ᤗᤧᤒᤡ 7 - LIFOTNTᤀᤠᤵᤋᤡᤰ ᤛᤡᤍᤢᤱᤈᤓᤠ ᤌᤡᤶᤜᤠ᤹ 1 “‘ᤀᤠᤵᤋᤡᤰ ᤛᤡᤍᤢᤱᤈᤓᤠ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤁᤴ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 2 ᤀᤠᤳᤋᤡᤴ ᤋᤧᤴᤏᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤛᤧᤵᤔᤠ ᤐᤥᤱ᤹. ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤴᤏᤠᤱ ᤀᤠᤶᤓᤠ ᤂᤧᤵᤔᤥ ᤛᤧᤵᤔᤠ ᤐᤥᤱ᤹॥ ᤂᤧᤸᤗᤧ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤜᤢᤱᤔᤠᤍᤣᤔᤠ ᤐᤥᤱ᤹॥ 3 ᤂᤧᤸᤗᤧ ᤁᤧᤖᤧᤰ ᤁᤢᤛᤥ᤺ᤳᤋᤡᤴ. ᤀᤡᤃᤪ ᤁᤢᤔᤡ᤺ᤸᤗᤧ ᤁᤢᤒᤢᤱᤅᤥᤒᤠ ᤁᤢᤛᤥ᤺ᤳᤋᤡᤴ ᤏᤢ ᤁᤢᤜᤡᤍᤢᤳ ᤁᤢᤎᤧᤅᤠᤱ ᤁᤢᤍᤧᤵᤔᤠ ᤁᤢᤛᤥ᤺ᤳᤋᤡᤴ. 4 ᤏᤧᤵᤔᤠᤱ ᤁᤢᤗᤧᤶᤜᤠ᤹ ᤏᤢ ᤂᤧᤸᤗᤧ ᤁᤢᤛᤶᤎᤠᤱᤒᤠ ᤜᤧᤰᤁᤩᤠᤱ ᤁᤢᤃᤧᤱᤅᤥᤒᤠ ᤁᤢᤛᤥ᤺ᤳᤋᤡᤴ. ᤂᤧᤒᤩᤠᤱ ᤁᤢᤗᤧᤶᤔᤡᤴ ᤛᤥᤛᤥᤖᤡᤰ ᤁᤢᤗᤢᤱᤔᤠ᤹ ᤁᤧᤍᤧᤵᤐᤠ ᤛᤠᤴ ᤘᤧ᤺ᤰᤔᤠ ᤗ᤺ᤵᤔᤠᤀᤠᤱ ᤋᤥ᤺ᤶᤔᤠ ᤐᤥᤱ᤹॥ 5 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ॥ ᤁᤴ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥ 6 ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤶᤛᤕᤱᤅᤥᤒᤠ ᤀᤠᤳᤋᤡᤴ ᤕᤧᤶᤒᤡᤳᤇᤠ ᤛᤠ᤺ᤸᤗᤧᤛᤠᤱ ᤂᤧᤴ ᤆᤠᤔᤠ ᤛᤢᤰᤋᤢ᤹॥ ᤁᤖ ᤁᤴ ᤛᤣᤛᤣᤒᤠᤍᤧᤴᤏᤥ ᤆᤖ ᤐᤥᤱ᤹॥ ᤁᤴ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 7 “‘ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤀᤠᤰᤋᤱᤒᤠ ᤆᤥᤰ. ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤴᤏᤠᤱ ᤜᤧᤰᤋᤱᤒᤠᤀᤣ ᤆᤥᤰ॥ ᤂᤧᤸᤗᤧ ᤗᤠᤃᤡ ᤗᤳᤇᤠ ᤛᤠᤶᤕᤥᤌᤡᤶ ᤘᤠ᤹॥ ᤀᤠᤳᤋᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤋᤥ᤺ᤴᤍᤢᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ᤹. ᤂᤧᤴ ᤂᤧᤸᤗᤧᤴᤏᤣ ᤐᤥᤱᤗ॥ 8 ᤀᤠᤳᤋᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤏᤠ᤺ᤸᤗᤧ ᤋᤠᤖᤢᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤢ᤹. ᤂᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤜᤥᤖᤡᤰᤐᤠᤴ ᤜᤠᤒᤠ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧᤴᤏᤣ ᤐᤥᤱᤗ॥ 9 ᤔᤡᤜᤠ᤹ᤗᤢᤱᤅᤥ ᤌᤥ᤺ᤰᤔᤏᤠᤒᤠ. ᤜᤧᤰᤁᤩᤠᤱ ᤂᤖᤧ᤺ᤱ ᤗᤧ᤺ᤱᤔᤠ ᤂᤣ᤺ᤰᤕᤠᤀᤥ ᤏᤢ ᤂᤵᤐᤩᤠᤀᤥ ᤌᤥ᤺ᤰᤔᤏᤠᤒᤠ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤂᤧᤴ ᤁᤧᤍᤥᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧᤴ ᤐᤥᤱᤗ॥ 10 ᤜᤧᤰᤁᤩᤠᤱ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤏᤢ ᤛᤧᤱᤛᤧᤱᤒᤠ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤁᤧᤖᤧᤰᤗᤧ ᤁᤢᤍᤱᤒᤠ ᤔᤧᤄᤥᤛᤢᤖᤖᤥ॥ ᤋᤱᤈᤢᤶ ᤛᤡᤍᤢᤱᤈᤓᤠ ᤌᤡᤶᤜᤠ᤹ 11 “‘ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤋᤥ᤺ᤶᤔᤏᤠᤒᤠ ᤋᤱᤈᤢᤶ ᤛᤡᤍᤢᤱᤈᤓᤠ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— 12 “‘ᤋᤱᤈᤢᤶ ᤛᤡᤍᤢᤱᤈᤓᤠᤴ ᤁᤢᤓᤠᤖᤧ ᤏᤢᤃᤧᤴ ᤐᤡᤖᤢᤖ ᤋᤥ᤺ᤴᤍᤢᤏᤧᤓᤃᤪ ᤏᤡ᤺ᤱᤃᤣ᤹ᤀᤥ ᤛ᤹ᤖᤢᤀᤠᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤆᤠᤖ᤺ᤵᤐᤠ. ᤏᤡ᤺ᤱᤃᤣ᤹ ᤜᤢ᤺ᤵᤔᤏᤠᤒᤠ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ. ᤜᤧᤰᤁᤩᤠᤱ ᤏᤡ᤺ᤱᤃᤣ᤹ᤀᤥ ᤘᤖᤱᤔᤏᤠᤒᤠ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤗᤠᤶ ᤗᤧ᤺ᤱᤔᤏᤠᤒᤠ ᤆᤠᤖ᤺ᤵᤐᤠᤴ ᤋᤥ᤺ᤴᤍᤢᤖ॥ 13 ᤂᤧᤸᤗᤧ ᤂᤢᤏᤧ᤹ ᤏᤢᤃᤧᤴ ᤋᤥ᤺ᤴᤍᤢᤒᤠ ᤋᤱᤈᤢᤶ ᤛᤡᤍᤢᤱᤈᤓᤠ᤺ᤴᤏᤢ ᤁᤧᤓᤱᤒᤠ ᤛᤡᤍᤠ᤹ ᤕᤠᤰᤔᤏᤠᤒᤠ ᤂᤖᤧ᤺ᤱᤅᤡᤴᤏᤠᤱ ᤋᤥ᤺ᤴᤍᤢᤖ॥ 14 ᤂᤧᤱᤜᤠ᤹ᤗᤠᤶ ᤗᤳᤇᤠ ᤗᤳᤇᤠ ᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤂᤧᤸᤗᤧ ᤋᤥ᤺ᤴᤍᤢᤖ॥ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤀᤠᤳᤋᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤛᤠᤰᤂᤢ᤹ ᤂᤧᤴ ᤂᤧᤸᤗᤧᤴᤏᤣ ᤐᤥᤱᤗ॥ 15 ᤏᤢᤃᤧᤴ ᤋᤥ᤺ᤶᤔᤠ ᤋᤱᤈᤢᤶ ᤛᤡᤍᤢᤱᤈᤓᤠ ᤛᤠᤴ ᤂᤧᤴ ᤋᤥ᤺ᤶᤔᤏᤠᤒᤠ ᤕᤧᤴᤏᤥᤀᤣ ᤆᤠᤔᤠ ᤐᤥᤱ᤹. ᤋᤠᤏᤠᤶ ᤌᤠᤖᤡᤰ ᤂᤧᤸᤗᤧ ᤌᤧᤔᤠᤀᤠᤱ ᤔᤧᤏᤴᤇᤢᤴ ᤔᤧᤕᤢᤰᤂᤢᤴᤗ॥ 16 “‘ᤁᤖ ᤋᤥ᤺ᤶᤔᤠ ᤁᤧᤒᤥᤱᤒᤠ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤔᤠᤱᤜᤢᤵᤐᤡᤴ ᤁᤧᤵᤔᤠᤖᤧ ᤗᤠᤃᤡ ᤀᤡᤃᤪ ᤀᤠᤒᤠᤅᤣ ᤏᤡᤱᤘᤠ᤺ᤸᤗᤧ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤏᤧᤓᤃᤪ ᤂᤧᤸᤗᤧ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤒᤠ ᤕᤧᤴᤏᤥᤀᤣ ᤂᤢᤏᤧ᤹ ᤂᤧᤴ ᤆᤖ. ᤂᤧᤒᤩᤠᤱ ᤁᤧᤏᤶᤒᤠᤀᤠᤱ ᤁᤧᤕᤢᤱᤒᤠᤴ ᤁᤢᤍᤠ᤺ᤴᤍᤡᤰᤔᤠ ᤔᤧᤈᤖ॥ 17 ᤀᤠᤴᤇᤡᤴᤍᤠᤴ ᤌᤠᤖᤡᤰ ᤁᤧᤏᤶᤒᤠᤀᤠᤱ ᤁᤧᤕᤢᤱᤒᤠ ᤛᤡᤍᤢᤱᤈᤓᤠ ᤛᤠᤴ ᤆᤠᤜᤣ ᤔᤡᤀᤥ ᤔᤡᤎᤡᤱᤔᤠᤍᤣᤔᤠ ᤐᤥᤱ᤹॥ 18 ᤋᤱᤈᤢᤶ ᤛᤡᤍᤢᤱᤈᤓᤠᤀᤥᤒᤠ ᤛᤠᤴ ᤁᤢᤀᤠᤳᤇᤡᤴᤍᤠ᤺ᤴ ᤁᤢᤓᤠᤖᤧ ᤆᤏᤧᤓᤃᤪ ᤂᤧᤴ ᤛᤠᤴ ᤕᤠᤶᤗᤧ ᤔᤧᤴᤍᤠ᤺ᤰᤔᤏᤠᤒᤠ ᤐᤥᤱ᤹. ᤔᤣ᤺ᤴᤏᤧᤓᤃᤪ ᤂᤧᤸᤗᤧ ᤋᤥ᤺ᤴᤍᤢᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤴᤋᤢᤴ᤹. ᤁᤖ ᤂᤧᤴ ᤀᤠᤛᤢᤳᤌᤥ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤁᤧᤈᤠᤒᤠ ᤔᤏᤠ᤺ᤸᤗᤧ ᤂᤢᤶᤍᤡᤱ ᤂᤥᤛᤢ᤹॥ 19 “‘ᤁᤢᤓᤠ ᤀᤠᤛᤢᤳᤌᤥ ᤌᤣ᤺ᤸᤗᤧᤛᤠᤱ ᤛᤢᤛᤢᤒᤠ ᤛᤠᤴ ᤔᤧᤈᤠᤶᤔᤡᤴᤏᤧ᤹॥ ᤔᤡᤀᤥ ᤂᤧᤴ ᤔᤡᤎᤡᤰᤂᤧᤶᤔᤧ᤹॥ ᤘᤣ᤹ ᤛᤠᤴ ᤆᤠᤀᤣ. ᤀᤠᤰᤂᤧᤶᤔᤩᤠᤰ ᤔᤏᤠ ᤛᤢᤳᤌᤥ ᤔᤧᤘᤠ᤹ ᤂᤧᤱᤜᤠ᤹ᤖᤧ ᤂᤧᤴ ᤆᤠᤔᤠ ᤔᤧᤛᤢᤰᤋᤢ᤹॥ 20 ᤁᤖ ᤂᤢᤏᤧ᤹ ᤀᤠᤛᤢᤳᤌᤥ ᤐᤥᤱᤅᤠᤱ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤛᤠᤴ ᤁᤢᤓᤠᤖᤧ ᤆᤏᤧᤓᤃᤪ ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥ 21 ᤁᤢᤓᤠ ᤔᤏᤠ᤺ᤸᤗᤧ ᤁᤢᤓᤠ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤛᤢᤛᤢ᤹ ᤀᤠᤛᤢᤳᤌᤥ ᤔᤏᤠᤗᤠᤶ ᤁᤧᤗ᤺ᤶᤒᤠ ᤐᤠᤴ ᤀᤠᤛᤢᤛᤢᤒᤠ ᤐᤠᤴ ᤀᤡᤃᤪ ᤀᤠᤛᤢᤳᤌᤥ ᤌᤰᤛᤠᤛᤠᤱ ᤀᤡᤃᤪ ᤂᤠᤶᤒᤠᤱᤅᤥ ᤁᤧᤀᤢ᤺ᤱᤛᤡᤱᤒᤠ ᤘᤣ᤹ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤜᤠ᤹ ᤛᤢᤛᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤛᤠᤴ ᤆᤏᤧᤓᤃᤪ. ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖᤖᤥ॥’” ᤛᤠᤛᤥ᤺ᤳ ᤏᤢ ᤛᤠᤔᤠᤰᤂᤡ᤹ ᤆᤠᤔᤠ ᤔᤧᤏᤢ᤹ᤏᤧᤴ 22 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 23 “ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤛᤧᤃᤶᤒᤠ ᤀᤡᤃᤪ ᤔᤧᤸᤗᤢᤰ ᤁᤡᤃᤪ ᤔᤧ᤺ᤴᤍᤠ᤺ᤸᤗᤧ ᤁᤢᤛᤥᤳ ᤌᤧᤔᤠᤀᤠᤱ ᤔᤧᤈᤠᤶᤔᤡᤴᤏᤧ᤹॥ 24 ᤀᤠᤒᤠᤅᤣ ᤁᤧᤛᤡᤒᤠ ᤏᤢ ᤁᤢᤓᤠ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤓᤢᤕᤢᤀᤠᤱ ᤔᤧᤛᤧᤖᤢᤒᤠ ᤁᤢᤓᤠ ᤌᤰᤛᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤁᤢᤓᤠ ᤘᤣ᤹ ᤕᤠ᤺ᤶᤒᤰᤁᤥ ᤀᤥᤃᤵ ᤁᤧᤈᤥᤃᤢᤶᤔᤡᤸᤗᤧ ᤐᤥᤱ᤹. ᤁᤖ ᤀᤠᤰᤂᤣᤀᤠᤱᤛᤠᤱ ᤂᤧᤴ ᤔᤧᤈᤠᤶᤔᤡᤴᤏᤧ᤹॥ 25 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤀᤠᤳᤋᤡᤴ ᤔᤏᤠ᤺ᤸᤗᤧ ᤆ᤹᤺ ᤂᤧᤴ ᤔᤏᤠᤴ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥ 26 ᤂᤡᤏᤡ᤹ ᤁᤧᤕᤢᤅᤡᤒᤠ ᤀᤠᤳᤋᤡᤴ ᤋᤧᤴᤏᤥᤛᤠᤱ ᤀᤠᤳᤋᤡᤴ ᤐᤢᤛᤠ ᤀᤡᤃᤪ ᤌᤰᤛᤠ᤺ᤸᤗᤧ ᤁᤢᤔᤠᤰᤂᤡ᤹ ᤔᤧᤈᤠᤶᤔᤡᤴᤏᤧ᤹॥ 27 ᤔᤠᤰᤂᤡ᤹ ᤁᤧᤈᤠᤒᤠ ᤀᤠᤳᤋᤡᤴ ᤔᤏᤠ᤺ᤴᤇᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶᤒᤠ ᤂᤧᤴ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥’” 28 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 29 “ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤱᤈᤢᤶ ᤛᤡᤍᤢᤱᤛᤓᤠ ᤁᤧᤍᤥ᤺ᤶᤒᤧᤸᤗᤧ ᤋᤱᤈᤢᤶ ᤛᤡᤍᤢᤱᤈᤓᤠ᤺ᤸᤗᤧ ᤗᤳᤇᤠ ᤁᤢᤗᤰ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤀᤥ ᤋᤠᤖᤢᤖ॥ 30 ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤴ ᤀᤠᤒᤠᤅᤣ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤋᤠᤖᤢᤖ॥ ᤂᤧᤸᤗᤧ ᤛᤠᤛᤥ᤺ᤳᤋᤡᤴ. ᤁᤢᤛᤱᤒᤵᤔᤧᤴᤏᤠᤱ ᤋᤠᤖᤢᤖ. ᤜᤧᤰᤁᤩᤠᤱ ᤁᤢᤛᤱᤒᤧ᤹ᤔᤧᤴ ᤆᤠᤜᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤌᤠ᤺ᤱ ᤐᤰᤂᤢᤖ॥ 31 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠᤛᤥ᤺ᤳᤋᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ. ᤁᤖ ᤁᤢᤛᤱᤒᤵᤔᤧᤴ ᤆᤠᤀᤣ ᤜᤠᤖᤢᤏᤧᤴ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤐᤥᤱ᤹॥ 32 ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤆᤠᤜᤣ ᤂᤡᤏᤡ᤹ ᤀᤠᤒᤠᤅᤣ ᤋᤱᤈᤢᤶ ᤛᤡᤍᤢᤱᤈᤓᤠᤗᤠᤶ ᤜᤢᤰᤘᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤐᤡᤖᤧᤶᤔᤧ᤹॥ 33 ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤀᤥᤗᤠᤶ ᤜᤠ᤺ᤳᤗᤧ ᤋᤱᤈᤢᤶ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤏᤢ ᤁᤢᤛᤥ᤺ᤳᤋᤡᤴ ᤋᤥ᤺ᤴᤍᤢ. ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤂᤧᤸᤗᤧ ᤁᤢᤗᤰ ᤐᤥᤱ᤹॥ 34 ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤱᤈᤢᤶ ᤛᤡᤍᤢᤱᤈᤓᤠᤗᤠᤶᤒᤠ ᤌᤠ᤺ᤱ ᤐᤱᤔᤏᤠᤒᤠ ᤁᤢᤛᤱᤒᤵᤔᤠᤴ ᤏᤢ ᤑᤥ᤺ᤱᤔᤏᤠᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤀᤠᤱᤃᤠ᤹ ᤂᤡᤏᤡ᤹ᤗᤠᤶ ᤕᤠᤱᤛᤡᤱᤅᤠ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤧᤵᤔᤠᤱᤗᤠᤶ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤛᤍᤠᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤠ᤹॥’” 35 ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤀᤠᤳᤋᤡᤴ ᤕᤧᤴᤏᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤋᤠᤰᤑᤠᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤠᤱᤛᤧᤘᤠ ᤆᤥ᤺ᤰᤛᤧ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤛᤡᤀᤠᤱ ᤔᤧᤘᤕᤧ. ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤗᤠᤶ ᤁᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤐᤥ᤺ᤰᤂᤧᤀᤠᤱ ᤘᤕᤧ॥ 36 ᤀᤠᤳᤋᤡᤴ ᤕᤧᤴᤏᤥ ᤂᤢᤏᤧ᤹ ᤂᤧᤱᤜᤠ᤹ ᤔᤠᤱᤌᤥ᤺ᤰᤏᤠ ᤐᤡᤖᤢᤛᤡᤀᤠᤱ ᤘᤕᤧ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰᤁᤣ ᤀᤡᤛᤪᤠᤀᤡᤗᤡᤜᤠ᤹ᤗᤠᤶᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤁᤧᤒᤥᤱᤒᤠ ᤁᤴ ᤗᤰᤁᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤁᤴ ᤛᤍᤠᤍᤡᤱᤒᤠ ᤗᤰ ᤐᤥᤱ᤹॥ 37 ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ. ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ. ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ. ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ॥ 38 ᤂᤧᤴ ᤛᤠᤶᤕᤥᤌᤡᤶᤔᤡᤴ ᤛᤡᤏᤤ ᤁᤥ᤺ᤰᤔᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤐᤡᤖᤢᤀᤠᤱ ᤘᤕᤧ. ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤛᤡᤏᤤᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤛᤡᤍᤢᤱᤈᤓᤠᤜᤠ᤹ ᤂᤢᤏᤧ᤹ᤀᤥ ᤋᤠ᤺ᤵᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.