ᤂᤠᤏᤡ᤺ᤳ 13 - LIFOTNT

ᤌᤥ᤺ᤶᤈᤡᤒᤠᤜᤠ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

² “ᤂᤧᤏᤧ᤹ ᤁᤏᤠᤏ ᤗᤠᤈᤣ᤹ᤀᤥ ᤌᤥ᤺ᤶᤈᤡᤒᤠᤜᤠ᤹ ᤐᤠᤱᤄᤧᤛᤧ᤹॥ ᤀᤠᤱᤃᤠ᤹ ᤂᤧᤴ ᤗᤠᤈᤣᤴ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤱᤛᤡᤱ᤹॥ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤌᤠ᤺ᤰᤁᤥᤗᤠᤶ ᤗᤠᤶᤗᤥᤒᤠ ᤌᤡᤰᤌᤡᤰ ᤐᤠᤱᤄᤧᤛᤧ᤹॥”

³ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤐᤠᤖᤠᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤐᤠᤱᤄᤢᤍᤣᤛᤢᤛᤡ॥ ᤂᤧᤱᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤔᤧᤘᤕᤧ॥

⁴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤜᤠᤒᤠ ᤁᤴᤜᤠ᤹ᤀᤣ ᤘᤕᤧ— ᤁᤢᤒᤧᤖᤧ ᤁᤢᤎᤠ᤺ᤰᤗᤠᤶ ᤈᤰᤁᤢᤖᤖᤧ ᤁᤢᤛ᤻ᤛᤠ ᤛᤶᤔᤢᤀ.

⁵ ᤛᤡᤔᤡᤕᤥᤏᤖᤧ ᤁᤢᤎᤠ᤺ᤰᤗᤠᤶ ᤜᤥᤖᤡᤖᤧ ᤁᤢᤛ᤻ᤛᤠ ᤛᤠᤑᤠᤋ.

⁶ ᤕᤜᤢᤍᤠᤖᤧ ᤁᤢᤎᤠ᤺ᤰᤁᤥᤗᤠᤶ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒ.

⁷ ᤀᤡᤛ᤻ᤛᤠᤂᤠᤖᤖᤧ ᤁᤢᤎᤠ᤺ᤰᤗᤠᤶ ᤕᤢᤛᤢᤑᤖᤧ ᤁᤢᤛ᤻ᤛᤠ ᤕᤡᤃᤠᤗ.

⁸ ᤀᤡᤑᤪᤠᤀᤡᤔᤖᤧ ᤁᤢᤎᤠ᤺ᤰᤗᤠᤶ ᤏᤢᤏᤖᤧ ᤁᤢᤛ᤻ᤛᤠ ᤜᤥᤛᤡᤕᤠ.

⁹ ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤁᤥᤗᤠᤶ ᤖᤑᤢᤖᤧ ᤁᤢᤛ᤻ᤛᤠ ᤐᤗᤋᤡ.

¹⁰ ᤈᤒᤗᤢᤏᤖᤧ ᤁᤢᤎᤠ᤺ᤰᤁᤥᤗᤠᤶ ᤛᤥᤍᤡᤖᤧ ᤁᤢᤛ᤻ᤛᤠ ᤃᤍ᤻ᤍᤡᤀᤣᤗ.

¹¹ ᤕᤢᤛᤢᤑᤖᤧ ᤁᤢᤎᤠ᤺ᤰᤁᤥᤗᤠᤶ ᤀᤡᤃᤪ ᤔᤏᤛ᤻ᤛᤣᤖᤧ ᤁᤢᤎᤠ᤺ᤰᤁᤥᤗᤠᤶ ᤛᤢᤛᤡᤖᤧ ᤁᤢᤛ᤻ᤛᤠ ᤃᤣᤍ᤻ᤍᤡ.

¹² ᤍᤠᤏᤖᤧ ᤁᤢᤎᤠ᤺ᤰᤁᤥᤗᤠᤶ ᤃᤔᤸᤗᤡᤖᤧ ᤁᤢᤛ᤻ᤛᤠ ᤀᤶᤔᤡᤀᤣᤗ.

¹³ ᤀᤠᤛᤣᤖᤖᤧ ᤁᤢᤎᤠ᤺ᤰᤁᤥᤗᤠᤶ ᤔᤡᤂᤠᤀᤣᤗᤖᤧ ᤁᤢᤛ᤻ᤛᤠ ᤛᤋᤢᤖ.

¹⁴ ᤏᤵᤋᤠᤗᤡᤖᤧ ᤁᤢᤎᤠ᤺ᤰᤁᤥᤗᤠᤶ ᤘᤥᤑ᤻ᤛᤡᤖᤧ ᤁᤢᤛ᤻ᤛᤠ ᤏᤜᤒᤡ.

¹⁵ ᤃᤠᤍᤖᤧ ᤁᤢᤎᤠ᤺ᤰᤗᤠᤶ ᤔᤠᤁᤡᤖᤧ ᤁᤢᤛ᤻ᤛᤠ ᤃᤢᤀᤣᤗ॥

¹⁶ ᤗᤠᤈᤣ᤹ᤀᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤔᤥᤛᤠ᤺ᤸᤗᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤀᤠᤶᤓᤠ ᤁᤴᤜᤠ᤹ᤀᤣᤖᤥ॥ (ᤔᤥᤛᤠ᤺ᤸᤗᤧ ᤏᤢᤏᤖᤧ ᤁᤢᤛ᤻ᤛᤠ ᤜᤥᤛᤡᤕᤠᤴ ᤕᤜᤥᤛᤢ ᤔᤡᤱ ᤘᤠ᤺ᤳᤋᤢ॥)

¹⁷ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤁᤏᤠᤏ ᤗᤠᤈᤣᤴ ᤌᤥ᤺ᤶᤔᤠᤖᤧ ᤗᤠᤃᤡ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤵᤔᤥᤗᤠᤶ ᤌᤠᤀᤠᤛᤡᤶᤔᤧ᤹ᤀᤠᤱ ᤏᤣᤃᤣᤘ ᤔᤧᤵᤔᤏᤠᤒᤠ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤋᤧᤱᤃᤵᤐᤥᤗᤠᤶ ᤁᤥ᤺ᤰᤔᤠ ᤐᤡᤛᤠᤱ ᤐᤣᤃᤧᤶᤔᤧ᤹.

¹⁸ ᤜᤧᤰᤁᤩᤠᤱ ᤗᤠᤈᤣᤴ ᤀᤠᤰᤋᤱᤒᤠ ᤆᤥᤰ. ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤠᤰᤂᤩᤠᤖᤡᤰ ᤁᤧᤎᤢᤶᤒᤠ ᤔᤧᤈᤥ᤺ᤰᤐᤡ ᤀᤡ ᤔᤧᤶᤎᤢᤶᤔᤏᤠᤒᤠ ᤔᤧᤈᤥ᤺ᤰᤐᤡ. ᤕᤖᤡᤰ ᤔᤧᤘᤠ᤹ᤒᤡ ᤀᤡ ᤛᤢ᤺ᤸᤗᤡᤰ ᤔᤧᤘᤠ᤹ᤒᤡ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤧᤶᤔᤧ᤹॥

¹⁹ ᤂᤧᤱᤜᤠ᤹ ᤔᤧᤕᤢᤱᤒᤠ ᤗᤠᤈᤣᤴ ᤏᤢᤒᤠ ᤆᤥ᤺ᤰᤐᤡ ᤀᤡ ᤋᤠᤵᤑᤧ᤺ᤶᤒᤠ ᤆᤥ᤺ᤰᤐᤡ. ᤀᤠᤰᤋᤱᤒᤠ ᤆᤥᤰ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤕᤢᤱᤒᤡ ᤀᤡ ᤕᤰᤁᤥ ᤔᤧᤕᤢᤱᤒᤡ. ᤀᤠᤰᤋᤱᤒᤠ ᤕᤧᤰᤕᤰᤁᤥ ᤔᤧᤕᤢᤱ᤹᥅

²⁰ ᤗᤠᤈᤣ᤹ ᤛᤡᤱᤒᤢᤱᤅᤡᤴ ᤀᤠᤰᤋᤱᤒᤠ ᤆᤥᤰ. ᤆᤠ ᤁᤧᤏᤢ᤹ᤒᤠ ᤆᤥ᤺ᤰᤐᤡ ᤔᤧᤴᤏᤢ᤹ᤔᤏᤠᤒᤠ ᤆᤥ᤺ᤰᤐᤡ. ᤂᤧᤵᤔᤥ ᤋᤠᤶᤓᤢᤱ ᤏᤧᤒᤡ ᤔᤧᤏᤧᤏᤧᤶᤒᤡ ᤂᤧᤴ ᤀᤥᤔᤧᤳᤋᤧᤶᤔᤧ᤹॥ ᤜᤠᤱᤜᤠᤱ ᤗ᤹ᤖᤧᤶᤔᤧ᤹. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤢᤓᤠ ᤛᤡᤱᤛᤣ᤹ᤜᤠ᤹ ᤑᤧᤳᤋᤧᤶᤔᤧ᤹॥” ᤂᤧᤴ ᤕᤧᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤆᤧᤸᤗᤧᤰᤛᤣ᤹ ᤋᤢᤶᤔᤠ ᤕᤠᤰᤘᤠ ᤘᤕᤧ॥

²¹ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤌᤠᤶᤔᤠᤱ ᤌᤥ ᤔᤧᤎᤥ᤺ᤰᤛᤡᤱ ᤔᤧᤒᤣ ᤜᤧᤰᤁᤩᤠᤱ ᤈᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤗᤧᤒᤥ-ᤜᤔᤠᤋ ᤗᤧᤵᤔᤠᤱᤒᤠ ᤖᤜᤥᤒ ᤌᤠᤖᤡᤰ ᤂᤧᤴ ᤗᤠᤈᤣᤴ ᤔᤧᤎᤥ᤺ᤵᤛᤢ॥

²² ᤂᤧᤱᤜᤠ᤹ ᤏᤣᤃᤣᤒᤗᤠᤶ ᤔᤧᤎᤥ᤺ᤰᤛᤡᤱᤅᤠᤱ ᤜᤧᤒᤪᤠᤏᤀᤥ ᤔᤧᤃᤧᤖᤧ. ᤂᤧᤵᤔᤥ ᤀᤏᤠᤁᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤜᤡᤔᤏ. ᤛᤣᤛᤤ ᤏᤢ ᤋᤸᤔᤤᤴ ᤔᤧᤕᤢᤅᤧ॥ ᤜᤧᤒᤪᤥᤏᤧᤱᤃ ᤔᤡᤛᤪᤒᤠ ᤛᤥᤀᤏ ᤕᤧᤰᤕᤰᤁᤧᤴᤏᤢ᤺ᤸᤗᤧ ᤋᤱᤒᤣ ᤏᤢᤛᤡ ᤋᤃᤡ ᤆᤢᤰᤋᤧᤆᤢᤖᤧᤀᤠᤱ ᤏᤧᤛ᤻ᤛᤧ॥

²³ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤀᤣᤛ᤻ᤁᤥᤗᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤒᤣ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤆᤧᤸᤗᤧᤰᤛᤣᤸᤗᤧ ᤁᤢᤒᤥᤖᤠᤰᤁᤥᤒᤠ ᤗᤳᤇᤠ ᤁᤢᤒᤈᤠᤎᤡᤰ ᤔᤧᤈᤩᤧᤵᤋᤢᤀᤠᤱ ᤗᤳᤇᤠ ᤛᤡᤱᤗ᤺ᤱᤛᤠᤀᤥ ᤔᤧᤍᤡ᤺ᤰᤂᤢ ᤂᤧᤒᤩᤠᤱ ᤏᤧᤵᤑᤢ ᤔᤏᤠᤖᤧ ᤐᤰᤂᤧᤇᤢᤀᤠᤱ ᤑᤧᤳᤋᤧᤇᤢ॥ ᤂᤧᤱᤜᤠ᤹ᤖᤧ ᤑᤢ᤹ᤗᤧ᤹ᤛᤣ᤹ ᤏᤢ ᤐ᤺ᤳᤇᤣ᤹ᤀᤠᤱ ᤔᤧᤓᤧᤳᤋᤢ॥

²⁴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤵᤔᤥᤗᤠᤶ ᤂᤧᤴ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤈᤠᤴ ᤔᤧᤈᤩᤧᤵᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱᤅᤡᤴ ᤀᤣᤛ᤻ᤁᤗᤥᤏ ᤏᤧᤏᤧᤒᤠᤍᤧᤴ ᤔᤧᤔᤧᤳᤋᤢᤒᤠᤖᤥ॥

²⁵ ᤗᤡᤒᤥᤱ ᤕᤧᤴ ᤁᤧᤖᤧᤒᤠ ᤁᤢᤏᤢᤵᤔᤥ ᤂᤧᤴ ᤗᤠᤈᤣᤴ ᤔᤧᤎᤥ᤺ᤵᤛᤢ ᤔᤧᤛᤢᤖᤢᤀᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧ॥

ᤌᤥ᤺ᤶᤈᤡᤒᤠ ᤐᤠ᤺ᤴᤜᤠ᤹ ᤔᤧᤈᤧᤰᤂᤢ

²⁶ ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤐᤠᤖᤠᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤁᤠᤍᤣᤛᤀᤥ ᤔᤥᤛᤠ. ᤜᤠᤖᤢᤏ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤀᤥ ᤔᤧᤍᤩᤧ. ᤜᤧᤰᤁᤩᤠᤱ ᤁᤠᤰ ᤛᤱᤈᤢᤶᤓᤥ᤺ᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤈᤧᤰᤋᤢᤛᤡ. ᤂᤧᤒᤩᤠᤱ ᤂᤧᤴ ᤗᤠᤈᤣ᤹ᤀᤥᤒᤠ ᤛᤡᤱᤛᤣ᤹ᤜᤠ᤹ ᤂᤧᤱᤜᤠ᤹ ᤀᤥ᤺ᤴᤔᤧᤎᤠᤰᤋᤢᤛᤡ॥

²⁷ ᤂᤧᤱᤜᤠ᤹ᤖᤧ ᤔᤥᤛᤠᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤕᤠᤵᤔᤡ ᤁᤧᤒᤠᤱᤄᤧᤒᤠᤍᤧᤴᤏᤥ ᤀᤠᤏᤡᤃᤣ ᤁᤧᤖᤡᤃᤧ॥ ᤛᤧᤰᤂᤠᤀᤣ ᤂᤧᤴ ᤗᤠᤈᤣ᤹ᤀᤥ ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤢᤱᤗᤳᤇ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤎᤥ᤺ᤰᤐᤠ ᤛᤡᤱᤛᤣ᤹ᤜᤠ᤹ ᤜᤠᤒᤠ ᤁᤴᤗᤥ॥

²⁸ ᤁᤖ ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤔᤧᤈᤥ᤺ᤰᤗᤳᤇ ᤂᤶᤓᤩᤠᤱ ᤕᤧᤰᤕᤰᤜᤠ᤹ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤔᤧᤓᤠᤰᤋᤢᤒᤠ ᤏᤢ ᤆᤠ᤹ᤖᤡᤰ ᤕᤶᤒᤕᤶᤒᤠ ᤏᤣᤖᤳᤇ॥ ᤂᤧᤴᤏᤢ᤺ᤸᤗᤧ ᤘᤣ᤹ ᤀᤠᤏᤡᤃᤣ ᤂᤧᤵᤔᤥ ᤀᤏᤠᤁᤖᤧ ᤁᤢᤛ᤻ᤛᤠᤜᤠ᤹ᤀᤠᤱ ᤏᤡᤛᤢᤶᤛᤡᤶᤒᤧ॥

²⁹ ᤏᤣᤃᤣᤒ ᤔᤧᤵᤔᤏᤠᤒᤠ ᤗᤠᤱᤃᤧᤳ ᤐᤡᤛᤠᤱᤒᤠ ᤋᤧᤱᤃᤵᤐᤥ ᤀᤔᤠᤗᤧᤁᤡᤜᤠ᤹. ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤒᤠ ᤋᤧᤱᤃᤵᤐᤥ ᤜᤡᤳᤋᤡ. ᤕᤒᤢᤛᤡ ᤏᤢ ᤀᤣᤔᤥᤖᤡᤜᤠ᤹ ᤂᤧᤒᤩᤠᤱ ᤘᤖ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤏᤢ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤏᤠᤏᤡᤜᤠ᤹ ᤔᤧᤕᤢᤱᤗᤳᤇ॥”

³⁰ ᤂᤧᤒᤩᤠᤱ ᤁᤠᤗᤣᤒᤖᤧ ᤔᤥᤛᤠ᤺ᤸᤗᤧ ᤁᤢᤍᤃᤡ ᤔᤏᤠᤜᤠ᤹ ᤛᤫᤠ᤺ᤳ ᤔᤧᤕᤢᤅᤧᤖ ᤕᤠ᤺ᤴᤍᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤏᤡ᤹ ᤂᤡᤔᤥ ᤂᤧᤵᤔᤥ ᤐᤣᤃᤡᤀᤠᤱ ᤂᤧᤴ ᤗᤠᤈᤣᤴ ᤜᤢᤰᤁᤠᤵ ᤆᤥᤃᤢᤶ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤂᤧᤴ ᤛᤧᤰᤂᤠᤛᤠᤱ ᤏᤠ᤺ᤶᤔᤠ ᤀᤠᤛᤢᤰᤋᤢᤶ᤹॥”

³¹ ᤁᤖ ᤂᤢᤏᤧ᤹ᤏᤢ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤂᤧᤴ ᤔᤏᤠᤜᤠ᤹ᤏᤢ ᤌᤰᤛᤧ ᤐᤣ᤺ᤰᤔᤠ ᤀᤠᤏᤡ᤹ ᤀᤠᤴᤇᤢᤰᤋᤢᤶᤔᤡᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ᤏᤢ᤺ᤸᤗᤧ ᤐᤎᤢᤶ ᤁᤧᤎᤢᤶᤒᤠ ᤔᤧᤈᤥᤰ॥”

³² ᤗᤠᤈᤣ᤹ ᤌᤥ᤺ᤶᤛᤧ ᤁᤧᤒᤣ᤺ᤰᤐᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤀᤡᤱᤄᤱ ᤔᤧᤈᤧᤰᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤣ ᤗᤠᤈᤣ᤹ ᤌᤥ᤺ᤶᤛᤧ ᤐᤣᤃᤡᤃᤧᤀᤠᤱ ᤏᤢ᤺ᤰᤂᤡᤃᤧᤒᤠ ᤗᤠᤈᤣ᤺ᤸᤗᤧᤃ ᤂᤧᤵᤔᤥ ᤁᤧᤕᤢᤱᤒᤠ ᤀᤠᤵᤑᤣᤰ ᤁᤢᤔᤏᤠᤜᤠ᤹ ᤗᤖᤢᤍᤣᤛᤢᤛᤡᤒᤠᤖᤳᤇ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤵᤔᤥ ᤏᤡᤛᤢᤶᤛᤡᤶᤒᤧᤒᤠ ᤔᤏᤠᤜᤠ᤹ᤃ ᤀᤠᤈᤠᤈᤠᤒᤠ ᤜᤥᤖᤢ ᤜᤧᤰᤋᤱᤒᤠ ᤔᤧᤈᤥ᤺ᤰᤗᤧᤳᤇ॥

³³ ᤂᤧᤵᤔᤥ ᤀᤠᤏᤡᤃᤣ ᤏᤣᤑᤡᤗᤡᤔ ᤜᤥᤖᤢᤜᤠ᤹ ᤏᤡᤛᤢᤶᤛᤡᤶᤒᤧ. ᤂᤧᤱᤜᤠ᤹ᤃ ᤀᤏᤠᤁᤖᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤛᤡᤖᤧᤳᤇ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤀᤠᤏᤡᤃᤣ ᤀᤠᤵᤑᤣᤰᤁ ᤐᤩᤠ᤺ᤳ ᤜᤧᤰᤋᤱᤒᤠ ᤏᤡᤀᤠᤛᤡᤃᤧ॥ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤔᤧᤏᤡᤛᤡᤃᤧᤸᤗᤧ ᤜᤧᤰᤋᤱᤒᤠᤀᤣ ᤏᤡᤎᤠᤒᤡᤃᤧᤖᤥ॥”