ᤗᤧᤒᤡ 6 - LIFOTNT1 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤁ᤹ᤕᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤀᤡᤛᤡ᤺ᤰ—ᤁᤢᤓᤠᤖᤧ ᤁᤴ ᤑᤧᤴᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤏᤧᤓᤃᤪ. ᤁᤢᤓᤠᤖᤧ ᤁᤵᤔᤠ ᤔᤧᤒᤡᤖᤢᤒᤠ ᤐᤠ᤺ᤴᤏᤥ. ᤋᤡ᤺ᤰᤁᤥ ᤔᤧᤕᤢᤰᤂᤢᤒᤠ ᤆᤡᤃᤰᤘᤠᤴ ᤂᤢ᤺ᤳᤋᤢ ᤀᤡᤃᤪ ᤂᤢ᤺ᤳᤋᤢᤒᤠ ᤐᤠ᤺ᤴᤏᤥ ᤜᤡᤶᤒᤣᤛᤠᤱᤒᤧᤴ ᤀᤡᤱᤗᤧᤰᤋᤢᤏᤧᤓᤃᤪ. 3 ᤀᤡᤃᤪ ᤁᤧᤔᤠᤒᤠ ᤆᤡᤃᤰᤘᤠᤴ ᤂᤥᤛᤢᤛᤠᤱ ᤀᤡᤱᤗᤧᤰ ᤐᤠ᤺ᤳᤋᤢᤏᤧᤓᤃᤪ. ᤀᤡᤃᤪ ᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤔᤧᤈᤥᤃᤢᤀᤠᤱ ᤔᤧᤒᤵᤐᤠ ᤀᤡᤱᤗᤧᤰ ᤆᤥ᤺ᤰᤔᤠ ᤗᤠᤕᤥᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤜᤧᤰᤛᤡᤱᤏᤧᤓᤃᤪ— 4 ᤀᤠᤸᤗ ᤂᤧᤸᤗᤧ ᤁᤶᤓᤗ᤹ᤖᤡᤰ ᤗᤠᤕᤥ ᤆᤥᤃᤢᤀᤠᤱ ᤀᤠᤵᤋᤡᤰᤛᤠᤒᤠ ᤐᤥ᤺ᤰᤂᤧᤀᤠᤱ ᤘᤠ᤹. ᤂᤧᤒᤩᤠᤱ ᤂᤧᤸᤗᤧ ᤂᤢ᤺ᤳᤋᤢᤒᤠ. ᤋᤣ᤹ᤖᤢᤒᤠ. ᤔᤠ᤹ᤖᤢ ᤁᤳᤋᤢᤒᤠ ᤛᤠᤔᤠ. ᤁᤧᤔᤠᤒᤠ ᤛᤠᤔᤠ ᤂᤥᤛᤢᤒᤠ. 5 ᤀᤡᤃᤪ ᤆᤩᤠᤈᤩᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤸᤗᤧ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤏᤥ ᤔᤠᤱᤜᤧᤰᤛᤡᤱᤅᤠᤱ ᤘᤠ᤹ᤏᤧᤓᤃᤪ. ᤂᤧᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤁᤢᤗᤰ ᤅᤠᤛᤡ ᤕᤥ᤹ᤖᤢᤀᤠᤱ ᤁᤧᤖᤧᤰ ᤏᤢ᤺ᤰᤋᤢᤖ ᤐᤥᤱ᤹॥ ᤂᤧᤸᤗᤧ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤒᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰᤁᤣ ᤂᤧᤴ ᤛᤠᤔᤠ᤺ᤴ ᤜᤠ᤺ᤳᤗᤧ ᤁᤢᤛᤠᤔᤠ ᤘᤕᤧ. ᤂᤢᤏᤧ᤹ᤀᤣ ᤂᤧᤴ ᤏᤢ᤺ᤰᤋᤢᤖ ᤐᤡᤖᤢᤖ ᤐᤥᤱ᤹॥ 6 ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ. ᤀᤡᤃᤪ ᤕᤜᤘᤣ ᤍᤠᤱᤒᤠᤀᤥ ᤕᤠᤖᤢᤒᤠ ᤁᤢᤔᤧᤸᤗᤢᤱ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤀᤠᤵᤋᤡᤰᤁᤡᤸᤗᤧ ᤗᤠᤃᤡ ᤔᤧᤱᤃᤠ᤺ᤶᤔᤏᤠᤒᤠ ᤌᤢ᤺ᤶᤒᤠ ᤌᤡᤰ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤠᤖᤢᤖ ᤐᤥᤱ᤹॥ 7 ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹. ᤜᤧᤰᤁᤩᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤀᤠᤵᤋᤡᤰᤛᤠᤒᤠ ᤐᤥ᤺ᤰᤂᤧᤒᤠ. ᤂᤧᤴ ᤐᤠ᤺ᤴᤏᤥ ᤂᤢᤏᤧ᤹ ᤗᤧᤵᤔᤡ ᤂᤥᤛᤢᤖᤥ॥” ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ 8 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 9 “ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤧᤛᤧ᤹—‘ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤛᤠᤶᤕᤥᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤛᤡᤱᤛᤶᤎᤠᤱ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤋᤠᤏᤠᤶ ᤌᤠᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤏᤧᤖ. ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤔᤡᤴ ᤂᤧ᤹ᤕᤥ ᤋᤡ᤺ᤳᤋᤠᤱ ᤕᤢᤱᤗ॥ 10 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧ ᤁᤢᤈᤠᤱᤅᤡᤴ. ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤛᤡᤃᤠᤱ ᤆᤠᤱᤔᤏᤠᤒᤠ ᤁᤈᤠᤱᤅᤡᤴᤏᤠᤱ ᤁᤢᤎᤰᤁᤥ ᤆᤠᤰᤂᤢ᤹. ᤂᤧᤒᤩᤠᤱ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤔᤡᤎᤡᤰᤂᤢᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤀᤥᤒᤠ ᤂᤠᤵᤐᤢ᤺ᤴ ᤆᤠᤜᤣ ᤂᤧᤸᤗᤧ ᤗ᤺ᤳᤋᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤜᤢᤰᤂᤢᤖ॥ 11 ᤂᤧᤒᤩᤠᤱ ᤂᤧᤸᤗᤧ ᤁᤴ ᤁᤢᤈᤠᤱᤜᤠ᤹ ᤑᤧᤴᤍᤢᤀᤠᤱ ᤘᤣ᤹ ᤆᤠᤱ ᤆᤠᤰᤛᤡᤱᤗ ᤜᤧᤰᤁᤩᤠᤱ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤗᤳᤇᤠ ᤛᤣᤛᤣ ᤛᤠᤱᤛᤠᤱᤒᤠᤍᤧᤴᤏᤥ ᤂᤧᤴ ᤂᤠᤵᤐᤢ᤺ᤴ ᤐᤰᤂᤢ ᤋᤣ᤹ᤖᤢᤖ॥ 12 ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤔᤡᤴ ᤋᤡ᤺ᤳᤋᤠᤱᤅᤣ ᤕᤢᤱᤗ ᤜᤧᤰᤁᤩᤠᤱ ᤂᤧᤴ ᤔᤧᤛᤡᤏᤧᤴᤗ॥ ᤋᤠᤏᤠᤶ ᤌᤰᤔᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤵᤔᤥ ᤛᤡᤱᤜᤠ᤹ ᤕᤥ᤹ᤖᤢᤖ. ᤂᤶᤓᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤔᤡᤀᤥ ᤋᤱᤛᤢᤀᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤋᤱᤈᤢᤶᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤔᤡᤎᤡᤰᤂᤢᤖ॥ 13 ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤆᤰᤔᤧᤸᤗ᤹ᤀᤣ ᤔᤡᤴ ᤋᤡ᤺ᤳᤋᤠᤱᤅᤣ ᤕᤢᤱᤗ. ᤂᤧᤴ ᤀᤠᤓᤧᤸᤗᤧᤀᤠᤱ ᤔᤧᤛᤡᤏᤧᤴᤗᤖᤥ॥ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ 14 “‘ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤛᤠᤶᤕᤥᤌᤡᤶᤔᤡᤴ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤋᤃᤠᤱ ᤗᤧᤵᤔᤠᤱ ᤂᤧᤴ ᤔᤧᤍᤠᤖᤢᤖ॥ 15 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤛᤥ᤺ᤸᤗᤠᤰ ᤌᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤏᤢ ᤜᤢᤰᤐᤰ ᤌᤡᤰ ᤏᤡ᤺ᤱᤃᤣ᤺ᤴ ᤕᤠᤱᤛᤡᤱᤅᤠᤱ ᤁᤧᤖᤧᤰ ᤛᤢᤰᤐᤠᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤔᤠᤖᤧ ᤗᤠᤃᤡ ᤜᤢᤰᤘᤠ ᤜᤧᤰᤋᤱᤒᤠ ᤗᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ॥ 16 ᤁᤧᤏᤶᤒᤠᤴ ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤔᤧᤈᤖᤖᤥ॥ ᤁᤖ ᤗᤳᤇᤠ ᤛᤣᤛᤣᤒᤠᤍᤧᤴᤏᤥ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣ ᤂᤧᤴ ᤔᤧᤈᤖ॥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤰᤂᤢᤶᤔᤥ ᤂᤧᤱᤜᤠ᤹ᤖᤧ ᤂᤧᤴ ᤔᤧᤈᤖ॥ 17 ᤂᤧᤴ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴᤏᤢ ᤌᤥ᤺ᤰᤔᤠ ᤔᤧᤏᤢ᤹ᤏᤧᤴ॥ ᤔᤡᤗᤠᤶ ᤋᤥ᤺ᤶᤔᤏᤠᤒᤠ ᤀᤠᤱᤃᤠ᤹ ᤀᤠᤛᤡᤍᤢᤱᤈᤓᤠᤜᤠ᤹ᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰ ᤜᤧᤰᤋᤱᤒᤠ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹॥ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤏᤢ ᤀᤠᤵᤋᤡᤰᤗᤠᤶ ᤗᤠᤕᤥ ᤂᤥᤔᤠ ᤛᤡᤍᤢᤱᤈᤓᤠ ᤜᤧᤰᤁᤣ ᤂᤧᤴᤏᤠᤱ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 18 ᤜᤠᤖᤢᤏᤧᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤥ ᤀᤠᤳᤋᤡᤴ ᤕᤧᤶᤒᤡᤳᤇᤠ ᤛᤠ᤺ᤸᤗᤧᤛᤠᤱ ᤂᤧᤴ ᤆᤠᤔᤠ ᤛᤢᤰᤋᤢ᤹॥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤀᤥᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤠ᤺ᤰᤁᤥ ᤌᤠᤖᤡᤰ ᤁᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤥᤔᤠ ᤗᤰ ᤐᤥᤱᤗ॥ ᤂᤧᤸᤗᤧ ᤛᤢᤛᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤣᤛᤣ ᤐᤥᤱ᤹॥’” 19 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 20 “ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤏᤡ᤺ᤱᤃᤣᤸᤗᤧ ᤔᤧᤗᤧ᤺ᤰᤋᤢᤛᤡᤀᤠᤱ ᤔᤧᤛᤣ᤺ᤴᤍᤢᤛᤡᤒᤠ ᤕᤧᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤴ ᤀᤠᤶᤓᤠ ᤁᤴᤗᤥ. ᤀᤡᤃᤪ ᤁᤡᤗᤥ ᤌᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ. ᤋᤠᤏᤠᤶ ᤁᤢᤓᤪᤧ᤺ᤰ. ᤕᤢ᤺ᤴᤇᤡᤰ ᤁᤢᤓᤪᤧ᤺ᤰ ᤋᤥ᤺ᤴᤍᤧ᤹॥ ᤀᤠᤸᤗᤀᤠᤱᤎᤥ ᤀᤠᤓᤧᤸᤗᤧᤛᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧ᤹॥ 21 ᤏᤡ᤺ᤱᤃᤣᤴᤏᤢ ᤁᤴ ᤏᤢᤖᤡᤰ ᤑ᤺ᤴᤍᤧ᤹ᤀᤠᤱ ᤂᤖᤧ᤺ᤱ ᤗᤧ᤺ᤱᤔᤠ ᤂᤣ᤺ᤰᤕᤠᤀᤥ ᤗᤧ᤺ᤰᤂᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤜᤧᤰᤁᤣ ᤐᤥᤱᤗ ᤁᤢᤄᤧ᤺ᤱ ᤁᤢᤄᤧ᤺ᤱ ᤆᤥᤃᤧ᤹ᤀᤠᤱ ᤐᤥᤃᤢᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤧ᤹॥ 22 ᤂᤧᤸᤗᤧ ᤁᤢᤛ᤻ᤛᤠᤜᤠ᤹ᤀᤥ ᤀᤠᤳᤋᤡᤴ ᤂᤢᤏᤧ᤹ ᤁᤢᤍᤠᤰᤑᤠᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢ᤹. ᤀᤠᤶᤓᤠ ᤂᤧᤸᤗᤧ ᤁᤴ ᤋᤥ᤺ᤴᤍᤢᤖ॥ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤓᤧᤸᤗᤧᤛᤠᤱ ᤁᤢᤄᤥᤔᤠ ᤗᤰᤗᤥ. ᤜᤧᤰᤁᤩᤠᤱ ᤁᤴ ᤂᤰᤐᤧᤳ ᤔᤡᤎᤡᤱᤔᤠ ᤐᤥᤱ᤹॥ 23 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤋᤥ᤺ᤴᤍᤢᤒᤠ ᤁᤧᤖᤧᤰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤂᤵᤐᤧᤳ ᤔᤡᤎᤡᤱᤔᤠᤍᤣᤔᤠ ᤐᤥᤱ᤹॥ ᤁᤴ ᤆᤠᤔᤠ ᤔᤧᤏᤠ᤹ᤏᤧᤴᤗᤥ॥” ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤌᤡᤶᤜᤠ᤹ 24 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤕᤠᤶᤔᤥ ᤔᤧᤳᤋᤢ. 25 “ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹ ‘ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤠᤶᤕᤥ ᤌᤡᤶᤔᤡᤴ ᤜᤠᤒᤠ ᤁᤴᤗᤥ—ᤀᤠᤳᤋᤡᤴ ᤋᤧᤴᤏᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤛᤧᤵᤔᤠ ᤐᤥᤱ᤹. ᤜᤠᤒᤠ ᤂᤧᤴ ᤋᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤛᤧᤵᤔᤠ ᤐᤥᤱ᤹॥ ᤁᤴ ᤛᤠ᤹ᤖᤡᤰ ᤛᤣᤛᤣᤒᤠ ᤛᤡᤍᤢᤱᤈᤓᤠᤖᤥ॥ 26 ᤁᤴ ᤁᤧᤍᤥᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤴ ᤆᤖ॥ ᤛᤣᤛᤣᤒᤠᤍᤧᤴᤏᤥ. ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤰᤂᤢᤶᤔᤥ ᤔᤧᤈᤖ॥ 27 ᤌᤣ᤺ᤸᤗᤧ ᤂᤧᤴ ᤛᤠᤴ ᤛᤢᤛᤢ᤹. ᤂᤧᤴ ᤛᤣᤛᤣ ᤐᤥᤱ᤹॥ ᤂᤧᤸᤗᤧ ᤁᤢᤔᤠᤰᤂᤡᤸᤗᤧ ᤁᤢᤓᤠ ᤆᤠᤱᤅᤡᤴ ᤐᤡᤳᤋᤢᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤧᤴ ᤔᤠᤰᤂᤡᤸᤗᤧ ᤐᤡᤳᤋᤢᤒᤠ ᤆᤠᤱᤅᤡᤴ ᤁᤢᤓᤠ ᤛᤣᤛᤣᤒᤠᤍᤧᤴᤏᤥ ᤘᤠᤜᤵᤔᤠ ᤐᤥᤱ᤹॥ 28 ᤀᤠᤳᤋᤡᤴ ᤑᤢᤈᤡᤰᤁᤥ ᤂᤧᤴ ᤛᤠᤴ ᤌᤧᤶᤔᤠ ᤐᤥᤱ᤹. ᤂᤧᤴ ᤑᤢᤈᤡᤰᤁᤡᤴ ᤜᤧᤵᤔᤠ ᤐᤥᤱ᤹॥ ᤁᤴ ᤛᤠᤴ ᤁᤠᤛᤠ ᤂᤵᤐᤩᤠᤀᤥ ᤌᤧᤶᤔᤠ ᤐᤥᤱᤏᤧᤓᤃᤪ. ᤂᤧᤴ ᤀᤡ᤺ᤱᤔᤠᤀᤠᤱ ᤆᤫᤠ᤺ᤳᤋᤡᤸᤗᤧ ᤘᤖᤧᤰᤔᤠ ᤐᤥᤱ᤹॥ 29 ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤶᤛᤕᤱᤅᤥᤒᤠ ᤀᤠᤳᤋᤡᤴ ᤕᤧᤶᤒᤡᤳᤇᤠ ᤛᤠ᤺ᤸᤗᤧᤛᤠᤱ ᤂᤧᤴ ᤆᤠᤔᤠ ᤛᤢᤰᤋᤢ᤹॥ ᤁᤴ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 30 ᤁᤖ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤀᤠᤳᤋᤡᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤛᤣᤛᤣᤒᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤔᤧᤍᤠᤖᤢ᤹. ᤂᤧᤴ ᤛᤡᤍᤢᤱᤈᤓᤠᤴ ᤆᤠᤔᤠ ᤔᤧᤏᤢ᤹ᤏᤧᤴ॥ ᤁᤴ ᤔᤡᤀᤥ ᤔᤡᤎᤡᤱᤔᤠᤍᤣᤔᤠᤀᤣ ᤐᤥᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.