ᤗᤧᤒᤡ 15 - LIFOTNTᤌᤰᤁᤥᤏᤢ ᤁᤧᤗ᤺ᤶᤒᤠ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 2 “ᤀᤡᤛᤪᤠᤀᤡᤗᤡᤜᤠ᤹ ᤂᤡᤴᤇᤡ᤹ ᤀᤰᤂᤣ ᤔᤧᤳᤋᤧᤇᤧᤛᤧ᤹. ‘ᤁᤢᤓᤠ ᤕᤧᤶᤒᤡᤳᤇᤠ ᤔᤏᤠᤴ ᤛᤧᤔᤧᤘᤠ ᤘᤕᤠᤔᤠ ᤋᤢᤰᤔᤧᤸᤗᤧ ᤋᤖᤢᤏᤧᤓᤃᤪ. ᤂᤧᤴ ᤛᤧᤔᤧᤘᤠᤴ ᤀᤠᤛᤢᤳᤌᤥ ᤐᤥᤱ᤹॥ 3 ᤂᤧᤸᤗᤧ ᤁᤢᤎᤰᤁᤥᤗᤠᤶᤒᤠ ᤆᤰᤔᤧᤸᤗ᤹ᤀᤣ ᤘᤕᤠᤛᤢ᤹. ᤀᤡᤃᤪ ᤘᤕᤠᤔᤠ ᤏᤠ᤹ᤛᤠᤱ ᤂᤧᤸᤗᤧ ᤔᤏᤠᤴ ᤀᤠᤛᤢᤳᤌᤥᤀᤣ ᤆᤥᤃᤢ᤹॥ ᤀᤰᤂᤣᤗ᤹ᤖᤡᤰ ᤂᤧᤴ ᤛᤧᤔᤧᤘᤠ᤺ᤸᤗᤧ ᤔᤏᤠᤀᤥ ᤀᤠᤛᤢᤳᤌᤥ ᤋᤠᤖᤢ᤹— 4 “‘ᤘᤕᤢᤔᤠ ᤋᤢᤰᤔᤧᤸᤗᤧ ᤁᤧᤍᤶᤒᤠ ᤂᤧᤴ ᤔᤏᤠᤴ ᤏᤧᤒᤠ. ᤕᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤛᤢᤳᤌᤥ ᤐᤥᤱ᤹॥ 5 ᤀᤠᤳᤋᤡᤸᤗᤧ ᤂᤧᤸᤗᤧ ᤁᤢᤏᤧᤳᤏᤠᤴ ᤛᤢᤛᤢ. ᤂᤧᤴ ᤁᤧᤛᤢᤒᤠ ᤔᤏᤠ᤺ᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤆᤫᤠ᤺ᤳᤋᤥ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱᤔᤠ ᤐᤥᤱ᤹॥ 6 ᤛᤧᤔᤧᤘᤠ ᤘᤕᤠᤔᤠ ᤋᤢᤰᤔᤧᤸᤗᤧ ᤁᤧᤍᤶᤒᤠ ᤔᤏᤠᤴ ᤕᤢᤱᤒᤠ ᤌᤧᤔᤠ ᤐᤠ᤺ᤴᤏᤥᤛᤠᤱ ᤜᤠᤳ ᤕᤢᤱ᤹ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤀᤠᤵᤑᤣᤰᤁᤠᤱ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 7 “‘ᤀᤠᤳᤋᤡᤸᤗᤧ ᤘᤕᤠᤔᤠ ᤋᤢᤰᤔᤧᤸᤗᤧ ᤋᤖᤢᤒᤠ ᤔᤏᤠᤴ ᤛᤢᤛᤢ. ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤂᤢᤏᤧ᤹ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 8 “‘ᤂᤧᤴ ᤁᤧᤍᤢᤰᤐᤠ ᤔᤏᤠ᤺ᤸᤗᤧ ᤁᤢᤓᤠ ᤛᤢᤳᤌᤥ ᤔᤏᤠᤴ ᤌᤩᤠᤳᤌᤥ᤺ᤰᤋᤢᤏᤧᤓᤃᤪ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣᤀᤠᤱ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤶᤓᤩᤠᤱ ᤕᤢ᤺ᤴᤇᤡᤰ ᤌᤧᤶᤔᤠ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 9 “‘ᤀᤠᤳᤋᤡᤴ ᤛᤡᤱᤍᤠᤰᤂᤥ᤺ᤰ ᤀᤡᤃᤪ ᤕᤢᤰᤏᤠᤀᤥ ᤂᤧᤴ ᤁᤧᤍᤢᤰᤐᤠᤴ ᤕᤢᤱ᤹. ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 10 ᤀᤠᤳᤋᤡᤸᤗᤧ ᤂᤧᤸᤗᤧ ᤁᤢᤛᤡᤃᤠᤱ ᤁᤧᤏᤧᤒᤠ ᤁᤢᤓᤠ ᤐᤠ᤺ᤴᤏᤡᤴ ᤛᤢᤛᤢ᤹. ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ ᤀᤠᤳᤋᤡᤸᤗᤧ ᤂᤧᤴ ᤐᤠ᤺ᤴᤜᤠ᤹ ᤑᤥ᤺ᤰᤂᤢ᤹. ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 11 “‘ᤂᤧᤴ ᤁᤧᤍᤢᤰᤐᤠ ᤔᤏᤠ᤺ᤸᤗᤧ ᤁᤢᤜᤢᤰᤁᤡᤴ ᤆᤫᤠ᤺ᤳᤋᤥ ᤘᤠᤔᤧᤴᤜᤵᤐᤣ ᤁᤢᤓᤠ ᤔᤏᤠᤴ ᤛᤢᤛᤢᤏᤧᤓᤃᤪ. ᤂᤧᤴ ᤛᤢᤛᤢᤒᤠ ᤔᤏᤠ᤺ᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤆᤫᤠ᤺ᤳᤋᤥ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤶᤓᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤧᤴ ᤀᤠᤛᤢᤳᤌᤥ ᤕᤢᤱᤔᤠ ᤐᤥᤱ᤹॥ 12 “‘ᤂᤧᤴ ᤁᤧᤍᤢᤰᤐᤠ ᤔᤏᤠ᤺ᤸᤗᤧ ᤁᤢᤓᤠ ᤑᤢᤈᤡᤰᤁᤧᤴ ᤛᤢᤛᤢᤏᤧᤓᤃᤪ ᤂᤧᤴ ᤕ᤺ᤶᤔᤠᤍᤣᤔᤠ ᤐᤥᤱ᤹. ᤁᤖ ᤛᤡᤱᤅᤡᤸᤗᤧᤴ ᤁᤧᤖᤧᤰ ᤛᤠᤔᤠᤜᤠ᤹ ᤆᤫᤠ᤺ᤳᤋᤡᤸᤗᤧ ᤀᤡ᤺ᤱᤔᤠᤛᤡ ᤐᤥᤱ᤹॥ 13 “‘ᤂᤧᤴ ᤔᤏᤠ᤺ᤴ ᤘᤕᤠᤔᤠ ᤋᤢᤰᤔᤥᤗᤠᤶ ᤘᤣ᤺ᤳᤋᤧᤸᤗᤧ ᤂᤢᤏᤧ᤹ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤏᤢᤛᤡ ᤕᤧᤴ ᤌᤠᤖᤡᤰ ᤏᤡᤖᤢᤖ. ᤜᤧᤰᤁᤩᤠᤱ ᤁᤢᤈᤠᤱᤅᤡᤴ ᤘᤠᤜᤵᤋᤢᤀᤠᤱ ᤁᤢᤎᤰᤁᤡᤴ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤵᤛᤢᤖ. ᤂᤧᤒᤩᤠᤱ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥ 14 ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤧᤸᤗᤧ ᤛᤠᤵᤐᤧᤳᤋᤪᤢ᤺ᤰᤔᤠ ᤏᤧᤳᤇᤡ ᤀᤡᤃᤪ ᤐᤧᤷᤘᤠᤈᤩᤠ᤺ᤰ ᤏᤧᤳᤇᤡ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤠᤱ ᤋᤠᤖᤢᤛᤡᤀᤠᤱ ᤋᤠᤖ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤂᤧᤱᤜᤠ᤹ ᤐᤡᤖᤢᤖ॥ 15 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤱᤜᤠ᤹ᤀᤥᤗᤠᤶ ᤗᤳᤇᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤏᤢ ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤥ᤺ᤴᤍᤢᤛᤡᤖ॥ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤘᤕᤢᤔᤠ ᤋᤢᤰᤔᤧᤸᤗᤧ ᤋᤖᤢᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹॥ 16 “‘ᤕᤠᤶᤔᤥ ᤁᤢᤓᤠ ᤕᤧᤶᤒᤡᤳᤇᤠ᤺ᤸᤗᤧ ᤁᤢᤛᤧᤔᤧᤘᤠᤴ ᤂᤢᤏᤧ᤹ᤗᤠᤶ ᤜᤠᤒᤠ ᤗ᤺ᤴᤍᤧᤏᤧᤓᤃᤪ. ᤂᤢᤏᤧ᤹ ᤁᤢᤎᤰᤁᤡᤴ ᤂᤰᤐᤧᤳ ᤘᤠᤖᤢ᤺ᤵᤛᤢᤖ. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 17 ᤀᤠᤳᤋᤡᤴ ᤆᤠᤱᤅᤥ ᤀᤡᤃᤪ ᤛᤡᤜᤥ᤹ᤒᤠᤀᤥ ᤂᤧᤴ ᤛᤧᤔᤧᤘᤠᤴ ᤆᤢᤰ. ᤂᤧᤴ ᤆᤫᤠ᤺ᤳᤋᤡᤸᤗᤧ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱᤗ॥ 18 ᤁᤢᤓᤠ ᤕᤧᤶᤒᤡᤳᤇᤠ᤺ᤸᤗᤧ ᤔᤧᤴᤇᤢᤔᤠᤴᤏᤢ ᤏᤧᤔᤠ ᤕᤠ᤺ᤶᤒᤰ ᤆᤥᤃᤢ ᤜᤧᤰᤁᤩᤠᤱ ᤛᤧᤔᤧᤘᤠ ᤗ᤺ᤴᤏᤠᤱ ᤀᤣᤃᤠᤱ ᤏᤧᤵᤔᤠᤱ ᤘᤠᤖᤢ᤺ᤶᤏᤧᤛᤡᤖ ᤐᤥᤱ᤹. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤢᤴᤇᤡ᤹ ᤀᤠᤛᤢᤳᤌᤥ ᤐᤥᤱᤛᤡ᤹॥ 19 “‘ᤁᤢᤓᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤠᤰᤂᤡ᤹ ᤗ᤺ᤶᤔᤠ ᤜᤣ᤺ᤰᤋᤧᤀᤠᤱ ᤂᤧᤴ ᤁᤢᤛᤡᤶ ᤘᤠᤜᤵᤐᤠᤏᤧᤓᤃᤪ. ᤂᤢᤏᤧ᤹ ᤁᤢᤛᤡᤶ ᤘᤠᤜᤵᤔᤠ ᤀᤠᤛᤢᤳᤌᤥᤴ ᤏᤢᤛᤡ ᤕᤧᤴ ᤌᤠᤖᤡᤰ ᤐᤳ॥ ᤀᤠᤳᤋᤡᤸᤗᤧ ᤂᤢᤏᤧ᤹ ᤛᤢᤛᤢ. ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 20 “‘ᤂᤧᤸᤗᤧ ᤁᤢᤛᤡᤶ ᤘᤠᤜᤵᤔᤠ ᤕᤧᤴ ᤘᤠ᤹ᤖ ᤌᤠᤖᤡᤰ ᤌᤧᤔᤠ ᤌᤧᤔᤠᤜᤠ᤹ᤀᤥ ᤂᤧᤴ ᤏᤧ᤹᤺. ᤂᤧᤱᤜᤠ᤹ ᤁᤧᤖᤧᤰ ᤀᤠᤛᤢᤳᤌᤥ ᤐᤥᤱ᤹॥ ᤜᤧᤰᤁᤩᤠᤱ ᤌᤣᤎᤣ ᤕᤢᤰᤏᤠᤍᤧᤴᤜᤠ᤹ᤀᤥ ᤂᤧᤴ ᤕᤢᤱ᤹. ᤂᤧᤱᤜᤠ᤹ᤀᤠᤱ ᤀᤠᤛᤢᤳᤌᤥ ᤐᤥᤱ᤹॥ 21 ᤀᤠᤳᤋᤡᤸᤗᤧ ᤂᤧᤸᤗᤧ ᤁᤢᤏᤧᤳᤏᤠᤴ ᤛᤢᤛᤢ᤹. ᤂᤧᤴ ᤀᤠᤛᤢᤳᤌᤥ ᤐᤥᤱ᤹ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣᤀᤠᤱ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 22 ᤀᤠᤳᤋᤡᤸᤗᤧ ᤂᤧᤸᤗᤧ ᤁᤢᤕᤢᤰᤏᤠᤴ ᤛᤢᤛᤢ᤹ ᤂᤢᤏᤧ᤹ ᤀᤠᤛᤢᤳᤌᤥ ᤐᤥᤱ᤹ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣᤀᤠᤱ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 23 ᤏᤧᤳᤏᤠ ᤆᤩᤠᤛᤠᤱ ᤀᤡᤃᤪ ᤕᤢᤰᤋᤢᤒᤠ ᤌᤧᤔᤠᤛᤠᤱ ᤀᤠᤳᤋᤡᤸᤗᤧ ᤛᤢᤛᤢ᤹. ᤂᤧᤴ ᤁᤧᤛᤢᤒᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 24 “‘ᤁᤢᤓᤠ ᤕᤧᤶᤒᤡᤳᤇᤠᤴ ᤂᤢᤏᤧ᤹ᤏᤢ ᤀᤡᤵᤛᤧ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤡᤶ ᤘᤠᤜᤵᤔᤧᤸᤗᤧ ᤂᤢᤏᤧ᤹ ᤛᤢᤛᤢᤏᤧᤓᤃᤪ. ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹. ᤂᤧᤒᤩᤠᤱ ᤂᤢᤏᤧ᤹ ᤀᤡᤶᤒᤠ ᤀᤠᤳᤋᤡᤴ ᤀᤡᤶᤏᤠᤍᤧᤴᤏᤡᤴᤇᤠᤱ ᤀᤠᤛᤢᤳᤌᤥ ᤐᤥᤱ᤹॥ 25 “‘ᤁᤢᤓᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤕᤧᤴᤏᤡᤴᤏᤢ᤺ᤸᤗᤧ ᤘᤣ᤹ ᤕᤖᤡᤰ ᤕᤧᤴ ᤌᤠᤖᤡᤰ ᤔᤠᤰᤂᤡ᤹ ᤘᤕᤢᤛᤢ ᤀᤡᤃᤪ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤕᤧᤴᤏᤡᤴᤏᤢ᤺ᤸᤗᤧ ᤘᤣ᤹ ᤕᤧᤴ ᤌᤠᤖᤡᤰ ᤔᤠᤰᤂᤡ᤹ ᤘᤕᤢᤛᤢᤏᤧᤓᤃᤪ. ᤔᤠᤰᤂᤡ᤹ ᤘᤕᤢᤛᤢᤀᤠᤱ ᤘᤠ᤹ᤖ ᤌᤠᤖᤡᤰ ᤂᤢᤏᤧ᤹ ᤀᤠᤛᤢᤳᤌᤥ ᤐᤥᤱ᤹॥ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤕᤧᤴᤜᤠ᤹ᤀᤥ ᤜᤧᤰᤁᤣᤀᤣ ᤂᤢᤏᤧ᤹ ᤀᤠᤛᤢᤳᤌᤥ ᤐᤥᤱ᤹॥ 26 ᤂᤧᤸᤗᤧ ᤁᤢᤔᤠᤰᤂᤡ᤹ ᤘᤕᤢᤒᤠ ᤁᤧᤖᤧᤰ ᤕᤧᤴᤜᤠ᤹ᤀᤥ ᤂᤢᤏᤧ᤹ ᤀᤡᤶᤒᤠ ᤀᤠᤳᤋᤡᤴ ᤁᤢᤏᤧᤳᤏᤠ᤺ᤴᤇᤠᤱ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤔᤠ ᤕᤧᤶᤔᤥᤒᤠ ᤜᤧᤰᤁᤣᤀᤣ ᤗᤣ᤺ᤵᤔᤠ ᤐᤥᤱ᤹॥ ᤌᤧᤔᤠ ᤌᤧᤔᤠ ᤕᤢᤰᤏᤠᤜᤠ᤹ ᤕᤢᤰᤋᤢ᤹. ᤂᤢᤏᤧ᤹ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤕᤧᤴᤜᤠ᤹ ᤜᤧᤰᤁᤣᤀᤣ ᤂᤧᤱᤜᤠ᤹ᤀᤠᤱ ᤀᤠᤛᤢᤳᤌᤥ ᤐᤥᤱᤗ॥ 27 ᤂᤧᤴ ᤐᤠ᤺ᤴᤜᤠ᤹ ᤁᤧᤛᤢᤒᤧᤴ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤸᤗᤧ ᤀᤠᤒᤠᤅᤣ ᤁᤢᤈᤠᤱᤜᤠ᤹ ᤘᤠᤜᤵᤋᤢᤖ ᤐᤥᤱ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣᤀᤠᤱ ᤘᤠᤖᤢ᤺ᤶᤛᤡᤱᤔᤠ ᤐᤥᤱ᤹. ᤂᤧᤒᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤢᤏᤧ᤹ ᤀᤠᤛᤢᤳᤌᤥ ᤐᤥᤱ᤹॥ 28 “‘ᤂᤧᤸᤗᤧ ᤁᤢᤛᤡᤶ ᤘᤠᤜᤵᤔᤧᤴ ᤘᤠ᤹ᤔᤠ ᤏᤠ᤹ᤀᤠᤱ ᤀᤣᤃᤠᤱ ᤂᤢᤏᤧ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤏᤡᤖᤢᤖ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥ 29 ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤧᤸᤗᤧ ᤐᤢᤳᤋᤢ᤺ᤰᤁᤣ ᤏᤧᤳᤇᤡ ᤀᤡᤃᤪ ᤐᤧᤷᤘᤠᤈᤩᤠ᤺ᤰ ᤏᤧᤳᤇᤡ ᤕᤠᤱᤛᤡᤱᤅᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤋᤠᤖ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤐᤡᤖᤢᤖ॥ 30 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤗᤳᤇᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤏᤢ ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤋᤥ᤺ᤴᤍᤢᤖ॥ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤠᤰᤂᤡ᤹ ᤘᤠᤃᤧᤕᤢᤒᤠ ᤀᤠᤛᤢᤳᤌᤥ᤺ᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ᤹॥ 31 “‘ᤁᤶᤓᤗ᤹ᤖᤡᤰ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ ᤀᤠᤛᤢᤳᤌᤥ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤁᤳᤋᤧᤶᤛᤡᤶᤔᤧ᤹. ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤀᤠᤱᤃᤠ᤹ ᤀᤠᤘᤠ᤹ᤔᤠᤍᤧᤴᤏᤡᤴ ᤂᤧᤱᤜᤠ᤹ᤖᤧ ᤀᤠᤛᤢᤳᤌᤥ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤀᤠᤛᤢᤳᤌᤥᤀᤥ ᤔᤧᤛᤡ᤹᤺॥’” 32 ᤀᤠᤳᤋᤡᤸᤗᤧ ᤘᤕᤠᤔᤠ ᤋᤢᤰᤔᤠ ᤁᤳᤋᤢ᤹. ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤢᤛᤧᤔᤧᤘᤠᤴ ᤗ᤺ᤴᤒᤣ᤺ᤰ ᤜᤧᤰᤁᤩᤠᤱ ᤂᤧᤴ ᤗᤠᤶᤒᤠ ᤀᤠᤛᤢᤳᤌᤥ ᤐᤥᤱ᤹. 33 ᤂᤧᤒᤩᤠᤱ ᤁᤢᤛᤡᤶ ᤘᤠᤜᤵᤔᤠ ᤁᤧᤘᤠ᤹ᤔᤠ ᤔᤧᤴᤇᤢᤔᤠ. ᤘᤕᤠᤔᤠ ᤋᤢᤰᤔᤧᤸᤗᤧ ᤕᤠᤱᤄᤢᤒᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ. ᤂᤶᤓᤩᤠᤱ ᤀᤠᤛᤢᤳᤌᤥ ᤁᤧᤒᤥᤱᤔᤠ ᤔᤧᤴᤇᤢᤔᤠᤴᤏᤢ ᤀᤡᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤕᤧᤶᤒᤡᤳᤇᤠ ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤌᤡᤶᤜᤠ᤹ ᤁᤴᤜᤠ᤹ᤀᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.