ᤂᤠᤏᤡ᤺ᤳ 23 - LIFOTNTᤒᤠᤗᤠᤔᤖᤧ ᤌᤡᤰᤛᤡᤃᤣᤰᤐᤠ ᤁᤢᤀᤡᤱᤄᤱ 1 ᤒᤠᤗᤠᤔᤧᤸᤗᤧ ᤒᤠᤗᤠᤁᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤛᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤠᤱ ᤐᤡᤖᤠᤱᤅᤧ᤹. ᤜᤧᤰᤁᤩᤠᤱ ᤏᤢᤛᤡ ᤛᤧᤃᤶᤒᤠ ᤏᤢ ᤏᤢᤛᤡ ᤌᤢ᤺ᤶᤒᤠᤜᤠ᤹ ᤕᤠᤖᤡᤵ ᤆᤥᤃᤠᤱ ᤐᤡᤖᤠᤱᤅᤧ᤹॥” 2 ᤒᤠᤗᤠᤔᤧᤸᤗᤧ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤒᤠᤗᤠᤁᤖᤧ ᤆᤥᤃᤢ॥ ᤒᤠᤗᤠᤁ ᤏᤢ ᤒᤠᤗᤠᤔᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤰᤔᤠ ᤗᤳᤇᤠ ᤗᤳᤇᤠ ᤛᤧᤃᤶᤒᤠ ᤏᤢ ᤗᤳᤇᤠ ᤗᤳᤇᤠ ᤔᤧᤸᤗᤢᤰ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤛᤢ॥ 3 ᤒᤠᤗᤠᤔᤧᤸᤗᤧ ᤒᤠᤗᤠᤁᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤢᤶᤛᤧ ᤐᤣ᤺ᤰᤁᤠᤸᤗᤧ ᤂᤧᤏᤧ᤹ᤃ ᤁᤧᤛᤡᤍᤢᤱᤈᤓᤠ᤺ᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤅᤧ᤹॥ ᤀᤠᤸᤗ ᤀᤠᤱᤃᤠ᤹ᤃ ᤏᤠᤜᤠᤱ ᤗᤧᤵᤔᤠᤱ ᤐᤣ᤺ᤰᤁᤠ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤀᤠᤍᤢᤶᤛᤧ ᤕᤢᤒᤡᤗᤠ॥ ᤂᤢᤏᤧ᤹ ᤀᤠᤱᤃᤠ᤹ ᤆᤩᤠᤈᤩᤠ ᤀᤥ᤺ᤴᤎᤠᤰᤁᤠ. ᤂᤧᤴ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧ॥” ᤂᤧᤰᤁᤩᤠᤱ ᤂᤢᤏᤧ᤹ ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠ ᤗᤧᤵᤔᤠᤱ ᤐᤣ॥ 4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠᤗᤠᤔᤧᤴ ᤋᤢᤔᤢ॥ ᤜᤧᤰᤁᤩᤠᤱ ᤒᤠᤗᤠᤔᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤏᤢᤛᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢᤱᤅᤠᤱ ᤂᤧᤵᤔᤥ ᤀᤠᤱᤃᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤰᤔᤠ ᤛᤧᤃᤶᤒᤠ ᤌᤡᤰᤌᤡᤰ ᤏᤢ ᤌᤢ᤺ᤶᤒᤠ ᤌᤡᤰᤌᤡᤰ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤛᤡᤱᤅᤠᤱ ᤔᤧᤏᤧᤖᤥ॥” 5 ᤕᤜᤘᤣ ᤍᤠᤱᤒᤧᤸᤗᤧ ᤒᤠᤗᤠᤔᤧᤸᤗᤧ ᤁᤢᤶᤒᤪᤠᤀᤥ ᤀᤡᤱᤄᤱ ᤌᤡᤰ ᤁᤣ᤺ᤳᤋᤢ ᤐᤡᤖᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤱᤔᤠ ᤐᤣ᤺ᤰᤔᤠᤀᤠᤱ ᤒᤠᤗᤠᤁᤧᤴ ᤔᤧᤵᤔᤠ ᤁᤧᤒᤥᤱᤒᤠ ᤀᤡᤱᤄᤱᤅᤡᤴ ᤜᤠᤒᤠ ᤁᤴᤗᤥ॥” 6 ᤜᤧᤰᤁᤩᤠᤱ ᤒᤠᤗᤠᤶᤔᤧᤴ ᤒᤠᤗᤠᤁᤀᤥ ᤏᤢ᤺ᤰᤂᤧᤀᤠᤱ ᤐᤣ॥ ᤁᤴ ᤕᤧᤶᤔᤥ ᤒᤠᤗᤠᤁᤧᤴ ᤔᤥᤀᤠᤒᤒᤠ ᤁᤧᤖᤧᤰ ᤋᤢᤶ ᤔᤏᤠᤜᤠ᤹ᤏᤢ ᤛᤥᤖᤡᤰ ᤂᤢᤏᤧ᤹ ᤁᤢᤛᤡᤍᤢᤱᤈᤓᤠ᤺ᤴᤏᤢ ᤀᤠᤸᤗᤛᤠᤱ ᤕᤧᤒᤧᤃᤖᤧ॥ 7 ᤂᤧᤒᤩᤠᤱ ᤒᤠᤗᤠᤔᤧᤸᤗᤧ ᤀᤠᤖᤠᤔᤗᤠᤶ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤁᤥ᤺ᤰᤔᤠᤜᤠ᤹ᤀᤥᤏᤢ ᤑᤧᤳᤋᤠᤱ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤶᤓᤗ᤹ᤖᤡᤰ ᤁᤢᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤖᤥ— “‘ᤋᤩᤧᤶᤔᤧ᤹ᤀᤥ. ᤀᤠᤗᤠᤃᤡ ᤕᤠᤁᤢᤒᤧᤴ ᤔᤠᤱᤍᤣᤛᤧᤶᤔᤧ᤹ᤀᤥ ᤋᤩᤧᤶᤔᤧ᤹ᤀᤥ.’ ᤔᤥᤀᤠᤒᤒᤠ ᤜᤠᤱ ᤒᤠᤗᤠᤁᤖᤧ ᤀᤰᤂᤣ ᤔᤧᤳᤋᤠᤱᤗᤥ ‘ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤕᤱᤔᤠ ᤛᤧᤖᤧᤛᤧ᤹ᤀᤥ॥’ 8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤛᤠᤱᤃᤪᤠ ᤔᤧᤔᤧᤳᤋᤢᤴᤇᤡᤴᤒᤠᤜᤠ᤹ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤔᤠᤱᤍᤣᤛᤢᤱᤛᤡᤱᤒᤣ᥅ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤆᤧᤰᤕᤠ ᤀᤡᤱᤍᤥ ᤔᤧᤔᤧᤳᤋᤢᤴᤇᤡᤴᤒᤠᤜᤠ᤹ ᤀᤠᤱᤃᤠ᤹ ᤀᤠᤰᤂᤣᤀᤠᤱ ᤀᤠᤵᤋᤡᤰ ᤁᤢ᤺ᤳᤋᤢᤱᤛᤡᤱᤒᤣ᥅ 9 ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤜᤠ᤹ᤖᤧ ᤁᤢᤈᤱᤅᤥᤏᤢ ᤀᤠᤱᤃᤠ᤹ ᤂᤧᤱᤜᤠ᤹ ᤏᤡᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤁᤥ᤺ᤰᤔᤠ ᤌᤧᤃᤢᤜᤠ᤹ᤀᤥᤏᤢ ᤀᤠᤱᤃᤠ᤹ ᤂᤧᤱᤜᤠ᤹ ᤀᤥᤔᤧᤳᤋᤢᤱᤛᤡᤱᤗᤥ॥ ᤀᤥᤔᤧᤳᤋᤧᤶᤔᤧ᤹. ᤁᤱᤃ ᤀᤣ᤺ᤰ ᤁᤧᤕᤢᤱᤒᤠ ᤛᤢᤘᤠᤱᤗᤥ. ᤂᤧᤱᤜᤠ᤹ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤔᤧᤛᤧᤴᤇᤡᤱᤗᤥ॥ 10 ᤕᤧ᤺ᤱᤄᤠ ᤕᤠᤖᤡᤰ ᤕᤖᤡᤰ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤜᤠ᤺ᤳᤗᤧ ᤏᤡ᤺ᤵᤔᤠ ᤛᤢᤰᤋᤢᤛᤡᤒᤣ᥅ ᤀᤡᤃᤪ ᤀᤡᤛᤪᤠᤀᤡᤗᤒᤠ ᤁᤢᤗᤰ ᤗᤡᤛᤡᤀᤥ ᤁᤢᤗᤰ ᤌᤡᤰᤜᤠ᤹ᤀᤠᤱ ᤜᤠ᤺ᤳᤗᤧ ᤏᤡ᤺ᤵᤔᤠ ᤛᤢᤰᤋᤢᤛᤡᤒᤣ᥅ ᤀᤠᤛᤡᤔᤧᤴ ᤛᤠᤶᤕᤥᤒᤠ ᤜᤧᤰᤋᤱᤒᤠ ᤐᤥᤱᤗᤖᤥ. ᤜᤧᤰᤁᤩᤠᤱ ᤀᤠᤏᤢᤵᤔᤧᤴ ᤂᤧᤱᤜᤠ᤹ᤖᤧᤴ ᤜᤧᤰᤋᤱᤒᤠ ᤐᤥᤱᤗᤖᤥ॥” 11 ᤂᤧᤒᤩᤠᤱ ᤒᤠᤗᤠᤁᤧᤸᤗᤧ ᤒᤠᤗᤠᤔᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤌᤧᤔᤠ ᤁᤧᤔᤧᤳᤋᤠᤒᤠᤒᤣ᥅ ᤀᤠᤏᤡᤱᤔᤡᤜᤠ᤹ ᤛᤠᤱᤃᤪᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤑᤧᤳᤏᤧ. ᤁᤖ ᤂᤧᤏᤧ᤹ᤃ ᤂᤧᤱᤜᤠ᤹ ᤋᤠᤱᤃᤪᤠᤳᤆᤡ ᤔᤢ᤹ᤀᤡᤛᤠᤶᤏᤣ ᤁᤧᤒᤡᤖᤢᤛᤡ᥄” 12 ᤂᤢᤏᤧ᤹ ᤒᤠᤗᤠᤁᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤠᤱᤒᤠ ᤐᤠ᤺ᤴᤈᤠ᤺ᤰᤁᤡᤴᤏᤣ ᤀᤠᤱᤃᤠ᤹ ᤐᤠ᤺ᤵᤔᤠ ᤔᤧᤒᤥᤱᤏᤧᤶᤒᤡ᥅” ᤒᤠᤗᤠᤔᤖᤧ ᤏᤡᤛᤡᤃᤣᤰᤐᤠ ᤁᤢᤀᤡᤱᤄᤱ 13 ᤂᤧᤒᤩᤠᤱ ᤒᤠᤗᤠᤁᤖᤧ ᤂᤢᤏᤧ᤹ ᤔᤧᤳᤋᤢ. “ᤆᤡᤛᤠᤛᤠᤈᤡ ᤘᤣ᤹ᤛᤔᤠᤍᤧᤴᤏᤥ ᤀᤠᤱᤃᤠ᤹ᤀᤥ ᤑᤧᤖᤧ᤹॥ ᤂᤧᤵᤔᤥᤗᤠᤶ ᤂᤧᤏᤧ᤹ ᤂᤧᤱᤜᤠ᤹ ᤁᤧᤏᤡᤛᤢᤛᤡ᤹॥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤕᤠ ᤁᤢᤍᤡᤱᤜᤠ᤹ᤖᤰ ᤁᤧᤏᤡᤛᤢ. ᤁᤖ ᤂᤧᤱᤜᤠ᤹ ᤁᤧᤖᤧᤰ ᤁᤧᤴᤏᤡᤛᤢᤛᤡᤴ᤹॥ ᤜᤠᤒᤠ ᤂᤧᤵᤔᤥᤗᤠᤶ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤧᤛᤧ᤹॥” 14 ᤂᤧᤒᤩᤠᤱ ᤒᤠᤗᤠᤁᤖᤧ ᤂᤢᤏᤧ᤹ ᤐᤡᤛᤃᤠᤒᤠ ᤁᤥ᤺ᤰᤔᤠᤸᤗᤧ ᤁᤢᤈᤱᤅᤥ ᤁᤧᤏᤧᤒᤠ ᤛᤥᤑᤡᤔᤒᤠ ᤀᤡᤰᤋᤠᤵᤐᤥ ᤋᤣ᤹ᤖᤢ. ᤜᤧᤰᤁᤩᤠᤱ ᤏᤢᤛᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤰᤔᤠ ᤗᤳᤇᤠ ᤗᤳᤇᤠ ᤛᤧᤃᤶᤒᤠ ᤏᤢ ᤗᤳᤇᤠ ᤗᤳᤇᤠ ᤌᤢ᤺ᤶᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤛᤡ॥ 15 ᤒᤠᤗᤠᤔᤧᤸᤗᤧ ᤒᤠᤗᤠᤁᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤢᤶᤛᤧ ᤐᤣ᤺ᤰᤁᤠᤸᤗᤧ ᤂᤧᤏᤧ᤹ᤃ ᤁᤴ ᤁᤧᤛᤡᤍᤢᤱᤈᤓᤠ᤺ᤸᤗᤧ ᤁᤢᤒᤣᤛᤠᤱ ᤜᤠᤒᤠ ᤕᤧᤒᤧ᤹॥” 16 ᤕᤜᤘᤣ ᤍᤠᤱᤒᤧᤸᤗᤧ ᤒᤠᤗᤠᤔᤧᤴ ᤋᤢᤔᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤪᤠᤀᤥ ᤐᤠ᤺ᤴᤈᤠᤰ ᤁᤣ᤺ᤳᤋᤢ ᤐᤡᤖᤢ. ᤂᤶᤓᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤱᤔᤠ ᤐᤣ᤺ᤰᤔᤠᤀᤠᤱ ᤒᤠᤗᤠᤁᤧᤴ ᤔᤧᤵᤔᤠ ᤁᤧᤒᤥᤱᤒᤠ ᤐᤠ᤺ᤴᤈᤠ᤺ᤰᤁᤡᤴ ᤀᤠᤶᤓᤠ ᤁᤴᤗᤥ॥” 17 ᤂᤧᤒᤩᤠᤱ ᤒᤠᤗᤠᤶᤔᤧᤴ ᤒᤠᤗᤠᤁᤖᤧᤀᤥ ᤐᤣ॥ ᤒᤠᤗᤠᤰᤁᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤥᤀᤠᤒᤒᤠ ᤋᤢᤶ ᤔᤏᤠᤜᤠ᤹ ᤂᤧᤏᤧ᤹ ᤁᤢᤛᤡᤍᤢᤱᤈᤓᤠ᤺ᤸᤗᤧ ᤁᤢᤒᤣᤛᤠᤱ ᤀᤠᤸᤗᤛᤠᤱ ᤕᤧᤒᤧᤃᤖᤧ॥ ᤒᤠᤗᤠᤁᤧᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤁᤧᤔᤧᤳᤋᤧᤒᤣ᥅” 18 ᤂᤧᤒᤩᤠᤱ ᤒᤠᤗᤠᤔᤧᤸᤗᤧ ᤂᤢᤏᤧ᤹ ᤁᤢᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤖᤥ— ᤒᤠᤗᤠᤁᤀᤣ. ᤂᤧᤏᤧ᤹ ᤐᤥᤃᤧ᤹ᤀᤠᤱ ᤂᤧᤵᤛᤧ᤹ᤀᤥ. ᤛᤡᤵᤐᤥᤖᤠ᤺ᤸᤗᤧ ᤁᤢᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ 19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤀᤠᤸᤗᤧᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡ ᤔᤣ᤺ᤸᤗᤥ. ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤧᤗᤧᤰᤂᤢᤴᤗᤥ. ᤜᤧᤏᤠᤱᤓᤧᤸᤗᤧ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡ ᤔᤢ᤹ᤀᤡᤍᤠᤱᤛᤠ ᤔᤣ᤺ᤴᤗᤥ॥ ᤌᤣ ᤂᤢᤏᤧ᤹ ᤐᤠ᤺ᤳᤋᤢᤀᤠᤱ ᤂᤧᤴ ᤔᤧᤈᤥᤃᤢᤴᤒᤡ᥅ ᤀᤡᤃᤪ ᤌᤣ ᤂᤢᤏᤧ᤹ ᤔᤠᤱᤜᤢᤵ ᤆᤥᤃᤢᤀᤠᤱ ᤂᤧᤴ ᤔᤧᤃᤧᤳᤋᤢᤶᤒᤡ᥅ 20 ᤀᤥᤔᤧᤳᤋᤧᤶᤔᤧ᤹. ᤔᤢ᤹ᤀᤡᤛᤠᤶ ᤌᤠᤔᤠᤖᤧ ᤗᤠᤃᤡ ᤀᤠᤱᤃᤠ᤹ᤃ ᤀᤡᤱᤈᤠᤱ ᤂᤥᤛᤢᤱᤅᤠᤱ ᤘᤠ᤹ᤖᤥ ᤂᤢᤏᤧ᤹ ᤔᤢ᤹ᤀᤡᤛᤠᤶ ᤌᤠᤛᤢᤀᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤂᤧᤴ ᤗᤧᤱᤔᤠ ᤔᤧᤛᤢᤰᤁᤠᤴᤗᤥ॥ 21 “ᤕᤠᤁᤢᤒᤀᤥ ᤋ᤹ᤕᤠᤴ ᤑᤧᤶᤔᤠ ᤏᤡᤔᤧᤴᤍᤧᤳᤋᤣ ᤘᤠ᤹ᤖᤥ॥ ᤀᤡᤛᤪᤠᤀᤡᤗᤀᤥ ᤋᤢᤰᤂᤣ ᤗᤠᤰᤂᤣ ᤏᤡᤔᤧᤴᤎᤠ᤺ᤵᤐᤣ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤠ. ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤴᤇᤡ᤹ᤏᤢᤀᤣ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤢᤴᤇᤡ᤹ ᤜᤠᤱ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤢᤘᤠ ᤔᤧᤈᤥᤃᤢᤖᤥ॥ 22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤛᤪᤗᤠᤶ ᤂᤧᤱᤜᤠ᤹ ᤗ᤺ᤳᤋᤢ ᤑᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤢᤏᤧ᤹ᤃ ᤋᤠᤶᤓᤢᤱᤅᤥᤒᤠ ᤛᤧᤃᤶᤒᤠᤴ ᤜᤧᤰᤁᤣ ᤂᤢᤴᤇᤡ᤹ ᤗᤠᤃᤡ ᤋᤧᤴᤎᤱ ᤆᤥᤰᤗᤥ॥ 23 ᤛᤧᤰᤂᤠᤛᤠᤱ ᤕᤠᤁᤢᤒᤧᤴ ᤁᤧᤕᤠᤱᤒᤠ ᤁᤡᤳᤆᤠᤰ ᤜᤥᤵᤗᤥ. ᤀᤡᤛᤪᤠᤀᤡᤗᤖᤧ ᤁᤢᤍᤰᤗᤧᤱᤘᤠᤀᤥ ᤌᤧᤔᤠ ᤌᤢᤶᤔᤩᤠᤀᤠᤱ ᤜᤥᤵᤗᤥ॥ ᤕᤠᤁᤢᤒ ᤏᤢ ᤀᤡᤛᤪᤠᤀᤡᤗᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤃᤢᤀᤠᤱ ᤘᤠ᤹ᤖᤥ᥄’ 24 ᤀᤥᤔᤧᤳᤋᤧᤶᤔᤧ᤹. ᤂᤧᤴ ᤛᤢᤘᤠᤱᤜᤠ᤹ ᤂᤡᤖᤡᤱᤔᤠᤴ ᤜᤧᤰᤁᤣ ᤔᤧᤒᤥᤰᤗᤥ. ᤕᤠᤵᤔᤡ ᤑᤵᤔᤠ ᤁᤧᤈᤥ᤺ᤰᤐᤠ ᤂᤡᤖᤡᤱᤒᤠᤴ ᤜᤧᤰᤁᤣ ᤂᤧᤴ ᤋᤰᤐᤧᤳ ᤔᤢᤳᤌᤪᤡᤰ ᤐᤥ᤺ᤰᤗᤥ॥ ᤂᤧᤸᤗᤧ ᤛᤠᤏᤠ᤺ᤳᤋᤡᤴ ᤔᤧᤴᤈᤠᤀᤣ ᤌᤠᤖᤡᤰ ᤜᤧᤰᤁᤩᤠᤱ ᤁᤢᤔᤠᤰᤂᤡᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤂᤧᤴ ᤔᤧᤏᤠ᤺ᤶᤛᤡᤱᤅᤡᤴᤗᤥ॥” 25 ᤂᤧᤒᤩᤠᤱ ᤒᤠᤗᤠᤁᤧᤸᤗᤧ ᤒᤠᤗᤠᤔᤧᤴ ᤔᤧᤳᤋᤢ. “ᤂᤧᤱᤜᤠ᤹ ᤔᤠᤱᤍᤣ ᤛᤠᤱᤃᤪᤠᤀᤠᤱ ᤔᤧᤔᤧᤳᤋᤧᤛᤧᤴᤏᤧ᤹. ᤜᤧᤰᤁᤩᤠᤱ ᤔᤢ᤹ᤀᤡᤛᤠᤶᤔᤠᤱ ᤔᤧᤒᤡᤖᤧᤛᤧᤴᤏᤧ᤹᥄” 26 ᤁᤖ ᤒᤠᤗᤠᤔᤧᤸᤗᤧ ᤒᤠᤗᤠᤁᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤆᤩᤠ ᤐᤠ᤺ᤳᤋᤢ᤹ ᤂᤧᤴ ᤀᤠᤱᤃᤠ᤹ ᤛᤧᤰᤂᤠ ᤆᤥ᤺ᤰᤔᤠᤀᤣ ᤐᤥᤱ ᤑᤠ᤹ᤀᤠᤱ ᤂᤧᤏᤧ᤹ ᤋᤃᤡᤀᤣ ᤔᤧᤔᤧᤳᤏᤧᤴᤏᤠᤱ ᤔᤧᤘᤕᤧᤴᤒᤡ᥅” ᤒᤠᤗᤠᤔᤖᤧ ᤛᤢᤶᤛᤡᤃᤣᤰᤐᤠ ᤁᤢᤀᤡᤱᤄᤱ 27 ᤂᤧᤒᤩᤠᤱ ᤒᤠᤗᤠᤁᤖᤧ ᤒᤠᤗᤠᤔᤧᤴ ᤔᤧᤳᤋᤢ. “ᤑᤧᤖᤧ᤹. ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤘᤣ᤹ᤛᤔᤠᤍᤧᤴᤏᤥ ᤋᤣ᤹ᤏᤧ॥ ᤐᤥᤱᤔᤠ ᤛᤢᤰ. ᤂᤧᤵᤔᤥᤗᤠᤶ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤏᤧ᤹ ᤂᤧᤱᤜᤠ᤹ ᤛᤠᤱᤃᤪᤠ ᤔᤧᤵᤔᤠᤛᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤒᤡ॥” 28 ᤜᤧᤰᤁᤩᤠᤱ ᤒᤠᤗᤠᤁᤧᤸᤗᤧ ᤒᤠᤗᤠᤔᤧᤴ ᤐᤥᤖᤒᤠ ᤆᤴᤈᤶᤒᤠᤍᤧᤴᤏᤥ ᤋᤣ᤹ᤖᤢ. ᤂᤧᤵᤔᤥᤗᤠᤶ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤴ ᤏᤡᤎᤠᤒᤧ॥ 29 ᤂᤧᤒᤩᤠᤱ ᤒᤠᤗᤠᤔᤧᤸᤗᤧ ᤒᤠᤗᤠᤁᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤗᤠᤃᤡ ᤁ᤹ᤕᤥ ᤏᤢᤛᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤧ᤹ᤀᤠᤱ ᤏᤢᤛᤡ ᤛᤧᤃᤶᤒᤠ ᤏᤢ ᤏᤢᤛᤡ ᤌᤢ᤺ᤶᤒᤠᤜᤠ᤹ ᤕᤠᤖᤡᤵ ᤆᤥᤃᤠᤱ ᤐᤡᤖᤠᤱᤅᤧ᤹॥” 30 ᤒᤠᤗᤠᤔᤧᤸᤗᤧ ᤔᤧᤳᤋᤢᤒᤠ ᤁᤢᤛᤡᤱᤅᤣ ᤒᤠᤗᤠᤁᤧᤸᤗᤧ ᤆᤥᤃᤢ. ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤵᤔᤣ ᤗᤳᤇᤠ ᤗᤳᤇᤠ ᤛᤧᤃᤶᤒᤠ ᤏᤢ ᤗᤳᤇᤠ ᤗᤳᤇᤠ ᤌᤢ᤺ᤶᤒᤠᤜᤠ᤹ ᤂᤢᤏᤧ᤹ ᤋᤥ᤺ᤴᤍᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.