ᤂᤠᤏᤡ᤺ᤳ 16 - LIFOTNTᤁᤥᤖᤜ. ᤍᤠᤋᤠᤏ ᤏᤢ ᤀᤒᤡᤖᤠᤔᤧᤸᤗᤧ ᤔᤥᤛᤠᤴ ᤔᤧᤀᤳᤋᤢ 1 ᤌᤡᤰᤕᤠᤴ ᤕᤡᤛᤜᤠᤖᤖᤧ ᤁᤢᤛ᤻ᤛᤠ ᤁᤥᤖᤜ. ᤗᤧᤒᤡ᤺ᤸᤗᤧ ᤁᤢᤛ᤻ᤛᤠ ᤁᤥᤖᤜ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ. ᤜᤧᤰᤁᤩᤠᤱ ᤖᤢᤒᤣᤏᤖᤧ ᤁᤢᤎᤠ᤺ᤰᤁᤥᤒᤠ ᤀᤣᤗᤡᤒᤖᤧ ᤁᤢᤛ᤻ᤛᤠ ᤍᤠᤋᤠᤏ ᤏᤢ ᤀᤒᤡᤖᤠᤔᤧᤴ ᤜᤧᤰᤁᤩᤠᤱ ᤐᤣᤗᤣᤌᤖᤧ ᤁᤢᤛ᤻ᤛᤠ ᤀᤥᤏᤧᤴ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧ॥ 2 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤥᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥᤒᤠ ᥈᥋᥆ ᤗᤠᤶᤗᤥᤒᤠ ᤔᤏᤠᤜᤠ᤹ᤏᤢ ᤌᤡᤰᤜᤢᤵ ᤔᤧᤒᤥ᤺ᤰᤂᤧ॥ 3 ᤂᤧᤱᤜᤠ᤹ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤧᤖᤧᤰ ᤔᤧᤓᤢᤱᤛᤡᤱᤅᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤂᤡᤏᤡ᤹ ᤛᤠ᤹ᤖᤡᤰᤁᤣ ᤔᤧᤴᤘᤠ᤹ᤔᤏᤠᤒᤠ ᤁᤧᤈᤥᤃᤢᤶ᥄ ᤛᤱᤈᤢᤶᤓᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤣᤛᤣᤒᤠ ᤔᤧᤈᤥᤰ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤘᤠ᤹॥ ᤂᤡᤏᤡ᤹ ᤌᤣᤀᤠᤱ ᤀᤠᤵᤑᤣᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤁᤢᤔᤏᤠᤜᤠ᤹ᤏᤢ᤺ᤸᤗᤧ ᤕᤶᤒᤠ ᤁᤧᤜᤧᤴᤏᤠᤛᤡᤒᤠᤒᤣ᥅” 4 ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤏᤢᤔᤧ᤺ᤴᤏᤣ ᤔᤥᤛᤠᤴ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤏᤧᤛᤡᤱ॥ 5 ᤜᤧᤰᤁᤩᤠᤱ ᤂᤢᤏᤧ᤹ ᤁᤥᤖᤜ᤺ᤴ ᤏᤢ ᤂᤢᤏᤧ᤹ᤏᤢ ᤁᤧᤍᤡᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤋᤠ᤺ᤴᤍᤡᤰ ᤋᤠᤏᤠᤶ ᤜᤠᤳ ᤂᤢᤏᤧ᤹ ᤁᤢᤔᤏᤠ. ᤀᤠᤳᤋᤡᤴ ᤛᤣᤛᤣᤒᤠ ᤆᤥᤰ. ᤜᤧᤰᤁᤩᤠᤱ ᤜᤠᤳ ᤂᤢᤏᤧ᤹ ᤁᤢᤒᤣᤛᤠᤱ ᤋᤠᤔᤠ ᤑᤠ᤺ᤰᤋᤢ᤹ ᤂᤧᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤀᤥᤛᤣ᤺ᤴᤎᤠᤱ ᤆᤥᤃᤢ᤹॥ ᤜᤠᤳ ᤂᤢᤏᤧ᤹ ᤛᤣᤃᤢ᤹. ᤂᤧᤴ ᤂᤢᤏᤧ᤹ ᤁᤢᤒᤣᤛᤠᤱ ᤋᤠᤔᤠ ᤑᤠ᤺ᤰᤋᤢ᤹॥ 6 ᤁᤥᤖᤜᤀᤣ. ᤂᤧᤏᤧ᤹ ᤀᤰᤂᤣ ᤆᤥᤃᤧ᤹. ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤍᤡᤶᤒᤠ ᤔᤏᤠᤜᤠ᤹ᤖᤧ ᤛᤠᤱᤋᤧᤖᤧ᤺ᤱᤜᤠ᤹ ᤕᤠᤱᤅᤠᤛᤡᤶᤔᤧ᤹॥ 7 ᤋᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤛᤠᤱᤋᤧᤖᤧ᤺ᤱᤜᤠ᤹ᤀᤥ ᤔᤡ ᤏᤢ ᤛᤢᤰᤐᤠ ᤕᤠᤰᤋᤧᤶᤔᤧ᤹॥ ᤜᤠᤳ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢ᤹. ᤜᤠᤒᤠ ᤂᤧᤴ ᤛᤣᤛᤣᤒᤠ ᤐᤥᤱ᤹॥ ᤗᤧᤒᤡ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤛᤣ. ᤂᤡᤏᤡ᤹ ᤛᤠ᤹ᤖᤡᤰᤁᤣ ᤁᤢ᤹ᤀᤡᤃᤧᤓᤧᤖᤡ᥄” 8 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤁᤥᤖᤜ᤺ᤴ ᤔᤧᤳᤋᤢ. “ᤗᤧᤒᤡᤛᤣ. ᤂᤧᤵᤛᤧᤶᤔᤧ᤹॥ 9 ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤛᤱᤈᤢᤶᤓᤥ ᤋᤃᤡ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤧᤍᤠᤖᤡᤀᤠᤱ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥᤗᤠᤶ ᤂᤢᤏᤧ᤹ᤀᤣ ᤁᤧᤛᤣᤃᤡᤒᤠᤴ ᤌᤣ ᤂᤡᤏᤡ᤹ ᤂᤧᤴ ᤆᤢᤰᤐᤠ ᤁᤧᤗᤣ᤺ᤳᤋᤢᤶᤒᤡ᥅ 10 ᤂᤢᤏᤧ᤹ ᤂᤧᤏᤧ᤹ᤏᤢ ᤛᤥᤖᤡᤰ ᤁᤧᤶᤓᤢ᤹ ᤁᤧᤴᤛᤠ᤹ ᤗᤧᤒᤡᤜᤠ᤹ ᤏᤡ᤺ᤳᤋᤠᤱ ᤋᤠᤖᤢᤛᤡᤀᤠᤱ ᤘᤠ᤹॥ ᤀᤠᤸᤗ ᤌᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤠᤱ ᤁᤧᤃᤥ᤺ᤳᤋᤢᤶᤒᤡ᥅ 11 ᤂᤧᤏᤧ᤹ ᤁᤧᤍᤡᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤈᤢᤵᤛᤡᤀᤠᤱ ᤁᤧᤘᤕᤡᤒᤡ᥅ ᤜᤠᤖᤢᤏᤧᤴ ᤜᤠ᤺ᤳᤋᤠᤱ ᤂᤡᤏᤡ᤹ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤏᤧᤃᤧᤎᤡᤰᤋᤡᤒᤣ᥅” 12 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤣᤗᤡᤀᤠᤒᤖᤧ ᤁᤢᤛ᤻ᤛᤠ ᤍᤠᤋᤠᤏᤧᤴ ᤏᤢ ᤀᤒᤡᤖᤠᤔᤧᤴ ᤀᤢ᤺ᤳᤇᤧ ᤐᤠᤱᤄᤢᤛᤡ॥ ᤁᤖ ᤂᤢᤴᤇᤡ᤹ ᤀᤰᤂᤣ ᤐᤠ᤺ᤳᤋᤧᤇᤢ. “ᤀᤠᤴᤇᤡᤃᤣ ᤔᤧᤓᤧᤴᤇᤡᤴᤃᤧᤴ॥ 13 ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥᤗᤠᤶ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤡᤛᤧ ᤕᤠᤵᤔᤡ ᤁᤧᤓᤧᤳᤋᤧᤛᤠᤱ ᤂᤧᤏᤧ᤹ ᤁᤧᤴᤕᤥᤖᤧᤴᤒᤡ᥅ ᤕᤠᤶᤔᤥ ᤀᤠᤏᤡᤃᤣ ᤛᤶᤎᤠᤱ ᤕᤢᤰ ᤆᤥ᤺ᤰᤔᤠᤀᤠᤱ ᤁᤧᤃᤥ᤺ᤳᤋᤢᤒᤡ᥅ 14 ᤂᤧᤏᤧ᤹ ᤀᤠᤏᤡᤃᤣ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥᤀᤠᤱ ᤕᤠᤵᤔᤡ ᤁᤧᤶᤓᤧᤳᤋᤧᤴ. ᤜᤧᤰᤁᤩᤠᤱ ᤀᤡᤰᤋᤠᤵ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤠᤜᤠ᤹ ᤜᤢᤰᤁᤠᤵ ᤆᤥ᤺ᤰᤔᤠᤀᤠᤱ ᤕᤠᤵᤔᤡ ᤁᤧᤶᤒᤧᤖᤧᤴ॥ ᤂᤧᤏᤧ᤹ ᤌᤣ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤋᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅ ᤀᤠᤏᤡᤃᤣ ᤑᤧᤶᤔᤠᤀᤣ ᤔᤧᤓᤧᤖᤡᤃᤧᤴ॥” 15 ᤂᤧᤒᤩᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤔᤧᤍᤥᤴᤍᤢᤒᤠ ᤛᤡᤍᤢᤱᤈᤓᤠᤴ ᤔᤧᤍᤠ᤺ᤰᤋᤧᤴᤏᤧ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠ ᤀᤍᤱ ᤌᤡᤰᤁᤠᤱ ᤔᤧᤴᤍᤣ᤹ᤀᤣ ᤘᤠ᤹ᤀᤠ॥ ᤀᤠᤱᤃᤠ᤹ ᤂᤧᤱᤜᤠ᤹ᤀᤥ ᤀᤠᤳᤋᤡᤸᤗᤧᤴᤏᤠᤱ ᤜᤠᤴᤋᤡ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠ॥” 16 ᤔᤥᤛᤠ᤺ᤸᤗᤧ ᤁᤥᤖᤜ᤺ᤴ ᤔᤧᤳᤋᤢ. “ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤍᤡᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤜᤧᤰᤁᤩᤠᤱ ᤜᤠᤖᤢᤏᤧᤴᤏᤠᤱ ᤋᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤩᤧᤶᤔᤧ᤹॥ 17 ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤵᤑᤣᤰ ᤀᤠᤵᤑᤣᤰ ᤛᤠᤱᤋᤧᤖᤧ᤺ᤱᤜᤠ᤹ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤂᤧᤱᤜᤠ᤹ᤀᤥ ᤛᤢᤰᤐᤠ ᤁᤣ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤀᤠᤵᤑᤣᤰ ᤀᤠᤵᤑᤣᤰ ᤛᤠᤱᤋᤧᤖᤧ᤺ᤱᤜᤠ᤹. ᤀᤡᤃᤪ ᤁᤡᤵ ᤏᤧᤳᤇᤡᤀᤠᤱ ᤅᤠᤒᤥᤱ ᤛᤠᤱᤋᤧᤖᤧ᤺ᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤠᤖᤧᤶᤔᤧ᤹॥ ᤜᤠᤖᤢᤏᤧᤴ ᤏᤢ ᤂᤧᤏᤧ᤹ᤀᤠᤱ ᤀᤠᤵᤑᤣᤰ ᤀᤠᤵᤑᤣᤰ ᤛᤠᤱᤋᤧᤖᤧ᤺ᤱᤜᤠ᤹ ᤋᤠᤖᤧᤛᤧ᤹॥” 18 ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠᤱᤋᤧᤖᤧ᤺ᤱᤜᤠ᤹ ᤔᤧᤕᤠᤱᤛᤡᤱ ᤜᤧᤰᤁᤩᤠᤱ ᤂᤧᤵᤔᤥ ᤔᤡᤴ ᤔᤧᤎᤧᤰᤋᤢᤀᤠᤱ ᤛᤢᤰᤐᤠ ᤔᤧᤜᤠ᤺ᤴᤍᤢ॥ ᤂᤶᤓᤩᤠᤱ ᤂᤧᤱᤜᤠ᤹ ᤔᤥᤛᤠᤴ ᤜᤧᤰᤁᤩᤠᤱ ᤜᤠᤖᤢᤏᤧᤴ ᤛᤥᤖᤡᤰ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤔᤧᤕᤧᤶᤛᤡᤱ॥ 19 ᤁᤥᤖᤜ᤺ᤸᤗᤧ ᤂᤢᤏᤧ᤹ ᤁᤧᤍᤡᤶᤒᤠ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤛᤢᤵᤛᤢᤛᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤰᤐᤧᤳ ᤛᤱᤈᤢᤶᤓᤥᤀᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ 20 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 21 “ᤁᤴ ᤛᤱᤈᤢᤶᤓᤥᤀᤥᤏᤢ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴᤜᤠ᤹ ᤌᤡᤰᤗᤧᤱᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱ᤹॥” 22 ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤛᤠᤒᤴ ᤑᤴᤏᤧᤇᤡᤀᤠᤱ ᤏᤧᤏᤧᤛᤡ ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤧᤛᤢ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤖᤧᤰ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠ ᤁᤧᤃᤣ᤺ᤵᤐᤠ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤗᤳᤇᤠ ᤔᤏᤠᤖᤧ ᤗᤠᤕᤥ ᤆᤥᤃᤢᤒᤠᤀᤥ ᤌᤣ ᤂᤧᤏᤧ᤹ ᤁᤧᤖᤧᤰ ᤛᤱᤈᤢᤶᤓᤥ᤺ᤴᤏᤢ ᤁᤧᤛᤡᤰ ᤐᤥ᤺ᤰᤐᤠᤒᤡ᥅” 23 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 24 “ᤂᤧᤏᤧ᤹ ᤂᤧᤴ ᤛᤱᤈᤢᤶᤓᤥ᤺ᤴ ᤀᤰᤂᤣ ᤔᤧᤳᤋᤧᤛᤧ᤹. ‘ᤁᤥᤖᤜ. ᤍᤠᤋᤠᤏ ᤏᤢ ᤀᤒᤡᤖᤠᤔᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤒᤣᤛᤠᤱᤗᤠᤶ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤂᤧᤳᤋᤠᤛᤡᤶᤔᤧ᤹॥’” 25 ᤔᤥᤛᤠᤴ ᤐᤥᤃᤧᤀᤠᤱ ᤍᤠᤋᤠᤏ ᤏᤢ ᤀᤒᤡᤖᤠᤔᤀᤥ ᤐᤣ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤀᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤔᤧᤎᤠᤛᤡᤱ॥ 26 ᤂᤢᤏᤧ᤹ ᤛᤱᤈᤢᤶᤓᤥ᤺ᤴ ᤛᤡᤱᤛᤡᤱ ᤕᤧᤰᤕᤧᤰ ᤐᤥᤱᤔᤠ ᤐᤠᤱᤄᤢᤛᤡ. “ᤁᤴ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤗᤠᤶ ᤗᤠ᤺ᤳᤗᤠ᤺ᤳ ᤂᤧᤳᤋᤠᤛᤡᤶᤔᤧ᤹. ᤜᤧᤰᤁᤩᤠᤱ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤌᤧᤔᤠᤀᤠᤱ ᤔᤧᤛᤢᤛᤧᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤕᤢᤔᤪᤧᤰ ᤁᤧᤔᤧᤃᤡ᤹॥” 27 ᤁᤸᤗᤧᤆᤥᤃᤢᤸᤗᤧ ᤁᤥᤖᤜ. ᤍᤠᤋᤠᤏ ᤏᤢ ᤀᤒᤡᤖᤠᤔᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤗᤠᤶ ᤂᤧᤱᤜᤠ᤹ ᤔᤧᤗ᤺ᤴᤍᤧ ᤔᤧᤒᤣ॥ ᤍᤠᤋᤠᤏ ᤏᤢ ᤀᤒᤡᤖᤠᤔᤧᤴ ᤂᤢᤴᤇᤡ᤹ ᤔᤧ᤺ᤳᤛᤠᤜᤠ᤹ᤏᤢ ᤛᤥᤖᤡᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤗᤠ᤺ᤳᤗᤠ᤺ᤳ ᤔᤧᤕᤧᤶᤛᤡᤱ॥ 28 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡ. “ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠᤱᤄᤠᤱᤒᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤺ᤸᤗᤧ ᤆᤥᤃᤢᤱᤒᤠ ᤔᤣ᤺ᤴ ᤑᤠ᤹ᤀᤠᤱ ᤁᤴ ᤗᤠᤶᤒᤠ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 29 ᤁᤴ ᤔᤏᤠᤜᤠ᤹ᤀᤠᤱ ᤘᤣ᤹ ᤁᤧᤖᤧᤰ ᤔᤏᤠᤜᤠ᤹ ᤁᤢᤛᤡᤱ ᤀᤠᤵᤑᤣᤰ ᤂᤢᤴᤇᤡ᤹ ᤌᤠ᤺ᤰ ᤐᤢᤴᤏᤠᤱ ᤔᤧᤛᤡᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤐᤠᤱᤄᤠᤱᤒᤠ ᤔᤣ᤺ᤴ॥ 30 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ᤹ ᤜᤧᤰᤁᤩᤠᤱ ᤂᤠᤶᤒᤠᤱᤅᤡᤴ ᤐᤰᤁᤪᤧ᤹ ᤐ᤺ᤱᤅᤠᤱ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ᤏᤢ ᤛᤥᤖᤡᤰ ᤁᤴᤜᤠ᤹ ᤁᤢᤜᤡᤱᤘᤧᤳᤋᤣ ᤂᤧᤔᤠ ᤕᤱᤛᤱᤅᤥ ᤔᤧᤒᤣ᤺ᤰᤗ ᤕᤠ᤺ᤴᤍᤢᤛᤡᤏᤧᤓᤃᤪ. ᤁᤴ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤁᤢᤏᤠᤔᤧᤴᤇᤠ᤹ᤀᤣ ᤔᤧᤔᤧᤳᤋᤢᤖᤧᤇ ᤁᤧᤗ᤹ᤒᤠ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥” 31 ᤂᤢᤏᤧ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤛᤢᤖᤢᤀᤠᤱᤗᤰ ᤌᤣ ᤐᤳᤇᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤃᤠᤱᤒᤠ ᤂᤠᤶᤒᤠᤱᤅᤡᤴ ᤜᤷᤃᤧ᤹ ᤐ᤺ᤰᤂᤧ॥ 32 ᤜᤧᤰᤁᤩᤠᤱ ᤂᤠᤶᤒᤠᤱᤅᤡᤴ ᤔᤢᤖᤠᤴ ᤜᤠ ᤔᤧᤵᤔᤏᤠᤒᤠ ᤁᤢᤛᤡᤱ ᤐ᤺ᤰᤂᤧᤀᤠᤱ ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹. ᤁᤥᤖᤜᤖᤧ ᤁᤧᤖᤧᤰ ᤁᤢᤔᤏᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤆᤡᤃᤰᤘᤠᤜᤠ᤹ᤀᤠᤱ ᤂᤠᤱᤒᤠᤱᤅᤡᤸᤗᤧ ᤗᤖᤢᤍᤣᤛᤢᤛᤡ॥ 33 ᤂᤢᤴᤇᤡ᤹ ᤔᤧᤃᤳᤋᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ᤏᤢ ᤛᤥᤖᤡᤰ ᤁᤢᤜᤡᤱᤘᤧᤳᤋᤣ ᤂᤧᤱᤜᤠ᤹ ᤂᤧᤔᤠ ᤕᤱᤛᤱᤅᤥ ᤔᤧᤒᤣ॥ ᤂᤠᤶᤒᤠᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤆᤡᤈᤢᤵ ᤆᤢᤒᤧᤀᤠᤱ ᤗᤖᤢᤍᤣᤛᤢᤛᤡ. ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤂᤧᤱᤜᤠ᤹ ᤔᤧᤔᤧᤃᤧ॥ 34 ᤂᤧᤱᤜᤠ᤹ ᤔᤧᤓᤡ᤺ᤰᤋᤧᤒᤠ ᤀᤡᤰᤗᤠᤴ ᤁᤒᤪᤡᤱ ᤐᤡᤛᤠᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤄᤧᤵᤛᤢ ᤂᤧᤸᤗᤧᤆᤥᤃᤢᤸᤗᤧ ᤔᤧᤄᤧᤳᤇᤡᤱᤗ ᤀᤰᤂᤣ ᤗ᤹ᤔᤠ ᤔᤧᤜᤣ᤺ᤰᤋᤧ. “ᤀᤠᤏᤡ᤹ᤀᤠᤱ ᤀᤠᤸᤗ ᤂᤠᤶᤒᤠᤱᤅᤡᤸᤗᤧ ᤀᤠᤗᤳ ᤀᤠᤍᤣᤒᤡᤗᤠ᥄” 35 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥᤗᤠᤶ ᤔᤡᤎᤢᤱ ᤔᤡᤖᤠ᤺ᤰ ᤗ᤺ᤴᤍᤧᤀᤠᤱ ᤛᤢᤰᤐᤠ ᤁᤧᤜᤠ᤺ᤶᤒᤠ ᥈᥋᥆ ᤔᤏᤠᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡ॥ 36 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 37 “ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤁᤧᤍᤡ᤺ᤵᤐᤠᤀᤠᤱ ᤁᤧᤕᤢᤱᤒᤠ ᤔᤡᤎᤢᤱ ᤔᤡᤖᤠ᤺ᤰᤁᤥᤗᤠᤶ ᤛᤠᤱᤋᤧᤖᤧ᤺ᤱᤜᤠ᤹ ᤗ᤺ᤵᤔᤠ ᤏᤢ ᤔᤡᤛᤠᤱᤜᤠ᤹ ᤔᤠᤱᤓᤠ ᤔᤠ᤺ᤱᤄᤠ ᤋᤣ᤹ᤔᤠᤀᤠᤱ ᤛᤧᤔᤠᤖᤧ ᤗᤠᤃᤡ ᤔᤢᤖᤠ ᤔᤧᤳᤋᤧ᤹॥ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤱᤋᤧᤖᤧ᤺ᤱᤜᤠ᤹ ᤛᤣᤛᤣᤒᤠ ᤆᤥᤰ— 38 ᤂᤧᤱᤜᤠ᤹ᤃ ᤂᤢᤴᤇᤡ᤹ ᤀᤠᤒᤠᤅᤣ ᤕᤠᤶᤛᤠᤶᤔᤡᤴ ᤜᤠᤴᤋᤡ ᤆᤥᤃᤢᤖ ᤌᤠᤖᤡᤰ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤱᤋᤧᤖᤧ᤺ᤱᤛᤡᤖᤥ॥ ᤂᤧᤴ ᤛᤠᤱᤋᤧᤖᤧ᤺ᤱᤜᤠ᤹ᤗᤠᤶ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤐᤶᤔᤠᤖᤧ ᤗᤠᤃᤡ ᤗᤧᤵᤐᤧᤵᤐᤠ ᤑᤧ᤺ᤳᤇᤧᤶᤔᤧ᤹ᤀᤠᤱ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤥᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤛᤣᤛᤣᤒᤠ ᤆᤥᤰ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤴ ᤔᤡᤰᤛᤣᤴ ᤐᤥᤱᤗ॥” 39 ᤂᤧᤒᤩᤠᤱ ᤀᤣᤗᤠᤈᤠᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠᤜᤠ᤹ᤖᤧ ᤔᤧᤍᤥᤴᤍᤢᤒᤠ ᤁᤠᤛᤠ ᤛᤠᤱᤋᤧᤖᤧ᤺ᤱᤜᤠ᤹ ᤕᤠᤱᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤃᤢ ᤑᤧ᤺ᤳᤇᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤃᤡᤵᤔᤠ ᤐᤠ᤹ᤐᤠ᤺ᤶᤒᤠ ᤁᤢᤗᤧ᤺ᤵᤗᤠ ᤆᤥᤃᤢ. 40 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤗᤠᤶ ᤀᤣᤗᤠᤈᤠᤖᤧᤴ ᤔᤧᤳᤋᤢᤀᤠᤱ ᤘᤕᤧᤒᤠ ᤜᤧᤰᤁᤣᤀᤣ ᤂᤧᤸᤗᤧ ᤆᤥᤃᤢ॥ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤛᤢᤰᤐᤠ ᤜᤠ᤺ᤴᤇᤧ ᤏᤡ᤺ᤳᤋᤠᤱ ᤔᤧᤍᤠᤏᤧᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤀᤠᤱ ᤘᤕᤧ. ᤔᤣ᤺ᤴᤏᤧᤓᤃᤪ ᤂᤧᤴᤏᤠᤱ ᤁᤥᤖᤜ᤺ᤴ ᤏᤢ ᤂᤢᤏᤧ᤹ ᤁᤧᤍᤡᤶᤒᤠ ᤔᤏᤠᤜᤠ᤹ ᤜᤧᤰᤁᤣ ᤂᤠᤵᤐᤢᤌᤩ᤺ᤱ ᤔᤧᤒᤥᤱ᤹॥ 41 ᤁᤢᤍᤠ᤺ᤴᤍᤡᤰᤔᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤰᤂᤣ ᤔᤧᤗ᤹ᤖᤧᤀᤠᤱ ᤔᤏᤧᤔᤧᤎᤡᤰᤋᤧ. “ᤂᤧᤴᤇᤡ᤹ᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤁᤧᤛᤧᤖᤢᤛᤡᤀᤠᤱ ᤘᤠ᤹॥” 42 ᤁᤖ ᤀᤠᤸᤗ ᤛᤱᤈᤢᤶᤓᤥ᤺ᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤧᤈᤢᤵᤛᤧᤀᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤀᤥᤔᤧᤔᤧᤳᤋᤢ. ᤂᤧᤒᤩᤠᤱ ᤆᤄᤵ ᤂᤠ᤹ᤔᤡ᤺ᤳᤋᤧᤸᤗᤧ ᤂᤧᤴ ᤆᤡᤒᤴ ᤐᤴᤇᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ 43 ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤋᤃᤡ ᤐᤣᤛᤡ. 44 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 45 “ᤂᤡᤏᤡ᤹ᤃ ᤁᤴ ᤛᤱᤈᤢᤶᤓᤥᤀᤥᤗᤠᤶ ᤗᤠ᤺ᤳᤗᤠ᤺ᤳ ᤂᤧᤳᤋᤠᤛᤡᤶᤔᤧ᤹. ᤂᤶᤓᤩᤠᤱ ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤔᤡᤰᤆᤡᤖᤠᤵᤐᤠ ᤌᤡᤰᤗᤧᤛᤠ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱ᤹॥” ᤂᤧᤒᤩᤠᤱ ᤂᤧᤱᤜᤠ᤹ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱᤅᤠᤱ ᤔᤧᤏᤧᤛᤡᤱ॥ 46 ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤛᤠᤱᤋᤧᤖᤧ᤺ᤱᤅᤡᤴ ᤕᤠᤱᤛᤡᤱᤅᤧ᤹. ᤂᤧᤒᤩᤠᤱ ᤂᤧᤵᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤔᤡᤴ ᤁᤣ᤺ᤳᤋᤧᤀᤠᤱ ᤛᤢᤰᤐᤠ ᤕᤠᤰᤋᤧ᤹. ᤜᤧᤰᤁᤩᤠᤱ ᤂᤡᤔᤥ ᤂᤧᤴ ᤛᤱᤈᤢᤶᤓᤥᤀᤥ ᤋᤣ᤹ᤖᤧᤀᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤋᤡᤰᤗᤠᤶ ᤛᤢᤳᤌᤥ ᤆᤥ᤺ᤰᤔᤠᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤴᤏᤢ ᤏᤠᤍᤱ ᤆᤥ᤺ᤰᤔᤠᤛᤡ ᤕᤠ᤺ᤶᤒᤰ ᤆᤥᤃᤧ ᤐᤡᤖᤧᤛᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤡ ᤜᤧᤰᤋᤱᤒᤠ ᤁᤢᤛᤠᤰᤁᤧᤴᤏᤡᤴ ᤐᤥᤃᤧ ᤆᤢᤖᤧᤀᤠᤱ ᤘᤠ᤹—ᤔᤡᤱᤍᤣ᤹ ᤐᤥᤃᤧ ᤆᤢᤖᤧᤀᤠᤱ ᤘᤠ᤹॥” 47 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢᤒᤠ ᤁᤢᤛᤡᤱ ᤜᤠᤖᤢᤏᤖᤧ ᤛᤠᤱᤋᤧᤖᤧ᤺ᤱᤅᤡᤴ ᤕᤠᤱᤛᤡᤱᤅᤠᤱ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤗᤥ᤺ᤰᤋᤧᤀᤠᤱ ᤐᤣ॥ ᤔᤡᤱᤍᤣᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤐᤥᤱᤔᤠ ᤜᤣ᤺ᤰᤋᤧ ᤆᤢᤖᤧᤀᤠᤱ ᤘᤕᤧ. ᤁᤖ ᤂᤢᤏᤧ᤹ ᤛᤢᤰᤐᤠ ᤜᤠ᤺ᤴᤍᤢᤀᤠᤱ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤋᤡᤰᤗᤠᤶ ᤛᤢᤳᤌᤥ ᤆᤥ᤺ᤰᤔᤠᤛᤡ ᤕᤠ᤺ᤶᤒᤰ ᤆᤥᤃᤢ ᤐᤡᤖᤢᤛᤡ॥ 48 ᤂᤢᤏᤧ᤹ ᤁᤧᤛᤡᤒᤠ ᤏᤢ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤧᤶᤛᤡᤱ. ᤜᤧᤰᤁᤩᤠᤱ ᤔᤡᤱᤍᤣ᤹ ᤐᤥ᤺ᤰᤔᤧᤴ ᤆᤰ ᤗ᤹ᤖᤧ॥ 49 ᤁᤥᤖᤜᤖᤧ ᤁᤢᤜᤡᤴᤍᤥᤰᤁᤥ ᤁᤧᤛᤡᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤂᤧᤴ ᤕᤧᤶᤔᤥ ᤔᤡᤱᤍᤣᤸᤗᤧ ᤁᤧᤛᤡᤒᤠᤜᤠ᤹ ᥇᥊.᥍᥆᥆ ᤔᤧᤘᤕᤧ॥ 50 ᤔᤡᤱᤍᤣᤴ ᤆᤰᤗ᤹ᤖᤧᤀᤠᤱ ᤀᤣᤃᤠᤱ ᤜᤠᤖᤢᤏᤧᤴ ᤋᤢᤶᤔᤠᤍᤧᤴ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤥᤛᤠᤖᤥᤀᤥ ᤏᤢ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.