ᤂᤠᤏᤡ᤺ᤳ 10 - LIFOTNTᤕᤢᤵᤐᤠ ᤌᤢᤳᤋᤢᤖᤡ᤺ᤵᤐᤠᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤕᤢᤵᤐᤠ ᤌᤢᤳᤋᤢ᤺ᤵᤐᤠ ᤏᤧᤳᤇᤡ ᤆᤥᤃᤧ᤹॥ ᤂᤧᤱᤜᤠ᤹ ᤌᤰᤔᤏᤠᤀᤠᤱ ᤆᤥ᤺ᤰᤔᤏᤠᤒᤠ ᤐᤥᤱᤔᤠ ᤐᤥᤱ᤹॥ ᤛᤱᤈᤢᤶᤓᤥ ᤑᤢᤱᤔᤠᤛᤡ ᤏᤢ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤏᤢ ᤗᤠᤶ ᤌᤠᤔᤠᤛᤡᤸᤗᤧ ᤂᤧᤴ ᤌᤢᤳᤋᤢᤖᤡ᤺ᤵᤐᤠᤜᤠ᤹ ᤔᤢ᤺ᤵᤔᤠ ᤐᤥᤱ᤹॥ 3 ᤂᤧᤴ ᤏᤧᤵᤔᤈᤠᤱ ᤁᤣ᤺ᤶᤒᤠ ᤀᤡᤰᤗᤠ ᤔᤢ᤺ᤵᤔᤠᤸᤗᤧ ᤁᤧᤖᤧᤰ ᤛᤱᤈᤢᤶᤓᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤂᤧᤏᤧ᤹ᤀᤥ ᤔᤧᤈᤢᤶ ᤔᤧᤍᤠᤖ॥ 4 ᤁᤖ ᤗᤳᤇᤠᤖᤰ ᤔᤢ᤺ᤵᤔᤧᤸᤗᤧ ᤗᤠᤶᤗᤥᤒᤠᤜᤠ᤹. ᤀᤡᤃᤪ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤂᤧᤏᤧ᤹ᤀᤥ ᤔᤧᤈᤢᤶ ᤔᤧᤍᤠᤖ॥ 5 ᤀᤠᤸᤗ ᤀᤡᤱᤄᤱ ᤐᤡᤔᤠᤛᤡ ᤋᤠᤱᤒᤠ ᤀᤡᤰᤗᤠᤴ ᤔᤢᤰᤁᤡᤸᤗᤧ ᤏᤠᤱᤃᤧᤴ ᤐᤡᤛᤠᤱ ᤁᤧᤏᤧᤒᤠ ᤛᤠ᤺ᤱᤃᤠᤜᤡᤶᤔᤥᤒᤠ ᤔᤏᤠᤜᤠ᤹ ᤗᤠᤶ ᤔᤧᤎᤠᤛᤡᤱᤗ॥ 6 ᤀᤠᤸᤗ ᤏᤡᤗᤧᤱ ᤀᤡᤱᤄᤱ ᤐᤡᤔᤠᤛᤡ ᤋᤠᤱᤒᤠ ᤀᤡᤰᤗᤠᤴ ᤔᤢᤰᤁᤡᤸᤗᤧ ᤗᤠᤱᤃᤧᤳ ᤐᤡᤛᤠᤱ ᤁᤧᤏᤧᤒᤠ ᤛᤠ᤺ᤱᤃᤠᤜᤡᤶᤔᤥᤒᤠ ᤔᤏᤠᤜᤠ᤹ ᤗᤠᤶ ᤔᤧᤎᤠᤱᤛᤡᤱᤗ॥ ᤀᤡᤱᤄᤱ ᤐᤡᤔᤠᤛᤡ ᤀᤡᤰᤗᤠᤴ ᤗᤠᤶ ᤌᤠᤛᤡᤱᤔᤠᤖᤧ ᤗᤠᤃᤡ ᤔᤡᤰᤛᤣ᤺ᤴ ᤐᤥᤱ᤹॥ 7 ᤛᤱᤈᤢᤶᤓᤥ ᤑᤢᤱᤔᤠᤛᤡ ᤕᤧᤶᤔᤥᤀᤠᤱ ᤁᤣ᤺ᤶᤒᤠ ᤀᤡᤰᤗᤠ ᤔᤢ᤺ᤵᤔᤠ ᤐᤥᤱ᤹॥ 8 “ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤢᤳᤋᤢᤖᤡ᤺ᤵᤐᤠᤜᤠ᤹ ᤔᤧᤔᤢ᤺ᤳᤋᤢᤖ॥ ᤁᤴ ᤂᤡᤏᤡ᤹ ᤖ ᤂᤡᤏᤡ᤹ ᤕᤠᤱᤛᤡᤒᤠ ᤌᤠ᤺ᤰᤜᤠ᤹ᤖᤧ ᤗᤠᤃᤡ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗ॥ 9 ᤀᤠᤒᤠᤅᤣ ᤂᤡᤏᤡ᤹ ᤗᤠᤈᤣ᤹ᤀᤥ ᤂᤡᤏᤡ᤹ ᤛᤶᤎᤠᤱ ᤕᤢᤰ ᤁᤧᤈᤥ᤺ᤰᤐᤠ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤡᤏᤡ᤹ ᤋᤧᤴᤎᤱ ᤆᤥ᤺ᤰᤛᤧ ᤁᤧᤒᤣᤃᤡᤸᤗᤧ ᤌᤢᤳᤋᤢᤖᤡ᤺ᤵᤐᤠ ᤀᤡᤰᤗᤠᤗᤠᤶ ᤀᤡᤱᤄᤱ ᤐᤡᤖᤧᤶᤛᤡᤶᤔᤧ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤣᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤔᤡᤜᤠ᤹ᤗᤠᤶ ᤀᤠᤱᤃᤠ᤹ ᤛᤧ᤺ᤵᤏᤡᤱ᤹॥ 10 ᤂᤡᤏᤡ᤹ ᤛ᤺ᤵᤔᤠ ᤕᤧᤶᤔᤥ—ᤂᤡᤏᤡ᤹ ᤗᤠᤃᤡ ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ ᤏᤢ ᤗᤠᤍᤢᤵᤐᤥᤒᤠ ᤋᤱᤏᤠᤶᤜᤠ᤹ᤀᤥ—ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤛᤡᤎᤢᤱᤈᤓᤠᤜᤠ᤹ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤂᤡᤏᤡ᤹ ᤌᤢᤳᤋᤢᤖᤡ᤺ᤵᤐᤠ ᤔᤢ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤀᤠᤵᤑᤣᤰ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤴ ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤛᤥᤰ ᤐᤥᤱᤗ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥” ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤕᤅᤢ ᤔᤧᤍᤣ᤹ᤖᤢ 11 ᤏᤡᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤏᤡᤛᤡᤃᤣᤰᤐᤠ ᤗᤠ ᤏᤡᤒᤥᤱ ᤕᤧᤴᤏᤥ ᤔᤠᤱᤜᤢᤵ ᤛᤠᤵᤗᤢᤱ ᤁᤧᤕᤠᤰᤐᤠ ᤛᤴᤍᤥᤰ ᤁᤧᤕᤢᤱᤒᤠ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤛᤶᤎᤠᤱ ᤁᤧᤒᤵᤐᤠ ᤂᤠ᤹ᤔᤡ᤺ᤳᤋᤡᤴ ᤀᤡ᤺ᤱᤛᤡᤱ॥ 12 ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤔᤧᤎᤠᤛᤡᤱᤅᤠᤱ ᤘᤣ᤹ ᤘᤣ᤹ ᤋᤧᤴᤜᤠ᤹ᤀᤥ ᤔᤧᤒᤣ. ᤜᤧᤰᤁᤩᤠᤱ ᤐᤠᤖᤠᤏᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤠ᤹ᤔᤡ᤺ᤳᤋᤧᤴ ᤑᤴᤇᤡᤱ॥ 13 ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤔᤥᤛᤠ᤺ᤴᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤐᤡᤖᤢᤛᤡᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤗᤠᤶᤍᤡᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ॥ 14 ᤌᤡᤰᤛᤡᤃᤣ᤺ᤰᤐᤥ ᤕᤜᤢᤍᤠᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤔᤏᤠᤛᤢᤶᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤡᤛᤠᤏ ᤔᤧᤓᤥᤰᤂᤢᤀᤠᤱ ᤋᤃᤡ ᤔᤧᤎᤠᤛᤡᤱ॥ ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ ᤏᤜᤛᤥᤏᤧᤴ ᤔᤏᤠᤛᤢᤶᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 15 ᤛᤢᤀᤠᤖᤖᤧ ᤁᤢᤛ᤻ᤛᤠ ᤏᤋᤏᤣᤗᤧᤴ ᤀᤡᤛ᤻ᤛᤠᤂᤠᤖ ᤌᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 16 ᤜᤣᤗᤥᤏᤖᤧ ᤁᤢᤛ᤻ᤛᤠ ᤀᤣᤗᤡᤀᤠᤒᤧᤴ ᤈᤒᤗᤢᤏ ᤌᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 17 ᤂᤧᤒᤩᤠᤱ ᤛᤣᤛᤣᤍᤧᤴᤏᤡᤴ ᤔᤧᤕᤅᤢ. ᤜᤧᤰᤁᤩᤠᤱ ᤂᤧᤴ ᤔᤧᤒᤰᤂᤢᤀᤠᤱ ᤃᤣᤷᤛᤥᤏᤡᤜᤠ᤹ ᤏᤢ ᤔᤖᤠᤖᤡᤜᤠ᤹ ᤋᤃᤠᤱ ᤔᤧᤎᤠᤛᤡᤱ॥ 18 ᤂᤧᤴ ᤀᤣᤃᤠᤱ ᤁᤢᤒᤧᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤔᤏᤠᤛᤢᤶᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤡᤛᤠᤏ ᤔᤧᤒᤰᤂᤢᤀᤠᤱ ᤋᤃᤠᤱ ᤔᤧᤎᤠᤛᤡᤱ॥ ᤛᤍᤣᤀᤢᤖᤖᤧ ᤁᤢᤛ᤻ᤛᤠ ᤀᤣᤗᤡᤛᤢᤖᤧᤴ ᤔᤏᤠᤛᤢᤶᤜᤠ᤹ ᤗᤠᤶᤃᤧᤒᤠ ᤘᤕᤧ॥ 19 ᤛᤢᤖᤡᤛᤍ᤻ᤍᤤᤖᤧ ᤁᤢᤛ᤻ᤛᤠ ᤛᤗᤢᤔᤡᤀᤣᤗᤧᤴ ᤛᤡᤔᤡᤕᤥᤏᤖᤧ ᤁᤢᤎᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ. 20 ᤜᤧᤰᤁᤩᤠᤱ ᤍᤢᤀᤣᤗᤖᤧ ᤁᤢᤛ᤻ᤛᤠ ᤀᤣᤗᤩᤠᤛᤠᤐᤧᤴ ᤃᤠᤍᤖᤧ ᤁᤢᤎᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 21 ᤂᤧᤒᤩᤠᤱ ᤁᤜᤠᤋᤡᤜᤠ᤹ ᤛᤣᤛᤣᤒᤠ ᤐᤠ᤺ᤴᤜᤠ᤹ ᤔᤧᤒᤰᤂᤢᤀᤠᤱ ᤋᤃᤠᤱ ᤔᤧᤎᤠᤛᤡᤱ॥ ᤂᤧᤱᤜᤠ᤹ ᤁᤧᤵᤔᤠ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤧᤴ ᤑᤥᤱᤔᤠ ᤛᤢ᤺ᤵᤔᤠ ᤁᤧᤒᤥᤱᤒᤠ ᤘᤕᤧ॥ 22 ᤂᤧᤴ ᤀᤣᤃᤠᤱ ᤀᤣᤑᤪᤠᤀᤡᤔᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤔᤏᤠᤛᤢᤶᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤛᤠᤏ ᤔᤧᤓᤥᤰᤂᤢᤀᤠᤱ ᤋᤃᤡ ᤔᤧᤎᤠᤛᤡᤱ॥ ᤀᤶᤔᤡᤜᤢᤍᤖᤧ ᤁᤢᤛ᤻ᤛᤠ ᤀᤣᤗᤡᤛᤠᤔᤠ᤺ᤴ ᤔᤏᤠᤛᤢᤶᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 23 ᤐᤍᤠᤛᤢᤖᤖᤧ ᤁᤢᤛ᤻ᤛᤠ ᤃᤔᤗᤡᤀᤣᤗᤧᤴ ᤔᤏᤛ᤻ᤛᤣᤖᤧ ᤁᤢᤎᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ. 24 ᤜᤧᤰᤁᤩᤠᤱ ᤃᤡᤍᤣᤀᤥᤏᤡᤖᤧ ᤁᤢᤛ᤻ᤛᤠ ᤀᤒᤡᤍᤠᤏᤧᤴ ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 25 ᤂᤧᤴ ᤀᤣᤃᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤁᤧᤒᤵᤐᤠ ᤍᤠᤏᤖᤧ ᤁᤢᤛᤠ᤺ᤱᤃᤠᤜᤡᤶᤜᤠ᤹ᤀᤥᤒᤠ ᤔᤏᤠᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤛᤠᤏ ᤔᤧᤓᤥ᤺ᤰᤂᤢ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤛᤢᤶᤜᤠ᤹ ᤁᤶᤒᤪᤠᤱ ᤔᤧᤔᤧᤳᤋᤢᤛᤡᤖ ᤋᤃᤠᤱ ᤔᤧᤎᤠᤛᤡᤱ॥ ᤀᤶᤔᤡᤛᤍ᤻ᤍᤤᤖᤧ ᤁᤢᤛ᤻ᤛᤠ ᤀᤜᤡᤀᤣᤈᤣᤖᤧᤴ ᤔᤏᤠᤛᤢᤶᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 26 ᤀᤥᤁᤪᤠᤏᤖᤧ ᤁᤢᤛ᤻ᤛᤠ ᤐᤃᤡᤀᤣᤗᤧᤴ ᤀᤠᤛᤣᤖᤖᤧ ᤁᤢᤎᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ. 27 ᤜᤧᤰᤁᤩᤠᤱ ᤀᤣᤗᤠᤏᤖᤧ ᤁᤢᤛ᤻ᤛᤠ ᤀᤜᤡᤖᤧᤴ ᤏᤵᤋᤠᤗᤡᤖᤧ ᤁᤢᤎᤠ᤺ᤰᤜᤠ᤹ ᤗᤠᤶᤃᤧᤗᤥᤒᤠ ᤘᤕᤧ॥ 28 ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤏᤠᤛᤢᤶᤜᤠ᤹ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤎᤠᤛᤡᤱᤅᤡᤸᤗᤧ ᤁᤶᤓᤗ᤹ᤖᤡᤰ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤘᤕᤧ॥ 29 ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤠ ᤔᤡᤎᤩᤠᤏᤒᤠ ᤖᤢᤀᤣᤗᤖᤧ ᤁᤢᤛ᤻ᤛᤠ ᤜᤥᤒᤠᤒᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤐᤡᤏᤡᤱ ᤔᤧᤳᤋᤡᤃᤧᤒᤠ ᤋᤧᤴᤏᤥ ᤀᤠᤏᤡᤃᤣ ᤐᤣᤃᤡᤃᤧᤖ ᤐᤳᤇᤡᤃᤧ॥ ᤂᤧᤏᤧ᤹ᤀᤠᤱ ᤀᤠᤏᤡᤃᤧᤏᤢᤀᤣ ᤐᤣᤃᤧ᤹. ᤀᤠᤏᤡᤃᤣ ᤂᤧᤏᤧ᤹ ᤏᤢᤖᤡᤰᤁᤣ ᤔᤧᤳᤋᤠᤛᤡᤃᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤏᤢ᤹ᤔᤠ ᤋᤠᤔᤠ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹॥” 30 ᤁᤖ ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤔᤧᤒᤣ᤺ᤰᤁᤠᤴ॥ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤈᤣ᤹ᤀᤥ ᤏᤢ ᤀᤠᤵᤑᤣᤰ ᤀᤠᤔᤏᤠᤜᤠ᤹ᤀᤥ ᤏᤢ᤺ᤱᤅᤠ ᤐᤣ᤺ᤰᤁᤠ॥” 31 ᤁᤖ ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤀᤠᤏᤡᤃᤣ ᤀᤣ᤺ᤰ ᤀᤠᤸᤗᤧᤖᤧᤴᤏᤧ᤹॥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤏᤡᤃᤣ ᤀᤠᤳᤋᤡ ᤀᤠᤳᤋᤡ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤐᤥᤱ᤹ ᤂᤧᤴ ᤂᤧᤏᤧ᤹ ᤁᤧᤏᤡᤛᤢ᤹ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤏᤡᤃᤣ ᤗᤠᤃᤡ ᤗᤠᤶ ᤀᤥ᤺ᤴᤃᤧᤎᤠᤰᤐᤠ ᤐᤥᤱᤔᤠ ᤁᤧᤛᤢᤰ॥ 32 ᤂᤧᤏᤧ᤹ ᤀᤠᤏᤡᤃᤧᤏᤢ ᤛᤥᤖᤡᤰ ᤁᤧᤒᤣ᤺ᤰᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤐᤡᤖᤡᤃᤧᤒᤠ ᤏᤢ᤹ᤔᤠ ᤋᤠᤔᤠᤴ ᤂᤧᤏᤧ᤹ᤀᤠᤱ ᤑ᤺ᤱᤅᤠ ᤐᤡᤀᤠᤛᤡᤃᤧᤖᤥ॥” ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤶᤍᤡᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ 33 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠᤀᤥᤗᤠᤶ ᤂᤧᤱᤜᤠ᤹ ᤛᤢᤶᤕᤠᤴ ᤗᤠᤶᤍᤡᤰ ᤔᤧᤈᤥᤃᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤒᤱᤒᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤠᤱᤎᤥ᤺ᤰᤔᤠᤍᤧᤴ ᤁᤥ᤺ᤳᤇᤧ ᤀᤠᤓᤧᤸᤗᤧᤛᤠᤱ ᤋᤃᤡ ᤋᤃᤡ ᤔᤧᤒᤣ॥ 34 ᤂᤧᤱᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥᤗᤠᤶ ᤔᤧᤎᤠᤛᤡᤱᤅᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤠ᤹ᤔᤡ᤺ᤳᤋᤧᤴ ᤗᤧᤴᤍᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤐᤳᤇᤧ॥ 35 ᤀᤠᤓᤧᤸᤗᤧᤛᤠᤱ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤋᤃᤡ ᤔᤧᤍᤣ᤹ᤖᤢᤸᤗᤧ. ᤔᤥᤛᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤠᤀᤣ. ᤐᤥᤃᤧ᤹ᤀᤥ᥄ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤑᤢᤳᤇᤡᤱᤈᤩᤠᤱ ᤔᤧᤒᤥᤱᤗᤖᤥ᥄ ᤂᤧᤏᤧ᤹ ᤁᤧᤈᤡ᤺ᤵᤐᤠᤜᤠ᤹ ᤁᤧᤍᤃᤡ ᤁᤧᤍᤃᤡ ᤔᤧᤄᤧᤳᤇᤡᤱᤗᤖᤥ॥” 36 ᤜᤧᤰᤁᤩᤠᤱ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤏᤠ᤺ᤵᤛᤢᤸᤗᤧ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤜᤘᤣ ᤍᤠᤱᤒᤠᤀᤣ. ᤀᤡᤛᤪᤠᤀᤡᤗᤒᤠ ᤜᤧᤴᤇᤡᤱ ᤜᤧᤴᤇᤡᤱ ᤜᤡᤶᤛᤕᤱᤜᤠ᤹ᤀᤥ ᤂᤧᤏᤧ᤹ ᤏᤢ᤺ᤰᤂᤧ ᤋᤩᤧ᤹ᤀᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.