ᤂᤠᤏᤡ᤺ᤳ 21 - LIFOTNTᤁᤏᤠᤏᤡᤜᤠ᤹ ᤜᤠᤖᤡᤔᤧᤍᤩᤧ 1 ᤀᤠᤸᤗ ᤏᤣᤃᤣᤘᤀᤥ ᤁᤧᤕᤢᤱᤒᤠ ᤀᤠᤖᤠᤍᤒᤠ ᤁᤏᤠᤏᤡ ᤜᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤋᤠᤖᤡᤔᤒᤠ ᤗᤠᤶᤔᤥ ᤔᤧᤓᤧᤴᤗ ᤔᤧᤒᤳ ᤁᤧᤗ᤹ᤒᤠ ᤀᤡᤱᤄᤱ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥᤃᤧ. ᤂᤧᤒᤩᤠᤱ ᤂᤧᤱᤜᤠ᤹ᤀᤥᤒᤠ ᤁᤢᤓᤠᤃ ᤂᤢᤏᤧ᤹ ᤋᤧᤶᤛᤢᤛᤡᤀᤠᤱ ᤐᤢᤱᤗᤠᤎᤠᤒᤠ ᤆᤥᤃᤢ ᤑᤧᤳᤋᤢᤛᤡ॥ 2 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴᤏᤢ ᤁᤴ ᤔᤠᤱᤜᤢᤵᤐᤡᤴ ᤔᤧᤈᤥᤃᤢᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤴ ᤔᤏᤠᤜᤠ᤹ ᤀᤠᤏᤡᤃᤣ ᤜᤢᤰᤁᤥ ᤁᤧᤎᤠᤛᤢᤛᤡᤏᤧᤓᤃᤪ ᤀᤠᤏᤡᤃᤣ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤶ ᤐᤡᤖᤢᤶᤛᤡᤶᤒᤧ॥” 3 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤢ. ᤜᤧᤰᤁᤩᤠᤱ ᤁᤏᤠᤏᤡᤜᤠ᤹ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤠᤱ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤴ ᤜᤥᤷᤔᤠ ᤔᤡᤱ ᤔᤧᤘᤠ᤺ᤳᤋᤢᤖᤥ॥ ᤁᤠᤛᤠ ᤀᤛᤣ᤺ᤰ 4 ᤂᤧᤱᤜᤠ᤹ᤖᤧ ᤀᤧᤍᤥᤔ ᤗᤠᤈᤣᤴ ᤁᤵᤔᤠᤀᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤜᤥᤖ ᤁᤥ᤺ᤰᤔᤠᤀᤥᤗᤠᤶ ᤜᤧ᤺ᤳᤋᤠᤱᤒᤠ ᤘᤖ᤺ᤱᤗᤠᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤒᤣ॥ ᤁᤖ ᤗᤠᤶᤍᤡ᤺ᤰᤁᤡᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤛᤠ᤹ᤖᤡᤰ ᤏᤠᤛᤡᤔᤧᤴᤎ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧ॥ 5 ᤂᤧᤒᤩᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤥᤛᤠᤴ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤰᤂᤣ ᤗ᤹ᤔᤠ ᤔᤧᤜᤣ᤺ᤰᤋᤧ. “ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤡᤛᤧ ᤂᤧᤏᤧ᤹ ᤌᤣᤀᤠᤱ ᤔᤡᤛᤪ ᤗᤠᤈᤣ᤹ᤗᤠᤶ ᤀᤠᤏᤡᤃᤣ ᤀᤠᤃ᤻ᤓᤧᤳᤋᤧᤒᤠᤒᤣ᥅ ᤁ᤹ᤕᤥ ᤂᤖᤧ᤺ᤱ ᤜᤥᤵ. ᤁ᤹ᤕᤥ ᤆᤫᤠ᤺ᤳᤋᤠᤱ ᤜᤥᤵ॥ ᤁᤴ ᤁᤢᤈᤠᤃᤧᤓᤧᤶᤒᤠ ᤁᤢᤈᤠ᤺ᤸᤗᤧ ᤀᤠᤏᤡᤃᤣ ᤏᤡᤱᤛᤳᤗᤧ᤹ ᤗᤧ᤹ᤖᤢ᥄” 6 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤢᤏᤡᤱ ᤁᤧᤀᤠ᤺ᤵᤐᤠ ᤀᤛᤣ᤺ᤰᤜᤠ᤹ ᤐᤠᤱᤄᤢ ᤋᤠᤛᤢᤛᤡ. ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤧᤀᤃᤢᤛᤡ. ᤜᤧᤰᤁᤩᤠᤱ ᤕᤖᤡᤰ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ ᤔᤧᤛᤩᤧ॥ 7 ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤥᤛᤠᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤏᤢ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤐᤠᤖᤡᤃᤧᤀᤠᤱ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤠ᤹॥ ᤂᤢᤏᤧ᤹ ᤀᤠᤏᤡᤃᤧᤀᤥᤗᤠᤶ ᤁᤴ ᤀᤛᤣ᤺ᤰᤜᤠ᤹ ᤂᤧᤳᤋᤢᤍᤣᤛᤢᤛᤡᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤧ ᤀᤠᤒᤡᤖᤧ᤹॥” ᤂᤧᤒᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤥᤛᤠ᤺ᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ॥ 8 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤗᤳᤇᤠ ᤁᤢᤏᤡᤱ ᤁᤧᤀᤠ᤺ᤵᤐᤠ ᤀᤛᤣ᤺ᤰ ᤌᤡᤰᤗᤧ ᤁᤢᤈᤀᤡ᤺ᤳ ᤆᤥᤃᤧ᤹ ᤜᤧᤰᤁᤩᤠᤱ ᤂᤧᤴ ᤗᤳᤇᤠ ᤛᤡᤳᤗᤠᤱᤅᤥ ᤑᤥ᤺ᤴᤍᤧ᤹॥ ᤀᤛᤣ᤺ᤰᤁᤡᤸᤗᤧ ᤀᤃᤢᤛᤡᤒᤠᤜᤠ᤹ᤖᤧ ᤂᤧᤴ ᤀᤥᤔᤧᤔᤧᤳᤋᤢ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤜᤡᤱ᤹॥” 9 ᤂᤧᤶᤒᤩᤠᤱ ᤔᤥᤛᤠ᤺ᤸᤗᤧ ᤗᤳᤇᤠ ᤁᤠᤛᤠ ᤀᤛᤣ᤺ᤰ ᤆᤥᤃᤢᤀᤠᤱ ᤂᤧᤴ ᤗᤳᤇᤠ ᤛᤡᤳᤗᤠᤱᤅᤥ ᤑᤥ᤺ᤴᤍᤢ॥ ᤀᤛᤣ᤺ᤰᤁᤡᤸᤗᤧ ᤀᤃᤢᤛᤡᤒᤠ ᤁᤧᤖᤧᤰᤗᤧ ᤁᤠᤛᤠ ᤀᤛᤣ᤺ᤰᤁᤡᤴ ᤀᤥᤔᤧᤔᤧᤳᤋᤢᤀᤠᤱ ᤂᤧᤱᤜᤠ᤹ ᤔᤧᤜᤡᤅᤧ॥ ᤔᤥᤀᤠᤒ ᤐᤣ᤺ᤰᤔᤠᤖᤧ ᤗᤠᤃᤡ ᤗᤠᤶᤍᤡᤰ 10 ᤀᤡᤛᤪᤠᤀᤡᤗᤡᤜᤠ᤹ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤀᤥᤒᤥᤋᤀᤥ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ 11 ᤜᤧᤰᤁᤩᤠᤱ ᤀᤥᤒᤥᤋᤗᤠᤶ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤔᤥᤀᤠᤒᤖᤧ ᤁᤢᤒᤣᤛᤠᤱ ᤏᤠᤱᤃᤧᤴ ᤗᤧᤵᤔᤠᤱ ᤀᤡᤕᤣ-ᤀᤒᤠᤖᤡᤔᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ 12 ᤂᤧᤵᤔᤥᤗᤠᤶ ᤂᤧᤱᤜᤠ᤹ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤈᤣᤖᤣᤍᤒᤠ ᤏᤧᤏᤧᤒᤠᤍᤧᤴᤏᤥ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ 13 ᤂᤧᤵᤔᤥᤗᤠᤶ ᤂᤧᤱᤜᤠ᤹ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤀᤥᤗᤠᤶ ᤁᤧᤗ᤺ᤶᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤀᤷᤏᤥᤏ ᤘᤜ᤺ᤱ ᤏᤠᤎᤠ᤺ᤶᤒᤡ ᤗᤧᤵᤔᤠᤱ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ ᤀᤷᤏᤥᤏ ᤘᤜ᤺ᤱᤅᤡᤱᤃ ᤔᤥᤀᤠᤒᤖᤧ ᤁᤢᤀᤡ᤺ᤴᤍᤥᤖᤥ. ᤂᤧᤴ ᤔᤥᤀᤠᤒᤡ ᤏᤢ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤧ᤹᤺॥ 14 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤧᤴᤎᤱ ᤛᤠᤵᤐᤴᤏᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳᤗᤥ— “ᤛᤢᤐᤠ ᤋᤧᤱᤃᤵᤐᤥᤒᤠ ᤘᤠᤜᤣᤒ ᤕᤧᤰᤕᤰᤁᤥ ᤜᤧᤰᤁᤩᤠᤱ ᤀᤷᤏᤥᤏ ᤘᤜ᤺ᤱᤅᤥᤒᤠ ᤏᤧᤏᤧᤒᤠᤍᤧᤴᤜᤠ᤹ᤀᤥ 15 ᤂᤧᤒᤩᤠᤱ ᤏᤧᤏᤧᤒᤠᤍᤧᤴᤜᤠ᤹ᤀᤥᤒᤠ ᤛᤸᤗᤧ᤺ᤱᤗᤧ᤺ᤱᤒᤠᤜᤠ᤹. ᤂᤧᤴ ᤋᤧᤴᤜᤠ᤹ ᤀᤠᤖ ᤕᤧᤰᤕᤰ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤥᤀᤠᤒᤖᤧ ᤁᤢᤀᤡ᤺ᤴᤍᤥ ᤌᤠᤖᤡᤰ ᤐᤣᤀᤠᤱ ᤏᤧᤖᤥ॥” 16 ᤂᤧᤵᤔᤥᤗᤠᤶ ᤂᤧᤱᤜᤠ᤹ ᤒᤣᤀᤥᤖ ᤔᤧᤒᤣ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ “ᤂᤧᤏᤧ᤹ ᤔᤏᤠᤜᤠ᤹ ᤑᤢᤰᤂᤧᤛᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤆᤫᤠ᤺ᤳ ᤐᤡᤖᤢᤱᤛᤡᤱ᤹” ᤔᤧᤳᤋᤢᤒᤠ ᤘᤠᤒᤠᤰᤁᤡᤴ ᤀᤠᤶᤓᤠ ᤁᤵᤔᤥ ᤏᤧᤖᤥ॥ 17 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤴ ᤏᤠᤖᤠᤑᤥᤔᤠ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖᤥ. “ᤘᤠᤒᤠᤰᤁᤣ. ᤑᤰᤋᤧ ᤗ᤺ᤴᤍᤧ᤹ᤀᤥ. ᤂᤧᤸᤗᤧ ᤁᤢᤛᤠᤶᤗᤥᤴ ᤛᤠᤶᤔᤧᤳᤋᤧᤶᤔᤧ᤹ᤀᤥ 18 ᤂᤧᤴ ᤘᤠᤒᤠᤰᤁᤡᤱᤃ ᤜᤠᤱᤛᤠᤔᤠᤜᤠ᤹ᤖᤧ ᤔᤧᤍᤕᤢᤀᤠᤱ ᤏᤧᤛ᤻ᤛᤧᤖᤥ. ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤋᤰᤁᤠᤳ ᤏᤢ ᤋᤰᤁᤠ᤺ᤳᤋᤡᤸᤗᤧ ᤔᤧᤍᤕᤢᤀᤠᤱ ᤏᤧᤛ᤻ᤛᤧᤖᤥ॥” ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤔᤧᤗ᤺ᤴᤍᤧᤀᤠᤱ ᤔᤳᤋᤠᤏᤠᤀᤥ ᤗᤠᤶᤍᤡᤰ ᤔᤧᤈᤥᤃᤧ. 19 ᤜᤧᤰᤁᤩᤠᤱ ᤔᤳᤋᤠᤏᤠᤗᤠᤶ ᤏᤜᤗᤡᤀᤣᤗᤀᤥ. ᤏᤜᤗᤡᤀᤣᤗᤗᤠᤶ ᤒᤔᤥᤋᤀᤥ. 20 ᤂᤧᤒᤩᤠᤱ ᤒᤔᤥᤋᤗᤠᤶ ᤔᤥᤀᤠᤒᤒᤠ ᤋᤧᤸᤗᤰ ᤁᤧᤏᤧᤒᤠ ᤏᤧᤏᤧᤒᤠᤍᤧᤴᤏᤥ ᤌᤠᤖᤡᤰ ᤗᤠᤶᤍᤡᤰ ᤔᤧᤈᤥᤃᤧ ᤂᤧᤵᤔᤥᤏᤢ ᤐᤡᤛᤃᤠᤒᤠ ᤌᤥ ᤆᤴᤈᤶᤒᤠᤍᤧᤴᤏᤥᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤡᤴ ᤏᤡᤎᤠ᤺ᤵᤗᤥ॥ ᤛᤡᤜᤥᤏᤏᤢ ᤀᤥᤃ ᤜᤠᤱᤜᤠ᤹ ᤜᤠᤖᤡᤔᤧᤍᤩᤧ ( ᤛᤠᤶᤕᤥ ᤀᤡᤱ ᥈:᥈᥌–᥉:᥇᥇ ) 21 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤀᤥ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ. 22 “ᤂᤧᤏᤧ᤹ ᤁᤧᤗᤠ᤹ᤈᤣᤀᤥᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤀᤠᤏᤡᤃᤣ ᤀᤠᤓᤠ᤺ᤰᤋᤧ᤹॥ ᤀᤡᤰᤋᤠᤵ ᤗᤧᤵᤔᤠᤱ ᤀᤡᤃᤪ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤗᤧᤵᤔᤠᤱ ᤀᤠᤏᤡᤃᤣ ᤔᤧᤗᤠᤛᤡᤃᤧᤴ᤹॥ ᤀᤠᤏᤡᤃᤣ ᤂᤧᤏᤧ᤹ ᤀᤠᤳᤋᤡᤴ ᤁᤧᤘᤠᤒᤠᤰᤁᤥᤀᤠᤱ ᤆᤫᤠ᤺ᤳ ᤔᤧᤎᤢᤅᤢᤶᤒᤧᤴ᤹॥ ᤂᤧᤏᤧ᤹ ᤁᤧᤀᤡ᤺ᤴᤍᤥᤴ ᤔᤧᤱᤃᤠ᤺ᤰᤁᤣ ᤌᤠᤖᤡᤰ ᤀᤠᤏᤡᤃᤣ ᤜᤠᤱ ᤔᤠᤖᤠᤶᤔᤣ ᤔᤠᤖᤠᤶᤗᤠᤶᤗᤰ ᤐᤥ᤺ᤰᤂᤡᤃᤧᤀᤠᤱ ᤐᤣᤃᤡᤃᤧ॥” 23 ᤁᤖ ᤛᤡᤜᤥᤏᤖᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤧ᤹ ᤁᤢᤀᤡ᤺ᤴᤍᤥᤴ ᤁᤠ᤺ᤰᤔᤠᤀᤠᤱ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴ॥ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤕᤜᤛᤠ ᤌᤠᤖᤡᤰ ᤑᤧᤖᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥᤃᤧ॥ 24 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢ ᤔᤧᤛᤧᤖᤢ. ᤜᤧᤰᤁᤩᤠᤱ ᤀᤷᤏᤥᤏ ᤜ᤺ᤱᤃᤢᤀᤠᤱᤎᤥ ᤕᤒ᤻ᤒᤥᤁ ᤘᤜ᤺ᤱ ᤌᤠᤖᤡᤰ ᤂᤢᤏᤧ᤹ ᤁᤢᤗᤠᤈᤣᤴ ᤜᤢᤰᤁᤠᤵ ᤔᤧᤈᤥᤃᤢ॥ ᤁᤖ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤀᤥ ᤌᤠᤖᤡᤰᤗᤰ ᤂᤧᤱᤜᤠ᤹ᤖᤧ ᤜᤢᤰᤁᤠᤵ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤴ ᤏᤠ᤺ᤶᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤆᤥᤃᤧ॥ 25 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤴ ᤁᤧᤖᤧᤰ ᤕᤧᤰᤕᤰᤜᤠ᤹ ᤜᤢᤰᤁᤥ ᤔᤧᤎᤠᤛᤢ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤂᤰᤐᤧᤳ ᤕᤧᤰᤕᤰᤜᤠ᤹ᤀᤥ. ᤜᤣᤛ᤻ᤒᤥᤏ ᤏᤢ ᤂᤧᤴ ᤁᤒᤪᤡᤱ ᤐᤡᤛᤠᤱᤒᤠ ᤁᤧᤖᤧᤰ ᤐᤠᤱᤓᤣ᤹ᤜᤠ᤹ᤀᤥᤀᤠᤱ ᤔᤧᤕᤢᤱᤛᤡᤱ॥ 26 ᤜᤣᤛ᤻ᤒᤥᤏᤧᤴ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤖᤧ ᤁᤢᤜᤠᤱᤐᤠᤱ ᤏᤧᤛ᤻ᤛᤧ॥ ᤔᤥᤀᤠᤒᤒᤠ ᤌᤡᤰᤛᤡᤃᤣᤰᤐᤠ ᤜᤠᤱᤅᤡᤴᤏᤢ ᤛᤡᤜᤥᤏᤧᤴ ᤌᤱ ᤌᤰᤋᤧᤀᤠᤱ ᤘᤕᤧ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤈᤣᤴ ᤀᤷᤏᤥᤏ ᤜ᤺ᤱᤃᤢ ᤌᤠᤖᤡᤰᤁᤣ ᤁᤢᤕᤢᤰᤁᤥᤗᤠᤶ ᤏᤠᤵᤋᤢᤀᤠᤱ ᤏᤧᤛ᤻ᤛᤧ॥ 27 ᤁᤸᤗᤧ ᤆᤥᤃᤢᤸᤗᤧᤀᤣ ᤛᤠᤶᤔᤡᤸᤗᤠᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤛᤠᤶᤔᤧᤔᤧᤳᤋᤢᤀᤠᤱ ᤘᤠ᤹ᤖᤥ. “ᤜᤣᤛ᤻ᤒᤥᤏᤀᤥ ᤂᤡᤏᤡ᤹ ᤋᤩᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤴ ᤕᤠᤶᤔᤥ ᤆᤥᤃᤧᤶᤔᤧ᤹ᤀᤥ॥ ᤛᤡᤜᤥᤏᤖᤧ ᤁᤢᤕᤧᤰᤕᤰᤁᤡᤴ ᤕᤠᤶᤔᤥ ᤆᤥ᤺ᤰᤗᤖᤥ॥ 28 “ᤜᤣᤛ᤻ᤒᤥᤏᤗᤠᤶ ᤔᤡᤎᤢᤱ ᤔᤡᤖᤠ᤺ᤰ ᤗ᤺ᤴᤍᤧᤖᤥ. ᤛᤡᤜᤥᤏᤒᤠ ᤕᤧᤰᤕᤰᤁᤥᤗᤠᤶ ᤔᤡᤎᤢᤱ ᤔᤡᤖᤠ᤺ᤰ ᤐᤥᤃᤧᤖᤥ ᤜᤧᤰᤁᤩᤠᤱ ᤔᤥᤀᤠᤒᤒᤠ ᤀᤠᤖ ᤕᤧᤰᤕᤰᤁᤡᤴ ᤏᤢ ᤀᤷᤏᤥᤏ ᤆᤴᤈᤶᤒᤠᤍᤧᤴᤏᤥᤒᤠ ᤔᤏᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧᤖᤥ॥ 29 ᤔᤥᤀᤠᤒᤣ. ᤂᤧᤏᤧ᤹ᤃ ᤁᤧᤈᤡ᤺ᤳᤋᤧ ᤁᤧᤛᤩᤧᤖᤥ᥄ ᤁᤔᤥᤛᤖᤧ ᤁᤢᤔᤏᤠᤀᤣ. ᤂᤧᤏᤧ᤹ ᤁᤧᤔᤧᤃᤧᤖᤥ᥄ ᤂᤧᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤁᤧᤄᤧᤳᤇᤡᤱᤒᤠ ᤜᤧᤰᤁᤣ ᤜᤧᤰᤁᤩᤠᤱ ᤁᤢᤛ᤻ᤛᤠ ᤔᤧᤴᤇᤡᤴᤛᤠᤜᤠ᤹ ᤐᤢᤱᤗᤠᤎᤠᤒᤠ ᤜᤧᤰᤁᤣ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤧᤴ ᤐᤡᤖᤢᤍᤣᤛᤢᤛᤡᤀᤠᤱ ᤘᤠ᤹ᤖᤥ॥ 30 “ᤁᤖ ᤀᤠᤏᤡᤃᤣ ᤂᤧᤱᤜᤠ᤹ ᤏᤠ᤺ᤴᤍᤢᤶᤛᤡᤶᤒᤧᤀᤠᤱ ᤘᤠ᤹ᤖᤥ॥ ᤜᤣᤛ᤻ᤒᤥᤏᤧᤱᤃ ᤍᤡᤒᤥᤏ ᤌᤠᤖᤡᤰᤁᤣ ᤔᤧᤃᤧᤖᤥ. ᤜᤧᤰᤁᤩᤠᤱ ᤔᤣᤍᤒᤠ ᤌᤠᤖᤡᤰ ᤁᤧᤃᤧᤵᤐᤠ ᤏᤥᤐᤠᤴ ᤀᤠᤏᤡᤃᤣ ᤔᤧᤰᤂᤢᤶᤒᤧᤀᤠᤱ ᤘᤠ᤹ᤖᤥ॥” 31 ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤢᤱᤔᤠ ᤔᤧᤜᤣ᤺ᤰᤋᤧ॥ 32 ᤔᤥᤛᤠ᤺ᤸᤗᤧ ᤕᤠᤈᤣᤖᤧᤴ ᤌᤥ᤺ᤶᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤁᤒᤪᤡᤱ ᤐᤡᤛᤠᤱᤒᤠ ᤐᤠᤱᤓᤣ᤹ᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢᤀᤠᤱ ᤂᤧᤵᤔᤥᤒᤠ ᤀᤣᤔᤥᤖᤡᤜᤠ᤹ ᤔᤧᤏᤠ᤺ᤳᤋᤢᤔᤧᤍᤣᤛᤢᤛᤡ॥ 33 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤔᤧᤀᤡᤖᤧᤖ ᤒᤠᤛᤠᤏᤒᤠ ᤗᤠᤶ ᤔᤧᤒᤥ᤺ᤰᤂᤧᤀᤠᤱ ᤔᤧᤎᤥ᤺ᤰᤛᤡᤱ॥ ᤒᤠᤛᤠᤏᤒᤠ ᤜᤠᤱ ᤀᤥᤃ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤂᤧᤱᤜᤠ᤹ᤏᤢ ᤌᤰᤔᤠᤖᤧ ᤗᤠᤃᤡ ᤀᤣᤍᤪᤀᤡ ᤔᤧᤵᤔᤏᤠᤍᤧᤴᤏᤥ ᤔᤧᤗ᤺ᤴᤍᤧ ᤔᤧᤍᤩᤧ॥ 34 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤴᤏᤢ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ. ᤂᤧᤸᤗᤧ ᤁᤧᤖᤧᤰ ᤁᤢᤔᤏᤠᤜᤠ᤹ ᤏᤢ ᤂᤧᤸᤗᤧ ᤁᤢᤗᤠᤈᤣ᤺ᤴᤏᤠᤱ ᤂᤧᤏᤧ᤹ ᤜᤢᤰᤛᤢᤵᤏᤧᤀᤠᤱ ᤘᤠ᤹॥ ᤂᤧᤏᤧ᤹ ᤜᤣᤛ᤻ᤒᤥᤏᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤧᤴ ᤁᤧᤔᤧᤳᤋᤢᤒᤠ ᤜᤧᤰᤁᤣ ᤁᤴᤏᤠᤱ ᤔᤧᤳᤋᤧ᤹॥” 35 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹. ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤀᤠᤳᤋᤡᤴᤏᤠᤱ ᤔᤧᤸᤗᤧᤳ ᤔᤧᤴᤎᤠᤀᤣ ᤁᤧᤖᤧᤰ ᤔᤧᤛᤩᤧᤖᤢᤛᤡᤀᤠᤱ ᤂᤢᤏᤧ᤹ ᤁᤢᤗᤠᤈᤣᤴ ᤜᤢᤰᤁᤠᤵ ᤔᤧᤈᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.