ᤂᤠᤏᤡ᤺ᤳ 25 - LIFOTNT

ᤐᤥᤖ ᤔᤧᤵᤔᤏᤠᤒᤠᤍᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹

¹ ᤀᤡᤛᤪᤠᤀᤡᤗᤡᤜᤠ᤹ ᤛᤡᤳᤋᤡᤔᤒᤠ ᤏᤧᤏᤧᤒᤠᤍᤧᤴᤏᤥ ᤛᤠ᤺ᤱᤃᤠᤜᤡᤶ ᤔᤧᤗᤣ᤺ᤳᤋᤢᤀᤠᤱ ᤔᤧᤕᤢᤅᤧᤸᤗᤧ ᤁᤢᤓᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤔᤥᤀᤠᤒᤒᤠ ᤋᤧᤴᤇᤠᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤀᤠᤛᤢᤳᤌᤥ ᤔᤧᤈᤥ᤺ᤰᤛᤡᤱ॥

² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤡᤍᤢᤱᤈᤓᤠ ᤔᤧᤒᤡᤖᤢᤛᤡᤸᤗᤧ ᤁᤴ ᤕᤧᤶᤒᤡᤳᤇᤠᤜᤠ᤹ ᤔᤧᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤁᤴ ᤕᤧᤶᤒᤡᤳᤇᤠᤜᤠ᤹ᤖᤧ ᤛᤡᤍᤢᤱᤈᤓᤠᤀᤥᤒᤠ ᤛᤠ ᤏᤢ ᤋ᤺ᤰ ᤔᤧᤈᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ॥

³ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤐᤥᤖᤒᤠ ᤒᤠᤗ ᤔᤠᤱᤅᤥ ᤔᤧᤄᤧ᤺ᤶᤛᤡᤱ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤠ᤹ᤖᤡᤰ ᤜᤠᤱᤃᤧᤴ ᤛᤡᤰᤆᤠ ᤗᤥᤖᤧ॥

⁴ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤛᤧᤖᤧᤛᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤠᤶᤗᤠ᤺ᤱᤔᤥ ᤏᤠᤶᤓᤧᤳᤋᤧᤛᤧ᤹. ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤔᤡ ᤜᤧᤰᤋᤱᤒᤠ ᤁᤛᤡᤰ ᤐᤥ᤺ᤰᤔᤠᤴ ᤀᤡᤛᤪᤠᤀᤡᤗᤡᤜᤠ᤹ᤗᤠᤶᤒᤠ ᤔᤠ᤺ᤱᤄᤠ ᤐᤥᤱᤗ॥”

⁵ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰ ᤐᤥᤖᤒᤠ ᤒᤠᤗ ᤔᤠᤱᤅᤥ ᤁᤧᤄᤧ᤺ᤶᤔᤠᤛᤡ॥”

⁶ ᤀᤡᤛᤪᤠᤀᤡᤗᤡᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤔᤧᤜᤠᤒᤧᤖ ᤔᤧᤕᤢᤅᤧ॥ ᤂᤧᤴ ᤕᤧᤶᤔᤥ ᤗᤳᤇᤠ ᤀᤡᤛᤪᤠᤀᤡᤗᤡ ᤌᤡᤰᤗᤧ ᤔᤥᤛᤠᤴ ᤏᤢ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡᤀᤣ ᤂᤢᤏᤧ᤹ ᤁᤢᤜᤡᤶᤛᤕᤱᤅᤥ ᤔᤡᤎᤩᤠᤏᤡ ᤔᤧᤴᤇᤢᤔᤠᤎᤡᤰ ᤋᤠᤖᤢ॥

⁷ ᤀᤠᤸᤗ ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ. ᤜᤠᤖᤢᤏ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤶᤔᤧᤴᤇᤠ᤹ ᤐᤡᤏᤜᤠᤛᤖᤧ ᤂᤧᤴ ᤏᤡᤛᤢ. ᤂᤧᤒᤩᤠᤱ ᤂᤧᤸᤗᤧ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤔᤢᤳᤌᤪᤡᤰ ᤐᤥᤃᤧ ᤜᤧᤰᤁᤩᤠᤱ ᤁᤢᤜᤢᤰᤁᤥ ᤗᤠ᤺ᤰᤌᤡᤰ ᤕᤠᤱᤛᤡᤱᤅᤠᤱ

⁸ ᤂᤧᤴ ᤀᤡᤛᤪᤠᤀᤡᤗᤡ᤺ᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤛᤶᤎᤠᤱ ᤁᤧᤒᤵᤐᤠ ᤂᤧᤴ ᤀᤡᤛᤪᤠᤀᤡᤗᤡᤴ ᤏᤧᤵᤔᤠᤱ ᤔᤧᤴᤇᤢᤔᤠ᤺ᤸᤗᤧ ᤁᤢᤛᤠᤵᤐᤥ᤺ᤰᤁᤥᤗᤠᤶ ᤑᤩᤠᤰ ᤗᤛ᤻ᤛᤢᤖ ᤌᤢᤒᤢᤛᤡ॥ ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤡᤜᤠ᤹ᤀᤥᤗᤠᤶ ᤂᤧᤴ ᤔᤡᤱᤍᤣᤴ ᤔᤠ᤺ᤱᤄᤠ ᤐᤥ᤺ᤰᤂᤧ॥

⁹ ᤁᤖ ᤂᤧᤴ ᤔᤡᤱᤍᤣᤸᤗᤧ ᥈᥊.᥆᥆᥆ ᤔᤏᤠᤜᤠ᤹ ᤛᤧᤖᤢᤛᤡ॥

¹⁰ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

¹¹ “ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠ᤺ᤱᤛᤥᤖᤧ ᤗᤠᤃᤡ ᤀᤠᤱᤃᤠ᤹ ᤌᤢᤰᤁᤠᤒᤠ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ. ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤖᤧ ᤁᤢᤶᤔᤧᤴᤇᤠ᤹ ᤐᤡᤏᤜᤠᤛᤧᤴ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤌᤢᤰᤋᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤂᤧᤳᤋᤢᤍᤣᤛᤢ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤂᤧᤱᤜᤠ᤹ ᤀᤠᤱᤃᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤱᤛᤡᤱᤅᤡᤴ॥

¹² ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴᤏᤢ ᤋᤱᤔᤠ ᤔᤠᤱᤜᤢᤵ ᤆᤥᤃᤢᤱ᤹ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤧ᤹॥

¹³ ᤂᤧᤴ ᤏᤢ ᤂᤧᤸᤗᤧ ᤁᤢᤎᤠ᤺ᤰᤜᤠ᤹ᤀᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤕᤢᤰᤋᤡᤱ ᤆᤥᤃᤢᤱᤛᤡᤱ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤃᤡ ᤌᤢᤰᤋᤢᤀᤠᤱ ᤘᤕᤧ॥ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ ᤐᤡᤖᤢᤛᤡ॥”

¹⁴ ᤂᤧᤴ ᤔᤡᤎᤩᤠᤏᤒᤠ ᤔᤧᤴᤇᤢᤔᤠᤴᤏᤢ ᤔᤧᤛᤧᤖᤢᤒᤠ ᤀᤡᤛᤪᤠᤀᤡᤗᤡ᤺ᤸᤗᤧ ᤁᤢᤔᤡᤱ ᤈᤡᤔᤪᤡ ᤘᤕᤧ. ᤂᤧᤴ ᤛᤡᤔᤡᤕᤥᤏᤖᤧ ᤁᤢᤎᤠ᤺ᤰᤁᤥᤒᤠ ᤗᤳᤇᤠ ᤜᤡᤶᤛᤕᤱᤒᤠ ᤗᤠᤶᤗᤥᤒᤠ ᤛᤠᤗᤢᤖᤧ ᤁᤢᤛ᤻ᤛᤠ ᤘᤕᤧ॥

¹⁵ ᤂᤧᤴ ᤔᤧᤛᤧᤖᤢᤔᤠ ᤔᤡᤎᤩᤠᤏᤒᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤡᤱ ᤆᤠᤀᤣ ᤁᤥᤈᤒᤡ ᤘᤕᤧ. ᤂᤧᤴ ᤔᤡᤎᤩᤠᤏᤡ ᤛ᤺ᤱᤒᤠ ᤗᤠᤶᤗᤥᤒᤠ ᤛᤢᤖᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥

¹⁶ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

¹⁷ “ᤂᤧᤏᤧ᤹ ᤔᤡᤎᤩᤠᤏᤒᤠᤜᤠ᤹ ᤋᤢᤰᤂᤣ ᤆᤠ᤺ᤳᤋᤧᤛᤧᤀᤠᤱ ᤛᤧᤖᤧᤛᤧ᤹.

¹⁸ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤀᤠᤱ ᤂᤡᤏᤡ᤹ ᤋᤢᤰᤂᤣ ᤁᤧᤶᤈᤠ᤺ᤳᤋᤡ. ᤜᤧᤰᤁᤩᤠᤱ ᤐᤥᤖᤀᤥ ᤀᤡᤱᤗᤧᤰ ᤁᤧᤶᤔᤧᤳᤋᤡᤀᤠᤱ ᤔᤠᤱᤜᤠ᤹ ᤛᤧᤘᤠ ᤔᤧᤵᤔᤠ ᤁᤧᤶᤒᤠᤱᤄᤡ. ᤂᤧᤴ ᤕᤧᤶᤔᤥ ᤔᤡᤎᤩᤠᤏᤡ ᤗᤠᤶᤗᤥᤒᤠᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤁᤥᤈᤒᤡᤴ ᤐᤥᤖᤒᤠ ᤔᤡᤱᤍᤣ᤹ ᤕᤧᤴᤏᤥ ᤔᤧᤛᤧᤖᤢᤀᤠᤱ ᤘᤕᤧᤖᤥ॥”