ᤂᤠᤏᤡ᤺ᤳ 12 - LIFOTNT

ᤔᤡᤖᤡᤕᤔ ᤏᤢ ᤜᤠᤖᤢᤏᤖᤧ ᤔᤥᤛᤠᤴ ᤀᤳᤋᤧᤛᤢ

¹ ᤁᤢᤛ ᤗᤠᤈᤣ᤹ ᤁᤧᤕᤢᤱᤔᤠ ᤔᤥᤛᤠ᤺ᤸᤗᤧ ᤁᤢᤔᤣᤳ ᤁᤢᤛᤡ᤺ᤸᤗᤧ ᤆᤥᤃᤢᤸᤗᤧ ᤔᤡᤖᤡᤕᤔ ᤏᤢ ᤜᤠᤖᤢᤏᤧᤴ ᤔᤥᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤠ ᤜᤣ᤺ᤰᤋᤧᤛᤡ. ᤌᤣᤀᤠᤱᤓᤧᤸᤗᤧ ᤔᤥᤛᤠ᤺ᤸᤗᤧ ᤁᤢᤛ ᤗᤠᤈᤣ᤹ᤒᤠ ᤔᤧᤴᤇᤢᤔᤠ ᤌᤡᤰ ᤔᤣ᤺ᤳ ᤋᤠᤖᤢᤀᤠᤱ ᤘᤕᤧ॥

² ᤂᤧᤴ ᤏᤧᤵᤔᤠᤱᤗᤧ ᤐᤠ᤺ᤳᤋᤧᤇᤢ. “ᤌᤣ ᤕᤜᤘᤣ ᤍᤠᤱᤒᤠᤴ ᤔᤥᤛᤠ᤺ᤴᤗᤠᤶᤒᤠᤖᤰ ᤐᤠᤖᤧᤀᤠᤱ ᤘᤠ᤹ᤒᤡ᥅ ᤌᤣ ᤂᤢᤏᤧ᤹ ᤀᤠᤴᤇᤡ᤹ᤗᤠᤶᤔᤠᤱ ᤔᤧᤒᤠᤖᤧᤴᤏᤠᤱ ᤔᤧᤘᤠ᤹ᤏᤧᤶᤒᤡ᥅” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ॥

³ ᤔᤥᤛᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰᤏᤢ᤺ᤸᤗᤧ ᤏ᤺ᤶᤏ᤺ᤶᤒᤠ ᤔᤏᤠ ᤘᤕᤧ॥

⁴ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤔᤥ ᤔᤥᤛᤠ᤺ᤴ. ᤜᤠᤖᤢᤏᤧᤴ ᤏᤢ ᤔᤡᤖᤡᤕᤶᤔᤡᤴ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤢᤶᤒᤪᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤋᤩᤧᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤢᤶᤒᤪᤠᤱ ᤔᤧᤍᤩᤧ॥

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤴ ᤂᤠ᤹ᤔᤡ᤺ᤵᤐᤠ ᤛᤡᤳᤗᤠᤱᤅᤥ ᤕᤧ ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤑᤴᤇᤡᤱᤅᤠᤱ ᤜᤠᤖᤢᤏᤧᤴ ᤏᤢ ᤔᤡᤖᤡᤕᤶᤔᤡᤴ ᤀᤢ᤺ᤳᤋᤢᤛᤡ॥ ᤀᤠᤸᤗ ᤂᤧᤴ ᤏᤧᤵᤔᤠᤱ ᤋᤃᤡ ᤋᤩᤧᤛᤡ.

⁶ ᤂᤧᤒᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤴᤇᤡ᤹ ᤂᤧᤵᤛᤧᤳᤇᤧ᤹ᤀᤥ— “ᤂᤡᤏᤡ᤹ ᤗᤢᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤘᤠ᤹ᤀᤡᤸᤗᤧ. ᤂᤧᤴ ᤔᤏᤠ᤺ᤴᤏᤢ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤛᤢᤑᤥᤀᤥ ᤀᤥ᤺ᤴᤎᤠᤰᤛᤡᤱᤅᤠᤖᤥ. ᤛᤧᤵᤔᤠᤱᤔᤥ ᤀᤠᤱᤃᤠ᤹ ᤂᤧᤴᤏᤢ ᤐᤠ᤺ᤳᤋᤠᤖᤥ॥

⁷ ᤁᤖ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤥᤛᤠ᤺ᤴᤏᤢᤃ ᤀᤠᤱᤃᤠ᤹ ᤜᤧᤰᤁᤣ ᤔᤧᤈᤥ᤺ᤰᤁᤠᤴᤗᤥ॥ ᤂᤢᤏᤧ᤹ᤃ ᤁᤧᤖᤧᤰ ᤀᤠᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥

⁸ ᤀᤠᤱᤃᤠ᤹ ᤂᤧᤴᤏᤢ ᤛᤫᤠ᤺ᤳᤋᤠᤱ ᤋᤠ᤹ᤍᤡᤀᤥ ᤔᤣ᤺ᤴᤗᤥ. ᤁᤖ ᤏᤠᤖᤠ ᤋᤢᤶᤍᤢᤶᤒᤠ ᤏᤢᤖᤡᤰᤁᤠᤱ ᤋᤠ᤹ᤈᤧᤱᤅᤠᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤱᤃᤠ᤹ ᤀᤠᤏᤠᤖᤠᤴ ᤀᤥᤔᤧᤳᤋᤢᤖᤥ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤥᤛᤠᤴ ᤆᤧᤰᤕᤠ ᤀᤡᤱᤍᤥ ᤔᤧᤵᤔᤠ ᤌᤣᤀᤠᤱ ᤁᤧᤱᤃᤡᤛᤧᤳᤇᤡᤴᤒᤠᤒᤣ᥅”

⁹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ. ᤂᤶᤓᤩᤠᤱ ᤂᤢᤏᤧ᤹ ᤂᤧᤵᤔᤥᤏᤢ ᤜ᤻ᤕᤠᤵ ᤌᤠᤛᤡᤱᤅᤠᤱ ᤐᤣᤄᤧᤖᤧ॥

¹⁰ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱᤗᤠᤶ ᤂᤠ᤹ᤔᤡ᤺ᤳᤋᤧᤴ ᤀᤡ᤺ᤱᤛᤡᤱᤅᤧᤸᤗᤧ ᤔᤡᤖᤡᤕᤶᤔᤡᤴ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤧᤸᤗᤧ ᤋᤖᤢᤀᤠᤱ ᤏᤠ᤺ᤱ ᤜᤧᤰᤁᤣ ᤑᤢᤳᤋᤪᤡ᤺ᤱᤃᤩᤠ᤺ᤵᤔᤠ ᤐᤥ᤺ᤰᤂᤧᤆᤢᤖᤧᤀᤠᤱ ᤘᤕᤧ॥ ᤜᤠᤖᤢᤏᤖᤧ ᤔᤡᤖᤡᤕᤶᤔᤡᤴ ᤀᤥᤔᤧᤳᤋᤢᤸᤗᤧ ᤂᤧᤴ ᤜᤥᤖᤡᤰᤐᤠ ᤋᤢᤰᤔᤧᤸᤗᤧ ᤋᤖᤢᤒᤠ ᤏᤡᤛᤢ॥

¹¹ ᤜᤠᤖᤢᤏᤖᤧ ᤔᤥᤛᤠᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤀᤠᤴᤇᤡᤃᤣ ᤀᤍᤱ ᤕᤠ᤺ᤶᤒᤰ ᤆᤥᤃᤧᤳᤇᤢᤃᤧ ᤜᤧᤰᤁᤩᤠᤱ ᤗᤠᤕᤥ ᤆᤥᤃᤧᤳᤇᤢᤃᤧᤀᤠᤱ ᤘᤠ᤹. ᤁᤖ ᤂᤧᤴᤗᤠᤶᤒᤠᤒᤠ ᤂᤢᤶᤍᤡᤱᤅᤡᤴ ᤀᤠᤴᤇᤡᤃᤣ ᤋᤢᤶᤔᤠ ᤔᤧᤒᤥᤱᤏᤧᤴᤗ॥

¹² ᤁᤢᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥᤗᤠᤶ ᤗ᤺ᤴᤍᤧᤸᤗᤧᤛᤠ ᤂᤧᤴ ᤁᤢᤓᤪᤧ᤺ᤱ ᤁᤡᤖᤧᤀᤠᤱ ᤛᤩᤧᤒᤠ ᤜᤧᤰᤋᤱᤒᤠ ᤐᤥᤱᤗ ᤔᤧᤕᤠ᤺ᤴᤍᤧᤴᤏᤧ᤹॥”

¹³ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤠᤱ ᤐᤣᤗᤡ ᤑᤠᤰᤏᤧ᥄ ᤂᤧᤴ ᤘᤣ᤺ᤴᤍᤣ᤹ᤀᤥ॥”

¹⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤴ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤏᤠᤖᤠᤀᤥ ᤌᤩᤠ᤺ᤳ ᤌᤥ᤺ᤰᤋᤢᤒᤠ ᤜᤧᤰᤁᤣ᤺ᤸᤗᤧ. ᤌᤣ ᤂᤧᤴ ᤕᤧᤳᤏᤠᤶ ᤌᤠᤖᤡᤰ ᤁᤢᤏᤠ ᤔᤧᤎᤩᤧᤏᤧᤶᤒᤠᤒᤡ᥅ ᤂᤧᤴ ᤕᤧᤳᤏᤠᤶ ᤌᤠᤖᤡᤰ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤛᤠᤰᤋᤧ ᤕᤢᤰᤂᤧ᤹. ᤂᤧᤴ ᤀᤣᤃᤠᤱᤗᤰ ᤂᤢᤏᤧ᤹ ᤛᤡᤃᤠᤱ ᤋᤠᤖᤧ᤹॥”

¹⁵ ᤂᤧᤒᤩᤠᤱ ᤔᤡᤖᤡᤕᤶᤔᤡᤴ ᤕᤧᤳᤏᤠᤶ ᤌᤧᤶᤒᤠ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤔᤧᤛᤠᤰᤋᤢ ᤔᤧᤕᤢᤰᤂᤢ. ᤜᤧᤰᤁᤩᤠᤱ ᤔᤡᤖᤡᤕᤶᤔᤡᤴ ᤛᤡᤃᤠᤱ ᤔᤧᤴᤎᤧᤰᤁᤣ ᤌᤠᤖᤡᤰ ᤔᤏᤠᤜᤠ᤹ᤀᤠᤱ ᤋᤃᤡ ᤔᤧᤶᤒᤣᤏᤧᤴ॥

¹⁶ ᤂᤧᤴ ᤀᤣᤃᤠᤱ ᤜᤛᤣᤖᤥᤋᤗᤠᤶ ᤋᤃᤡ ᤔᤧᤒᤣᤀᤠᤱ ᤐᤠᤖᤠᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢᤖᤥ॥