ᤂᤠᤏᤡ᤺ᤳ 20 - LIFOTNTᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤀᤥᤗᤠᤶ ᤆᤫᤠ᤺ᤳ ( ᤗᤠ ᥇᥍:᥇-᥍ ) 1 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤌᤡᤰᤛᤡᤃᤣᤰᤐᤠ ᤗᤠᤀᤥ ᤈᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤃᤧᤖᤧ. ᤜᤧᤰᤁᤩᤠᤱ ᤁᤠᤍᤣᤛᤀᤥ ᤕᤠᤱᤔᤧᤎᤥ᤺ᤰᤋᤧ॥ ᤂᤶᤓᤩᤠᤱ ᤔᤡᤖᤡᤕᤶᤔᤡᤴ ᤀᤠᤶᤓᤠ ᤂᤧᤵᤔᤥ ᤔᤠᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤠᤶᤓᤠ ᤂᤧᤵᤔᤥ ᤔᤧᤗᤢᤵᤋᤢ॥ 2 ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤗᤠᤃᤡ ᤂᤧᤵᤔᤥ ᤌᤢᤱᤔᤠ ᤆᤫᤠ᤺ᤳ ᤜᤥ᤺ᤵᤋᤧ. ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤧᤈᤢᤵᤛᤧ॥ 3 ᤂᤧᤱᤜᤠ᤹ ᤔᤥᤛᤠ᤺ᤴᤏᤢ ᤂᤧᤔᤠ᤹ ᤔᤧᤈᤥᤃᤧᤀᤠᤱ ᤀᤰᤂᤣ ᤔᤧᤔᤧᤳᤋᤢ. “ᤀᤠᤏᤡᤃᤣ ᤑᤢ᤹ᤏᤢᤛᤠ᤹ᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤣᤛᤠᤱ ᤔᤧᤛᤩᤧ᤺ᤸᤗᤧ ᤀᤠᤏᤡᤃᤧᤀᤠᤱ ᤛᤩᤧ᤹ᤀᤡᤃᤧᤸᤗᤧ ᤏᤢᤖᤧᤒᤠᤔᤧᤴ॥ 4 ᤌᤣᤀᤠᤱᤓᤧᤸᤗᤧ ᤀᤠᤸᤗ ᤀᤠᤏᤡᤃᤣ ᤐᤡᤳᤌᤰᤛᤠᤜᤠ᤹ᤏᤢ ᤛᤥᤛᤥᤖᤡᤰ ᤀᤠᤏᤡᤃᤧᤀᤠᤱ ᤛᤩᤧ᤹ᤀᤡᤃᤧ॥ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤴ ᤂᤧᤏᤧ᤹ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤓᤧᤳᤋᤢᤛᤡᤒᤠᤒᤣ᥅ 5 ᤔᤡᤛᤪᤗᤠᤶ ᤌᤣᤀᤠᤱ ᤁᤴ ᤋᤠᤵᤑᤧ᤺ᤶᤒᤠ ᤋᤧᤴᤏᤥ ᤀᤠᤏᤡᤃᤣ ᤕᤠᤵᤔᤡ ᤁᤧᤓᤧᤳᤋᤧᤒᤠᤒᤣ᥅ ᤁᤴ ᤋᤧᤴᤏᤥ ᤁᤢᤈᤠ. ᤀᤡᤃᤪ ᤐ᤺ᤳᤇᤣ᤹ ᤁᤡᤃᤪ ᤆᤧᤸᤗᤧᤰᤛᤣ᤹ ᤑᤢ᤹ᤗᤧᤛᤣ᤹ᤜᤠ᤹ ᤌᤧᤔᤠᤀᤠᤱ ᤜᤥᤵ॥ ᤁ᤹ᤕᤥ ᤌᤢᤱᤔᤠ ᤆᤫᤠ᤺ᤳᤋᤠᤱ ᤜᤥᤵ᥄” 6 ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡᤗᤠᤶ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤥ ᤐᤣᤛᤡᤀᤠᤱ ᤛᤠᤶᤒᤥᤴ ᤜᤒᤳ ᤑᤴᤏᤧᤛᤡᤀᤠᤱ ᤏᤧᤏᤧᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 8 “ᤔᤠᤱᤜᤢᤵ ᤛᤴᤍᤥ᤺ᤰᤁᤧᤸᤗᤧ ᤁᤢᤍᤃᤡ ᤁᤧᤏᤧᤒᤠ ᤁᤴ ᤋᤰᤁᤠ᤺ᤳᤋᤡᤴ ᤋᤣ᤹ᤖᤧᤀᤠᤱ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤶᤓᤢ᤹ ᤜᤠᤖᤢᤏᤧᤴ ᤐᤣᤛᤧ᤹ ᤜᤧᤰᤁᤩᤠᤱ ᤛᤱᤈᤢᤶᤓᤥ᤺ᤴ ᤑᤢᤰᤂᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤗᤧ ᤋᤃᤡᤀᤣ ᤁᤴ ᤕᤠᤰᤐᤣᤴ ᤀᤡᤱᤈᤠᤱ ᤐᤡᤖᤧ᤹ ᤜᤧᤰᤁᤩᤠᤱ ᤁᤴ ᤕᤠᤰᤐᤣ᤹ᤀᤥᤗᤠᤶ ᤆᤫᤠ᤺ᤳ ᤗᤠᤰᤋᤢ ᤗ᤺ᤴᤏᤠᤱ ᤂᤧᤏᤧ᤹ ᤛᤱᤈᤢᤶᤓᤥ᤺ᤴ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤳᤌᤰᤛᤠᤜᤠ᤹ ᤕᤠᤰᤐᤣ᤹ᤀᤥᤗᤠᤶ ᤆᤫᤠ᤺ᤳ ᤁᤧᤒᤡᤖᤢᤛᤡ᤹॥” 9 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤜᤧᤰᤁᤣ ᤔᤥᤛᤠ᤺ᤸᤗᤧ ᤋᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤍᤃᤡᤗᤠᤶ ᤐᤣ. 10 ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤕᤠᤰᤐᤣ᤺ᤸᤗᤧ ᤁᤢᤍᤃᤡ ᤛᤱᤈᤢᤶᤓᤥ᤺ᤴ ᤑᤢᤰᤂᤧᤛᤢᤛᤡ॥ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤵᤛᤧᤶᤔᤧ᤹. ᤐᤡᤑᤩᤢᤱ ᤁᤧᤈᤥ᤺ᤰᤐᤠᤛᤣ᥄ ᤌᤣ ᤀᤠᤴᤇᤡᤃᤣ ᤜᤠᤒᤠ ᤁᤴ ᤕᤠᤰᤐᤣ᤹ᤀᤥᤗᤠᤶ ᤂᤡᤏᤡ᤹ ᤆᤫᤠ᤺ᤳ ᤗ᤺ᤳᤇᤢ ᤐᤡᤀᤠᤛᤡᤃᤧᤒᤡ᥅” 11 ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤑᤥ᤺ᤰᤂᤢᤀᤠᤱ ᤏᤡᤖᤧᤱ ᤁᤢᤍᤰᤁᤠ᤺ᤳᤋᤡᤸᤗᤧ ᤕᤠᤰᤐᤣᤴ ᤜᤡᤵᤋᤢ॥ ᤂᤧᤒᤩᤠᤱ ᤂᤧᤵᤔᤥᤗᤠᤶ ᤑᤈᤱᤈᤱ ᤗ᤹ᤖᤡᤰ ᤘᤧᤳᤋᤧᤛᤖᤧ ᤆᤫᤠ᤺ᤳ ᤑᤰᤋᤧᤗ᤺ᤴᤍᤧ. ᤜᤧᤰᤁᤩᤠᤱ ᤛᤱᤈᤢᤶᤓᤥ ᤏᤢ ᤐᤡᤳ ᤌᤰᤛᤠᤜᤠ᤹ᤖᤧ ᤔᤧᤎᤢᤅᤢ॥ 12 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤛᤣᤛᤣ ᤆᤥᤃᤠᤱᤒᤠ ᤐᤠ᤺ᤴᤏᤥ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤏᤢᤖᤡᤰᤁᤠᤱ ᤂᤧᤴᤇᤡ᤹ ᤀᤠᤱᤃᤠ᤹ ᤏᤛᤠᤴ ᤕᤠᤵᤔᤡ ᤁᤧᤴᤈᤥᤃᤧᤛᤡᤴᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤔᤠ ᤀᤡ᤺ᤳᤋᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤂᤧᤴᤇᤡ᤹ ᤂᤧᤱᤜᤠ᤹ ᤁᤧᤵᤔᤠ ᤁᤧᤱᤄᤥᤛᤢᤴ॥” 13 ᤔᤣᤖᤡᤒᤠᤀᤥᤒᤠ ᤆᤫᤠ᤺ᤳ ᤜᤠᤒᤠ ᤁᤴ ᤔᤧᤔᤧᤳᤋᤢ᤹॥ ᤜᤠᤒᤠ ᤁ᤹ᤕᤥ ᤀᤡᤛᤪᤠᤀᤡᤗᤡᤜᤠ᤹ ᤕᤜᤘᤣ ᤍᤠᤱᤒᤠᤴᤏᤢ ᤂᤧᤔᤠ᤹ ᤔᤧᤈᤥᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤢᤏᤧ᤹ ᤛᤣᤛᤣ ᤗ᤹ᤖᤡᤰ ᤀᤥ᤺ᤴᤎᤠᤰᤛᤡᤱᤗᤥ॥ ᤀᤣᤍᤥᤔᤒᤠ ᤜᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤹ᤖᤢᤛᤡ 14 ᤔᤥᤛᤠ᤺ᤸᤗᤧ ᤁᤠᤍᤣᤛᤗᤠᤶ ᤀᤡᤱᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤣᤍᤥᤔᤒᤠ ᤜᤠᤱᤅᤡᤴ ᤀᤡᤱᤄᤱ ᤜᤠᤰᤋᤢᤖᤥ. “ᤂᤧᤏᤧ᤹ ᤁᤧᤃᤠ᤹ᤀᤡ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ᤀᤠᤏᤡᤃᤣ ᤋᤢᤔᤢᤶᤒᤧᤒᤠ ᤋᤢᤰᤂᤧ᤺ᤴ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤘᤠ᤹॥ 15 ᤀᤠᤏᤡᤃᤣ ᤌᤠ᤺ᤰᤌᤧᤒᤠᤜᤠ᤹ ᤔᤡᤛᤪ ᤗᤠᤈᤣ᤹ᤀᤥ ᤔᤧᤒᤣᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤀᤠᤏᤡᤃᤣ ᤕᤖᤡᤰ ᤋᤱᤒᤣ ᤌᤠᤖᤡᤰ ᤔᤡᤛᤪ ᤗᤠᤈᤣ᤹ᤀᤥ ᤘᤕᤡᤃᤧ. ᤂᤶᤓᤩᤠᤱ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤌᤠ᤺ᤰᤌᤧᤒᤠᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤡᤃᤧ॥ 16 ᤁᤖ ᤕᤜᤘᤣ ᤍᤠᤱᤒᤠᤴ ᤀᤠᤏᤡᤃᤣ ᤐᤣᤗᤡ ᤑᤠᤰᤋᤢᤶᤒᤧ. ᤂᤧᤒᤩᤠᤱ ᤂᤢᤏᤧ᤹ ᤀᤠᤏᤡᤃᤣ ᤐᤣᤗᤡᤴ ᤂᤧᤵᤛᤢ. ᤂᤶᤓᤩᤠᤱ ᤂᤢᤏᤧ᤹ ᤔᤠᤱᤗᤠᤀᤡᤱᤒᤠ ᤌᤡᤰ ᤐᤠᤱᤄᤢᤀᤠᤱ ᤔᤡᤛᤪᤗᤠᤶ ᤀᤠᤏᤡᤃᤣ ᤗ᤺ᤳᤋᤡ ᤑᤧᤳᤋᤡᤃᤧ॥ “ᤀᤠᤏᤡᤃᤣ ᤀᤠᤸᤗᤥ ᤂᤧᤏᤧ᤹ ᤁᤧᤗᤠᤈᤣ᤹ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤁᤠᤍᤣᤛ ᤕᤧᤰᤕᤰᤁᤥ ᤘᤕᤡᤃᤧ॥ 17 ᤆᤢᤱᤈᤡᤃᤧᤴ ᤐᤣᤗᤡ ᤑᤠᤰᤁᤠᤛᤡᤃᤧ. ᤀᤠᤏᤡᤃᤣ ᤂᤧᤏᤧ᤹ ᤁᤧᤗᤠᤈᤣ᤹ᤀᤥᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹॥ ᤀᤡᤰᤋᤠᤵ ᤀᤡᤃᤪ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤗᤠᤶ ᤀᤠᤏᤡᤃᤣ ᤐᤥ᤺ᤰᤂᤡᤃᤧᤀᤠᤱ ᤔᤧᤒᤣᤃᤡᤃᤧᤴ᤹॥ ᤂᤧᤏᤧ᤹ ᤁᤧᤈᤫᤠ᤺ᤳ ᤌᤢᤱᤔᤠ ᤁᤧᤘᤠᤒᤠᤰᤁᤥ ᤀᤠᤏᤡᤃᤣ ᤆᤫᤠ᤺ᤳ ᤔᤧᤎᤢᤅᤢᤶᤒᤧᤴ᤹॥ ᤜᤠᤱ ᤔᤠᤖᤠᤶᤗᤠᤶ ᤀᤠᤏᤡᤃᤣ ᤐᤥ᤺ᤰᤂᤡᤃᤧᤀᤠᤱ ᤐᤣᤃᤡᤃᤧ॥ ᤂᤧᤏᤧ᤹ ᤁᤧᤀᤡ᤺ᤴᤍᤥᤴ ᤔᤧᤱᤃᤠ᤺ᤰᤁᤣ ᤌᤠᤖᤡᤰ ᤀᤠᤏᤡᤃᤣ ᤆᤢᤰᤘᤠ ᤑᤧᤱᤘᤠ ᤔᤧᤗ᤹ᤖᤡᤃᤧᤴ᤹॥” 18 ᤁᤖ ᤀᤣᤍᤥᤔᤒᤠ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤗᤠᤈᤣ᤹ᤗᤠᤶ ᤐᤥᤱᤔᤠᤀᤠᤱ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤱᤄᤥᤛᤡᤴ᤹. ᤔᤣ᤺ᤴᤏᤧᤓᤃᤪ ᤋᤠᤓᤣ᤺ᤴᤏᤢ ᤑᤳᤋᤠᤛᤡᤃᤧ॥” 19 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢᤛᤡ. “ᤔᤠᤖᤠᤶ ᤗᤠᤶᤒᤠᤀᤣ ᤀᤠᤏᤡᤃᤣ ᤐᤥ᤺ᤰᤂᤡᤃᤧᤀᤠᤱ ᤐᤣᤃᤡᤃᤧ᤹॥ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤐᤡᤳ ᤌᤰᤛᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤫᤠ᤺ᤳᤋᤧᤴ ᤌᤢᤅᤢᤶᤒᤧᤏᤧᤓᤃᤪ ᤂᤧᤸᤗᤧ ᤁᤢᤔᤧᤸᤗᤢᤱ ᤀᤠᤏᤡᤃᤣ ᤜᤢᤅᤢᤶᤒᤧ॥ ᤀᤠᤏᤡᤃᤣ ᤂᤧᤏᤧ᤹ ᤁᤧᤗᤠᤈᤣ᤹ᤀᤥᤗᤠᤶᤒᤠᤖᤰ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹॥” 20 ᤕᤠᤶᤔᤥ ᤀᤣᤍᤥᤔᤒᤠ ᤜᤠᤱᤅᤡᤸᤗᤧ ᤔᤧᤳᤋᤢᤛᤡ. “ᤀᤠᤏᤡᤃᤣ ᤂᤡᤏᤡ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤁᤠᤛᤡᤃᤧᤴ᤹᥄” ᤂᤧᤒᤩᤠᤱ ᤀᤣᤍᤥᤔᤒᤠ ᤜᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤢᤰᤁᤧᤃᤢᤒᤠ ᤕᤖᤡᤰ ᤌᤰᤛᤢᤒᤠ ᤑᤧᤳᤋᤢᤛᤡᤀᤠᤱ ᤑᤧᤖᤧ॥ 21 ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤴᤍᤥ᤺ᤴ ᤁᤠ᤺ᤰᤔᤠᤀᤠᤱ ᤐᤣ᤺ᤰᤔᤠ ᤂᤢᤏᤧ᤹ ᤔᤧᤍᤧᤴᤍᤧᤴ॥ ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤧᤵᤔᤥᤗᤠᤶ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤖᤥ॥ ᤜᤠᤖᤢᤏᤧᤴ ᤔᤠᤛᤡᤱ 22 ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤁᤠᤍᤣᤛᤗᤠᤶ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤜᤥᤖ ᤁᤥ᤺ᤰᤔᤠᤀᤥ ᤔᤧᤃᤧᤖᤧ ᤔᤧᤓᤧᤖᤧ॥ 23 ᤀᤧᤍᤥᤔ ᤗᤠᤈᤣ᤹ᤒᤠ ᤀᤡ᤺ᤴᤍᤥ ᤐᤣᤛᤠᤱᤒᤠ ᤜᤥᤖ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤀᤰᤂᤣ ᤔᤧᤳᤋᤢᤛᤡ. 24 “ᤜᤠᤖᤢᤏᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤀᤥ ᤐᤣ᤺ᤰᤁᤠᤱ ᤋᤱᤛᤡᤱ॥ ᤔᤣᤖᤡᤒᤠᤀᤥᤒᤠ ᤆᤫᤠ᤺ᤳᤋᤥ ᤂᤧᤴᤇᤡ᤹ ᤏᤧᤵᤔᤈᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤃᤧᤛᤡᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤐᤡᤔᤠ ᤀᤡ᤺ᤳᤋᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤂᤧᤴ ᤗᤠ᤺ᤵᤔᤠ ᤔᤧᤄᤥᤏᤧᤴ॥ 25 ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤂᤧᤏᤧ᤹ ᤌᤥ ᤜᤥᤖ ᤁᤥ᤺ᤰᤔᤠᤀᤥ ᤋᤣ᤹ᤖᤧᤛᤧ᤹ᤀᤠᤱ ᤐᤣᤃᤧ᤹॥ 26 ᤜᤠᤖᤢᤏᤖᤧ ᤁᤢᤈᤠᤱᤅᤡᤴ ᤑᤧᤴᤍᤧ᤹ᤀᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤆᤠᤰᤋᤧ᤹॥ ᤂᤧᤴ ᤀᤣᤃᤠᤱ ᤜᤠᤖᤢᤏᤧᤴ ᤂᤢᤏᤧ᤹ ᤁᤢᤎᤠ᤺ᤰᤜᤠ᤹ᤀᤥ ᤐᤣ᤺ᤰᤁᤠᤱ ᤋᤱᤛᤡᤱ᤹ ᤂᤧᤒᤩᤠᤱ ᤂᤧᤵᤔᤥᤀᤣ ᤛᤡᤖᤥ॥” 27 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤜᤧᤰᤁᤣᤀᤣ ᤔᤥᤛᤥ᤺ᤸᤗᤧ ᤆᤥᤃᤢ. ᤜᤧᤰᤁᤩᤠᤱ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤔᤡᤰᤗᤧ ᤋᤃᤡ ᤂᤧᤱᤜᤠ᤹ ᤜᤥᤖ ᤁᤥ᤺ᤰᤔᤠᤀᤥ ᤔᤧᤎᤥ᤺ᤰᤛᤡᤱ ᤔᤧᤒᤣ॥ 28 ᤔᤥᤛᤠ᤺ᤸᤗᤧ ᤜᤠᤖᤢᤏᤖᤧ ᤁᤢᤈᤠᤱᤅᤡᤴ ᤑᤧᤴᤍᤢᤀᤠᤱ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤆᤠᤰᤋᤢ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤁᤥ᤺ᤰᤔᤠᤸᤗᤧ ᤁᤢᤈᤱᤅᤥ ᤜᤠᤖᤢᤏᤧᤴ ᤔᤠᤛᤡᤱ॥ ᤂᤧᤒᤩᤠᤱ ᤔᤥᤛᤠᤴ ᤏᤢ ᤀᤣᤗᤠᤈᤠᤖᤧᤴ ᤁᤥ᤺ᤰᤔᤠᤀᤥᤗᤠᤶ ᤕᤥ ᤌᤠᤏᤧᤛᤡ॥ 29 ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤜᤠᤖᤢᤏᤧᤴ ᤔᤠᤛᤡᤱᤒᤠ ᤏᤡᤱᤘᤠ᤹ ᤔᤧᤄᤥᤛᤢ. ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤢᤶᤒᤥᤱ ᤕᤧᤴ ᤌᤠᤖᤡᤰ ᤔᤧᤖᤡᤱ ᤔᤧᤎᤰᤋᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.