ᤂᤠᤏᤡ᤺ᤳ 11 - LIFOTNTᤀᤡᤛᤪᤠᤀᤡᤗᤡᤜᤠ᤹ ᤔᤏᤧᤔᤧᤎᤡᤰᤋᤧ 1 ᤁᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢᤖ ᤌᤠᤖᤡᤰ ᤂᤧᤴ ᤔᤏᤠᤜᤠ᤹ ᤂᤢᤴᤇᤡ᤹ ᤋᤢᤰᤂᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤏᤧᤎᤡᤰᤔᤠ ᤔᤧᤜᤣ᤺ᤰᤋᤧ॥ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤸᤗᤧ ᤔᤡ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤗ᤺ᤶᤒᤠ ᤔᤡᤴ ᤜᤠ᤹ᤖᤢᤀᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤕᤠ ᤁᤢᤍᤡᤱᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧ॥ 2 ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤥᤛᤠᤀᤥ ᤔᤧᤍᤩᤧᤀᤠᤱ ᤔᤧᤖᤡᤱ ᤔᤧᤎᤰᤋᤧ॥ ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ. ᤜᤧᤰᤁᤩᤠᤱ ᤔᤡᤴ ᤛᤩᤧ॥ 3 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤋᤒᤣᤖᤠ ᤔᤧᤔᤧᤳᤋᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤀᤥᤗᤠᤶ ᤁᤧᤗ᤺ᤶᤒᤠ ᤔᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤋᤡᤖᤧᤀᤠᤱ ᤘᤕᤧ॥ 4 ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤂᤧᤈᤧᤰ ᤁᤧᤈᤥ᤺ᤰᤐᤠ ᤔᤏᤠᤛᤢᤶᤜᤠ᤹ ᤛᤠ᤹ᤖᤡᤰ ᤁᤢᤈᤠᤄᤩᤠ ᤔᤧᤒᤥ᤺ᤰᤂᤧ. ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤕᤠᤶᤔᤥ ᤔᤧᤜᤠᤒᤧᤀᤠᤱ ᤀᤰᤂᤣ ᤗ᤹ᤔᤠ ᤔᤧᤜᤣ᤺ᤰᤋᤧ. “ᤀᤠᤏᤡᤃᤣ ᤛᤠ ᤆᤠᤔᤠ ᤂᤥᤛᤢᤶᤒᤧᤸᤗᤧ ᤏᤢᤒᤠ ᤐᤥ᤺ᤰᤂᤧᤒᤠᤔᤧᤴ᥄ 5 ᤔᤡᤛᤪᤀᤥ ᤀᤠᤏᤡᤃᤣ ᤜᤠᤒᤠ ᤆᤠᤔᤠ ᤂᤥᤛᤢᤶᤒᤧᤒᤠ ᤅᤠᤛᤠᤴ—ᤜᤧᤰᤁᤩᤠᤱ ᤂᤠᤶᤐᤀᤡᤳ. ᤁᤰᤐᤠ. ᤇᤧ᤺ᤵᤐᤡ ᤏᤢ ᤔᤠᤰᤂᤥ᤹ ᤁᤢᤈ᤺ᤰᤜᤠ᤹ ᤏᤡᤱᤘᤠ᤹ᤛᤢᤶ ᤗ᤹ᤖᤡᤃᤧ॥ 6 ᤁᤖ ᤁᤴ ᤔᤴᤏ᤺ᤴᤏᤢ᤺ᤸᤗᤧ ᤘᤣ᤹ ᤌᤣᤀᤠᤱ ᤁᤢᤈᤠ ᤏᤡᤔᤧᤍᤧᤳᤏᤧᤴ॥ ᤀᤠᤸᤗᤃ ᤀᤠᤏᤡᤃᤣ ᤆᤠᤔᤠᤀᤠᤱ ᤔᤧᤈᤠᤶᤒᤧᤴ॥” 7 ᤔᤴᤏ ᤔᤧᤵᤔᤏᤠᤒᤧᤴ ᤛ᤺ᤵᤑᤠ᤺ᤸᤗᤧ ᤁᤢᤛᤣ᤹ ᤜᤧᤰᤋᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤀᤥᤔᤧᤵᤔᤧᤸᤗᤧ ᤀᤠ᤺ᤱᤄᤡᤰᤘᤠ ᤁᤢᤀᤡᤛᤡᤰ ᤏᤡᤍᤧᤳᤋᤧ॥ 8 ᤔᤏᤠᤜᤠ᤹ ᤔᤧᤒᤣᤀᤠᤱ ᤂᤧᤴ ᤔᤧᤓᤢᤰᤂᤢ. ᤗᤢᤱᤛᤢᤶᤔᤥ ᤔᤧᤕᤢ᤺ᤳᤋᤢᤀᤠᤱ ᤀᤡᤃᤪ ᤛᤢᤶᤒᤠᤱᤅᤥ ᤔᤧᤜᤠᤃᤢ. ᤜᤧᤰᤁᤩᤠᤱ ᤂᤵᤐᤩᤠᤀᤥ ᤔᤧᤎᤥ᤺ᤰᤋᤢᤀᤠᤱ ᤜᤠ᤺ᤰᤘᤠ ᤔᤧᤈᤥᤃᤢ॥ ᤂᤧᤴ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤌᤥ᤺ᤰᤔᤏᤠᤒᤠ ᤁᤢᤈᤠ ᤜᤧᤰᤁᤣ ᤁᤢᤈᤠᤏᤢᤖᤧ॥ 9 ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤛᤧᤴᤍᤡᤰ ᤛᤣ᤺ᤰᤘᤠ ᤌᤩᤧ᤺ᤸᤗᤧ ᤔᤴᤏ᤺ᤴᤏᤠᤱ ᤛᤥᤖᤡᤰ ᤌᤠᤛᤢ॥ 10 ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤔᤧᤕᤧᤶᤛᤡᤱᤅᤠᤱ ᤁᤧᤖᤧᤰ ᤜᤡᤶᤛᤕᤱᤒᤠ ᤔᤏᤠᤜᤠ᤹ ᤔᤧᤜᤠᤒᤧᤒᤠ ᤔᤥᤛᤠ᤺ᤸᤗᤧ ᤂᤧᤵᤛᤢ॥ ᤕᤜᤘᤣ ᤍᤠᤱᤒᤠᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤔᤥᤛᤠᤴ ᤏᤡᤱᤘᤠ᤹ ᤋᤢᤰᤔᤥ ᤌᤩᤧ॥ 11 ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤌᤣᤀᤠᤱ ᤁᤧᤛᤧᤘᤠᤖᤥᤒᤠᤴ ᤁᤶᤓᤗ᤹ᤖᤡᤰ ᤋᤢᤰᤂᤣ ᤁᤧᤈᤠ᤺ᤳᤋᤢᤒᤠᤒᤣ᥅ ᤜᤧᤰᤁᤩᤠᤱ ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ᤏᤢ ᤁᤧᤏᤡᤱᤘᤠ᤹ ᤔᤧᤍᤠᤏᤧᤶᤒᤠᤒᤣ᥅ ᤂᤧᤒᤩᤠᤱ ᤀᤠᤍᤠᤱᤒᤠᤖᤧ ᤌᤣᤀᤠᤱ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤰᤁᤡᤴ ᤁᤧᤃᤢ᤺ᤳᤋᤠᤒᤠᤒᤣ᥅ 12 ᤌᤣ ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤀᤠᤛᤠᤵᤐᤥ᤺ᤰᤁᤥ ᤁᤢᤕᤢᤱᤛᤡᤱᤅᤠᤱ ᤛᤠᤘᤠ᤺ᤴᤍᤢᤱᤛᤡᤱᤒᤠᤒᤡ᥅ ᤏᤢᤕᤠᤶᤔᤥᤒᤠ ᤀᤅᤧ᤺ᤰᤘᤠᤴ ᤏᤢᤃᤧᤎᤢᤰᤔᤠᤸᤗᤧ ᤐᤰᤂᤢᤒᤠ ᤜᤧᤰᤁᤣ ᤁᤴᤜᤠ᤹ ᤐᤱᤔᤠᤛᤡᤀᤠᤱ ᤋᤣ᤹ᤔᤠᤛᤡ ᤁᤧᤕᤠ᤺ᤴᤏᤠᤒᤠᤒᤡ᥅ 13 ᤁᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤛᤠᤴ ᤀᤠᤱᤃᤠ᤹ ᤀᤠᤳᤋᤡᤏᤢ ᤂᤥᤛᤢᤱᤅᤠᤱ ᤋᤠᤖᤢᤱᤒᤣ᥅ ᤂᤧᤱᤜᤠ᤹ ᤀᤠᤱᤃᤠ᤹ᤀᤥ ᤔᤧᤍᤠᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤜᤠ᤺ᤵ. ‘ᤀᤠᤏᤡᤃᤣ ᤛᤠ ᤆᤠᤔᤠ ᤀᤠᤒᤡᤖᤧ᤹॥’ 14 ᤀᤠᤱᤃᤠ᤹ ᤀᤣ᤺ᤰ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤰᤁᤡᤴ ᤁᤢᤔᤠ ᤔᤧᤛᤢᤰᤁᤠᤴ. ᤌᤣᤀᤠᤱᤓᤧᤸᤗᤧ ᤁᤴ ᤁᤰᤁᤡᤴ ᤀᤠᤱᤃᤠ᤹ ᤀᤠᤗᤠᤃᤡ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤆᤥᤰ॥ 15 ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤀᤰᤂᤣᤀᤣ ᤁᤧᤔᤧᤳᤋᤠ. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤏᤧᤓᤃᤪ. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤐᤖᤢᤔᤠᤸᤗᤧ ᤀᤠᤱᤃᤠ᤹ ᤛᤧᤖᤠᤱᤅᤧ᤹. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤔᤧᤰᤔᤠᤴ ᤀᤠᤱᤃᤠ᤹ ᤀᤠᤒᤠᤅᤣ ᤀᤥᤔᤧᤵᤔᤠ ᤔᤧᤒᤥᤱᤏᤧᤴᤗ॥” 16 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ᤀᤥ ᤏᤢᤒᤥᤱ ᤗᤠᤶᤗᤥᤒᤠᤜᤠ᤹ ᤑᤢᤰᤂᤧᤛᤧ᤹. ᤂᤧᤱᤜᤠ᤹ ᤔᤏᤠᤜᤠ᤹ᤀᤥ ᤗᤠᤶᤗᤥᤒᤠ ᤏᤢ ᤕᤢᤰᤛᤠᤒᤠ ᤔᤧᤘᤠ᤹ ᤁᤧᤗ᤹ᤒᤠ ᤂᤧᤏᤧ᤹ ᤁᤧᤏᤡᤛᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤀᤠᤱᤃᤠ᤹ᤀᤥ ᤋᤠᤖᤧᤛᤧ᤹. ᤂᤧᤒᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤂᤧᤏᤧ᤹ᤏᤢ ᤛᤥᤖᤡᤰ ᤔᤧᤕᤧᤵᤗ॥ 17 ᤀᤠᤱᤃᤠ᤹ ᤕᤥ ᤕᤢᤀᤠᤀᤠᤱ ᤂᤧᤏᤧ᤹ᤏᤢ ᤋᤠ᤹ᤈᤧᤱᤅᤠ॥ ᤂᤧᤏᤧ᤹ ᤁᤧᤛᤶᤎᤠᤱ ᤁᤧᤘᤠ᤹ᤒᤠ ᤕᤠᤶᤛᤠᤶᤗᤠᤶ ᤁᤢᤓᤠ ᤕᤠᤶᤛᤠᤶ ᤕᤠᤱᤛᤡᤱᤅᤠᤀᤠᤱ ᤂᤧᤱᤜᤠ᤹ᤀᤥ ᤌᤧᤰᤋᤢᤱ ᤐᤡᤖᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ᤏᤢ ᤛᤥᤛᤥᤖᤡᤰ ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤁᤰᤁᤡᤴ ᤔᤧᤃᤢᤕᤢ᤹. ᤜᤧᤰᤁᤩᤠᤱ ᤂᤧᤏᤧ᤹ᤖᤰ ᤀᤣ᤺ᤰ ᤁᤢᤔᤠ ᤔᤧᤒᤥᤱᤏᤧᤴᤗ॥ 18 “ᤂᤧᤏᤧ᤹ ᤔᤏᤠᤜᤠ᤹ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤛᤢᤳᤌᤥ ᤆᤥ᤺ᤰᤁᤠᤛᤡᤶᤔᤧ᤹ ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰ ᤛᤠ ᤆᤠᤔᤠ ᤁᤧᤄᤥᤛᤢᤶ᤹॥ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤧᤰᤂᤥ᤹ᤀᤥ ᤀᤰᤂᤣ ᤁᤧᤗ᤹ᤖᤡᤀᤠᤱ ᤁᤧᤜᤠᤒᤡᤀᤠᤱ ᤁᤧᤘᤕᤡ᤹. “ᤀᤠᤏᤡᤃᤣ ᤛᤠ ᤋᤶᤔᤠ ᤂᤥᤛᤢᤶᤒᤧᤸᤗᤧᤃᤔᤧᤴ ᤏᤢᤖᤧᤒᤠ ᤘᤕᤧ᥄ ᤀᤠᤏᤡᤃᤣ ᤗᤠᤃᤡ ᤔᤡᤛᤪ ᤗᤠᤈᤣ᤺ᤴᤏᤣ ᤏᤢᤒᤠ ᤆᤥᤃᤧ॥” ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤛᤠ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤴ ᤁᤧᤈᤠᤶ᤹॥ 19 ᤌᤡᤰᤕᤠᤴ ᤏᤡᤕᤠ᤺ᤴ. ᤗᤡᤕᤠᤴ ᤅᤠᤛᤡ ᤕᤧᤴ. ᤌᤡᤒᤥᤱ ᤀᤡᤃᤪ ᤏᤡᤒᤥᤱ ᤕᤧᤴᤗᤰ ᤔᤣ᤺ᤴ. 20 ᤁᤖ ᤏᤧᤒᤥᤀᤥᤗᤠᤶᤒᤠ ᤗ᤺ᤴᤏᤠᤱ ᤏᤡᤱᤛᤳᤗᤧ᤹ ᤗᤧ᤹ᤖᤢᤖ ᤌᤠᤖᤡᤰ ᤗᤠᤎᤡᤰ ᤂᤠᤖᤠᤰ ᤂᤡᤏᤡ᤹ ᤂᤧᤴ ᤁᤧᤈᤠᤶ᤹॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤵᤑᤣᤰ ᤗᤢᤶᤔᤥ ᤁᤧᤘᤠ᤹ᤒᤠ ᤕᤜᤘᤣ ᤍᤠᤱᤒᤠᤴ ᤁᤧᤏᤠ᤹ᤖᤢᤶᤔᤠᤱ ᤂᤢᤏᤧ᤹ᤀᤣ ᤁᤢᤍᤃᤡ ᤀᤰᤂᤣᤗ᤹ᤖᤡᤰ ᤁᤧᤜᤠᤒᤡᤀᤠᤱ ᤁᤧᤘᤕᤡ᤹. “ᤀᤠᤏᤡᤃᤣ ᤌᤣᤀᤠᤱ ᤔᤡᤛᤪ ᤗᤠᤈᤣᤴ ᤗᤧᤖᤢᤶᤒᤧᤀᤠᤱ ᤑᤧᤖᤡᤃᤧᤒᤠᤒᤣ᥅”’” 21 ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤁ᤹ᤕᤥ ᥌.᥆᥆.᥆᥆᥆ ᤔᤏᤠᤜᤠ᤹ ᤋᤡ᤺ᤰᤋᤢᤱᤛᤡᤱᤅᤠᤱ ᤗᤠᤱᤄᤣ᤺ᤰᤁᤠᤖ ᤐᤳᤋᤠ ᤜᤧᤰᤁᤩᤠᤱ ‘ᤂᤧᤱᤜᤠ᤹ ᤗᤠᤎᤡᤰ ᤌᤠᤖᤡᤰ ᤁᤧᤕᤥᤒᤠ ᤛᤠ ᤐᤡᤖᤢᤱᤛᤡᤱ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢ᤹॥’ 22 ᤌᤣ ᤁᤴ ᤁᤧᤖᤧᤰ ᤔᤧᤸᤗᤢᤰ ᤔᤧ᤺ᤴᤍᤠᤰ ᤗᤢᤵᤜᤠ᤹ ᤏᤢ ᤐᤡᤳᤌᤰᤛᤠᤜᤠ᤹ ᤛᤧᤵᤔᤠᤛᤡᤸᤗᤧ ᤁᤶᤓᤩᤠᤖᤡᤰ ᤔᤏᤠᤜᤠ᤹ ᤕᤥᤖᤢᤛᤡᤒᤡ᥅ ᤀᤡᤃᤪ ᤘᤖ᤺ᤱᤅᤥ ᤁᤧᤕᤠᤰᤕᤠᤰᤐᤠ ᤁᤧᤖᤧᤰ ᤅᤠᤜᤠ᤹ ᤋᤧᤶᤔᤠᤛᤡᤛᤠᤱ ᤂᤧᤱᤜᤠ᤹ ᤋᤧᤰᤋᤢᤛᤡᤒᤡ᥅” 23 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤌᤣ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤔᤢᤰᤛᤠᤶᤔᤡᤴ ᤛᤢ᤺ᤸᤗᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤒᤡ᥅ ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤐᤠ᤺ᤴᤏᤡᤴ ᤁᤧᤳᤋᤡ ᤔᤧᤃᤧᤳᤏᤧᤶᤒᤡ ᤂᤧᤴ ᤂᤧᤏᤧ᤹ ᤁᤧᤏᤡᤛᤢ᤹॥” 24 ᤁᤸᤗᤧᤆᤥᤃᤢᤸᤗᤧ ᤔᤥᤛᤠᤴ ᤗᤠ᤺ᤰᤁᤠᤳ ᤐᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤏᤠᤜᤠ᤹ ᤔᤧᤳᤋᤢᤛᤡ॥ ᤂᤢᤏᤧ᤹ ᤗᤠᤶᤗᤥᤒᤠᤜᤠ᤹ᤗᤠᤶ ᤏᤢᤒᤥᤱ ᤔᤏᤠᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶ ᤁᤒᤪᤡᤱ ᤐᤡᤛᤠᤱ ᤕᤧᤵᤛᤢᤛᤡ॥ 25 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤴ ᤂᤠ᤹ᤔᤡ᤺ᤳᤋᤥ ᤕᤥ ᤕᤧᤀᤠᤱ ᤂᤢᤏᤧ᤹ᤏᤢ ᤋᤠ᤹ᤈᤧᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤕᤠᤶᤛᤠᤶᤔᤥᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤂᤧᤴ ᤏᤢᤒᤥᤱ ᤗᤠᤶᤗᤥᤒᤠᤜᤠ᤹ᤀᤥ ᤕᤠᤰᤋᤢ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤕᤠᤶᤛᤠᤶᤔᤡᤴ ᤕᤧᤀᤠᤱ ᤂᤧᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧ॥ ᤁᤖ ᤋᤠ᤺ᤴᤍᤡ ᤋᤠ᤺ᤴᤍᤡᤃ ᤂᤧᤱᤜᤠ᤹ ᤜᤧᤰᤁᤣ ᤐᤠ᤺ᤵᤔᤠ ᤔᤧᤏᤠ᤹ᤖᤧ॥ 26 ᤂᤧᤴ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤀᤣᤸᤍᤠᤍ ᤏᤢ ᤔᤣᤍᤠᤍ ᤔᤡᤱ ᤁᤧᤘᤠ᤺ᤵᤐᤠ ᤏᤧᤴᤇᤡ ᤔᤏᤠ ᤘᤕᤧᤳᤇᤡ॥ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤔᤡᤱᤅᤠᤱ ᤔᤧᤛᤠᤵᤋᤢᤀᤠᤱ ᤐᤳᤇᤧ. ᤁᤖ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤧᤶᤒᤣ᤺ᤰᤁᤣ ᤘᤕᤧᤳᤇᤡ॥ ᤁᤖ ᤕᤠᤶᤛᤠᤶᤔᤡᤴ ᤂᤢᤴᤇᤡ᤹ ᤛᤶᤎᤠᤱᤅᤠᤱ ᤕᤧ. ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤀᤣ ᤂᤢᤴᤇᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤧᤇᤢ॥ 27 ᤂᤧᤒᤩᤠᤱ ᤗᤳᤇᤠ ᤌᤠᤱᤒᤧᤴ ᤌᤡᤰ ᤗᤥ᤺ᤰᤋᤧ ᤐᤣᤀᤠᤱ ᤔᤥᤛᤠᤴ ᤔᤧᤳᤋᤢ. “ᤀᤣᤸᤍᤠᤍ ᤏᤢ ᤔᤣᤍᤠᤍᤖᤧ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤇᤢᤖ ᤕᤠᤰᤛᤡ॥” 28 ᤏᤠᤗᤡᤃᤧᤴ ᤌᤠᤱᤒᤧᤴ ᤘᤕᤧᤀᤠᤱᤎᤥᤒᤠ ᤔᤥᤛᤠᤖᤧ ᤁᤢᤓᤠ᤹ᤒᤠᤱ. ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢ᤺ᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤔᤧᤓᤠ᤺ᤰᤋᤧᤛᤧᤴᤏᤧ᤹॥” 29 ᤁᤖ ᤔᤥᤛᤠ᤺ᤸᤗᤧ ᤂᤧᤴ ᤔᤧᤳᤋᤢ. “ᤌᤣ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤏᤧ᤹ ᤏᤠᤜᤧᤶᤒᤪᤡ᤺ᤰᤐᤠ ᤁᤧᤒᤥ᤺ᤰᤂᤧᤒᤡ᥅ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤕᤠᤶᤛᤠᤶᤔᤡᤴ ᤀᤠᤵᤑᤣᤰ ᤀᤠᤵᤑᤣᤰ ᤁᤢᤔᤏᤠᤜᤠ᤹ᤀᤥ ᤁᤣ᤺ᤳᤋᤢ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤧᤒᤥᤱᤅᤡᤸᤗᤧᤃ ᤛᤠ᤹ᤖᤡᤰ ᤏᤢᤒᤠ ᤐᤥᤱᤒᤠ ᤘᤕᤧᤔᤧᤴ᥄” 30 ᤂᤧᤒᤩᤠᤱ ᤔᤥᤛᤠᤴ ᤏᤢ ᤀᤡᤛᤪᤠᤀᤡᤗᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤛᤠ᤺ᤱᤃᤠᤜᤡᤶᤔᤥ ᤔᤧᤏᤢ᤺ᤰᤂᤧᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤢ᤺ᤳᤗᤢᤱᤃᤣ᤹ ᤐᤢᤜᤠ᤹ ᤔᤧᤈᤛᤡ 31 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤑᤥ᤺ᤰᤂᤢ ᤑᤧᤴᤇᤢᤒᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤘᤖ᤺ᤱᤅᤥᤗᤠᤶ ᤔᤢ᤺ᤳᤗᤢᤱᤃᤣ᤹ ᤐᤢᤜᤠ᤹ ᤑᤧᤛᤢ ᤋᤠᤖᤢᤛᤡ. ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶ ᤁᤒᤪᤡᤱ ᤐᤡᤛᤠᤱ ᤌᤡᤰᤕᤠᤴ ᤌᤠᤖᤡᤰᤐᤠ ᤗᤠᤶ ᤁᤢᤗᤧ᤺ᤶ ᤂᤠᤶᤒᤠᤱᤅᤥ ᤜᤢᤰᤛᤡᤰ ᤏᤧᤳᤇᤡ ᤕᤠᤖᤡᤰ ᤁᤢᤛᤧᤳ ᤁᤢᤛᤧᤳ ᤂᤧᤱᤜᤠ᤹ ᤔᤧᤕᤢᤱᤛᤡᤱ॥ 32 ᤔᤏᤠᤜᤠ᤹ᤖᤧ ᤂᤧᤸᤗᤧ ᤕᤠ᤺ᤴᤍᤡᤰ ᤏᤠᤶᤎᤠᤎᤠ. ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤏᤢ ᤁᤢᤍᤠ᤺ᤴᤍᤡᤰᤔᤠ ᤏᤠᤶᤎᤠᤎᤠᤀᤠᤱ ᤂᤧᤱᤜᤠ᤹ ᤔᤧᤍᤧᤶᤛᤢᤛᤡ॥ ᤛᤠ᤹ᤖᤡᤰ ᤀᤠᤈᤧ᤺ᤳᤇᤡᤰᤗᤰ ᤁᤧᤍᤧᤶᤒᤠᤜᤠ᤹ᤖᤧᤀᤠᤱ ᥇.᥌᥆᥆ ᤁᤡᤗᤥᤏᤢ᤺ᤸᤗᤧ ᤛᤢ᤺ᤸᤗᤡᤰ ᤔᤧᤴᤍᤧᤶᤛᤢᤛᤡᤴ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤛᤠ᤺ᤱᤃᤠᤜᤡᤶ ᤁᤒᤪᤡᤱ ᤐᤡᤛᤠᤱ ᤂᤧᤱᤜᤠ᤹ ᤔᤧᤄᤧᤰᤂᤢᤛᤡ॥ 33 ᤁᤖ ᤛᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤒᤥ᤹ᤒᤥ ᤐᤳᤇᤧᤖ ᤜᤧᤰᤁᤩᤠᤱ ᤂᤧᤴ ᤛᤠᤴ ᤂᤠᤶᤔᤠᤀᤣ ᤔᤧᤱᤄᤥᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤧᤴ ᤔᤏᤠᤜᤠ᤹ᤀᤥ ᤆᤢᤰᤋᤧ. ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤔᤏᤠᤜᤠ᤹ ᤛᤠ᤹ᤖᤡᤰ ᤕᤶᤒᤠ ᤔᤡᤱᤍᤣ᤹ᤀᤥ ᤔᤧᤎᤩᤧᤖ ᤕᤠ᤺ᤴᤍᤢᤛᤡ॥ 34 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤁᤡᤒᤪᤥᤌ-ᤜᤳᤋᤠᤘᤠ ᤔᤧᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤘᤣ᤹ ᤕᤖᤡᤰ ᤛᤠ᤺ᤸᤗᤧ ᤗᤠᤃᤡ ᤁᤢᤈᤠᤄᤩᤠ ᤁᤧᤒᤥᤱᤒᤠ ᤔᤏᤠᤜᤠ᤹ ᤜᤠᤒᤠ ᤂᤧᤵᤔᤥᤀᤣ ᤂᤧᤱᤜᤠ᤹ᤖᤧ ᤔᤧᤗᤢᤵᤋᤢ ᤔᤧᤎᤛᤡ॥ 35 ᤁᤡᤒᤪᤥᤌ-ᤜᤳᤋᤠᤘᤠᤗᤠᤶ ᤔᤏᤠᤜᤠ᤹ ᤗᤠᤱᤔᤧᤄᤣᤃᤧᤀᤠᤱ ᤜᤛᤣᤖᤥᤋ ᤗᤧᤵᤔᤠᤱ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤁᤢᤓᤠ ᤕᤧᤶ ᤕᤠᤱᤔᤧᤎᤥ᤺ᤰᤋᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.