ᤗᤧᤒᤡ 14 - LIFOTNTᤜᤥᤖᤡᤰᤐᤥᤒᤠ ᤕᤠ᤺ᤱᤄᤣᤰᤗᤠᤶ ᤛᤢᤳᤌᤥ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤁᤧᤍᤢᤰᤐᤧᤴ ᤛᤢᤳᤌᤥ ᤆᤥ᤺ᤰᤔᤧᤸᤗᤧ ᤁᤴ ᤌᤡᤶᤜᤠ᤹ ᤀᤥᤃᤵ ᤆᤥ᤺ᤰᤔᤠ ᤐᤥᤱ᤹॥ ᤀᤠᤳᤋᤡᤴ ᤕᤧᤴᤏᤥ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠ ᤘᤠ᤹ ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤴ ᤔᤏᤠᤴ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠ᤺ᤵᤔᤠ ᤐᤥᤱ᤹॥ 3 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤂᤧᤴ ᤗᤠ᤺ᤰᤁᤠᤳ ᤋᤣ᤹ᤖᤢᤀᤠᤱ ᤂᤧᤴ ᤛᤠ᤹ᤖᤢᤖ॥ ᤜᤥᤖᤡᤰᤐᤥ ᤁᤧᤗ᤺ᤶᤒᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤧᤴ ᤘᤣ᤺ᤳᤋᤧᤏᤧᤓᤃᤪ. 4 ᤂᤧᤸᤗᤧ ᤗᤠᤃᤡ ᤏᤧᤳᤇᤡ ᤁᤢᤜᤡᤱᤘᤧᤳ ᤛᤢᤳᤌᤥ ᤐᤢᤛᤠ. ᤛᤠᤶᤔᤠᤱᤛᤡᤱ. ᤜᤡᤛᤐ ᤕᤠᤴ ᤏᤢ ᤜᤧ᤺ᤰᤁᤱᤃᤱᤒᤠ ᤂᤡ ᤔᤧᤍᤠᤖᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤖ॥ 5 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤑᤢᤈᤡᤰᤁᤥ ᤁᤧᤕᤠᤰᤐᤠ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤁᤢᤛᤶᤎᤠᤱ ᤂᤧᤴ ᤏᤧᤳᤇᤡ ᤐᤢᤜᤠ᤹ᤀᤥ ᤗᤳᤇᤠ ᤛᤧᤵᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤛᤡᤖ॥ 6 ᤂᤧᤴ ᤁᤢᤜᤡᤱᤘᤧᤳ ᤐᤢ᤺ᤴ ᤛᤠᤶᤔᤠᤱᤛᤡᤱ. ᤜᤧ᤺ᤰᤁᤱᤃᤱᤒᤠ ᤂᤡ ᤏᤢ ᤜᤡᤛᤐ ᤕᤠ᤺ᤴᤏᤡᤴᤏᤠᤱ ᤕᤠᤱᤛᤡᤱᤅᤠᤱ ᤀᤠᤶᤓᤠ ᤂᤧᤴ ᤑᤢᤈᤡᤰᤁᤥ ᤁᤧᤕᤠᤰᤐᤠ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤁᤢᤛᤶᤎᤠᤱ ᤛᤧᤵᤔᤏᤠᤒᤠ ᤐᤢ᤺ᤸᤗᤧ ᤁᤢᤔᤠᤰᤂᤡ᤹ᤀᤥ ᤂᤧᤸᤗᤧ ᤜᤢᤶᤛᤢᤖ॥ 7 ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤗᤠᤶ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠᤸᤗᤧ ᤁᤢᤛᤶᤎᤠᤱ ᤏᤢᤛᤡᤗᤧᤱ ᤌᤠᤖᤡᤰ ᤛᤠᤰᤂᤢᤀᤠᤱ ᤂᤢᤏᤧ᤹ ᤂᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤁᤢᤜᤡᤱᤘᤧᤳ ᤐᤢ᤺ᤴ ᤋᤠᤶᤍᤠᤶᤒᤠᤍᤧᤴᤏᤥ ᤗᤧᤖᤢᤍᤣᤛᤢᤖ॥ 8 “ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤧᤸᤗᤧ ᤂᤢᤏᤧ᤹ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ. ᤜᤧᤰᤁᤩᤠᤱ ᤁᤧᤖᤧᤰ ᤁᤢᤎᤧᤃᤣᤰ ᤀᤡ᤺ᤴ ᤗᤡᤃᤥ᤹ ᤏ᤺ᤰᤂᤢᤀᤠᤱ ᤘᤠᤖᤢ᤺ᤶᤛᤡᤱᤗ. ᤜᤧᤰᤁᤩᤠᤱ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤐᤣ᤺ᤰᤗ. ᤁᤖ ᤏᤢᤛᤡ ᤕᤧᤴ ᤌᤠᤖᤡᤰ ᤂᤢᤏᤧ᤹ ᤁᤢᤛᤠ᤺ᤱᤃᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳᤋᤣ ᤕᤢᤱᤔᤠ ᤐᤥᤱ᤹॥ 9 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤡᤴ ᤗᤡᤃᤥ᤹ ᤏ᤺ᤰᤂᤢᤖ. ᤁᤢᤶᤎᤥ᤹. ᤁᤢᤔᤡᤰᤂᤢᤱᤒᤠᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤶᤒᤪᤡᤰᤜᤠ᤹ ᤏ᤺ᤰᤂᤢᤖ॥ ᤂᤧᤸᤗᤧ ᤁᤢᤈᤠᤱᤜᤠ᤹ ᤘᤠᤜᤵᤋᤢᤀᤠᤱ ᤂᤢᤏᤧ᤹ ᤁᤢᤎᤰᤁᤡᤴ ᤆᤫᤠ᤺ᤳᤋᤡᤸᤗᤧ ᤘᤠᤖᤢ᤺ᤵᤛᤢᤖ. ᤜᤧᤰᤁᤩᤠᤱ ᤂᤧᤴ ᤛᤢᤳᤌᤥ ᤐᤥᤱ᤹॥ 10 “ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤧᤸᤗᤧ ᤔᤧᤱᤃᤠ᤺ᤶᤔᤏᤠᤒᤠ ᤏᤧᤴᤇᤡ ᤔᤧᤸᤗᤢᤰᤛᤠ᤺ᤳ ᤏᤢ ᤋᤱᤒᤣ ᤌᤡᤰ ᤁᤧᤃᤧᤵᤔᤠ ᤔᤧᤱᤃᤠ᤺ᤶᤏᤠᤒᤠ ᤁᤢᤶᤔᤠᤔᤠ ᤗᤳᤇᤠ ᤔᤧᤸᤗᤢᤰᤛᤠ᤺ᤳ. ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤁᤡᤗᤥ ᤋᤢᤰᤛᤡ ᤑᤣ᤹ᤖᤢᤶ ᤏᤢ ᤔᤠᤏᤠ ᤁᤢᤓᤪᤧ᤺ᤱ ᤆᤤᤋᤢᤏ ᤏᤡ᤺ᤱᤃᤣ᤹ ᤋᤠᤖᤢᤖ॥ 11 ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠ ᤔᤏᤠᤴ ᤂᤧᤴ ᤜᤢᤰᤘᤠᤜᤠ᤹ᤏᤢ ᤛᤥᤖᤡᤰ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤢᤳᤌᤥ ᤁᤧᤗᤣ᤺ᤵᤐᤠᤀᤠᤱ ᤀᤢᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤛᤠᤶᤒᤧᤸᤗᤧ ᤋᤥ᤺ᤴᤍᤢᤖ॥ 12 “ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤔᤠᤏᤠ ᤁᤢᤓᤪᤧ᤺ᤱᤒᤠ ᤏᤡ᤺ᤱᤃᤣᤴᤏᤢ ᤛᤥᤖᤡᤰ ᤔᤧᤸᤗᤢᤰᤛᤠ᤺ᤳᤜᤠ᤹ᤗᤠᤶ ᤗᤳᤇᤠ ᤕᤠᤱᤛᤡᤱᤅᤠᤱ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ. ᤜᤧᤰᤁᤩᤠᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤐᤰᤂᤢᤖ॥ 13 ᤜᤧᤰᤁᤩᤠᤱ ᤂᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤀᤥ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤛᤧᤵᤔᤠ ᤛᤣᤛᤣᤒᤠᤍᤧᤴᤏᤥ ᤂᤧᤴ ᤔᤧᤸᤗᤢᤰᤛᤠ᤺ᤳᤋᤡᤴ ᤛᤧᤖᤢᤖ. ᤌᤣᤀᤠᤱᤓᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤗᤰ ᤐᤥᤱᤒᤠ ᤁᤢᤀᤡᤛᤡᤰ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤴᤏᤠᤱ ᤂᤧᤸᤗᤧᤴᤏᤣ ᤐᤥᤱ᤹॥ ᤂᤧᤴ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 14 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤓᤠ ᤁᤢᤔᤠᤰᤂᤡ᤹ᤈᤡ ᤕᤠᤱᤛᤡᤱᤅᤠᤱ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠ ᤔᤏᤠ᤺ᤸᤗᤧ ᤁᤢᤈᤢᤰᤘᤠ ᤗᤧᤵᤛᤠᤱᤒᤠ ᤁᤢᤏᤧᤰᤂᤥ ᤗᤥ᤺ᤳᤋᤡ᤺ᤴ ᤁᤢᤈᤢᤰᤘᤠ ᤁᤢᤜᤢᤰᤔᤠ᤺ᤴ ᤏᤢ ᤁᤢᤈᤢᤰᤘᤠ ᤁᤢᤗᤠᤱᤔᤠᤀᤥ ᤜᤢ᤺ᤳᤋᤢ ᤐᤡᤖᤢᤖ॥ 15 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤠᤏᤠ ᤁᤢᤓᤪᤧ᤺ᤱ ᤏᤡ᤺ᤱᤃᤣᤴ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤓᤧᤱᤘᤠ ᤜᤢᤰᤁᤥᤒᤠ ᤁᤢᤜᤢᤰᤋᤠᤵᤐᤣᤀᤥ ᤁᤢᤓᤠ ᤜᤢᤰᤂᤢᤖ॥ 16 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤢᤏᤧ᤹ ᤁᤢᤈᤢᤰᤘᤠ ᤁᤢᤜᤢᤰᤆᤥ᤺ᤴ ᤁᤢᤓᤧᤱᤘᤠ ᤜᤢᤰᤁᤥ ᤁᤳᤋᤢᤒᤠ ᤏᤡ᤺ᤱᤃᤣ᤹ᤀᤥ ᤜᤢᤶᤛᤢᤖ ᤜᤧᤰᤁᤩᤠᤱ ᤂᤧᤴᤗᤠᤶᤒᤠ ᤁᤢᤓᤠ ᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤜᤢᤰᤆᤥ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤢᤛᤡᤗᤧᤱ ᤛᤠᤰᤂᤢᤖ॥ 17 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤏᤡ᤺ᤱᤃᤣ᤹ᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠ ᤔᤏᤠ᤺ᤸᤗᤧ ᤁᤢᤈᤢᤰᤘᤠ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ ᤗᤥ᤺ᤵᤔᤠᤀᤥ. ᤂᤧᤸᤗᤧ ᤁᤢᤈᤢᤰᤘᤠ ᤜᤢᤰᤁᤥᤒᤠ ᤁᤢᤜᤢᤰᤔᤠᤀᤥ ᤏᤢ ᤂᤧᤸᤗᤧ ᤁᤢᤈᤢᤰᤘᤠ ᤗᤠᤱᤅᤥᤒᤠ ᤁᤢᤗᤠᤱᤔᤠᤀᤥ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡ᤹ ᤛᤶᤎᤠᤱ ᤜᤢ᤺ᤳᤋᤢ ᤐᤡᤖᤢᤖ॥ 18 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤁᤧᤏᤶᤒᤠ ᤏᤡ᤺ᤱᤃᤣᤴ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠ ᤔᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤥ ᤜᤢ᤺ᤳᤋᤢ ᤐᤡᤖᤢᤖ. ᤂᤧᤒᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢᤖ॥ 19 “ᤂᤧᤒᤩᤠᤱ ᤂᤧᤴ ᤀᤠᤛᤢᤳᤌᤥᤗᤠᤶ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤀᤠᤱ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢᤖ॥ ᤂᤧᤴ ᤀᤣᤃᤠᤱ ᤂᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤛᤧᤖᤢᤖ॥ 20 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤏᤢ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤴᤍᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢᤖ. ᤂᤧᤒᤩᤠᤱ ᤂᤧᤴ ᤛᤢᤳᤌᤥ ᤐᤥᤱ᤹॥ 21 “ᤁᤖ ᤂᤧᤴ ᤕᤠᤱᤃᤧᤛᤠ᤹ᤒᤠ ᤆᤥᤰ ᤜᤧᤰᤁᤩᤠᤱ ᤂᤠᤶᤓᤩᤠᤖᤡᤰᤁᤠᤱ ᤋᤠ᤺ᤵᤔᤠ ᤔᤧᤛᤢᤰᤋᤢᤴᤏᤧᤓᤃᤪ. ᤂᤢᤏᤧ᤹ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤌᤠ᤺ᤱᤐᤱᤔᤠ ᤑᤠ᤹ᤀᤠᤱ ᤗᤳᤇᤠ ᤔᤧᤸᤗᤢᤰᤛᤠ᤺ᤳ. ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤆᤤᤋᤢᤏ ᤏᤡ᤺ᤱᤃᤣ᤹ᤀᤥ ᤛ᤹ᤔᤏᤠᤒᤠ ᤁᤡᤗᤥ ᤏᤧᤳᤇᤡ ᤆᤢᤴᤈᤢᤶᤒᤠ ᤑᤣ᤹ᤖᤢᤶ. ᤂᤧᤒᤩᤠᤱ ᤔᤠᤏᤠ ᤁᤢᤓᤪᤧ᤺ᤱ ᤏᤡ᤺ᤱᤃᤣ᤹ ᤋᤠᤖᤢᤖ॥ 22 ᤜᤧᤰᤁᤩᤠᤱ ᤂᤢᤏᤧ᤹ ᤌᤧᤔᤠ ᤗ᤺ᤵᤔᤠ ᤛᤢᤰᤋᤢ᤹. ᤛᤠᤵᤐᤧᤳᤋᤪᤢ᤺ᤰᤔᤠ ᤏᤧᤳᤇᤡ ᤀᤡᤃᤪ ᤐᤧᤷᤘᤠᤈᤩᤠ᤺ᤰ ᤏᤧᤳᤇᤡ. ᤗᤳᤇᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤏᤢ ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤠᤖᤢᤖ॥ 23 “ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤂᤧᤸᤗᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤂᤧᤱᤜᤠ᤹ ᤋᤠᤖᤢᤖ॥ 24 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤔᤧᤸᤗᤢᤰᤛᤠ᤺ᤳᤋᤡᤴ ᤏᤢ ᤔᤠᤏᤠ ᤁᤢᤓᤪᤧ᤺ᤱ ᤏᤡ᤺ᤱᤃᤣᤴ ᤕᤠᤱᤛᤡᤱᤅᤠᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤌᤠ᤺ᤱ ᤐᤰᤂᤢᤖ॥ 25 ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤔᤧᤸᤗᤢᤰᤛᤠ᤺ᤳᤋᤡᤴ ᤛᤧᤖᤢᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥᤗᤠᤶ ᤁᤢᤓᤠ ᤕᤠᤱᤛᤡᤱᤗ ᤜᤧᤰᤁᤩᤠᤱ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠᤸᤗᤧ ᤁᤢᤈᤢᤰᤘᤠ ᤁᤢᤏᤧᤰᤂᤥ᤹ ᤗᤥ᤺ᤵᤔᤠᤀᤥ. ᤁᤢᤈᤢᤰᤘᤠ ᤜᤢᤰᤁᤥᤒᤠ ᤁᤢᤜᤢᤰᤔᤠᤀᤥ ᤏᤢ ᤁᤢᤈᤢᤰᤘᤠ ᤗᤠᤱᤅᤥᤒᤠ ᤁᤢᤗᤠᤱᤔᤠᤀᤥ ᤜᤢ᤺ᤳᤋᤢ ᤐᤡᤖᤢᤖ॥ 26 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤏᤡ᤺ᤱᤃᤣ᤹ᤀᤥᤗᤠᤶ ᤂᤢᤏᤧ᤹ ᤁᤢᤓᤧᤱᤘᤠ ᤜᤢᤰᤁᤥᤒᤠ ᤁᤢᤜᤢᤰᤋᤠᤵᤐᤣᤀᤥ ᤁᤢᤓᤠ ᤜᤢᤰᤂᤢᤖ. 27 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤢᤰᤘᤠ ᤜᤢᤰᤁᤥᤒᤠ ᤁᤢᤜᤢᤰᤆᤥ᤺ᤸᤗᤧ ᤂᤢᤏᤧ᤹ ᤁᤢᤓᤧᤱᤘᤠ ᤜᤢᤰᤁᤥ ᤁᤳᤋᤢᤒᤠ ᤁᤢᤓᤠ ᤏᤡ᤺ᤱᤃᤣᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤢᤛᤡᤗᤧᤱ ᤛᤠᤰᤂᤢᤖ॥ 28 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤏᤡ᤺ᤱᤃᤣ᤹ᤗᤠᤶ ᤁᤢᤓᤠ ᤕᤠᤱᤛᤡᤱᤅᤠᤱ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠᤸᤗᤧ ᤁᤢᤈᤢᤰᤘᤠ ᤗᤧᤵᤔᤠᤱᤒᤠ ᤁᤢᤴᤓᤠᤰᤁᤡᤸᤗᤧ ᤁᤢᤗᤥ᤺ᤵᤔᤧᤴ. ᤁᤢᤈᤢᤰᤘᤠ ᤜᤢᤰᤁᤥᤒᤠ ᤁᤢᤜᤢᤰᤔᤠ᤺ᤴ ᤏᤢ ᤁᤢᤈᤢᤰᤘᤠ ᤗᤠᤱᤅᤥᤒᤠ ᤁᤢᤗᤠᤱᤔᤠᤀᤥ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤔᤠᤰᤂᤡᤴ ᤜᤢ᤺ᤳᤋᤢ ᤐᤡᤖᤢᤒᤠᤍᤧᤴᤏᤥᤀᤣ ᤜᤢ᤺ᤳᤋᤢ ᤐᤡᤖᤢᤖ॥ 29 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤢᤏᤧ᤹ ᤁᤢᤜᤢᤰᤁᤥ ᤁᤳᤋᤢᤒᤠ ᤁᤧᤏᤶᤒᤠ ᤏᤡ᤺ᤱᤃᤣᤴ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠᤸᤗᤧ ᤁᤢᤗᤠᤕᤥᤴ ᤗᤧᤵᤔᤡ ᤏᤠ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤸᤗᤧ ᤁᤢᤎᤧᤃᤣ᤺ᤰᤁᤥ ᤜᤢ᤺ᤳᤋᤢ ᤐᤡᤖᤢᤖ॥ 30 ᤂᤧᤴ ᤀᤣᤃᤠᤱ ᤂᤧᤴ ᤔᤏᤠ᤺ᤸᤗᤧ ᤆᤩᤠ ᤗ᤺ᤵᤔᤠ ᤛᤢᤰᤋᤢᤒᤠ ᤛᤠᤵᤐᤧᤳᤋᤪᤢ᤺ᤰᤔᤠ ᤀᤡᤃᤪ ᤐᤧᤷᤘᤠᤈᤩᤠ᤺ᤰᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ. 31 ᤗᤳᤇᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ. ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤴᤏᤢ ᤛᤥᤖᤡᤰ ᤋᤥ᤺ᤴᤍᤢᤖ॥ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤢᤳᤌᤥ ᤐᤥᤱᤔᤠ ᤁᤧᤒᤥᤱᤒᤠᤸᤗᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ ᤐᤡᤖᤢ᤹॥” 32 ᤜᤥᤖᤡᤰᤐᤠᤀᤥ ᤀᤠᤗᤡ᤺ᤰᤗᤡ᤺ᤰᤐᤠ ᤕᤠᤱᤄᤣ᤺ᤰ ᤁᤧᤗ᤺ᤶᤒᤠᤀᤠᤱ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤗ᤺ᤵᤔᤠ ᤔᤧᤴᤕᤠ᤺ᤶᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤆᤥ᤺ᤰᤔᤠ ᤁᤧᤒᤥᤱᤒᤠ ᤌᤡᤶᤜᤠ᤹ ᤀᤠᤶᤓᤠ ᤁᤴᤜᤠ᤹ᤖᤥ॥ ᤜᤡᤶᤔᤥᤒᤠ ᤛᤢᤰᤏᤠ᤺ᤶᤒᤠ 33 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 34 “ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤕᤢᤰᤁᤥ ᤐᤡᤔᤠᤏᤡᤱ ᤀᤡ᤺ᤳᤋᤢᤱᤒᤠ ᤁᤏᤠᤏ ᤗᤠᤈᤣ᤹ᤀᤥ ᤁᤧᤃᤧᤖᤡᤸᤗᤧ. ᤜᤧᤰᤁᤩᤠᤱ ᤂᤡᤏᤡ᤹ ᤕᤢᤰᤁᤥ ᤁᤧᤄᤥᤛᤢᤶᤒᤠ ᤗᤠᤈᤣ᤹ᤀᤥᤒᤠ ᤜᤡᤶᤔᤥ ᤁᤧᤘᤠᤶᤒᤠ ᤁᤢᤓᤠ ᤛᤢᤰᤏᤠ᤺ᤶᤒᤠᤴ ᤀᤠᤱᤃᤠ᤹ ᤌᤠᤖ ᤕᤠ᤺ᤴᤍᤢᤱᤏᤧᤓᤃᤪ. 35 ᤂᤧᤴ ᤜᤡᤶᤔᤥᤒᤠ ᤜᤡᤶᤍᤠᤱᤒᤠᤴ ᤐᤣ᤺ᤰᤁᤠᤱ ‘ᤀᤠᤱᤃᤠ᤹ ᤀᤠᤜᤡᤶᤔᤥ ᤛᤢᤰᤏᤠ᤺ᤶᤒᤠ ᤌᤩᤧᤒᤠ ᤜᤧᤰᤁᤣ ᤗ᤹’ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤔᤧᤳᤋᤢᤖ॥ 36 ᤛᤢᤰᤏᤠ᤺ᤶᤒᤠᤴ ᤛᤠ᤹ᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤈᤠ ᤆᤡᤃᤰᤘᤠ ᤜᤧᤴᤕᤠᤜᤠ᤹ ᤜᤡᤶᤔᤥᤗᤠᤶ ᤔᤧᤗ᤺ᤳᤋᤢᤖ ᤑᤠ᤹ᤀᤠᤱ ᤔᤧᤳᤋᤢᤛᤡᤖ. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤜᤡᤶᤔᤡᤴ ᤀᤠᤛᤢᤳᤌᤥ ᤆᤥᤰ ᤑᤠ᤹ᤀᤠᤱ ᤀᤢᤘᤠ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤌᤧᤔᤠ ᤛᤠᤔᤠᤐᤢᤔᤠᤜᤠ᤹ᤀᤠᤱ ᤀᤠᤛᤢᤳᤌᤥ ᤔᤧᤒᤥᤱᤗ॥ ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤜᤡᤶᤔᤡᤴ ᤛᤠ᤹ᤔᤠᤖᤧ ᤗᤠᤃᤡ ᤛᤡᤃᤠᤱ ᤗᤠ᤺ᤳᤗ॥ 37 ᤜᤧᤰᤁᤩᤠᤱ ᤂᤧᤸᤗᤧ ᤛᤢᤰᤏᤠ᤺ᤶᤒᤠᤴ ᤛᤠ᤹ᤖᤢᤖ॥ ᤂᤧᤴ ᤛᤢᤰᤏᤠ᤺ᤶᤒᤠᤴ ᤜᤡᤶᤔᤥᤒᤠ ᤗᤢᤱᤎᤠᤰᤁᤥ ᤜᤡ᤺ᤰᤋᤠᤱᤒᤠ ᤀᤡᤃᤪ ᤜᤧ᤺ᤳᤜᤧ᤺ᤳᤋᤠᤱᤒᤠ ᤆᤥ᤺ᤰᤐᤠ ᤜᤧᤰᤁᤣ ᤗ᤹ᤏᤧᤓᤃᤪ. ᤂᤧᤒᤩᤠᤱ ᤗᤢᤱᤎᤠᤰᤁᤡᤴ ᤆᤡ᤹ᤖᤢᤖ ᤐᤵᤐᤠ ᤁᤢᤛᤡᤱ ᤗ᤹ᤏᤧᤓᤃᤪ. 38 ᤜᤡᤶᤔᤥᤗᤠᤶ ᤗᤠᤶᤎᤣ᤺ᤳᤋᤥ ᤐᤥᤱᤅᤠᤱ ᤗᤠ᤺ᤰᤁᤠᤳ ᤗ᤺ᤴᤗ ᤜᤧᤰᤁᤩᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤂᤧᤴ ᤜᤡᤶᤔᤡᤴ ᤛᤢᤒᤢᤖ॥ 39 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤕᤠᤶᤔᤥ ᤋᤠᤀᤠᤱ ᤂᤧᤴ ᤜᤡᤶᤔᤡᤴ ᤀᤥᤔᤧᤳᤋᤢᤖ. ᤜᤧᤰᤁᤩᤠᤱ ᤂᤧᤴ ᤜᤡᤶᤔᤥᤒᤠ ᤗᤢᤱᤎᤠᤰᤜᤠ᤹ᤀᤥ ᤛᤢᤰᤏᤠ᤺ᤶᤒᤠᤴ ᤘᤠᤔᤢᤀᤠᤱ ᤐᤳᤏᤧᤓᤃᤪ. 40 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤢᤰᤏᤠ᤺ᤶᤒᤠ ᤁᤧᤎᤠᤒᤠ ᤗᤢᤱᤜᤠ᤹ ᤗ᤺ᤳᤋᤢᤀᤠᤱ ᤕᤧᤰᤕᤰ ᤗᤠ᤺ᤰᤁᤠᤳ ᤁᤢᤓᤠ ᤀᤠᤛᤢᤳᤌᤥᤒᤠᤍᤧᤴᤏᤥ ᤗᤠᤵᤑᤢᤔᤠ ᤐᤠᤱᤄᤢᤛᤡᤖ॥ 41 ᤂᤧᤸᤗᤧ ᤜᤡᤶᤛᤡᤃᤠᤱ ᤗᤧᤵᤔᤠᤱ ᤁᤧᤖᤧᤰ ᤐᤡᤛᤠᤱ ᤜᤡ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤜᤵᤔᤠ ᤐᤠᤱᤄᤢᤛᤡᤖ. ᤂᤶᤓᤩᤠᤱ ᤔᤧᤜᤡᤒᤢᤒᤠ ᤂᤧᤴ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤂᤠᤶᤔᤡᤴ ᤂᤧᤱᤜᤠ᤹ᤖᤧ ᤕᤧᤰᤕᤰ ᤗᤠ᤺ᤰᤁᤠᤳ ᤁᤢᤓᤠ ᤀᤠᤛᤢᤳᤌᤥᤒᤠᤍᤧᤴᤏᤥ ᤗᤠᤵᤔᤧᤍᤣᤛᤢᤖ॥ 42 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤗᤢᤱᤜᤠ᤹ ᤔᤧᤍᤠᤖᤢᤀᤠᤱ ᤂᤧᤴ ᤋᤃᤡᤒᤠ ᤗᤢᤱᤜᤠ᤹ ᤕᤠᤃᤧᤒᤠᤍᤧᤴᤏᤥ ᤔᤧᤃᤣ᤺ᤳᤋᤢᤖ. ᤜᤧᤰᤁᤩᤠᤱ ᤘᤣ᤹ ᤂᤠᤶᤔᤡᤸᤗᤧ ᤔᤧᤗᤧᤅᤢᤖ॥ 43 “ᤗᤢᤱᤜᤠ᤹ ᤔᤧᤗ᤺ᤳᤋᤢ ᤂᤧᤒᤩᤠᤱ ᤜᤡᤶᤔᤡᤴ ᤔᤧᤜᤡᤒᤢ ᤔᤧᤗᤧᤅᤢ ᤔᤧᤛᤢᤖᤢᤀᤠᤱ ᤂᤧᤴ ᤛᤢᤰᤏᤠ᤺ᤶᤒᤠᤴ ᤕᤠᤶᤔᤥ ᤏᤡᤎᤠᤒᤧᤏᤧᤓᤃᤪ. 44 ᤏᤡᤱᤘᤠ᤹ᤑᤢᤛᤠᤶᤒᤧᤴ ᤐᤣ᤺ᤰᤁᤠᤱ ᤀᤥᤔᤧᤳᤋᤢᤖ॥ ᤂᤧᤴ ᤛᤢᤰᤏᤠ᤺ᤶᤒᤠᤴ ᤘᤠᤔᤢᤀᤠᤱ ᤐᤳᤏᤧᤓᤃᤪ. ᤂᤧᤱᤃ ᤁᤡᤵᤔᤠᤃᤧᤄᤢᤒᤠ ᤛᤢᤰᤏᤠ᤺ᤶᤒᤠᤖᤥ॥ ᤂᤧᤴ ᤜᤡᤶᤔᤡᤴ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤐᤥᤱ᤹॥ 45 ᤂᤧᤴ ᤜᤡᤶᤔᤡᤴ ᤗᤢ᤺ᤶᤔᤠᤍᤣᤔᤠ ᤐᤥᤱ᤹. ᤂᤧᤵᤔᤥᤒᤠ ᤗᤢᤱᤜᤠ᤹. ᤛᤡᤱᤜᤠ᤹ ᤏᤢ ᤗᤧᤱᤔᤏᤠᤒᤠ ᤐᤡ᤺ᤴᤍᤠᤜᤠ᤹ ᤔᤧᤍᤣ᤹ᤖᤢᤀᤠᤱ ᤕᤧᤰᤕᤰ ᤗᤠ᤺ᤰᤁᤠᤳ ᤁᤢᤓᤠ ᤀᤠᤛᤢᤳᤌᤥᤒᤠᤍᤧᤴᤏᤥ ᤗᤠᤵᤔᤧᤓᤢᤛᤢᤖ॥ 46 ᤂᤧᤴᤏᤠᤱᤎᤥ ᤀᤣᤃᤠᤱ ᤂᤧᤴ ᤜᤡᤶᤔᤡᤴ ᤔᤧᤛᤢᤒᤢ ᤔᤧᤓᤳᤇᤢᤖ ᤌᤠᤖᤡᤰ ᤜᤡᤶᤔᤥ ᤁᤢᤓᤠ ᤔᤧᤗᤠᤛᤧᤏᤧᤓᤃᤪ ᤂᤧᤱᤜᤠ᤹ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤔᤧᤒᤥᤱ᤹॥ 47 ᤜᤧᤰᤁᤩᤠᤱ ᤂᤧᤴ ᤜᤡᤶᤔᤥ ᤁᤧᤀᤡᤶᤒᤠ ᤀᤡᤃᤪ ᤁᤧᤈᤠᤒᤧᤸᤗᤧ ᤂᤢᤏᤧ᤹ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹॥ 48 “ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤂᤧᤴ ᤜᤡᤶᤔᤥ ᤗᤠ᤺ᤳᤋᤠᤱ ᤛᤠ᤹ᤖᤢᤸᤗᤧ ᤜᤡᤶᤔᤡᤴ ᤔᤧᤗᤧᤅᤢᤀᤠᤱ ᤀᤣᤃᤠᤱ ᤛᤢᤰᤏᤠ᤺ᤶᤒᤠᤴ ᤘᤠᤔᤢᤒᤠ ᤜᤥᤵᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤜᤡᤶᤔᤡᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ. ᤌᤣᤀᤠᤱᤓᤧᤸᤗᤧ ᤛᤢᤰᤏᤠ᤺ᤶᤒᤠ ᤌ᤹ᤔᤠ ᤏᤠ᤹ᤖᤧᤀᤠᤱ ᤘᤠ᤹॥ 49 ᤜᤧᤰᤁᤩᤠᤱ ᤜᤡᤶᤔᤡᤴ ᤛᤢᤳᤌᤥ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤸᤗᤧ ᤐᤢ ᤏᤧᤳᤇᤡ. ᤛᤠᤶᤔᤠᤱᤛᤡᤱ. ᤜᤡᤛᤐ ᤕᤠ᤺ᤴᤏᤡᤴ ᤏᤢ ᤜᤧ᤺ᤳᤋᤠᤱᤒᤠ ᤂᤡ ᤋᤠᤖᤢᤖ॥ 50 ᤜᤧᤰᤁᤩᤠᤱ ᤂᤧᤸᤗᤧ ᤑᤢᤈᤡᤰᤁᤥ ᤁᤧᤕᤠᤰᤐᤠ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤁᤢᤛᤶᤎᤠᤱ ᤏᤧᤳᤇᤡ ᤐᤢᤜᤠ᤹ᤀᤥ ᤗᤳᤇᤠ ᤛᤧᤖᤢᤖ॥ 51 ᤂᤧᤒᤩᤠᤱ ᤛᤠᤶᤔᤠᤱᤛᤡᤱ. ᤜᤡᤛᤐ ᤕᤠ᤺ᤴ. ᤜᤧ᤺ᤳᤋᤠᤱᤒᤠ ᤂᤡ᤺ᤴ ᤜᤧᤰᤁᤩᤠᤱ ᤁᤢᤜᤡᤱᤘᤧᤳ ᤐᤢ᤺ᤴ ᤕᤠᤱᤛᤡᤱᤅᤠᤱ ᤂᤧᤴ ᤛᤧᤵᤔᤏᤠᤒᤠ ᤐᤢ᤺ᤸᤗᤧ ᤁᤢᤔᤠᤰᤂᤡ᤹ᤀᤥ ᤏᤢ ᤛᤣᤛᤣᤒᤠ ᤆᤫᤠ᤺ᤳᤋᤥ ᤏᤡ᤺ᤵᤛᤢᤀᤠᤱ ᤂᤧᤴ ᤜᤡᤶᤔᤥ ᤏᤢᤛᤡᤗᤧᤱ ᤌᤠᤖᤡᤰ ᤛᤠᤰᤂᤢᤖ॥ 52 ᤂᤧᤸᤗᤧ ᤐᤢ᤺ᤸᤗᤧ ᤁᤢᤔᤠᤰᤂᤡᤴ. ᤛᤣᤛᤣᤒᤠ ᤆᤫᤠ᤺ᤳᤋᤡᤴ. ᤁᤢᤜᤡᤱᤘᤧᤳ ᤐᤢ᤺ᤴ. ᤛᤠᤶᤔᤠᤱᤛᤡᤱᤅᤡᤴ. ᤜᤡᤛᤐ ᤕᤠᤴ ᤏᤢ ᤜᤧ᤺ᤳᤋᤠᤱᤒᤠ ᤂᤡ᤺ᤸᤗᤧ ᤜᤡᤶᤔᤡᤴ ᤛᤢᤳᤌᤥ ᤆᤥᤃᤢᤖ॥ 53 ᤂᤧᤒᤩᤠᤱ ᤂᤧᤸᤗᤧ ᤁᤢᤜᤡᤱᤘᤧᤳ ᤐᤢ᤺ᤴ ᤆᤠᤜᤣ ᤕᤧᤰᤕᤰ ᤗᤠ᤺ᤰᤁᤠᤳ ᤋᤠᤶᤍᤠᤶᤒᤠᤍᤧᤴᤏᤥ ᤗᤧᤖᤢᤍᤣᤛᤢᤖ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤂᤧᤴ ᤜᤡᤶᤔᤡᤸᤗᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ᤹. ᤂᤧᤒᤩᤠᤱ ᤂᤧᤴ ᤜᤡᤶᤔᤡᤴ ᤛᤢᤳᤌᤥ ᤐᤥᤱ᤹॥” 54 ᤜᤥᤖᤡᤰᤐᤥ ᤁᤧᤗ᤺ᤶᤒᤠ ᤁᤧᤖᤧᤰ ᤐᤖᤡᤰᤐᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠ. ᤜᤧᤰᤁᤩᤠᤱ ᤁᤧᤛᤥᤒᤠ ᤋᤢᤰᤔᤠ. 55 ᤆᤠᤱᤅᤥᤒᤠ ᤏᤢ ᤜᤡᤶᤔᤥᤒᤠ ᤛᤢᤰᤏᤠ᤺ᤶᤒᤠ. 56 ᤕᤠᤱᤄᤣ᤺ᤰ ᤏᤢ ᤁᤧᤎᤱᤒᤠ. ᤜᤧᤰᤁᤩᤠᤱ ᤑᤰᤘᤠ᤺ᤸᤗᤧ ᤁᤢᤕᤥ᤺ᤰᤁᤡᤴ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤗᤣ᤺ᤵᤔᤠ ᤌᤡᤶᤔᤡᤴ ᤜᤠᤒᤠ ᤁᤴᤜᤠ᤹ᤖᤥ॥ 57 ᤜᤥᤖᤡᤰᤐᤥ ᤁᤧᤗ᤺ᤶᤒᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤜᤠ᤹ ᤏᤢ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠᤗᤠᤶ ᤛᤢᤳᤌᤥ ᤐᤥᤱᤔᤠ ᤌᤡᤶᤜᤠ᤹ ᤀᤠᤶᤓᤠ ᤁᤴᤜᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.