ᤂᤠᤏᤡ᤺ᤳ 18 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤂᤧᤏᤧ᤹. ᤁᤧᤛ᤻ᤛᤠ ᤁᤧᤶᤔᤧᤳᤇᤠ᤹ᤜᤠ᤹ ᤏᤢ ᤗᤧᤒᤡᤖᤧ ᤁᤢᤎᤠ᤺ᤰᤗᤠᤶᤒᤠᤒᤠ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤛᤣᤛᤣᤍᤧᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤀᤠᤵᤋᤡᤰᤁᤡᤴ ᤂᤡᤏᤡ᤹ ᤁᤧᤃᤢᤕᤢᤶᤗ ᤐᤥᤱ᤹. ᤁᤖ ᤂᤧᤏᤧ᤹ ᤏᤢ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧᤖᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤔᤧᤍᤢᤔᤢᤶ᤹॥ 2 ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰ ᤁᤧᤕᤢᤱᤒᤠ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤍᤃᤠᤱ ᤔᤠᤱᤛᤧᤘᤠ ᤁᤧᤈᤥᤃᤢᤶᤔᤡᤸᤗᤧ ᤂᤧᤏᤧ᤹ ᤁᤧᤎᤠ᤺ᤰᤌᤧᤒᤠ ᤗᤧᤒᤡ ᤌᤠ᤺ᤰᤁᤥᤒᤠ ᤂᤧᤏᤧ᤹ ᤁᤧᤶᤓᤢ᤹ᤁᤧᤴᤛᤠ᤹ᤜᤠ᤹ᤀᤠᤱ ᤂᤧᤏᤧ᤹ᤏᤢ ᤛᤥᤖᤡᤰ ᤋᤠᤖᤧᤛᤧ᤹ᤀᤠᤱ ᤋᤩᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤧ᤹ᤏᤢ ᤔᤧᤍᤱᤛᤡᤱᤅᤠᤱ ᤁᤧᤶᤓᤠ᤹ᤖ॥ 3 ᤂᤧᤱᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤗᤰᤐᤧᤴᤛᤠᤒᤠ ᤔᤧᤒᤥᤱᤗ. ᤜᤧᤰᤁᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤖ ᤐᤥᤱ᤹॥ ᤂᤧᤱᤜᤠ᤹ ᤛᤣᤛᤣᤍᤧᤴᤏᤥᤒᤠ ᤛᤠᤔᤠᤜᤠ᤹ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱᤗᤰ ᤔᤧᤴᤍᤠᤏᤧᤴᤗ. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ᤀᤠᤱ ᤂᤧᤱᤜᤠ᤹ᤏᤢᤀᤣ ᤛᤥᤖᤡᤰ ᤁᤧᤛᤩᤧ᤹ᤀᤡ॥ 4 ᤂᤧᤱᤜᤠ᤹ᤖᤧ ᤂᤡᤏᤡ᤹ᤏᤢ ᤛᤥᤖᤡᤰ ᤔᤧᤒᤥᤱᤅᤠᤱ ᤛᤠ᤺ᤱᤃᤠᤜᤡᤶᤔᤥᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤕᤠ᤺ᤶᤒᤰᤜᤠ᤹ ᤀᤥᤔᤧᤔᤧᤳᤋᤢᤖ॥ ᤘᤣ᤹ ᤔᤏᤠ ᤀᤠᤳᤋᤡᤴᤏᤠᤱ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤠᤔᤠ ᤔᤧᤄᤥᤏᤧᤴᤗ॥ 5 “ᤂᤧᤏᤧ᤹ᤀᤣ ᤛᤣᤛᤣᤍᤧᤴᤏᤡᤴ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤕᤠ᤺ᤶᤒᤰᤜᤠ᤹ ᤀᤥᤔᤧᤳᤋᤧ ᤆᤥᤃᤧ᤹. ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤠᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤔᤧᤎᤠᤏᤧᤴᤗ॥ 6 ᤀᤠᤱᤃᤠ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤂᤧᤏᤧ᤹ ᤁᤧᤶᤓᤢ᤹ ᤁᤧᤴᤛᤠ᤹ ᤗᤧᤒᤡᤜᤠ᤹ ᤛᤣᤃᤢᤱᤛᤡᤱᤅᤠᤱ ᤘᤠ᤹॥ ᤂᤧᤱᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤛᤡᤒᤠ ᤂᤧᤏᤧ᤹ ᤁᤧᤗᤠᤃᤡ ᤜᤢᤰᤘᤠᤛᤡᤖᤥ॥ 7 ᤁᤖ ᤂᤧᤏᤧ᤹ ᤏᤢ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧᤖᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤏᤢ ᤑᤥ᤺ᤴᤍᤠ ᤛᤡᤃᤠᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ᤺ᤸᤗᤧ ᤕᤠ᤺ᤶᤒᤰᤁᤡᤴ ᤗᤰᤐᤧᤴ ᤋᤠ᤺ᤰᤋᤧ᤹ᤀᤠᤱ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥ ᤁᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ᤺ᤴ ᤀᤠᤱᤃᤠ᤹ ᤂᤡᤏᤡ᤹ ᤜᤢᤰᤘᤠ ᤁᤢᤀᤡᤛᤡᤰ ᤐᤡᤏᤡᤱᤗ ᤐᤳᤋᤠ॥ ᤁᤢᤓᤠ ᤘᤣ᤹ ᤔᤏᤠ ᤁ᤹ᤕᤥ ᤋᤠᤏᤧᤓᤃᤪ ᤂᤧᤴ ᤛᤩᤧᤵᤔᤠ ᤐᤥᤱᤗᤥ॥” ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰᤜᤠ᤹ 8 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤱᤃᤠ᤹ᤀᤥ ᤔᤧᤍᤥᤴᤍᤢᤒᤠ ᤁᤧᤖᤧᤰ ᤛᤣᤛᤣᤒᤠ ᤛᤡᤍᤢᤱᤈᤓᤠᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤀᤥᤔᤧᤵᤔᤠ ᤕᤠ᤺ᤶᤒᤰ ᤐᤡᤏᤧᤀᤠᤱ ᤘᤠ᤹॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤃᤳᤋᤢᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠ᤺ᤸᤗᤧ ᤆᤥᤃᤢᤸᤗᤧ ᤂᤧᤴ ᤗᤰᤜᤠ᤹ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤀᤠᤓᤧᤸᤗᤧᤛᤠᤱ ᤁᤧᤄᤥᤛᤢᤶᤒᤠ ᤗᤰ ᤁᤢᤛᤡᤱ ᤛᤧᤴᤍᤢᤱ ᤐᤡᤏᤡᤱᤅᤠᤱ ᤘᤠ᤹॥ 9 ᤔᤡᤗᤠᤶᤒᤠ ᤛᤧᤶᤔᤏᤠᤒᤠ ᤏᤧᤔᤏᤠᤒᤠ ᤛᤠ᤹ᤖᤡᤰ ᤛᤢᤳᤌᤥ ᤛᤡᤍᤢᤱᤈᤓᤠᤜᤠ᤹ᤀᤥᤒᤠ ᤗᤰᤁᤡᤴ ᤂᤧᤏᤧ᤹ ᤁᤧᤗᤰ ᤐᤥᤱᤗ॥ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤥ ᤔᤧᤍᤥᤴᤍᤢᤒᤠ ᤂᤧᤴ ᤛᤠ᤹ᤖᤡᤰ ᤛᤣᤛᤣᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ. ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤏᤢ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤜᤠ᤹ᤀᤥᤒᤠ ᤗᤰᤜᤠ᤹ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤗᤠᤃᤡ ᤂᤥᤔᤠ ᤗᤰ ᤐᤥᤱ᤹॥ 10 ᤂᤧᤏᤧ᤹ ᤂᤧᤴ ᤛᤠ᤹ᤖᤡᤰ ᤛᤣᤛᤣᤒᤠ ᤗᤣ᤺ᤳᤋᤧᤀᤠᤱ ᤆᤩᤧ᤹॥ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤧᤴ ᤔᤧᤈᤖ॥ ᤁᤴ ᤂᤧᤏᤧ᤹ ᤛᤢᤳᤌᤥᤒᤠ ᤗᤣ᤺ᤵᤔᤠ ᤐᤥᤱ᤹॥ 11 “ᤂᤧᤴᤏᤠᤱ ᤂᤧᤏᤧ᤹ᤀᤡᤴᤏᤣ ᤐᤥᤱᤗ—ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤛᤧᤶᤔᤏᤠᤒᤠ ᤁᤧᤖᤧᤰ ᤜᤢᤰᤘᤠᤛᤢᤱᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤗᤠᤃᤡ ᤀᤠᤓᤧᤸᤗᤧᤛᤠᤱ ᤂᤥᤔᤠ ᤁᤧᤒᤥᤱᤒᤠ ᤗᤰ ᤁᤢᤛᤡᤱ ᤐᤡᤏᤡᤱᤅᤠᤱ ᤘᤠ᤹॥ ᤂᤧᤏᤧ᤹ ᤁᤧᤜᤡᤶᤔᤥ ᤛᤢᤳᤌᤥ ᤁᤧᤒᤥᤱᤒᤠ ᤁᤧᤖᤧᤰᤗᤧ ᤂᤧᤴ ᤆᤠᤔᤠ ᤔᤧᤛᤢᤰᤋᤢ᤹॥ 12 “ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤔᤧᤒᤡᤖᤢᤒᤠ ᤏᤢᤒᤠ ᤆᤤᤋᤢᤏ ᤏᤡ᤺ᤱᤃᤣ᤹. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ. ᤐᤥᤃᤢᤃᤧᤴ ᤁᤢᤈᤠᤴ ᤋᤃᤡ ᤁᤧᤍᤢᤶᤒᤠ ᤁᤢᤈᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤏᤧ᤹ᤀᤣ ᤐᤡᤏᤧᤀᤠᤱ ᤘᤠ᤹॥ 13 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤇᤧ ᤔᤧᤍᤠᤖᤢᤒᤠ ᤂᤢᤴᤇᤡ᤹ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤜᤠ᤹ ᤂᤧᤏᤧ᤹ᤀᤡᤴᤏᤣ ᤐᤥᤱᤗ॥ ᤂᤧᤏᤧ᤹ ᤁᤧᤜᤡᤶᤔᤥ ᤛᤢᤳᤌᤥ ᤁᤧᤒᤥᤱᤒᤠ ᤁᤧᤖᤧᤰᤗᤧ ᤂᤧᤴ ᤆᤠᤔᤠ ᤔᤧᤛᤢᤰᤋᤢ᤹॥ 14 “ᤀᤠᤱᤃᤠ᤹ᤀᤥ ᤛᤖᤰ ᤔᤧᤍᤥᤴᤍᤢᤒᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ᤀᤡᤴᤏᤣᤖᤥ॥ 15 ᤔᤏᤠ ᤀᤡᤃᤪ ᤌᤰᤛᤠᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤛᤡᤒᤠ ᤋᤃᤡ ᤁᤧᤎᤠᤵᤐᤠ ᤏᤢ ᤛᤠᤃᤧᤘᤠ᤺ᤴᤇᤡᤱᤒᤠ ᤁᤧᤖᤧᤰ ᤌᤰᤛᤠᤈᤩᤠᤰ ᤏᤢ ᤀᤅᤧ᤺ᤰᤘᤠᤜᤠ᤹ ᤂᤧᤏᤧ᤹ᤀᤡᤴᤏᤣ ᤔᤧᤒᤥᤱᤗ॥ ᤀᤰᤂᤣ ᤐᤥᤱᤛᤠᤱ ᤋᤃᤡ ᤛᤠᤃᤧᤘᤠ᤺ᤴᤇᤡᤱᤒᤠ ᤔᤏᤠ ᤏᤢ ᤁᤧᤎᤠᤵᤐᤠ ᤌᤰᤛᤠᤴ ᤂᤧᤏᤧ᤹ ᤁᤢᤔᤧᤴ ᤁᤧᤜᤢᤅᤢᤀᤠᤱ ᤁᤧᤎᤧ᤹ᤖᤢᤖ ᤐᤥᤱ᤹॥ 16 ᤗᤠᤎᤡᤰ ᤕᤥ᤺ᤸᤗᤧ ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗ ᤁᤢᤀᤡᤛᤡᤰ ᤂᤧᤏᤧ᤹ ᤁᤢᤔᤧᤸᤗᤢᤱ ᤜᤧᤴᤍᤧᤀᤠᤱ ᤛᤣᤁᤣᤗ ᤅᤠᤛᤡ ᤁᤢᤔᤧᤸᤗᤢᤱ ᤜᤢᤅᤧ᤹ᤀᤠᤱ ᤂᤧᤴ ᤁᤧᤎᤧ᤹ᤖᤢᤖ ᤐᤥᤱ᤹॥ ᤏᤡᤒᤥᤱ ᤃᤣᤖᤠᤖᤧ ᤛᤣᤁᤣᤗ ᤌᤡᤰ ᤐᤥᤱ᤹॥ 17 “ᤁᤖ ᤋᤃᤡ ᤁᤧᤎᤠᤵᤐᤠ ᤐᤡᤳ. ᤔᤧᤸᤗᤢᤰ ᤀᤡᤃᤪ ᤔᤧ᤺ᤴᤍᤠ᤺ᤴ ᤛᤧᤶᤔᤠ ᤔᤧᤒᤥᤱᤏᤧᤴ॥ ᤂᤧᤴ ᤛᤢᤳᤌᤥ ᤆᤥᤰ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤂᤧᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤠᤰᤂᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤔᤠᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤢᤛᤡᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤥ᤺ᤳᤋᤧᤴ ᤔᤡᤎᤡᤰᤂᤧ᤹॥ 18 ᤁᤖ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤱᤒᤵᤔᤧᤴ ᤜᤧᤰᤁᤣ ᤏᤢ ᤁᤢᤈᤢᤰᤘᤠ ᤁᤢᤗᤠᤱᤓᤧᤸᤗᤧᤰᤔᤧᤴ ᤜᤧᤰᤁᤣ ᤂᤧᤴ ᤋᤃᤡ ᤁᤧᤎᤠᤵᤐᤠ ᤐᤡᤳ. ᤔᤧᤸᤗᤢᤰ ᤏᤢ ᤔᤧ᤺ᤴᤍᤠ ᤛᤠ᤺ᤴᤏᤠᤱ ᤂᤧᤏᤧ᤹ᤀᤡᤴᤏᤣ ᤐᤥᤱᤗ॥ 19 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤒᤠ ᤛᤣᤛᤣᤒᤠ ᤛᤡᤍᤢᤱᤈᤓᤠᤗᤠᤶ ᤗᤠ᤺ᤳᤗᤠ᤺ᤳ ᤛᤧᤶᤔᤏᤠᤒᤠ ᤁᤧᤖᤧᤰ ᤗᤰᤜᤠ᤹ ᤀᤠᤓᤧᤸᤗᤧᤛᤠᤱ ᤁᤧᤄᤥᤛᤢᤶᤒᤠ ᤗᤰ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤏᤧ᤹ ᤏᤢ ᤁᤧᤛ᤻ᤛᤠᤜᤠ᤹ ᤐᤡᤏᤡᤱᤅᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ᤖᤧ ᤗᤠᤃᤡ ᤛᤍᤠᤍᤡᤱ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤣ᤺ᤶᤔᤏᤠᤒᤠ ᤔᤠᤱᤜᤢᤵ ᤐᤥᤱ᤹॥” 20 ᤕᤜᤘᤣ ᤍᤠᤱᤒᤧᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤒᤠ ᤗᤠᤈᤣ᤹ ᤛᤡᤱᤒᤢᤱᤜᤠ᤹ᤀᤥ ᤂᤡᤏᤡ᤹ ᤗᤠᤈᤣ᤹ ᤗᤰᤂᤥᤔᤠ ᤕᤢᤰ ᤜᤥᤵ॥ ᤂᤧᤱᤜᤠ᤹ᤏᤢ ᤛᤥᤛᤥᤖᤡᤰ ᤂᤧᤏᤧ᤹ ᤌᤧᤔᤠᤀᤠᤱ ᤗᤰ ᤁᤧᤱᤄᤥᤛᤢᤴ᤹॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤏᤧ᤹ ᤁᤧᤄᤥᤔᤠ ᤗᤰ ᤏᤢ ᤁᤧᤗᤰᤂᤥ᤺ᤴ ᤀᤠᤱᤃᤠ᤹ᤀᤠᤀᤣᤖᤥ॥” ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰ 21 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤗᤧᤒᤡ᤺ᤸᤗᤧ ᤁᤢᤔᤢ᤹ᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤃ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤡᤒᤥᤱ ᤗᤰᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰ ᤁᤢᤀᤡᤛᤡᤰ ᤐᤡᤖᤢᤱᤛᤡᤱᤅᤠᤱ ᤘᤠ᤹॥ 22 ᤀᤠᤸᤗᤀᤠᤱᤎᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤏᤡ᤺ᤳᤋᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤧᤴᤍᤠᤏᤧᤴᤗ. ᤔᤣ᤺ᤴᤏᤧᤓᤃᤪ ᤂᤢᤴᤇᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤛᤡᤖᤥ॥ 23 ᤁᤖ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤗᤧᤒᤡᤜᤠ᤹ᤖᤧ ᤔᤧᤈᤥᤃᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤱᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤌᤠᤖᤥ॥ ᤂᤧᤴ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤌᤡᤶ ᤐᤥᤱᤗ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤃ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤌᤧᤔᤠᤀᤠᤱ ᤗᤰᤂᤥᤔᤠ ᤕᤢᤰ ᤜᤥᤵ॥ 24 ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤒᤠ ᤌᤡᤒᤥᤱ ᤗᤰᤁᤡᤴᤏᤣ ᤀᤠᤱᤃᤠ᤹ ᤗᤧᤒᤡᤜᤠ᤹ ᤂᤢᤴᤇᤡ᤹ ᤂᤥᤔᤠ ᤁᤧᤒᤥᤱᤒᤠ ᤗᤰ ᤜᤧᤰᤁᤣ ᤐᤡᤖᤢᤱᤛᤡᤱᤅᤠᤱ ᤘᤠ᤹॥ ᤀᤠᤱᤃᤠ᤹ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤀᤰᤂᤣ ᤏᤠ᤺ᤳᤋᤢᤱᤅᤠᤱ ᤘᤠ᤹. ‘ᤀᤡᤛᤪᤠᤀᤡᤗᤡᤜᤠ᤹ᤀᤥ ᤁᤴᤜᤠ᤹ᤖᤧ ᤌᤧᤔᤠᤀᤠᤱ ᤗᤰᤂᤥᤔᤠ ᤕᤢᤰ ᤔᤧᤱᤃᤳᤋᤢᤴᤗᤥ॥’” ᤗᤧᤒᤡᤜᤠ᤹ᤖᤧ ᤋᤥ᤺ᤶᤔᤠ ᤁᤧᤒᤥᤱ ᤌᤡᤒᤥᤱᤗᤰ 25 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 26 “ᤂᤧᤏᤧ᤹ ᤗᤧᤒᤡᤜᤠ᤹ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤂᤥᤔᤠ ᤁᤧᤒᤥᤱᤒᤠ ᤗᤠᤈᤣ᤹ᤛᤡᤱᤒᤢᤱ ᤗᤰᤗᤧ ᤗᤠᤃᤡ ᤀᤠᤱᤃᤠ᤹ ᤐᤡᤏᤡᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤡᤒᤥᤱ ᤗᤰᤜᤠ᤹ ᤁᤧᤍᤠ᤺ᤰᤋᤢᤶᤔᤡᤸᤗᤧ ᤂᤧᤴ ᤗᤠᤶᤒᤠᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤌᤡᤒᤥᤱᤗᤰ ᤛᤧᤴᤍᤠᤶᤔᤧ᤹ᤀᤠᤱ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ 27 ᤂᤡᤏᤡ᤹ ᤛᤡᤍᤢᤱᤈᤓᤠᤴ ᤆᤠᤎᤠᤶᤔᤠᤍᤧᤴᤏᤥᤒᤠ ᤐᤥᤃᤢᤃᤧᤴ ᤁᤢᤈᤠ ᤏᤢ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥᤗᤠᤶ ᤁᤧᤗ᤺ᤶᤒᤠ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤁᤢᤛᤡᤱᤒᤠ ᤐᤥᤱ᤹॥ 28 ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤗᤠᤶ ᤁᤧᤄᤥᤛᤢᤶᤒᤠ ᤁᤧᤖᤧᤰ ᤌᤡᤒᤥᤱᤗᤰᤗᤠᤶ ᤂᤡᤏᤡ᤹ᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤗᤠᤶᤒᤠ ᤕᤜᤘᤣ ᤍᤠᤱᤒᤠᤀᤥ ᤁᤧᤍᤥ᤺ᤴᤍᤢᤶᤒᤠ ᤛᤡᤍᤢᤱᤈᤓᤠᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤴ ᤐᤡᤖᤧᤶᤔᤧ᤹॥ 29 ᤂᤡᤏᤡ᤹ ᤁᤧᤄᤥᤛᤢᤶᤒᤠᤗᤠᤶ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤏᤢ ᤛᤢᤳᤌᤥ ᤗᤰᤁᤡᤴ ᤆᤠᤀᤣ ᤛᤡᤍᤢᤱᤈᤓᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧᤶᤔᤧ᤹॥’ 30 “ᤂᤧᤏᤧ᤹ ᤗᤧᤒᤡᤜᤠ᤹ ᤔᤧᤳᤋᤧᤛᤧ᤹. ‘ᤀᤠᤸᤗ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤗᤰᤁᤡᤴ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤂᤧᤴ ᤂᤡᤏᤡ᤹ ᤗᤠᤃᤡ ᤆᤠᤎᤠᤶᤔᤠᤍᤧᤴᤏᤥᤒᤠ ᤁᤢᤈᤠ ᤏᤢ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥᤒᤠ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤁᤢᤛᤡᤱᤒᤠ ᤐᤥᤱ᤹॥ 31 ᤜᤧᤰᤁᤩᤠᤱ ᤂᤡᤏᤡ᤹ ᤏᤢ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤖᤧ ᤂᤧᤴ ᤀᤠᤳᤋᤡᤴ ᤋᤧᤴᤏᤥᤛᤠᤱ ᤆᤠᤔᤠ ᤁᤧᤛᤢᤰᤋᤢᤶ᤹. ᤌᤣᤀᤠᤱᤓᤧᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤡᤏᤡ᤹ ᤂᤥᤔᤠ ᤏᤠᤶᤕᤠ᤺ᤰᤗᤥ॥ 32 ᤂᤡᤏᤡ᤹ ᤛᤠ᤹ᤖᤡᤰ ᤏᤢᤒᤠ ᤗᤰᤁᤡᤴ ᤁᤧᤍᤥ᤺ᤴᤍᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤵᤋᤡᤰᤁᤥ ᤁᤧᤴᤎᤩᤧ᤹ᤀᤡᤴ. ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤣᤛᤣᤒᤠ ᤛᤡᤍᤢᤱᤈᤓᤠᤜᤠ᤹ ᤂᤡᤏᤡ᤹ ᤀᤠᤛᤢᤳᤌᤥ ᤁᤧᤴᤈᤥᤃᤢᤶᤔᤡᤴ᤹. ᤂᤶᤓᤩᤠᤱ ᤂᤡᤏᤡ᤹ ᤁᤧᤴᤇᤧ᤹ᤀᤡᤴᤏᤠᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.