ᤗᤧᤒᤡ 8 - LIFOTNTᤜᤠᤖᤢᤏ ᤏᤢ ᤁᤢᤛ᤻ᤛᤠᤜᤠ᤹ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤛᤡ ( ᤗᤠ ᥈᥏:᥇-᥉᥍ ) 1 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤜᤠᤖᤢᤏᤧᤴ. ᤂᤧᤸᤗᤧ ᤁᤢᤛ᤻ᤛᤠᤜᤠ᤹ᤀᤠᤱ ᤛᤥᤛᤥᤖᤡᤰ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹. ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣᤴ. ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠᤴ. ᤌᤢ᤺ᤶᤒᤠ ᤏᤧᤳᤇᤡ ᤏᤢ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤁᤧᤕᤠᤰᤐᤠ ᤏᤠ᤹ᤀᤡᤔᤠᤴ ᤕᤠᤱᤛᤡᤱᤅᤧ᤹ 3 ᤜᤧᤰᤁᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤑᤢᤰᤂᤧᤛᤧ᤹॥” 4 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤔᤥᤛᤠ᤺ᤸᤗᤧ ᤆᤥᤃᤢ. ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤛᤱᤈᤢᤶᤓᤥᤜᤠ᤹ ᤛᤢᤵᤛᤢᤛᤡ॥ 5 ᤔᤥᤛᤠ᤺ᤸᤗᤧ ᤛᤱᤈᤢᤶᤓᤥᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤜᤠᤒᤠ ᤁᤴᤗᤥ॥” 6 ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤋᤠᤖᤢᤛᤡᤀᤠᤱ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤵᤛᤢᤛᤡ॥ 7 ᤂᤢᤏᤧ᤹ ᤜᤠᤖᤢᤏᤧᤴ ᤗᤃᤣ᤺ᤵ ᤆᤠᤰᤋᤢᤀᤠᤱ ᤁᤒᤪᤡᤱ ᤂᤣ᤺ᤰᤂᤢ ᤐᤡᤖᤢ. ᤜᤧᤰᤁᤩᤠᤱ ᤜᤰᤛᤢ᤺ᤵᤐᤠ ᤋᤣᤳ ᤆᤠᤰᤋᤢᤀᤠᤱ ᤁᤢᤛᤶᤎᤠᤱ ᤀᤣᤐᤥᤍᤧᤴ ᤑᤳᤇᤢ ᤐᤡᤖᤢ॥ ᤂᤧᤒᤩᤠᤱ ᤁᤢᤜᤢᤰᤘᤠ ᤁᤧᤏᤢ᤹ᤒᤠᤸᤗᤧ ᤑᤢᤱ ᤗᤰᤋᤢᤒᤠ ᤑ᤹ᤀᤡ᤺ᤴ ᤀᤣᤐᤥᤍᤧᤸᤗᤧ ᤁᤢᤛᤶᤎᤠᤱ ᤑᤳᤇᤢᤀᤠᤱ ᤁᤢᤃᤣᤱᤅᤥ ᤁᤒᤪᤡᤱ ᤕᤢᤵᤋᤢ॥ 8 ᤂᤧᤴ ᤀᤣᤃᤠᤱ ᤂᤧᤸᤗᤧ ᤜᤠᤖᤢᤏᤧᤴ ᤂᤍᤡ ᤑᤳᤇᤢ ᤐᤡᤖᤢᤀᤠᤱ ᤂᤧᤵᤔᤥ. “ᤀᤢᤖᤡᤔ” ᤏᤢ “ᤋᤢᤶᤔᤡᤶᤔᤧᤴ” ᤁᤣ᤺ᤳᤋᤢ॥ 9 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤜᤠᤖᤢᤏᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤧᤸᤗᤧ ᤑᤧᤋᤠ ᤂᤢ᤺ᤰᤋᤢ. ᤜᤧᤰᤁᤩᤠᤱ ᤑᤧᤋᤠ᤺ᤸᤗᤧ ᤁᤢᤛᤶᤎᤠᤱ ᤋᤃᤠᤱ ᤗᤧᤵᤔᤠᤱ ᤑᤧᤔᤏᤠᤒᤠ ᤛᤠᤶᤔᤩᤠᤱᤅᤡᤴ ᤑᤳᤇᤢ ᤐᤡᤖᤢ. ᤂᤧᤸᤗᤧ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤇᤡᤱᤒᤠ ᤔᤡᤰᤛᤣᤴ ᤐᤥᤱ᤹॥ 10 ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣᤴ ᤕᤠᤱᤛᤡᤱᤅᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤠᤱᤌᤥ᤺ᤰᤏᤠ ᤆᤥᤃᤢᤀᤠᤱ ᤛᤣᤛᤣᤛᤠᤱᤛᤠᤱ ᤆᤥᤃᤢ॥ 11 ᤂᤧᤵᤔᤥᤗᤠᤶᤒᤠ ᤁᤢᤓᤠ ᤏᤡ᤺ᤱᤃᤣ᤹ᤈᤡ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤏᤢᤛᤡᤗᤧᤱ ᤛᤠᤰᤂᤢ. ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤂᤵᤐᤩᤠ ᤛᤠᤔᤠᤜᤠ᤹. ᤗᤠᤱᤜᤢᤰ ᤘᤠᤜᤵᤔᤠ ᤇᤧ᤺ᤱᤃᤩᤠ ᤂᤧᤸᤗᤧ ᤁᤢᤍᤰᤔᤠ ᤁᤢᤗᤠᤱᤜᤠ᤹ᤀᤠᤱ ᤋᤥ᤺ᤶᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ॥ 12 ᤕᤠᤶᤔᤥ ᤂᤢᤏᤧ᤹ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤏᤡ᤺ᤱᤃᤣᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤜᤢᤰᤂᤢᤀᤠᤱ ᤂᤢᤏᤧ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤖᤢ॥ 13 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ ᤋᤠᤖᤢᤛᤡᤀᤠᤱ ᤗᤃᤣ᤺ᤵ ᤆᤠᤰᤋᤢᤛᤡ ᤜᤧᤰᤁᤩᤠᤱ ᤑ᤹ᤀᤡ ᤕᤢᤵᤋᤢᤛᤡᤀᤠᤱ ᤂᤧᤱᤜᤠ᤹ ᤐᤠᤃᤖᤡ ᤂᤢ᤺ᤰᤋᤢᤛᤡ॥ 14 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠᤴ ᤋᤠᤖᤢ. ᤜᤧᤰᤁᤩᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤢᤴᤇᤡ᤹ ᤜᤢᤰᤜᤠ᤹ ᤔᤧᤏᤧᤛ᤻ᤛᤢ॥ 15 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤴ ᤛᤧᤖᤢ. ᤂᤶᤒᤩᤠᤱ ᤂᤧᤸᤗᤧ ᤁᤢᤓᤠ ᤔᤠᤰᤂᤡ᤹ᤈᤡ ᤕᤠᤱᤛᤡᤱᤅᤠᤱ ᤁᤢᤜᤢᤰᤆᤥ᤺ᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤋᤠᤱᤜᤠ᤹ᤀᤥ ᤜᤢ᤺ᤳᤋᤢ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤣᤛᤣᤛᤠᤱᤛᤠᤱ ᤆᤥᤃᤢ॥ ᤜᤧᤰᤁᤩᤠᤱ ᤁᤧᤏᤶᤒᤠ ᤁᤢᤔᤠᤰᤂᤡᤴ ᤂᤧᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢ॥ ᤂᤧᤸᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤂᤧᤸᤗᤧ ᤁᤶᤓᤗ᤹ᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤣᤛᤣᤛᤠᤱᤛᤠᤱ ᤆᤥᤃᤢ॥ 16 ᤁᤢᤜᤡᤍᤢᤳ ᤁᤢᤎᤧᤅᤠ᤺ᤱᤜᤠ᤹ ᤁᤧᤍᤧᤵᤐᤠ ᤁᤧᤖᤧᤰ ᤁᤢᤛᤥ᤺ᤳᤋᤡᤴ ᤏᤢ ᤁᤢᤗᤢᤱᤔᤠ᤹ ᤁᤧᤍᤧᤵᤐᤠ ᤛᤠᤴ ᤜᤧᤰᤁᤩᤠᤱ ᤁᤢᤛᤥ᤺ᤳᤏᤢ ᤛᤥᤖᤡᤰᤐᤠ ᤏᤧᤵᤔᤠᤱ ᤁᤢᤗᤧᤶᤜᤠ᤹ ᤔᤥᤛᤠᤴ ᤕᤠᤱᤛᤡᤱ. ᤂᤧᤒᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢ॥ 17 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤛᤧᤃᤶᤒᤠᤴ ᤆᤠᤜᤣ ᤂᤧᤸᤗᤧ ᤁᤢᤜᤥᤖᤡᤰᤐᤠᤴ ᤏᤢ ᤛᤠᤴ ᤜᤧᤰᤁᤩᤠᤱ ᤐᤡ᤹ᤜᤡ᤺ᤴᤏᤢ ᤛᤥᤖᤡᤰ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤔᤡᤀᤥ ᤔᤡᤎᤡᤰᤂᤢᤍᤣᤛᤢ॥ 18 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤸᤗᤢᤰᤁᤡᤴ ᤋᤥ᤺ᤴᤍᤢ॥ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤌᤢ᤺ᤶᤒᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤔᤧᤏᤧᤛ᤻ᤛᤢ॥ 19 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤛᤧᤖᤢ॥ ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤂᤧᤸᤗᤧ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤜᤢᤰᤂᤢᤍᤣᤛᤢ॥ 20 ᤜᤧᤰᤁᤩᤠᤱ ᤂᤢᤏᤧ᤹ ᤌᤢ᤺ᤶᤒᤠ᤺ᤴ ᤁᤢᤈᤰᤋᤠ ᤁᤢᤗᤧᤶᤍᤠ ᤛᤧᤴᤍᤢᤀᤠᤱ ᤂᤰᤋᤢ. ᤂᤧᤒᤩᤠᤱ ᤁᤢᤎᤧᤃᤣ᤺ᤰᤁᤡᤴ. ᤂᤧᤴ ᤛᤠᤃᤠᤰᤔᤠᤜᤠ᤹ ᤏᤢ ᤁᤢᤛᤥ᤺ᤳᤋᤡᤴᤏᤠᤱ ᤛᤥᤛᤥᤖᤡᤰ ᤔᤡᤎᤡᤰᤂᤢᤍᤣᤛᤢ॥ 21 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤁᤢᤜᤡᤍᤢᤳ ᤁᤢᤎᤧᤅᤠᤱ ᤏᤢ ᤁᤢᤗᤠᤱᤜᤠ᤹ ᤆᤫᤠ᤺ᤳᤋᤡᤸᤗᤧ ᤘᤖᤧᤰᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶᤒᤠ ᤋᤥ᤺ᤴᤍᤢ. ᤁᤢᤏᤠᤶᤃᤧᤏᤢ᤹ᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤓᤢᤸᤗᤠ ᤔᤧᤸᤗᤢᤰᤁᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢ॥ 22 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤋᤥ᤺ᤶᤔᤠᤛᤡᤖᤧ ᤗᤠᤃᤡ ᤏᤡᤛᤡᤃᤣᤰᤐᤠ ᤌᤢ᤺ᤶᤒᤠ᤺ᤴ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤂᤧᤴ ᤌᤢ᤺ᤶᤒᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤔᤧᤏᤧᤛ᤻ᤛᤢ॥ 23 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤴ ᤛᤧᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤸᤗᤧ ᤁᤢᤔᤠᤰᤂᤡᤴ ᤕᤠᤱᤛᤡᤱᤅᤠᤱ ᤜᤠᤖᤢᤏᤧᤸᤗᤧ ᤁᤢᤈᤢᤰᤘᤠ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ ᤗᤥ᤺ᤵᤔᤠᤀᤥ. ᤂᤢᤏᤧ᤹ ᤁᤢᤈᤢᤰᤘᤠ ᤁᤢᤜᤢᤰᤔᤠᤀᤥ ᤏᤢ ᤂᤢᤏᤧ᤹ ᤁᤢᤈᤢᤰᤘᤠ ᤗᤠᤱᤔᤠᤀᤥ ᤜᤢ᤺ᤳᤋᤢ ᤐᤡᤖᤢ॥ 24 ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ ᤋᤠᤖᤢᤛᤡ. ᤂᤶᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤵᤛᤠᤱ ᤆᤢᤵᤛᤠᤱ ᤗᤧᤵᤔᤠᤱᤒᤠ ᤏᤧᤰᤂᤥ᤹ ᤗᤥ᤺ᤵᤔᤠᤀᤥ. ᤆᤢᤵᤛᤠᤱ ᤆᤢᤵᤛᤠᤱ ᤗᤧᤵᤔᤠᤱᤒᤠ ᤜᤢᤰᤔᤠᤀᤥ ᤏᤢ ᤆᤢᤵᤛᤠᤱ ᤆᤢᤵᤛᤠᤱ ᤗᤧᤵᤔᤠᤱᤒᤠ ᤗᤠᤱᤔᤠᤀᤥ ᤔᤠᤰᤂᤡ᤹ ᤜᤢ᤺ᤳᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤁᤧᤏᤶᤒᤠ ᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤛᤠᤰᤂᤢ॥ 25 ᤂᤧᤒᤩᤠᤱ ᤂᤧᤸᤗᤧ ᤁᤢᤛᤥ᤺ᤳᤋᤡᤴ. ᤁᤢᤔᤡ᤺ᤸᤗᤧ ᤁᤢᤒᤢᤱᤅᤥᤒᤠ ᤁᤢᤛᤥ᤺ᤳᤋᤡᤴ. ᤁᤢᤜᤡᤍᤢᤳ ᤁᤢᤎᤧᤅᤠᤱ ᤁᤧᤍᤧᤵᤐᤠ ᤁᤧᤖᤧᤰ ᤁᤢᤛᤥ᤺ᤳᤋᤡᤴ. ᤁᤢᤏᤧᤖᤧᤳ ᤁᤧᤍᤧᤵᤐᤠ ᤛᤠ᤺ᤴ. ᤁᤢᤛᤥ᤺ᤳᤏᤢ ᤛᤥᤖᤡᤰᤐᤠ ᤏᤧᤵᤔᤠᤱ ᤁᤢᤗᤧᤶᤜᤠ᤹ ᤏᤢ ᤁᤢᤈᤢᤰᤘᤠ ᤗᤧᤵᤔᤠᤱᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤔᤧᤳᤇᤡᤱ॥ 26 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱ ᤁᤧᤕᤠᤰᤐᤠ ᤏᤠ᤹ᤀᤡᤔᤠᤗᤠᤶ ᤂᤧᤸᤗᤧ ᤗᤳᤇᤠ ᤆᤠᤖ᤺ᤵᤐᤠ. ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤗᤳᤇᤠ ᤂᤖᤧ᤺ᤱ ᤏᤢ ᤗᤳᤇᤠ ᤂᤖᤧ᤺ᤱ ᤕᤠᤱᤛᤡᤱᤅᤠᤱ ᤂᤧᤴ ᤛᤠᤛᤥ᤺ᤳᤋᤡᤴ ᤏᤢ ᤆᤢᤰᤘᤠ ᤗᤧᤵᤔᤠᤱᤒᤠ ᤁᤢᤗᤠᤱᤓᤧ᤺ᤸᤗᤧ ᤁᤢᤛᤶᤎᤠᤱ ᤏᤧᤛ᤻ᤛᤢ॥ 27 ᤂᤧᤱᤜᤠ᤹ ᤁᤧᤖᤧᤰ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤏᤧᤛ᤻ᤛᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤌᤠ᤺ᤱ ᤔᤧᤒᤰᤂᤢ॥ 28 ᤂᤧᤴ ᤀᤣᤃᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤕᤠᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤠᤀᤥ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤋᤥ᤺ᤶᤔᤠᤛᤡᤖᤧ ᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ. ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤋᤥ᤺ᤶᤔᤏᤠᤒᤠ ᤜᤧᤰᤁᤣ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤧᤏᤧᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤔᤡᤎᤡᤰᤂᤢ॥ 29 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤱᤒᤧ᤹ᤔᤧᤴᤏᤠᤱ ᤕᤠᤱᤛᤡᤱᤅᤠᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤐᤰᤂᤢ॥ ᤂᤧᤴ ᤆᤠᤜᤣ ᤋᤥ᤺ᤶᤔᤏᤠᤒᤠ ᤔᤧᤸᤗᤢᤰᤗᤠᤶ ᤔᤥᤛᤠ᤺ᤸᤗᤧ ᤁᤢᤄᤥᤔᤠ ᤗᤰ ᤘᤕᤧ॥ 30 ᤂᤧᤒᤩᤠᤱ ᤔᤥᤛᤥ᤺ᤸᤗᤧ ᤔᤠᤱᤌᤥ᤺ᤰᤏᤠ ᤐᤡᤔᤠᤛᤡ ᤁᤢᤓᤠ ᤏᤡ᤺ᤱᤃᤣ᤹ᤈᤡ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤁᤧᤕᤢᤱᤒᤠ ᤔᤠᤰᤂᤡ᤹ᤗᤠᤶᤒᤠ ᤁᤢᤓᤠ ᤕᤠᤱᤛᤡᤱᤅᤠᤱ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤈᤠᤱᤜᤠ᤹ᤀᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ᤀᤥᤀᤠᤱ ᤛᤠᤰᤂᤢ॥ ᤀᤰᤂᤣᤗ᤹ᤖᤡᤰ ᤂᤧᤸᤗᤧ ᤜᤠᤖᤢᤏᤧᤴ ᤂᤢᤏᤧ᤹ ᤁᤢᤈᤠᤱᤜᤠ᤹ᤏᤢ ᤛᤥᤖᤡᤰ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤂᤢᤴᤇᤡ᤹ ᤆᤠᤱᤜᤠ᤹ᤀᤠᤱ ᤋᤥ᤺ᤴᤍᤢ॥ 31 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤔᤧᤳᤋᤢᤛᤡ. “ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤛᤠᤴ ᤌᤥ᤺ᤰᤋᤧᤶᤔᤧ᤹ᤀᤠᤱ ᤆᤩᤧᤶᤔᤧ᤹ ᤂᤧᤒᤩᤠᤱ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤋᤥ᤺ᤶᤏᤠᤛᤡᤸᤗᤧᤒᤠ ᤛᤡᤍᤢᤱᤈᤓᤠᤀᤥᤒᤠ ᤏᤠ᤹ᤀᤡᤔᤥ ᤁᤧᤕᤠᤰᤐᤠ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱᤅᤡᤴᤏᤠᤱ ᤀᤠᤱᤃᤠ᤹ ᤔᤧᤳᤏᤡᤱᤒᤠ ᤜᤧᤰᤁᤣᤀᤣ ᤜᤠᤒᤠ ᤂᤧᤵᤔᤥᤀᤣ ᤆᤧᤶᤔᤧ᤹॥ 32 ᤁᤧᤏᤶᤒᤠ ᤛᤠᤴ ᤏᤢ ᤂᤖᤧ᤺ᤱᤅᤡᤴ ᤔᤡᤎᤡᤰᤂᤧᤶᤍᤣᤛᤧᤶᤔᤧ᤹॥ 33 ᤂᤡᤏᤡ᤹ ᤁᤧᤍᤥ᤺ᤴᤍᤢᤶᤒᤠ ᤕᤧᤴᤏᤡᤴ ᤁᤧᤖᤧᤰ ᤔᤧᤱᤃᤧᤳᤋᤣ ᤌᤠᤖᤡᤰ ᤏᤢᤛᤡ ᤕᤧᤴ ᤌᤧᤶᤒᤠ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤂᤡᤏᤡ᤹ ᤔᤧᤒᤣᤃᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤍᤥ᤺ᤶᤍᤢᤶᤒᤠᤴ ᤏᤢᤛᤡ ᤕᤧᤴ ᤌᤠᤖᤡᤰ ᤐᤳ॥ 34 ᤀᤠᤀᤡᤴ ᤌᤣᤎᤣ ᤐᤥ᤺ᤰᤂᤧᤀᤠᤱ ᤘᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤠᤕᤥᤴ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤜᤠᤒᤠ ᤜᤧᤰᤋᤱᤒᤠᤀᤣ ᤀᤡᤱᤈᤠᤱ ᤆᤥᤃᤢᤀᤠᤱ ᤘᤕᤧ॥ 35 ᤂᤡᤏᤡ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤛᤧᤴᤍᤡᤰ ᤗᤧᤴᤍᤡᤰ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤘᤕᤧᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤆᤥ᤺ᤰᤔᤠ ᤁᤧᤒᤡᤖᤡᤒᤠ ᤕᤠ᤺ᤶᤒᤰᤁᤡᤴ ᤁᤧᤳᤋᤧᤶᤔᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤜᤠᤒᤠ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤠᤱᤅᤠᤱ ᤘᤠ᤹॥” 36 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤒᤠ ᤁᤧᤖᤧᤰ ᤀᤡᤱᤈᤠᤱᤜᤠ᤹ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.