ᤗᤧᤒᤡ 19 - LIFOTNTᤛᤣᤛᤣ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤶᤔᤠ ᤌᤡᤶᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤛᤣᤛᤣ ᤐᤥ᤺ᤰᤂᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ. ᤛᤣᤛᤣᤒᤠ ᤆᤥ᤺ᤰᤁᤠ॥ 3 “‘ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤐᤠᤏᤢᤍᤡᤱ ᤐᤠᤜᤠ᤹ ᤌᤠᤔᤧᤴᤍᤡᤱ ᤔᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤠ᤺ᤶᤛᤡᤱᤔᤠ ᤛᤒᤠᤌ ᤕᤧᤴᤏᤡᤴ ᤏᤧᤳᤋᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 4 “‘ᤏᤠᤘᤠᤀᤡᤳᤗᤠᤜᤠ᤹ ᤗᤧᤵᤔᤠᤱ ᤂᤡᤏᤡ᤹ ᤔᤧᤒᤳᤇᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤕᤥ᤺ᤶᤔᤏᤠᤒᤠ ᤔᤠᤱᤜᤠ᤹ᤀᤠᤱ ᤔᤧᤈᤥᤃᤧᤶᤛᤡᤶᤔᤧᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 5 “‘ᤂᤡᤏᤡ᤹ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤁᤧᤍᤥ᤺ᤶᤍᤢᤶᤔᤡᤸᤗᤧ ᤀᤠᤱᤃᤠ᤹ ᤐᤡᤏᤡᤱᤒᤠ ᤌᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤡᤍᤢᤱᤈᤓᤠᤴ ᤋᤠ᤺ᤰᤋᤢᤱ᤹॥ 6 ᤂᤡᤏᤡ᤹ ᤁᤧᤍᤥ᤺ᤴᤍᤢᤶᤒᤠ ᤕᤧᤴᤏᤥᤀᤣ ᤀᤡᤃᤪ ᤁᤢᤍᤠ᤺ᤴᤍᤡᤰᤔᤠ ᤌᤠᤖᤡᤰ ᤂᤧᤴ ᤆᤧᤶᤔᤧ᤹॥ ᤁᤖ ᤁᤢᤀᤠᤳᤇᤡᤴᤍᤠ᤺ᤴ ᤌᤠᤖᤡᤰ ᤏᤖᤧᤏᤧᤓᤃᤪ ᤂᤧᤴ ᤔᤡᤀᤥ ᤔᤡᤎᤡᤰᤂᤧᤶᤍᤣᤛᤧᤶᤔᤧ᤹॥ 7 ᤁᤢᤀᤠᤳᤇᤡᤴᤍᤠ᤺ᤴ ᤌᤠᤖᤡᤰᤁᤠᤱ ᤁᤧᤈᤠᤶᤏᤧᤓᤃᤪ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤴ॥ 8 ᤂᤧᤴ ᤀᤠᤳᤋᤡᤴᤜᤠ᤹ᤖᤧ ᤔᤧᤈ᤹᤺ ᤂᤧᤴ ᤁᤧᤈᤠᤒᤠᤜᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤂᤢᤶᤍᤡᤱ ᤐᤡᤔᤠᤛᤡᤀᤣ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤐᤠ᤺ᤴᤏᤡᤴ ᤀᤠᤛᤢᤳᤌᤥ ᤔᤧᤈᤥᤃᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖ॥ 9 “‘ᤂᤡᤏᤡ᤹ ᤀᤠᤒᤠᤅᤣ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠᤴ ᤁᤧᤜᤧᤃᤢᤶᤔᤡᤸᤗᤧ ᤂᤡᤏᤡ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤸᤗᤧ ᤁᤢᤕᤠᤀᤥ ᤌᤠᤖᤡᤰ ᤔᤧᤜᤧᤃᤧᤶᤔᤡᤴᤏᤧ᤹॥ ᤁᤧᤜᤧᤃᤢᤶᤔᤠᤱ ᤁᤧᤔᤠᤒᤠ ᤁᤧᤕᤠ᤺ᤰᤐᤠ ᤁᤢᤍᤠᤵᤔᤠᤜᤠ᤹ ᤔᤧᤓᤢᤰᤂᤧᤶᤔᤡᤴᤏᤧ᤹॥ 10 ᤂᤡᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤁᤢᤈᤠ᤹ᤜᤠ᤹ ᤘᤖᤧᤱᤗᤧᤱ ᤔᤧᤍᤢᤒᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤔᤰᤁᤧᤎᤠᤒᤠ ᤁᤢᤈᤠ᤹ᤜᤠ᤹ ᤔᤧᤛᤢᤵᤛᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤃ ᤕᤠᤱᤃᤧᤛᤠ᤹ᤒᤠ ᤏᤢ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤧᤖᤧᤶᤎᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 11 “‘ᤂᤡᤏᤡ᤹ ᤔᤧᤄᤢ᤺ᤳᤋᤧᤶᤔᤡᤴᤏᤧ᤹॥ “‘ᤀᤡᤱᤗᤧᤰ ᤔᤧᤈᤥᤃᤧᤶᤔᤡᤴᤏᤧ᤹॥ “‘ᤘᤣ᤹ᤜᤠ᤹ᤏᤢ ᤀᤡᤱᤗᤧᤰ ᤐᤠᤴ ᤔᤧᤒᤠᤖᤧᤶᤔᤡᤴᤏᤧ᤹॥ 12 “‘ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤡᤱᤅᤥ ᤀᤡᤱᤗᤧᤰᤁᤣ ᤔᤠᤱᤜᤧᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤑᤧᤳᤁᤧᤗᤠ᤺ᤶᤍᤢᤶ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 13 “‘ᤂᤡᤏᤡ᤹ ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤧᤴ ᤔᤧᤕᤢᤰᤋᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤂᤧᤴ ᤔᤧᤏᤠᤵᤋᤧᤶᤔᤡᤴᤏᤧ᤹॥ “‘ᤏᤠᤶᤕᤠᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤁᤢᤕᤠᤱᤅᤡᤴ ᤂᤡᤏᤡ᤹ ᤌᤡᤰ ᤛᤧᤴᤏᤠᤱ ᤔᤧᤃᤳᤋᤧᤶᤔᤡᤴᤏᤧ᤹॥ 14 “‘ᤁᤢᤏᤠᤃᤧᤎᤠᤰᤐᤠ ᤔᤏᤠᤴ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤔᤧᤳᤋᤧᤶᤔᤡᤴᤏᤧ᤹॥ ᤔᤡᤰᤑ᤺ᤶᤒᤧᤸᤗᤧ ᤁᤢᤍᤃᤡ ᤀᤠᤍᤥ᤺ᤰᤋᤥ᤺ᤰᤐᤠ ᤐᤠᤴ ᤔᤧᤏᤧᤛ᤻ᤛᤧᤶᤔᤡᤴᤏᤧ᤹. ᤁᤖ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤛᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 15 “‘ᤂᤡᤏᤡ᤹ ᤔᤧᤴᤘᤠ᤹ᤔᤏᤠᤒᤠ ᤔᤧᤈᤥᤃᤧᤶᤔᤡᤴᤏᤧ᤹॥ ᤆᤢᤰᤐᤠᤛᤠᤱ ᤀᤡᤃᤪ ᤕᤶᤒᤠᤛᤠᤱ. ᤔᤏᤠᤴ ᤀᤥᤔᤧᤵᤔᤠᤀᤠᤱ ᤔᤣ᤺ᤴ. ᤁᤖ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥᤃᤧᤶᤔᤧ᤹॥ 16 “‘ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤡᤱᤗᤧᤰ ᤐᤠᤴ ᤔᤧᤀᤡᤱᤛᤠᤶᤔᤡᤴᤏᤧ᤹॥ “‘ᤂᤡᤏᤡ᤹ ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤧᤴ ᤛᤡᤔᤠᤗᤡᤱᤎᤥ ᤁᤧᤳᤗ ᤔᤧᤈᤥᤃᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 17 “‘ᤀᤠᤒᤠᤅᤣ ᤑᤢ᤹ᤏᤢᤛᤠ᤹ᤜᤠ᤹ ᤏᤡᤱᤔᤡ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹॥ ᤀᤠᤒᤠᤅᤣ ᤜᤡᤶᤒᤣᤛᤠᤱᤒᤧᤴ ᤏᤠᤍᤢᤶᤍᤢᤶᤒᤠ ᤐᤠᤴ ᤔᤧᤳᤋᤧᤶᤔᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ᤀᤠᤱ ᤂᤧᤸᤗᤧ ᤁᤢᤓᤧᤴ ᤕᤠ᤺ᤶᤒᤰᤁᤥ ᤁᤢᤍᤱᤒᤠ ᤁᤧᤎᤩᤧ᤹ᤀᤡ॥ 18 “‘ᤀᤠᤒᤠᤅᤣ ᤜᤡᤶᤒᤣᤛᤠᤱᤒᤧᤴᤏᤢ ᤁᤢᤗᤧᤰᤘᤠ ᤏᤢ᤺ᤰᤔᤠ ᤔᤧᤃᤣ᤺ᤳᤋᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤛᤡᤰ ᤔᤧᤃᤢᤕᤧᤶᤔᤡᤴᤏᤧ᤹. ᤁᤖ ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤧᤴ ᤀᤠᤵᤑᤣᤰ ᤁᤢᤀᤡᤛᤡᤰ ᤗᤢᤱᤔᤠ᤹ ᤋᤢᤰᤋᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 19 “‘ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ “‘ᤏᤧᤳᤇᤡ ᤘᤣ᤹ ᤘᤣ᤹ ᤐᤖᤡᤰᤐᤠ ᤌᤰᤛᤠᤜᤠ᤹ ᤔᤧᤗᤠᤶᤛᤡᤱᤗ ᤔᤧᤕᤠ᤺ᤴᤍᤧᤶᤛᤡᤶᤔᤡᤴᤏᤧ᤹॥ “‘ᤂᤡᤏᤡ᤹ ᤀᤡᤰᤋᤠᤵᤐᤥ ᤏᤧᤳᤇᤡ ᤐᤖᤡᤰᤐᤠ ᤕᤠ᤹ᤖᤡ᤺ᤶᤒᤠᤜᤠ᤹ ᤔᤧᤜᤣ᤹ᤖᤧᤶᤔᤡᤴᤏᤧ᤹॥ “‘ᤂᤡᤏᤡ᤹ ᤏᤧᤳᤇᤡ ᤐᤖᤡᤰᤗᤧᤴ ᤂᤡ ᤁᤧᤒ᤺ᤶᤒᤠ ᤆᤠᤱ ᤔᤧᤈᤠᤰᤂᤧᤶᤔᤡᤴᤏᤧ᤹॥ 20 “‘ᤔᤣ᤺ᤰᤂᤡᤶᤗᤧ ᤗᤠᤃᤡ ᤐᤠᤴ ᤁᤧᤒᤢ᤹ᤔᤠᤀᤠᤱ ᤁᤧᤕᤧᤵᤔᤠ ᤁᤖ ᤔᤧᤸᤗᤧᤳᤋᤣ ᤁᤧᤘᤠ᤹ᤔᤠ ᤀᤡᤃᤪ ᤆᤥ᤺ᤰᤕᤢᤶᤓᤥ ᤔᤧᤶᤒᤥᤱᤅᤣ ᤁᤧᤘᤠ᤹ᤔᤠ ᤕᤥ᤺ᤃ᤻ᤔᤠ ᤔᤧᤴᤇ᤻ᤕᤠᤴ ᤁᤢᤓᤠ ᤔᤏᤠ᤺ᤸᤗᤧ ᤀᤡᤵᤋᤢᤏᤧᤓᤃᤪ. ᤂᤧᤴ ᤐᤠ᤺ᤴᤏᤡᤴ ᤛᤠ᤹ᤔᤠᤀᤠᤱ ᤏᤡ᤺ᤴᤎᤥ ᤆᤥ᤺ᤰᤔᤠ ᤐᤥᤱ᤹॥ ᤂᤧᤴ ᤔᤏᤠᤴ ᤛᤧᤵᤔᤠᤃ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤧᤴᤇ᤻ᤕᤠᤴ ᤆᤥ᤺ᤰᤕᤢᤶᤓᤥ ᤔᤧᤶᤒᤥᤱᤅᤣ ᤘᤕᤧ॥ 21 ᤁᤖ ᤂᤧᤴ ᤕᤧᤶᤒᤡᤳᤇᤠ᤺ᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤂᤢᤏᤧ᤹ ᤁᤢᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤌᤢ᤺ᤶᤒᤠ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠᤖᤧ ᤗᤠᤃᤡ ᤋᤠᤖᤢᤖ ᤐᤥᤱ᤹॥ 22 ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤗᤠᤕᤥᤸᤗᤧ ᤗᤠᤃᤡ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤌᤢ᤺ᤶᤒᤠ᤺ᤴᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢᤖ. ᤂᤧᤒᤩᤠᤱ ᤂᤧᤸᤗᤧ ᤁᤢᤗᤠᤕᤥᤴ ᤗᤧᤵᤔᤡ ᤐᤥᤱ᤹॥ 23 “‘ᤂᤡᤏᤡ᤹ ᤂᤧᤴ ᤗᤠᤈᤣ᤹ᤀᤥ ᤁᤧᤃᤧᤖᤡ ᤜᤧᤰᤁᤩᤠᤱ ᤁᤢᤓᤠ ᤐᤖᤡᤰᤐᤠ ᤆᤠᤔᤠ ᤁᤧᤏᤢ᤹ᤒᤠ ᤛᤡᤱᤛᤣ᤹ ᤁᤧᤗᤣ᤺ᤳᤋᤢᤶᤔᤠᤱ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤂᤧᤸᤗᤧ ᤁᤢᤈᤠ᤹ᤀᤡᤴ ᤆᤠᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ 24 ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤆᤠᤜᤣ ᤁᤧᤖᤧᤰ ᤛᤡᤱᤛᤣ᤹ᤜᤠ᤹ ᤛᤣᤛᤣᤒᤠ ᤐᤥᤱ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤏᤠᤖᤠᤑᤥᤔᤠ ᤛᤡᤍᤢᤱᤈᤓᤠ ᤐᤥᤱ᤹॥ 25 ᤁᤖ ᤅᤠᤛᤡᤃᤣᤰᤐᤠ ᤋᤱᤒᤣᤀᤥ ᤂᤧᤸᤗᤧ ᤁᤢᤈᤠ᤹ᤀᤡᤴ ᤂᤡᤏᤡ᤹ ᤆᤠᤔᤠ ᤏᤢ᤹॥ ᤜᤧᤰᤁᤣᤗ᤹ᤖᤡᤰ ᤁᤴ ᤐᤠ᤺ᤴᤏᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤂᤧᤴ ᤕᤖᤡᤰ ᤁᤢᤈᤠ᤹ ᤌᤥ᤺ᤰᤗ ᤐᤣᤰ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 26 “‘ᤁᤢᤓᤠ ᤌᤰᤛᤠ ᤐᤢᤛᤠᤴ ᤂᤧᤸᤗᤧ ᤁᤢᤔᤠᤰᤂᤡᤴᤏᤢ ᤛᤥᤖᤡᤰ ᤂᤡᤏᤡ᤹ ᤔᤧᤈᤧᤶᤔᤡᤴᤏᤧ᤹॥ “‘ᤂᤡᤏᤡ᤹ ᤌᤢᤶᤔᤩᤠ ᤔᤧᤀᤡᤛᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤁᤡᤳᤆᤠᤰ ᤔᤧᤈᤥᤃᤧᤶᤔᤡᤴᤏᤧ᤹॥ 27 “‘ᤂᤡᤏᤡ᤹ ᤏᤧᤛᤡ᤺ᤶᤒᤥᤒᤠ ᤌᤧᤃᤣ᤺ᤰᤀᤡ᤺ᤴ ᤔᤧᤄᤰᤋᤧᤶᤔᤡᤴᤏᤧ᤹. ᤂᤧᤒᤩᤠᤱ ᤔᤢᤎᤥ᤹ᤀᤡᤸᤗᤧ ᤁᤢᤛᤢᤰᤐᤠᤜᤠ᤹ ᤔᤧᤛᤠ᤺ᤰᤋᤧᤶᤔᤡᤴᤏᤧ᤹॥ 28 “‘ᤁᤧᤛᤡᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤌᤰᤁᤥ ᤔᤧᤜᤧᤃᤧᤶᤔᤡᤴᤏᤧ᤹ᤀᤠᤱ ᤔᤧᤄᤠ᤺ᤴᤍᤠᤶᤔᤡᤴᤏᤧ᤹॥ ᤜᤧᤰᤁᤩᤠᤱ ᤀᤠᤵᤑᤣᤰ ᤌᤰᤁᤥ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤁᤢᤕᤥᤰ ᤔᤧᤓᤳᤇᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 29 “‘ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤕᤧᤶᤒᤠ ᤜᤱᤈᤣᤏᤠ ᤁᤧᤳᤏᤡᤔᤠ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤠᤱ ᤑᤧᤳᤔᤧᤗᤠ᤺ᤴᤍᤧᤶᤛᤡᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤗᤠᤈᤣᤴ ᤁᤧᤳᤏᤡᤔᤠ ᤆᤥ᤺ᤰᤔᤠ ᤗᤧᤵᤛᤠᤱ ᤗᤠ᤺ᤳ. ᤂᤧᤒᤩᤠᤱ ᤗᤠᤈᤣᤴ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤋᤡᤶ᤹॥ 30 “‘ᤂᤡᤏᤡ᤹ ᤀᤠᤱᤃᤠ᤹ ᤀᤠᤏᤠ᤺ᤶᤛᤡᤱᤔᤠ ᤛᤒᤠᤌ ᤕᤧᤴᤏᤡᤴ ᤏᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤀᤠᤛᤣᤛᤣᤍᤧᤴᤏᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 31 “‘ᤂᤡᤏᤡ᤹ ᤔᤠᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤡᤃᤪ ᤁᤧᤛᤡᤒᤠ ᤛᤠᤶ ᤁᤧᤓᤥᤱᤒᤠ ᤗᤧᤵᤔᤠᤱ ᤔᤧᤗᤠᤛᤧᤶᤔᤡᤴᤏᤧ᤹॥ ᤂᤧᤱᤜᤠ᤹ᤏᤢ ᤛᤢᤈᤠ ᤔᤧᤏᤠ᤺ᤰᤋᤠᤶᤔᤡᤴᤏᤧ᤹ᤀᤠᤱ ᤂᤡᤏᤡ᤹ ᤀᤠᤒᤠᤅᤣ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤡᤴᤏᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 32 “‘ᤁᤠᤵᤐᤥ ᤋᤢᤶᤛᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤛᤡᤖᤧ ᤗᤠᤃᤡ ᤐᤥᤃᤧᤶᤔᤧ᤹ ᤜᤧᤰᤁᤩᤠᤱ ᤂᤍᤠᤰᤔᤡᤜᤠ᤹ ᤏᤠᤈᤶ ᤐᤡᤖᤧᤶᤛᤡᤶᤔᤧ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤂᤡᤏᤡ᤹ ᤁᤡᤛᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥ 33 “‘ᤂᤡᤏᤡ᤹ᤀᤥ ᤕᤠᤱᤎᤥ᤺ᤰᤛᤧ ᤁᤧᤍᤠᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤔᤡᤴᤏᤧ᤹॥ 34 ᤂᤧᤴ ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤔᤏᤠ ᤜᤧᤰᤁᤣ ᤗᤣ᤺ᤳᤋᤧᤶᤔᤧ᤹॥ ᤂᤡᤏᤡ᤹ ᤂᤧᤴ ᤀᤠᤒᤠᤅᤣ ᤁᤢᤛᤡᤱ ᤗᤢᤱᤔᤠ᤹ ᤋᤢᤰᤋᤠᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤘᤣ᤹ ᤗᤠᤈᤣ᤹ᤒᤠ ᤁᤧᤘᤕᤡ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 35 “‘ᤂᤡᤏᤡ᤹ ᤁᤧᤛᤡ᤺ᤰᤋᤢᤶᤔᤡᤸᤗᤧ. ᤁᤧᤎᤠᤱᤄᤢᤶᤔᤡᤸᤗᤧ ᤜᤧᤰᤁᤩᤠᤱ ᤁᤧᤎᤡᤶᤛᤢᤶᤔᤡᤸᤗᤧ ᤀᤡᤱᤗᤧᤰ ᤔᤧᤈᤥᤃᤧᤶᤔᤡᤴᤏᤧ᤹॥ 36 ᤂᤡᤏᤡ᤹ ᤁᤢᤍᤥ᤺ᤵᤔᤠ ᤋᤧᤶᤍᤢᤖᤡ ᤏᤢ ᤁᤢᤎᤠᤱᤔᤠ. ᤜᤧᤰᤁᤩᤠᤱ ᤁᤧᤃᤧᤵᤐᤠ ᤁᤢᤛᤡ᤺ᤰᤔᤠ ᤏᤢ ᤐᤠᤛᤠᤱᤃᤠᤜᤠ᤹ ᤁᤳᤋᤧᤶᤔᤧ᤹॥ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ 37 “‘ᤂᤡᤏᤡ᤹ ᤀᤠᤱᤃᤠ᤹ ᤁᤧᤖᤧᤰ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤎᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.