ᤗᤧᤒᤡ 12 - LIFOTNT

ᤁᤧᤛᤠᤱᤛᤡᤱᤔᤠ ᤔᤧᤴᤇᤢᤔᤠᤴ ᤛᤢᤳᤌᤥ ᤐᤥᤱᤔᤠ ᤌᤡᤶ

¹ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ.

² “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤔᤧᤴᤇᤢᤰᤔᤠ ᤁᤧᤒᤥᤱᤔᤠᤀᤠᤱ ᤕᤧᤶᤒᤡᤳᤇᤠᤛᤠ ᤁᤧᤃᤵᤔᤠ ᤔᤧᤴᤇᤢᤔᤠᤴ ᤏᤢᤛᤡ ᤕᤧᤴ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤒᤠ ᤕᤧᤴᤏᤥ ᤜᤧᤰᤁᤣᤀᤣ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥

³ ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤕᤧᤶᤒᤡᤳᤇᤠ ᤀᤅᤧ᤺ᤰᤘᤠᤴ ᤜᤷᤍᤥ ᤔᤧᤜᤧᤃᤢ ᤔᤧᤒᤡᤖᤢᤖ॥

⁴ ᤂᤧᤴ ᤀᤣᤃᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤔᤠᤰᤂᤡ᤹ ᤘᤕᤢᤔᤠᤗᤠᤶ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤛᤢᤶᤒᤥᤱᤅᤠᤱ ᤛᤢᤶᤛᤡ ᤕᤧᤴ ᤌᤠᤖᤡᤰ ᤜᤠᤱᤄᤢᤖ ᤐᤥᤱ᤹. ᤜᤧᤰᤁᤩᤠᤱ ᤛᤢᤳᤌᤥ ᤐᤥᤱᤔᤠ ᤕᤧᤴ ᤔᤧᤱᤃᤧᤳ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ ᤀᤠᤳᤋᤡᤴ ᤛᤢᤳᤌᤥ ᤐᤠ᤺ᤴᤏᤡᤴᤏᤠᤱ ᤛᤢᤔᤠ ᤔᤧᤏᤢ᤹ᤏᤧᤴ. ᤛᤣᤛᤣᤍᤧᤴᤏᤥᤀᤠᤱ ᤐᤣ᤺ᤰᤔᤠ ᤔᤧᤏᤢ᤹ᤏᤧᤴ॥

⁵ “‘ᤁᤖ ᤂᤧᤸᤗᤧ ᤔᤧᤴᤇᤢᤔᤠᤛᤠ ᤁᤳᤋᤢᤏᤧᤓᤃᤪ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤔᤠ ᤕᤧᤴᤏᤥ ᤜᤧᤰᤁᤣᤀᤣ ᤂᤢᤏᤧ᤹ ᤕᤧᤳᤏᤠᤶ ᤏᤧᤳᤇᤡ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹. ᤜᤧᤰᤁᤩᤠᤱ ᤁᤢᤔᤠᤰᤂᤡ᤹ ᤘᤕᤢᤔᤠᤗᤠᤶ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤋᤢᤰᤐᤥᤱᤅᤠᤱ ᤋᤢᤰᤛᤡ ᤕᤧᤴ ᤌᤠᤖᤡᤰ ᤜᤠᤱᤔᤠ ᤐᤥᤱ᤹॥

⁶ “‘ᤂᤢᤏᤧ᤹ ᤛᤢᤳᤌᤥ ᤁᤢᤒᤥᤱᤔᤠ ᤕᤧᤴᤏᤡᤴ ᤁᤧᤵᤔᤠ ᤆᤢ᤺ᤳᤋᤠᤱ. ᤕᤧᤶᤒᤡᤳᤇᤠᤛᤠ᤺ᤸᤗᤧ ᤁᤢᤗᤠᤃᤡᤛᤠᤱ ᤔᤧᤴᤇᤢᤔᤠ ᤛᤠ᤺ᤸᤗᤧ ᤁᤢᤗᤠᤃᤡᤛᤠᤱ. ᤂᤢᤏᤧ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤌᤢ᤺ᤶᤒᤠ ᤏᤢ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤗᤳᤇᤠ ᤐᤧᤷᤘᤠᤈᤩᤠ᤺ᤰ ᤀᤡᤃᤪ ᤛᤠᤵᤐᤧᤳᤋᤪᤢ᤺ᤰᤔᤠ ᤌᤡᤰ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤋᤠᤖᤢᤖ॥

⁷ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤱᤜᤠ᤹ ᤋᤥ᤺ᤴᤍᤢᤛᤡᤀᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ᤹॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤁᤢᤔᤠᤰᤂᤡ᤹ ᤘᤕᤢᤔᤠᤗᤠᤶ ᤛᤢᤳᤌᤥ ᤐᤥᤱᤒᤠ ᤏᤡ᤺ᤴᤎᤥ ᤐᤥᤱ᤹॥ “‘ᤔᤧᤴᤇᤢᤔᤠ᤺ᤸᤗᤧ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠᤛᤠ ᤁᤳᤋᤢᤀᤠᤱ ᤀᤣᤃᤠᤱ ᤂᤧᤸᤗᤧ ᤗᤠᤃᤡ ᤆᤥ᤺ᤰᤔᤠ ᤁᤧᤒᤥᤱᤒᤠ ᤌᤡᤶᤔᤡᤴ ᤜᤠᤒᤠ ᤁᤴᤗᤥ॥

⁸ “‘ᤌᤢ᤺ᤶᤒᤠ ᤋᤠ᤺ᤵᤔᤠ ᤂᤧᤸᤗᤧ ᤔᤧᤜᤡ᤹ᤖᤢᤴᤏᤧᤓᤃᤪ ᤂᤢᤏᤧ᤹ ᤏᤧᤳᤇᤡ ᤛᤠᤵᤐᤧᤳᤋᤪᤢ᤺ᤰᤔᤠ ᤀᤡᤃᤪ ᤐᤧᤷᤘᤠᤈᤩᤠ᤺ᤰ ᤏᤧᤳᤇᤡ—ᤗᤳᤇᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤏᤢ ᤘᤣ᤹ᤀᤡᤴ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤠᤖᤢᤖ॥ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤋᤢ᤹. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤛᤢᤳᤌᤥ ᤐᤥᤱᤒᤠ ᤏᤡ᤺ᤴᤎᤥ ᤐᤥᤱᤗᤥ॥’”