ᤂᤠᤏᤡ᤺ᤳ 19 - LIFOTNT

ᤛᤢᤳᤌᤥ ᤐᤥᤱᤔᤠ ᤌᤡᤶᤜᤠ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ.

² “ᤕᤜᤘᤣ ᤍᤠᤱᤒᤧᤸᤗᤧ ᤁᤧᤒᤡᤖᤡᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤗᤳᤇᤠ ᤌᤡᤶ ᤜᤠᤒᤠ ᤁᤴᤗᤥ—ᤁᤢᤍᤢᤰᤔᤠ ᤁᤢᤕ᤹ᤔᤠ ᤁᤧᤜᤥ᤺ᤵᤔᤠ ᤘᤖᤢᤵᤗᤢᤵᤔᤠ. ᤀᤠᤵᤑᤠᤸᤗᤧᤀᤠᤱ ᤂᤧ᤺ᤵᤛᤡᤱ ᤔᤧᤱᤃᤢ᤺ᤳᤋᤧᤔᤠ ᤜᤧ᤺ᤳᤋᤠᤱᤔᤠ ᤁᤢᤶᤔᤠᤔᤠ ᤐᤡᤳᤛᤠᤳ ᤌᤡᤰ ᤂᤧᤱᤜᤠ᤹ᤀᤥ ᤋᤠᤖᤧᤶᤔᤧ᤹ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹॥

³ ᤂᤡᤏᤡ᤹ ᤂᤧᤴ ᤁᤢᤶᤔᤠᤔᤠ ᤐᤡᤳᤛᤠᤳᤋᤡᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤂᤢᤏᤧ᤹ ᤂᤧᤴ ᤗ᤺ᤳᤋᤢᤖ. ᤂᤧᤒᤩᤠᤱ ᤂᤢᤏᤧ᤹ ᤁᤢᤒᤣᤛᤠᤱ ᤂᤧᤴ ᤔᤧᤛᤧᤖᤢᤖ॥

⁴ ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤸᤗᤧ ᤁᤢᤜᤢᤰᤆᤥᤀᤥᤗᤠᤶ ᤂᤧᤴ ᤛᤠᤔᤠᤰᤂᤡᤴ ᤁᤢᤓᤠ ᤕᤠᤱᤛᤡᤱᤗ ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤋᤃᤡ ᤏᤢᤛᤡᤗᤧᤱ ᤛᤠᤰᤂᤢᤖ॥

⁵ ᤂᤢᤏᤧ᤹ ᤏᤡᤛᤢᤖᤀᤣ ᤂᤧᤴ ᤁᤢᤶᤔᤠᤔᤠ ᤐᤡᤳᤛᤠᤳᤋᤡᤴ. ᤁᤢᤜᤥᤖᤡᤰ. ᤁᤢᤏᤧᤰᤛᤠ. ᤁᤢᤔᤠᤰᤂᤡ᤹ ᤏᤢ ᤐᤡ᤹ᤜᤡ᤺ᤴ ᤛᤥᤛᤥᤖᤡᤰ ᤔᤡᤔᤧᤎᤡᤰᤂᤢ ᤔᤧᤍᤣᤛᤢᤖ॥

⁶ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠᤶᤔᤠᤱᤛᤡᤱ. ᤜᤡᤛᤐ ᤕᤠ᤺ᤴ. ᤜᤧ᤺ᤳᤋᤠᤱᤒᤠ ᤛᤧᤔᤢᤖᤡᤰᤁᤡᤴ ᤕᤠᤱᤛᤡᤱᤅᤠᤱ ᤔᤡᤔᤧᤎᤡᤰᤂᤢᤀᤠᤱ ᤁᤧᤏᤧᤒᤠ ᤁᤢᤶᤔᤠᤔᤠ ᤐᤡᤳᤛᤠ᤺ᤳᤋᤥ ᤗᤠᤵᤑᤢᤛᤢ ᤁᤣ᤺ᤳᤋᤢᤖ॥

⁷ ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤢᤏᤧ᤹ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ. ᤜᤧᤰᤁᤩᤠᤱ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤶᤛᤡᤱᤅᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤏᤢ᤺ᤱᤗ॥ ᤁᤖ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱᤗ॥

⁸ ᤂᤧᤴ ᤔᤡᤃᤧᤎᤡᤱᤒᤧᤸᤗᤧᤀᤠᤱ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ. ᤜᤧᤰᤁᤩᤠᤱ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤶᤛᤡᤱᤗ॥ ᤂᤢᤏᤧ᤹ᤀᤠᤱ ᤕᤢ᤺ᤴᤇᤡᤰ ᤌᤧᤶᤒᤠᤀᤣ ᤀᤠᤛᤢᤳᤌᤥ ᤐᤥᤱᤗ॥

⁹ “ᤁᤢᤓᤠ ᤗᤳᤇᤠ ᤛᤢᤳᤌᤥ ᤔᤏᤠ᤺ᤸᤗᤧ ᤂᤧᤴ ᤁᤢᤶᤔᤠᤔᤠ ᤐᤡᤳᤛᤠᤳ ᤂᤠᤵᤐᤢ᤺ᤴ ᤑᤢᤰᤂᤢᤖ ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤁᤢᤓᤠ ᤛᤢᤳᤌᤥᤒᤠ ᤋᤧᤴᤏᤥ ᤂᤧᤴ ᤕᤢᤰᤂᤢᤖ॥ ᤂᤧᤱᤃ ᤀᤥᤃᤵ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤕᤥᤗᤠᤶ ᤛᤢᤳᤌᤥ ᤐᤥᤱᤔᤠ ᤑᤠ᤹ᤀᤠᤱ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤆᤫᤠ᤺ᤳᤋᤥ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥ᤺ᤸᤗᤧ ᤔᤧᤕᤢᤰᤂᤢᤖ ᤐᤥᤱ᤹॥ ᤁᤱᤃ ᤗᤠᤕᤥᤗᤠᤶ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡᤖᤥ॥

¹⁰ ᤁᤢᤶᤔᤠᤔᤠ ᤐᤡᤳᤛᤠᤳ ᤂᤠᤵᤐᤢ ᤁᤧᤓᤢᤱᤒᤠᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰᤁᤣ ᤂᤢᤏᤧ᤹ᤀᤠᤱ ᤀᤠᤛᤢᤳᤌᤥ ᤐᤥᤱ᤹॥ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤁᤴ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗᤖᤥ॥

ᤆᤣ᤺ᤴ ᤛᤢᤔᤠᤀᤠᤱ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤌᤡᤶ

¹¹ “ᤆᤣ ᤁᤧᤛᤢᤒᤠ ᤔᤏᤠᤴ ᤏᤢᤛᤡ ᤕᤧᤴ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥

¹² ᤂᤢᤏᤧ᤹ ᤂᤧᤴ ᤆᤫᤠ᤺ᤳᤋᤡᤸᤗᤧ ᤛᤢᤶᤛᤡᤃᤣᤰᤐᤠ ᤏᤢ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤛᤢᤳᤌᤥ ᤆᤥ᤺ᤰᤛᤡᤱᤗ. ᤜᤧᤰᤁᤩᤠᤱ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥ ᤁᤖ ᤂᤧᤸᤗᤧ ᤛᤢᤶᤛᤡᤃᤣᤰᤐᤠ ᤏᤢ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤛᤢᤳᤌᤥ ᤔᤧᤈᤥ᤺ᤰᤛᤡᤱᤏᤧᤴᤏᤧᤓᤃᤪ ᤂᤧᤴ ᤛᤢᤳᤌᤥ ᤔᤧᤒᤥᤱᤏᤧᤴ॥

¹³ ᤀᤠᤳᤋᤡᤸᤗᤧ ᤆᤣ᤺ᤴ ᤛᤢᤛᤢᤀᤠᤱ ᤂᤢᤏᤧ᤹ ᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤡᤴ. ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤕᤢᤱᤍᤧᤴᤏᤡᤴ ᤀᤠᤛᤢᤳᤌᤥ ᤆᤥᤃᤢ᤹॥ ᤂᤧᤴ ᤔᤏᤠᤴ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤆᤫᤠ᤺ᤳᤋᤡᤴ ᤂᤧᤸᤗᤧ ᤁᤢᤛᤶᤎᤠᤱ ᤔᤧᤴᤇᤠᤰᤂᤢᤴ. ᤁᤸᤗᤧᤆᤥᤃᤢᤸᤗᤧ ᤂᤧᤴ ᤀᤠᤛᤢᤳᤌᤥᤀᤣ ᤆᤥᤰ॥ ᤂᤧᤸᤗᤧ ᤁᤢᤀᤠᤛᤢᤳᤌᤥᤴ ᤂᤢᤏᤧ᤹ ᤁᤢᤛᤶᤎᤠᤱᤅᤣ ᤜᤠᤒᤠ ᤘᤠ᤹ᤖ॥

¹⁴ “ᤁᤢᤓᤠ ᤔᤏᤠ᤺ᤴ ᤛᤠ᤺ᤱᤃᤠᤜᤡᤶᤔᤥ ᤛᤡᤏᤧᤓᤃᤪ ᤂᤧᤸᤗᤧ ᤗᤠᤃᤡ ᤌᤡᤶ ᤜᤠᤒᤠ ᤁᤴᤗᤥ—ᤂᤧᤴ ᤛᤠ᤺ᤱᤃᤠᤜᤡᤶᤔᤥ ᤁᤧᤍᤠᤒᤠ ᤏᤢ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤀᤠᤛᤢᤳᤌᤥ ᤔᤧᤒᤥᤱ᤹॥

¹⁵ ᤁᤢᤛᤢ᤺ᤵᤔᤠ ᤔᤣ᤺ᤴᤏᤣ ᤜᤱ ᤗ᤹ᤖᤡᤰ ᤁᤧᤕᤢᤱᤒᤠ ᤁᤧᤖᤧᤰ ᤂᤵᤐᤩᤠᤜᤠ᤹ ᤀᤠᤛᤢᤳᤌᤥ ᤐᤥᤱ᤹॥

¹⁶ “ᤗᤠ᤺ᤰᤁᤠᤳ ᤗᤧᤵᤔᤠᤱ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤀᤡᤃᤪ ᤀᤠᤵᤑᤣᤰ ᤁᤧᤛᤡᤒᤠ ᤆᤣ ᤁᤡᤃᤪ ᤔᤏᤠ᤺ᤸᤗᤧ ᤁᤢᤕᤧᤳ ᤀᤡᤃᤪ ᤀᤡᤐᤢᤱᤅᤡᤴ ᤜᤠ᤺ᤳᤗᤧ ᤛᤢᤛᤢ᤹. ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥

¹⁷ “ᤂᤧᤴ ᤀᤠᤛᤢᤳᤌᤥ ᤔᤏᤠ᤺ᤸᤗᤧ ᤁᤢᤗᤠᤃᤡ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤐᤥᤱᤔᤠ ᤛᤡᤍᤢᤱᤈᤓᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤐᤡᤵᤔᤠ ᤂᤠᤵᤐᤢ᤺ᤴ ᤕᤠᤱᤛᤡᤅᤠᤱ ᤂᤵᤐᤩᤠᤀᤥ ᤁᤣ᤺ᤳᤋᤢᤖ ᤜᤧᤰᤁᤩᤠᤱ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤂᤧᤴ ᤗᤧ᤺ᤰᤋᤢᤖ ᤐᤥᤱ᤹॥

¹⁸ ᤂᤧᤒᤩᤠᤱ ᤁᤢᤓᤠ ᤛᤢᤳᤌᤥ ᤔᤏᤠ᤺ᤸᤗᤧ ᤜᤡᤛᤐ ᤕᤠ᤺ᤴᤏᤧᤴ ᤕᤠᤱᤛᤡᤱᤅᤠᤱ ᤂᤧᤴ ᤆᤫᤠ᤺ᤳᤋᤥ ᤜᤢᤶᤛᤢᤖ ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤔᤥ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤂᤵᤐᤩᤠ ᤛᤠᤔᤠᤜᤠ᤹ᤀᤥ ᤂᤶᤓᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤶᤎᤠᤱ ᤛᤠᤰᤂᤢᤖ॥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧ ᤗᤢᤱᤛᤡ ᤕᤧᤳ. ᤔᤧᤛᤧᤖᤢᤒᤠ ᤀᤡᤃᤪ ᤀᤠᤒᤠᤅᤣ ᤁᤧᤛᤡᤒᤠ ᤆᤣᤜᤠ᤹. ᤀᤡᤃᤪ ᤀᤡᤐᤢᤱᤜᤠ᤹ ᤔᤧᤛᤢᤛᤢ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱᤅᤠᤱ ᤛᤠᤰᤂᤢᤖ॥

¹⁹ ᤛᤢᤳᤌᤥ ᤔᤏᤠ᤺ᤸᤗᤧ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤢᤶᤛᤡᤃᤣᤰᤐᤠ ᤏᤢ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤧᤴ ᤆᤫᤠ᤺ᤳᤋᤡᤴ ᤛᤠᤰᤂᤢᤖ॥ ᤛᤢᤳᤌᤥ ᤔᤏᤠ᤺ᤸᤗᤧ ᤏᤢᤛᤡᤃᤣᤰᤐᤠ ᤕᤧᤴᤏᤥᤃ ᤂᤢᤏᤧ᤹ ᤂᤧᤱᤜᤠ᤹ ᤛᤢᤳᤌᤥ ᤆᤥᤃᤢᤛᤡᤖ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤘᤠᤔᤧᤜᤵᤋᤢᤀᤠᤱ ᤘᤠᤔᤧᤖᤢ᤺ᤶᤛᤡᤱᤗ. ᤂᤧᤒᤩᤠᤱ ᤂᤧᤱᤜᤠ᤹ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤔᤧᤒᤥᤱ᤹॥

²⁰ ᤁᤖ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤔᤏᤠᤜᤠ᤹ ᤀᤠᤵᤑᤣᤰ ᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤅᤡᤴᤏᤧᤓᤃᤪ ᤂᤧᤴ ᤔᤏᤠᤜᤠ᤹ ᤛᤱᤈᤢᤶᤓᤥᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴᤏᤡᤴ ᤀᤠᤛᤢᤳᤌᤥ ᤔᤧᤈᤥᤃᤢ॥ ᤛᤢᤳᤌᤥ ᤐᤥᤱᤔᤠ ᤆᤫᤠ᤺ᤳᤋᤡᤴ ᤂᤧᤱᤜᤠ᤹ ᤛᤶᤎᤠᤱ ᤔᤧᤴᤇᤠᤱᤅᤣ ᤘᤠ᤹ᤒᤧᤸᤗᤧ ᤆᤥᤃᤢᤸᤗᤧᤀᤣ ᤂᤧᤱᤜᤠ᤹ ᤀᤠᤛᤢᤳᤌᤥ ᤔᤧᤈᤥᤰ॥

²¹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤴ ᤛᤍᤠᤍᤡᤱᤗᤧ ᤗᤠᤃᤡ ᤌᤡᤶ ᤐᤥᤱᤗ॥ “ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤆᤫᤠ᤺ᤳ ᤁᤧᤛᤠᤱᤒᤧᤸᤗᤧᤀᤠᤱ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ॥ ᤂᤧᤴ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤆᤫᤠ᤺ᤳ ᤁᤧᤛᤢᤒᤧᤴᤏᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥

²² ᤀᤠᤛᤢᤳᤌᤥ ᤔᤏᤠ᤺ᤸᤗᤧ ᤛᤢᤛᤢᤒᤠ ᤌᤧᤔᤠ᤺ᤴᤇᤠᤱ ᤀᤠᤛᤢᤳᤌᤥ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤛᤢᤛᤢᤒᤠ ᤐᤠ᤺ᤴᤜᤠ᤹ ᤁᤧᤛᤢᤒᤧᤴᤏᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱᤗᤥ॥”