ᤗᤧᤒᤡ 13 - LIFOTNTᤜᤥᤖᤡᤰᤁᤥ ᤕᤠᤱᤄᤣ᤺ᤰ ᤁᤧᤗ᤺ᤶᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤡᤶᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 2 “ᤁᤢᤓᤠ ᤔᤏᤠ᤺ᤸᤗᤧ ᤁᤢᤜᤥᤖᤡᤰᤐᤠᤴ ᤌᤱᤍᤢ ᤀᤡᤃᤪ ᤑᤰᤘᤠ ᤗ᤺ᤴᤍᤧ ᤁᤡᤃᤪ ᤑᤍᤠᤱᤒᤠ ᤁᤢᤕᤥᤰ ᤆᤢᤰᤋᤧᤏᤧᤓᤃᤪ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤥᤖᤡᤰᤁᤥ ᤁᤧᤈᤳᤇᤡᤱᤒᤠ ᤋᤢᤰᤔᤠᤸᤗᤧ ᤕᤠᤱᤄᤢᤏᤧᤓᤃᤪ. ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤀᤥ ᤀᤡᤃᤪ ᤁᤢᤛ᤻ᤛᤠᤜᤠ᤹ᤀᤥᤒᤠ ᤁᤢᤓᤠ ᤌᤡᤰᤐᤠᤖᤥ ᤔᤧᤍᤠᤖᤢᤖ॥ 3 ᤂᤧᤸᤗᤧ ᤁᤢᤜᤥᤖᤡᤰᤐᤥ ᤁᤧᤗ᤺ᤶᤒᤠ ᤕᤠᤱᤄᤣ᤺ᤰᤁᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤀᤥᤔᤧᤳᤋᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤥᤖᤡᤰᤁᤥ ᤋᤢᤰᤔᤠᤸᤗᤧ ᤋᤖᤢᤒᤠᤍᤧᤴᤏᤥ ᤁᤧᤗᤡᤱᤒᤠ ᤁᤢᤶᤒᤪᤡᤰᤁᤡᤴ ᤑᤍᤠᤱᤒᤠ ᤐᤥ᤺ᤰᤂᤧᤀᤠᤱ ᤕᤢᤱ᤹ ᤜᤧᤰᤁᤩᤠᤱ ᤂᤧᤴ ᤕᤠᤱᤄᤣ᤺ᤰᤁᤡᤴ ᤜᤥᤖᤡᤰᤁᤡᤴᤏᤢ᤺ᤸᤗᤧᤀᤠᤱ ᤐᤠᤰᤂᤥ᤺ᤱ ᤏᤡᤎᤠᤒᤧᤏᤧᤓᤃᤪ. ᤂᤧᤱᤃ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤢᤏᤧ᤹ ᤛᤠ᤹ᤖᤢᤀᤠᤱ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ 4 ᤁᤖ ᤂᤧᤴ ᤁᤢᤕᤥ᤺ᤰᤁᤡᤴ ᤜᤥᤖᤡᤰᤐᤥ ᤑᤍᤠᤱᤒᤠ ᤆᤥ᤺ᤰᤏᤧᤓᤃᤪ. ᤜᤧᤰᤁᤩᤠᤱ ᤀᤥᤔᤧᤵᤔᤧᤸᤗᤧ ᤂᤧᤴ ᤜᤥᤖᤡᤰᤐᤥ ᤔᤢᤔᤢᤰ ᤛᤡᤃᤠᤱ ᤌᤠᤖᤡᤰ ᤏᤡᤔᤧᤍᤧᤳᤋᤧᤴᤏᤧᤓᤃᤪ. ᤂᤧᤒᤩᤠᤱ ᤂᤧᤵᤔᤥ ᤁᤧᤗᤡᤱᤒᤠ ᤔᤢᤖᤡᤰᤁᤡᤴᤏᤠᤱ ᤑᤍᤠᤱᤒᤠ ᤔᤧᤶᤒᤥᤱᤅᤣ ᤕᤢᤱᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤁᤧᤍᤢᤰᤐᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 5 ᤏᤢᤛᤡ ᤕᤧᤴ ᤁᤧᤳᤋᤡᤸᤗᤧ ᤕᤠ᤺ᤴᤍᤡᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤸᤗᤧ ᤁᤢᤀᤡᤛᤡ᤺ᤰᤛᤡ᤺ᤰ ᤐᤳ. ᤜᤧᤰᤁᤩᤠᤱ ᤜᤥᤖᤡᤰᤐᤥ ᤂᤧᤴ ᤕᤠᤱᤄᤣ᤺ᤰᤁᤡᤴ ᤔᤧᤶᤒᤥᤀᤣ ᤐᤳᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤕᤠᤶᤔᤥ ᤘᤣ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 6 ᤏᤢᤛᤡ ᤕᤧᤴ ᤁᤧᤳᤋᤡᤸᤗᤧ ᤕᤠ᤺ᤶᤔᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤕᤠᤶᤔᤥ ᤛᤠ᤹ᤖᤢᤸᤗᤧ ᤋᤢᤰᤔᤧᤴ ᤀᤠᤈᤧᤳ ᤆᤵᤆᤵ ᤗ᤹ᤖᤧᤀᤠᤱ ᤐᤳ ᤜᤧᤰᤁᤩᤠᤱ ᤜᤥᤖᤡᤰᤐᤥ ᤔᤧᤴᤘᤠᤶᤔᤣ ᤐᤳᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤱᤃ ᤕᤠᤱᤄᤣ᤺ᤰᤖᤰᤗᤥ॥ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ ᤜᤧᤰᤁᤩᤠᤱ ᤌᤡᤶ ᤁᤢᤀᤡᤛᤡᤰ ᤂᤧᤴ ᤛᤢᤳᤌᤥ ᤐᤥᤱ᤹॥ 7 ᤁᤖ ᤛᤢᤳᤌᤥ ᤐᤥᤱᤔᤠᤴ ᤏᤡ᤺ᤴᤎᤥ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠ ᤛᤢ᤺ᤵᤔᤠᤀᤠᤱᤛᤠᤱ ᤂᤧᤴ ᤕᤠᤱᤄᤣ᤺ᤰᤁᤡᤴ ᤜᤥᤖᤡᤰᤐᤥ ᤕᤠᤶᤔᤥ ᤘᤠᤔᤢᤍᤣ᤹ᤖᤢᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤂᤢᤏᤧ᤹ ᤀᤠᤒᤠᤅᤣ ᤐᤣ᤺ᤰᤔᤠᤀᤠᤱ ᤀᤥ᤺ᤴᤎᤠᤰᤛᤡᤱᤔᤠ ᤐᤥᤱ᤹॥ 8 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤛᤠ᤹ᤖᤢᤸᤗᤧ ᤜᤥᤖᤡᤰᤁᤥ ᤕᤠᤱᤄᤣ᤺ᤰᤁᤡᤴ ᤘᤠᤔᤧᤀᤠᤱ ᤐᤳᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ. ᤂᤧᤴ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 9 “ᤁᤢᤓᤠ ᤔᤏᤠ᤺ᤴ ᤀᤠᤗᤡ᤺ᤰᤗᤡ᤺ᤰᤐᤠ ᤜᤥᤖᤡᤰᤐᤠ ᤋᤢᤰᤔᤠᤸᤗᤧ ᤕᤠᤱᤄᤢᤀᤠᤱ ᤘᤠ᤹ᤏᤧᤓᤃᤪ. ᤂᤧᤴ ᤔᤏᤠᤴ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠ᤺ᤵᤔᤠ ᤐᤥᤱ᤹॥ 10 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤸᤗᤧ ᤜᤥᤖᤡᤰᤐᤠᤴ ᤑᤍᤠᤱᤒᤠ ᤌᤱᤍᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤢᤖᤡᤰᤁᤡᤴ ᤑᤍᤠᤱᤒᤠ ᤐᤥ᤺ᤰᤂᤧᤒᤠ ᤏᤢ ᤌᤱᤍᤢᤒᤠᤍᤧᤴᤏᤥ ᤜᤧᤴᤏᤧᤰᤛᤠ ᤏᤡᤃᤧᤎᤠ᤺ᤵᤐᤠ ᤕᤠᤱᤄᤣ᤺ᤰ ᤐᤥ᤺ᤰᤂᤧᤏᤧᤓᤃᤪ. 11 ᤂᤧᤴ ᤕᤖᤡᤰ ᤕᤧᤶ ᤌᤧᤶᤒᤠ ᤁᤧᤒᤵᤐᤠ ᤜᤥᤖᤡᤰᤐᤠ ᤋᤢᤰᤔᤠᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤢᤏᤧ᤹ ᤂᤧᤴ ᤗᤠ᤺ᤳᤗᤠ᤺ᤳ ᤔᤧᤕᤢᤰᤂᤢᤴᤗ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤐᤥ᤺ᤰᤂᤧᤆᤢᤖᤧᤀᤠᤱ ᤘᤠ᤹॥ 12 “ᤋᤢᤰᤔᤧᤴ ᤜᤥᤖᤡᤰᤐᤠᤀᤥ ᤐᤥᤖᤧᤖ ᤐᤣ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤥᤔᤧᤳᤋᤢᤸᤗᤧ ᤁᤧᤍᤢᤰᤐᤧᤸᤗᤧ ᤁᤢᤎᤧᤃᤣ᤺ᤰᤁᤥᤏᤢ ᤁᤢᤗᤠᤱᤅᤥ ᤌᤠᤖᤡᤰᤁᤣ ᤜᤥᤖᤡᤰᤐᤠᤀᤥ ᤘᤠᤔᤢᤀᤠᤱ ᤐᤳᤏᤧᤓᤃᤪ. 13 ᤂᤶᤓᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤸᤗᤧ ᤋᤢᤰᤔᤧᤴ ᤌᤰᤁᤥ ᤁᤢᤖᤧ᤺ᤶ ᤌᤡᤶᤛᤢᤀᤠᤱ ᤐᤳᤏᤧᤓᤃᤪ. ᤂᤢᤏᤧ᤹ ᤂᤧᤴ ᤁᤧᤍᤢᤰᤐᤧᤴ ᤛᤢᤳᤌᤥ ᤐᤥ᤺ᤰᤂᤧ ᤑᤠ᤹ᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤴ ᤁᤧᤖᤧᤰ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤐᤥ᤺ᤰᤂᤧ ᤆᤢᤖᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤱᤃ ᤛᤢᤳᤌᤥᤖᤥ॥ 14 ᤁᤖ ᤂᤧ᤹ᤕᤥ ᤜᤧᤴᤏᤧᤰᤛᤠ ᤏᤡᤍᤧᤳᤏᤧᤓᤃᤪ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 15 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤸᤗᤧ ᤁᤢᤜᤧᤴᤏᤧᤰᤛᤠᤴ ᤏᤡᤎᤠᤒᤧᤏᤧᤓᤃᤪ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤴ ᤜᤧᤴᤏᤧᤰᤛᤠ᤺ᤱᤃ ᤀᤠᤛᤢᤳᤌᤥᤖᤥ. ᤂᤧᤴ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 16 ᤁᤖ ᤂᤧᤴ ᤜᤧᤴᤏᤧᤰᤛᤠᤴ ᤕᤠᤶᤔᤥ ᤑᤍᤠᤱᤒᤠ ᤐᤥ᤺ᤰᤂᤧ ᤗ᤺ᤴᤍᤧᤏᤧᤓᤃᤪ ᤂᤧᤴ ᤔᤏᤠᤴ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤐᤣ᤺ᤰᤗ. 17 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤸᤗᤧ ᤂᤧᤴ ᤕᤠᤱᤄᤣ᤺ᤰᤁᤡᤴ ᤑᤍᤠᤱᤒᤠ ᤐᤥ᤺ᤰᤂᤧᤀᤠᤱ ᤐᤳᤏᤧᤓᤃᤪ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤁᤧᤍᤢᤰᤐᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤒᤩᤠᤱ ᤂᤧᤴ ᤔᤏᤠᤴ ᤛᤢᤳᤌᤥ ᤐᤥᤱ᤹॥ 18 “ᤁᤢᤓᤠ ᤔᤏᤠ᤺ᤸᤗᤧ ᤁᤢᤜᤥᤖᤡᤰᤐᤥ ᤜᤥ᤹ ᤗ᤺ᤴᤍᤧᤀᤠᤱ ᤘᤣ᤺ᤳᤋᤧ. 19 ᤜᤧᤰᤁᤩᤠᤱ ᤂᤧᤴ ᤜᤥ᤹ ᤗ᤺ᤴᤍᤧᤒᤠᤍᤧᤴᤏᤡᤴ ᤑᤍᤠᤱᤒᤠ ᤐᤥ᤺ᤰᤂᤧᤀᤠᤱ ᤌᤱᤍᤢ ᤀᤡᤃᤪ ᤜᤧ᤺ᤳᤁᤧᤗ᤹ᤒᤠ ᤑᤍᤠᤱᤒᤠ ᤁᤢᤕᤥᤰ ᤂᤧ᤹ᤕᤥ ᤆᤢᤰᤋᤧᤏᤧᤓᤃᤪ. ᤂᤧᤴ ᤐᤣ᤺ᤰᤁᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤠᤒᤠᤅᤣ ᤀᤥ᤺ᤴᤎᤠᤰᤋᤢᤖ ᤐᤥᤱ᤹॥ 20 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤸᤗᤧ ᤂᤧᤴ ᤁᤢᤕᤥ᤺ᤰᤁᤡᤴ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤔᤢᤔᤢᤰ ᤏᤡᤎᤠᤒᤧ ᤜᤧᤰᤁᤩᤠᤱ ᤔᤢᤖᤡᤰᤁᤡᤴᤏᤠᤱ ᤑᤍᤠᤱᤒᤠ ᤐᤥ᤺ᤰᤂᤧᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤴ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ ᤂᤧᤱᤃ ᤜᤥ᤹ᤀᤥᤗᤠᤶ ᤁᤧᤗ᤺ᤶᤒᤠᤖᤥ॥ 21 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤸᤗᤧ ᤂᤧ᤹ᤕᤥ ᤁᤢᤓᤠ ᤑᤍᤠᤱᤒᤠ ᤔᤢᤖᤡᤰ ᤔᤧᤕᤢᤱᤅᤧᤴᤏᤧᤓᤃᤪ. ᤜᤧᤰᤁᤩᤠᤱ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤛᤡᤃᤠᤱ ᤔᤢᤔᤢᤰ ᤜᤥᤵ ᤂᤧᤒᤩᤠᤱ ᤜᤣᤖᤧᤀᤠᤱ ᤔᤕᤧᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 22 ᤂᤧᤴ ᤜᤥᤖᤡᤰᤐᤠᤀᤥ ᤘᤠᤔᤢᤀᤠᤱ ᤐᤳᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ. ᤂᤧᤱᤃ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 23 ᤁᤖ ᤂᤧᤴ ᤁᤢᤕᤥ᤺ᤰᤁᤡᤴ ᤔᤧᤴᤘᤠᤶᤔᤣ ᤌᤡᤰᤔᤧᤳᤌᤡᤰ ᤐᤳᤏᤧᤓᤃᤪ ᤂᤧᤱᤃ ᤜᤥ᤹ᤀᤡᤸᤗᤧ ᤁᤢᤕᤥ᤺ᤰᤗᤥ॥ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ 24 “ᤁᤢᤓᤠᤖᤧ ᤁᤢᤜᤥᤖᤡᤰᤐᤥ ᤔᤡᤃᤧᤖᤠᤰᤐᤠ ᤕᤠᤱᤄᤣ᤺ᤰ ᤆᤢᤰᤋᤧ ᤜᤧᤰᤁᤩᤠᤱ ᤂᤧᤴ ᤔᤡᤃᤧᤖᤠᤰᤐᤠ ᤕᤠᤱᤄᤣ᤺ᤰᤁᤥᤒᤠ ᤜᤧᤴᤏᤧᤰᤛᤠᤀᤥ ᤜᤧ᤺ᤳᤜᤧ᤺ᤳ ᤁᤧᤗ᤹ᤒᤠ ᤑᤍᤠᤱᤒᤠ ᤀᤡᤃᤪ ᤑᤍᤠᤱᤒᤠ ᤁᤢᤕᤥᤰ ᤆᤢᤰᤋᤧᤓᤃᤪ. 25 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤁᤢᤕᤥ᤺ᤰᤁᤡᤴ ᤛᤠ᤹ᤖᤢᤖ. ᤜᤧᤰᤁᤩᤠᤱ ᤂᤧᤴ ᤁᤢᤕᤥ᤺ᤰᤁᤥ ᤁᤧᤗᤡᤱᤒᤠ ᤔᤢᤖᤡᤰᤁᤡᤴ ᤑᤍᤠᤱᤒᤠ ᤏᤢ ᤀᤥᤔᤧᤵᤔᤠᤸᤗᤧ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤛᤡᤃᤠᤱ ᤔᤢᤔᤢᤰ ᤏᤡᤍᤧᤳᤋᤧᤏᤧᤓᤃᤪ. ᤂᤧᤴ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ ᤂᤧᤱ ᤔᤡᤃᤧᤖᤠᤰᤐᤠ ᤕᤠᤱᤄᤣ᤺ᤰᤁᤥ ᤁᤧᤍᤧᤒᤠ ᤁᤧᤗ᤺ᤶᤒᤠᤖᤥ॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ. ᤂᤧᤱᤃ ᤜᤥᤖᤡᤰᤐᤠᤀᤥ ᤁᤧᤗ᤺ᤶᤒᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 26 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤸᤗᤧ ᤂᤧᤴ ᤁᤢᤕᤥ᤺ᤰᤁᤥ ᤑᤍᤠᤱᤒᤠ ᤔᤢᤖᤡᤰ ᤔᤧᤕᤢᤅᤧᤴ. ᤜᤧᤰᤁᤩᤠᤱ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤔᤢᤔᤢᤰ ᤛᤡᤃᤠᤱᤅᤠᤱ ᤔᤧᤈᤥᤰᤏᤧᤴ ᤁᤖ ᤜᤣᤖ ᤐᤣ᤺ᤰᤗ ᤐᤳᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 27 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤛᤠ᤹ᤖᤢᤖ॥ ᤂᤧᤴ ᤜᤥᤖᤡᤰᤐᤠᤀᤥ ᤘᤠᤔᤢᤀᤠᤱ ᤐᤳᤏᤧᤓᤃᤪ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤴ ᤜᤥᤖᤡᤰᤁᤥᤒᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 28 ᤁᤖ ᤂᤧᤴ ᤁᤢᤕᤥ᤺ᤰᤁᤡᤴ ᤔᤧᤴᤘᤠᤶᤔᤣ ᤌᤡᤰᤔᤧᤳᤌᤡᤰ ᤐᤳᤏᤧᤓᤃᤪ ᤜᤧᤰᤁᤩᤠᤱ ᤔᤕᤧᤏᤧᤓᤃᤪ. ᤂᤧᤴ ᤔᤡᤃᤧᤍᤡᤰᤐᤠ ᤕᤠᤱᤄᤣ᤺ᤰᤁᤥᤗᤠᤶ ᤌᤱᤍᤢᤒᤠᤖᤥ॥ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤔᤡᤃᤧᤖᤠᤰᤐᤠ ᤕᤠᤱᤄᤣ᤺ᤰᤁᤡᤸᤗᤧ ᤁᤢᤕᤥ᤺ᤰᤗᤰᤗᤥ॥ 29 “ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤁᤡᤃᤪ ᤁᤢᤛᤡᤱᤍᤠᤱᤔᤥ ᤕᤠᤱᤄᤣ᤺ᤰ ᤐᤳᤏᤧᤓᤃᤪ. 30 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤕᤠᤱᤄᤣ᤺ᤰᤁᤡᤴ ᤛᤠ᤹ᤖᤢᤖ. ᤜᤧᤰᤁᤩᤠᤱ ᤂᤧᤴ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤔᤢᤔᤢᤰ ᤏᤡᤍᤧᤳᤋᤧᤏᤧᤓᤃᤪ ᤂᤶᤓᤩᤠᤱ ᤂᤧᤵᤔᤥ ᤁᤧᤒᤵᤐᤠ ᤔᤢᤖᤡᤰᤁᤡᤴ ᤛᤠ᤹ᤖᤡᤰ ᤁᤠ᤹ᤖᤠ᤺ᤱᤗᤠ᤺ᤱᤒᤠ ᤏᤢ ᤀᤶᤍᤠᤱᤒᤠ ᤆᤥ᤺ᤰᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤂᤧᤱᤃ ᤁᤧᤛᤥᤒᤠ ᤋᤢᤰᤔᤠ. ᤀᤡᤃᤪ ᤌᤧᤃᤣᤰ ᤁᤡᤃᤪ ᤛᤡᤱᤍᤠᤱᤔᤥᤒᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 31 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤋᤢᤰᤔᤧᤴ ᤛᤠ᤹ᤖᤢᤸᤗᤧ ᤂᤧᤴ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤔᤢᤔᤢᤰ ᤏᤡᤔᤧᤍᤧᤳᤏᤧᤴ ᤜᤧᤰᤁᤩᤠᤱ ᤂᤧᤵᤔᤥ ᤔᤠᤰᤋᤠᤱᤒᤠ ᤔᤢᤖᤡᤰᤁᤠᤱ ᤔᤧᤕᤢᤱᤏᤧᤴᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤁᤧᤍᤢᤰᤐᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 32 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤕᤠᤱᤄᤣ᤺ᤰᤁᤡᤴ ᤛᤠ᤹ᤖᤢᤖ. ᤜᤧᤰᤁᤩᤠᤱ ᤂᤧᤴ ᤁᤧᤛᤥᤒᤠ ᤋᤢᤰᤔᤧᤴ ᤔᤧᤴᤘᤠᤶᤔᤣ ᤐᤳ ᤂᤧᤒᤩᤠᤱ ᤂᤧᤵᤔᤥ ᤔᤢᤖᤡᤰᤁᤧᤴ ᤀᤶᤍᤠᤱᤒᤠ ᤔᤧᤶᤒᤥᤱᤅᤣ ᤕᤢᤱ᤹ ᤂᤶᤓᤩᤠᤱ ᤂᤧᤴ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤔᤢᤔᤢᤰ ᤔᤧᤸᤗ᤺ᤳᤋᤣ ᤐᤳᤏᤧᤓᤃᤪ. 33 ᤂᤧᤸᤗᤧ ᤁᤢᤕᤠᤱᤄᤣ᤺ᤰᤁᤧᤴ ᤆᤠᤜᤣ ᤗᤧᤖᤢᤀᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤡᤴ ᤏᤢ ᤁᤢᤶᤎᤥᤴ ᤏ᤺ᤰᤂᤢᤖ॥ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤁᤧᤍᤢᤰᤐᤧᤴ ᤀᤠᤸᤗᤛᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 34 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤸᤗᤧ ᤁᤧᤛᤥᤒᤠ ᤁᤢᤍᤢᤰᤔᤧᤴ ᤛᤠ᤹ᤖᤢᤖ॥ ᤂᤧᤴ ᤋᤢᤰᤔᤧᤴ ᤔᤧᤴᤘᤠ᤺ᤶᤔᤣ ᤐᤳᤋᤠᤱ ᤜᤥᤖᤡᤰᤐᤠᤴᤏᤢ᤺ᤸᤗᤧ ᤔᤢᤔᤢᤰ ᤐᤵᤐᤠ ᤏᤡᤔᤧᤎᤠ᤺ᤵᤏᤧᤴᤏᤧᤓᤃᤪ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤋᤢᤀᤠᤱ ᤂᤢᤏᤧ᤹ ᤛᤢᤳᤌᤥ ᤐᤥᤱ᤹॥ 35 ᤁᤖ ᤂᤧᤴ ᤛᤢᤳᤌᤥ ᤐᤥ᤺ᤰᤂᤧᤒᤠ ᤀᤢᤘᤠ ᤆᤥᤃᤢᤀᤠᤱᤛᤠᤱ ᤁᤧᤛᤥᤒᤠ ᤋᤢᤰᤔᤧᤴ ᤜᤥᤖᤡᤰᤐᤥ ᤘᤠᤶᤔᤠ ᤜᤣ᤺ᤰᤋᤢᤏᤧᤓᤃᤪ. 36 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤛᤠ᤹ᤖᤢᤖ॥ ᤂᤧᤴ ᤜᤥᤖᤡᤰᤐᤥ ᤘᤠᤔᤢᤖ ᤋᤣ᤹ᤖᤢᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤶᤍᤠᤱᤒᤠ ᤔᤢᤖᤡᤰ ᤕᤢᤱᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤀᤥᤔᤧᤵᤔᤠ ᤆᤠᤜᤠ ᤔᤧᤈᤥᤰᤏᤧᤴ॥ ᤂᤧᤱᤃ ᤀᤠᤛᤢᤳᤌᤥᤖᤥ॥ 37 ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤸᤗᤧ ᤂᤧᤴ ᤁᤧᤛᤥᤒᤠ ᤋᤢᤰᤔᤧᤴ ᤀᤠᤶᤓᤠ ᤁᤢᤀᤡᤛᤡ᤺ᤰᤛᤡ᤺ᤰ ᤐᤳ ᤜᤧᤰᤁᤩᤠᤱ ᤂᤧᤵᤔᤥ ᤔᤠᤰᤋᤠᤱᤒᤠ ᤔᤢᤖᤡᤰ ᤗᤡᤱᤛᤧᤏᤧᤓᤃᤪ. ᤂᤧᤴ ᤋᤢᤰᤔᤧᤱᤃ ᤘᤣ᤺ᤳᤋᤧᤒᤠᤖᤥ॥ ᤂᤧᤴ ᤛᤢᤳᤌᤥ ᤆᤥᤰ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ 38 “ᤁᤢᤓᤠ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠ᤺ᤸᤗᤧ ᤁᤢᤜᤥᤖᤡᤰᤐᤥ ᤑᤍᤠᤱᤒᤠ ᤁᤢᤕᤥ᤺ᤰᤜᤠ᤹ ᤐᤳᤏᤧᤓᤃᤪ. 39 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤖ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤥᤖᤡᤰᤐᤥ ᤂᤧᤴ ᤁᤢᤕᤥ᤺ᤰᤜᤠ᤹ ᤑᤢ᤺ᤳᤋᤰᤋᤰᤐᤠ ᤐᤳᤏᤧᤓᤃᤪ ᤂᤧᤱᤃ ᤜᤥᤖᤡᤰᤐᤥ ᤁᤧᤗ᤺ᤶᤒᤠ ᤁᤢᤕᤥ᤺ᤁᤪᤰᤗᤥ॥ ᤂᤧᤴ ᤔᤏᤠᤴ ᤛᤢᤳᤌᤥᤀᤣ ᤆᤥᤰ॥ 40 “ᤁᤢᤓᤠᤖᤧ ᤁᤢᤎᤣᤃᤣ᤺ᤰ ᤔᤢᤖᤡᤰᤁᤡᤴ ᤁᤧᤖᤧᤰ ᤗᤢᤃᤧᤀᤠᤱ ᤘᤠ᤹ᤏᤧᤓᤃᤪ ᤂᤧᤴ ᤋᤫᤠᤗᤧ᤺ᤰᤁᤣ ᤐᤥ᤺ᤰᤂᤧᤒᤠᤖᤰ. ᤁᤖ ᤂᤧᤴ ᤛᤢᤳᤌᤥᤀᤣ ᤆᤥᤰ॥ 41 ᤂᤧᤸᤗᤧ ᤁᤢᤎᤧᤃᤣᤰ ᤀᤡ᤺ᤴ ᤂᤧᤸᤗᤧ ᤁᤢᤎᤧᤃᤣ᤺ᤰᤁᤡᤸᤗᤧ ᤋᤃᤠᤱ ᤗᤧᤵᤔᤠᤱ ᤗᤧ᤺ᤰᤋᤧᤀᤠᤱ ᤐᤳᤏᤧᤓᤃᤪ ᤂᤧᤸᤗᤧ ᤁᤢᤍᤫᤠᤒᤧᤴ ᤗᤧ᤺ᤰᤋᤧᤒᤠᤖᤥ. ᤁᤖ ᤂᤧᤴ ᤛᤢᤳᤌᤥᤀᤣ ᤆᤥᤰ॥ 42 ᤁᤖ ᤂᤧᤸᤗᤧ ᤁᤢᤏᤧᤖᤧᤶᤒᤥ᤺ᤵᤔᤠ ᤀᤡᤃᤪ ᤁᤢᤍᤫᤠᤒᤠ ᤁᤧᤗᤧ᤺ᤰᤐᤥ ᤜᤧ᤺ᤳᤜᤧ᤺ᤳ ᤁᤧᤗ᤹ᤒᤠ ᤑᤍᤠᤱᤒᤠ ᤕᤠᤱᤄᤣ᤺ᤰᤏᤧᤓᤃᤪ ᤂᤧᤴ ᤏᤧᤖᤧᤶᤒᤥ᤺ᤵᤔᤠ ᤀᤡᤃᤪ ᤋᤫᤠᤒᤥᤗᤠᤶ ᤁᤧᤓᤧᤰᤐᤠ ᤁᤧᤗ᤺ᤶᤒᤠ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠᤖᤥ॥ 43 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤀᤠᤱ ᤀᤥᤔᤧᤳᤋᤢᤸᤗᤧ ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠ ᤜᤧᤰᤁᤣ ᤏᤧᤖᤧᤶᤒᤥ᤺ᤵᤔᤠ ᤀᤡᤃᤪ ᤋᤫᤠᤒᤠ ᤁᤧᤗᤧ᤺ᤰᤐᤥ ᤌᤱᤍᤢᤀᤠᤱ ᤜᤧ᤺ᤳᤜᤧ᤺ᤳ ᤁᤧᤗ᤹ᤒᤠ ᤕᤠᤱᤄᤣ᤺ᤰ ᤏᤡᤎᤠᤒᤧᤏᤧᤓᤃᤪ. 44 ᤂᤧᤴ ᤔᤏᤠᤴ ᤁᤧᤍᤢᤰᤐᤠ ᤏᤢ ᤀᤠᤛᤢᤳᤌᤥᤖᤥ॥ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤁᤧᤒᤵᤐᤠ ᤕᤠᤱᤄᤣ᤺ᤰᤁᤡᤸᤗᤧ ᤆᤥᤃᤢᤸᤗᤧ. ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤀᤠᤛᤢᤳᤌᤥ ᤗᤣ᤺ᤳᤋᤢᤀᤠᤱ ᤀᤢᤘᤠ ᤆᤥᤃᤢᤖ॥ 45 “ᤀᤠᤗᤡ᤺ᤰᤗᤡ᤺ᤰᤐᤠ ᤋᤢᤰᤔᤠ ᤁᤧᤃᤵᤐᤠ ᤔᤏᤠ᤺ᤸᤗᤧ ᤁᤧᤍᤧ᤺ᤱᤒᤠ ᤆᤠᤱ ᤆᤠᤱᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥᤒᤠ ᤌᤧᤃᤣ᤺ᤰᤀᤡ᤺ᤴ ᤋᤠᤱᤈᤡᤱᤛᤠ ᤐᤵᤔᤠ ᤐᤥᤱ᤹॥ ᤂᤧᤸᤗᤧ ᤔᤢᤜᤠᤱ ᤗᤧᤵᤔᤠᤱᤒᤠ ᤁᤢᤏᤠ᤺ᤴ ᤋᤧᤵᤋᤢᤀᤠᤱ ‘ᤀᤠᤛᤢᤳᤌᤥ᥄ ᤀᤠᤛᤢᤳᤌᤥ᥄’ ᤗ᤹ᤖ ᤀ᤺ᤰᤗ ᤐᤥᤱ᤹॥ 46 ᤀᤠᤵᤑᤠᤸᤗᤧ ᤌᤠᤖᤡᤰ ᤂᤧᤴ ᤋᤢᤰᤔᤧᤸᤗᤧ ᤔᤧᤗᤧᤖᤢᤴ. ᤂᤧᤴ ᤀᤠᤛᤢᤳᤌᤥᤀᤣ ᤐᤥᤱ᤹॥ ᤂᤧᤴ ᤀᤣ᤺ᤰᤛᤧᤳᤇᤠ ᤕᤢᤱᤔᤠ ᤐᤥᤱ᤹॥ ᤂᤧᤸᤗᤧ ᤁᤢᤕᤢᤱᤔᤠᤍᤧᤴᤏᤡᤴ ᤛᤠ᤺ᤱᤃᤠᤜᤡᤶᤜᤠ᤹ᤗᤠᤶ ᤗᤠ᤺ᤰᤁᤠᤳ ᤐᤥᤱᤔᤠ ᤐᤥᤱᤗᤥ॥ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤡᤶᤜᤠ᤹ 47 “ᤀᤠᤳᤋᤡᤴ ᤆᤠᤱᤅᤥ ᤛᤢᤰᤏᤠ᤺ᤶᤒᤠ ᤁᤧᤎᤠᤒᤠ ᤁᤢᤕᤥᤰ ᤐᤳ. ᤂᤧᤴ ᤛᤧᤔᤢᤖᤡᤰ ᤐᤥᤱᤛᤠᤱ ᤀᤡᤃᤪ ᤏᤤᤏᤠᤛᤢᤳ ᤐᤥᤱᤛᤠᤱ. 48 ᤂᤧᤴ ᤌᤠᤰᤔᤏᤠᤒᤠ ᤐᤥᤱᤛᤠᤱ ᤀᤡᤃᤪ ᤑᤔᤏᤠᤒᤠ ᤐᤥᤱᤛᤠᤱ. ᤏᤤᤏᤠᤛᤢᤳ ᤀᤡᤃᤪ ᤛᤧᤔᤢᤖᤡᤰ ᤌᤧᤔᤠ ᤐᤥᤱᤛᤠᤱ. ᤛᤡᤜᤥ᤹ᤒᤠ ᤁᤡᤃᤪ ᤛᤡᤜᤥ᤹ᤒᤠ ᤋᤔᤏᤠᤒᤠ ᤆᤩᤠᤛᤠᤱ— 49 ᤜᤡ᤺ᤰᤋᤠᤱᤒᤠ ᤛᤢᤰᤏᤠ᤺ᤶᤒᤠ ᤀᤡᤃᤪ ᤜᤧ᤺ᤳᤋᤠᤱᤒᤠ ᤛᤢᤰᤏᤠ᤺ᤶᤒᤠ ᤁᤧᤎᤠᤒᤠ. ᤆᤠᤱ. ᤛᤡᤜᤥ᤹ᤒᤠ. ᤌᤠᤰᤔᤏᤠᤒᤠ. ᤑᤔᤏᤠᤒᤠ ᤀᤡᤃᤪ ᤛᤡᤜᤥ᤹ᤒᤠ ᤆᤡᤃᤰᤘᤠ ᤌᤧᤔᤠᤀᤥ ᤐᤳᤇᤠᤱ ᤂᤧᤱᤃ ᤁᤧᤘᤠᤶᤒᤠ ᤛᤢᤰᤏᤠ᤺ᤶᤒᤠᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤥ᤺ᤴᤎᤠᤰᤔᤠ ᤐᤥᤱ᤹॥ 50 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤸᤗᤧ ᤁᤢᤕᤥ᤺ᤰᤁᤡᤴ ᤛᤠ᤹ᤖᤢᤖ. ᤜᤧᤰᤁᤩᤠᤱ ᤂᤧᤴ ᤁᤢᤕᤥᤰ ᤁᤧᤈᤢᤰᤐᤠ ᤆᤡᤃᤰᤘᤠᤴ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 51 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤁᤢᤕᤥ᤺ᤰᤁᤡᤴ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤛᤠ᤹ᤖᤢᤖ॥ ᤆᤠᤱ. ᤌᤠᤰᤔᤏᤠᤒᤠ. ᤑᤔᤏᤠᤒᤠ ᤀᤡᤃᤪ ᤌᤧᤔᤠ ᤕᤠ᤺ᤶᤒᤰᤁᤥ ᤕᤠᤱᤔᤏᤠᤒᤠ ᤛᤡᤜᤥ᤹ᤒᤠᤀᤥ ᤂᤧᤴ ᤛᤢᤰᤏᤠ᤺ᤶᤒᤠᤴ ᤘᤠᤔᤢᤀᤠᤱ ᤐᤳᤏᤧᤓᤃᤪ ᤂᤧᤴ ᤁᤡᤵᤔᤠᤃᤧᤄᤢᤒᤠ ᤛᤢᤰᤏᤠ᤺ᤶᤒᤠᤖᤥ॥ ᤂᤧᤴ ᤆᤡᤃᤰᤘᤠᤴ ᤀᤠᤛᤢᤳᤌᤥᤖᤥ॥ 52 ᤂᤧᤒᤩᤠᤱ ᤂᤧᤴ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤆᤠᤱᤅᤡᤴ. ᤌᤠᤰᤔᤏᤠᤒᤠ. ᤛᤧᤔᤢᤖᤡᤰ. ᤏᤤᤏᤠᤛᤢᤳ ᤀᤡᤃᤪ ᤌᤧᤔᤠ ᤛᤡᤜᤥ᤹ᤒᤠ ᤆᤡᤃᤰᤘᤠ ᤌᤣᤛᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤴ ᤔᤡᤎᤡᤰᤂᤢᤍᤣᤛᤢᤖ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤃᤡ᤺ᤴᤃᤡ᤺ᤶᤒᤠ ᤛᤢᤰᤏᤠ᤺ᤶᤒᤠᤖᤥ॥ ᤔᤡᤀᤥ ᤂᤧᤴ ᤔᤡᤎᤡᤱᤔᤠᤍᤣᤔᤠ ᤐᤥᤱ᤹॥ 53 “ᤁᤖ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤛᤠ᤹ᤖᤢᤸᤗᤧ ᤂᤧᤴ ᤛᤢᤰᤏᤠ᤺ᤶᤒᤠᤴ ᤆᤠᤱ. ᤌᤠᤰᤔᤏᤠᤒᤠ. ᤑᤔᤏᤠᤒᤠ. ᤀᤡᤃᤪ ᤌᤧᤔᤠ ᤛᤡᤜᤥ᤹ᤒᤠ ᤆᤡᤃᤰᤘᤠᤀᤥᤀᤠᤱ ᤘᤠᤔᤢᤒᤠ ᤜᤥᤵᤏᤧᤓᤃᤪ. 54 ᤂᤧᤴ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤆᤠᤱᤅᤡᤴ ᤘᤠᤜᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤖ॥ ᤂᤧᤒᤩᤠᤱ ᤂᤧᤸᤗᤧ ᤀᤠᤸᤗᤛᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤗᤠ᤺ᤳᤗᤠ᤺ᤳ ᤕᤢᤰᤂᤢᤖ॥ 55 ᤂᤧᤴ ᤆᤡᤃᤰᤘᤠᤴ ᤘᤠᤔᤧᤜᤵᤋᤢᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤖ. ᤜᤧᤰᤁᤩᤠᤱ ᤛᤢᤰᤏᤠ᤺ᤶᤒᤧᤴ ᤔᤧᤴᤘᤠᤶᤔᤣ ᤐᤳᤋᤠᤱ ᤔᤧᤴᤈᤠ᤺ᤴᤏᤣᤒᤠ ᤜᤧᤰᤁᤣ ᤗ᤹ᤏᤧᤓᤃᤪ ᤂᤧᤴ ᤀᤠᤸᤗᤛᤠᤱ ᤀᤠᤛᤢᤳᤌᤥᤀᤣ ᤆᤥᤰ॥ ᤂᤧᤴ ᤛᤢᤰᤏᤠ᤺ᤶᤒᤧᤴ ᤛᤡᤃᤠᤱ ᤗᤧᤵᤔᤠᤱ ᤐᤳᤇᤠᤱ ᤗᤠ᤺ᤰᤁᤠᤳ ᤐᤳᤇᤠᤱ. ᤔᤡᤀᤥ ᤂᤧᤴ ᤆᤠᤱᤅᤡᤴ ᤔᤡᤎᤡᤱᤔᤠᤍᤣᤔᤠ ᤐᤥᤱ᤹॥ 56 ᤂᤧᤴ ᤆᤠᤱᤅᤡᤴ ᤘᤠᤔᤧᤜᤵᤋᤢᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤛᤠ᤹ᤖᤢᤸᤗᤧ ᤛᤢᤰᤏᤠ᤺ᤶᤒᤧᤴ ᤔᤠᤒᤣ᤺ᤰᤗ ᤐᤳᤏᤧᤓᤃᤪ ᤂᤧᤴ ᤆᤠᤱᤅᤡᤴ. ᤌᤠᤰᤔᤏᤠᤒᤠ. ᤀᤡᤃᤪ ᤑᤔᤏᤠᤒᤠ ᤁᤡᤃᤪ ᤛᤡᤜᤥ᤹ᤒᤥᤗᤠᤶ ᤂᤧᤴ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤁᤢᤗᤧᤵᤐᤡᤸᤗᤰ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤌᤧ᤺ᤰᤂᤢᤍᤧᤛᤢᤖ॥ 57 ᤁᤖ ᤂᤧᤴ ᤛᤢᤰᤏᤠ᤺ᤶᤒᤧᤴ ᤀᤠᤸᤗᤛᤠᤱ ᤆᤠᤱ. ᤌᤠᤰᤔᤏᤠᤒᤠ. ᤑᤔᤏᤠᤒᤠ ᤀᤡᤃᤪ ᤁᤢᤓᤠ ᤛᤡᤜᤥ᤹ᤒᤠ ᤆᤡᤃᤰᤘᤠᤀᤥ ᤕᤠᤶᤔᤥ ᤏᤡᤎᤠᤒᤧᤏᤧᤓᤃᤪ. ᤂᤧᤴ ᤘᤠᤔᤢᤍᤣ᤹ᤖᤢᤖ ᤐᤵᤐᤠᤖᤥ॥ ᤂᤧᤴ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤆᤡᤃᤰᤘᤠᤴ ᤔᤡᤀᤥ ᤔᤡᤎᤡᤱᤔᤠᤍᤣᤔᤠ ᤐᤥᤱ᤹॥ 58 ᤀᤠᤳᤋᤡᤴ ᤆᤠᤱ. ᤌᤠᤰᤔᤏᤠᤒᤠ. ᤑᤔᤏᤠᤒᤠ ᤀᤡᤃᤪ ᤌᤧᤔᤠ ᤛᤡᤜᤥ᤹ᤒᤠ ᤆᤡᤃᤰᤘᤠᤛᤠᤱ ᤘᤠᤜᤵᤔᤧᤸᤗᤧ ᤂᤧᤵᤔᤥᤗᤠᤶ ᤛᤢᤰᤏᤠ᤺ᤶᤒᤧᤴ ᤐᤣᤃᤧᤏᤧᤓᤃᤪ. ᤂᤧᤴ ᤕᤠᤶᤔᤥ ᤏᤡᤗᤧᤱ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤛᤢᤳᤌᤥ ᤐᤥᤱ᤹॥” 59 ᤛᤧᤔᤢᤖᤡᤰ ᤀᤡᤃᤪ ᤏᤤᤏᤠᤛᤢᤳ ᤆᤡᤖᤡᤰᤁᤥ. ᤌᤠᤰᤔᤏᤠᤒᤠ ᤁᤡᤃᤪ ᤑᤔᤏᤠᤒᤠ ᤏᤢ ᤁᤢᤓᤠ ᤛᤡᤜᤥ᤹ᤒᤠ ᤆᤡᤃᤰᤘᤠᤀᤥ ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤁᤢᤕᤥ᤺ᤰᤁᤡᤴ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤗᤣ᤺ᤵᤔᤠᤖᤧ ᤗᤠᤃᤡ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤒᤥᤱᤒᤠ ᤌᤡᤶᤜᤠ᤹ ᤀᤠᤶᤓᤠ ᤁᤴᤜᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.