ᤂᤠᤏᤡ᤺ᤳ 22 - LIFOTNTᤔᤥᤀᤠᤒ ᤜᤠᤱ ᤒᤠᤗᤠᤁᤖᤧ ᤒᤠᤗᤠᤔᤧᤴ ᤀᤢ᤺ᤳᤋᤢ 1 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤗᤠᤶᤍᤡᤰ ᤔᤧᤈᤥᤃᤧᤖ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤒᤣ ᤜᤧᤰᤁᤩᤠᤱ ᤕᤖᤡᤜᤥ ᤁᤢᤍᤥ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢ॥ 2 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤣᤔᤥᤖᤡᤜᤠ᤹ ᤌᤧᤔᤠ ᤌᤧᤔᤠ ᤔᤧᤔᤧᤳᤋᤢᤛᤡᤀᤠᤱ ᤘᤕᤧ. ᤛᤡᤵᤐᤥᤖᤠᤖᤧ ᤁᤢᤛ᤻ᤛᤠ ᤒᤠᤗᤠᤁᤖᤧ ᤂᤧᤴ ᤏᤡᤛᤢᤀᤠᤱ ᤘᤕᤧ. 3 ᤜᤧᤰᤁᤩᤠᤱ ᤔᤥᤀᤠᤒᤧᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤠ᤹ᤖᤡᤰ ᤁᤡᤛᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤖᤡᤰ ᤔᤧᤘᤕᤧ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤛᤠᤶᤔᤡᤰᤗᤧ ᤗᤧᤖᤢᤛᤡ॥ 4 ᤔᤥᤀᤠᤒᤡᤜᤠ᤹ᤖᤧ ᤔᤡᤍᤩᤠᤏᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ ᤔᤧᤔᤧᤳᤋᤢᤛᤡ. “ᤀᤠᤸᤗ ᤀᤠᤏᤡ᤹ ᤁᤧᤖᤧᤰ ᤐᤡᤛᤠᤱᤒᤠ ᤋᤧᤴᤏᤡᤴ ᤀᤠᤎᤥ᤺ᤱᤎᤥ᤺ᤱᤒᤠ ᤐᤡᤳᤋᤧᤸᤗᤧ ᤋᤧᤸᤗᤰ ᤀᤡᤰᤋᤠᤵᤜᤠ᤹ ᤗᤠ᤺ᤰᤋᤢ ᤑᤧᤳᤋᤢᤀᤠᤱ ᤕᤠ᤺ᤴᤜᤠ᤹ ᤕᤢᤔᤪᤧᤰ ᤔᤧᤰᤂᤢᤒᤠ ᤜᤧᤰᤁᤣ ᤁᤴ ᤔᤏᤠᤗᤢᤵᤗᤡᤜᤠ᤹ᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤢᤔᤪᤧᤰ ᤔᤧᤔᤧᤰᤂᤢᤒᤠ ᤐᤥ᤺ᤰᤂᤧ॥” ᤂᤧᤴ ᤕᤧᤶᤔᤥ ᤛᤡᤵᤐᤥᤖᤠᤖᤧ ᤁᤢᤛ᤻ᤛᤠ ᤒᤠᤗᤠᤁᤧᤴ ᤔᤥᤀᤠᤒᤒᤠ ᤜᤠᤱ ᤘᤕᤧ॥ 5 ᤂᤢᤏᤧ᤹ ᤕᤢᤑᤪᤣᤋᤡᤛ ᤁᤢᤒᤣᤛᤠᤱ ᤁᤧᤕᤢᤱᤒᤠ. ᤂᤢᤏᤧ᤹ ᤀᤠᤵᤑᤣᤰ ᤁᤢᤛᤢᤘᤠᤱᤒᤠ ᤁᤢᤴᤛᤠ᤹ᤖᤧ ᤁᤢᤒᤠᤱᤓᤣ᤹ ᤐᤋᤥᤖᤀᤥ ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤔᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤀᤡᤱᤄᤱ ᤜᤠᤰᤋᤢᤖᤥ. “ᤔᤡᤛᤪᤗᤠᤶ ᤗᤳᤇᤠ ᤛᤢᤘᤠᤱᤒᤠ ᤔᤏᤠᤜᤠ᤹ ᤔᤧᤓᤧᤖᤧᤀᤠᤱ ᤗᤠᤈᤣ᤺ᤴᤏᤣ ᤛᤎᤧᤰ ᤔᤧᤎᤡᤶᤛᤢ ᤔᤧᤛᤢᤖᤢ॥ ᤂᤧᤱᤜᤠ᤹ ᤀᤠᤱᤃᤠ᤹ᤀᤣ ᤀᤠᤀᤡ᤺ᤴᤍᤥᤀᤥ ᤔᤧᤓᤧᤖᤧᤀᤠᤱ ᤔᤧᤕᤢᤱᤛᤡᤱᤅᤠᤱ ᤔᤧᤕᤢᤱ॥ 6 ᤀᤠᤸᤗ ᤑᤧᤖᤧ᤹ᤀᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤁᤴ ᤛᤢᤘᤠᤱᤜᤠ᤹ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤧᤛᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤔᤢᤰᤛᤠᤶᤛᤠᤒᤠ ᤔᤧᤈᤥᤰ॥ ᤜᤧᤰᤁᤣ ᤁᤧᤈᤥᤃᤢᤏᤧᤓᤃᤪ ᤀᤠᤱᤃᤠ᤹ ᤂᤧᤱᤜᤠ᤹ ᤏᤠ᤺ᤴᤍᤢᤱᤛᤡᤱᤅᤠᤱ ᤗᤠᤈᤣ᤹ᤗᤠᤶ ᤏᤠ᤺ᤵᤔᤠᤍᤣᤔᤠ ᤛᤢᤰᤋᤢᤱᤒᤡ ᤜᤠᤃ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤳᤋᤡᤴ ᤔᤏᤠᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤢ᤹ ᤂᤢᤏᤧ᤹ᤀᤥ ᤔᤢ᤹ᤀᤡᤛᤠᤶ ᤌᤠ᤹᤺. ᤜᤧᤰᤁᤩᤠᤱ ᤀᤠᤳᤋᤡᤴ ᤔᤠᤱᤍᤣ ᤛᤠᤱᤃᤪᤠ ᤁᤧᤔᤧᤳᤋᤢ᤹ ᤂᤧᤴ ᤛᤠᤱᤃᤪᤠᤖᤧ ᤋᤧᤳᤋᤢ᤹. ᤂᤧᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥” 7 ᤔᤥᤀᤠᤒ ᤏᤢ ᤔᤡᤍᤩᤠᤏᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ᤖᤧ ᤌᤢᤶᤔᤩᤠ ᤀᤡᤔᤠ ᤁᤢᤈᤧᤴ ᤕᤠᤱᤅᤡᤴ ᤔᤧᤍᤠ᤺ᤰᤋᤢ. ᤜᤧᤰᤁᤩᤠᤱ ᤒᤠᤗᤠᤔᤀᤥ ᤔᤧᤍᤩᤧᤀᤠᤱ ᤒᤠᤗᤠᤁᤖᤧ ᤁᤢᤀᤡᤱᤄᤱᤅᤡᤴ ᤔᤧᤔᤧᤳᤋᤢ॥ 8 ᤒᤠᤗᤠᤔᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤀᤡᤴ ᤛᤧᤴᤍᤡᤰ ᤀᤠᤶᤓᤠ ᤁᤶᤔᤥᤀᤣ ᤕᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤌᤧᤔᤠ ᤔᤧᤳᤋᤠᤀᤠ. ᤀᤠᤱᤃᤠ᤹ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴ ᤆᤧᤰᤏᤡᤱ᤹॥” ᤁᤸᤗᤧᤆᤥᤃᤢᤸᤗᤧ ᤔᤥᤀᤠᤒᤒᤠ ᤗᤠᤶᤗᤥᤒᤠᤜᤠ᤹ ᤒᤠᤗᤠᤔᤖᤥ ᤕᤠᤱᤔᤧᤎᤥ᤺ᤰᤋᤧ॥ 9 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤒᤠᤗᤠᤔᤖᤥ ᤕᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ᤀᤥ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤜᤠ᤺ᤳᤇᤡᤒᤣ᥅” 10 ᤒᤠᤗᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤔᤥᤀᤠᤒᤒᤠ ᤜᤠᤱ ᤛᤡᤵᤐᤥᤖᤠ᤺ᤸᤗᤧ ᤁᤢᤛ᤻ᤛᤠ ᤒᤠᤗᤠᤁᤖᤧ ᤀᤠᤱᤃᤠ᤹ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤠᤱᤅᤠᤱ ᤘᤠ᤹. 11 ‘ᤔᤡᤛᤪᤗᤠᤶ ᤁᤧᤗ᤺ᤶᤒᤠ ᤁᤧᤓᤧᤶᤒᤠ ᤗᤳᤇᤠ ᤛᤢᤘᤠᤱᤛᤔᤠ ᤔᤏᤠᤜᤠ᤹ᤖᤧ ᤗᤠᤈᤣᤴ ᤁᤧᤖᤧᤰ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤏᤧ᤹᤺॥ ᤀᤠᤸᤗ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤀᤠᤱᤃᤠ᤹ ᤗᤧᤵᤔᤠᤱᤗᤠᤶ ᤂᤧᤱᤜᤠ᤹ ᤔᤠᤱᤍᤣᤛᤧᤛᤧ᤹॥ ᤜᤧᤰᤁᤣ ᤁᤧᤈᤥᤃᤢᤏᤧᤓᤃᤪ ᤀᤠᤱᤃᤠ᤹ ᤂᤧᤱᤜᤠ᤹ ᤏᤠ᤺ᤴᤍᤢᤱᤛᤡᤱᤅᤠᤱ ᤗᤠᤈᤣ᤹ᤗᤠᤶ ᤏᤠ᤺ᤵᤔᤠᤍᤣᤔᤠ ᤛᤢᤰᤋᤢᤱᤒᤡ ᤜᤠᤃ॥’” 12 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠᤗᤠᤔᤧᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤁᤴᤜᤠ᤹ᤏᤢ ᤔᤧᤒᤣᤃᤧᤴᤏᤧ᤹॥ ᤂᤧᤏᤧ᤹ ᤁᤴ ᤛᤢᤘᤠᤱᤜᤠ᤹ ᤔᤠᤱᤍᤣ ᤛᤠᤱᤃᤪᤠ ᤔᤧᤵᤔᤠᤛᤡ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤢ᤹ᤀᤡᤛᤠᤒᤠ ᤔᤧᤈᤥᤰ॥” 13 ᤂᤧᤒᤩᤠᤱ ᤒᤠᤗᤠᤔᤧᤴ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧ. ᤜᤧᤰᤁᤩᤠᤱ ᤒᤠᤗᤠᤁᤖᤧ ᤁᤢᤗᤠᤶᤗᤥᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥ ᤐᤣᤃᤠᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤛᤥᤖᤡᤰ ᤐᤣ᤺ᤰᤔᤠ ᤔᤧᤓᤠ᤺ᤰᤋᤠᤱᤅᤡᤴ॥” 14 ᤜᤧᤰᤁᤩᤠᤱ ᤔᤥᤀᤠᤒᤒᤠ ᤗᤠᤶᤗᤥᤒᤠᤜᤠ᤹ ᤒᤠᤗᤠᤁᤀᤥ ᤔᤧᤒᤣᤀᤠᤱ ᤔᤧᤔᤧᤳᤋᤢ. “ᤒᤠᤗᤠᤔᤧᤴ ᤀᤠᤏᤡᤃᤧᤏᤢ ᤑᤧᤶᤔᤠ ᤔᤧᤍᤧᤴᤍᤧᤴ॥” 15 ᤂᤧᤒᤩᤠᤱ ᤒᤠᤗᤠᤁᤧᤸᤗᤧ ᤋᤃᤡ ᤐᤠᤱᤄᤢᤛᤡᤒᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤧᤍᤶᤒᤠ ᤗᤠᤶᤗᤥᤒᤠᤜᤠ᤹ ᤏᤢ ᤌᤥᤎᤥᤰᤐᤠ ᤕᤶᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤐᤠᤱᤄᤢᤛᤡ॥ 16 ᤂᤧᤱᤜᤠ᤹ ᤒᤠᤗᤠᤔᤖᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤵᤐᤥᤖᤠ᤺ᤸᤗᤧ ᤁᤢᤛ᤻ᤛᤠ ᤒᤠᤗᤠᤁᤖᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤧᤏᤧ᤹ ᤀᤠᤱᤃᤠ᤹ ᤀᤠᤓᤠ᤹ᤛᤧ ᤑᤧᤶᤔᤠᤖᤧᤗᤠᤃᤡ ᤌᤧᤔᤠ ᤐᤠ᤺ᤴᤏᤡᤸᤗᤧᤀᤠᤱ ᤁᤧᤴᤇᤠᤰᤏᤧᤸᤗ॥ 17 ᤀᤠᤱᤃᤠ᤹ ᤂᤧᤏᤧ᤹ ᤕᤶᤒᤠ ᤏᤠᤈᤶ ᤐᤡᤏᤧᤀᤠᤱ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤆᤥ᤺ᤰᤏᤧ॥ ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢ᤹ ᤀᤠᤱᤃᤠ᤹ ᤜᤠᤒᤠ ᤂᤧᤴ ᤆᤥᤃᤢᤱ᤹॥ ᤁᤸᤗᤧᤆᤥᤃᤢᤸᤗᤧ ᤆᤡᤛᤠᤈᤡ ᤑᤧᤖᤧ᤹. ᤜᤧᤰᤁᤩᤠᤱ ᤁᤴ ᤛᤢᤘᤠᤱᤒᤠ ᤔᤏᤠᤜᤠ᤹ ᤔᤠᤱᤍᤣᤛᤧᤛᤧ᤹॥” 18 ᤁᤖ ᤒᤠᤗᤠᤔᤧᤸᤗᤧ ᤒᤠᤗᤠᤁᤖᤧ ᤁᤢᤀᤡᤱᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤏᤥᤃᤵ ᤐᤡᤖᤢᤛᤡ. “ᤒᤠᤗᤠᤁᤖᤧ ᤁᤢᤜᤠᤱ ᤁᤢᤜᤡᤶᤔᤥ ᤁᤳᤋᤢᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤏᤢ ᤕᤢᤵᤐᤠᤜᤠ᤹ ᤐᤡᤀᤠᤛᤠᤱ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤆᤢᤰᤐᤠ ᤀᤡᤃᤪ ᤕᤶᤒᤠ ᤐᤠ᤺ᤴᤏᤥ ᤑᤣ᤺ᤶᤔᤠ ᤔᤧᤛᤢᤰᤁᤠᤴ॥ 19 ᤀᤠᤸᤗ ᤘᤣ᤹ᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤀᤠᤱ ᤀᤠᤀᤡᤴ ᤛᤧᤴᤍᤡᤰ ᤜᤠᤒᤠ ᤁ᤹ᤕᤥ ᤕᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤸᤗᤛᤠᤱ ᤘᤣ᤹ ᤌᤧᤔᤠ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ᤹॥” 20 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤴ ᤛᤧᤴᤍᤡᤰ ᤒᤠᤗᤠᤔᤖᤧᤀᤥ ᤕᤧᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤁᤴ ᤔᤏᤠᤜᤠ᤹ ᤂᤧᤏᤧ᤹ ᤁᤧᤀᤢ᤺ᤳᤇᤧ ᤔᤧᤍᤩᤧᤒᤠᤖᤥ॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤴᤜᤠ᤹ᤏᤢ ᤛᤥᤖᤡᤰ ᤐᤣᤃᤧ᤹. ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤌᤧᤔᤠ ᤌᤧᤔᤠ ᤔᤧᤳᤏᤧ. ᤂᤧᤴᤗᤰ ᤆᤥᤃᤧ᤹॥” ᤒᤠᤗᤠᤔᤖᤧ ᤁᤢᤀᤍᤱᤅᤡᤴ 21 ᤒᤠᤗᤠᤔᤧᤴ ᤋᤠᤏᤠᤶᤛᤠ ᤐᤥᤃᤧ. ᤜᤧᤰᤁᤩᤠᤱ ᤁᤢᤀᤍᤱᤅᤥ ᤁᤠᤖᤣ᤺ᤸᤗᤡᤴ ᤀᤡᤄᤣ᤺ᤰᤂᤢᤀᤠᤱ ᤔᤥᤀᤠᤒᤒᤠ ᤗᤠᤶᤗᤥᤒᤠᤜᤠ᤹ᤏᤢ ᤛᤥᤖᤡᤰ ᤐᤣᤖᤥ॥ 22 ᤁᤖ ᤒᤠᤗᤠᤔᤧᤴ ᤐᤣᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤴ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤕᤧᤀᤠᤱ ᤁᤢᤗᤠᤶᤔᤡᤴ ᤌᤣ᤺ᤰᤋᤢ ᤐᤡᤖᤢ॥ ᤂᤢᤏᤧ᤹ ᤀᤠᤵᤑᤣᤰ ᤁᤢᤀᤍᤱᤅᤡᤴ ᤕᤢᤰᤋᤢᤀᤠᤱ ᤐᤣᤖ ᤐᤳᤇᤧ॥ ᤒᤠᤗᤠᤶᤔᤧᤸᤗᤧ ᤂᤢᤏᤧ᤹ ᤁᤢᤀᤍᤱᤅᤡᤴ ᤕᤢᤰᤋᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤁᤢᤛᤧᤘᤠᤖᤥᤒᤠ ᤏᤧᤳᤇᤡᤀᤠᤱ ᤘᤕᤧᤳᤇᤡ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤁᤢᤜᤢᤰᤁᤥ ᤋᤠᤓᤣᤴ ᤕᤠᤱᤛᤡᤱᤅᤠᤱ ᤗᤠᤶᤔᤥ ᤕᤧᤒᤧᤃᤖᤧᤒᤠ ᤂᤧᤴ ᤀᤍᤱᤅᤡᤸᤗᤧ ᤏᤡᤛᤢ. ᤜᤧᤰᤁᤩᤠᤱ ᤀᤍᤱᤅᤡᤴ ᤗᤠᤶᤔᤥᤏᤢ ᤜᤡᤸᤗᤡᤰ ᤜᤡᤛᤡᤱᤅᤠᤱ ᤀᤡᤰᤋᤠᤵ ᤗᤧᤵᤔᤠᤱ ᤌᤠᤛᤡᤱ॥ ᤗᤠᤶᤔᤥ ᤜᤡᤔᤠᤖᤧ ᤗᤠᤃᤡ ᤒᤠᤗᤠᤔᤧᤸᤗᤧ ᤀᤍᤱᤅᤡᤴ ᤜᤡᤵᤋᤢ॥ 24 ᤏᤠᤜᤠᤱ ᤁᤳᤏᤠᤜᤠᤱ ᤗᤢᤱᤎᤠᤰ ᤛᤧᤵᤔᤏᤠᤒᤠᤀᤠᤱ ᤁᤧᤕᤧᤵᤐᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤏᤧᤳᤇᤡᤖᤧ ᤁᤢᤗᤢᤶᤔᤥᤒᤠ ᤆᤡᤜᤢ᤹ᤜᤢ᤹ᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤕᤧᤶᤛᤡᤱ॥ 25 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠ ᤀᤡᤱᤒᤧᤴ ᤏᤡᤛᤢᤀᤠᤱ ᤀᤍᤱᤅᤡᤴ ᤗᤢᤱᤎᤠᤰᤁᤥ ᤆᤡᤄᤧ᤺ᤶ ᤂᤧ᤺ᤶᤛᤡᤱ ᤜᤧᤰᤁᤩᤠᤱ ᤒᤠᤗᤠᤔᤖᤧ ᤁᤢᤗᤠᤱᤅᤡᤴ ᤗᤢᤱᤎᤠᤰᤁᤥ ᤆᤡᤓᤡ᤺ᤳ ᤑᤡ᤺ᤳᤋᤢ॥ ᤂᤢᤏᤧ᤹ ᤀᤍᤱᤅᤡᤴ ᤕᤠᤶᤔᤥ ᤜᤡᤵᤋᤢ॥ 26 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤀᤠᤸᤗᤛᤠᤱ ᤏᤠᤏᤠᤰ ᤐᤣᤀᤠᤱ ᤆᤢᤰᤘᤠ ᤑᤧᤱᤘᤠ ᤀᤠᤳᤋᤡᤀᤠᤱ ᤜᤡᤛᤡᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤡᤜᤢ᤹ᤜᤢ᤹ᤒᤠᤍᤧᤴᤏᤥ ᤕᤧᤶᤛᤡᤱ॥ 27 ᤀᤍᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤏᤡᤛᤢᤀᤠᤱ ᤜᤷᤃᤢᤵ ᤏᤧᤛᤡᤱ॥ ᤂᤧᤒᤩᤠᤱ ᤒᤠᤗᤠᤔᤧᤴ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤁᤢᤍᤰᤁᤠ᤺ᤳᤋᤡᤸᤗᤧ ᤀᤍᤱᤅᤡᤴ ᤗ᤺ᤶᤔᤠ ᤜᤣ᤺ᤰᤋᤢ॥ 28 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤍᤱᤅᤡᤴ ᤐᤠᤖᤧᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤂᤧᤸᤗᤧ ᤒᤠᤗᤠᤔᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤌᤣ ᤔᤧᤳᤏᤧᤀᤠᤱ ᤘᤠ᤹ᤀᤠᤱ ᤀᤠᤱᤃᤠ᤹ ᤛᤢᤶᤍᤢ᤺ᤰ ᤁᤧᤜᤡᤵᤋᤠᤱᤒᤣ᥅” 29 ᤒᤠᤗᤠᤔᤧᤸᤗᤧ ᤀᤍᤱᤅᤡᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤛᤎ᤺ᤰᤐᤠ ᤁᤧᤈᤥᤃᤠᤱ॥ ᤀᤠᤱᤃᤠ᤹ ᤀᤠᤜᤢᤰᤁᤥ ᤋᤠᤓᤣᤴ ᤘᤕᤧᤒᤠ ᤜᤧᤰᤁᤣ᤺ᤸᤗᤧ ᤀᤠᤸᤗᤥᤛᤠ ᤂᤧᤏᤧ᤹ ᤛᤧᤳᤏᤧᤒᤠ ᤘᤕᤧᤔᤧᤴ᥄” 30 ᤀᤍᤱᤅᤡᤸᤗᤧ ᤒᤠᤗᤠᤔᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤡᤱᤜᤡᤱ ᤌᤧᤶᤒᤠ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤂᤧᤏᤧ᤹ ᤁᤧᤕᤢᤰᤋᤢᤒᤠ ᤀᤍᤱᤅᤡᤴ ᤌᤣ ᤀᤠᤱᤃᤠ᤹ᤀᤣ ᤔᤧ᤺ᤴᤏᤠᤒᤡ᥅ ᤀᤠᤱᤃᤠ᤹ ᤀᤠᤵᤑᤠᤸᤗᤧ ᤂᤧᤏᤧ᤹ᤏᤢ ᤀᤰᤋᤱᤒᤠ ᤆᤥᤃᤢᤱᤅᤠᤱ ᤘᤕᤧᤒᤣ᥅” ᤜᤧᤰᤁᤩᤠᤱ ᤒᤠᤗᤠᤔᤧᤸᤗᤧ ᤔᤧᤳᤋᤢ. “ᤔᤣ᤺ᤴ. ᤔᤧᤴᤈᤥ᤺ᤰᤁᤣ ᤁᤧᤘᤠ᤹॥” 31 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤒᤠᤗᤠᤔᤧᤴ ᤔᤡᤰ ᤏᤡᤛᤧᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤋᤠᤓᤣ ᤁᤧᤓᤡ᤺ᤱᤒᤠᤀᤠᤱ ᤜᤢᤰᤁᤥ ᤁᤧᤕᤠᤱᤛᤡᤱᤒᤠ ᤗᤠᤶᤔᤥ ᤁᤧᤕᤧᤵᤐᤠ ᤁᤧᤈᤠᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤂᤢᤏᤧ᤹ ᤏᤡᤛᤢ॥ ᤜᤧᤰᤁᤩᤠᤱ ᤀ᤺ᤰᤂᤢᤶ ᤔᤧ᤺ᤳᤇᤡᤱᤅᤠᤱ ᤛᤠᤶᤒᤥᤴ ᤑᤴᤇᤡᤱ॥ 32 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤁᤧᤀᤍᤱᤅᤡᤴ ᤛᤢᤶᤍᤢ᤺ᤰ ᤁᤧᤜᤡᤵᤋᤢᤒᤠ᥅ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤶ ᤌᤣ᤺ᤰᤛᤧ ᤕᤠᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤍᤃᤡ ᤂᤧᤏᤧ᤹ ᤀᤠᤵᤑᤣᤰ ᤁᤧᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤗᤠᤱᤃᤧᤄᤣ᤺ᤰᤗ ᤁᤧᤒᤳ॥ 33 ᤂᤧᤴ ᤀᤍᤱᤅᤡᤸᤗᤧ ᤀᤠᤱᤃᤠ᤹ ᤏᤡᤛᤠᤱᤅᤠᤱ ᤀᤠᤸᤗᤥ ᤌᤠᤖᤡᤰᤗᤧ ᤛᤢᤶᤍᤢ᤺ᤰ ᤀᤠᤱᤃᤠ᤹ ᤀᤠᤍᤃᤡᤗᤠᤶ ᤂᤧᤳᤇᤡᤱ॥ ᤀᤠᤱᤃᤠ᤹ᤗᤠᤶ ᤂᤧᤴ ᤔᤧᤄᤧᤳᤇᤡᤱᤅᤧᤴᤒᤠ ᤜᤧᤰᤁᤣ᤺ᤸᤗᤧ ᤀᤠᤸᤗᤥ ᤌᤠᤖᤡᤰᤗᤧ ᤀᤠᤱᤃᤠ᤹ ᤂᤧᤏᤧ᤹ ᤀᤠᤴᤍᤣᤴ ᤛᤧᤳᤏᤧᤔᤧᤴ. ᤁᤖ ᤂᤧᤱᤃ ᤁᤢᤜᤡᤱᤘᤧᤳ ᤗᤧᤖᤢᤱᤔᤧᤴ॥” 34 ᤒᤠᤗᤠᤔᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹॥ ᤀᤠᤱᤃᤠ᤹ ᤀᤠᤗᤠᤶᤔᤡᤴ ᤁᤧᤎᤣ᤺ᤰᤋᤢᤀᤠᤱ ᤂᤧᤏᤧ᤹ ᤁᤧᤕᤧᤒᤧᤒᤠ ᤀᤠᤱᤃᤠ᤹ ᤔᤧᤴᤏᤡᤒᤠ॥ ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤔᤡᤰᤛᤠᤀᤥ ᤁᤴ ᤏᤢᤒᤠ ᤔᤧᤈᤥᤰᤏᤧᤴᤏᤧᤓᤃᤪ ᤀᤠᤱᤃᤠ᤹ ᤕᤠᤶᤔᤥ ᤏᤢ᤺ᤱᤅᤠ ᤐᤣ᤺ᤰᤁᤠ॥” 35 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤒᤠᤗᤠᤔᤧᤴ ᤔᤧᤳᤋᤢ. “ᤁᤴ ᤔᤏᤠᤜᤠ᤹ᤏᤢ ᤛᤥᤖᤡᤰ ᤐᤣᤃᤧ᤹॥ ᤁᤖ ᤀᤠᤱᤃᤠ᤹ ᤌᤧᤔᤠ ᤌᤧᤔᤠ ᤔᤧᤳᤏᤧ. ᤜᤠᤒᤠ ᤂᤧᤴᤗᤰ ᤂᤧᤏᤧ᤹ ᤐᤠ᤺ᤳᤋᤧ᤹॥ ᤁᤸᤗᤧᤆᤥᤃᤢᤸᤗᤧ ᤒᤠᤗᤠᤔᤧᤴ ᤒᤠᤗᤠᤁᤖᤧ ᤁᤢᤗᤠᤶᤗᤥᤒᤠᤜᤠ᤹ᤏᤢ ᤛᤥᤖᤡᤰ ᤐᤣᤖᤥ॥” ᤒᤠᤗᤠᤁᤖᤧ ᤒᤠᤗᤠᤔᤧᤴ ᤗᤠᤱᤍᤠ᤺ᤰ ᤔᤧᤳᤋᤢ 36 ᤒᤠᤗᤠᤁᤖᤧ ᤒᤠᤗᤠᤔᤧᤴ ᤑᤧᤖᤧᤒᤠ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤢᤗᤠᤈᤣ᤹ᤀᤥᤒᤠ ᤁᤢᤕᤠ ᤁᤢᤍᤡᤱᤜᤠ᤹ᤖᤧ ᤁᤢᤒᤣᤛᤠᤱᤒᤠ ᤀᤷᤏᤥᤏ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤔᤥᤀᤠᤒᤡ ᤕᤧᤰᤕᤰ ᤌᤠᤖᤡᤰᤁᤣ ᤂᤢᤴᤇᤡ᤹ ᤋᤢᤶᤛᤧ ᤐᤣ॥ 37 ᤒᤠᤗᤠᤁᤖᤧ ᤒᤠᤗᤠᤔᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤀᤢ᤺ᤳᤇᤧ ᤔᤏᤠᤜᤠ᤹ ᤐᤠᤱᤄᤢᤱᤛᤡᤱ. ᤁᤖ ᤂᤧᤏᤧ᤹ ᤀᤠᤱᤃᤠ᤹ᤀᤥ ᤌᤣᤀᤠᤱ ᤁᤧᤶᤓᤧᤖᤧᤴ᥅ ᤌᤣ ᤀᤠᤱᤃᤠ᤹ ᤂᤧᤏᤧ᤹ ᤕᤶᤒᤠ ᤏᤠᤈᤶ ᤐᤡᤔᤠ ᤔᤧᤛᤢᤰᤏᤧᤶᤒᤠ ᤘᤕᤧᤒᤡ᥅” 38 ᤂᤧᤒᤩᤠᤱ ᤒᤠᤗᤠᤔᤖᤧ ᤒᤠᤗᤠᤁᤧᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤑᤧᤖᤠᤱᤅᤠᤱ ᤘᤠ᤹ᤀᤠ॥ ᤌᤧᤔᤠ ᤐᤠᤴ ᤐᤠ᤺ᤵᤐᤠᤀᤠᤱ ᤀᤠᤱᤃᤠ᤹ ᤔᤢᤰᤛᤠᤶ ᤔᤧᤃᤳᤋᤠᤴ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤌᤧᤔᤠ ᤀᤡᤱᤈᤠᤱ ᤐᤡᤀᤠ ᤀᤠᤶᤓᤠ ᤂᤧᤴᤗᤰ ᤀᤠᤱᤃᤠ᤹ ᤐᤠ᤺ᤵᤔᤠ ᤐᤥᤱ᤹॥” 39 ᤂᤧᤒᤩᤠᤱ ᤒᤠᤗᤠᤔᤧᤴ ᤒᤠᤗᤠᤁᤧᤴᤏᤢ ᤛᤥᤖᤡᤰ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤡᤷᤕᤋ-ᤜᤢᤛᤥᤋᤀᤥ ᤔᤧᤓᤧᤖᤧ॥ 40 ᤒᤠᤗᤠᤁᤧᤸᤗᤧ ᤐᤡᤳᤜᤠ᤹ ᤏᤢ ᤔᤧᤸᤗᤢᤰᤜᤠ᤹ ᤛᤡᤍᤢᤱᤛᤓᤠ ᤋᤥ᤺ᤴᤍᤢᤛᤡᤀᤠᤱ ᤒᤠᤗᤠᤔᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤓᤧᤶᤒᤠ ᤗᤠᤶᤗᤥᤒᤠᤜᤠ᤹ ᤐᤡᤖᤢᤛᤡᤖᤥ॥ 41 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤒᤠᤗᤠᤁᤖᤧ ᤒᤠᤗᤠᤔᤧᤴ ᤋᤣ᤹ᤖᤢᤀᤠᤱ ᤒᤔᤥᤋ-ᤒᤠᤗᤀᤥ ᤌᤥ᤺ᤰᤏᤧᤛᤡ ᤐᤣᤛᤡ॥ ᤂᤧᤵᤔᤥᤗᤠᤶ ᤒᤠᤗᤠᤔᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤓᤠ ᤁᤢᤕᤠ ᤁᤢᤍᤡᤱᤜᤠ᤹ ᤏᤡᤛᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.