ᤗᤢᤁᤠ 2 - LIFOTNTᤕᤧᤛᤢᤖᤧ ᤁᤢᤛᤠᤘᤠ᤺ᤴᤇᤡᤱᤔᤠᤴ ( ᤔᤳᤋᤡ ᥇:᥇᥎-᥈᥋ ) 1 ᤂᤧᤴ ᤕᤧᤶᤔᤥ ᤖᤥᤔᤡ ᤐᤕᤶ ᤜᤠᤱ ᤀᤃᤛ᤻ᤋᤛᤧᤸᤗᤧ ᤁᤧᤖᤧᤰ ᤖᤥᤔᤡ ᤜᤠᤱᤈᤢᤶᤔᤥ ᤕᤠᤶᤏᤠ᤺ᤳᤏᤡ᤺ᤳ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥ 2 ᤁᤴ ᤌᤡᤰᤛᤡᤃᤣᤰᤐᤠ ᤕᤠᤶᤏᤠ᤺ᤳᤏᤡ᤺ᤳ ᤔᤧᤈᤥᤃᤢᤸᤗᤧ ᤛᤡᤖᤡᤕᤠ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤁᤢᤖᤣᤏᤡᤕᤛ ᤘᤕᤧ॥ 3 ᤁᤧᤖᤧᤰ ᤔᤏᤠᤜᤠ᤹ ᤕᤠᤶᤏᤠ᤺ᤳᤏᤡ᤺ᤳᤋᤥ ᤔᤡᤱ ᤛᤠᤵᤛᤧ ᤀᤠᤒᤠᤅᤣ ᤐᤠᤱᤈᤢᤶᤔᤥ ᤔᤧᤒᤣ॥ 4-5 ᤜᤧᤰᤁᤣ᤺ᤸᤗᤧ ᤕᤢᤛᤢᤑᤧᤴᤏᤠᤱ ᤃᤠᤗᤡᤗ ᤌᤢᤶᤔᤥᤒᤠ ᤏᤠᤛᤖᤋ ᤐᤠᤱᤓᤣ᤹ᤀᤥᤗᤠᤶ ᤕᤜᤢᤍᤡᤕᤠᤛᤔᤠ ᤍᤠᤀᤢᤍᤖᤧ ᤁᤢᤒᤠᤱᤈᤢᤶ ᤒᤣᤌᤗᤧᤜᤧᤶᤔᤥ ᤔᤡᤱ ᤛᤠᤵᤛᤧ ᤌᤠᤛᤡᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤘᤕᤧ॥ ᤂᤢᤏᤧ᤹ ᤁᤢᤔᤣ᤺ᤰᤂᤡᤶ ᤐᤠᤴ ᤁᤧᤒᤢ᤹ᤔᤠᤀᤠᤱ ᤁᤧᤘᤠ᤹ᤔᤠ ᤔᤖᤡᤕᤶᤔᤡᤴᤏᤢ ᤐᤣ॥ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤔᤧᤴᤇᤢᤰᤔᤠ ᤘᤕᤧᤖᤥ॥ 6 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤘᤕᤧᤳᤇᤡᤸᤗᤧ ᤔᤖᤡᤕᤔᤖᤧ ᤁᤢᤛᤠᤃᤵᤔᤠ ᤕᤧᤶ ᤋᤩᤧᤀᤠᤱ 7 ᤛᤠᤍᤢᤱᤅᤡᤸᤗᤧ ᤋᤖᤢ. ᤜᤧᤰᤁᤩᤠᤱ ᤋᤢᤶᤒᤠ ᤕᤧᤶᤒᤡᤳᤇᤠ᤹ᤛᤠᤴ ᤛᤠᤘᤠ᤺ᤴᤍᤢᤀᤠᤱ ᤂᤧᤴ ᤀᤅᤧ᤺ᤰᤘᤠᤴ ᤋᤣ᤺ᤳᤋᤡᤸᤗᤧ ᤛᤢᤅᤢᤀᤠᤱ ᤘᤠᤄᤥᤱᤅᤥ ᤏᤧᤛ᤻ᤛᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤆᤧᤕᤠᤱᤎᤥ᤺ᤰᤁᤥ ᤕᤠᤱᤎᤥ᤺ᤰᤔᤠ ᤔᤧᤄᤥᤛᤧᤳᤇᤢᤴᤗᤥ॥ ᤔᤧᤸᤗᤢᤰᤁᤶᤒᤠᤜᤠ᤹ ᤏᤢ ᤔᤠᤱᤗᤠᤀᤡᤱᤒᤠᤜᤠ᤹ 8 ᤂᤧᤴ ᤕᤧᤶᤔᤥ ᤗᤠ᤺ᤰᤁᤠᤳ ᤆᤦᤖᤡᤀᤥ ᤁᤢᤓᤠ ᤔᤧᤸᤗᤢᤰᤁᤶᤒᤠᤜᤠ᤹ ᤂᤢᤏᤡ᤹ ᤔᤧᤸᤗᤢᤰᤜᤠ᤹ ᤔᤧᤃᤥᤛᤢᤛᤡᤖ ᤛᤧᤴᤍᤡᤰ ᤔᤧᤕᤢᤅᤧ॥ 9 ᤂᤧᤵᤔᤥ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤁᤢᤀᤡᤛᤡᤰ ᤂᤢᤏᤡ᤹ ᤂᤡᤖᤡ ᤗᤧᤰᤋᤧᤖᤥ॥ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ. 10 ᤁᤖ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ᥄ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤛᤢᤏᤠᤀᤡᤱ ᤋᤠᤖᤢᤱᤅᤠᤱ ᤘᤠ᤹ᤀᤠᤖᤥ॥ 11 ᤌᤣᤀᤠᤱᤓᤧᤸᤗᤧ ᤀᤠᤀᤡᤴ ᤍᤠᤀᤢᤍᤖᤧ ᤁᤢᤒᤠᤱᤈᤢᤶᤔᤥ ᤂᤡᤏᤡ᤹ ᤗᤠᤃᤡ ᤛᤧᤴᤗᤵᤍᤠᤱᤒᤠᤴ ᤛᤠᤘᤠ᤺ᤴᤇᤡᤱᤅᤠᤱ ᤘᤠ᤹॥ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤍᤠᤱᤒᤠᤖᤥ॥ 12 ᤀᤅᤧ᤺ᤰᤘᤠᤴ ᤋᤣ᤺ᤳᤋᤡᤸᤗᤧ ᤔᤧᤛᤢᤅᤢᤀᤠᤱ ᤘᤠᤄᤥᤱᤅᤥ ᤔᤧᤀᤡᤵᤋᤢᤀᤠᤱ ᤏᤧᤒᤠ ᤁᤧᤏᤡᤛᤢᤶᤗᤥ॥ ᤂᤡᤏᤡ᤹ ᤗᤠᤃᤡ ᤒᤠ ᤂᤧᤴᤏᤡᤴᤏᤣ ᤔᤡᤰᤛᤣᤴ ᤐᤥᤱᤗᤥ॥” 13 ᤂᤧᤵᤔᤥ ᤜᤰᤆᤄᤳ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤎᤠ᤺ᤶᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. 14 “ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤔᤏᤠᤜᤠ᤹ᤖᤧ ᤛᤏᤠᤖᤢᤱ ᤔᤧᤄᤥᤛᤢᤖᤖᤥ॥” 15 ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤜᤠ᤹ ᤕᤠᤱᤎᤥ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤏᤢ᤺ᤰᤂᤧ ᤔᤧᤒᤣ. ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰᤁᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤍᤠᤱᤒᤧᤸᤗᤧ ᤀᤠᤏᤡ᤹ ᤀᤠᤔᤧᤳᤋᤧᤒᤠ ᤜᤧᤰᤁᤣ ᤒᤣᤌᤗᤧᤜᤧᤶᤔᤥ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤐᤣᤃᤡᤀᤠᤱ ᤀᤥᤔᤧᤳᤋᤢᤶᤗᤥ॥” 16 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤠ ᤔᤧᤈᤠᤳᤋᤧᤖ ᤒᤣᤌᤗᤧᤜᤧᤶᤔᤥ ᤔᤧᤒᤣ॥ ᤂᤧᤵᤔᤥ ᤕᤢᤛᤢᤑ ᤏᤢ ᤔᤖᤡᤕᤔ ᤜᤧᤰᤁᤩᤠᤱ ᤘᤠᤄᤥᤱᤅᤥ ᤔᤧᤀᤡᤵᤋᤢᤀᤠᤱ ᤏᤧᤛ᤻ᤛᤧᤒᤠ ᤀᤅᤧ᤺ᤰᤘᤠᤴ ᤔᤧᤍᤢᤔᤢᤖᤥ॥ 17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤀᤅᤧ᤺ᤰᤘᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤔᤧᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤔᤧᤈᤧᤰᤋᤢᤛᤡᤖᤥ॥ 18 ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 19 ᤁᤖ ᤔᤖᤡᤕᤶᤔᤡᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤕᤢᤰᤂᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤗ ᤘᤕᤧᤖᤥ॥ 20 ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤔᤠᤱᤗᤠᤀᤡᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤒᤠ ᤔᤧᤏᤡᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤔᤧᤈᤥᤃᤢᤖ ᤁᤢᤏᤠᤖᤠ ᤔᤧᤓᤥᤛᤢᤖ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥ 21 ᤛᤠᤘᤠ᤺ᤴᤇᤡᤱᤒᤠ ᤕᤧᤳᤇᤡ ᤕᤧᤴᤏᤥ ᤀᤅᤧ᤺ᤰᤘᤠᤴ ᤜᤷᤍᤥ ᤔᤧᤜᤧᤃᤢ ᤔᤧᤒᤡᤖᤢᤸᤗᤧ ᤂᤢᤏᤧ᤹ ᤕᤧᤛᤢ ᤔᤡᤱ ᤔᤧᤘᤠ᤺ᤳᤋᤢᤖᤥ॥ ᤂᤧᤴ ᤔᤡᤱᤅᤡᤴ ᤂᤢᤏᤧ᤹ ᤜᤠᤱᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤔᤠᤱᤗᤠᤀᤡᤱᤒᤠᤸᤗᤧ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤕᤧᤛᤢᤴ ᤔᤠᤱᤜᤡᤶᤔᤥ ᤔᤧᤍᤥᤴᤍᤢ᤹ 22 ᤀᤠᤸᤗ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤕᤠᤱᤍᤠᤱ ᤑᤥᤱᤔᤠ ᤕᤧᤴ ᤋᤩᤧᤀᤠᤱ ᤕᤢᤛᤢᤑ ᤏᤢ ᤔᤖᤡᤕᤔᤖᤧ ᤕᤖᤢᤛᤗᤧᤶᤔᤥ ᤀᤅᤧ᤺ᤰᤘᤠᤴ ᤍᤠᤱᤒᤠᤸᤗᤥ ᤋᤥ᤺ᤶᤔᤠ ᤑᤠ᤹ᤀᤠᤱ ᤋᤠᤖᤧᤳᤇᤢ 23 (ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤋᤢᤶᤒᤠ ᤛᤠᤜᤠ᤹ ᤁᤧᤖᤧᤰ ᤍᤠᤱᤒᤠᤀᤥ ᤛᤣᤛᤣ ᤗ᤹ᤖᤡᤰ ᤋᤥ᤺ᤶᤔᤠᤛᤡᤀᤣ ᤐᤥᤱ)॥ 24 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤁᤢᤃᤠᤵᤌᤡᤰ ᤐᤢᤳᤋᤢ᤺ᤰᤁᤣ ᤀᤡᤃᤪ ᤏᤧᤳᤇᤡ ᤐᤣᤖᤘᤠᤛᤠᤜᤠ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤠᤱᤜᤡᤶᤔᤥ ᤋᤠᤖᤧᤳᤇᤢ॥ 25 ᤀᤠᤸᤗ ᤕᤖᤢᤛᤗᤧᤶᤔᤥ ᤛᤡᤔᤡᤕᤥᤏ ᤔᤧᤵᤔᤏᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤛᤠᤶᤕᤥᤒᤠ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ॥ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤁᤧᤛᤧ᤺ᤵᤐᤠ ᤔᤛᤡᤜ᤺ᤸᤗᤧ ᤁᤢᤍᤠᤔᤧᤴ ᤜᤠᤱᤄᤢᤖ ᤘᤕᤧ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤌᤡᤶᤛᤢᤀᤠᤱ 26 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤧᤏᤡᤛᤢᤀᤠᤱᤗᤰ ᤁᤧᤔᤠᤛᤡᤱᤗᤥ ᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤕᤧᤖᤥ॥ 27 ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤀᤠᤱ ᤂᤢᤏᤧ᤹ ᤔᤠᤱᤜᤡᤶᤔᤥ ᤋᤣ᤹ᤖᤢ॥ ᤂᤧᤵᤔᤥ ᤕᤢᤛᤢᤑ ᤏᤢ ᤔᤖᤡᤕᤔᤖᤧ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤀᤅᤧ᤺ᤰᤘᤠ ᤕᤧᤛᤢᤴ ᤋᤥ᤺ᤶᤔᤠ ᤑᤠ᤹ᤀᤠᤱ ᤋᤠᤖᤧᤳᤇᤢᤸᤗᤧ 28 ᤛᤡᤔᤡᤕᤥᤏᤖᤧ ᤁᤢᤜᤢᤰᤁᤥ ᤀᤅᤧ᤺ᤰᤘᤠᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢᤖ ᤀᤰᤂᤣ ᤐᤠ᤺ᤳᤋᤢ. 29 “ᤔᤢᤰᤛᤠᤶᤍᤠᤱᤒᤠ ᤀᤠᤍᤠᤱᤒᤠᤀᤣ. ᤀᤠᤸᤗ ᤂᤧᤏᤧ᤹ ᤁᤧᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤁᤧᤛᤧᤘᤠᤖᤥᤒᤠᤴ ᤛᤏᤠᤖᤢᤱᤅᤥ ᤛᤡᤀᤠᤏᤡᤖᤥ. 30-31 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤕᤠᤖᤡᤵ ᤁᤧᤈᤥᤃᤢᤒᤠ ᤁᤧᤛᤧᤴᤗᤵᤐᤡᤴ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤡᤰᤁᤡᤸᤗᤧ ᤏᤡᤛᤢᤱᤅᤠᤱ ᤘᤠ᤹ᤀᤠᤖᤥ॥ 32 ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤀᤥ᤺ᤳᤋᤡ ᤀᤥᤛᤣ᤺ᤴᤃᤧᤎᤠᤰᤐᤠ ᤜᤧᤰᤁᤩᤠᤱ ᤂᤢᤏᤧ᤹ᤃ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱ ᤐᤥᤱᤗᤥ॥” 33 ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤳᤇᤢᤀᤠᤱ ᤛᤠ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 34 ᤜᤧᤰᤁᤩᤠᤱ ᤛᤡᤔᤡᤕᤥᤏᤖᤧ ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖ ᤔᤖᤡᤕᤶᤔᤡᤴ ᤔᤧᤳᤋᤢ. “ᤁᤴ ᤀᤅᤧ᤺ᤰᤘᤠᤴ ᤀᤡᤛᤪᤠᤀᤡᤗᤀᤥ ᤕᤖᤡᤰᤗᤧ ᤂᤢᤏᤡ᤹ ᤔᤧᤰᤔᤠ ᤏᤢ ᤛᤧᤴᤗᤵᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤗᤥ॥ 35 ᤜᤧᤰᤁᤣ᤺ᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤌᤠ᤺ᤵᤗᤥ॥ ᤜᤧᤰᤁᤩᤠᤱ ᤋᤢᤰᤂᤣᤖᤧ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤸᤗᤧ ᤁᤢᤀᤡᤛᤡᤰ ᤁᤧᤗᤢᤱᤔᤠ᤹ᤀᤡᤴ ᤗᤛ᤻ᤛᤢ᤹ᤖᤥ॥” 36 ᤜᤧᤰᤁᤩᤠᤱ ᤂᤧᤵᤔᤥ ᤀᤠᤛᤣᤖ ᤛᤢᤘᤠᤱᤒᤠ ᤑᤏᤢᤀᤧᤗᤖᤧ ᤁᤢᤛ᤻ᤛᤠ ᤜᤴᤏᤠ ᤔᤧᤵᤔᤏᤠᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤛᤠᤶᤕᤥᤏᤡᤔᤠ ᤏᤢ ᤛᤧᤘᤠᤖᤥᤔᤠᤎᤡᤰ ᤘᤕᤧ॥ ᤂᤧᤴ ᤁᤢᤔᤣ᤺ᤰᤂᤡᤶ ᤐᤥ᤺ᤰᤂᤧᤀᤠᤱ ᤏᤢᤛᤡ (᥍) ᤋᤱᤒᤣ ᤌᤠᤖᤡᤰ ᤁᤢᤕᤧᤶᤒᤠ᤺ᤴᤏᤢ ᤛᤥᤖᤡᤰ ᤘᤕᤧᤳᤇᤡ ᤜᤧᤰᤁᤩᤠᤱ ᤁᤢᤕᤧᤶᤒᤠ᤹ᤀᤡᤴ ᤔᤠᤛᤡᤱᤅᤠᤱ ᤔᤣᤔᤣᤍᤢᤔᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ 37 ᤂᤢᤏᤧ᤹ ᤋᤱᤒᤣ ᤕᤧᤳᤐᤥᤱᤀᤠᤱ ᤗᤡᤛᤡ (᥎᥊) ᤁᤧᤃᤧᤵᤔᤠ ᤁᤠᤵᤔᤥᤔᤠ ᤘᤕᤧᤖᤥ॥ ᤂᤧᤸᤗᤧ ᤔᤠᤱᤜᤡᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤸᤗᤧᤳᤋᤣ ᤛᤧᤴᤍᤡᤰ ᤗᤧᤴᤍᤡᤰ ᤆᤠᤏᤧᤳ ᤕᤢᤅᤧᤖ ᤋᤢᤘᤠ ᤆᤥᤃᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤆᤥᤃᤢᤖ ᤘᤕᤧᤖᤥ॥ 38 ᤂᤧᤴ ᤕᤧᤶᤔᤥ ᤂᤧᤵᤔᤥ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤜᤠᤱᤒᤠ ᤔᤏᤠᤜᤠ᤹ ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤔᤧᤳᤋᤢᤛᤡᤖᤥ॥ 39 ᤍᤠᤱᤒᤠᤸᤗᤧ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤔᤖᤡᤕᤔ ᤏᤢ ᤕᤢᤛᤢᤑᤖᤧ ᤆᤥᤃᤧᤳᤇᤢᤀᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤐᤠᤱᤓᤣ᤹ ᤃᤠᤗᤡᤗ ᤌᤢᤶᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤏᤢ᤺ᤰᤂᤧᤳᤇᤡ ᤐᤣᤛᤡᤖᤥ॥ 40 ᤂᤧᤵᤔᤥ ᤀᤅᤧ᤺ᤰᤘᤠᤴ ᤐᤥᤖᤧᤖ ᤐᤣᤀᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧᤖᤥ॥ ᤂᤢᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤁᤢᤎᤡᤶ ᤘᤕᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤂᤢᤏᤧ᤹ ᤛᤶᤍᤠᤱ ᤘᤕᤧᤖᤥ॥ ᤕᤧᤛᤢᤴ ᤆᤢᤰᤋᤧᤸᤗᤧ ᤔᤠᤱᤜᤡᤶᤔᤥ ᤐᤠ᤺ᤴᤎᤱ ᤆᤥᤃᤢ᤹ 41 ᤋᤱᤒᤣ ᤌᤵᤔᤠ ᤕᤧᤛᤢᤖᤧ ᤁᤢᤶᤒᤠ ᤁᤢᤶᤔᤠᤛᤡ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤐᤣ᤺ᤰᤔᤠ ᤌᤡᤶ ᤁᤳᤋᤧᤳᤇᤢᤖᤥ॥ 42 ᤜᤧᤰᤁᤩᤠᤱ ᤕᤧᤛᤢᤴ ᤌᤡᤰ-ᤏᤧᤳ (᥇᥈) ᤋᤱᤒᤣ ᤁᤧᤖᤧᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤋᤱᤏᤠᤶᤔᤥ ᤔᤧᤒᤣ॥ 43 ᤂᤧᤴ ᤋᤱᤏᤠᤶᤔᤡᤴ ᤐᤣᤀᤠᤱ ᤂᤧᤱᤜᤠ᤹ ᤜᤡᤶᤔᤥ ᤏᤢ᤺ᤱᤔᤠ ᤔᤧᤜᤣ᤺ᤰᤋᤧ. ᤁᤖ ᤕᤧᤛᤢᤴ ᤕᤖᤢᤛᤗᤧᤶᤔᤥᤀᤣ ᤘᤕᤧᤗᤠᤖᤧ॥ ᤁᤴ ᤐᤠ᤺ᤴᤏᤡᤴ ᤕᤧᤛᤢᤖᤧ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤏᤡᤱᤘᤠ᤹ ᤔᤧᤄᤥᤛᤧᤳᤇᤢᤴᤗᤥ॥ 44 ᤂᤧᤱᤜᤠ᤹ᤖᤧ ᤋᤃᤡ ᤁᤧᤒᤣ᤺ᤰᤐᤠ ᤗᤠᤶᤍᤡ᤺ᤰᤛᤠᤒᤠᤜᤠ᤹ᤏᤢ ᤐᤣᤒᤡᤗᤠ ᤑᤠ᤹ᤀᤠᤱ ᤀᤡ᤺ᤳᤋᤧᤇᤢ॥ ᤌᤡᤰᤕᤧᤴᤒᤠ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤂᤢᤴᤇᤡ᤹ ᤁᤠ᤹ᤀᤡ ᤛᤥ᤹ᤎᤥᤰ ᤏᤢ ᤋᤣ᤺ᤱᤈᤢᤶᤜᤠ᤹ᤀᤥ ᤕᤧᤛᤢᤴ ᤁᤥ᤺ᤵᤔᤠ ᤜᤣ᤺ᤰᤋᤧᤳᤇᤢ. 45 ᤁᤖ ᤔᤧᤍᤢᤔᤧᤳᤇᤢᤴᤏᤠᤱ ᤏᤧᤵᤔᤠᤱ ᤁᤢᤃᤥ᤺ᤳᤇᤧ ᤕᤖᤢᤛᤗᤧᤶᤔᤥ ᤏᤢ᤺ᤰᤂᤧᤳᤇᤡ॥ 46 ᤛᤢᤶ ᤕᤧᤴᤏᤥ ᤕᤧᤛᤢᤴ ᤔᤠᤱᤜᤡᤶᤔᤥ ᤕᤜᤢᤍᤡ ᤛᤡᤰᤛᤠᤶᤒᤠᤜᤠ᤹ ᤂᤧᤵᤛᤢᤛᤡᤖ ᤐᤠᤴ ᤛᤣ᤺ᤴᤍᤥᤛᤢᤛᤡᤖ ᤕᤢᤅᤧᤒᤠ ᤋᤢᤔᤧᤳᤇᤢᤖᤥ॥ 47 ᤂᤢᤏᤧ᤹ ᤁᤢᤀᤡ᤺ᤳᤇᤡᤱᤛᤠᤶ ᤏᤢ ᤐᤡᤖᤢᤛᤡᤒᤠ ᤏᤥᤃᤵ ᤁᤧᤄᤧᤶᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ 48 ᤜᤧᤰᤁᤩᤠᤱ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤏᤧ᤹ ᤏᤡᤛᤧᤳᤇᤢᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤁᤢᤶᤔᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤌᤣᤀᤠᤱ ᤀᤰᤂᤣ ᤕᤠᤵᤔᤡ ᤁᤧᤈᤥᤃᤧᤒᤠᤒᤣ᥅ ᤀᤠᤴᤇᤡᤃᤣ ᤏᤡᤱᤛᤠᤶᤔᤥ ᤌᤩᤧᤛᤡᤃᤧᤀᤠᤱ ᤁᤥ᤺ᤳᤏᤧᤳᤇᤡᤃᤧ ᤔᤣ᤺ᤶᤒᤡ᥅” 49 ᤕᤧᤛᤢᤖᤧ ᤛᤣ᤺ᤴᤍᤥᤛᤢᤛᤡ. “ᤐᤠᤏᤢᤍᤡᤱ ᤀᤠᤶᤒᤦ ᤀᤠᤶᤔᤦ. ᤌᤣᤀᤠᤱ ᤕᤠᤵᤔᤡ ᤁᤧᤃᤥ᤺ᤳᤇᤡᤒᤠᤒᤣ᥅ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤘᤠ᤹ᤔᤠ ᤐᤥᤱ ᤑᤠ᤹ᤀᤠᤱ ᤂᤡᤴᤇᤡ᤹ ᤁᤧᤴᤏᤡᤛᤧᤳᤇᤢᤴᤒᤡ᥅” 50 ᤁᤖ ᤁᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤧᤳᤇᤢᤴᤗᤥ॥ 51 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤏᤢ ᤏᤠᤛᤖᤋᤀᤥ ᤐᤣ॥ ᤂᤢᤏᤧ᤹ᤃ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤐᤠᤴ ᤁᤧᤄᤧᤶᤒᤠ ᤘᤕᤧ॥ ᤁᤢᤶᤔᤠᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤕᤢᤰᤂᤢᤖᤥ॥ 52 ᤀᤰᤂᤣᤗ᤹ᤖᤡᤰ ᤕᤧᤛᤢᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤐᤥᤖᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤛ᤺ᤳᤋᤧ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤠᤱ ᤔᤧᤛ᤺ᤳᤋᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.