ᤗᤧᤒᤡ 11 - LIFOTNTᤆᤠᤔᤠ ᤁᤧᤏᤢ᤹ᤒᤠ ᤌᤰᤛᤠᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. 2 “ᤀᤡᤛᤪᤠᤀᤡᤗᤡᤜᤠ᤹ ᤂᤧᤴᤇᤡ᤹ ᤀᤰᤂᤣ ᤔᤧᤳᤋᤧᤇᤧᤛᤧ᤹—ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ᤀᤥ ᤂᤡᤏᤡ᤹ ᤁᤴᤜᤠ᤹ ᤆᤠᤔᤠᤛᤡ ᤏᤢ᤹॥ 3 ᤌᤰᤛᤠᤜᤠ᤹ᤀᤥ ᤏᤧᤳᤇᤡ ᤁᤢᤗᤰᤁᤥ ᤁᤢᤗᤠᤱ ᤋᤥ᤹ᤓᤣ᤺ᤳ ᤁᤧᤛᤧᤒᤠ ᤏᤢ ᤁᤢᤈᤠ ᤁᤧᤀᤶᤒᤠᤜᤠ᤹ ᤆᤠᤔᤠᤛᤡ ᤏᤢ᤹॥ 4 “‘ᤜᤧᤰᤁᤣᤛᤠᤱ ᤁᤢᤈᤠ ᤁᤧᤀᤶᤒᤠᤖᤰ ᤀᤡᤃᤪ ᤁᤢᤗᤠᤱ ᤋᤥ᤹ᤓᤣ᤺ᤳ ᤁᤧᤛᤧᤒᤠᤖᤰ ᤁᤧᤒᤵᤐᤠ ᤁᤴ ᤌᤰᤛᤠᤜᤠ᤹ ᤂᤡᤏᤡ᤹ ᤆᤠᤔᤠᤛᤡ ᤔᤧᤏᤢ᤹ᤏᤧᤴ—ᤀᤢᤔᤣ. ᤌᤣᤀᤠᤱᤓᤧᤸᤗᤧ ᤀᤢᤔᤣ᤺ᤸᤗᤧ ᤁᤢᤈᤠᤴ ᤀᤴᤍᤢ ᤁᤖ ᤂᤧᤸᤗᤧ ᤁᤢᤗᤠᤱ ᤋᤥ᤹ᤓᤧ᤺ᤳᤋᤡᤴ ᤁᤧᤛᤧᤒᤠ ᤔᤧᤒᤵᤏᤧᤴ. ᤂᤧᤴ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤆᤥᤰ॥ 5 ᤜᤧᤰᤁᤩᤠᤱ ᤔᤡᤄᤰᤐᤠ ᤛᤢᤒᤠ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤈᤠ ᤀᤴᤍᤢ᤹. ᤁᤖ ᤂᤧᤸᤗᤧ ᤁᤢᤗᤠᤱ ᤋᤥ᤹ᤓᤧ᤺ᤳᤋᤡᤴ ᤁᤧᤛᤧᤶᤒᤠ ᤔᤧᤒᤳᤏᤧᤴ॥ ᤂᤧᤴ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤆᤥᤰ॥ 6 ᤜᤧᤰᤁᤩᤠᤱ ᤑᤋᤠ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤈᤠ ᤀᤴᤍᤢ. ᤁᤖ ᤂᤧᤸᤗᤧ ᤁᤢᤗᤠᤱ ᤋᤥ᤹ᤓᤣ᤺ᤳᤋᤡᤴ ᤁᤧᤛᤧᤶᤒᤠ ᤔᤧᤒᤳᤏᤧᤴ॥ ᤂᤧᤴ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤆᤥᤰ॥ 7 ᤜᤧᤰᤁᤩᤠᤱ ᤑᤠᤰ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤗᤠᤱ ᤋᤥ᤹ᤓᤣ᤺ᤳᤋᤡᤴ ᤁᤧᤛᤧᤶᤒᤠᤃ ᤐᤳ. ᤁᤖ ᤁᤢᤈᤠᤴ ᤔᤧᤀᤴᤍᤢᤴ᤹॥ ᤂᤧᤴ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤆᤥᤰ॥ 8 ᤂᤧᤴ ᤌᤰᤛᤠ ᤛᤠᤜᤠ᤹ ᤂᤡᤏᤡ᤹ ᤔᤧᤈᤧᤶᤔᤡᤴᤏᤧ᤹. ᤂᤧᤒᤩᤠᤱ ᤂᤧᤴ ᤌᤰᤛᤠ ᤁᤧᤛᤡᤒᤠᤜᤠ᤹ ᤛᤢᤔᤠᤛᤡ ᤔᤧᤏᤢ᤹ᤏᤧᤴ॥ ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ 9 “‘ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤁᤴ ᤌᤰᤛᤠᤜᤠ᤹ ᤂᤡᤏᤡ᤹ ᤆᤠᤔᤠ ᤔᤧᤏᤢ᤹. ᤀᤡᤃᤪ ᤘᤖ᤺ᤱᤅᤥ ᤏᤢ ᤘᤜ᤺ᤱᤜᤠ᤹ᤀᤥ ᤁᤧᤕᤠᤰᤐᤠ ᤁᤢᤗᤠᤵ ᤜᤧᤰᤁᤩᤠᤱ ᤁᤢᤛᤣ᤺ᤰ ᤁᤧᤒᤵᤐᤠᤜᤠ᤹ ᤂᤡᤏᤡ᤹ ᤆᤠᤔᤠᤛᤡ ᤏᤢ᤹॥ 10 ᤁᤖ ᤘᤖ᤺ᤱ ᤏᤢ ᤘᤜ᤺ᤱᤜᤠ᤹ᤀᤥ ᤁᤧᤕᤠᤰᤐᤠ ᤁᤢᤗᤠᤵ ᤏᤢ ᤁᤢᤛᤣ᤺ᤰ ᤔᤧᤶᤒᤵᤔᤏᤠᤒᤠ. ᤆᤫᤠ᤺ᤳᤋᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤁᤧᤖᤧᤰ ᤐᤠᤎᤢᤱ ᤗᤧᤰᤅᤠ ᤏᤢ ᤆᤫᤠ᤺ᤳᤋᤥ ᤜᤕᤱ ᤜᤕᤱ ᤁᤧᤕᤠᤰᤐᤠ ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤁᤧᤖᤧᤰ ᤂᤡᤏᤡ᤹ ᤗᤠᤃᤡ ᤛᤡᤰᤁᤧᤗᤧ᤺ᤱᤒᤠ ᤔᤧᤈᤥᤰ॥ 11 ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤛᤡᤰᤁᤧᤗᤧ᤺ᤱᤒᤠ ᤔᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ. ᤂᤡᤏᤡ᤹ ᤂᤧᤴ ᤐᤠᤎᤢᤱ ᤗᤧᤰᤅᤠ ᤛᤠᤜᤠ᤹ ᤔᤧᤈᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤂᤧᤴ ᤐᤠᤎᤢᤱ ᤗᤧᤰᤅᤠ ᤁᤢᤛᤡᤘᤧᤳᤜᤠ᤹ᤖᤧ ᤁᤢᤒᤣᤛᤠᤱ ᤂᤡᤏᤡ᤹ ᤐᤣ᤺ᤰᤔᤠᤀᤣ ᤔᤧᤒᤣᤃᤧᤶᤔᤡᤴᤏᤧ᤹॥ 12 ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤁᤖ ᤁᤢᤗᤠᤵ ᤏᤢ ᤁᤢᤛᤣ᤺ᤰ ᤔᤧᤶᤒᤵᤔᤏᤠᤒᤠᤜᤠ᤹ ᤂᤡᤏᤡ᤹ ᤗᤠᤃᤡ ᤛᤡᤰᤁᤧᤗᤧ᤺ᤱᤒᤠ ᤔᤧᤈᤥᤰ॥ 13 “‘ᤐᤢᤛᤠᤜᤠ᤹ᤀᤥ ᤁᤴᤜᤠ᤹ ᤂᤡᤏᤡ᤹ ᤗᤠᤃᤡ ᤛᤡᤰᤁᤧᤗᤧ᤺ᤱᤒᤠ ᤔᤧᤈᤥᤰ—ᤂᤧᤱᤜᤠ᤹ ᤂᤡᤏᤡ᤹ ᤆᤠᤔᤠᤛᤡ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤠᤶᤃᤧᤛᤡᤱᤒᤠ ᤔᤧᤈᤥᤰ—ᤁᤰᤁᤑᤡ᤺ᤰᤔᤠ. ᤁᤡᤌ. ᤁᤢᤔᤠᤰᤗᤠ ᤁᤡᤌ. 14 ᤁᤢᤜᤧ᤺ᤳᤗᤠ ᤔᤕᤠ ᤏᤢ ᤁᤧᤖᤧᤰ ᤐᤖᤡᤰᤐᤠ ᤔᤕᤠᤜᤠ᤹. 15 ᤁᤧᤖᤧᤰ ᤐᤖᤡᤰᤐᤠ ᤀᤠ᤺ᤰᤘᤠᤜᤠ᤹. 16 ᤕᤶᤒᤠ ᤑᤰᤌᤡ᤺ᤶᤒᤠ. ᤁᤢᤗᤢᤗᤢ ᤁᤧᤗ᤹ᤒᤠ ᤑᤰᤌᤡ᤺ᤶᤒᤠ. ᤘᤖ᤺ᤱᤅᤥᤒᤠ ᤐᤢ. ᤁᤧᤖᤧᤰ ᤐᤖᤡᤰᤐᤠ ᤑᤡ᤺ᤳᤆᤥᤜᤠ᤹. 17 ᤆᤢᤰᤛᤠ ᤑᤰᤌᤡ᤺ᤶᤒᤠ. ᤆᤫᤠ᤺ᤳᤋᤥ ᤁᤧᤕᤠᤰᤐᤠ ᤁᤠ᤺ᤰᤘᤠ. ᤜᤶᤒᤢ᤺ᤶᤔᤠ. 18 ᤁᤢᤓᤖᤠ ᤑᤰᤌᤡ᤺ᤶᤒᤠ. ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤑᤰᤌᤡ᤺ᤶᤒᤠ. ᤅᤠ ᤁᤧᤈᤠᤒᤠ ᤔᤕᤠ. 19 ᤋᤠ᤺ᤱᤘᤠ. ᤁᤧᤖᤧᤰ ᤐᤖᤡᤰᤐᤠ ᤗᤡᤗᤡᤘᤠ. ᤂᤧᤵ ᤐᤢ ᤏᤢ ᤏᤧᤰᤘᤠ ᤔᤧᤘᤠᤖᤠᤵ॥ 20 “‘ᤁᤢᤗᤠᤵ ᤁᤧᤒᤵᤐᤠ ᤁᤢᤗᤠᤱ ᤗᤡᤛᤡᤖᤧ ᤗᤠᤱᤃᤧᤄᤣ᤺ᤰᤐᤠ ᤁᤧᤖᤧᤰ ᤐᤖᤡᤰᤐᤠ ᤑᤣ᤹ᤒᤠ᤺ᤳᤜᤠ᤹ ᤂᤡᤏᤡ᤹ ᤗᤠᤃᤡ ᤕᤠᤶᤃᤧᤛᤡᤱᤒᤠ ᤔᤧᤈᤥᤰ॥ 21 ᤁᤖ ᤁᤢᤗᤠᤵ ᤁᤧᤒᤵᤐᤠ ᤁᤢᤗᤠᤱ ᤗᤡᤛᤡᤖᤧ ᤗᤠᤱᤃᤧᤄᤣ᤺ᤰᤐᤠᤜᤠ᤹ᤀᤥ ᤂᤠᤶᤒᤠᤱᤅᤥ ᤗᤠᤱᤄᤣ᤺ᤰᤔᤠᤖᤧ ᤗᤠᤃᤡ ᤁᤢᤗᤠᤱᤔᤡᤰ ᤁᤧᤒᤵᤐᤠᤜᤠ᤹ ᤂᤡᤏᤡ᤹ ᤆᤠᤔᤠᤛᤡ ᤔᤧᤏᤢ᤹॥ 22 ᤂᤧᤱᤜᤠ᤹ᤀᤥ ᤁᤴᤜᤠ᤹ ᤂᤡᤏᤡ᤹ ᤆᤠᤔᤠᤛᤡ ᤏᤢ᤹—ᤀᤡᤃᤪ ᤁᤧᤖᤧᤰ ᤐᤖᤡᤰᤐᤠ ᤏᤡ᤺ᤱᤄᤢᤰᤘᤠᤜᤠ᤹. ᤋᤠᤱᤗᤧ᤺ᤰᤁᤩᤠ ᤐᤩᤠ᤺ᤳ. ᤁᤡᤖᤡ᤺ᤰᤘᤠ. ᤗᤶᤗᤶ ᤐᤩᤠ᤺ᤵᤔᤠ॥ 23 ᤁᤖ ᤁᤢᤗᤠᤱ ᤗᤡᤛᤡᤒᤠ ᤁᤢᤗᤠᤵ ᤁᤧᤒᤵᤐᤠ ᤘᤣ᤹ ᤁᤧᤖᤧᤰ ᤂᤡᤏᤡ᤹ ᤗᤠᤃᤡ ᤕᤠᤶᤃᤧᤛᤡᤱᤒᤠ ᤔᤧᤈᤥᤰ॥ 24 “‘ᤁᤴᤜᤠ᤹ᤗᤠᤶ ᤂᤡᤏᤡ᤹ ᤀᤠᤛᤢᤳᤌᤥ ᤁᤧᤒᤥ᤺ᤰᤂᤡ᤹॥ ᤀᤠᤳᤋᤡᤸᤗᤧ ᤁᤴ ᤁᤢᤛᤡᤘᤧᤳᤜᤠ᤹ ᤛᤢᤛᤢᤛᤡ᤹. ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 25 ᤀᤠᤳᤋᤡᤸᤗᤧ ᤁᤴᤜᤠ᤹ᤀᤥᤒᤠ ᤁᤢᤓᤠ ᤁᤧᤛᤡᤒᤠᤜᤠ᤹ ᤐᤰᤂᤢᤛᤡ᤹. ᤂᤢᤏᤧ᤹ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤌᤠᤖᤡᤰ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ 26 “‘ᤁᤢᤗᤠᤱ ᤋᤥ᤹ᤓᤣ᤺ᤳ ᤁᤧᤛᤧᤒᤠ ᤔᤧᤶᤒᤵᤔᤏᤠᤒᤠ ᤏᤢ ᤁᤢᤈᤠ ᤔᤧᤴᤀᤶᤔᤏᤠᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ ᤂᤧᤴ ᤁᤢᤛᤡᤘᤧᤳᤜᤠ᤹ ᤁᤧᤛᤢᤒᤠᤜᤠ᤹ ᤁᤧᤖᤧᤰ ᤀᤠᤛᤢᤳᤌᤥ ᤔᤧᤒᤥᤱ᤹॥ 27 ᤂᤢᤴᤇᤡ᤹ ᤗᤠᤱ ᤋᤥ᤹ᤓᤣ᤺ᤳᤋᤡᤸᤗᤧ ᤁᤧᤍᤰᤛᤡᤱᤒᤠᤀᤠᤱ ᤗᤡᤛᤡ ᤗᤠᤱᤅᤡᤸᤗᤧ ᤗᤠᤱᤃᤧᤄᤣ᤺ᤰᤐᤠ ᤁᤧᤖᤧᤰ ᤌᤰᤛᤠᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ ᤂᤧᤴ ᤁᤢᤛᤡᤘᤧᤳ ᤌᤰᤛᤠ ᤁᤧᤛᤢᤒᤠᤜᤠ᤹ ᤁᤧᤖᤧᤰ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤔᤧᤒᤥᤱ᤹॥ 28 ᤂᤧᤴ ᤁᤢᤛᤡᤘᤧᤳᤜᤠ᤹ ᤁᤧᤒᤱᤒᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤋᤢᤖ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤱᤜᤠ᤹ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤔᤧᤈᤥᤰ॥ 29 “‘ᤂᤠᤶᤒᤠᤱᤅᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ᤀᤥ ᤁᤴᤜᤠ᤹ ᤆᤠᤜᤣ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥᤛᤡᤖᤥ—ᤀᤡᤃᤪ ᤜᤡᤕᤢ. ᤛᤢᤒᤠ. ᤁᤧᤖᤧᤰ ᤐᤖᤡᤰᤐᤠ ᤜ᤺ᤴᤍᤃᤣ᤺ᤰᤜᤠ᤹. 30 ᤁᤍᤠ. ᤏᤠᤶᤕᤢ᤺ᤰ. ᤏᤸᤗᤧ᤺ᤰ. ᤕᤧ᤺ᤱᤄᤠᤀᤥ ᤁᤧᤕᤠᤰᤐᤠ ᤜ᤺ᤴᤍᤃᤣ᤺ᤰ ᤏᤢ ᤁᤢᤏᤠᤖᤠ ᤁᤧᤗᤧᤱᤒᤠ ᤜ᤺ᤴᤍᤃᤣ᤺ᤰ॥ 31 ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ᤀᤥ ᤀᤠᤛᤢᤳᤌᤥ ᤁᤴᤜᤠ᤹ᤖᤥ॥ ᤁᤸᤗᤧ ᤁᤢᤛᤡᤘᤧᤳᤜᤠ᤹ ᤜᤠ᤺ᤳᤗᤧ ᤛᤢᤛᤢᤛᤡ. ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 32 ᤁᤴᤜᤠ᤹ᤀᤥᤒᤠ ᤁᤢᤛᤡᤘᤧᤳ ᤌᤡᤰ ᤁᤢᤓᤠ ᤀᤠᤳᤋᤡᤴ ᤛᤠᤔᤠᤀᤥᤛᤠᤱ ᤗᤠ᤺ᤳᤏᤧᤓᤃᤪ. ᤂᤧᤴ ᤐᤠ᤺ᤴᤏᤡᤴ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤴ ᤛᤡᤱᤗᤧ ᤆᤡᤃᤰᤘᤠ. ᤀᤡᤃᤪ ᤆᤠᤱ. ᤛᤡᤜᤥ᤹ᤒᤠ. ᤛᤠᤃᤡᤛᤠᤱ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤴ ᤆᤫᤠ᤺ᤳᤋᤥ ᤜᤢᤶᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹. ᤂᤧᤴ ᤀᤣᤃᤠᤱᤗᤰ ᤂᤧᤴ ᤛᤢᤳᤌᤥ ᤐᤥᤱ᤹॥ 33 ᤁᤢᤓᤠ ᤂᤠᤶ ᤂᤵᤐᤩᤠᤀᤥ ᤁᤴ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ᤗᤠᤶ ᤁᤢᤓᤠ ᤗᤳᤌᤡᤰ ᤗᤠᤛᤧᤏᤧᤓᤃᤪ ᤂᤧᤴ ᤂᤵᤐᤩᤠᤀᤥ ᤁᤧᤕᤠᤰᤐᤠ ᤁᤧᤖᤧᤰ ᤐᤠ᤺ᤴᤏᤡᤴ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤴ ᤂᤵᤐᤩᤠᤴ ᤂᤡᤏᤡ᤹ ᤕ᤺ᤵᤛᤧᤶᤍᤧᤛᤧᤶᤔᤧ᤹॥ 34 ᤜᤧᤰᤋᤱᤒᤠ ᤂᤵᤐᤩᤠᤀᤥ ᤕᤢᤱᤔᤏᤠᤒᤠ ᤆᤫᤠ᤺ᤳᤋᤡᤴ ᤀᤠᤳᤋᤡᤴ ᤁᤢᤈᤠᤀᤥ ᤗᤠ᤺ᤳᤇᤠᤱ ᤂᤧᤴ ᤀᤠᤛᤢᤳᤌᤥ ᤐᤥᤱ᤹. ᤂᤧᤒᤩᤠᤱ ᤜᤧᤰᤋᤱᤒᤠ ᤂᤵᤐᤩᤠᤀᤥ ᤁᤧᤕᤠᤰᤐᤠ ᤌᤢᤱᤔᤏᤠᤒᤠ ᤌᤧᤔᤠ᤺ᤴᤇᤠᤱ ᤀᤠᤛᤢᤳᤌᤥ ᤐᤥᤱ᤹॥ 35 ᤌᤧᤔᤠ ᤐᤠ᤺ᤴᤏᤥᤛᤠᤱ. ᤔᤡᤜᤠ᤹ᤗᤢᤱ ᤁᤡᤃᤪ ᤋ᤺ᤰ ᤌᤥ᤺ᤰᤔᤠ ᤂᤵᤐᤩᤠ. ᤂᤧᤵᤔᤥ ᤂᤧᤸᤗᤧ ᤁᤢᤛᤡᤘᤧᤳᤜᤠ᤹ ᤔᤧᤗᤠᤛᤧᤏᤣᤃᤓᤪ ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥ ᤂᤧᤴ ᤐᤰᤁᤪᤧ᤹ ᤐᤰᤁᤪᤧ᤹ ᤜᤧᤖᤧᤶᤍᤣᤛᤧᤶᤔᤧ᤹॥ ᤂᤧᤱᤜᤠ᤹ ᤀᤠᤛᤢᤳᤌᤥᤛᤡ. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥᤀᤣ ᤔᤧᤈᤥᤰ॥ 36 ᤜᤧᤰᤁᤣᤛᤠᤱ ᤘᤠᤒᤢᤴᤍᤠᤰᤘᤠ ᤀᤡᤃᤪ ᤘᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤛᤢᤳᤌᤥᤀᤣ ᤐᤥᤱᤅᤠᤱ ᤏᤧ᤹᤺. ᤁᤖ ᤂᤧᤴ ᤁᤢᤛᤡᤘᤧᤳᤜᤠ᤹ ᤁᤧᤛᤢᤒᤠᤴ ᤀᤠᤛᤢᤳᤌᤥ ᤐᤥᤱ᤹॥ 37 ᤜᤣ᤹ᤔᤠᤖᤧ ᤗᤠᤃᤡ ᤕᤢᤱᤔᤏᤠᤒᤠ ᤕᤠ᤹ᤖᤡ᤺ᤶᤒᤠᤀᤥ ᤜᤧᤰᤋᤱᤒᤠ ᤀᤠᤛᤢᤳᤌᤥ ᤐᤠ᤺ᤴᤏᤡᤴ ᤗᤠ᤺ᤳᤇᤠᤱ ᤕᤠ᤹ᤖᤡ᤺ᤶᤒᤠᤴ ᤛᤢᤳᤌᤥᤀᤣ ᤐᤥᤱ᤹॥ 38 ᤁᤖ ᤂᤧᤴ ᤕᤠ᤹ᤖᤡ᤺ᤶᤒᤠᤀᤥ ᤆᤫᤠ᤺ᤳ ᤁᤣ᤺ᤵᤔᤏᤠᤀᤠᤱ ᤕᤠᤰᤁᤠᤱ ᤂᤧᤴ ᤁᤢᤛᤡᤘᤧᤳᤜᤠ᤹ ᤂᤧᤸᤗᤧ ᤁᤢᤛᤶᤎᤠᤱ ᤆᤢᤰᤋᤧᤏᤧᤓᤃᤪ. ᤂᤧᤴ ᤂᤡᤏᤡ᤹ ᤗᤠᤃᤡ ᤀᤠᤛᤢᤳᤌᤥ ᤐᤥᤱ᤹॥ 39 “‘ᤂᤡᤏᤡ᤹ ᤛᤠᤈᤠᤔᤠ ᤁᤢᤓᤠ ᤌᤰᤛᤠᤴ ᤛᤩᤧᤏᤧᤓᤃᤪ ᤂᤧᤴ ᤁᤢᤛᤡᤘᤧᤳ ᤌᤰᤛᤠ ᤁᤧᤛᤢᤒᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 40 ᤁᤢᤛᤡᤘᤧᤳ ᤛᤠ ᤁᤧᤈᤠᤒᤠ ᤀᤡᤃᤪ ᤁᤧᤒᤱᤒᤧᤸᤗᤧ ᤁᤢᤈᤠᤱᤅᤡᤴ ᤘᤠᤜᤵᤔᤠ ᤐᤥᤱ᤹. ᤜᤧᤰᤁᤩᤠᤱ ᤂᤧᤴ ᤕᤢ᤺ᤴᤇᤡᤰ ᤌᤠᤖᤡᤰ ᤀᤠᤛᤢᤳᤌᤥ ᤐᤥᤱ᤹॥ 41 “‘ᤂᤠᤶᤒᤠᤱᤅᤥ ᤁᤧᤛ᤺ᤴᤇᤡᤱᤒᤠ ᤆᤢᤈᤢᤰᤛᤠ ᤁᤧᤖᤧᤰ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠᤜᤠ᤹ ᤕᤠᤶᤃᤧᤛᤡᤱᤒᤠ ᤔᤧᤈᤥᤰ. ᤂᤧᤱᤜᤠ᤹ ᤔᤧᤈᤠᤶᤛᤡᤶᤔᤡᤴᤏᤧ᤹॥ 42 ᤛᤠᤵᤐᤥ᤺ᤰᤗᤠᤶ ᤁᤧᤛ᤺ᤴᤇᤡᤱᤒᤠ. ᤀᤡᤃᤪ ᤗᤠᤱ ᤗᤡᤛᤡᤖᤧ ᤁᤧᤀᤢ᤺ᤱᤛᤡᤱᤒᤠ. ᤁᤡᤃᤪ ᤕᤖᤡᤰ ᤗᤠᤱᤜᤠ᤹ᤖᤧ ᤂᤠᤶᤒᤠᤱᤅᤥ ᤁᤧᤛ᤺ᤴᤇᤡᤱᤒᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤑᤣ᤹ᤒᤠ᤺ᤳᤜᤠ᤹ ᤂᤡᤏᤡ᤹ ᤆᤠᤔᤠᤛᤡ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤠᤶᤃᤧᤛᤡᤱᤒᤠ ᤔᤧᤈᤥᤰ॥ 43 ᤀᤠᤳᤋᤡᤴ ᤁᤧᤛ᤺ᤴᤇᤡᤱᤒᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤌᤰᤛᤠ᤺ᤴᤗᤠᤶᤔᤠᤱ ᤂᤡᤏᤡ᤹ ᤀᤠᤛᤢᤳᤌᤥ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ ᤂᤧᤱᤜᤠ᤹ ᤔᤧᤛᤢᤛᤧᤶᤛᤡᤶᤔᤡᤴᤏᤧ᤹. ᤔᤧᤈᤠᤶᤛᤡᤶᤔᤡᤴᤏᤧ᤹ ᤜᤧᤰᤁᤩᤠᤱ ᤀᤠᤛᤢᤳᤌᤥ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ 44 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤂᤡᤏᤡ᤹ ᤀᤠᤒᤠᤅᤣ ᤋᤥ᤺ᤴᤏᤠᤛᤡᤶᤔᤧ᤹ᤀᤠᤱ ᤛᤣᤛᤣ ᤐᤥ᤺ᤰᤂᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠ॥ ᤂᤠᤶᤒᤠᤱᤅᤥ ᤁᤧᤀᤢ᤺ᤱᤛᤡᤱᤒᤠ ᤀᤠᤳᤋᤡᤴ ᤐᤖᤡᤰᤐᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤌᤰᤛᤠᤗᤠᤶᤔᤠᤱ ᤀᤠᤛᤢᤳᤌᤥ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹॥ 45 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤡᤛᤪᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ᤀᤠ॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤛᤣᤛᤣ ᤐᤥ᤺ᤰᤂᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤣᤛᤣ ᤆᤥ᤺ᤰᤁᤠ॥ 46 “‘ᤌᤰᤛᤠ. ᤐᤢᤛᤠ ᤏᤢ ᤆᤫᤠ᤺ᤳᤋᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤁᤧᤛ᤺ᤴᤇᤡᤱᤒᤠ ᤁᤧᤖᤧᤰ ᤌᤰᤛᤠᤖᤧ ᤕᤠ᤺ᤶᤒᤣᤀᤥᤒᤠ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 47 ᤛᤢᤳᤌᤥ ᤏᤢ ᤀᤠᤛᤢᤳᤌᤥ. ᤜᤧᤰᤁᤩᤠᤱ ᤌᤰᤛᤠᤜᤠ᤹ᤀᤥ ᤆᤠᤔᤠ ᤁᤧᤏᤢ᤹ᤒᤠ ᤏᤢ ᤔᤧᤴᤏᤢ᤹ᤔᤏᤠᤒᤠ ᤁᤧᤛᤧᤴᤍᤢᤶᤛᤡᤶᤗ ᤐᤥᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.