ᤗᤧᤒᤡ 4 - LIFOTNTᤔᤧᤴᤏᤡ ᤔᤧᤴᤎᤠ ᤁᤧᤒᤥᤱᤒᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤠᤸᤗ ᤕᤜᤘᤣ ᤍᤠᤱᤒᤠᤸᤗᤧ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠ ᤁᤢᤓᤠ ᤐᤠ᤺ᤴᤏᤥ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣ ᤀᤠᤳᤋᤡᤸᤗᤧ ᤗᤠᤕᤥ ᤆᤥᤃᤢ᤹— 3 “‘ᤁᤢᤓᤠ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤗᤠᤕᤥ ᤆᤥᤃᤢᤀᤠᤱ ᤔᤏᤠᤜᤠ᤹ᤀᤥ ᤀᤠᤵᤋᤡᤰ ᤋᤠᤖᤢᤏᤧᤓᤃᤪ ᤂᤧᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤗᤠᤕᤥᤸᤗᤧ ᤗᤠᤃᤡ ᤁᤢᤗᤠᤱ ᤔᤧᤴᤇᤰᤔᤏᤠᤒᤠ ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ ᤋᤠᤖᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ॥ 4 ᤂᤢᤏᤧ᤹ ᤂᤧᤴ ᤛᤧᤃᤶᤒᤠᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤡᤸᤗᤧ ᤁᤢᤕᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤠᤖᤢᤖ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤀᤠᤱ ᤂᤧᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤛᤧᤖᤢᤖ॥ 5 ᤜᤧᤰᤁᤩᤠᤱ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤛᤧᤃᤶᤒᤠᤸᤗᤧ ᤁᤢᤔᤠᤰᤂᤡᤴ ᤋᤣ᤹ᤖᤢᤀᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤋᤠᤖᤢᤖ॥ 6 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤢᤰᤆᤥ᤺ᤴ ᤔᤠᤰᤂᤡ᤹ᤀᤥ ᤜᤢᤶᤛᤢᤀᤠᤱ ᤂᤧᤴ ᤔᤠᤰᤂᤡ᤹ᤀᤥᤗᤠᤶ ᤛᤣᤛᤣᤍᤧᤴᤏᤥᤒᤠ ᤑᤥ᤺ᤴᤍᤠ᤺ᤸᤗᤧ ᤁᤢᤍᤃᤡ ᤗᤧᤵᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤣᤛᤠᤱ ᤏᤢᤛᤡᤗᤧᤱ ᤌᤠᤖᤡᤰ ᤛᤠᤰᤂᤢᤖ॥ 7 ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤁᤧᤕᤢᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤗᤧᤳᤋᤡ ᤋᤥ᤺ᤴᤔᤠᤍᤧᤴᤏᤥᤒᤠ ᤋᤠᤱᤜᤠ᤹ᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤣᤛᤠᤱ ᤂᤧᤴ ᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤋᤠᤖᤢᤖ. ᤜᤧᤰᤁᤩᤠᤱ ᤛᤧᤃᤶᤒᤠᤸᤗᤧ ᤁᤧᤏᤶᤒᤠ ᤁᤢᤔᤠᤰᤂᤡᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢᤖ॥ 8 ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠᤸᤗᤧ ᤁᤢᤛᤥ᤺ᤳᤋᤡᤴ ᤁᤧᤖᤧᤰ ᤂᤢᤏᤧ᤹ ᤂᤧᤵᤔᤥᤏᤢ ᤗ᤺ᤳᤋᤢᤖ. ᤁᤢᤜᤡᤍᤢᤳ ᤁᤢᤎᤧᤃᤠᤱ ᤁᤧᤍᤧᤵᤐᤠ ᤁᤢᤛᤥ᤺ᤳᤋᤡᤴ ᤏᤢ ᤁᤢᤜᤡᤍᤢ᤺ᤳᤋᤡᤸᤗᤧ ᤁᤢᤛᤶᤎᤠᤱᤒᤠ ᤁᤢᤛᤥ᤺ᤳᤋᤡᤴ. 9 ᤏᤧᤵᤔᤠᤱ ᤁᤢᤗᤧᤶᤜᤠ᤹ ᤏᤢ ᤂᤧᤸᤗᤧ ᤁᤢᤛᤶᤎᤠᤱᤒᤠ ᤜᤧᤰᤁᤩᤠᤱ ᤁᤢᤃᤧᤱᤅᤥᤒᤠ ᤁᤢᤛᤥ᤺ᤳᤋᤡᤴ ᤏᤢ ᤁᤢᤗᤧᤶᤜᤠ᤹ᤏᤢ ᤛᤥᤖᤡᤰ ᤁᤢᤗᤢᤱᤔᤠ᤹ ᤁᤧᤍᤧᤵᤐᤠ ᤛᤠᤴ ᤂᤧᤸᤗᤧ ᤘᤧᤃᤢ ᤗ᤺ᤳᤋᤢᤖ॥ 10 ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤛᤧᤵᤔᤏᤠᤒᤠ ᤌᤰᤛᤠᤀᤥᤗᤠᤶ ᤁᤢᤛᤥ᤺ᤳᤋᤡᤴ ᤗ᤺ᤵᤔᤏᤠᤒᤠ ᤜᤧᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤗ᤺ᤳᤋᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤍᤣᤛᤢᤖ. 11 ᤁᤖ ᤛᤧᤃᤶᤒᤠᤸᤗᤧ ᤁᤢᤜᤥᤖᤡᤰᤐᤠᤴ. ᤂᤧᤴ ᤁᤧᤖᤧᤰ ᤛᤠ᤺ᤴ. ᤁᤢᤎᤧ᤺ᤰᤁᤡᤴ. ᤁᤢᤗᤠᤱᤜᤠ᤹ ᤏᤢ ᤁᤢᤜᤡᤍᤢᤳ ᤁᤢᤎᤧᤃᤠᤱ ᤁᤢᤜᤡ᤺ᤴ ᤛᤥᤛᤥᤖᤡᤰ. 12 ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤛᤧᤃᤶᤒᤧᤸᤗᤧ ᤁᤢᤈᤰᤋᤠ ᤁᤢᤗᤧᤶᤍᤠᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤂᤠᤵᤐᤢ ᤗᤠᤵᤑᤢᤔᤠ ᤆᤰᤂᤥᤒᤠᤍᤧᤴᤏᤥ ᤋᤣ᤹ᤖᤢᤖ ᤜᤧᤰᤁᤩᤠᤱ ᤛᤡᤱᤅᤡᤸᤗᤧ ᤁᤢᤛᤶᤎᤠᤱ ᤏᤧᤛ᤻ᤛᤢᤀᤠᤱ ᤔᤡᤀᤥ ᤔᤡᤎᤡᤰᤂᤢᤖ—ᤀᤠᤳᤋᤡᤍᤡ ᤂᤠᤵᤐᤢ ᤗᤠᤵᤑᤢᤔᤠᤍᤧᤴ ᤏᤧ. ᤂᤧᤵᤔᤥᤀᤣ ᤂᤧᤴ ᤔᤡᤎᤡᤰᤂᤢᤖ॥ 13 “‘ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹ᤏᤧᤓᤃᤪ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠ ᤗᤳᤇᤠ ᤐᤠᤴ ᤔᤧᤈᤥᤃᤢᤀᤠᤱ ᤘᤠ᤹ᤏᤧᤓᤃᤪ. ᤂᤧᤴ ᤐᤠ᤺ᤴᤏᤡᤴ ᤂᤧᤴ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤡᤰᤛᤠᤀᤥ ᤏᤡᤔᤧᤎᤠ᤺ᤵᤏᤧᤴᤇᤠᤱ ᤁᤴᤜᤠ᤹ ᤀᤠᤵᤋᤡᤰᤛᤠᤒᤠ ᤔᤧᤒᤥᤱ᤹॥ 14 ᤁᤴᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤧᤴ ᤗᤳᤇᤠ ᤗᤠᤕᤥᤴ ᤀᤥᤛᤣ᤺ᤴᤎᤠᤱ ᤐᤥᤱᤅᤡᤸᤗᤧ ᤛᤱᤈᤢᤶᤓᤥᤒᤠᤜᤠ᤹ᤖᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤛᤧᤃᤶᤒᤠᤴ ᤋᤠ᤺ᤵᤔᤠᤀᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤜᤡᤶᤔᤡᤸᤗᤧ ᤁᤢᤍᤃᤡ ᤋᤥ᤺ᤶᤔᤠ ᤐᤥᤱ᤹॥ 15 ᤛᤱᤈᤢᤶᤓᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤛᤧᤃᤶᤒᤠᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤏᤧᤛ᤻ᤛᤢᤖ ᤜᤧᤰᤁᤩᤠᤱ ᤂᤧᤴ ᤛᤧᤃᤶᤒᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤛᤧᤖᤢᤖ॥ 16 ᤂᤧᤴ ᤀᤣᤃᤠᤱ ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤛᤧᤃᤶᤒᤠᤸᤗᤧ ᤁᤢᤔᤠᤰᤂᤡᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤋᤠᤖᤢᤖ॥ 17 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤠᤒᤠᤅᤣ ᤁᤢᤜᤢᤰᤆᤥ᤺ᤴ ᤔᤠᤰᤂᤡ᤹ᤀᤥ ᤏᤡ᤺ᤵᤛᤢᤀᤠᤱ ᤂᤧᤴ ᤔᤠᤰᤂᤡᤴ ᤑᤥ᤺ᤴᤍᤠ᤺ᤸᤗᤧ ᤁᤢᤍᤃᤡ ᤗᤧᤵᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤏᤢᤛᤡᤗᤧᤱ ᤌᤠᤖᤡᤰ ᤛᤠᤰᤂᤢᤖ॥ 18 ᤂᤧᤴ ᤀᤣᤃᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤁᤧᤕᤢᤱᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤋᤠᤱᤜᤠ᤹ᤀᤥ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤜᤢ᤺ᤳᤋᤢᤖ. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤏᤶᤒᤠ ᤔᤠᤰᤂᤡᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢᤖ॥ 19 ᤂᤧᤸᤗᤧ ᤁᤧᤖᤧᤰ ᤁᤢᤛᤥ᤺ᤳᤋᤡᤴ ᤂᤢᤏᤧ᤹ ᤂᤧᤵᤔᤥᤗᤠᤶ ᤗ᤺ᤳᤋᤢᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ॥ 20 ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠᤸᤗᤧ ᤗᤠᤃᤡ ᤂᤧᤸᤗᤧ ᤌᤧᤔᤠ ᤆᤥᤃᤢᤀᤠᤱ ᤘᤕᤧ ᤁᤴ ᤛᤧᤃᤶᤒᤠᤸᤗᤧ ᤗᤠᤃᤡᤀᤠᤱ ᤂᤢᤏᤧ᤹ ᤜᤧᤰᤁᤣᤀᤣ ᤆᤥᤃᤢᤖ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢ ᤐᤡᤖᤢᤛᤡᤖ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤧᤵᤔᤡ ᤔᤧᤄᤥᤛᤢ᤹॥ 21 ᤂᤧᤸᤗᤧ ᤂᤧᤴ ᤛᤧᤃᤶᤒᤠᤴ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤋᤣ᤹ᤖᤢᤀᤠᤱ ᤋᤃᤡᤒᤠᤴ ᤔᤡᤎᤡᤰᤂᤢᤒᤠ ᤜᤧᤰᤁᤣᤀᤣ ᤔᤡᤎᤡᤰᤂᤢᤖ॥ ᤛᤱᤈᤢᤶᤓᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤴ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥ 22 “‘ᤀᤠᤸᤗ ᤁᤢᤓᤠ ᤕᤢᤰᤛᤠᤒᤠᤸᤗᤧ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣ ᤗᤠᤕᤥ ᤆᤥᤃᤢ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤂᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤀᤥ ᤁᤢᤓᤠ ᤐᤠᤴ ᤆᤥᤃᤢᤏᤧᤓᤃᤪ. ᤂᤧᤴ ᤀᤠᤵᤋᤡᤰᤛᤠᤒᤠ ᤐᤥᤱ᤹॥ 23 ᤂᤧᤸᤗᤧ ᤆᤥᤃᤢᤒᤠ ᤗᤠᤕᤥᤴ ᤂᤢᤏᤧ᤹ᤀᤥ ᤀᤥᤛᤣ᤺ᤴᤎᤠᤱ ᤐᤥᤱᤅᤡᤸᤗᤧ. ᤂᤧᤸᤗᤧ ᤗᤳᤇᤠ ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠᤎᤡᤰ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤋᤠᤖᤢᤖ ᤐᤥᤱ᤹॥ 24 ᤂᤧᤸᤗᤧ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤖ. ᤜᤧᤰᤁᤩᤠᤱ ᤀᤠᤳᤋᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤰᤛᤠᤴ ᤔᤧᤛᤧᤖᤢ᤹. ᤂᤧᤵᤔᤥᤀᤣ ᤂᤧᤴ ᤔᤧᤛᤧᤖᤢᤖ॥ ᤂᤧᤴᤃ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤥ॥ 25 ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤠᤵᤑᤣᤰ ᤁᤢᤜᤢᤰᤆᤥ᤺ᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤋᤠᤱᤜᤠ᤹ ᤜᤢ᤺ᤳᤋᤢᤖ. ᤜᤧᤰᤁᤩᤠᤱ ᤁᤧᤏᤶᤒᤠ ᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢᤖ॥ 26 ᤂᤧᤸᤗᤧ ᤁᤧᤖᤧᤰ ᤁᤢᤛᤥ᤺ᤳᤋᤡᤴᤏᤠᤱ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤁᤢᤀᤡᤛᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤸᤗᤧ ᤔᤡᤎᤡᤰᤂᤢᤖ॥ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤕᤢᤰᤛᤠᤒᤧᤸᤗᤧ ᤁᤢᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤆᤥ᤺ᤰᤔᤠ ᤐᤡᤔᤠ ᤕᤠ᤺ᤶᤒᤰ ᤆᤥᤃᤢ ᤐᤡᤖᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤛᤢ᤹॥ 27 “‘ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ᤀᤥᤗᤠᤶ ᤁᤢᤓᤠᤖᤧ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤴᤈᤥ᤺ᤰᤁᤣ ᤗᤠᤕᤥ ᤆᤥᤃᤢ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤀᤥᤒᤠ ᤁᤢᤓᤠ ᤐᤠᤴ ᤆᤥᤃᤢᤏᤧᤓᤃᤪ. ᤂᤧᤴ ᤀᤠᤵᤋᤡᤰᤛᤠᤒᤠ ᤐᤥᤱ᤹॥ 28 ᤂᤢᤏᤧ᤹ ᤆᤥᤃᤢᤒᤠ ᤂᤧᤴ ᤗᤠᤕᤥᤴ ᤂᤢᤏᤧ᤹ ᤁᤢᤗᤠᤃᤡ ᤀᤥᤛᤣ᤺ᤴᤎᤠᤱ ᤐᤥᤱᤅᤡᤸᤗᤧ. ᤂᤧᤸᤗᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤗᤠᤃᤡ ᤜᤢᤰᤘᤠ ᤁᤢᤀᤡᤛᤡᤰ ᤁᤢᤗᤠᤱ ᤔᤧᤴᤇᤰᤔᤏᤠ ᤔᤧᤱᤃᤠ᤺ᤶᤏᤠ ᤁᤢᤶᤔᤠᤔᤠ ᤔᤧ᤺ᤴᤍᤠᤎᤡᤰ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤠᤖᤢᤖ ᤐᤥᤱ᤹॥ 29 ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤖ. ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤍᤧᤴᤏᤥ ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤂᤧᤴ ᤛᤡᤍᤢᤱᤈᤓᤠᤴ ᤛᤧᤖᤢᤖ॥ 30 ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤠᤵᤑᤣᤰ ᤁᤢᤜᤢᤰᤆᤥ᤺ᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤋᤠᤱᤜᤠ᤹ᤀᤥ ᤜᤢ᤺ᤳᤋᤢᤖ. ᤂᤧᤒᤩᤠᤱ ᤁᤧᤏᤶᤒᤠ ᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢᤖ॥ 31 ᤂᤧᤸᤗᤧ ᤁᤧᤖᤧᤰ ᤁᤢᤛᤥ᤺ᤳᤋᤡᤴ ᤋᤱᤈᤢᤶᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴ ᤜᤧᤰᤁᤣ ᤂᤧᤸᤗᤧ ᤗ᤺ᤳᤋᤢᤖ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤴ ᤔᤡᤎᤡᤰᤂᤢᤖ ᤜᤧᤰᤁᤩᤠᤱ ᤂᤧᤴ ᤁᤢᤏᤠᤶᤃᤧᤏᤢ᤹ᤒᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤁᤢᤏᤡᤱᤘᤠ᤹ ᤋᤠᤛᤢ ᤐᤡᤖᤢ॥ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹. ᤂᤧᤒᤩᤠᤱ ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤛᤢ᤹॥ 32 “‘ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠᤖᤧ ᤗᤠᤃᤡ ᤔᤧᤸᤗᤢᤰᤛᤠ᤺ᤳᤋᤡᤴ ᤂᤢᤏᤧ᤹ ᤜᤢᤰᤘᤠ ᤜᤧᤰᤁᤣ ᤋᤠᤖᤢᤏᤧᤓᤃᤪ ᤔᤧᤱᤃᤠ᤺ᤶᤏᤠ ᤁᤢᤶᤔᤠᤔᤠ ᤔᤧᤸᤗᤢᤰ ᤆᤩᤠ᤺ᤰᤌᤡᤰ ᤋᤠᤖᤢᤖ॥ 33 ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤖ. ᤜᤧᤰᤁᤩᤠᤱ ᤀᤠᤳᤋᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤌᤰᤛᤠᤴ ᤔᤧᤛᤧᤖᤢ᤹. ᤀᤠᤶᤓᤠ ᤂᤧᤵᤔᤥᤀᤣ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠᤖᤧ ᤗᤠᤃᤡ ᤂᤧᤴ ᤔᤧᤛᤧᤖᤢᤖ॥ 34 ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤢᤰᤆᤥ᤺ᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤓᤠ ᤁᤢᤔᤠᤰᤂᤡ᤹ᤈᤡ ᤕᤠᤱᤛᤡᤱᤅᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤋᤠᤱᤜᤠ᤹ᤀᤥ ᤜᤢ᤺ᤳᤋᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤁᤧᤏᤶᤒᤠ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤢᤱᤅᤥ ᤜᤢᤰᤂᤢᤖ॥ 35 ᤂᤧᤸᤗᤧ ᤁᤧᤖᤧᤰ ᤁᤢᤛᤥ᤺ᤳᤋᤡᤴ ᤋᤱᤈᤢᤶᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤸᤗᤢᤰᤛᤠ᤺ᤳᤋᤡᤸᤗᤧ ᤁᤢᤛᤥ᤺ᤳᤋᤡᤴ ᤁᤢᤀᤡᤛᤡᤰ ᤂᤧᤸᤗᤧ ᤘᤧᤃᤢ ᤗ᤺ᤳᤋᤢᤖ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤴ ᤔᤡᤗᤠᤶᤒᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ॥ ᤁᤶᤓᤗ᤹ᤖᤡᤰ ᤂᤧᤸᤗᤧ ᤆᤥᤃᤢᤒᤠ ᤁᤢᤗᤠᤕᤥᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤢᤏᤧ᤹ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹. ᤂᤧᤒᤩᤠᤱ ᤂᤧᤸᤗᤧ ᤗᤧᤵᤔᤡ ᤂᤥᤛᤢᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.