ᤗᤧᤒᤡ 22 - LIFOTNTᤛᤢᤳᤌᤥᤒᤠ ᤛᤡᤍᤢᤱᤈᤓᤠ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤃᤡ ᤔᤧᤍᤥᤴᤍᤢᤀᤠᤱ ᤛᤡᤍᤢᤱᤈᤓᤠ ᤔᤧᤈᤥᤃᤢᤒᤠ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤜᤠ᤹ ᤂᤡᤏᤡ᤹ ᤀᤡᤱᤎᤠᤱ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤡᤴ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥’ 3 “ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤀᤠᤳᤋᤡᤴ ᤌᤠ᤺ᤰᤁᤥᤒᤠᤛᤠᤱ ᤁᤢᤓᤠ ᤀᤠᤛᤢᤳᤌᤥ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤥᤴᤍᤢᤀᤠᤱ ᤛᤡᤍᤢᤱᤈᤓᤠ ᤔᤧᤈᤥᤃᤢᤒᤠ ᤛᤢᤳᤌᤥ ᤛᤡᤍᤢᤱᤈᤓᤠᤜᤠ᤹ᤖᤧ ᤁᤢᤒᤣᤛᤠᤱ ᤐᤣ᤺ᤰᤏᤧᤓᤃᤪ. ᤂᤧᤴ ᤀᤠᤱᤃᤠ᤹ ᤀᤠᤒᤣᤛᤠᤱᤗᤠᤶᤒᤠ ᤗ᤺ᤵᤔᤠᤍᤣᤔᤠ ᤐᤥᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 4 “‘ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤀᤥᤒᤠ ᤁᤢᤓᤠ ᤀᤠᤳᤋᤡᤴᤇᤠᤱ ᤜᤥᤖᤡᤰᤐᤥ ᤕᤠᤱᤄᤣ᤺ᤰ ᤗ᤺ᤶᤔᤠ ᤏᤢ ᤘᤠᤕᤢᤔᤠ ᤋᤢᤰᤔᤧᤸᤗᤧ ᤋᤖᤢᤀᤠᤱ ᤘᤠ᤹ᤏᤧᤓᤃᤪ. ᤂᤧᤴ ᤛᤢᤳᤌᤥ ᤔᤧᤶᤒᤥᤱᤅᤣ ᤌᤠᤖᤡᤰ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤜᤠ᤹ᤀᤥᤒᤠ ᤌᤧᤔᤠᤀᤠᤱ ᤁᤢᤈᤠ ᤂᤧᤸᤗᤧ ᤔᤧᤈᤏᤧᤴᤗ॥ ᤆᤣ ᤁᤧᤛᤢᤒᤠ. ᤛᤧᤔᤧᤘᤠ ᤘᤠᤕᤢᤔᤠ ᤋᤢᤰᤔᤧᤸᤗᤧ ᤁᤧᤕᤠᤱᤒᤠᤴ ᤁᤧᤛᤢᤒᤠ. 5 ᤀᤡᤃᤪ ᤁᤧᤀᤢ᤺ᤱᤛᤡᤱᤒᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤌᤰᤛᤠᤴ ᤀᤡᤃᤪ ᤀᤠᤛᤢᤳᤌᤥ ᤔᤏᤠ ᤀᤡᤃᤪ ᤀᤠᤛᤢᤳᤌᤥ ᤐᤠᤴ ᤌᤣ᤺ᤸᤗᤧᤛᤠᤱ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢ᤹॥ 6 ᤂᤧᤴ ᤔᤏᤠᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱᤗ ᤐᤥᤱ᤹॥ ᤂᤢᤏᤧ᤹ ᤘᤠᤔᤧᤸᤗᤢ᤺ᤶᤛᤡᤱᤅᤣ ᤌᤠᤖᤡᤰ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤜᤠ᤹ ᤔᤧᤈᤏᤧᤴᤗ॥ 7 ᤏᤠᤶᤎᤠᤀᤠᤱᤗᤰ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤢᤳᤌᤥ ᤛᤡᤍᤢᤱᤈᤓᤠᤜᤠ᤹ ᤆᤠᤔᤠ ᤛᤢᤰᤋᤢ᤹. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤂᤢᤏᤧ᤹ ᤁᤢᤈᤠᤔᤠᤖᤥ॥ 8 ᤀᤠᤵᤑᤣᤰ ᤁᤧᤛᤡᤒᤠ ᤀᤡᤃᤪ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤌᤧ᤺ᤰᤂᤢ ᤛᤧᤖᤢᤒᤠ ᤌᤰᤛᤠᤴ ᤂᤧᤸᤗᤧ ᤔᤧᤈᤏᤧᤴᤗ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤆᤀᤠᤱ ᤀᤠᤒᤠᤅᤣ ᤀᤠᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤡᤴᤗ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 9 “‘ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤔᤧᤏᤠ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤵᤋᤡᤰᤛᤠᤒᤠ ᤔᤧᤒᤥᤱᤅᤠᤱ ᤔᤧᤛᤡ᤹᤺॥ ᤂᤧᤱᤜᤠ᤹ ᤛᤣᤛᤣ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 10 “‘ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤜᤡᤶᤛᤕᤱᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤴ ᤔᤧᤈᤏᤧᤴᤗ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤍᤖᤧᤒᤠ ᤀᤡᤃᤪ ᤁᤢᤕᤠ᤺ᤸᤗᤧᤰ ᤛᤧᤘᤠᤖᤥᤒᤠᤸᤗᤧᤀᤠᤱ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤴ ᤔᤧᤈᤏᤧᤴᤗ॥ 11 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤀᤡᤅᤢᤒᤠ ᤁᤢᤕᤥ᤺ᤃ᤻ᤒᤠ ᤀᤡᤃᤪ ᤂᤢᤏᤧ᤹ ᤁᤢᤜᤡᤶᤔᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤥ᤺ᤃ᤻ᤒᤠᤏᤧᤓᤃᤪ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤈᤠᤔᤠ ᤗᤰᤁᤥᤗᤠᤶ ᤆ᤺ᤸᤗᤧ ᤏᤢ᤹॥ 12 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤘᤣ᤹ ᤌᤠ᤺ᤰᤁᤥᤒᤠ ᤁᤢᤓᤠ ᤕᤧᤶᤒᤡᤳᤇᤠ᤺ᤴᤏᤢ ᤁᤢᤔᤣ᤺ᤰᤂᤡᤶ ᤐᤥ᤺ᤰᤂᤧᤀᤠᤱ ᤘᤠ᤹ᤏᤧᤓᤃᤪ ᤀᤠᤳᤋᤡᤴ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤗᤠᤶᤔᤠᤱ ᤂᤢᤏᤧ᤹ ᤔᤧᤈᤏᤧᤴᤗ॥ 13 ᤁᤖ ᤁᤢᤓᤠ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤁᤢᤕᤧᤶᤒᤠ ᤁᤧᤛᤡᤔᤠ ᤔᤣᤔᤣᤍᤢᤔᤠ ᤀᤡᤃᤪ ᤔᤧᤏᤠ᤹ᤖᤢᤔᤠ ᤏᤢ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤘᤠ᤹ᤀᤣ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤘᤠ᤹ᤏᤧᤓᤃᤪ. ᤂᤢᤏᤧ᤹ ᤜᤡᤴᤈᤠ᤹ ᤘᤕᤧᤒᤠ ᤜᤧᤰᤁᤣᤀᤣ ᤂᤧᤸᤗᤧ ᤁᤢᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤂᤥᤛᤢᤒᤠ ᤁᤢᤗᤰᤁᤥᤗᤠᤶ ᤆᤖᤖᤥ॥ ᤆᤠᤔᤠ ᤂᤥᤔᤠ ᤕᤢᤰ ᤁᤧᤃᤵᤐᤠᤜᤠ᤹ᤖᤧᤖᤰ ᤂᤧᤴ ᤔᤧᤈᤖ॥ 14 “‘ᤁᤢᤓᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤛᤢᤳᤌᤥᤒᤠ ᤛᤡᤍᤢᤱᤈᤓᤠᤗᤠᤶ ᤁᤢᤓᤠ ᤌᤧᤔᤠᤀᤡ ᤆᤏᤧᤓᤃᤪ. ᤂᤧᤸᤗᤧ ᤁᤢᤗᤰ ᤅᤠᤛᤡ ᤕᤥ᤹ᤔᤠᤀᤠᤱ ᤂᤧᤴ ᤛᤢᤳᤌᤥᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤐᤡᤖᤢᤖ॥ 15 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤍᤥᤴᤍᤢ ᤔᤧᤒᤡᤖᤢᤒᤠ ᤛᤣᤛᤣ ᤛᤡᤍᤢᤱᤈᤓᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤠᤛᤢᤳᤌᤥ ᤔᤧᤴᤈᤥᤃᤢᤴᤗ॥ ᤔᤏᤠᤜᤠ᤹ ᤔᤧᤶᤒᤡᤖᤢᤛᤡᤴᤗ॥ 16 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤣᤛᤣ ᤛᤡᤍᤢᤱᤈᤓᤠᤴ ᤔᤏᤠᤜᤠ᤹ ᤔᤧᤶᤒᤡᤖᤢᤴᤇᤡᤴᤗ. ᤔᤣ᤺ᤴᤏᤧᤑᤃᤪ ᤂᤧᤴᤜᤠ᤹ᤖᤧ ᤀᤠᤵᤑᤣᤰ ᤂᤢᤴᤇᤡ ᤀᤠᤵᤋᤡᤰ ᤏᤢ ᤂᤢᤶᤍᤡᤱ ᤔᤧᤍᤠᤖᤢᤖᤥ॥ ᤛᤡᤍᤢᤱᤈᤓᤠᤜᤠ᤹ ᤛᤣᤛᤣ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ॥’” 17 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 18 “ᤜᤠᤖᤢᤏ. ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤀᤡᤛᤪᤠᤀᤡᤗᤡ ᤀᤡᤃᤪ ᤀᤡᤛᤪᤠᤀᤡᤗᤀᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ᤺ᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤀᤡᤃᤪ ᤀᤠᤒᤠᤅᤣ ᤁᤢᤏᤡᤱᤘᤠ᤹ ᤗᤠᤶᤒᤠᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢᤸᤗᤧ. 19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤋᤠ᤺ᤰᤔᤠᤖᤧ ᤗᤠᤃᤡ ᤐᤡᤳ. ᤔᤧᤸᤗᤢᤰ ᤀᤡᤃᤪ ᤔᤧ᤺ᤴᤍᤒᤁᤠᤜᤠ᤹ᤗᤠᤶ ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠᤴ ᤋᤥ᤺ᤴᤍᤢᤖ॥ 20 ᤁᤧᤃᤠ᤺ᤶᤒᤠ ᤌᤰᤛᤠ ᤌᤧᤔᤠ᤺ᤴᤏᤠᤱ ᤂᤡᤏᤡ᤹ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤍᤠ᤺ᤰᤋᤢᤴ᤹॥ 21 ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤀᤠᤵᤑᤣᤰ ᤆᤥ᤺ᤰᤔᤏᤠᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤧᤸᤗᤧ ᤀᤡᤃᤪ ᤀᤠᤒᤠᤅᤣ ᤏᤡᤱᤘᤠ᤹ᤗᤠᤶᤒᤠᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤶᤔᤧᤸᤗᤧ ᤌᤰᤛᤠ ᤗᤢᤵᤐᤥ ᤀᤡᤃᤪ ᤌᤰᤛᤠ ᤛᤢᤶᤔᤥᤗᤠᤶ ᤋᤠ᤺ᤵᤔᤏᤠᤒᤠ ᤌᤰᤛᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤐᤥᤱᤔᤠᤖᤧ ᤗᤠᤃᤡ ᤂᤧᤴ ᤔᤧᤱᤃᤠ᤺ᤶᤔᤏᤠᤒᤠ ᤏᤢ ᤁᤢᤗᤠᤱ ᤁᤢᤜᤢᤰ ᤔᤧᤴᤇᤰᤔᤏᤠᤒᤠ ᤐᤥᤱᤔᤠ ᤐᤥᤱ᤹॥ 22 ᤔᤡᤰᤔᤧᤴᤏᤡᤔᤏᤠᤒᤠ. ᤁᤧᤃᤠ᤺ᤶᤒᤠ. ᤁᤢᤓᤢᤍᤢᤰ ᤁᤧᤒᤥᤱᤒᤠ. ᤛᤧ᤺ᤵᤔᤠ ᤁᤧᤗ᤺ᤶᤒᤠ ᤀᤡᤃᤪ ᤁᤧᤍᤢᤶᤒᤠ ᤕᤠᤱᤄᤣ᤺ᤰ ᤁᤧᤒᤵᤐᤠ ᤌᤰᤛᤠᤴ ᤂᤡᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ 23 ᤁᤢᤗᤠᤱ ᤁᤧᤛᤰᤐᤠ. ᤁᤢᤔᤡᤰ ᤁᤧᤓᤧᤰᤐᤠ ᤛᤧᤃᤶᤒᤠᤴ ᤀᤡᤃᤪ ᤔᤧᤸᤗᤢᤰᤁᤡᤴ ᤆᤠᤜᤣ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤗᤠᤶᤒᤠᤒᤠ ᤛᤡᤍᤢᤱᤈᤓᤠᤀᤥ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤐᤥᤱ᤹॥ ᤁᤖ ᤔᤠᤱᤜᤢᤵ ᤁᤧᤈᤥᤃᤢᤶᤒᤠ ᤛᤡᤍᤢᤱᤈᤓᤠᤀᤥ ᤆᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤍᤠ᤺ᤰᤋᤢᤴ᤹॥ 24 ᤀᤠᤳᤋᤡᤴ ᤌᤰᤛᤠ᤺ᤸᤗᤧ ᤁᤢᤸᤎᤡ᤺ᤶᤒᤠᤴ ᤑᤧᤱᤔᤏᤠᤒᤠ ᤀᤡᤃᤪ ᤕ᤺ᤶᤔᤏᤠᤒᤠ. ᤜᤧᤵᤔᤏᤠᤒᤠ ᤀᤡᤃᤪ ᤆᤧᤖᤧᤒᤠ ᤆᤥᤰ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤂᤧᤴ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ ᤂᤡᤏᤡ᤹ ᤗᤠᤈᤣ᤹ ᤁᤧᤖᤧᤰ ᤀᤰᤂᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ॥ 25 ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶᤒᤠᤀᤠᤱ ᤀᤰᤋᤱᤒᤠ ᤌᤰᤛᤠ ᤔᤧᤍᤠᤖᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ ᤁᤢᤀᤡᤛᤡᤰ ᤔᤧᤍᤥ᤺ᤴᤍᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤀᤥ ᤁᤧᤒᤵᤐᤠ ᤁᤢᤓᤢᤍᤢᤰᤔᤠ ᤏᤢ ᤁᤧᤃᤠ᤺ᤶᤒᤠ ᤁᤢᤕᤥ᤺ᤰᤁᤡᤸᤗᤧ ᤆᤥᤃᤢᤸᤗᤧ. ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤴ॥’” 26 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 27 “ᤐᤡᤳᤛᤠᤳ ᤀᤡᤃᤪ ᤔᤧᤸᤗᤢᤰ ᤔᤧ᤺ᤴᤍᤠᤰᤁᤡᤸᤗᤧ ᤁᤧᤎᤠᤵᤐᤠ ᤁᤢᤛ᤻ᤛᤠᤴ ᤏᤢᤛᤡ ᤕᤧᤴ ᤌᤠᤖᤡᤰ ᤂᤧᤴ ᤁᤢᤶᤔᤠᤏᤢᤀᤣ ᤘᤠ᤹ᤖ॥ ᤕᤧᤳᤇᤡᤃᤣᤰᤐᤠ ᤕᤧᤴᤏᤠᤱᤎᤥ ᤂᤧᤴ ᤔᤡᤀᤥᤗᤠᤶ ᤛᤡᤍᤢᤱᤈᤓᤠ ᤋᤥ᤺ᤶᤔᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤋᤠ᤺ᤰᤋᤢᤒᤠ ᤐᤥᤱ᤹॥ 28 ᤁᤢᤶᤔᤠᤔᤠ ᤐᤡᤳ ᤀᤡᤃᤪ ᤁᤢᤶᤔᤠᤔᤠ ᤔᤧᤸᤗᤢᤰᤁᤡᤴ ᤂᤧᤸᤗᤧ ᤁᤢᤛ᤻ᤛᤠ᤺ᤴᤏᤢ ᤛᤥᤛᤥᤖᤡᤰ ᤌᤡᤰᤕᤠ᤺ᤴᤗᤧ ᤛᤧᤵᤔᤠᤛᤡ ᤔᤣ᤺ᤴ॥ 29 “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤏᤢᤃᤧᤴ ᤋᤥ᤺ᤶᤔᤠ ᤛᤡᤍᤢᤱᤈᤓᤠ ᤁᤧᤍᤥ᤺ᤶᤍᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤡᤶᤜᤠ᤹ ᤁᤢᤀᤡᤛᤡᤰ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤁᤧᤍᤠ᤺ᤰᤋᤡᤖᤥ॥ 30 ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤴ ᤆᤧᤶᤍᤣᤛᤧᤶᤔᤧ᤹॥ ᤂᤧᤵᤔᤥ ᤁᤧᤏᤶᤒᤠ ᤁᤢᤓᤠ ᤌᤧᤔᤠᤀᤠᤱ ᤋᤠᤏᤠᤶ ᤌᤠᤖᤡᤰ ᤔᤧᤃᤳᤋᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 31 “ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 32 ᤀᤠᤱᤃᤠ᤹ ᤛᤣᤛᤣ ᤀᤠᤔᤡᤱᤅᤡᤴ ᤂᤡᤏᤡ᤹ ᤀᤠᤛᤢᤳᤌᤥ ᤔᤧᤈᤥᤃᤧᤶᤔᤡᤴᤏᤧ᤹॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠ ᤁᤧᤗ᤹ᤒᤠ ᤐᤠ᤺ᤴᤏᤥ ᤔᤧᤍᤧᤴᤗ ᤐᤥᤱ᤹॥ ᤂᤡᤏᤡ᤹ ᤛᤣᤛᤣ ᤁᤧᤈᤥ᤺ᤰᤐᤠ. 33 ᤜᤧᤰᤁᤩᤠᤱ ᤂᤡᤏᤡ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤐᤥᤱᤔᤠᤖᤧ ᤗᤠᤃᤡ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤠᤀᤠ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.