ᤂᤠᤏᤡ᤺ᤳ 2 - LIFOTNTᤌᤠ᤺ᤰ ᤌᤠ᤺ᤰᤐᤠ ᤔᤏᤠᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤕᤢᤱᤔᤠ ᤋᤱᤃᤠᤶ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 2 “ᤀᤡᤛᤪᤠᤀᤡᤗᤡᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤢᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤡᤛᤠ᤺ᤸᤗᤧ ᤁᤢᤛᤡᤃᤠᤱ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢᤖ॥ ᤂᤧᤱᤜᤠ᤹ᤖᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤁᤧᤖᤧᤰ ᤐᤡᤛᤠᤱ ᤀᤠᤈᤧᤳ ᤗᤠ᤺ᤳᤗᤠ᤺ᤳ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢᤖ॥” 3 ᤏᤠᤱᤃᤧᤴ ᤗᤧᤵᤔᤠᤱ ᤏᤠᤶ ᤁᤧᤗᤡᤱᤒᤠ ᤐᤡᤛᤠᤱ ᤕᤜᤢᤍᤠ᤺ᤸᤗᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤏᤡᤛᤠ᤺ᤸᤗᤧ ᤁᤢᤛᤡᤃᤠᤱ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤈᤥᤃᤢᤖ॥ ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ ᤏᤜᤛᤥᤏᤧᤴ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤐᤥᤱᤗ॥ 4 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠ ᤛᤢᤶ ᥍᥊.᥌᥆᥆ ᤔᤧᤘᤠ᤹॥ 5 ᤂᤧᤸᤗᤧ ᤁᤢᤒᤣᤛᤠᤱ ᤀᤡᤛ᤻ᤛᤠᤂᤠᤖᤖᤧ ᤁᤢᤎᤠ᤺ᤰᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤓᤥ᤺ᤰᤂᤢᤖ॥ ᤀᤡᤛ᤻ᤛᤠᤂᤠᤖᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠ ᤛᤢᤀᤠᤖᤖᤧ ᤁᤢᤛ᤻ᤛᤠ ᤏᤠᤋᤠᤏᤣᤗᤧᤴ ᤐᤥᤱᤗ॥ 6 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠ ᤛᤢᤶ ᥋᥊.᥊᥆᥆ ᤔᤧᤘᤠ᤹॥ 7 ᤂᤧᤴ ᤀᤣᤃᤠᤱ ᤈᤒᤗᤢᤏᤖᤧ ᤁᤢᤎᤠ᤺ᤰᤜᤠ᤹ ᤔᤧᤘᤠ᤹ᤖ॥ ᤈᤒᤗᤢᤏᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠ ᤜᤧᤗᤥᤏᤧᤸᤗᤧ ᤁᤢᤛ᤻ᤛᤠ ᤀᤣᤗᤡᤀᤠᤒᤧᤴ ᤐᤥᤱᤗ॥ 8 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠ ᤛᤢᤶ ᥋᥍.᥊᥆᥆ ᤔᤧᤘᤠ᤹॥ 9 ᤕᤜᤢᤍᤠ᤺ᤸᤗᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ ᤔᤧᤏᤡᤖᤢᤛᤡᤒᤠᤜᤠ᤹ᤖᤧ ᤁᤧᤖᤧᤰ ᤂᤢᤏᤡ᤹ ᤂᤠᤏᤡ᤺ᤳᤋᤡᤴ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤏᤠᤛᤢᤶ ᤁᤢᤀᤡᤛᤡᤰ ᥇.᥎᥌.᥊᥆᥆ ᤔᤧᤘᤠ᤹॥ ᤁᤴᤜᤠ᤹ᤀᤣ ᤋᤃᤡ ᤋᤃᤡ ᤗᤠᤱᤔᤧᤄᤣ᤺ᤰᤁᤠᤱ ᤔᤧᤒᤣ᤺ᤰ॥ 10 ᤗᤠᤱᤃᤧᤳ ᤐᤡᤛᤠᤱ ᤖᤢᤒᤣᤏᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤔᤏᤠᤛᤢᤶᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤛᤠ᤺ᤸᤗᤧ ᤁᤢᤛᤡᤃᤠᤱ ᤔᤧᤘᤠ᤹॥ ᤖᤢᤒᤣᤏᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤛᤍᤣᤀᤢᤖᤖᤧ ᤁᤢᤛ᤻ᤛᤠ ᤀᤣᤗᤡᤛᤢᤖᤧᤴ ᤐᤥᤱᤗ॥ 11 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠ ᤛᤢᤶᤜᤠ᤹ ᥊᥌.᥋᥆᥆ ᤔᤧᤘᤠ᤹॥ 12 ᤂᤧᤸᤗᤧ ᤁᤢᤒᤣᤛᤠᤱ ᤛᤡᤔᤡᤕᤥᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢᤖ॥ ᤛᤡᤔᤡᤕᤥᤏᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤛᤢᤖᤡᤛᤍ᤻ᤍᤤᤖᤧ ᤁᤢᤛ᤻ᤛᤠ ᤛᤗᤢᤔᤡᤀᤣᤗᤧᤴ ᤐᤥᤱᤗ॥ 13 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠ ᤛᤢᤶᤜᤠ᤹ ᥋᥏.᥉᥆᥆ ᤔᤧᤘᤠ᤹॥ 14 ᤂᤧᤴ ᤀᤣᤃᤠᤱ ᤃᤠᤍᤖᤧ ᤁᤢᤎᤠ᤺ᤰᤜᤠ᤹ ᤔᤧᤘᤠ᤹ᤖ॥ ᤍᤢᤀᤣᤗᤖᤧ ᤁᤢᤛ᤻ᤛᤠ ᤀᤣᤗᤩᤠᤛᤠᤐᤧᤴ ᤃᤠᤍᤧᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤐᤥᤱᤗ॥ 15 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠ ᤛᤢᤶᤜᤠ᤹ ᥊᥋.᥌᥋᥆ ᤔᤧᤘᤠ᤹॥ 16 ᤖᤢᤒᤣᤏᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤏᤡᤖᤢᤛᤡᤒᤠ ᤁᤧᤖᤧᤰ ᤂᤠᤏᤡ᤺ᤳᤋᤧᤴ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤏᤠᤛᤢᤶ ᤁᤢᤀᤡᤛᤡᤰ ᥇.᥋᥇.᥊᥋᥆ ᤔᤧᤘᤠ᤹॥ ᤂᤧᤱᤜᤠ᤹ ᤏᤡᤛᤡᤃᤣᤰᤐᤠ ᤋᤡ᤺ᤰᤗᤠᤀᤥ ᤗᤠᤱᤔᤧᤄᤣ᤺ᤰ॥ 17 ᤂᤧᤒᤩᤠᤱ ᤌᤡᤰᤛᤡᤃᤣᤰᤐᤠ ᤏᤧᤳᤇᤡ ᤛᤠ᤺ᤱᤃᤠᤜᤡᤶᤜᤠ᤹ ᤏᤢ ᤀᤣᤃᤠᤱᤛᤔᤠ ᤏᤧᤳᤇᤡ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤧᤒᤡᤜᤠ᤹ᤖᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤒᤰᤂᤢᤀᤠᤱ ᤗᤠᤱᤔᤧᤄᤣ᤺ᤰᤗ॥ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢᤒᤠ ᤁᤢᤀᤡᤛᤡᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤡᤛᤠ ᤛᤡᤃᤠᤱ ᤁᤧᤖᤧᤰ ᤔᤏᤠᤜᤠ᤹ ᤌᤡᤰᤌᤡᤰ ᤀᤠᤵᤑᤣᤰ ᤀᤠᤵᤑᤣᤰ ᤋᤧᤴᤏᤥ ᤗᤠᤱᤔᤧᤄᤣ᤺ᤰᤗ॥ 18 ᤏᤠᤶᤎᤠ ᤐᤡᤛᤠᤱ ᤀᤣᤑᤪᤠᤀᤡᤔᤖᤧ ᤁᤢᤛᤠ᤺ᤱᤃᤠᤜᤡᤶᤔᤥᤒᤠ ᤔᤏᤠᤛᤢᤶᤜᤠ᤹ ᤂᤢᤴᤇᤡ᤹ ᤏᤡᤛᤠ᤺ᤸᤗᤧ ᤁᤢᤛᤡᤃᤠᤱ ᤔᤧᤘᤠ᤹॥ 19 ᤀᤡᤑᤪᤠᤀᤡᤔᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤀᤶᤔᤡᤜᤢᤍᤖᤧ ᤁᤢᤛ᤻ᤛᤠ ᤀᤣᤗᤡᤛᤠᤔᤠ᤺ᤴ ᤐᤥᤱᤗ॥ ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤛᤢᤶᤜᤠ᤹ ᥊᥆.᥋᥆᥆ ᤔᤧᤘᤠ᤹॥ 20 ᤂᤧᤸᤗᤧ ᤁᤢᤒᤣᤛᤠᤱ ᤔᤏᤛ᤻ᤛᤣ᤺ᤸᤗᤧ ᤁᤢᤎᤠ᤺ᤰᤜᤠ᤹ ᤔᤧᤘᤠ᤹ᤖ॥ ᤔᤏᤛ᤻ᤛᤣ᤺ᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤐᤍᤠᤛᤢᤖᤖᤧ ᤁᤢᤛ᤻ᤛᤠ ᤃᤔᤗᤡᤀᤣᤗᤧᤴ ᤐᤥᤱ॥ 21 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤛᤢᤶᤜᤠ᤹ ᥉᥈.᥈᥆᥆ ᤔᤧᤘᤠ᤹॥ 22 ᤂᤧᤴ ᤀᤣᤃᤠᤱ ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤁᤥᤒᤠ ᤔᤏᤠᤜᤠ᤹ ᤔᤧᤘᤠ᤹ᤖ॥ ᤒᤣᤏᤩᤠᤔᤡᤏᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤃᤡᤍᤣᤀᤥᤏᤡᤖᤧ ᤁᤢᤛ᤻ᤛᤠ ᤀᤒᤡᤍᤠᤏᤧᤴ ᤐᤥᤱᤗ॥ 23 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤛᤢᤶᤜᤠ᤹ ᥉᥋.᥊᥆᥆ ᤔᤧᤘᤠ᤹॥ 24 ᤀᤡᤑᤪᤠᤀᤡᤔᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤏᤡᤖᤢᤛᤡᤒᤠ ᤁᤧᤖᤧᤰ ᤂᤠᤏᤡ᤺ᤳᤋᤧᤴ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤏᤠᤛᤢᤶᤜᤠ᤹ ᤁᤢᤀᤡᤛᤡᤰ ᥇.᥆᥎.᥇᥆᥆ ᤔᤧᤘᤠ᤹॥ ᤁᤴᤜᤠ᤹ ᤛᤢᤶᤛᤡᤃᤣᤰᤐᤠ ᤋᤡ᤺ᤰᤗᤠᤀᤥ ᤗᤠᤱᤔᤧᤄᤣ᤺ᤰ॥ 25 ᤌᤠᤱᤃᤧᤳ ᤗᤧᤵᤔᤠᤱ ᤍᤠᤏᤖᤧ ᤁᤢᤛᤠ᤺ᤱᤃᤠᤜᤡᤶᤔᤥᤒᤠ ᤔᤏᤠᤛᤢᤶᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤛᤠ ᤛᤡᤃᤠᤱ ᤔᤧᤘᤠ᤹॥ ᤍᤠᤏᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤀᤶᤔᤡᤛᤍ᤻ᤍᤤᤖᤧ ᤁᤢᤛ᤻ᤛᤠ ᤀᤜᤡᤀᤣᤈᤣᤖᤧᤴ ᤐᤥᤱᤗ॥ 26 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤛᤢᤶᤜᤠ᤹ ᥌᥈.᥍᥆᥆ ᤔᤧᤘᤠ᤹॥ 27 ᤂᤧᤸᤗᤧ ᤁᤢᤏᤡ᤺ᤳᤋᤠᤱ ᤀᤠᤛᤣᤖᤖᤧ ᤁᤢᤎᤠ᤺ᤰᤁᤥᤒᤠ ᤔᤏᤠᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤓᤥ᤺ᤰᤂᤢᤖ॥ ᤀᤠᤛᤣᤖᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤀᤥᤁᤪᤠᤏᤖᤧ ᤁᤢᤛ᤻ᤛᤠ ᤐᤃᤡᤀᤣᤗᤧᤴ ᤐᤥᤱᤗ॥ 28 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤛᤢᤶᤜᤠ᤹ ᥊᥇.᥋᥆᥆ ᤔᤧᤘᤠ᤹॥ 29 ᤂᤧᤴ ᤀᤣᤃᤠᤱ ᤏᤵᤋᤠᤗᤡᤖᤧ ᤁᤢᤎᤠ᤺ᤰᤁᤥᤒᤠ ᤔᤏᤠᤜᤠ᤹ ᤔᤧᤘᤠ᤹ᤖ॥ ᤏᤵᤋᤠᤗᤡᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠ ᤀᤣᤏᤠᤏᤖᤧ ᤁᤢᤛ᤻ᤛᤠ ᤀᤜᤡᤖᤧᤴ ᤐᤥᤱ॥ 30 ᤂᤠᤏᤡ᤺ᤳ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤛᤢᤶᤜᤠ᤹ ᥋᥉.᥊᥆᥆ ᤔᤧᤘᤠ᤹॥ 31 ᤍᤠᤏᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤏᤡᤖᤢᤛᤡᤒᤠ ᤁᤧᤖᤧᤰ ᤕᤧᤶᤒᤡᤳᤇᤠ ᤔᤏᤠᤛᤢᤶ ᤂᤠᤏᤡ᤺ᤳᤋᤧᤴ ᥇.᥋᥍.᥌᥆᥆ ᤔᤧᤘᤠ᤹॥ ᤁᤴᤜᤠ᤹ᤃ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤡᤛᤠ᤺ᤸᤗᤧ ᤁᤢᤛᤡᤃᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤗᤠᤱᤔᤧᤄᤣ᤺ᤰ॥ 32 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤛᤕᤱ ᤁᤢᤀᤡᤛᤡᤰ ᤔᤧᤏᤡᤖᤢᤛᤡᤒᤠᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤏᤠᤛᤢᤶ ᤁᤢᤀᤡᤛᤡᤰ ᤁᤧᤖᤧᤰ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤏᤡᤖᤢᤛᤡᤒᤠᤜᤠ᤹ ᤁᤧᤖᤧᤰ ᥌.᥆᥉.᥋᥋᥆ ᤔᤧᤘᤠ᤹॥ 33 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤀᤡᤱᤈᤠᤱ ᤀᤡᤛᤡ᤺ᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤗᤧᤒᤡᤖᤧ ᤁᤢᤎᤠ᤺ᤰᤜᤠ᤹ ᤔᤧᤏᤡᤖᤢᤛᤡᤒᤠ ᤜᤥ᤺ᤵᤋᤧ॥ 34 ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤜᤧᤰᤁᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤡᤛᤠ᤺ᤸᤗᤧ ᤁᤢᤏᤡ᤺ᤳᤋᤠᤱ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤒᤠᤅᤣ ᤀᤠᤒᤠᤅᤣ ᤌᤠ᤺ᤰ ᤏᤢ ᤜᤡᤶᤛᤕᤱ ᤁᤢᤀᤡᤛᤡᤰ ᤂᤧᤱᤜᤠ᤹ ᤗᤠᤱᤔᤧᤄᤣᤃᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.