ᤂᤠᤏᤡ᤺ᤳ 14 - LIFOTNTᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤔᤧᤀᤳᤋᤢ 1 ᤂᤧᤴ ᤛᤧᤴᤍᤡᤰ ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤑᤡᤖᤡᤰ ᤑᤡᤖᤡᤰ ᤔᤧᤓᤡ᤺ᤰᤋᤧᤖ ᤔᤧᤜᤠᤒᤧ॥ 2 ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤥᤛᤠᤴ ᤏᤢ ᤜᤠᤖᤢᤏᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤏᤧᤔᤧᤎᤡᤰᤋᤧ. ᤜᤧᤰᤁᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤖᤧ ᤂᤧᤴᤜᤠ᤹ ᤔᤧᤔᤧᤳᤋᤢᤛᤡ. “ᤔᤡᤛᤪ ᤗᤠᤈᤣ᤹ᤀᤥᤀᤣ ᤀᤠᤏᤡᤃᤣ ᤛᤩᤧ᤹ᤀᤡᤃᤧᤸᤗᤧ ᤏᤢᤒᤠ ᤐᤥ᤺ᤰᤂᤧᤒᤠ ᤘᤕᤧᤒᤠᤔᤧᤴ. ᤀᤡᤃᤪ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤩᤧ᤹ᤀᤡᤃᤧᤛᤠᤱ ᤏᤢᤖᤧᤒᤠ ᤘᤕᤧᤔᤧᤴ॥ 3 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤓᤣ᤺ᤸᤗᤧ ᤀᤠᤏᤡᤃᤣ ᤛᤧᤵᤔᤠᤖᤧ ᤗᤠᤃᤡ ᤌᤣᤀᤠᤱ ᤁᤴ ᤋᤧᤴᤏᤥ ᤑᤧᤳᤋᤡᤃᤧᤖ ᤐᤳᤇᤡᤃᤧᤒᤠᤒᤣ᥅ ᤀᤠᤏᤡᤃᤣ ᤔᤣ᤺ᤳᤜᤠ᤹ ᤏᤢ ᤛᤠᤜᤠ᤹ ᤏᤠᤵᤔᤏᤠᤒᤠ ᤆᤡᤃᤰᤘᤠ ᤜᤧᤰᤁᤣ ᤔᤧᤍᤧᤶᤛᤢᤛᤡ᤹॥ ᤀᤠᤸᤗ ᤀᤠᤏᤡ᤹ ᤔᤡᤛᤪ ᤗᤠᤈᤣ᤹ᤀᤥᤀᤣ ᤏᤢ᤺ᤱᤔᤠ ᤐᤣ᤺ᤰᤔᤠ ᤏᤢᤒᤠ ᤔᤧᤒᤥᤱᤏᤧᤶᤒᤡ᥅” 4 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤗᤳᤇᤠ ᤗᤠᤶᤗᤥᤒᤠ ᤛᤣᤃᤢᤶᤔᤠᤱ ᤔᤡᤛᤪ ᤗᤠᤈᤣ᤹ ᤏᤢ᤺ᤰᤂᤡ᤹॥” 5 ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤛᤠᤶᤒᤥᤴ ᤜᤒᤳ ᤑᤴᤏᤧᤇᤡᤀᤠᤱ ᤏᤧᤏᤧᤳᤇᤡ॥ 6 ᤗᤠᤈᤣ᤹ ᤌᤥ᤺ᤶᤛᤧ ᤁᤧᤒᤣ᤺ᤰᤐᤠᤜᤠ᤹ᤀᤥ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤏᤢ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤌᤧ᤺ᤰᤂᤧᤇᤢ. 7 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤂᤢᤴᤇᤡ᤹ ᤀᤰᤂᤣ ᤔᤧᤳᤋᤧᤇᤢᤛᤡ. “ᤀᤠᤏᤡᤃᤣ ᤁᤢᤎᤥ᤺ᤶᤛᤧ ᤐᤣᤃᤡᤃᤧᤒᤠ ᤗᤠᤈᤣᤴ ᤛᤠ᤹ᤖᤡᤰ ᤏᤢᤒᤠ ᤗᤠᤈᤣ᤹ ᤆᤥᤰ॥ 8 ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ᤏᤢ ᤁᤢᤏᤡᤱᤘᤠ᤹ ᤋᤠᤏᤧᤓᤃᤪ. ᤂᤢᤏᤧ᤹ ᤀᤠᤏᤡ᤹ ᤂᤧᤴ ᤗᤠᤈᤣ᤹ᤀᤥ ᤀᤠᤍᤣ᤹. ᤜᤧᤰᤁᤩᤠᤱ ᤂᤧᤴ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣᤴ ᤂᤢᤏᤧ᤹ ᤀᤠᤒᤡᤖᤥ॥ 9 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥᤖᤰ ᤔᤧᤒᤥᤃᤧᤶᤔᤡᤴᤏᤧ᤹॥ ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤀᤠᤏᤡ᤹ ᤛᤠᤏᤠ᤺ᤳ ᤔᤧᤒᤥᤱ᤹॥ ᤂᤧᤱᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠᤴ ᤂᤢᤴᤇᤡ᤹ᤗᤠᤶ ᤂᤧᤳᤇᤡᤱ ᤐᤣᤀᤠᤱ ᤜᤥᤵ. ᤁᤖ ᤕᤜᤘᤣ ᤍᤠᤱᤒᤠᤴ ᤀᤠᤏᤡ᤹ᤏᤢ ᤘᤠ᤹॥ ᤂᤡᤏᤡ᤹ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹॥” 10 ᤁᤖ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤧᤱᤜᤠ᤹ ᤗᤢᤱᤅᤡᤸᤗᤧ ᤗᤧᤵᤔᤠᤛᤡ ᤑᤠ᤹ᤀᤠᤱ ᤐᤠᤴ ᤔᤧᤜᤢᤵᤋᤢ॥ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ 11 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤁᤴ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤰᤂᤩᤠᤖᤡᤰ ᤀᤡᤖᤡᤰ ᤔᤧᤏᤠ᤹ᤀᤠᤖ ᤔᤧᤘᤠ᤹ᤒᤣ᥅ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤏᤡᤛᤢᤀᤠᤱᤛᤠᤱ ᤁᤴᤜᤠ᤹ᤖᤧ ᤀᤠᤰᤂᤧᤴ ᤌᤠᤖᤡᤰ ᤀᤠᤱᤃᤠ᤹ ᤏᤛᤠᤴ ᤔᤧᤴᤈᤥ᤺ᤰᤁᤠᤀᤠᤴᤒᤠᤒᤣ᥅ 12 ᤁᤴᤜᤠ᤹ ᤀᤠᤱᤃᤠ᤹ ᤔᤡᤱᤍᤣᤸᤗᤧ ᤔᤧᤰᤂᤢᤱᤛᤡᤱ᤹. ᤁᤖ ᤂᤧᤏᤧ᤹ ᤗᤠᤶᤒᤠᤀᤣ ᤁᤴᤜᤠ᤹ᤏᤢ᤺ᤸᤗᤧᤀᤠᤱ ᤕᤶᤒᤠ ᤛᤢᤘᤠᤱ ᤏᤢ ᤔᤢᤰᤛᤠᤶᤛᤠᤒᤠ ᤆᤥᤃᤢᤱᤛᤡᤱ᤹॥” 13 ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ. “ᤔᤡᤛᤪᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤸᤗᤧ ᤂᤧᤱᤜᤠ᤹ᤖᤧ ᤌᤣ ᤔᤧᤒᤠ᤺ᤳᤋᤢ᤹᥅ ᤀᤠᤍᤠᤱᤒᤠᤖᤧ ᤁᤧᤔᤢᤰᤛᤠᤶᤔᤡᤴ ᤀᤥ᤺ᤴᤃᤧᤎᤠᤰᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤀᤠᤍᤠᤱᤒᤠᤖᤧᤀᤣ ᤁᤴᤜᤠ᤹ ᤁᤧᤗ᤺ᤳᤋᤢ ᤁᤧᤎᤠᤰᤋᤢᤛᤡᤒᤠᤖᤥ॥ 14 ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤔᤡᤛᤪᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤈᤧᤰᤋᤢᤛᤡ᤹॥ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢ ᤔᤧᤛᤢᤖᤢᤀᤠᤱ ᤘᤠ᤹. ᤂᤧᤏᤧ᤹ ᤏᤠᤍᤢᤶᤍᤢᤶᤒᤠᤀᤣ ᤏᤡᤃᤧᤎᤠᤒᤧᤀᤠᤱ ᤁᤧᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤄᤠ᤹ᤔᤡ᤺ᤳᤋᤡᤴ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤧᤶᤛᤡᤱ ᤂᤧᤒᤩᤠᤱ ᤗᤧᤴᤍᤡᤰ ᤂᤠ᤹ᤔᤡᤳ ᤛᤡᤳᤗᤠᤱ ᤏᤢ ᤛᤧᤴᤍᤡᤰ ᤔᤡ ᤛᤡᤳᤗᤠᤱ ᤁᤧᤒᤥᤱᤅᤠᤱ ᤂᤧᤏᤧ᤹ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤁᤧᤒᤣ᤺ᤰ॥ 15 ᤀᤠᤸᤗ ᤂᤧᤏᤧ᤹ ᤁᤴ ᤔᤏᤠᤜᤠ᤹ ᤌᤡᤰᤗᤧᤱᤗᤧ ᤁᤧᤛᤧᤖᤢᤛᤡᤸᤗᤧᤃ ᤂᤧᤏᤧ᤹ ᤁᤧᤔᤡᤱᤛᤥ ᤁᤧᤎᤠ᤺ᤱᤛᤥ ᤁᤧᤄᤧᤶᤒᤠ ᤛᤢᤘᤠᤱᤜᤠ᤹ᤖᤧ ᤀᤰᤂᤣ ᤔᤧᤗ᤹ᤀᤠᤱ ᤐᤠᤴ ᤔᤧᤒᤠ᤺ᤳᤋᤢ᤹. 16 ‘ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤏᤠᤜᤠ᤹ ᤗᤠᤈᤣ᤹ ᤐᤡᤏᤡᤱ ᤔᤧᤳᤋᤢᤛᤡ ᤜᤧᤰᤁᤩᤠᤱ ᤔᤠᤱᤜᤧᤰ ᤆᤥᤃᤢ ᤁᤖ ᤔᤠᤱᤜᤢᤵ ᤆᤥᤃᤢᤒᤠ ᤗᤠᤈᤣ᤹ᤀᤥ ᤑᤧᤵᤔᤠ ᤔᤧᤛᤢᤰᤋᤢᤛᤡᤴ. ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤩᤧᤖᤢᤛᤡ॥’ 17 “ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤧ᤹ᤀᤥ. ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤠ᤹— 18 ‘ᤕᤜᤘᤣ ᤍᤠᤱᤒᤠᤴ ᤜᤏᤧ ᤁᤢᤛᤡᤰ ᤔᤧᤶᤒᤥ᤺ᤰᤔᤏᤠᤒᤠ ᤏᤢ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤆᤥᤰ. ᤑᤧᤴᤕᤠ᤺ᤶᤒᤰ ᤏᤢ ᤗᤠᤕᤥ ᤗᤠᤛᤥᤳ ᤗᤧᤵᤔᤡ ᤁᤧᤒᤡᤒᤠ ᤆᤥᤰ. ᤁᤖ ᤀᤠᤵᤋᤡᤰᤛᤠᤒᤠᤴ ᤀᤠᤳᤋᤡᤴ ᤐᤖᤡᤰᤗᤧᤀᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤧᤴᤈᤥ᤺ᤰᤔᤏᤠᤒᤠ. ᤐᤠᤎᤧᤒᤠ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤴᤇᤡ᤹ ᤛᤢᤶᤛᤡ ᤗᤡᤛᤡ ᤌᤠ᤺ᤰ ᤌᤠᤖᤡᤰᤛᤠᤱ ᤂᤢᤶᤍᤡᤱ ᤁᤧᤒᤡᤒᤠ ᤆᤥᤰ॥’ 19 ᤀᤠᤱᤃᤠ᤹ ᤂᤧᤏᤧ᤹ ᤐᤣᤗᤡ ᤑᤠᤰᤏᤧ. ᤂᤧᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤐᤠ ᤁᤢᤀᤡᤛᤡᤰ. ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤗᤠᤶ ᤀᤠᤸᤗᤥ ᤌᤠᤖᤡᤰ ᤗᤧᤵᤔᤡ ᤁᤧᤒᤡᤖᤢᤛᤡᤖ ᤁᤧᤘᤠ᤹ᤒᤠ ᤜᤧᤰᤁᤣ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥” 20 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤁᤢᤛᤡᤱᤅᤣ ᤀᤠᤱᤃᤠ᤹ ᤁᤴᤜᤠ᤹ ᤗᤧᤵᤔᤡ ᤐᤡᤖᤢᤱᤛᤡᤱᤅᤠᤱ ᤘᤠ᤹॥ 21 ᤜᤧᤰᤁᤣᤛᤠᤱ. ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠᤖᤠᤰ ᤘᤠ᤹ᤒᤠ ᤁᤢᤀᤡᤛᤡᤰ. 22 ᤔᤡᤛᤪ ᤏᤢ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤏᤢ ᤀᤠᤱᤃᤠ᤹ ᤆᤥᤃᤢᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡᤛᤢᤀᤠᤱᤛᤠᤱ ᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤒᤠ ᤁᤧᤒᤥᤱᤒᤠᤀᤠᤱ ᤌᤡᤒᤥᤱᤗᤧᤱ ᤌᤠᤖᤡᤰ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤁᤧᤛᤠ᤹ᤒᤠ ᤁᤴ ᤁᤧᤖᤧᤰ ᤔᤏᤠᤜᤠ᤹ᤖᤧ— 23 ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤐᤡᤏᤡᤱ᤹ ᤗ᤹ᤖᤡᤰ ᤔᤠᤱᤜᤧᤰᤛᤡᤅᤠᤱᤒᤠ ᤗᤠᤈᤣᤴ ᤂᤧᤱᤜᤠ᤹ᤀᤥ ᤗᤳᤇᤠᤖᤧᤀᤠᤱ ᤏᤡᤔᤠ ᤔᤧᤱᤄᤥᤛᤢᤴ᤹॥ ᤀᤠᤱᤃᤠ᤹ ᤁᤧᤏᤠ᤹ᤒᤠᤜᤠ᤹ᤖᤧ ᤂᤧᤴ ᤗᤠᤈᤣᤴ ᤀᤠᤵᤑᤠᤸᤗᤧᤀᤠᤱ ᤏᤡᤔᤠ ᤔᤧᤱᤄᤥᤛᤢᤴ᤹॥ 24 ᤁᤖ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤁᤠᤗᤧᤒᤖᤧᤀᤥ ᤘᤣ᤹ᤛᤔᤠ ᤕᤠᤶᤛᤠᤶ ᤕᤠᤰ. ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤐᤖᤡᤰᤗᤧ ᤀᤠᤱᤃᤠ᤹ ᤀᤠᤈᤥ᤺ᤱ ᤀᤡ᤺ᤳᤋᤢᤀᤠᤱ ᤘᤠ᤹॥ ᤁᤸᤗᤧ ᤆᤥᤃᤢᤸᤗᤧᤀᤣ ᤂᤢᤏᤧ᤹ ᤁᤧᤖᤧᤀᤠᤱ ᤑᤧᤖᤧᤒᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤂᤢᤏᤧ᤹ ᤋᤣ᤹ᤖᤢᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤥ ᤕᤢᤰ ᤔᤧᤈᤥᤃᤢ᤹॥ 25 ᤀᤔᤠᤗᤧᤁᤡᤜᤠ᤹ ᤏᤢ ᤁᤏᤠᤏᤡᤜᤠ᤹ ᤏᤧᤏᤧᤒᤠᤍᤧᤴᤜᤠ᤹ᤀᤥ ᤔᤧᤕᤢᤱᤒᤠᤸᤗᤧ ᤆᤥᤃᤢᤸᤗᤧ ᤋᤠ᤺ᤴᤍᤡᤰᤛᤠ ᤂᤡᤏᤡ᤹ ᤏᤢ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥ ᤗᤠᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤐᤣᤃᤧᤶᤔᤧ᤹॥” 26 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 27 “ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤴ ᤁᤢ᤹ᤀᤡᤃᤧᤓᤧᤶᤒᤠ ᤛᤱᤈᤢᤶᤓᤥ᤺ᤴ ᤀᤠᤑᤠᤸᤎᤠᤖᤡᤰ ᤔᤏᤧᤔᤧᤎᤡᤰᤐᤠᤒᤣ᥅ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤏᤧᤔᤧᤎᤡᤰᤋᤧᤒᤧᤴ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹॥ 28 ᤂᤡᤴᤇᤡ᤹ ᤂᤧᤱᤜᤠ᤹ ᤔᤧᤳᤋᤧᤛᤧᤛᤧ᤹. ‘ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤕᤜᤘᤣ ᤍᤠᤱᤒᤠᤸᤗᤧ ᤀᤢᤘᤠ ᤆᤥᤃᤢ᤹. ᤀᤠᤱᤃᤠ᤹ ᤂᤧᤵᤛᤢᤱᤗ ᤂᤡᤏᤡ᤹ ᤌᤧᤔᤠ ᤌᤧᤔᤠ ᤁᤧᤒᤠ᤺ᤳᤋᤢᤶᤔᤠᤱ ᤘᤕᤧ. ᤀᤠᤱᤃᤠ᤹ ᤜᤠᤒᤠ ᤂᤧᤴᤏᤣ ᤆᤥᤃᤢᤱ᤹॥ 29 ᤂᤡᤏᤡ᤹ ᤆᤣ ᤌᤰᤜᤠ᤹ ᤀᤠᤶᤓᤠ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤏᤧᤕᤠ᤺ᤰ. ᤂᤡᤏᤡ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤏᤧᤃᤧᤎᤡᤰᤋᤡᤀᤠᤱ ᤁᤧᤘᤕᤡ᤹॥ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤥ ᤏᤡᤒᤥᤱ ᤋᤱᤒᤣᤏᤢ᤺ᤸᤗᤧ ᤕᤖᤡᤰ ᤁᤧᤕᤥᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤂᤧᤴ ᤗᤠᤈᤣ᤹ᤀᤥ ᤗᤠ᤺ᤵᤔᤠ ᤁᤧᤱᤄᤥᤛᤡᤴ᤹॥ 30 ᤜᤧᤰᤁᤩᤠᤱ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒᤧᤴ ᤏᤢ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤏᤠᤱ ᤀᤠᤱᤃᤠ᤹ ᤐᤡᤏᤡᤱ ᤑᤠ᤹ᤀᤠᤱ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤔᤠᤱᤜᤧᤰᤛᤡᤅᤠᤱᤒᤠ ᤗᤠᤈᤣ᤹ᤀᤥ ᤗᤠ᤺ᤵᤔᤠᤀᤠᤱ ᤕᤢᤱᤔᤠ ᤁᤧᤱᤄᤥᤛᤡᤴ᤹॥ 31 ᤏᤠᤵᤔᤏᤠᤛᤡᤒᤠ ᤆᤡᤃᤰᤘᤠ ᤜᤧᤰᤁᤣ ᤔᤧᤍᤧᤶᤛᤢᤛᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤂᤡᤏᤡ᤹ ᤛᤠᤀᤣᤜᤠ᤹ᤃ ᤀᤠᤱᤃᤠ᤹ ᤂᤧᤵᤔᤥ ᤁᤧᤳᤋᤢᤱᤛᤡᤱ᤹. ᤂᤶᤓᤩᤠᤱ ᤂᤡᤏᤡ᤹ ᤏᤡᤏᤡ ᤂᤧᤶᤄᤧᤶ ᤁᤧᤸᤗᤠᤵᤋᤢᤶᤔᤡᤴᤒᤠ ᤋᤧᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤄᤥᤛᤢ᤹॥ 32 ᤁᤖ ᤂᤡᤏᤡ᤹ ᤆᤣ ᤌᤰᤜᤠ᤹ᤃ ᤀᤠᤶᤓᤠ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤏᤧᤕᤠ᤺ᤰ॥ 33 ᤂᤡᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤋᤠᤰᤔᤧᤃᤴᤏᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤡᤏᤡ᤹ ᤁᤧᤖᤧᤰ ᤔᤧᤴᤇᤡᤀᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢ᤹॥ 34 ᤂᤡᤏᤡ᤹ ᤂᤧᤴ ᤗᤠᤈᤣᤴ ᤌᤥ᤺ᤶᤔᤠᤖᤧ ᤗᤠᤃᤡ ᤗᤡᤒᤥᤱ ᤕᤧᤴ ᤁᤧᤍᤣᤛᤢᤶᤔᤠᤱ ᤁᤧᤘᤕᤡ. ᤁᤸᤗᤧᤆᤥᤃᤢᤸᤗᤧ ᤌᤡᤰᤕᤠᤴ ᤁᤢᤍᤱᤒᤠ ᤋᤱᤒᤣ ᤌᤡᤰ. ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤋᤢᤰᤂᤣ ᤆᤩᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤔᤡ ᤐᤥᤱᤅᤠᤸᤗᤧ ᤌᤣ ᤐᤥᤱ᤹ ᤂᤧᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥’ 35 ᤁᤴ ᤁᤧᤒᤠ᤺ᤵᤐᤧᤴ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤧᤈᤢᤶᤒᤠ ᤁᤴ ᤁᤢ᤹ᤀᤡᤃᤧᤓᤧᤶᤒᤠ ᤛᤱᤈᤢᤶᤓᤥ᤺ᤴ ᤀᤠᤱᤃᤠ᤹ ᤀᤰᤂᤣᤀᤣ ᤔᤧᤳᤋᤢᤱ᤹॥ ᤀᤠᤶᤓᤠ ᤁᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤛᤡᤀᤠᤱ ᤔᤧᤔᤠ᤺ᤳ॥” 36 ᤔᤥᤛᤠ᤺ᤸᤗᤧ ᤗᤠᤈᤣᤴ ᤌᤥ᤺ᤶᤔᤠᤖᤧ ᤗᤠᤃᤡ ᤐᤠᤱᤄᤢᤛᤡᤸᤗᤧ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤸᤗᤧ ᤋᤠᤵᤑᤧ᤺ᤶᤒᤠ ᤀᤡᤱᤄᤱ ᤔᤧᤓᤧᤳᤋᤢ ᤜᤧᤰᤁᤩᤠᤱ ᤁᤧᤖᤧᤰ ᤛᤱᤈᤢᤶᤓᤥ᤺ᤴ ᤔᤥᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠᤖᤧᤖ ᤔᤧᤕᤠ᤺ᤴᤍᤢᤛᤡᤀᤠᤱ ᤘᤕᤧ. 37 ᤂᤧᤴ ᤋᤠᤵᤑᤧ᤺ᤶᤒᤠ ᤀᤡᤱᤄᤱ ᤁᤧᤓᤧᤵᤐᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤍᤢᤰᤔᤧᤸᤗᤧ ᤔᤧᤛᤩᤧ॥ 38 ᤗᤠᤈᤣ᤹ ᤌᤥ᤺ᤶᤛᤧ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤀᤥ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤏᤢ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤧᤒᤧᤴᤗᤰ ᤁᤢᤜᤡᤱᤘᤧᤳ ᤕᤠ᤺ᤰᤋᤧᤛᤡ॥ 39 ᤀᤠᤸᤗ ᤔᤥᤛᤠ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤁᤴ ᤐᤠ᤺ᤴᤏᤡᤴ ᤆᤧᤰᤋᤢᤛᤡᤸᤗᤧ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤖᤡᤱ ᤔᤧᤎᤰᤋᤧᤀᤠᤱ ᤜᤠ᤺ᤵᤔᤠ ᤔᤧᤜᤣ᤺ᤰᤋᤧ॥ 40 ᤂᤧᤱᤜᤠ᤹ ᤀᤠᤴᤍᤣᤴ ᤋᤠᤏᤠᤶᤛᤠ ᤔᤧᤒᤥᤃᤧᤀᤠᤱ ᤀᤰᤂᤣ ᤔᤧᤗ᤹ᤖᤧᤖ ᤁᤥ᤺ᤰᤔᤠ ᤑᤠᤱᤈᤱᤒᤠ ᤋᤧᤱᤃᤵ ᤗᤧᤵᤔᤠᤱ ᤌᤥ᤺ᤰᤛᤡᤱᤔᤠ ᤔᤧᤜᤣ᤺ᤰᤋᤧ. “ᤀᤥᤔᤧᤳᤋᤧᤶᤔᤧ᤹. ᤀᤠᤏᤡ᤹ ᤁᤵᤔᤥᤗᤠᤶ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠᤍᤧᤴᤏᤥ ᤌᤥ᤺ᤰᤁᤠᤛᤡᤀᤠᤱ ᤐᤣᤃᤡ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤗᤠᤕᤥ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹॥” 41 ᤁᤖ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤓᤣ᤺ᤴᤍᤢᤶᤒᤠᤒᤣ᥅ ᤁᤴ ᤁᤢᤗᤡᤱᤍᤥ ᤔᤧᤃᤧᤳᤏᤧᤴ॥ 42 ᤂᤡᤏᤡ᤹ ᤌᤥ ᤔᤧᤎᤥ᤺ᤰᤁᤠᤛᤡᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤏᤡᤱᤔᤡᤜᤠ᤹ᤖᤧ ᤂᤡᤏᤡ᤹ ᤁᤧᤶᤏᤠ᤺ᤴᤍᤡ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤂᤡᤏᤡ᤹ ᤗᤢᤶᤔᤥ ᤜᤥᤵ॥ 43 ᤂᤧᤵᤔᤥ ᤀᤔᤠᤗᤧᤁᤡᤜᤠ᤹ ᤏᤢ ᤁᤏᤠᤏᤡᤜᤠ᤹ ᤂᤡᤏᤡ᤹ᤏᤢ ᤔᤧᤎᤰ. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤱᤜᤠ᤹ᤗᤠᤶ ᤜᤠᤖᤡ ᤁᤧᤍᤩᤧ᤹ᤀᤡ᤹॥ ᤕᤜᤘᤣ ᤍᤠᤱᤒᤠᤴ ᤂᤡᤏᤡ᤹ ᤋᤡᤶᤔᤠ ᤏᤠ᤺ᤵᤔᤠ ᤁᤧᤗᤧᤖᤢᤶ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ᤏᤢ ᤜᤥᤵ. ᤁᤖ ᤋᤠᤓᤣᤗᤠᤶ ᤂᤡᤏᤡ᤹ ᤁᤧᤛᤩᤧ᤹ᤀᤡᤖᤥ॥” 44 ᤜᤧᤰᤁᤣᤛᤠᤱ ᤐᤠ᤺ᤴᤏᤣ ᤔᤧᤱᤄᤧᤶᤔᤣ ᤂᤧᤱᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤋᤧᤱᤃᤵ ᤗᤧᤵᤔᤠᤱ ᤋᤃᤡ ᤔᤧᤎᤥ᤺ᤰᤛᤡᤱ॥ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤏᤢ ᤔᤥᤛᤠᤴ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤗᤠᤶ ᤔᤧᤗ᤺ᤴᤍᤧᤴ॥ 45 ᤂᤧᤒᤩᤠᤱ ᤂᤧᤴ ᤁᤥ᤺ᤰᤔᤠᤀᤥ ᤁᤧᤕᤢᤱᤒᤠ ᤀᤔᤠᤗᤧᤁᤡᤜᤠ᤹ ᤏᤢ ᤁᤏᤠᤏᤡᤜᤠ᤹ ᤕᤥ ᤔᤧᤎᤠᤛᤡᤱ ᤔᤧᤕᤧᤀᤠᤱ ᤂᤧᤱᤜᤠ᤹ ᤜᤥᤷᤔᤠ ᤌᤠᤖᤡᤰᤁᤣ ᤔᤧᤎᤃᤢᤛᤡᤖ ᤜᤧᤰᤁᤩᤠᤱ ᤔᤧᤏᤠ᤺ᤳᤋᤢᤛᤡᤖ ᤔᤧᤓᤧᤳᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.