ᤂᤠᤏᤡ᤺ᤳ 17 - LIFOTNT

ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳ

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

² “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤰᤔᤠ ᤗᤳᤇᤠ ᤗᤳᤇᤠ ᤗ᤹ᤖᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤋᤰᤁᤠ᤺ᤳᤜᤠ᤹ ᤋᤠᤖᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤡᤱᤜᤠ᤹ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤰᤁᤠ᤺ᤳᤜᤠ᤹ᤀᤥ ᤛᤠᤵᤋᤧ᤹॥

³ ᤗᤧᤒᤡ ᤌᤠ᤺ᤰᤁᤥᤒᤠ ᤋᤰᤁᤠ᤺ᤳᤋᤥ ᤂᤧᤏᤧ᤹ ᤜᤠᤖᤢᤏᤖᤧ ᤁᤢᤔᤡᤱ ᤛᤠᤵᤋᤧ᤹. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤌᤠ᤺ᤰᤌᤰᤔᤠᤒᤠ ᤗᤠᤶᤗᤥᤒᤠ ᤔᤏᤠ᤺ᤸᤗᤧ ᤗᤠᤃᤡ ᤗᤳᤇᤠ ᤋᤰᤁᤠᤳ ᤁᤵᤔᤠ ᤐᤥᤱ᤹॥

⁴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤜᤢᤵ ᤛᤠᤵᤗᤢᤱᤜᤠ᤹ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰᤁᤡᤸᤗᤧ ᤁᤢᤒᤣᤛᤠᤱ ᤀᤠᤱᤃᤠ᤹ ᤂᤡᤏᤡ᤹ ᤋᤢᤶᤏᤡᤱᤒᤠᤍᤧᤴᤏᤥ ᤂᤧᤴ ᤋᤰᤁᤠ᤺ᤳᤜᤠ᤹ ᤏᤧᤛ᤻ᤛᤧ᤹॥

⁵ ᤀᤠᤱᤃᤠ᤹ ᤀᤠᤳᤋᤡᤴ ᤔᤏᤠᤴ ᤛᤣᤃᤢᤱ᤹. ᤂᤧᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤁᤢᤈ᤺ᤰ ᤗ᤺ᤴ᤹॥ ᤁᤶᤓᤗ᤹ᤖᤡᤰ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤡᤛᤪᤠᤀᤡᤗᤡᤜᤠ᤹ ᤔᤏᤧᤎᤡᤰᤔᤠ ᤔᤧᤏᤠ᤹ᤖ ᤆᤥᤃᤢᤱ᤹॥”

⁶ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤴ ᤐᤠ᤺ᤴᤏᤡᤴ ᤆᤧᤰᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤁᤢᤀᤡᤛᤡᤰ ᤌᤠ᤺ᤰᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤗᤳᤇᤠ ᤗ᤹ᤖᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤋᤰᤁᤠ᤺ᤳᤜᤠ᤹ ᤂᤢᤏᤧ᤹ ᤔᤧᤒᤡᤖᤢ॥ ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳᤋᤡᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤁᤠ᤺ᤳᤋᤡᤸᤗᤧ ᤁᤢᤗᤢᤶᤔᤥ ᤕᤧᤒᤧ॥

⁷ ᤔᤥᤛᤠ᤺ᤸᤗᤧ ᤂᤧᤴ ᤋᤰᤁᤠ᤺ᤳᤜᤠ᤹ ᤕᤠᤱᤛᤡᤱ ᤜᤧᤰᤁᤩᤠᤱ ᤔᤠᤱᤜᤢᤵ ᤛᤠᤵᤗᤢᤱᤜᤠ᤹ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰ ᤁᤧᤕᤢᤱᤒᤠ ᤛᤠ᤺ᤱᤃᤠᤜᤡᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤧᤛ᤻ᤛᤢ॥

⁸ ᤁᤢᤍᤠ᤺ᤰᤍᤡᤰᤔᤠ ᤔᤥᤛᤠᤴ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢ ᤛᤴᤍᤥᤰ ᤁᤧᤕᤢᤱᤒᤠ ᤛᤠ᤺ᤱᤃᤠᤜᤡᤶᤔᤥ ᤐᤣ॥ ᤜᤧᤰᤁᤩᤠᤱ ᤗᤧᤒᤡ ᤌᤠ᤺ᤰᤁᤡᤸᤗᤧ ᤗᤠᤃᤡ ᤔᤧᤏᤧᤛ᤻ᤛᤢᤒᤠ ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳᤋᤥ ᤁᤢᤓᤧᤰᤔᤧᤳ ᤗ᤺ᤴᤍᤧᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤁᤢᤓᤧᤰᤔᤧᤳ ᤗ᤺ᤴᤍᤧᤀᤠᤱ ᤁᤢᤓᤢᤱ ᤑᤧᤰᤋᤧ ᤂᤧᤒᤩᤠᤱ ᤂᤈᤱᤛᤣ᤹ᤀᤠᤱᤏᤡ ᤋᤢᤶᤛᤧ ᤆᤢᤖᤧᤀᤠᤱ ᤐᤳᤇᤧ᥄

⁹ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤁᤧᤖᤧᤰ ᤋᤰᤁᤠ᤺ᤳᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤗᤠᤶ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤋᤠᤖᤢ ᤜᤧᤰᤁᤩᤠᤱ ᤀᤥᤔᤧᤔᤧᤳᤋᤢᤀᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤰᤁᤠ᤺ᤳᤜᤠ᤹ ᤔᤧᤔᤧᤳᤇᤡᤱ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤐᤡᤑᤩᤢᤱ ᤁᤧᤈᤥ᤺ᤰᤐᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤡᤰᤛᤣ᤺ᤴᤗᤧ ᤗᤠᤃᤡ ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳᤋᤡᤴ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤏᤡᤱᤘᤠ᤹ᤑᤢᤔᤠᤱ ᤛᤴᤍᤥᤰᤁᤥ ᤁᤢᤍᤃᤡ ᤋᤣ᤹ᤖᤧᤀᤠᤱ ᤕᤧᤵᤛᤧ᤹. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤱᤜᤠ᤹ ᤔᤏᤧᤎᤡᤰᤔᤠ ᤔᤧᤏᤠ᤹ᤖ ᤆᤥᤃᤧ ᤐᤡᤖᤧᤛᤧ᤹. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ ᤔᤧᤛᤡᤖᤥ॥”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤛᤡᤱ ᤔᤥᤛᤠ᤺ᤸᤗᤧ ᤁᤧᤖᤧᤰ ᤆᤥᤃᤢ॥

¹² ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤀᤥᤔᤧᤳᤋᤧᤛᤠ᤹ᤖᤧ. ᤀᤠᤏᤡᤃᤣ ᤔᤧᤃᤡᤃᤧ. ᤑᤧᤳᤗᤠ᤹ᤖᤡᤃᤧ. ᤀᤠᤏᤡᤃᤣ ᤁᤧᤖᤧᤰ ᤌᤣᤏᤠᤎᤣᤒᤠ ᤐᤥ᤺ᤰᤂᤡᤃᤧ᥄

¹³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤕᤢᤱᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤁᤧᤍᤠᤒᤠ ᤁᤧᤖᤧᤰ ᤌᤡᤰᤁᤠᤱ ᤔᤣ᤺ᤴᤏᤣ ᤔᤧᤛᤡᤖᤥ॥ ᤌᤣ ᤀᤠᤏᤡᤃᤧᤀᤠᤱ ᤁᤧᤖᤧᤰ ᤔᤧᤰᤔᤠ ᤐᤥᤱᤒᤠᤒᤡ᥅”