ᤗᤧᤒᤡ 18 - LIFOTNT

ᤛᤥᤖᤡᤰ ᤀᤡᤶᤔᤠ ᤔᤧᤴᤏᤢ᤹ᤔᤏᤠᤒᤠ ᤐᤠ᤺ᤴᤜᤠ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

² “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹—‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥

³ ᤂᤡᤏᤡ᤹ ᤁᤧᤕᤢᤅᤡ ᤁᤧᤘᤕᤡᤒᤠ ᤔᤡᤛᤪ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤡᤶᤒᤣ ᤛᤠᤰᤌᤡᤶᤜᤠ᤹ ᤔᤧᤀᤡ᤺ᤳᤋᤧᤶ ᤔᤧᤏᤠ᤺ᤳᤋᤠᤶᤔᤡᤴᤏᤧ᤹॥ ᤜᤧᤰᤁᤩᤠᤱ ᤀᤠᤸᤗ ᤀᤠᤱᤃᤠ᤹ ᤁᤏᤠᤏ ᤗᤠᤈᤣ᤹ᤀᤥ ᤂᤡᤏᤡ᤹ ᤋᤣ᤹ᤏᤡᤱᤗ ᤐᤳᤋᤠ. ᤁᤸᤗᤧᤆᤥᤃᤢᤸᤗᤧ ᤂᤧᤵᤔᤥᤒᤠ ᤌᤡᤶᤒᤣ ᤛᤠᤰᤌᤡᤶᤜᤠ᤹ᤀᤠᤱ ᤔᤧᤏᤠ᤺ᤳᤋᤧᤶᤔᤡᤴᤏᤧ᤹॥

⁴ ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤎᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤂᤧᤴ ᤁᤢᤀᤡᤛᤡᤰ ᤘᤠ᤹ᤔᤠ ᤐᤥᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥

⁵ ᤂᤡᤏᤡ᤹ ᤁᤴ ᤀᤠᤛᤠᤶᤕᤥᤌᤡᤶ ᤛᤠᤰᤌᤡᤶᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤏᤠᤴ ᤂᤧᤱᤜᤠ᤹ᤗᤠᤶᤒᤠᤀᤣ ᤜᤡᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥

⁶ “‘ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤸᤗᤧᤀᤠᤱ ᤏᤡ᤺ᤳᤋᤠᤱ ᤁᤠ᤹ᤀᤡ ᤁᤧᤎᤠᤵᤐᤠ ᤁᤧᤎᤠᤵᤔᤠᤜᤠ᤹ᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ॥

⁷ “‘ᤂᤧᤏᤧ᤹ ᤁᤧᤶᤔᤠ ᤔᤣ᤺ᤳ ᤋᤣ᤹ᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤒᤠ ᤛᤡᤖᤡᤱᤔᤔᤥ ᤔᤧᤎᤠᤛᤧᤴᤏᤧ᤹॥ ᤂᤧᤴ ᤂᤧᤏᤧ᤹ ᤔᤠᤏᤢᤍᤡᤱ ᤁᤧᤶᤔᤠᤖᤥ॥ ᤂᤧᤏᤧ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥

⁸ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤒᤠᤖᤧ ᤁᤢᤔᤣᤳ ᤁᤧᤶᤔᤠ ᤐᤠ᤺ᤰᤔᤧᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤒᤠᤖᤧ ᤁᤢᤈᤠ᤺ᤳᤌᤡ ᤁᤧᤍᤣᤛᤢ᤹॥

⁹ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤴᤏᤧ᤹ ᤁᤧᤴᤛᤠ᤹ ᤀᤡᤃᤪ ᤁᤧᤶᤔᤠ ᤐᤠ᤺ᤰᤔᤠ ᤗᤧᤵᤔᤠᤱᤒᤠ ᤁᤡᤃᤪ ᤀᤠᤵᤑᤣᤰ ᤁᤧᤶᤒᤠ ᤗᤧᤵᤔᤠᤱᤒᤠ ᤁᤧᤴᤏᤧ᤹ ᤁᤧᤴᤛᤠ᤹ᤀᤡᤴ ᤜᤡᤶᤔᤥ ᤀᤡᤃᤪ ᤗᤠ᤺ᤰᤁᤠᤳ ᤛᤠᤃᤧᤘᤠ᤺ᤴᤇᤡᤱᤔᤠᤛᤠᤱ ᤂᤧᤴ ᤔᤣ᤺ᤳ ᤋᤣ᤹ᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥

¹⁰ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤛ᤻ᤛᤠ ᤕᤧᤶᤒᤡᤳᤇᤠ ᤗᤧᤵᤔᤠᤱᤒᤠᤛᤠᤱ ᤁᤧᤛ᤻ᤛᤠ ᤔᤧᤴᤇᤢᤔᤠ ᤗᤧᤵᤔᤠᤱᤒᤠᤛᤠᤱ ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤔᤧᤴᤇᤠ᤹ᤀᤡᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤢᤏᤧ᤹ᤗᤠᤶᤒᤠ ᤂᤧᤏᤧ᤹ ᤀᤠᤒᤠᤅᤣ ᤁᤢᤏᤠᤔᤧᤴᤇᤠ᤹ ᤁᤧᤈᤥ᤺ᤰᤛᤡᤱ᤹॥

¹¹ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤔᤠ ᤐᤠ᤺ᤰᤔᤠᤸᤗᤧ ᤁᤢᤛ᤻ᤛᤠ᤺ᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤧᤏᤧ᤹ ᤂᤧᤴ ᤁᤧᤔᤠᤱᤃᤧᤴᤏᤠ ᤁᤧᤴᤛᤠ᤹ᤖᤥ॥

¹² “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤴᤕᤠ᤹ᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤧᤴ ᤂᤧᤏᤧ᤹ ᤁᤧᤶᤒᤠᤖᤧ ᤏᤡ᤺ᤳᤋᤠᤱᤒᤠ ᤁᤢᤃᤠ᤹ᤀᤡᤖᤥ॥

¹³ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤔᤠᤖᤧ ᤁᤢᤴᤛᤠ᤹ ᤁᤧᤴᤇᤢᤔᤠᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤧᤴ ᤂᤧᤏᤧ᤹ ᤁᤧᤶᤔᤠᤖᤧ ᤏᤡ᤺ᤳᤋᤠᤱᤒᤠ ᤁᤢᤃᤠ᤹ᤀᤡᤖᤥ॥

¹⁴ “‘ᤂᤧᤏᤧ᤹ ᤁᤧᤴᤍᤢᤶᤔᤠ ᤀᤡᤃᤪ ᤁᤧᤴᤇᤢᤔᤠ᤺ᤴ ᤔᤣ᤺ᤳ ᤋᤣ᤹ᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤁᤧᤶᤒᤠᤖᤧ ᤁᤢᤴᤛᤠ᤹ ᤁᤢᤶᤓᤢ᤹ᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤧᤛᤧᤴᤏᤧ᤹॥ ᤂᤢᤏᤧ᤹ᤃ ᤂᤧᤏᤧ᤹ ᤁᤧᤴᤍᤢᤶᤔᤠ ᤀᤡᤃᤪ ᤁᤧᤴᤇᤢᤔᤠᤖᤥ॥

¹⁵ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤒᤠᤱᤗᤡ᤺ᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤧᤴ ᤂᤧᤏᤧ᤹ ᤁᤧᤛ᤻ᤛᤠ᤺ᤸᤗᤧ ᤁᤢᤔᤣ᤺ᤳᤗᤥ॥ ᤂᤧᤏᤧ᤹ ᤂᤧᤴᤏᤢ ᤔᤧᤀᤡᤵᤛᤧᤴᤏᤧ᤹॥

¹⁶ “‘ᤂᤧᤏᤧ᤹ ᤀᤠᤒᤠᤅᤣ ᤁᤧᤶᤓᤢ᤹ᤖᤧ ᤁᤢᤔᤣᤳ ᤀᤡᤃᤪ ᤁᤧᤴᤛᤠ᤹ᤖᤧ ᤁᤢᤔᤣ᤺ᤳᤋᤧᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤠᤱ ᤁᤧᤴᤛᤠ᤹ ᤁᤧᤶᤓᤢ᤹ᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤧᤛᤧᤴᤏᤧ᤹॥

¹⁷ “‘ᤁᤢᤓᤠ ᤔᤧᤴᤇᤢᤔᤠ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤏᤧᤵᤔᤠᤱᤏᤢ ᤂᤧᤏᤧ᤹ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤜᤧᤰᤁᤩᤠᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤀᤡᤃᤪ ᤁᤢᤛ᤻ᤛᤠ ᤔᤧᤴᤇᤢᤔᤠ ᤗᤧᤵᤔᤠᤱᤒᤠ ᤁᤢᤶᤔᤧᤴᤇᤠ᤹ᤀᤡᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤧᤴ ᤂᤢᤏᤧ᤹ ᤏᤡ᤺ᤳᤋᤠᤱᤒᤠ ᤁᤢᤃᤠ᤹ᤀᤡᤖᤥ॥ ᤜᤧᤰᤁᤣ ᤆᤥ᤺ᤰᤔᤠᤃ ᤑᤧᤴᤕᤠ᤺ᤶᤒᤰ ᤐᤥᤱ᤹॥

¹⁸ “‘ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤣ᤺ᤳᤋᤡᤴ ᤜᤡᤱᤅᤠᤱ ᤘᤠ᤹ᤖ ᤂᤢᤏᤧ᤹ ᤁᤢᤴᤏᤧ᤹ ᤀᤡᤃᤪ ᤁᤢᤴᤛᤠ᤹ᤀᤡᤴ ᤗᤠ᤹ᤔᤠ ᤔᤧᤍᤠᤖᤧᤴᤏᤧ᤹ᤀᤠᤱ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥

¹⁹ “‘ᤁᤢᤓᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤀᤠᤛᤢᤳᤌᤥ ᤐᤥᤱᤒᤠ ᤕᤧᤶᤔᤥ ᤂᤧᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥

²⁰ “‘ᤂᤧᤏᤧ᤹ ᤁᤧᤜᤡᤶᤒᤣᤛᤠᤱᤒᤧᤸᤗᤧ ᤁᤢᤔᤣᤳ ᤀᤣᤕᤠᤱᤔᤠ ᤔᤧᤴᤇᤢᤔᤠᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤀᤠᤵᤑᤣᤰ ᤀᤠᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤡᤴᤏᤧ᤹॥

²¹ “‘ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ ᤔᤥᤗᤥᤂ ᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤡᤔᤧᤎᤡᤰᤂᤧᤛᤧᤴᤏᤧ᤹ᤀᤠᤱ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤑᤧᤳᤔᤧᤗᤠ᤺ᤴᤍᤧᤴᤏᤧ᤹॥ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ॥

²² “‘ᤔᤧᤴᤇᤢᤔᤠᤜᤠ᤹ᤏᤢ ᤜᤧᤰᤁᤣ ᤂᤧᤏᤧ᤹ ᤕᤧᤶᤒᤡᤳᤇᤠ᤺ᤴᤏᤢ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹॥ ᤂᤧᤴ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤗᤥ॥

²³ “‘ᤀᤠᤳᤋᤡᤴ ᤌᤰᤛᤠ᤺ᤴᤏᤢᤀᤠᤱ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤠᤱ ᤀᤠᤒᤠᤅᤣ ᤀᤠᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤡᤴᤏᤧ᤹॥ ᤔᤧᤴᤇᤢᤔᤠᤴ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤌᤰᤛᤠ᤺ᤴᤏᤢ ᤔᤧᤀᤡᤶᤏᤧᤸᤗ॥ ᤂᤧᤴ ᤔᤧᤴᤘᤠ᤹ᤔᤏᤠᤒᤠ ᤑᤧᤴᤕᤠ᤺ᤶᤒᤰᤗᤥ॥

²⁴ “‘ᤀᤰᤋᤱᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤗᤠᤶ ᤀᤠᤵᤑᤣᤰ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤡᤴᤏᤧ᤹॥ ᤀᤠᤱᤃᤠ᤹ ᤂᤡᤏᤡ᤹ ᤋᤃᤡᤗᤠᤶᤒᤠ ᤗ᤺ᤵᤔᤠᤍᤣᤔᤠ ᤆᤥᤃᤢᤱᤛᤡᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤖᤧᤰ ᤀᤰᤋᤱᤒᤠ ᤐᤠ᤺ᤴᤜᤠ᤹ᤀᤥᤀᤣ ᤀᤠᤛᤢᤳᤌᤥ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥

²⁵ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤴ ᤗᤠᤈᤣᤴ ᤀᤠᤛᤢᤳᤌᤥ ᤐᤥ᤺ᤰᤂᤧᤒᤠᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤁᤢᤛᤶᤎᤠᤱ ᤂᤧᤸᤗᤧ ᤆᤥᤃᤢᤒᤠ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤖᤢᤱ. ᤂᤧᤒᤩᤠᤱ ᤂᤧᤴ ᤗᤠᤈᤣ᤺ᤸᤗᤧ ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤛᤢᤛᤡᤀᤠᤱ ᤗᤠᤵᤑᤣᤛᤢᤛᤡ॥

²⁶ ᤁᤖ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤛᤠᤱ ᤀᤡᤃᤪ ᤂᤡᤏᤡ᤹ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤛᤠᤱ. ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤎᤡᤶᤜᤠ᤹ ᤀᤡ᤺ᤳᤋᤠᤶ ᤏᤠ᤺ᤳᤋᤠᤶᤔᤧ᤹. ᤂᤧᤒᤩᤠᤱ ᤀᤰᤋᤱᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤧᤶᤔᤡᤴᤏᤧ᤹॥

²⁷ ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤂᤧᤴ ᤗᤠᤈᤣ᤹ᤀᤥ ᤋᤃᤡ ᤁᤧᤕᤢᤱᤒᤠᤜᤠ᤹ᤖᤧ ᤔᤧᤈᤥᤃᤢ. ᤂᤶᤓᤩᤠᤱ ᤂᤧᤴ ᤗᤠᤈᤣᤴ ᤀᤠᤛᤢᤳᤌᤥ ᤐᤥ᤺ᤰᤂᤧ॥

²⁸ ᤀᤠᤱᤃᤠ᤹ ᤀᤠᤛᤠᤶᤕᤥ ᤛᤠᤰᤌᤡᤶᤜᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤠᤱ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤀᤠᤛᤢᤳᤌᤥ ᤁᤧᤈᤥᤃᤢᤶᤏᤧᤓᤃᤪ ᤂᤧᤵᤔᤥ ᤋᤃᤡ ᤁᤧᤕᤢᤱᤒᤠᤜᤠ᤹ ᤜᤧᤰᤁᤣ ᤂᤡᤏᤡ᤹ᤀᤠᤱ ᤂᤧᤴ ᤗᤠᤈᤣ᤺ᤸᤗᤧ ᤁᤧᤀᤛᤡᤀᤠᤱ ᤗᤠᤵᤁᤧᤍᤧᤛᤡ᤹॥

²⁹ ᤁᤴᤜᤠ᤹ᤀᤥᤒᤠ ᤀᤠᤳᤋᤡᤸᤗᤧ ᤁᤢᤓᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤆᤥᤃᤢᤏᤧᤓᤃᤪ ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶᤒᤠ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥

³⁰ “‘ᤁᤸᤗᤧᤆᤥᤃᤢᤸᤗᤧ ᤀᤢᤴᤇᤥᤴ ᤀᤢᤴᤇᤥ᤺ᤴᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤔᤧᤈᤥᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤡᤴᤏᤧ᤹ ᤑᤠ᤹ᤀᤠᤱ ᤐᤡᤏᤡᤱᤒᤠ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤳᤋᤠᤶ ᤏᤠ᤺ᤳᤋᤠᤶᤔᤧ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’”