ᤂᤠᤏᤡ᤺ᤳ 15 - LIFOTNTᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤌᤡᤶᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤕᤢᤱᤔᤠᤖᤧ ᤗᤠᤃᤡ ᤐᤡᤏᤡᤱᤗ ᤐᤳᤋᤠᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤃᤧᤖᤡ᤹. 3 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤋᤥ᤺ᤴᤍᤧᤶᤔᤧ᤹॥ ᤁᤴ ᤛᤡᤍᤢᤱᤈᤓᤠᤜᤠ᤹ᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤔᤠᤱᤜᤢᤵ ᤁᤧᤵᤔᤠ ᤛᤡᤍᤢᤱᤈᤓᤠ ᤀᤡᤃᤪ ᤀᤠᤒᤠᤅᤣ ᤏᤡᤱᤘᤠ᤹ᤖᤧ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ. ᤋᤱᤒᤣᤀᤥᤒᤠ ᤋᤱᤏᤠᤶᤜᤠ᤹ᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤐᤡᤳᤌᤰᤛᤠ ᤀᤡᤃᤪ ᤔᤧᤸᤗᤢᤰ ᤔᤧ᤺ᤴᤍᤠᤰᤜᤠ᤹ᤗᤠᤶ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠ ᤁᤧᤛᤢᤰᤋᤢᤶ᤹॥ 4 ᤜᤧᤰᤁᤣ᤺ᤸᤗᤧ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤗᤡᤋᤖ ᤌᤡᤰ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤔᤠᤏᤠ ᤗᤡᤛᤡ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤔᤡᤸᤗᤧᤴ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧᤶᤔᤧ᤹॥ 5 ᤁᤧᤖᤧᤰ ᤛᤡᤍᤢᤱᤈᤓᤠ ᤀᤡᤃᤪ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤸᤗᤢᤰᤛᤠ᤺ᤳᤋᤧᤴᤏᤢ ᤛᤥᤛᤥᤖᤡᤰ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤔᤠᤏᤠ ᤗᤡᤛᤡ ᤆᤧᤸᤗᤧᤰᤛᤣ᤹ ᤛᤣ᤹ᤈ᤺ᤱᤘᤠᤀᤠᤱ ᤂᤡᤏᤡ᤹ ᤕᤠᤖᤡᤵ ᤆᤥᤃᤧᤶᤔᤧ᤹॥ 6 “‘ᤌᤢ᤺ᤶᤒᤠ᤺ᤴᤏᤢ ᤛᤥᤖᤡᤰ ᤆᤠᤜᤡ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤗᤡᤋᤖ ᤌᤡᤰᤁᤠᤱ ᤁᤢᤓᤪᤧ᤺ᤱ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤑᤥᤗᤰ ᤌᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ. 7 ᤜᤧᤰᤁᤩᤠᤱ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤗᤡᤋᤖ ᤌᤡᤰᤁᤠᤱ ᤁᤢᤓᤪᤧ᤺ᤱ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤕᤠᤖᤡᤵ ᤆᤥᤃᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤴ ᤁᤢᤏᤠᤶᤃᤧᤏᤢ᤹ᤒᤠ ᤛᤡᤍᤢᤱᤈᤓᤠ ᤜᤧᤰᤋᤱᤒᤠ ᤋᤥ᤺ᤴᤍᤧᤶᤔᤧ᤹॥ 8 “‘ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤀᤡᤃᤪ ᤔᤠᤱᤜᤢᤵᤐᤡᤴ ᤁᤧᤵᤔᤠᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤸᤗᤧ ᤁᤡᤃᤪ ᤕᤜᤘᤣ ᤍᤠᤱᤒᤠᤀᤥ ᤂᤧᤏᤧ᤹ ᤋᤱᤈᤢᤶ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤁᤢᤶᤒᤠᤒᤠ ᤐᤡᤳᤛᤠᤳᤋᤧᤴ ᤁᤧᤍᤥ᤺ᤴᤍᤢᤸᤗᤧ. 9 ᤂᤧᤴ ᤐᤡᤳᤛᤠᤳᤋᤧᤴᤏᤢ ᤛᤥᤖᤡᤰ ᤗᤡᤋᤖ ᤏᤧᤳᤇᤡ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤑᤥᤗᤰ ᤌᤡᤰᤁᤠᤱ ᤁᤢᤓᤪᤧ᤺ᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤜᤧᤰᤋᤱᤒᤠᤀᤠᤱ ᤋᤥ᤺ᤴᤍᤧ᤹॥ 10 ᤜᤧᤰᤁᤩᤠᤱ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤗᤡᤋᤖ ᤏᤧᤳᤇᤡ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤋᤠᤖᤧᤶᤔᤧ᤹॥ ᤂᤧᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤐᤥᤱ᤹॥ 11 ᤁᤧᤖᤧᤰ ᤛᤧᤃᤶᤒᤠ ᤀᤡᤃᤪ ᤌᤢ᤺ᤶᤒᤠ ᤁᤡᤃᤪ ᤔᤧᤸᤗᤢᤰᤛᤠ᤺ᤳ ᤁᤡᤃᤪ ᤔᤧ᤺ᤴᤍᤛᤠ᤺ᤳᤗᤧ ᤗᤠᤃᤡ ᤂᤡᤏᤡ᤹ ᤀᤰᤂᤣᤀᤣ ᤆᤥᤃᤧᤶᤔᤧ᤹॥ 12 ᤂᤡᤏᤡ᤹ ᤀᤠᤰᤂᤩᤠᤖᤡᤰ ᤁᤧᤍᤥ᤺ᤶᤍᤢᤶᤛᤡᤶ᤹. ᤂᤧᤱᤜᤠ᤹ ᤁᤧᤖᤧᤰ ᤜᤧᤰᤁᤣᤀᤣ ᤆᤥᤃᤧᤶᤛᤡᤶᤔᤧ᤹॥ 13 “‘ᤗᤠᤈᤣ᤹ᤛᤠᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤁᤧᤗ᤺ᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤔᤧᤍᤥᤴᤍᤢᤸᤗᤧ ᤁᤧᤖᤧᤰᤗᤧ ᤜᤠᤒᤠ ᤁᤴ ᤐᤖᤡᤰᤗᤧ ᤔᤧᤈᤥᤃᤢᤖ॥ 14 ᤂᤡᤏᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤀᤡᤃᤪ ᤁᤧᤍᤠᤒᤠ ᤌᤠ᤺ᤰᤁᤥ ᤂᤡᤏᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤁᤢᤓᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤁᤧᤗ᤺ᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤹ ᤋᤥ᤺ᤴᤍᤢᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤜᤧᤰᤁᤣᤀᤣ ᤂᤧᤸᤗᤧ ᤆᤥᤃᤢᤖ॥ 15 ᤂᤡᤏᤡ᤹ ᤛᤱᤈᤢᤶᤓᤥᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤗᤠᤃᤡ ᤗᤳᤇᤠ ᤐᤖᤡᤰᤐᤠ ᤌᤡᤶ ᤐᤥᤱᤗ॥ ᤁᤴ ᤂᤡᤏᤡ᤹ ᤋᤠ᤺ᤴᤍᤡ ᤁᤧᤍᤠᤒᤠ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤌᤡᤶ ᤐᤥᤱᤗ॥ ᤘᤣ᤹ ᤗᤠᤈᤣ᤹ᤒᤠᤴᤏᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤡᤏᤡ᤹ ᤜᤧᤰᤋᤱᤒᤠᤀᤣ ᤐᤥᤱᤗ॥ 16 ᤂᤡᤏᤡ᤹ ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤸᤗᤧ ᤗᤠᤃᤡ ᤗᤳᤇᤠ ᤐᤖᤡᤰᤐᤠ ᤌᤡᤶ ᤏᤢ ᤛᤠᤰᤌᤡᤶ ᤐᤥᤱᤗ॥’” 17 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 18 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤋᤣ᤹ᤏᤡᤱᤒᤠ ᤗᤠᤈᤣ᤹ᤀᤥ ᤁᤧᤃᤧᤖᤡ᤹. 19 ᤂᤧᤒᤩᤠᤱ ᤂᤡᤏᤡ᤹ ᤂᤧᤴ ᤗᤠᤈᤣ᤹ᤀᤥᤒᤠ ᤐᤥᤃᤢᤃᤧᤴ ᤁᤢᤈᤠᤴ ᤁᤧᤈᤠᤶᤔᤡᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤁᤢᤈᤠ ᤗᤰ ᤛᤧᤴᤍᤧᤶᤔᤧ᤹॥ 20 ᤂᤡᤏᤡ᤹ ᤂᤖᤧ᤺ᤱ ᤁᤧᤗᤧ᤺ᤱᤛᤢᤶᤔᤡᤸᤗᤧ ᤋᤃᤡ ᤁᤧᤍᤢᤶᤒᤠ ᤁᤢᤈᤠᤗᤠᤶᤒᤠᤒᤠ ᤂᤖᤧ᤺ᤱᤅᤡᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤧᤶᤔᤧ᤹॥ ᤂᤡᤏᤡ᤹ ᤆᤠ ᤌᤠᤶᤔᤠᤍᤧᤴᤏᤥ ᤁᤧᤛᤧᤴᤍᤢᤶᤒᤠ ᤁᤢᤈᤠᤗᤠᤶᤒᤠ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤒᤠ ᤜᤧᤰᤁᤣᤀᤣ ᤂᤧᤴ ᤂᤖᤧ᤺ᤱᤅᤡᤴ ᤁᤧᤍᤥ᤺ᤴᤍᤢᤶᤗ ᤐᤥᤱ᤹॥ 21 ᤂᤡᤏᤡ᤹ ᤋᤠ᤺ᤴᤍᤡ ᤁᤧᤍᤠᤒᤠ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤂᤡᤏᤡ᤹ ᤌᤡᤰᤛᤡᤃᤣᤰᤐᤠ ᤑᤣ᤹ᤖᤢᤶᤗᤠᤶ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ ᤔᤧᤴᤏᤡ ᤔᤧᤴᤎᤠ ᤁᤧᤒᤥᤱᤒᤠ ᤗᤠᤕᤥᤜᤠ᤹ᤖᤧ ᤗᤠᤃᤡ ᤛᤡᤍᤢᤱᤈᤓᤠᤜᤠ᤹ 22 “‘ᤀᤠᤸᤗ ᤂᤡᤏᤡ᤹ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢᤶᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤁᤴ ᤀᤡᤱᤈᤠᤱᤜᤠ᤹ᤀᤥᤒᤠ ᤗᤳᤇᤠᤀᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧᤓᤃᤪ. 23 ᤂᤡᤏᤡ᤹ ᤁᤧᤖᤧᤰ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤌᤡᤰᤛᤡᤃᤣᤰᤐᤠ ᤕᤧᤴᤏᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤗᤠᤶ ᤁᤧᤒᤡᤖᤡᤒᤠ ᤀᤡᤱᤈᤠᤱᤜᤠ᤹ᤀᤥᤒᤠ ᤀᤠᤳᤋᤡᤴ ᤀᤡᤱᤈᤠᤱᤅᤡᤴᤏᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧᤓᤃᤪ. 24 ᤜᤧᤰᤁᤩᤠᤱ ᤛᤱᤈᤢᤶᤓᤥ᤺ᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤂᤧᤴ ᤕᤠ᤺ᤶᤒᤰᤁᤡᤴ ᤀᤠᤴᤈᤠᤏᤡᤀᤥ ᤔᤧᤈᤥᤃᤢᤒᤠᤏᤧᤓᤃᤪ. ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤜᤧᤰᤋᤱᤒᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ. ᤂᤧᤸᤗᤧᤴ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠ᤺ᤴᤏᤢ ᤛᤥᤖᤡᤰ ᤌᤡᤶ ᤁᤢᤀᤡᤛᤡᤰ ᤋᤥ᤺ᤴᤍᤧᤶᤔᤧ᤹. ᤜᤧᤰᤁᤩᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤔᤧ᤺ᤴᤍᤠ ᤌᤡᤰᤁᤠᤱ ᤋᤥ᤺ᤴᤍᤧᤶᤔᤧ᤹॥ 25 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤗᤠᤃᤡ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢᤖ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤧᤈᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤏᤢ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤠᤖᤢᤀᤠᤱ ᤘᤠ᤹॥ 26 ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤧᤖᤧᤰ ᤂᤢᤴᤇᤡ᤹ ᤛᤱᤈᤢᤶᤓᤥ᤺ᤴ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤏᤠᤱ ᤗᤧᤵᤔᤡ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤴ ᤑᤧᤴᤕᤠ᤺ᤶᤒᤰᤁᤥ ᤔᤧᤎᤩᤧᤀᤠᤱ ᤔᤧᤘᤕᤧ॥ 27 “‘ᤁᤖ ᤁᤢᤓᤠ ᤗᤳᤇᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤗᤠᤕᤥ ᤆᤥᤃᤢᤏᤧᤓᤃᤪ. ᤂᤧᤸᤗᤧ ᤋᤱᤒᤣ ᤌᤡᤰ ᤁᤧᤃᤧᤵᤔᤠ ᤁᤢᤶᤔᤠᤔᤠ ᤔᤧ᤺ᤴᤍᤛᤠ᤺ᤳ ᤌᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤜᤧᤰᤁᤣ ᤋᤥ᤺ᤴᤍᤢᤖ॥ 28 ᤏᤡᤱᤘᤠ᤹ ᤔᤧᤱᤄᤥᤀᤣ ᤗᤠᤕᤥ ᤁᤧᤈᤥ᤺ᤰᤐᤠ ᤂᤧᤴ ᤔᤏᤠᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ ᤐᤡᤖᤢᤖ. ᤜᤧᤰᤁᤩᤠᤱ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤐᤥᤱᤅᤡᤸᤗᤧ ᤂᤧᤸᤗᤧ ᤗᤧᤵᤔᤡ ᤂᤥᤛᤢᤖᤥ॥ 29 ᤏᤡᤱᤘᤠ᤹ ᤔᤧᤱᤄᤥᤀᤣ ᤗᤠᤕᤥ ᤁᤧᤈᤥ᤺ᤰᤐᤠ ᤀᤡᤛᤪᤠᤀᤡᤗᤡ ᤕᤰᤕᤢᤱᤒᤠ ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤗᤳᤇᤠ ᤌᤡᤶ ᤐᤥᤱᤗ॥ 30 “‘ᤁᤖ ᤀᤠᤵᤑᤣᤰ ᤗᤠᤈᤣ᤹ᤛᤠᤒᤠ ᤀᤡᤃᤪ ᤘᤣ᤹ ᤗᤠᤈᤣ᤹ᤒᤠ ᤁᤢᤓᤠ ᤔᤏᤠ᤺ᤸᤗᤧ ᤏᤡᤏᤡᤒᤠ ᤗᤠᤕᤥ ᤆᤥᤃᤢᤏᤧᤓᤃᤪ. ᤕᤜᤘᤣ ᤍᤠᤱᤒᤧᤴ ᤀᤡᤱᤍᤥ ᤔᤧᤳᤋᤢᤒᤠ ᤀᤠᤵᤋᤡᤰᤁᤡᤴ ᤂᤧᤸᤗᤧ ᤁᤢᤛᤶᤎᤠᤱ ᤌᤠᤖᤥ. ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢ᤹॥ 31 ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤀᤠᤱ ᤘᤠ᤹. ᤂᤧᤒᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤑᤣ᤺ᤴᤍᤢᤀᤠᤱ ᤘᤠ᤹॥ ᤂᤧᤴ ᤔᤏᤠᤴ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥ ᤂᤧᤸᤗᤧ ᤆᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤋᤢᤔᤢᤖᤖᤥ॥’” ᤏᤠ᤺ᤶᤛᤡᤱᤔᤠ ᤕᤧᤴ ᤁᤧᤓᤣ᤺ᤶᤒᤠ ᤔᤏᤠ 32 ᤀᤡᤛᤪᤠᤀᤡᤗᤡᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤎᤡᤰ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤛᤡᤱ ᤛᤢᤶᤏᤢ ᤕᤠᤃᤧᤒᤠ ᤔᤧᤏᤡᤛᤢ॥ 33 ᤛᤡᤱ ᤁᤧᤛᤢᤶᤒᤠ ᤔᤏᤠᤴ ᤂᤧᤱᤜᤠ᤹ᤖᤧ ᤔᤥᤛᤠ. ᤜᤠᤖᤢᤏ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤀᤥ ᤔᤧᤍᤠᤖᤢ॥ 34 ᤂᤧᤴ ᤂᤢᤶᤍᤡᤱ ᤐᤡᤔᤠ ᤁᤧᤒᤥᤱᤒᤠ ᤌᤡᤶᤔᤡᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤃᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤔᤏᤠᤴ ᤔᤧᤛᤠᤰᤋᤢ ᤔᤧᤕᤢᤰᤂᤢ॥ 35 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤴ ᤔᤏᤠᤴ ᤛᤧᤵᤔᤠᤀᤣ ᤐᤥᤱ᤹॥ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤧᤴ ᤔᤏᤠᤴ ᤛᤠ᤺ᤱᤃᤠᤜᤡᤶᤜᤠ᤹ ᤗᤠ᤺ᤰᤁᤠᤳ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤖ॥” 36 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤧᤴ ᤛᤠ᤺ᤱᤃᤠᤜᤡᤶᤜᤠ᤹ ᤗᤠ᤺ᤰᤁᤠᤳ ᤔᤧᤍᤣ᤹ᤖᤢ. ᤂᤧᤒᤩᤠᤱ ᤂᤧᤴ ᤗᤢᤱᤅᤧᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤖᤥ॥ ᤆᤠᤱ ᤐᤥᤖᤠ᤺ᤰᤘᤠ ᤌᤡᤶᤜᤠ᤹ 37 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤰᤂᤣ ᤔᤧᤳᤋᤢ. 38 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤁᤧᤖᤧᤰ ᤌᤠ᤺ᤰᤌᤠ᤺ᤰᤁᤥ ᤌᤠᤖᤡᤰ ᤂᤡᤏᤡ᤹ ᤆᤠᤱᤜᤠ᤹ᤖᤧ ᤁᤢᤕᤠᤀᤥ ᤁᤢᤒᤥᤖᤠᤰᤜᤠ᤹ ᤑᤳᤇᤧᤶᤔᤧ᤹ ᤜᤧᤰᤁᤩᤠᤱ ᤂᤧᤵᤔᤥ ᤗᤳᤇᤠ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤂᤡ ᤌᤧᤰᤋᤧᤶᤔᤧ᤹॥ 39 ᤂᤧᤴ ᤁᤢᤒᤥᤖᤠᤰᤁᤡᤴ ᤀᤥᤃᤧᤔᤧᤳᤋᤢᤶᤔᤡᤸᤗᤧ ᤂᤡᤏᤡ᤹ ᤂᤧᤴ ᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤔᤡᤰᤗᤧ ᤏᤡᤛᤢᤒᤠ ᤐᤠ᤺ᤴᤏᤡᤴ ᤏᤢ ᤏᤡᤱᤘᤠ᤹ᤖᤧ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤥᤛᤢᤶᤒᤧᤃᤥ ᤔᤧᤗ᤹ᤖᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤏᤡᤱᤘᤠ᤹ᤛᤢᤶ ᤗ᤹ᤖ॥ 40 ᤂᤧᤒᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤀᤠᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤡᤱᤘᤠ᤹ ᤕᤠᤰᤁᤠᤱ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤁᤧᤒᤥ᤺ᤰᤂᤡ᤹॥ 41 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤎᤠᤰᤐᤠ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤀᤣᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.