ᤗᤧᤒᤡ 16 - LIFOTNTᤀᤠᤵᤋᤡᤰᤗᤠᤶ ᤛᤢᤳᤌᤥ ᤐᤥᤱᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤴ 1 ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤏᤧᤳᤇᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤣᤛᤠᤱ ᤐᤣᤛᤧᤳᤇᤡᤸᤗᤧ ᤂᤢᤴᤇᤡ᤹ ᤛᤩᤧᤛᤡ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤴ ᤔᤥᤛᤠ᤺ᤴᤏᤢ ᤐᤠᤖᤧ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤓᤢ᤹ ᤜᤠᤖᤢᤏᤧᤴ ᤛᤴᤍᤥᤰᤁᤡᤸᤗᤧ ᤁᤢᤛᤶᤎᤠᤱ ᤁᤧᤕᤢᤱᤒᤠ ᤁᤢᤍᤧᤵᤑᤣᤸᤗᤧ ᤁᤢᤍᤃᤡ ᤑᤥ᤺ᤴᤍᤠ ᤛᤡᤃᤠᤱᤒᤠ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤁᤢᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤔᤧᤍᤠᤏᤧᤴᤗ ᤑᤠ᤹ᤀᤠᤱ ᤔᤧᤳᤋᤧ᤹॥ ᤔᤣ᤺ᤴᤏᤧᤓᤃᤪ ᤂᤢᤏᤧ᤹ ᤛᤡᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤴᤍᤥᤰᤁᤡᤸᤗᤧ ᤁᤢᤛᤶᤔᤥᤒᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤁᤢᤍᤧᤵᤑᤣ᤺ᤸᤗᤧ ᤁᤢᤛᤶᤎᤠᤱ ᤂᤠ᤹ᤔᤡ᤺ᤳᤋᤥ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤱ ᤐᤥᤱᤅᤠ॥ 3 “ᤜᤠᤖᤢᤏᤧᤴ ᤛᤣᤛᤣᤍᤧᤴᤏᤥ ᤗᤠ᤺ᤵᤔᤠᤏᤢ᤺ᤸᤗᤧ ᤋᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤛᤧᤃᤶᤒᤠ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤔᤧᤸᤗᤢᤰ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤋᤠᤖᤖᤥ॥” 4 ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤛᤣᤛᤣᤒᤠ ᤗᤃᤣ᤺ᤵ. ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤛᤡᤃᤠᤱ ᤆᤠᤱᤔᤠ ᤆᤠᤱ. ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤑ᤹ᤀᤡ. ᤜᤧᤰᤁᤩᤠᤱ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤐᤠᤃᤖᤡ ᤂᤢ᤺ᤰᤛᤢᤀᤠᤱ ᤋᤠᤖ॥ ᤂᤧᤱᤜᤠ᤹ ᤛᤣᤛᤣᤒᤠ ᤆᤠᤱᤗᤥ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤘᤠᤖᤢ᤺ᤶᤛᤡᤱᤅᤠᤱᤗᤰ ᤂᤧᤴ ᤆᤠᤱᤜᤠ᤹ ᤆᤠᤰᤂᤢᤖ॥ 5 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤱᤈᤢᤶᤓᤥᤀᤥᤗᤠᤶ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤔᤧ᤺ᤴᤍᤠ ᤏᤧᤳᤇᤡ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤔᤧᤸᤗᤢᤰ ᤂᤧᤸᤗᤧ ᤋᤠᤖᤢᤖ॥ 6 “ᤂᤧᤴ ᤀᤣᤃᤠᤱ ᤜᤠᤖᤢᤏᤧᤸᤗᤧ ᤂᤢᤏᤧ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤛᤧᤃᤶᤒᤠᤴ ᤋᤥ᤺ᤴᤍᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤏᤢ ᤀᤠᤒᤠᤅᤣ ᤁᤢᤜᤡᤶᤛᤕᤱᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ 7 ᤂᤧᤒᤩᤠᤱ ᤂᤧᤸᤗᤧ ᤂᤧᤴ ᤏᤧᤵᤔᤠᤱ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤕᤠᤱᤛᤡᤱᤅᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋᤠᤖᤢᤖ॥ 8 ᤂᤧᤴ ᤀᤣᤃᤠᤱ ᤜᤠᤖᤢᤏᤧᤸᤗᤧ ᤏᤧᤵᤔᤠᤱ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ᤀᤥ ᤋ᤹ᤕᤠ᤺ᤴᤛᤥᤴ ᤁᤧᤛᤢᤖ. ᤗᤳᤇᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤢ ᤘᤣ᤹ᤀᤡᤴ ᤗᤧᤵᤔᤏᤠᤍᤣᤔᤏᤠᤒᤠ ᤔᤧ᤺ᤴᤍᤒᤁᤠ ᤐᤥᤱᤔᤠᤖᤧ ᤗᤠᤃᤡ॥ 9 ᤋ᤹ᤕᤠ᤺ᤴᤛᤥ᤺ᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤰᤁᤥ ᤁᤧᤎᤠᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤴ ᤆᤠᤜᤣ ᤜᤠᤖᤢᤏᤧᤸᤗᤧ ᤏᤡ᤺ᤳᤋᤠᤱ ᤋᤠᤖᤢᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤂᤧᤴ ᤋᤥ᤺ᤴᤍᤢᤖ॥ 10 ᤁᤖ ᤋ᤹ᤕᤠ᤺ᤴᤛᤥ᤺ᤴᤏᤥ ᤗᤧᤵᤔᤏᤠᤍᤣᤔᤏᤠᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤗᤰᤁᤥ ᤁᤧᤎᤠᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤢᤜᤡᤱᤘᤧᤳᤋᤣ ᤔᤧᤍᤠᤖᤢᤖ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤗᤧᤖᤢ ᤔᤧᤍᤣᤛᤢᤖ॥ 11 “ᤜᤠᤖᤢᤏᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤁᤢᤛᤡᤍᤢᤱᤈᤓᤠ ᤛᤧᤃᤶᤒᤠᤴ ᤋᤠᤖᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤛᤧᤃᤶᤒᤠᤴ ᤛᤧᤖᤢᤖ॥ 12 ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡ᤺ᤸᤗᤧ ᤁᤧᤍᤡᤶᤒᤠ ᤛᤠᤱᤋᤧᤖᤧ᤺ᤱᤅᤡᤴ ᤏᤢ ᤔᤧᤜᤠᤃᤢᤒᤠ ᤁᤧᤛᤠ᤺ᤶᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤧᤴ ᤐᤧ᤺ᤱᤃᤥ᤹ ᤌᤡᤰ ᤁᤢᤗᤧ᤺ᤶ ᤕᤠᤱᤛᤡᤱᤅᤠᤱ ᤑᤥ᤺ᤴᤍᤠ ᤛᤡᤃᤠᤱ ᤋᤠᤖᤢᤖ॥ 13 ᤂᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤒᤠ ᤔᤡᤀᤥ ᤛᤢᤰᤐᤠ ᤁᤣ᤺ᤳᤋᤢᤖ. ᤜᤧᤰᤁᤩᤠᤱ ᤛᤢᤰᤐᤠᤀᤥᤒᤠ ᤔᤡ᤺ᤰᤂᤢᤸᤗᤧ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤛᤶᤎᤠᤱ ᤁᤧᤕᤢᤱᤒᤠ ᤁᤢᤍᤧᤵᤑᤣᤴ ᤋᤧᤵᤋᤢᤖ. ᤔᤣ᤺ᤴᤏᤧᤓᤃᤪ ᤂᤧᤴ ᤛᤡᤖᤥ॥ 14 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤧᤃᤶᤒᤧᤸᤗᤧ ᤁᤢᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤜᤢᤰᤆᤥ᤺ᤸᤗᤧ ᤁᤢᤍᤧᤵᤑᤣ᤺ᤸᤗᤧ ᤁᤢᤍᤃᤡ ᤛᤠᤰᤂᤢᤖ. ᤜᤧᤰᤁᤩᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤁᤢᤍᤧᤵᤑᤣ᤺ᤸᤗᤧ ᤁᤢᤍᤃᤡ ᤗᤧᤵᤔᤠᤱ ᤂᤢᤏᤧ᤹ ᤁᤢᤜᤢᤰᤆᤥ᤺ᤸᤗᤧ ᤂᤧᤴ ᤔᤠᤰᤂᤡᤴ ᤏᤢᤛᤡᤗᤧᤱ ᤌᤠᤖᤡᤰ ᤛᤠᤰᤂᤢᤖ॥ 15 “ᤂᤧᤒᤩᤠᤱ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤡᤍᤢᤱᤈᤓᤠ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤴ ᤛᤧᤖᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤠᤰᤂᤡᤴ ᤑᤥ᤺ᤴᤍᤠ ᤛᤡᤃᤠᤱ ᤋᤠᤖᤢᤀᤠᤱ ᤛᤧᤃᤶᤒᤧᤸᤗᤧ ᤁᤢᤔᤠᤰᤂᤡᤴ ᤜᤧᤰᤁᤣ ᤁᤢᤍᤧᤵᤑᤣ᤺ᤸᤗᤧ ᤁᤢᤛᤶᤎᤠᤱ ᤏᤢ ᤁᤢᤍᤧᤵᤑᤣ᤺ᤸᤗᤧ ᤁᤢᤍᤃᤠᤱ ᤛᤠᤰᤂᤢᤖ॥ 16 ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤛᤢᤳᤌᤥ. ᤑᤧᤴᤕᤠ᤺ᤶᤒᤰ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤡᤸᤗᤧ ᤗᤠᤃᤡ ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤛᤢᤳᤌᤥ ᤗᤢᤶᤔᤥ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤗᤠᤃᤡᤀᤠᤱ ᤂᤧᤸᤗᤧ ᤜᤧᤰᤁᤣᤀᤣ ᤆᤥᤃᤢᤖ॥ 17 ᤀᤠᤸᤗ ᤜᤠᤖᤢᤏᤧᤴ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤗᤠ᤺ᤳ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤗᤠᤃᤡ. ᤂᤢᤏᤧ᤹ ᤀᤠᤒᤠᤅᤣ ᤁᤢᤜᤡᤶᤛᤕᤱᤗᤧ ᤗᤠᤃᤡ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤖᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤀᤠᤱ ᤔᤧᤴᤏᤢ᤺ᤱ ᤔᤧᤸᤗ᤺ᤴᤏᤣ ᤌᤠᤖᤡᤰ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤜᤠ᤺ᤳᤋᤠᤱ ᤔᤧᤗᤠ᤺ᤳᤏᤧᤴᤗ॥ 18 “ᤂᤧᤒᤩᤠᤱ ᤂᤧᤸᤗᤧ ᤗᤠ᤺ᤰᤁᤠᤳ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤐᤣ᤺ᤰᤁᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤸᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ ᤜᤧᤰᤁᤩᤠᤱ ᤛᤧᤃᤶᤒᤠᤴ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤀᤠᤈᤧ᤺ᤳᤇᤡᤰ ᤕᤠᤱᤛᤡᤱᤅᤠᤱ ᤁᤧᤖᤧᤰ ᤐᤡᤛᤠᤱᤒᤠ ᤋᤠᤱᤜᤠ᤹ᤀᤥ ᤜᤢ᤺ᤳᤋᤢᤖ॥ 19 ᤔᤠᤰᤂᤡ᤹ᤀᤥᤗᤠᤶ ᤁᤢᤜᤢᤰᤆᤥ᤺ᤸᤗᤧ ᤏᤢᤛᤡᤗᤧᤱ ᤌᤠᤖᤡᤰ ᤂᤧᤸᤗᤧ ᤁᤢᤛᤶᤎᤠᤱ ᤛᤠᤰᤂᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤛᤢᤳᤌᤥᤗᤠᤶ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤢᤳᤌᤥ ᤏᤢ ᤛᤣᤛᤣ ᤆᤥᤃᤢᤖᤖᤥ॥ 20 “ᤀᤠᤸᤗ ᤜᤠᤖᤢᤏᤧᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴ. ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤛᤢᤖᤢᤀᤠᤱ ᤂᤧᤸᤗᤧ ᤁᤢᤜᤡᤱᤘᤧᤳ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤴ ᤋᤠᤖᤢᤖ॥ 21 ᤜᤧᤰᤁᤩᤠᤱ ᤜᤠᤖᤢᤏᤧᤸᤗᤧ ᤂᤢᤏᤧ᤹ ᤏᤧᤵᤔᤠᤱ ᤁᤢᤜᤢᤰᤜᤠ᤹ ᤁᤢᤜᤡᤱᤘᤧᤳ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤖ. ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰ. ᤐᤡᤑᤩᤢᤱ ᤏᤢ ᤗᤠᤕᤥ ᤆᤥᤃᤢᤶᤒᤧ ᤗ᤹ᤖᤡᤰ ᤐᤠ᤺ᤵᤔᤠ ᤔᤧᤍᤧᤴᤏᤠᤱ ᤂᤧᤴ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤔᤧᤎᤠᤛᤢᤖ॥ ᤂᤢᤏᤧ᤹ ᤂᤧᤴ ᤗᤠᤕᤥᤜᤠ᤹ ᤁᤢᤶᤒᤠᤒᤠ ᤔᤧᤴᤍᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤀᤠᤱ ᤂᤢᤏᤧ᤹ ᤋᤃᤡᤀᤠᤱᤎᤥᤀᤣ ᤔᤢᤖᤠᤔᤧᤳᤋᤢᤒᤠ ᤔᤏᤠ᤺ᤴᤏᤢ ᤛᤥᤖᤡᤰ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤴ ᤔᤧ᤺ᤴᤍᤠ᤺ᤴ ᤐᤠᤱᤄᤢᤍᤣᤛᤢᤖ॥ 22 ᤁᤶᤓᤗ᤹ᤖᤡᤰ ᤂᤧᤴ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤆᤡᤈᤡ ᤂᤰᤂᤰᤐᤠᤍᤧᤴᤏᤥ ᤁᤢᤕᤢᤍᤣ᤹ᤖᤢᤖ. ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤧᤖᤢᤍᤣᤛᤢᤖ॥ 23 “ᤂᤧᤴ ᤀᤣᤃᤠᤱ ᤜᤠᤖᤢᤏᤧᤴ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤗᤠ᤺ᤵᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤏᤤᤏᤠᤛᤢᤳ ᤁᤢᤈᤠᤱᤜᤠ᤹ ᤆᤠᤰᤛᤡᤱᤗ॥ ᤂᤢᤏᤧ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤗᤠᤶ ᤗ᤺ᤴᤏᤡᤸᤗᤧ ᤂᤢᤏᤧ᤹ ᤆᤠᤰᤂᤢᤒᤠ ᤏᤤᤏᤠᤛᤢᤳ ᤆᤠᤱᤜᤠ᤹ ᤑᤧᤴᤍᤢᤀᤠᤱ ᤀᤠᤶᤓᤠ ᤂᤧᤵᤔᤥ ᤏᤧᤛ᤻ᤛᤢᤎᤖ॥ 24 ᤂᤢᤏᤧ᤹ ᤁᤢᤓᤠ ᤛᤣᤛᤣᤒᤠ ᤆᤫᤠ᤺ᤳ ᤁᤧᤏᤧᤒᤠᤍᤧᤴᤏᤥ ᤘᤠᤖᤢ᤺ᤶᤛᤡᤱᤗ. ᤜᤧᤰᤁᤩᤠᤱ ᤁᤢᤈᤠᤱᤜᤠ᤹ ᤆᤠᤰᤛᤡᤱᤅᤠᤱ ᤋᤠᤖᤖᤥ॥ ᤂᤧᤒᤩᤠᤱ ᤀᤠᤒᤠᤅᤣ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ 25 ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤥ᤺ᤳᤋᤡᤴᤏᤠᤱ ᤂᤧᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤰᤂᤢᤖ॥ 26 “ᤁᤢᤒᤠ᤺ᤵᤐᤠ᤺ᤳ ᤘᤠ᤹ᤔᤠ ᤁᤧᤄᤥᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠ ᤗᤧᤳᤇᤧ ᤁᤧᤒᤣ᤺ᤰᤐᤠ ᤔᤏᤠ᤺ᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤋᤢᤀᤠᤱ ᤂᤢᤏᤧ᤹ ᤘᤠᤖᤢ᤺ᤶᤛᤡᤱᤗ. ᤂᤧᤒᤩᤠᤱ ᤂᤧᤴ ᤀᤣᤃᤠᤱ ᤂᤧᤴ ᤛᤠ᤺ᤱᤃᤠᤜᤡᤶᤔᤥ ᤏᤢ᤺ᤱᤍᤠᤖ॥ 27 ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤛᤧᤃᤶᤒᤠᤴ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤔᤠᤰᤂᤡᤴ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤥ ᤔᤧᤍᤠᤖᤢᤀᤠᤱ ᤘᤕᤧ. ᤂᤧᤴ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤋᤣ᤹ᤖᤢᤀᤠᤱ ᤛᤠᤜᤥᤖᤡᤰᤜᤠ᤹. ᤛᤠᤜᤠ᤹ ᤏᤢ ᤐᤡ᤹ᤜᤡᤜᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤔᤡᤎᤡᤰᤂᤢᤍᤣᤛᤢᤖ ᤐᤥᤱ᤹॥ 28 ᤂᤧᤴ ᤔᤡᤃᤧᤎᤡᤱᤒᤠᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤋᤢᤀᤠᤱ ᤂᤢᤏᤧ᤹ ᤘᤠᤖᤢ᤺ᤶᤛᤡᤱᤗ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤋᤠᤖᤖᤥ॥ ᤀᤠᤵᤋᤡᤰᤗᤠᤶ ᤛᤢᤳᤌᤥ ᤐᤥᤱᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤴ ᤋᤥᤔᤠ ᤌᤡᤶ 29 “ᤂᤡᤏᤡ᤹ ᤗᤠᤃᤡ ᤁᤴ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗ॥ ᤏᤢᤛᤡᤃᤣᤰᤐᤠ ᤗᤠ ᤌᤡᤒᤥᤱ ᤕᤧᤴᤏᤥ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤏᤠ᤹ᤀᤠᤛᤡᤶᤔᤧ᤹॥ ᤗᤠᤈᤣ᤹ᤀᤥ ᤂᤡᤏᤡ᤹ ᤛᤠᤃᤧᤘᤠ᤺ᤴᤇᤡᤱᤒᤠᤏᤡᤱᤛᤠᤱ. ᤀᤡᤃᤪ ᤂᤡᤏᤡ᤹ᤗᤢᤶᤔᤥ ᤁᤧᤘᤠ᤹ᤒᤠ ᤘᤣ᤹ ᤗᤠᤈᤣ᤹ᤒᤠᤛᤠᤱ. ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤌᤧᤔᤠ ᤐᤖᤡᤰᤗᤧᤴᤏᤠᤱ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. 30 ᤌᤣᤀᤠᤱᤓᤧᤸᤗᤧ ᤜᤠᤒᤠ ᤂᤧᤴ ᤕᤧᤴᤏᤥ ᤂᤡᤏᤡ᤹ ᤛᤢᤳᤌᤥ ᤆᤥ᤺ᤰᤔᤠᤏᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠ ᤐᤥᤱ᤹॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤖᤧᤰ ᤗᤠᤕᤥᤗᤠᤶ ᤂᤡᤏᤡ᤹ ᤛᤢᤳᤌᤥ ᤁᤧᤒᤥ᤺ᤰᤂᤡ᤹॥ 31 ᤂᤧᤴ ᤕᤧᤴᤏᤡᤱᤃ ᤛᤠ᤹ᤖᤡᤰ ᤛᤣᤛᤣᤒᤠ ᤕᤧᤴᤗᤥ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤋ᤺ᤰᤏᤧᤳ ᤕᤢᤅᤧᤶᤔᤧ᤹ ᤜᤧᤰᤁᤩᤠᤱ ᤕᤠ᤺ᤶᤒᤰ ᤌᤣᤀᤠᤱ ᤔᤧᤈᤥᤃᤧᤶᤔᤡᤴᤏᤧ᤹॥ ᤁᤴ ᤌᤡᤶᤜᤠ᤹ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ᤹॥ 32 ᤔᤠᤱᤌᤥ᤺ᤰᤏᤠ ᤔᤧᤒᤡᤖᤢᤒᤠ ᤏᤢ ᤁᤢᤶᤒᤠᤖᤧ ᤁᤢᤗᤧᤰᤘᤠᤀᤥ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤜᤠᤳ ᤕᤢᤰᤋᤡᤱ ᤐᤥ᤺ᤰᤂᤧᤀᤠᤱ ᤘᤠ᤹. ᤀᤠᤶᤓᤠ ᤂᤢᤏᤧ᤹ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤛᤣᤛᤣ ᤏᤤᤏᤠᤛᤢᤳ ᤆᤠᤱᤜᤠ᤹ ᤆᤠᤰᤂᤢᤖ॥ 33 ᤂᤧᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴ. ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤱᤈᤢᤶᤓᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢᤖ॥ 34 “ᤁᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤛᤍᤠᤍᤡᤱᤒᤠ ᤌᤡᤶ ᤐᤥᤱᤗ—ᤋᤱᤒᤣᤖᤧ ᤌᤡᤰᤗᤧᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤋᤢᤖ॥” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤜᤧᤰᤁᤣᤀᤣ ᤆᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.