ᤂᤠᤏᤡ᤺ᤳ 27 - LIFOTNT

ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹

¹ ᤕᤥᤛᤣᤑᤖᤧ ᤁᤢᤛ᤻ᤛᤠ ᤔᤏᤛ᤻ᤛᤣᤖᤧ ᤁᤢᤎᤠ᤺ᤰᤁᤥ ᤁᤧᤘᤠ᤹ᤒᤠ ᤔᤏᤛ᤻ᤛᤣᤖᤧ ᤁᤢᤒᤧᤶᤔᤧᤴᤇᤠ᤹. ᤔᤠᤁᤡᤖᤖᤧ ᤁᤢᤈᤰᤔᤧᤴᤇᤠ᤹. ᤃᤡᤗᤠᤍᤖᤧ ᤁᤢᤶᤔᤧᤴᤇᤠ᤹. ᤜᤣᤐᤣᤖᤖᤧ ᤁᤢᤛ᤻ᤛᤠ ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤔᤜᤗᤠ. ᤏᤥᤀᤠᤜ. ᤜᤥᤃ᤻ᤗᤠ. ᤔᤡᤸᤁᤠ ᤏᤢ ᤋᤡᤷᤛᤠ ᤔᤧᤘᤕᤧ॥

² ᤂᤧᤱᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤥ ᤔᤥᤛᤠ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ. ᤗᤠᤶᤗᤥᤒᤠᤜᤠ᤹ ᤏᤢ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤔᤧᤕᤧᤶᤛᤡᤱᤅᤠᤱ ᤐᤣᤗᤡ ᤑᤠᤰᤔᤠ ᤔᤧᤜᤣ᤺ᤰᤋᤧ.

³ “ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤠᤛᤡᤱ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤁᤥᤖᤜᤖᤧ ᤁᤢᤔᤏᤠ ᤛᤢᤶᤔᤥ ᤂᤢᤏᤧ᤹ ᤜᤥ᤺ᤵᤋᤧ. ᤁᤖ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤕᤥᤸᤗᤧ ᤔᤠᤛᤡᤱ॥ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤀᤠᤱ ᤔᤧᤜᤥ᤺ᤵᤋᤧ॥

⁴ ᤌᤣ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤜᤥ᤺ᤵᤋᤧ ᤑᤠ᤹ᤀᤠᤱ ᤀᤠᤏᤡᤃᤣ ᤐᤠ᤺ᤸᤗᤧ ᤁᤢᤔᤡᤱᤅᤧᤴ ᤔᤠᤒᤠᤒᤡ᥅ ᤀᤠᤏᤡᤃᤣ ᤐᤠ᤺ᤸᤗᤧ ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹ᤀᤥ ᤀᤠᤏᤡᤃᤧᤀᤠᤱ ᤕᤠᤱᤛᤠᤁᤢᤴᤎᤣ ᤀᤠᤒᤡᤖᤧᤶᤔᤧ᤹॥”

⁵ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤱᤜᤠᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤠᤀᤥ ᤋᤠᤖᤢ॥

⁶ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

⁷ “ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤖᤧ ᤁᤧᤘᤠ᤹ᤒᤠᤀᤣ ᤐᤠᤴ ᤔᤧᤒᤠ᤺ᤳᤋᤢ॥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤏᤢ ᤂᤢᤴᤇᤡ᤹ ᤂᤥᤔᤠ ᤗᤰ ᤐᤡᤖᤧᤛᤧ᤹॥ ᤂᤧᤏᤧ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤐᤠ᤺ᤸᤗᤧ ᤁᤢᤗᤰ ᤁᤧᤄᤥᤔᤠ ᤆᤥᤃᤧᤛᤧ᤹॥

⁸ “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹. ‘ᤁᤢᤓᤠ ᤔᤏᤠᤴ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤘᤠ᤹ᤀᤣ ᤔᤠᤛᤡᤱᤏᤧᤓᤃᤪ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤣ ᤗᤰ ᤁᤧᤄᤥᤔᤠ ᤆᤥᤃᤧ᤹॥

⁹ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤠᤱ ᤔᤧᤜᤥ᤺ᤵᤏᤧᤓᤃᤪ ᤂᤧᤸᤗᤧ ᤁᤢᤄᤥᤔᤠ ᤗᤰᤁᤡᤴ ᤂᤢᤏᤧ᤹ ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹ᤖᤧ ᤔᤧᤄᤥᤛᤢᤖ॥

¹⁰ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤀᤠᤱ ᤔᤧᤜᤥ᤺ᤵᤏᤧᤓᤃᤪ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤴᤓᤢ᤹ᤁᤢᤴᤛᤠ᤹ᤜᤠ᤹ᤖᤧ ᤔᤧᤄᤥᤛᤢᤖ॥

¹¹ ᤂᤧᤸᤗᤧ ᤁᤢᤶᤒᤠᤖᤧ ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹ ᤜᤠ᤺ᤳᤋᤠᤱ ᤔᤧᤜᤥ᤺ᤵᤏᤧᤓᤃᤪ ᤜᤡᤶᤛᤕᤱᤅᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤡ᤺ᤳᤋᤠᤱᤒᤠ ᤌᤠ᤺ᤰᤁᤥᤒᤠ ᤑᤢ᤹ᤏᤢᤛᤠ᤹ ᤁᤧᤎᤠᤵᤐᤠᤴ ᤂᤧᤴ ᤔᤏᤠ᤺ᤸᤗᤧ ᤁᤢᤗᤰ ᤁᤧᤄᤥᤒᤠ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤂᤢᤏᤧ᤹ ᤁᤢᤕᤢᤰᤁᤥ ᤋᤠ᤺ᤰᤋᤢᤖ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤴ ᤛᤠᤶᤕᤥᤛᤠᤰᤌᤡᤶ ᤐᤥᤱᤗᤖᤥ॥’”

ᤔᤥᤛᤠᤴ ᤔᤠᤛᤡᤱᤅᤠᤱ ᤕᤜᤥᤛᤢᤴ ᤗᤠᤶᤗᤥᤒᤠ ᤐᤥ᤺ᤰᤂᤧ

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤴ ᤀᤒᤠᤖᤡᤔ ᤁᤥ᤺ᤰᤔᤠᤀᤥ ᤌᤠ᤺ᤱ ᤌᤥ᤺ᤰᤛᤡᤱᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣᤴ ᤀᤥᤔᤧᤳᤋᤧ᤹॥

¹³ ᤂᤧᤏᤧ᤹ ᤂᤧᤴ ᤁᤧᤏᤡᤛᤢᤀᤠᤱ ᤀᤣᤃᤠᤱ ᤂᤧᤏᤧ᤹ᤀᤠᤱ ᤁᤧᤶᤓᤢ᤹ ᤜᤠᤖᤢᤏᤧᤴ ᤜᤧᤰᤁᤣ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤁᤧᤒᤣ᤺ᤰ॥

¹⁴ ᤌᤣᤀᤠᤱᤓᤧᤸᤗᤧ ᤈᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤆᤫᤠ᤺ᤳᤜᤠ᤹ᤀᤥ ᤛᤱᤈᤢᤶᤓᤥ᤺ᤴ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤧᤒᤥᤃᤧᤸᤗᤧ. ᤂᤧᤴᤇᤡ᤹ ᤏᤧᤵᤔᤠᤱᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠᤒᤠ ᤐᤠ᤺ᤴᤏᤡᤴ ᤀᤡᤱᤎᤠᤱ ᤔᤧᤶᤒᤡᤀᤣ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤁᤧᤓᤣ᤺ᤴᤍᤢᤛᤡᤀᤠᤱ ᤁᤧᤘᤕᤧᤛᤡ॥” (ᤁᤴ ᤜᤡᤴᤍᤥᤰᤁᤡᤴ ᤛᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤔᤣᤖᤡᤒᤠ-ᤁᤠᤍᤣᤛᤒᤠ ᤆᤫᤠ᤺ᤳᤜᤠ᤹ᤀᤥ ᤐᤥ᤺ᤰᤂᤧᤀᤠᤱ ᤘᤕᤧ॥)

¹⁵ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ.

¹⁶ “ᤁᤧᤖᤧᤰ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠ ᤁᤧᤃᤣ᤺ᤵᤐᤠ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤀᤣ ᤁᤴ ᤛᤱᤈᤢᤶᤓᤥᤀᤥ ᤗᤳᤇᤠ ᤔᤏᤠ ᤕᤢᤰᤋᤡᤱ ᤐᤥᤱᤗ.

¹⁷ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤗᤠ᤺ᤰᤁᤠᤳ ᤁᤧᤒᤣ᤺ᤰᤐᤠ ᤏᤢ ᤛᤡᤃᤠᤱ ᤁᤧᤍᤠᤒᤠ ᤐᤥᤱᤗ. ᤂᤧᤸᤗᤧ ᤂᤧᤱᤜᤠ᤹ ᤗᤠᤶᤗᤥᤛᤢ ᤋᤣ᤹ᤖᤢᤛᤡᤖ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤡᤃᤠᤱ ᤋᤠᤖᤢᤛᤡ᤹॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤈᤢᤶᤓᤥᤴ ᤂᤢᤴᤇᤡ᤹ ᤁᤵᤐᤠᤱ ᤁᤧᤜᤥᤵᤐᤠ ᤔᤧᤸᤗᤢᤰ ᤜᤧᤰᤋᤱᤒᤠ ᤔᤧᤶᤒᤥᤱᤏᤧᤴᤗ॥”

¹⁸ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤗᤠᤶᤗᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤠᤶᤛᤠᤶᤔᤡᤴ ᤁᤧᤘᤠ᤹ᤒᤠ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤋᤣ᤹ᤖᤧᤀᤠᤱ ᤂᤧᤏᤧ᤹ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤧᤏᤧ᤹ ᤁᤧᤜᤢᤰᤁᤡᤴ ᤏᤧᤛ᤻ᤛᤧ᤹.

¹⁹ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤴ ᤏᤢ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤕᤧᤵᤛᤧ᤹॥ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤀᤣ ᤂᤧᤏᤧ᤹ ᤁᤴ ᤗᤰᤐᤧᤴᤏᤡᤴ ᤂᤢᤏᤧ᤹ ᤜᤢᤰᤛᤢᤵᤋᤧ᤹॥

²⁰ ᤂᤧᤏᤧ᤹ ᤁᤧᤕᤢᤰᤁᤥᤗᤠᤶ ᤂᤢᤏᤧ᤹ ᤁᤢᤓᤠ ᤕᤢᤰ ᤐᤡᤖᤧ᤹. ᤜᤧᤰᤁᤣᤗ᤹ᤖᤡᤰ ᤂᤰᤐᤧᤳ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥ᤺ᤸᤗᤧ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ॥

²¹ ᤂᤢᤏᤧ᤹ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤀᤥ ᤋᤠᤖ ᤜᤧᤰᤁᤩᤠᤱ ᤀᤣᤗᤠᤈᤠᤖᤖᤧᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ‘ᤀᤢᤖᤡᤔ’ ᤏᤢ ‘ᤋᤢᤶᤔᤡᤔ’ ᤗᤠᤶ ᤏᤡ᤺ᤴᤎᤥ ᤐᤠᤴ ᤑᤢ᤹ᤖᤢᤀᤠᤱ ᤂᤧᤴ ᤋᤠ᤹ᤈᤧᤰᤋᤢᤖ॥ ᤕᤜᤥᤛᤢᤖᤧᤀᤣ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠᤔᤠ ᤏᤢ ᤐᤣ᤺ᤰᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖ॥”

²² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣ ᤔᤥᤛᤠ᤺ᤸᤗᤧ ᤆᤥᤃᤢ॥ ᤂᤢᤏᤧ᤹ ᤕᤜᤥᤛᤢᤴ ᤋᤣ᤹ᤖᤢᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤴ ᤏᤢ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤕᤧᤵᤛᤢ॥

²³ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤁᤢᤜᤢᤰᤁᤡᤴ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢ ᤜᤧᤰᤁᤩᤠᤱ ᤂᤧᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤂᤢᤏᤧ᤹ ᤜᤢᤰᤛᤢᤵᤋᤢᤖᤥ॥