ᤗᤧᤒᤡ 5 - LIFOTNT

ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤜᤠ᤹

¹ “‘ᤁᤢᤓᤠ ᤔᤏᤠ᤺ᤸᤗᤧ ᤗᤠᤕᤥ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤧᤏᤡᤒᤠ ᤔᤏᤠᤴ ᤛᤠᤂᤡ ᤐᤥᤱᤅᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤐᤠ᤺ᤵᤔᤠ ᤐᤥᤱᤅᤡᤸᤗᤧᤀᤠᤱ ᤂᤢᤏᤧ᤹ ᤏᤡᤛᤢᤒᤠ ᤏᤢ ᤗᤧᤛᤢᤒᤠ ᤐᤠ᤺ᤴᤏᤡᤴ ᤔᤧᤒᤠ᤺ᤳᤋᤢᤴᤏᤧᤓᤃᤪ. ᤂᤧᤸᤗᤧ ᤗᤠᤃᤡ ᤂᤢᤏᤧ᤹ ᤀᤠᤵᤋᤡᤰᤛᤠᤒᤠ ᤐᤥᤱ᤹॥

² “‘ᤁᤢᤓᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤢᤓᤠ ᤀᤠᤛᤢᤳᤌᤥ ᤐᤠᤴ ᤌᤣᤛᤠᤱ. ᤀᤠᤛᤢᤳᤌᤥ ᤋᤠᤶᤓᤢᤱ ᤌᤰᤛᤠ ᤌᤣᤛᤠᤱ ᤀᤠᤛᤢᤳᤌᤥ ᤜᤡᤱᤔᤏᤠᤒᤠ ᤌᤰᤛᤠ. ᤀᤠᤛᤢᤳᤌᤥ ᤁᤧᤛ᤺ᤴᤇᤡᤱᤒᤠ ᤁᤧᤛᤡᤒᤠ ᤌᤰᤛᤠᤴ ᤛᤢᤛᤢ. ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤏᤡᤱᤘᤠ᤹ ᤔᤧᤄᤥᤛᤢᤴᤇᤠᤱ ᤂᤢᤏᤧ᤹ ᤀᤠᤛᤢᤳᤌᤥ ᤐᤥᤱ᤹. ᤂᤧᤒᤩᤠᤱ ᤀᤠᤵᤋᤡᤰᤛᤠᤒᤠ ᤐᤥᤱ᤹॥

³ “‘ᤁᤢᤓᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤏᤠᤗᤠᤶ ᤁᤧᤗ᤺ᤶᤒᤠ ᤀᤠᤛᤢᤳᤌᤥ ᤀᤠᤈᤥ᤺ᤰᤆᤥ᤺ᤰᤐᤠ ᤐᤠ᤺ᤴᤏᤡᤴ ᤛᤢᤛᤢ᤹ ᤜᤧᤰᤁᤩᤠᤱ ᤂᤧᤴ ᤂᤢᤏᤧ᤹ ᤏᤡᤱᤘᤠ᤹ ᤂᤥᤛᤢᤸᤗᤧ ᤂᤧᤴ ᤀᤠᤵᤋᤡᤰᤛᤠᤒᤠ ᤐᤥᤱ᤹॥

⁴ “‘ᤁᤢᤓᤠᤖᤧ ᤏᤡᤱᤘᤠ᤹ ᤔᤧᤴᤀᤡ᤺ᤳᤇᤡᤱᤅᤣ ᤁᤢᤓᤠ ᤏᤢᤒᤠ ᤀᤡᤃᤪ ᤋᤠᤵᤑᤧ᤺ᤶᤒᤠ ᤐᤠᤴ ᤆᤥ᤺ᤰᤔᤠᤖᤧ ᤗᤠᤃᤡ ᤁᤢᤶᤒᤪᤠ᤺ᤸᤗᤧ ᤔᤠᤱᤜᤧᤰ ᤆᤥᤃᤢ—ᤜᤧᤰᤁᤩᤠᤱ ᤆᤩᤠᤈᤩᤠ ᤐᤠ᤺ᤴᤏᤥ ᤔᤏᤠᤴ ᤏᤡᤱᤘᤠ᤹ ᤔᤧᤴᤀᤡ᤺ᤳᤇᤡᤱᤅᤣ ᤔᤠᤱᤜᤧᤰᤛᤡᤱ᤹—ᤂᤧᤵᤔᤥᤗᤠᤶᤒᤠ ᤂᤧᤴ ᤐᤠ᤺ᤴᤏᤡᤴ ᤏᤡᤔᤧᤎᤠ᤺ᤵᤏᤧᤴᤇᤠᤱ ᤂᤧᤸᤗᤧ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤜᤧᤰᤋᤱᤒᤠ ᤐᤠ᤺ᤴᤏᤥ ᤂᤧᤴ ᤀᤠᤵᤋᤡᤰᤛᤠᤒᤠ ᤐᤥᤱ᤹॥

⁵ “‘ᤁᤢᤓᤠ ᤔᤏᤠ᤺ᤸᤗᤧ ᤀᤠᤵᤋᤡᤰᤛᤠᤒᤠᤀᤠ ᤑᤠ᤹ᤀᤠᤱ ᤂᤧᤴ ᤁᤢᤓᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤂᤥᤛᤢᤏᤧᤓᤃᤪ ᤂᤢᤏᤧ᤹ ᤆᤥᤃᤢᤒᤠ ᤗᤠᤕᤥᤀᤥ ᤂᤢᤏᤧ᤹ ᤋᤧᤴᤗ ᤐᤥᤱ᤹॥

⁶ ᤂᤧᤸᤗᤧ ᤆᤥᤃᤢᤒᤠ ᤂᤧᤴ ᤗᤠᤕᤥᤸᤗᤧ ᤂᤢᤶᤍᤡᤱᤅᤡᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤌᤰᤛᤠ ᤗᤢᤵᤐᤥᤗᤠᤶ ᤔᤧᤸᤗᤢᤰ ᤀᤡᤃᤪ ᤁᤢᤶᤔᤠᤔᤠ ᤔᤧ᤺ᤴᤍᤠᤈᤩᤠ᤺ᤰ ᤌᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤧᤸᤗᤧ ᤋᤠᤖᤢᤖ ᤐᤥᤱ᤹॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤸᤗᤧ ᤁᤢᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹॥

⁷ “‘ᤔᤧ᤺ᤴᤍᤠᤈᤩᤠ᤺ᤰ ᤋᤠ᤺ᤵᤔᤠ ᤂᤧᤸᤗᤧ ᤔᤧᤛᤢᤰᤋᤢᤴᤏᤧᤓᤃᤪ. ᤂᤧᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤂᤧᤴ ᤗᤠᤕᤥᤸᤗᤧ ᤂᤢᤶᤍᤡᤱᤅᤡᤸᤗᤧ ᤗᤠᤃᤡ ᤏᤧᤳᤇᤡ ᤛᤠᤵᤐᤧᤳᤋᤪᤢ᤺ᤰᤔᤠ ᤀᤡᤃᤪ ᤐᤧᤷᤘᤠ᤺ᤸᤗᤧ ᤁᤢᤛ᤻ᤛᤠ ᤏᤧᤳᤇᤡ ᤕᤜᤘᤣ ᤍᤠᤱᤒᤠᤀᤥ ᤋᤠᤖᤢᤛᤡᤖ—ᤗᤳᤇᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤏᤢ ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤐᤥᤱᤗ॥

⁸ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤂᤧᤱᤜᤠ᤹ ᤋᤠᤖᤢᤛᤡᤖ॥ ᤂᤧᤸᤗᤧ ᤗᤳᤇᤠ ᤆᤠᤜᤣ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤋᤃᤡ ᤋᤥ᤺ᤴᤍᤢ᤹॥ ᤂᤢᤏᤧ᤹ ᤂᤧᤸᤗᤧ ᤁᤢᤛᤡᤳᤗᤠᤀᤥ ᤋᤧᤶᤛᤢᤀᤠᤱ ᤂᤀᤡᤰ ᤀᤡᤃᤢᤖ. ᤁᤖ ᤂᤧᤴ ᤛᤩᤠᤰ ᤔᤧᤓᤢ᤹ᤖᤢᤴ ᤔᤧᤍᤣᤛᤢᤴᤗ॥

⁹ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤓᤠ ᤛᤠᤰᤂᤢᤖ. ᤜᤧᤰᤁᤩᤠᤱ ᤁᤧᤏᤶᤒᤠ ᤁᤢᤔᤠᤰᤂᤡᤴᤃ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤠᤶᤗᤧᤱᤒᤥ ᤇ᤻ᤘᤠ᤺ᤰ ᤜᤢᤰᤂᤢᤍᤣᤛᤢᤖ॥ ᤁᤴ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥

¹⁰ ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤛᤠᤶᤕᤥᤛᤠᤰᤌᤡᤶ ᤁᤢᤀᤡᤛᤡᤰ ᤋᤥ᤺ᤴᤍᤢ᤹॥ ᤂᤧᤸᤗᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤗᤠᤃᤡ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤒᤩᤠᤱ ᤂᤧᤸᤗᤧ ᤗᤧᤵᤔᤡ ᤂᤥᤛᤢ᤹॥

¹¹ “‘ᤁᤖ ᤏᤧᤳᤇᤡ ᤛᤠᤵᤐᤧᤳᤋᤪᤢ᤺ᤰᤔᤠ ᤀᤡᤃᤪ ᤐᤧᤷᤘᤠ ᤆᤩᤠ᤺ᤰ ᤏᤧᤳᤇᤡ ᤋᤠ᤺ᤵᤔᤠᤀᤠᤱ ᤔᤧᤛᤢᤰᤋᤢᤴᤏᤧᤓᤃᤪ. ᤂᤧᤸᤗᤧ ᤌᤧᤔᤠ ᤐᤠ᤺ᤴᤏᤥ ᤗᤠᤕᤥ ᤆᤥᤃᤢ. ᤂᤧᤸᤗᤧ ᤗᤠᤃᤡ ᤂᤢᤏᤧ᤹ ᤜᤢᤰᤘᤠ ᤁᤢᤀᤡᤛᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤡᤗᤥᤎᤡᤰ ᤆᤢᤴᤈᤢᤶᤒᤠ ᤑᤣ᤹ᤖᤢᤶ ᤋᤠᤖᤢᤖ॥ ᤂᤧᤸᤗᤧ ᤂᤧᤵᤔᤥ ᤏᤡ᤺ᤱᤃᤣ᤹ ᤏᤢ ᤛᤢᤰᤐᤠ ᤕᤠᤰᤔᤠ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤁᤴ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥

¹² ᤂᤢᤏᤧ᤹ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠᤖᤢᤖ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤵᤔᤥᤗᤠᤶ ᤜᤢᤰᤘᤠ ᤁᤢᤀᤡᤛᤡᤰ ᤛᤥ᤺ᤸᤗᤠᤰ ᤌᤡᤰ ᤕᤠᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤛᤶᤎᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤢᤰᤂᤢᤖ॥ ᤁᤴ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥

¹³ ᤂᤧᤸᤗᤧ ᤂᤧᤴ ᤐᤠ᤺ᤴᤜᤠ᤹ᤀᤥᤒᤠ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤗᤠᤕᤥ ᤆᤥᤃᤢᤀᤠᤱ ᤘᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤕᤥᤴ ᤗᤧᤵᤔᤡ ᤐᤥᤱ᤹॥ ᤁᤧᤏᤶᤒᤠ ᤛᤡᤍᤢᤱᤈᤓᤠᤴ ᤆᤠᤜᤣ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤜᤧᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰ ᤐᤥᤱᤗᤥ॥’”

ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ

¹⁴ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤰᤂᤣ ᤔᤧᤳᤋᤢ.

¹⁵ “ᤁᤢᤓᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤐᤠ᤺ᤴᤜᤠ᤹ ᤐᤡᤔᤠ ᤏᤡᤱᤘᤠ᤹ ᤑᤣ᤺ᤳᤇᤢᤀᤠᤱ ᤔᤧᤴᤏᤡ ᤔᤧᤴᤎᤠ ᤗᤠᤕᤥ ᤆᤥᤃᤢᤸᤗᤧ ᤂᤧᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤛᤣᤛᤣᤍᤧᤴᤏᤥᤒᤠ ᤛᤣᤁᤣᤗ ᤂᤠᤏᤡ᤺ᤳ ᤁᤢᤀᤡᤛᤡᤰ ᤌᤢ᤺ᤶᤒᤠ᤺ᤸᤗᤧ ᤁᤢᤔᤧᤸᤗᤢᤱ ᤁᤢᤀᤡᤛᤡᤰ ᤕᤠᤖᤢᤒᤠ ᤌᤰᤛᤠ ᤗᤢᤵᤐᤥᤗᤠᤶ ᤔᤧᤱᤃᤠ᤺ᤶᤔᤏᤠᤒᤠ ᤌᤢ᤺ᤶᤒᤠ᤺ᤴ ᤂᤢᤏᤧ᤹ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱᤅᤡᤸᤗᤧ ᤁᤢᤗᤧᤰᤘᤠᤀᤥ ᤋᤠ᤺ᤵᤔᤠ ᤐᤥᤱ᤹॥ ᤁᤱᤃ ᤛᤠᤶᤒᤠᤴ ᤜᤢᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤥ॥

¹⁶ ᤂᤧᤸᤗᤧ ᤀᤠᤳᤋᤡᤴ ᤛᤣᤛᤣ ᤐᤠ᤺ᤴᤏᤡᤴ ᤆᤥ᤺ᤰᤔᤠ ᤔᤧᤃᤧᤳᤋᤢᤴᤏᤠᤱ ᤘᤠ᤹ ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤜᤢᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤅᤠᤛᤡᤃᤣᤰᤐᤠ ᤁᤢᤗᤰ ᤀᤠᤸᤗᤛᤠᤱ ᤜᤢᤱᤔᤠ ᤐᤥᤱ᤹. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤂᤧᤴ ᤁᤧᤖᤧᤰ ᤐᤡᤔᤠ ᤐᤥᤱ᤹॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤌᤢ᤺ᤶᤒᤠ᤺ᤴ ᤗᤠᤶᤒᤠ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤕᤥᤴ ᤗᤧᤵᤔᤡ ᤐᤥᤱ᤹॥

¹⁷ “ᤕᤜᤘᤣ ᤍᤠᤱᤒᤧᤸᤗᤧ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠ ᤁᤢᤓᤠ ᤐᤠ᤺ᤴᤜᤠ᤹ ᤆᤥᤃᤢᤀᤠᤱ ᤁᤢᤓᤠ ᤔᤏᤠ᤺ᤸᤗᤧ ᤗᤠᤕᤥ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤴ ᤂᤢᤏᤧ᤹ ᤏᤡᤱᤘᤠ᤹ ᤔᤧᤄᤥᤛᤢᤴᤇᤠᤱ ᤂᤢᤏᤧ᤹ ᤀᤠᤵᤋᤡᤰᤛᤠᤒᤠ ᤐᤥᤱ᤹ ᤜᤧᤰᤁᤩᤠᤱ ᤂᤧᤸᤗᤧ ᤂᤢᤶᤍᤡᤱ ᤂᤥᤛᤢ᤹॥

¹⁸ ᤕᤠᤖᤢᤒᤠ ᤁᤢᤔᤧᤸᤗᤢᤱ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤎᤰᤛᤠ ᤗᤢᤵᤐᤥᤗᤠᤶ ᤁᤢᤗᤠᤱ ᤔᤧᤴᤇᤰᤔᤏᤠᤒᤠ ᤔᤧᤱᤃᤠ᤺ᤶᤔᤏᤠᤒᤠ ᤌᤢ᤺ᤶᤒᤠ ᤌᤡᤰ ᤂᤢᤏᤧ᤹ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠᤖᤢᤖ॥ ᤂᤧᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤧᤴᤏᤡ ᤔᤧᤴᤎᤠ ᤆᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤕᤥᤴ ᤗᤧᤵᤔᤡ ᤐᤥᤱ᤹॥

¹⁹ ᤁᤴ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤥᤃᤢᤒᤠ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤥ॥”