ᤂᤠᤏᤡ᤺ᤳ 24 - LIFOTNT

¹ ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤔᤠᤛᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤘᤠ᤹ ᤁᤧᤗ᤹ᤒᤠ ᤒᤠᤗᤠᤔᤧᤸᤗᤧ ᤏᤡᤱᤘᤠ᤹ ᤂᤥᤛᤢ. ᤂᤧᤒᤩᤠᤱ ᤂᤢᤏᤧ᤹ ᤘᤣ᤹ ᤕᤧᤶᤔᤥ ᤜᤧᤰᤁᤣ ᤂᤠᤗᤥ᤺ᤴᤇᤧ ᤔᤧᤒᤣᤏᤧᤴ. ᤁᤖ ᤂᤢᤏᤧ᤹ ᤁᤢᤏᤠᤖᤠᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤜᤡᤛᤢ॥

² ᤀᤠᤸᤗ ᤒᤠᤗᤠᤔᤧᤸᤗᤧ ᤁᤢᤔᤡᤰᤁᤧᤴ ᤁᤠᤖᤡᤰ ᤔᤧᤳᤋᤢᤀᤠᤱ ᤀᤥᤔᤢᤕᤧ. ᤜᤧᤰᤁᤣ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤌᤠ᤺ᤰᤜᤠ᤹ᤏᤢ ᤔᤧᤕᤢᤅᤧᤒᤠ ᤏᤡᤛᤢᤛᤡ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤢᤏᤧ᤹ᤀᤥ ᤕᤧ॥

³ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤵᤔᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤖᤥ— “ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤔᤧᤸᤗᤧ ᤐᤠ᤺ᤳᤋᤢᤖᤥ. ᤂᤧᤴ ᤔᤏᤠ᤺ᤸᤗᤧ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤢᤖᤥ ᤁᤱᤃ ᤂᤢᤏᤧ᤹ ᤁᤢᤀᤡᤱᤄᤱᤗᤥ॥

⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤁᤧᤄᤧᤶᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. ᤂᤢᤏᤧ᤹ ᤔᤢᤰᤛᤠᤶᤍᤠᤱᤒᤠᤴ ᤗᤠᤶ ᤛᤢᤑᤥ ᤏᤡᤛᤢᤖᤥ. ᤂᤢᤏᤧ᤹ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤰᤁᤡᤴ ᤜᤱ ᤗ᤹ᤖᤥ॥

⁵ “ᤕᤠᤁᤢᤒᤀᤣ. ᤂᤧᤏᤧ᤹ ᤁᤧᤛᤠ᤺ᤱᤃᤠᤜᤡᤶᤜᤠ᤹ ᤛᤠ᤹ᤖᤡᤰ ᤏᤢᤒᤠ ᤆᤥᤰᤗᤥ. ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤁᤧᤕᤢᤱᤔᤠᤍᤣᤴᤜᤠ᤹ ᤆᤠ᤹ᤖᤡᤰ ᤏᤢᤒᤠ ᤆᤥᤰᤗᤥ᥄

⁶ “ᤂᤧᤱᤜᤠ᤹ ᤏᤧᤏᤧᤒᤠᤍᤧᤴ ᤜᤧᤰᤁᤣ ᤑᤧᤓᤧᤒᤠ ᤔᤧᤈᤥᤰᤗᤥ. ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤑᤢᤱᤀᤡᤰ ᤜᤧᤰᤁᤣ. ᤕᤜᤘᤣ ᤍᤠᤱᤒᤧᤸᤗᤧ ᤗᤣ᤺ᤳᤋᤢᤒᤠ ᤋᤥᤗᤡᤛᤡᤱᤔᤠ ᤜᤧᤰᤁᤣ. ᤆᤫᤠ᤺ᤳᤋᤡᤸᤗᤧ ᤁᤢᤕᤠᤀᤥᤒᤠ ᤛᤠᤶᤔᤠᤱᤛᤡᤱᤜᤠ᤹ ᤜᤧᤰᤁᤣ ᤋᤠᤒᤧᤀᤠᤱ ᤏᤧᤖᤥ॥

⁷ ᤂᤧᤸᤗᤧ ᤁᤢᤈᤫᤠ᤺ᤳ ᤕᤠᤱᤔᤠ ᤂᤵᤐᤩᤠᤜᤠ᤹ᤀᤥᤗᤠᤶ ᤆᤫᤠ᤺ᤳᤋᤡᤴ ᤁᤢᤗᤧ᤺ᤶ ᤋᤡᤶᤔᤠᤱ ᤘᤧᤳᤗᤥ. ᤂᤧᤸᤗᤧ ᤁᤢᤗᤡ᤺ᤶᤒᤧᤸᤗᤧ ᤐᤕᤥ ᤕᤥᤖᤢᤖ ᤆᤫᤠ᤺ᤳ ᤂᤥᤛᤢᤖᤥ॥ “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤅᤡᤴ ᤀᤃᤠᤃᤧᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤠᤱᤈᤢᤶᤔᤡᤴ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤐᤥᤱᤗᤥ॥

⁸ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢ ᤑᤧᤳᤋᤢᤛᤡᤖᤥ॥ ᤂᤢᤏᤧ᤹ᤃ ᤋᤠᤶᤓᤢᤱᤅᤥᤒᤠ ᤛᤧᤃᤶᤒᤠᤴ ᤜᤧᤰᤁᤣ ᤂᤢᤴᤇᤡ᤹ ᤗᤠᤃᤡ ᤋᤧᤴᤎᤱ ᤆᤥᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤛᤢᤘᤠᤱᤜᤠ᤹ ᤔᤧᤗᤖᤢ ᤔᤧᤍᤣᤛᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤳᤜᤠ᤹ ᤑᤕ᤺ᤵᤑᤕ᤺ᤵ ᤔᤧᤕ᤺ᤵᤛᤢᤖᤥ. ᤂᤢᤴᤇᤡ᤹ ᤋᤥ᤺ᤱᤜᤠ᤹ᤖᤧ ᤂᤧᤱᤜᤠ᤹ ᤋᤡ᤺ᤰᤂᤢ ᤛᤧᤖᤢᤛᤡᤖ॥

⁹ ᤂᤧᤱᤜᤠ᤹ ᤂᤡᤖᤡᤱᤒᤠᤴ ᤜᤧᤰᤁᤣ ᤁᤧᤱᤃᤪᤥᤒᤠ ᤔᤧᤈᤠᤀᤠᤱ ᤔᤧᤏᤧᤖᤥ. ᤂᤡᤖᤡᤱᤔᤠᤴ ᤜᤧᤰᤁᤣ ᤂᤧᤱᤜᤠ᤹ ᤜᤠ᤺ᤳᤗᤧ ᤑᤥᤱᤔᤠ ᤛᤢᤰᤋᤢᤛᤡᤒᤣ᥅ “ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤁᤧᤒᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠ ᤔᤧᤒᤥᤱᤗᤖᤥ॥ ᤂᤧᤱᤜᤠ᤹ ᤔᤠᤱᤃᤧᤍᤧᤒᤠᤜᤠ᤹ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤖᤖᤥ॥”

¹⁰ ᤂᤧᤒᤩᤠᤱ ᤒᤠᤗᤠᤁᤧᤴ ᤒᤠᤗᤠᤔᤧᤴᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤛᤠ᤺ᤵᤛᤢᤀᤠᤱ ᤒᤠᤗᤠᤔᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤏᤡᤱᤔᤡᤜᤠ᤹ ᤛᤠᤱᤃᤪᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ ᤀᤢ᤺ᤳᤏᤧᤀᤠᤱ ᤘᤕᤧ. ᤁᤖ ᤀᤥᤔᤧᤳᤋᤧ. ᤂᤧᤏᤧ᤹ ᤂᤧᤱᤜᤠ᤹ ᤛᤢᤶᤍᤢ᤺ᤰ ᤔᤢ᤹ᤀᤡᤛᤠᤶ ᤁᤧᤒᤡᤖᤢᤛᤡ॥

¹¹ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤧᤏᤧ᤹ ᤀᤠᤵᤑᤣᤰ ᤁᤧᤘᤠ᤹ᤔᤠᤍᤧᤴᤏᤥ ᤏᤢ᤺ᤰᤂᤧ ᤐᤣᤃᤧ᤹॥ ᤀᤠᤱᤃᤠ᤹ ᤂᤧᤏᤧ᤹ ᤕᤶᤒᤠ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤧ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤂᤥᤔᤠ ᤗᤠᤶ ᤁᤧᤛᤠᤰᤋᤧ॥”

¹² ᤒᤠᤗᤠᤔᤧᤸᤗᤧ ᤒᤠᤗᤠᤁᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ᤀᤥ ᤁᤧᤒᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤅᤠᤱ ᤔᤧᤘᤕᤧᤏᤧᤶᤒᤡ᥅

¹³ ‘ᤒᤠᤗᤠᤁᤧᤸᤗᤧ ᤁᤢᤜᤠᤱᤜᤡᤶᤔᤥ ᤁᤳᤋᤢᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤏᤢ ᤕᤢᤵᤐᤠᤜᤠ᤹ ᤀᤠᤱᤃᤠ᤹ ᤐᤡᤀᤠᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤠ᤺ᤰᤔᤠᤀᤠᤱ ᤀᤠᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤏᤢᤒᤠ ᤀᤡᤃᤪ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤔᤧᤛᤢᤰᤁᤠᤴ॥ ᤕᤜᤘᤣ ᤍᤠᤱᤒᤧᤸᤗᤧ ᤆᤩᤠ ᤔᤧᤳᤋᤠ. ᤀᤠᤱᤃᤠ᤹ ᤂᤧᤴᤏᤣ ᤐᤠ᤺ᤳᤋᤢᤱ᤹॥’

¹⁴ ᤀᤠᤸᤗ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠᤜᤠ᤹ᤀᤥ ᤐᤣ᤺ᤰᤁᤠ. ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤔᤏᤠᤜᤠ᤹ ᤋᤠ᤺ᤴᤍᤡ ᤌᤧᤔᤠ ᤔᤧᤔᤧᤳᤋᤢᤛᤡ᤹. ᤀᤠᤱᤃᤠ᤹ ᤂᤧᤴ ᤔᤧᤳᤏᤧᤖᤥ॥”

ᤒᤠᤗᤠᤔᤖᤧ ᤗᤡᤛᤡᤃᤣᤰᤐᤠ ᤁᤢᤀᤡᤱᤄᤱ

¹⁵ ᤂᤧᤒᤩᤠᤱ ᤂᤢᤏᤧ᤹ ᤁᤢᤒᤠ᤺ᤵᤔᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖᤥ— “ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤔᤧᤸᤗᤧ ᤐᤠ᤺ᤳᤋᤢᤖᤥ. ᤂᤧᤴ ᤔᤏᤠ᤺ᤸᤗᤧ ᤁᤢᤔᤡᤰᤁᤧᤴ ᤜᤱ ᤗ᤹ᤖᤥ ᤁᤱᤃ ᤂᤢᤏᤧ᤹ ᤁᤢᤀᤡᤱᤄᤱᤗᤥ॥

¹⁶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤁᤧᤄᤧᤶᤒᤧᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤂᤥᤛᤢᤖᤥ. ᤂᤢᤏᤧ᤹ ᤔᤢᤰᤛᤠᤶᤍᤠᤱᤒᤠᤗᤠᤶ ᤛᤢᤑᤥ ᤏᤡᤛᤢᤖᤥ ᤂᤢᤏᤧ᤹ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤰᤁᤡᤴ ᤜᤱ ᤗ᤹ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥

¹⁷ “ᤀᤠᤱᤃᤠ᤹ ᤂᤢᤏᤧ᤹ ᤏᤡᤛᤢᤱ᤹. ᤁᤖ ᤀᤠᤸᤗᤥᤃ ᤔᤣ᤺ᤴᤗᤥ॥ ᤀᤠᤱᤃᤠ᤹ ᤂᤢᤏᤧ᤹ ᤀᤥᤔᤧᤳᤋᤢᤱ᤹. ᤁᤖ ᤏᤡ᤺ᤳᤋᤠᤱ ᤗᤠᤶᤒᤠᤃ ᤔᤣ᤺ᤴᤗᤥ॥ ᤕᤠᤁᤢᤒᤗᤠᤶ ᤗᤳᤇᤠ ᤂᤣ᤺ᤶᤛᤡᤰᤐᤠ ᤗᤡᤱᤗᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤗᤠᤶ ᤜᤠᤱᤋᤰᤁᤠᤳ ᤌᤡᤰ ᤐᤥ᤺ᤰᤗᤥ॥ ᤂᤢᤏᤧ᤹ ᤔᤥᤀᤠᤒᤖᤧ ᤁᤢᤗᤠᤶᤗᤥᤒᤠᤜᤠ᤹ ᤕ᤺ᤵᤛᤢᤛᤡᤖᤥ. ᤜᤧᤰᤁᤩᤠᤱ ᤛᤣᤌᤖᤧ ᤁᤢᤔᤢ᤹ᤀᤡᤍᤠᤱᤛᤠᤴ ᤔᤧᤰᤂᤢᤖᤥ॥

¹⁸ ᤀᤣᤍᤥᤔᤧᤴ ᤜᤠᤖᤡ ᤋᤠᤖᤥ. ᤜᤧᤰᤁᤩᤠᤱ ᤁᤢᤏᤡᤱᤔᤡ ᤛᤣᤀᤡᤖᤧᤴᤏᤠᤱ ᤜᤠᤖᤡ ᤋᤠᤖᤥ. ᤁᤖ ᤀᤡᤛᤪᤠᤀᤡᤗᤧᤱᤃ ᤁᤧᤎᤢᤶᤒᤠ ᤐᤥᤱᤗᤥ॥

¹⁹ ᤕᤠᤁᤢᤒᤗᤠᤶ ᤗᤳᤇᤠ ᤕᤢᤰᤛᤠᤒᤠ ᤌᤡᤰ ᤗ᤺ᤴᤗᤥ. ᤂᤶᤓᤩᤠᤱ ᤕᤧᤰᤕᤰᤁᤥ ᤁᤧᤜᤡᤱᤒᤠᤜᤠ᤹ ᤔᤧᤰᤂᤢᤛᤡᤖᤥ॥”

ᤒᤠᤗᤠᤔᤖᤧ ᤅᤠᤛᤡᤃᤣᤰᤐᤠ ᤁᤢᤀᤡᤱᤄᤱ

²⁰ ᤂᤧᤒᤩᤠᤱ ᤂᤢᤏᤧ᤹ ᤀᤔᤠᤗᤧᤁᤡᤜᤠ᤹ ᤀᤥᤔᤧᤳᤋᤢᤛᤡᤀᤠᤱ ᤁᤢᤒᤠ᤺ᤵᤔᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤖᤥ— “ᤁᤧᤖᤧᤰ ᤛᤢᤘᤠᤱᤜᤠ᤹ᤀᤥ ᤀᤔᤠᤗᤧᤁᤡᤴ ᤛᤠ᤹ᤖᤡᤰ ᤔᤢᤰᤁᤧᤃᤢᤒᤠ ᤘᤕᤧᤖᤥ. ᤁᤖ ᤔᤧᤰᤔᤠ ᤛᤡᤔᤧᤴᤏᤣ ᤂᤧᤸᤗᤧ ᤁᤢᤏᤢᤵᤔᤠ ᤐᤥᤱᤗᤥ॥”

ᤒᤠᤗᤠᤔᤖᤧ ᤋᤢᤰᤛᤡᤃᤣᤰᤐᤠ ᤁᤢᤀᤡᤱᤄᤱ

²¹ ᤜᤧᤰᤁᤩᤠᤱ ᤁᤣᤏᤡᤜᤠ᤹ ᤀᤥᤔᤧᤳᤋᤢᤛᤡᤀᤠᤱ ᤁᤢᤒᤠ᤺ᤵᤔᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤖᤥ— “ᤂᤡᤏᤡ᤹ ᤕᤢᤱᤔᤠᤍᤧᤴᤏᤡᤴ ᤋᤠᤵᤌᤣᤰ ᤕᤠᤶᤎᤣᤰᤐᤠ ᤆᤥᤰᤗᤥ. ᤂᤡᤏᤡ᤹ ᤂᤧᤴ ᤕᤢᤰᤏᤠᤴ ᤕᤠᤰᤐᤣ᤹ᤀᤥᤒᤠ ᤐᤢᤜᤠᤵ ᤜᤧᤰᤋᤱᤒᤠ ᤆᤥᤰᤗᤥ॥

²² ᤁᤖ ᤀᤛ᤻ᤛᤢᤖᤖᤧ ᤂᤡᤏᤡ᤹ ᤁᤧᤍᤧᤶᤛᤡ ᤁᤧᤍᤣ᤹ᤖᤡᤖᤥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤁᤣᤏᤡᤜᤠ᤹ ᤂᤠᤵᤐᤢᤌᤩ᤺ᤱ ᤁᤧᤒᤥᤂᤡᤖᤥ॥”

ᤒᤠᤗᤠᤔᤖᤧ ᤏᤢᤛᤡᤃᤣᤰᤐᤠ ᤁᤢᤀᤡᤱᤄᤱ

²³ ᤂᤧᤒᤩᤠᤱ ᤂᤢᤏᤧ᤹ ᤕᤠᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤖᤥ— “ᤆᤡ᤺ᤳᤋᤧᤛᤩᤧᤖᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤆᤥᤃᤢᤸᤗᤧ ᤜᤠᤳ ᤜᤡᤱᤔᤠ ᤛᤢᤰᤐᤣ᥅

²⁴ ᤁᤡᤳᤋᤡᤔᤖᤧ ᤁᤢᤕᤠᤀᤥᤏᤢ ᤘᤠᤗᤠᤎᤠᤜᤠ᤹ ᤔᤧᤓᤧᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤛ᤻ᤛᤢᤖ ᤏᤢ ᤀᤣᤒᤣᤖᤧᤴ ᤔᤧᤏᤠ᤺ᤴᤍᤢᤛᤡᤖᤥ ᤁᤖ ᤂᤧᤱᤜᤠ᤹ ᤀᤠᤵᤑᤣᤰᤁᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤔᤧᤔᤧᤰᤗᤥ॥”

²⁵ ᤂᤧᤴ ᤀᤣᤃᤠᤱ ᤒᤠᤗᤠᤔᤧᤴ ᤐᤥᤃᤧᤀᤠᤱ ᤁᤢᤜᤡᤶᤔᤥ ᤏᤢ᤺ᤰᤂᤧ. ᤜᤧᤰᤁᤩᤠᤱ ᤒᤠᤗᤠᤁᤧᤴᤏᤠᤱ ᤁᤢᤗᤠᤶᤔᤥ ᤌᤠᤛᤡᤱᤗᤥ॥