ᤗᤧᤒᤡ 9 - LIFOTNTᤜᤠᤖᤢᤏᤧᤸᤗᤧ ᤛᤡᤍᤢᤱᤈᤓᤠ ᤋᤥ᤺ᤴᤍᤢ᤹ 1 ᤔᤠᤱᤌᤥ᤺ᤰᤏᤠ ᤐᤡᤖᤢᤛᤡᤒᤠ ᤌᤡᤶ ᤕᤧᤳᤇᤡᤃᤣᤰᤐᤠ ᤕᤧᤴ ᤁᤧᤖᤧᤸᤗᤧ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ. ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤀᤢ᤺ᤳᤋᤢᤛᤡ॥ 2 ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤖᤢᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠᤖᤧ ᤗᤠᤃᤡ ᤔᤧᤱᤃᤠ᤺ᤶᤔᤏᤠᤒᤠ ᤗᤳᤇᤠ ᤐᤡᤛᤠ᤺ᤳ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤔᤧᤱᤃᤠ᤺ᤶᤔᤏᤠᤒᤠ ᤗᤳᤇᤠ ᤔᤧᤸᤗᤢᤰ ᤋᤠᤖᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤡᤍᤢᤱᤈᤓᤠ ᤋᤥ᤺ᤴᤍᤧ᤹॥ 3 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤂᤧᤏᤧ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤁᤢᤶᤒᤠᤒᤠ ᤔᤧ᤺ᤴᤍᤠ ᤌᤡᤰ ᤂᤧᤒᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤗᤳᤇᤠ ᤔᤧᤱᤃᤠ᤺ᤶᤔᤏᤠᤒᤠ ᤐᤡᤳᤛᤠᤳ ᤌᤡᤰ ᤏᤢ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤔᤧᤱᤃᤠ᤺ᤶᤔᤏᤠᤒᤠ ᤌᤢ᤺ᤶᤒᤠ ᤌᤡᤰ ᤋᤠᤖᤧᤶᤔᤧ᤹॥ 4 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤡᤍᤢᤱᤈᤓᤠ ᤆᤥ᤺ᤰᤛᤧ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤛᤧᤃᤶᤒᤠ ᤏᤢ ᤗᤳᤇᤠ ᤔᤧᤸᤗᤢᤰ. ᤜᤧᤰᤁᤩᤠᤱ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤗᤳᤇᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤀᤠᤱ ᤋᤠᤖᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤴ ᤂᤡᤏᤡ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱ᤹॥’” 5 ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤜᤡᤶᤔᤡᤸᤗᤧ ᤁᤢᤍᤃᤡ ᤔᤧᤍᤠᤖᤢ. ᤜᤧᤰᤁᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤩᤧᤀᤠᤱ ᤔᤧᤕᤧᤶᤛᤡᤱ॥ 6 ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤜᤠᤒᤠ ᤁᤴᤗᤥ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤡᤏᤡ᤹ᤀᤥ ᤀᤥᤛᤣ᤺ᤴᤎᤠᤱ ᤐᤥᤱ᤹॥” 7 ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤋᤩᤧ᤹ᤀᤠᤱ ᤂᤧᤏᤧ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤁᤧᤛᤡᤍᤢᤱᤈᤓᤠᤴ ᤋᤥ᤺ᤴᤍᤧ᤹. ᤂᤶᤓᤩᤠᤱ ᤂᤧᤏᤧ᤹ ᤀᤠᤒᤠᤅᤣ ᤁᤧᤗᤠᤃᤡ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤋᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤔᤏᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤧ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤧᤵᤔᤡ ᤏᤠ᤺ᤰᤋᤧ᤹॥” 8 ᤂᤧᤒᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤜᤠᤖᤢᤏᤧᤴ ᤋᤩᤧᤀᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤐᤡᤳᤛᤠᤳᤋᤧᤴ ᤛᤧᤖᤢ॥ 9 ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤔᤠᤰᤂᤡᤴ ᤂᤢᤏᤧ᤹ᤀᤥ ᤔᤧᤍᤠᤖᤢ॥ ᤂᤢᤏᤧ᤹ ᤁᤢᤜᤢᤰᤆᤥ᤺ᤴ ᤔᤠᤰᤂᤡ᤹ᤀᤥ ᤏᤡ᤺ᤒ᤻ᤛᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤋᤠᤱᤜᤠ᤹ᤀᤥ ᤜᤢ᤺ᤳᤋᤢ. ᤜᤧᤰᤁᤩᤠᤱ ᤁᤧᤏᤶᤒᤠ ᤔᤠᤰᤂᤡᤴ ᤆᤠᤜᤣ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ. ᤁᤢᤗᤧᤶᤔᤡᤴ. ᤜᤧᤰᤁᤩᤠᤱ ᤁᤢᤏᤧᤖᤧᤳ ᤁᤧᤍᤧᤵᤐᤠ ᤛᤠᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢ॥ 11 ᤁᤖ ᤛᤠᤴ ᤏᤢ ᤁᤢᤜᤥᤖᤡᤰᤐᤠᤴ ᤆᤠᤜᤣ ᤛᤠ᤺ᤱᤃᤠᤜᤡᤶ ᤗᤠ᤺ᤰᤁᤠᤳ ᤔᤡᤀᤥ ᤔᤡᤎᤡᤰᤂᤢ॥ 12 ᤂᤧᤒᤩᤠᤱ ᤜᤠᤖᤢᤏᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤛᤧᤖᤢ. ᤂᤶᤒᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤔᤠᤰᤂᤡᤴ ᤂᤢᤏᤧ᤹ᤀᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤧᤖᤧᤰ ᤐᤡᤛᤠᤱ ᤂᤧᤴ ᤛᤠᤰᤂᤢ॥ 13 ᤂᤧᤱᤜᤠ᤹ᤖᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤁᤢᤈᤰᤋᤠ ᤁᤢᤗᤧᤶᤍᤠ ᤔᤧᤈᤥᤃᤢᤀᤠᤱ ᤁᤢᤎᤧᤃᤣ᤺ᤰᤁᤡᤴᤏᤠᤱ ᤂᤢᤏᤧ᤹ᤀᤥ ᤔᤧᤍᤠᤖᤢ. ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢ॥ 14 ᤁᤢᤜᤡᤍᤢᤳ ᤁᤢᤎᤧᤃᤠ᤺ᤱᤅᤡᤴ ᤏᤢ ᤁᤢᤗᤠᤱᤜᤠ᤹ ᤘᤠᤜᤵᤋᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤶᤎᤠᤱ ᤔᤡᤎᤡᤰᤂᤢ॥ 15 ᤂᤧᤴ ᤀᤣᤃᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤡᤍᤢᤱᤈᤓᤠᤴ ᤋᤠᤖᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤔᤧ᤺ᤴᤍᤒᤁᤠᤴ ᤜᤠᤖᤢᤏᤧᤸᤗᤧ ᤛᤧᤖᤢ. ᤜᤧᤰᤁᤩᤠᤱ ᤋᤃᤡᤒᤠ ᤜᤧᤰᤁᤣᤀᤣ ᤗᤠᤕᤥᤗᤠᤶ ᤗᤧᤵᤔᤡ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤂᤧᤴ ᤋᤥ᤺ᤴᤍᤢ॥ 16 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤕᤠᤱᤛᤡᤱᤅᤠᤱ ᤌᤡᤶ ᤁᤢᤀᤡᤛᤡᤰ ᤂᤧᤴ ᤋᤥ᤺ᤴᤍᤢ॥ 17 ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤕᤠᤱᤛᤡᤱᤅᤠᤱ ᤛᤥ᤺ᤸᤗᤠᤰ ᤌᤡᤰ ᤁᤢᤗᤧ᤺ᤶ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤠᤏᤠᤶ ᤋᤥ᤺ᤶᤔᤏᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤴᤏᤢ᤺ᤸᤗᤧ ᤘᤣ᤹ ᤂᤧᤴᤏᤠᤱ ᤔᤡᤎᤡᤰᤂᤢ॥ 18 ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤋᤱᤈᤢᤶ ᤛᤡᤍᤢᤱᤈᤓᤠ ᤛᤧᤃᤶᤒᤠᤴ ᤏᤢ ᤔᤧᤸᤗᤢᤰᤁᤡᤴᤏᤠᤱ ᤜᤠᤖᤢᤏᤧᤸᤗᤧ ᤛᤧᤖᤢ॥ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤔᤠᤰᤂᤡᤴ ᤔᤧᤕᤠᤱᤛᤡᤱᤅᤠᤱ ᤂᤢᤏᤧ᤹ ᤔᤧᤒᤡᤖᤢ. ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤒᤪᤡᤱ ᤐᤡᤛᤠᤱ ᤛᤠᤰᤂᤢ॥ 19 ᤁᤖ ᤛᤧᤃᤶᤒᤠᤴ ᤏᤢ ᤌᤢ᤺ᤶᤒᤠ᤺ᤸᤗᤧ ᤁᤢᤛᤥ᤺ᤳᤋᤡᤴ. ᤁᤢᤔᤡ᤺ᤸᤗᤧ ᤁᤢᤒᤢᤱᤅᤥᤒᤠ ᤁᤢᤛᤥ᤺ᤳᤋᤡᤴ. ᤁᤢᤜᤡᤍᤢᤳ ᤁᤢᤎᤧᤅᤠᤱ ᤁᤧᤍᤧᤵᤐᤠ ᤁᤢᤛᤥ᤺ᤳᤋᤡᤴ. ᤁᤢᤗᤧᤶᤜᤠ᤹ ᤏᤢ ᤁᤢᤏᤧᤖᤧᤳ ᤁᤧᤍᤧᤵᤐᤠ ᤛᤠ᤺ᤴ— 20 ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤱᤒᤵᤔᤠᤜᤠ᤹ᤖᤧ ᤁᤢᤛᤶᤎᤠᤱ ᤔᤧᤏᤧᤛ᤻ᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤥ᤺ᤳᤋᤡᤴ ᤆᤠᤜᤣ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢ॥ 21 ᤁᤢᤛᤱᤒᤵᤔᤠᤴᤏᤢ ᤛᤥᤖᤡᤰ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤗᤠᤱᤓᤧᤸᤗᤧᤰᤔᤠᤱᤃ ᤔᤥᤛᤠ᤺ᤸᤗᤧ ᤔᤢᤖᤠᤔᤧᤳᤋᤢᤒᤠ ᤁᤢᤀᤡᤛᤡᤰ ᤜᤠᤖᤢᤏᤧᤸᤗᤧ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤑᤥ᤺ᤰᤂᤢ॥ 22 ᤂᤧᤒᤩᤠᤱ ᤜᤠᤖᤢᤏᤧᤸᤗᤧ ᤁᤢᤜᤢᤰᤁᤡᤴ ᤔᤏᤠᤜᤠ᤹ ᤗᤧᤵᤔᤠᤱ ᤑᤥ᤺ᤰᤂᤢᤀᤠᤱ ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤛᤡ॥ ᤁᤶᤓᤗ᤹ᤖᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤴ. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤏᤢ ᤋᤱᤈᤢᤶ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤢᤀᤠᤱ ᤕᤥ ᤌᤠᤛᤡᤱ॥ 23 ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤗᤠᤛᤧᤳᤇᤡ. ᤜᤧᤰᤁᤩᤠᤱ ᤗ᤺ᤴᤍᤧᤛᤡᤀᤠᤱ ᤔᤏᤠᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤧᤳᤇᤢᤛᤡ॥ ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤁᤧᤖᤧᤰ ᤔᤏᤠᤜᤠ᤹ᤀᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧ॥ 24 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤗᤠᤶᤒᤠ ᤔᤡᤴ ᤗ᤺ᤴᤍᤧᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤏᤧᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤏᤢ ᤁᤢᤛᤥ᤺ᤳᤋᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢ॥ ᤀᤠᤸᤗ ᤂᤧᤴ ᤔᤏᤠᤜᤠ᤹ᤖᤧ ᤔᤧᤏᤡᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤔᤧᤀ᤺ᤰᤋᤧᤖ ᤛᤠᤶᤒᤥᤴ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤈᤥᤃᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.