ᤗᤧᤒᤡ 17 - LIFOTNT

ᤛᤠᤔᤠᤰᤂᤡ᤹ ᤆᤠᤔᤠ ᤔᤧᤏᤢ᤹ᤏᤧᤴ

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

² “ᤂᤧᤏᤧ᤹ ᤜᤠᤖᤢᤏᤧᤴ. ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤁᤴᤜᤠ᤹ᤖᤥ—

³ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤳᤋᤡᤸᤗᤧ ᤛᤠ᤺ᤱᤃᤠᤜᤡᤶᤜᤠ᤹ ᤛᤡᤃᤠᤱ ᤀᤡᤃᤪ ᤗᤠ᤺ᤰᤁᤠᤳ ᤐᤡᤳ. ᤔᤧᤸᤗᤢᤰᤛᤠ᤺ᤳ ᤁᤡᤃᤪ ᤔᤧ᤺ᤴᤍᤠᤰ ᤆᤩᤠ ᤛᤧᤖᤢ᤹.

⁴ ᤜᤧᤰᤁᤩᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤕᤢᤱᤍᤧᤴ ᤋᤃᤡ ᤗᤧᤵᤔᤠᤱ ᤛᤡᤍᤢᤱᤛᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤔᤧᤍᤠᤖᤢᤴ. ᤂᤧᤴ ᤔᤏᤠᤴ ᤔᤠᤰᤂᤡ᤹ᤀᤡᤸᤗᤧ ᤋᤧᤳᤋᤢᤖ॥ ᤂᤧᤸᤗᤧ ᤔᤠᤰᤂᤡ᤹ ᤘᤍᤣ᤺ᤴᤍᤢᤀᤠᤱ ᤘᤠ᤹॥ ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥

⁵ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤜᤠ᤹ ᤗᤠ᤺ᤰᤁᤠᤳ ᤋᤠᤶᤍᤠᤶᤒᤠᤍᤧᤴᤏᤥ ᤛᤡᤍᤢᤱᤈᤓᤠ ᤔᤧᤴᤍᤥ᤺ᤴᤍᤢᤴᤗ ᤑᤠ᤹ᤀᤠᤱ ᤁᤴ ᤀᤡᤱᤈᤠᤱᤅᤡᤴ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤀᤣ ᤋᤠ᤺ᤵᤔᤠᤛᤡᤀᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤜᤧᤰᤁᤣ ᤋᤥ᤺ᤶᤔᤠᤛᤡ ᤐᤥᤱ᤹॥

⁶ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤠᤰᤂᤡᤴ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤠᤰᤂᤢᤖ. ᤜᤧᤰᤁᤩᤠᤱ ᤁᤢᤛᤥ᤺ᤳᤋᤡᤴ ᤆᤠᤜᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤁᤢᤏᤠᤶᤃᤧᤏᤢ᤹ᤒᤠ ᤁᤢᤏᤠᤶ ᤐᤥᤱᤔᤠᤖᤧ ᤗᤠᤃᤡ ᤔᤡᤎᤡᤰᤂᤢᤍᤣᤛᤢᤖ॥

⁷ ᤂᤧᤱᤜᤠ᤹ᤖᤧ ᤀᤠᤸᤗ ᤔᤧ᤺ᤴᤍᤠ ᤏᤠᤖᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤶᤔᤧᤳᤋᤢᤛᤡᤴᤗ ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤍᤥᤴᤍᤢᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤀᤠᤱᤃᤠ᤹ᤏᤢ ᤏᤛᤠᤴ ᤁᤧᤗᤧᤱᤒᤠ ᤆᤥᤃᤢᤛᤡᤀᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤧᤰᤋᤱᤒᤠ ᤔᤧᤈᤥᤃᤢᤛᤡᤴᤗ॥ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤠ᤺ᤰᤗᤧ ᤗᤠᤃᤡ ᤁᤴ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗ॥’

⁸ “ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤀᤡᤛᤪᤠᤀᤡᤗᤡᤜᤠ᤹ ᤀᤡᤃᤪ ᤂᤧᤱᤜᤠ᤹ᤏᤢ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤀᤡᤃᤪ ᤁᤢᤓᤠ ᤘᤣ᤹ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤸᤗᤧ

⁹ ᤀᤠᤳᤋᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤴ ᤋᤥ᤺ᤴᤇᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤔᤧᤍᤠᤖᤢᤴ. ᤂᤧᤴ ᤔᤏᤠᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖ॥

¹⁰ “‘ᤀᤡᤛᤪᤠᤀᤡᤗᤡᤜᤠ᤹ ᤀᤡᤃᤪ ᤂᤧᤱᤜᤠ᤹ᤏᤢ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤀᤥ ᤁᤢᤓᤠᤖᤧ ᤀᤠᤳᤋᤡᤴ ᤛᤠᤔᤠᤰᤂᤡᤴᤇᤠᤱ ᤆᤏᤧᤓᤃᤪ. ᤂᤧᤴ ᤔᤠᤰᤂᤡ᤹ ᤁᤧᤈᤠᤒᤧᤴ ᤀᤠᤱᤃᤠ᤹ ᤀᤳᤋᤢᤱ᤹. ᤜᤧᤰᤁᤩᤠᤱ ᤂᤧᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤗᤠᤶ ᤗ᤺ᤳᤋᤢᤱᤍᤣᤛᤢᤱ᤹.

¹¹ ᤌᤣᤀᤠᤱᤓᤧᤸᤗᤧ ᤁᤢᤛᤰᤔᤠ ᤁᤧᤕᤠᤰᤐᤠ ᤌᤰᤛᤠ ᤐᤢᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠᤴ ᤔᤠᤰᤂᤡ᤹ᤀᤥ ᤕᤠᤰ॥ ᤀᤠᤱᤃᤠ᤹ ᤔᤠᤰᤂᤡᤴ ᤆᤠᤜᤣ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤡᤏᤡ᤹ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤐᤡᤏᤡᤱᤅᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤔᤠᤰᤂᤡ᤹ᤗᤠᤶᤒᤠᤀᤣ ᤔᤧᤴᤇᤠᤶ ᤕᤠᤵᤔᤡ ᤜᤡᤱᤔᤴᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤐᤥᤱ᤹॥

¹² ᤁᤸᤗᤧ ᤆᤢᤃᤢᤸᤗᤧ ᤂᤡᤏᤡ᤹ ᤀᤡᤃᤪ ᤂᤡᤏᤡ᤹ᤏᤢ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤀᤥ ᤀᤠᤳᤋᤡᤸᤗᤧᤀᤠᤱ ᤔᤠᤰᤂᤡ᤹ ᤔᤧᤈᤏᤧᤴᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤱᤛᤡᤱᤒᤠᤖᤥ॥

¹³ “‘ᤀᤡᤛᤪᤠᤀᤡᤗᤡᤜᤠ᤹ ᤀᤡᤃᤪ ᤂᤡᤏᤡ᤹ᤏᤢ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤀᤥ ᤀᤠᤳᤋᤡᤸᤗᤧ ᤛᤠᤏᤠ᤺ᤵᤔᤠ ᤆᤠᤔᤠ ᤁᤧᤏᤢ᤹ᤒᤠ ᤁᤢᤓᤠ ᤌᤰᤛᤠ ᤀᤡᤃᤪ ᤐᤢ᤺ᤴ ᤋᤧᤶᤛᤢ᤹. ᤂᤢᤏᤧ᤹ ᤂᤧᤸᤗᤧ ᤁᤧᤖᤧᤰ ᤁᤢᤔᤠᤰᤂᤡᤴ ᤛᤡ᤺ᤵᤋᤢᤗ᤺ᤳᤋᤢᤀᤠᤱ ᤂᤠᤶᤔᤡᤸᤗᤧ ᤗᤢᤵᤋᤢᤖ॥

¹⁴ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤁᤢᤛᤰᤔᤠ ᤁᤧᤕᤠᤰᤐᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤌᤰᤛᤠ ᤐᤢᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ᤀᤥ ᤕᤠ᤺ᤰ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹—“ᤀᤠᤳᤋᤡᤴ ᤁᤢᤜᤡᤱᤘᤧᤳ ᤌᤰᤛᤠ ᤐᤢᤛᤠ᤺ᤸᤗᤧ ᤁᤢᤔᤠᤰᤂᤡᤴᤏᤠᤱ ᤔᤧᤈᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠ ᤐᤢᤛᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠᤴ ᤂᤢᤴᤇᤡ᤹ ᤔᤠᤰᤂᤡ᤹ᤀᤥ ᤕᤠᤰ॥ ᤂᤧᤴ ᤔᤠᤰᤂᤡ᤹ ᤁᤧᤈᤠᤒᤠ ᤀᤠᤳᤋᤡᤴᤇᤠᤱ ᤗ᤺ᤵᤔᤠᤍᤣᤔᤠ ᤐᤥᤱ᤹॥”

¹⁵ “‘ᤗᤠᤈᤣ᤹ᤀᤥᤒᤠᤛᤠᤱ ᤀᤡᤃᤪ ᤘᤣ᤹ ᤗᤠᤈᤣ᤹ᤒᤠᤛᤠᤱ ᤜᤠ᤺ᤳᤗᤧ ᤀᤠᤵᤑᤣᤰ ᤁᤧᤛᤡᤒᤠ ᤀᤡᤃᤪ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤓᤢᤕᤢᤒᤠ ᤛᤠᤴ ᤆ᤹᤺. ᤂᤧᤸᤗᤧ ᤂᤢᤏᤧ᤹ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ ᤐᤥᤱ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤆᤫᤠ᤺ᤳᤋᤥ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥

¹⁶ ᤁᤖ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤔᤧᤜᤵᤋᤢᤴ ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤘᤠᤔᤧᤖᤢ᤺ᤶᤛᤡᤱᤅᤧᤴᤏᤧᤓᤃᤪ ᤂᤧᤸᤗᤧ ᤗᤠᤃᤡ ᤂᤢᤏᤧ᤹ ᤂᤢᤶᤍᤡᤱ ᤐᤡᤔᤠᤀᤣ ᤐᤥᤱᤗᤥ॥’”