ᤗᤧᤒᤡ 3 - LIFOTNT

ᤋᤱᤈᤢᤶ ᤛᤡᤍᤢᤱᤈᤓᤠ

¹ “‘ᤁᤢᤓᤠᤖᤧ ᤋᤥ᤺ᤴᤍᤢᤒᤠ ᤜᤢᤰᤘᤠᤴ ᤋᤱᤈᤢᤶ ᤛᤡᤍᤢᤱᤈᤓᤠᤏᤧᤓᤃᤪ. ᤜᤧᤰᤁᤩᤠᤱ ᤂᤧᤸᤗᤧ ᤐᤡᤳᤜᤠ᤹ᤗᤠᤶ ᤁᤢᤓᤠ ᤗᤳᤇᤠ ᤁᤢᤶᤒᤠᤒᤠ ᤐᤡᤳ ᤋᤥ᤺ᤴᤍᤢᤏᤧᤓᤃᤪ. ᤂᤧᤸᤗᤧ ᤂᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤱᤃᤠ᤺ᤶᤔᤏᤠᤒᤠ ᤐᤡᤳ ᤀᤡᤃᤪ ᤐᤡᤵᤔᤠ ᤌᤡᤰ ᤋᤥ᤺ᤴᤍᤢᤖ॥

² ᤂᤧᤸᤗᤧ ᤁᤢᤜᤢᤰᤁᤡᤴ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤖ ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤆᤩᤧᤵᤋᤢ ᤛᤩᤧᤖᤢᤖ॥ ᤂᤧᤒᤩᤠᤱ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹. ᤀᤡᤃᤪ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤔᤧᤛᤠᤰᤂᤢᤖ॥

³ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤗᤠᤶ ᤂᤧᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤔᤡᤀᤥᤗᤠᤶ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ—ᤀᤡᤃᤪ. ᤁᤢᤜᤡᤍᤢᤳ ᤁᤢᤎᤧᤃᤠᤱᤅᤡᤸᤗᤧ ᤁᤢᤍᤧᤵᤔᤠ ᤁᤢᤛᤥ᤺ᤳᤋᤡᤴ ᤏᤢ ᤁᤢᤜᤡᤍᤢ᤺ᤳᤋᤡᤸᤗᤧ ᤁᤢᤛᤶᤎᤠᤱᤒᤠ ᤁᤢᤛᤥ᤺ᤳᤋᤡᤴ ᤁᤧᤖᤧᤰ.

⁴ ᤏᤧᤵᤔᤠᤱ ᤁᤢᤗᤧᤶᤔᤡᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱᤒᤠ ᤁᤢᤛᤥ᤺ᤳᤋᤡᤴ ᤏᤢ ᤁᤢᤃᤧᤱᤅᤥᤒᤠ ᤁᤢᤛᤥ᤺ᤳᤋᤡᤴ. ᤂᤧᤒᤩᤠᤱ ᤁᤢᤗᤧᤶᤜᤠ᤹ᤏᤢ ᤛᤥᤖᤡᤰ ᤁᤢᤗᤢᤱᤔᤠ᤹ ᤁᤧᤍᤧᤵᤐᤠ ᤁᤢᤏᤧᤰᤛᤠᤴ ᤂᤧᤸᤗᤧ ᤗ᤺ᤳᤋᤢᤖ॥

⁵ ᤂᤧᤒᤩᤠᤱ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤀᤥᤒᤠ ᤛᤡᤱᤅᤡᤸᤗᤧ ᤁᤢᤛᤶᤎᤠᤱ ᤁᤧᤏᤧᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤀᤥ ᤔᤡᤔᤧᤎᤡᤰᤂᤢᤖ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤁᤢᤏᤠᤶᤃᤧᤏᤢ᤹ᤒᤠ. ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤖᤥ॥

⁶ “‘ᤂᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤋᤱᤈᤢᤶ ᤛᤡᤍᤢᤱᤈᤓᤠ ᤑᤠ᤹ᤀᤠᤱ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥᤗᤠᤶ ᤗᤳᤇᤠ ᤋᤥ᤺ᤴᤍᤢᤏᤧᤓᤃᤪ. ᤂᤧᤸᤗᤧ ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠ ᤀᤡᤃᤪ ᤁᤢᤶᤔᤠᤔᤠ ᤌᤡᤰ ᤋᤥ᤺ᤴᤍᤢᤖ॥

⁷ ᤂᤧᤸᤗᤧ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤔᤧᤸᤗᤢᤰᤛᤠ᤺ᤳᤋᤡᤴ ᤋᤥ᤺ᤴᤍᤢᤏᤧᤓᤃᤪ ᤕᤜᤘᤣ ᤍᤠᤱᤒᤠᤀᤥ ᤂᤧᤴ ᤋᤥ᤺ᤴᤍᤢᤖ॥

⁸ ᤂᤧᤸᤗᤧ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤂᤢᤏᤧ᤹ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤖ. ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤋᤃᤠᤱ ᤂᤧᤴ ᤛᤧᤖᤢᤖ॥ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤠᤰᤂᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤐᤡᤛᤠᤱ ᤔᤧᤛᤠᤰᤂᤢᤖ॥

⁹ ᤂᤧᤸᤗᤧ ᤋᤱᤈᤢᤶ ᤛᤡᤍᤢᤱᤈᤓᤠᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤗᤠᤶᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ—ᤀᤡᤃᤪ. ᤂᤧᤸᤗᤧ ᤁᤢᤛᤥ᤺ᤳᤋᤡᤴ ᤏᤢ ᤁᤢᤔᤡ᤺ᤸᤗᤧ ᤁᤢᤒᤢᤱᤅᤥᤒᤠ ᤁᤢᤛᤥ᤺ᤳᤋᤡᤴ ᤁᤢᤀᤣ᤺ᤰᤁᤥᤏᤢ ᤂᤧᤸᤗᤧ ᤛᤧᤴᤍᤢᤖ. ᤜᤧᤰᤁᤩᤠᤱ ᤁᤢᤜᤡᤍᤢᤳ ᤁᤢᤎᤧᤃᤠᤱᤅᤡᤸᤗᤧ ᤁᤢᤒ᤺ᤳᤌᤠᤱᤅᤡᤴ ᤏᤢ ᤁᤢᤜᤡᤍᤢᤳ ᤛᤶᤎᤠᤱᤒᤠ ᤁᤧᤖᤧᤰ ᤁᤢᤛᤥ᤺ᤳᤋᤡᤴ.

¹⁰ ᤏᤧᤵᤔᤠᤱ ᤁᤢᤗᤧᤶᤜᤠ᤹ ᤏᤢ ᤂᤧᤸᤗᤧ ᤁᤢᤛᤶᤎᤠᤱᤒᤠ ᤜᤧᤰᤁᤩᤠᤱ ᤁᤢᤃᤣᤱᤅᤥ ᤁᤧᤒᤵᤐᤠ ᤁᤢᤛᤥ᤺ᤳᤋᤡᤴ. ᤂᤧᤒᤩᤠᤱ ᤁᤢᤗᤧᤶᤔᤡᤴᤏᤢ ᤛᤥᤖᤡᤰ ᤁᤢᤗᤢᤱᤔᤠ᤹ ᤁᤧᤍᤧᤵᤐᤠ ᤛᤠᤴ ᤂᤧᤸᤗᤧ ᤘᤧᤃᤢ ᤗ᤺ᤳᤋᤢᤖ॥

¹¹ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤕᤜᤘᤣ ᤍᤠᤱᤒᤠᤀᤥ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤢᤈᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤔᤡᤎᤡᤰᤂᤢᤍᤣᤛᤢᤖ॥

¹² “‘ᤂᤧᤸᤗᤧ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤔᤧ᤺ᤴᤍᤠᤏᤧᤓᤃᤪ. ᤂᤧᤸᤗᤧ ᤂᤧᤴ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢᤖ॥

¹³ ᤂᤧᤸᤗᤧ ᤂᤢᤏᤧ᤹ ᤁᤢᤜᤢᤰᤁᤡᤴ ᤂᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤖ. ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤍᤃᤡ ᤂᤧᤴ ᤛᤧᤖᤢᤖ॥ ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤁᤒᤪᤡᤱ ᤂᤧᤸᤗᤧ ᤁᤢᤔᤠᤰᤂᤡᤴ ᤔᤧᤛᤠᤰᤂᤢᤖ॥

¹⁴ ᤂᤢᤏᤧ᤹ ᤂᤧᤴᤗᤠᤶᤒᤠ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤴᤍᤢᤖ—ᤁᤢᤜᤡᤍᤢᤳ ᤁᤢᤎᤧᤅᤠᤱ ᤁᤧᤍᤧᤵᤐᤠ ᤁᤢᤒ᤺ᤳᤌᤠ᤺ᤱᤅᤡᤴ ᤏᤢ ᤁᤢᤜᤡᤍᤢ᤺ᤳᤋᤡᤸᤗᤧ ᤁᤢᤛᤶᤎᤠᤱᤒᤠ ᤁᤧᤖᤧᤰ ᤁᤢᤛᤥ᤺ᤳᤋᤡᤴ.

¹⁵ ᤏᤧᤵᤔᤠᤱ ᤁᤢᤗᤧᤶᤜᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤶᤎᤠᤱᤒᤠ ᤏᤢ ᤁᤢᤃᤣᤱᤅᤥ ᤁᤧᤒᤵᤐᤠ ᤁᤢᤛᤥ᤺ᤳᤋᤡᤴ. ᤂᤶᤒᤩᤠᤱ ᤁᤢᤗᤧᤶᤜᤠ᤹ᤏᤢ ᤛᤥᤛᤥᤖᤡᤰ ᤁᤢᤗᤢᤱᤔᤠ᤹ ᤁᤧᤍᤧᤵᤐᤠ ᤛᤠᤴ ᤂᤧᤸᤗᤧ ᤘᤧᤃᤢ ᤗ᤺ᤳᤋᤢᤖ॥

¹⁶ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤁᤢᤏᤠᤶᤃᤧᤏᤢ᤹ᤒᤠ ᤐᤥᤱᤔᤠᤖᤧ ᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤢᤈᤠ ᤁᤢᤀᤡᤛᤡᤰ ᤋᤥ᤺ᤴᤍᤢᤖ॥ ᤁᤢᤛᤥᤳ ᤁᤧᤕᤠᤰᤐᤠᤜᤠ᤹ ᤁᤧᤖᤧᤰ ᤕᤜᤘᤣ ᤍᤠᤱᤒᤠᤸᤗᤧᤴᤏᤣᤖᤥ॥

¹⁷ “‘ᤂᤡᤏᤡ᤹ ᤁᤢᤛᤥ᤺ᤳᤋᤡᤴ ᤏᤢ ᤁᤢᤔᤠᤰᤂᤡᤴ ᤔᤧᤈᤠᤶᤔᤡᤴᤏᤧ᤹॥ ᤁᤴ ᤂᤡᤏᤡ᤹ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤅᤡᤛᤠᤱ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱᤒᤠ ᤛᤠᤶᤕᤥᤛᤠᤰᤌᤡᤶ ᤐᤥᤱᤗᤖᤥ॥’”