ᤗᤧᤒᤡ 10 - LIFOTNTᤏᤠᤍᤠᤒ ᤏᤢ ᤀᤒᤡᤜᤢᤖᤧ ᤂᤢᤴᤇᤡ᤹ ᤗᤠᤕᤥ 1 ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤏᤠᤍᤠᤒ ᤏᤢ ᤀᤒᤡᤜᤢ᤺ᤸᤗᤧ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤒᤠᤅᤣ ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱᤜᤠ᤹ ᤕᤠᤱᤏᤧᤳᤇᤡᤀᤠᤱ ᤂᤧᤵᤔᤥ ᤔᤡ ᤜᤠ᤺ᤴᤍᤢᤛᤡ॥ ᤁᤶᤓᤗ᤹ᤖᤡᤰ ᤏᤠᤍᤠᤒ ᤏᤢ ᤀᤒᤡᤜᤢ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤔᤧᤘᤕᤧᤏᤧᤶᤒᤠ ᤔᤡᤴ ᤂᤢᤏᤧ᤹ ᤁᤢᤍᤃᤡ ᤋᤥ᤺ᤴᤍᤧᤛᤢ॥ 2 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤔᤡᤴ ᤐᤠᤱᤄᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤡ᤺ᤸᤗᤧ ᤂᤢᤴᤇᤡ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡ॥ 3 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤠᤒᤠ ᤁᤴ ᤘᤠ᤹—‘ᤀᤠᤱᤃᤠ᤹ ᤀᤠᤒᤣᤛᤠᤱ ᤁᤧᤍᤠᤒᤠᤜᤠ᤹ᤀᤥ ᤀᤠᤱᤃᤠ᤹ ᤛᤣᤛᤣᤒᤠ ᤐᤥᤱᤅᤠ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱ ᤐᤥᤱ᤹॥’” ᤜᤠᤖᤢᤏᤧᤴ ᤛᤫᤠ᤺ᤳ ᤕᤢᤅᤧ॥ 4 ᤜᤠᤖᤢᤏᤧᤸᤗᤧ ᤁᤢᤶᤓᤅᤠ ᤀᤢᤈ᤻ᤈᤡᤀᤣᤗᤖᤧ ᤁᤢᤛ᤻ᤛᤠ ᤔᤡᤛᤠᤀᤣᤗ ᤏᤢ ᤀᤣᤗᤛᤠᤑᤠᤏᤧᤴ ᤔᤥᤛᤠ᤺ᤸᤗᤧ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤑᤧᤖᤧᤳᤇᤧᤀᤠᤱ ᤂᤧᤴᤇᤡ᤹ ᤏᤠᤰᤐᤠᤜᤠ᤹ ᤛᤣᤛᤣᤒᤠᤍᤧᤴᤏᤡᤸᤗᤧ ᤁᤢᤍᤃᤡᤗᤠᤶ ᤐᤰᤂᤧ ᤋᤣ᤹ᤖᤧᤛᤧ᤹॥” 5 ᤁᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤑᤧᤖᤧᤇᤡ ᤜᤧᤰᤁᤩᤠᤱ ᤂᤢᤴᤇᤡ᤹ ᤆᤠᤰᤂᤧᤇᤢᤒᤠ ᤗᤃᤣ᤺ᤵᤐᤥ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤛᤠ᤺ᤱᤃᤠᤜᤡᤶ ᤗᤠ᤺ᤰᤁᤠᤳ ᤂᤧᤴ ᤆᤣᤜᤠ᤹ ᤐᤰᤂᤧ ᤋᤣ᤹ᤖᤧᤛᤢᤛᤡ॥ 6 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠ ᤀᤣᤗᤠᤈᤠᤖ ᤏᤢ ᤀᤡᤋᤠᤔᤠᤖᤧᤴ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤧᤃᤣ᤺ᤰᤁᤥᤒᤠ ᤌᤧᤃᤣ᤺ᤰᤀᤡ᤺ᤴ ᤋᤠᤱᤈᤡᤱᤛᤠ ᤔᤧᤗᤧᤖᤧᤶᤔᤡᤴᤏᤧ᤹. ᤂᤡᤏᤡ᤹ ᤆᤠᤱᤜᤠ᤹ ᤔᤧᤎᤧ᤺ᤰᤂᤧᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤁᤧᤛᤩᤧ᤹ᤀᤡ ᤜᤧᤰᤁᤩᤠᤱ ᤁᤧᤖᤧᤰ ᤛᤱᤈᤢᤶᤓᤥᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤌᤠ᤹᤺॥ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤐᤠᤱᤄᤢᤒᤠ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤡᤸᤗᤧ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠᤀᤠᤱ ᤁᤧᤛᤡᤒᤠᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤁᤠ᤹ᤀᤡᤜᤠ᤹ᤖᤧ. ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤜᤡᤶᤛᤕᤱᤜᤠ᤹ ᤔᤧᤖᤡᤱ ᤔᤧᤎᤰᤁᤡᤸᤗᤧ ᤐᤥᤱ᤹॥ 7 ᤂᤡᤏᤡ᤹ᤃ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥᤗᤠᤶ ᤗᤠ᤺ᤰᤁᤠᤳ ᤔᤧᤒᤣᤃᤧᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤁᤧᤛᤩᤧᤀᤡ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤌᤥ᤺ᤰᤏᤠ ᤐᤡᤔᤠ ᤁᤢᤏᤡ᤺ᤱᤃᤧᤴ ᤂᤡᤏᤡ᤹ ᤛᤶᤎᤠᤱ ᤐᤳ॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤥᤛᤠ᤺ᤸᤗᤧ ᤔᤧᤳᤋᤢᤛᤡᤒᤠ ᤁᤢᤀᤡᤛᤡᤰ ᤔᤧᤈᤥᤃᤢᤖᤥ॥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤃᤡ ᤛᤠᤶᤕᤥᤌᤡᤶᤜᤠ᤹ 8 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤖᤢᤏᤧᤴ ᤔᤧᤳᤋᤢ. 9 “ᤂᤡᤏᤡ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤁᤧᤒᤣᤃᤡᤸᤗᤧ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤀᤡᤃᤪ ᤘᤣ᤹ ᤛᤣᤈ᤺ᤱᤘᤠ ᤔᤧᤎᤢᤅᤧᤶᤔᤡᤴᤏᤧ᤹. ᤔᤣ᤺ᤴᤏᤧᤓᤃᤪ ᤂᤡᤏᤡ᤹ ᤁᤧᤛᤩᤧᤀᤡ᤹॥ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤍᤠᤒᤠ ᤌᤠ᤺ᤰᤜᤠ᤹ᤀᤥ ᤌᤡᤶ ᤐᤥᤱᤗ॥ 10 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤆᤰᤂᤥᤒᤠ ᤏᤢ ᤔᤧᤴᤈᤥᤒᤠ. ᤜᤧᤰᤁᤩᤠᤱ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤁᤧᤛᤧᤴᤍᤢᤶᤗ ᤐᤥᤱ᤹॥ 11 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤗᤠᤶ ᤁᤧᤒᤡᤖᤡᤒᤠ ᤌᤡᤶᤔᤡᤴ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤡᤏᤡ᤹ ᤁᤧᤜᤢ᤹ᤖᤢᤶᤛᤡᤶᤗ ᤐᤥᤱ᤹॥” 12 ᤔᤥᤛᤠ᤺ᤸᤗᤧ ᤜᤠᤖᤢᤏᤧᤴ ᤏᤢ ᤂᤧᤸᤗᤧ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤁᤢᤛ᤻ᤛᤠ ᤀᤣᤗᤠᤈᤠᤖ ᤏᤢ ᤀᤡᤋᤠᤔᤠᤖᤧᤴ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤗᤠᤶ ᤁᤧᤏᤶᤒᤠᤀᤠᤱ ᤁᤧᤘᤠ᤹ᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤕᤠᤱᤛᤡᤱᤅᤧᤶᤔᤧ᤹ᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣ ᤆᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥᤰ॥ 13 ᤂᤧᤏᤡ᤹ ᤂᤧᤴ ᤁᤢᤓᤠ ᤛᤣᤛᤣᤒᤠᤍᤧᤴᤏᤥ ᤆᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤗᤠᤶ ᤁᤴ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤂᤡᤏᤡ᤹ ᤂᤥᤔᤠ ᤗᤰᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤰᤋᤱᤒᤠᤀᤣ ᤀᤡᤱᤈᤠᤱ ᤂᤥᤛᤢᤱᤅᤠᤱ ᤘᤠ᤹॥ 14 ᤁᤖ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤱᤒᤵᤔᤧᤴ ᤏᤢ ᤋᤥ᤺ᤶᤔᤏᤠᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ᤖᤧ ᤛᤣᤛᤣᤒᤠᤍᤧᤴᤏᤥ ᤆᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤗᤠᤶ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ᤖᤧ ᤂᤡᤏᤡ᤹ ᤂᤥᤔᤠ ᤗᤰ ᤁᤧᤶᤒᤡᤖᤡᤒᤠᤖᤥ॥ 15 ᤔᤡᤀᤥᤗᤠᤶ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤖᤧ ᤁᤢᤛᤥ᤺ᤳᤋᤡᤴᤏᤢ ᤛᤥᤛᤥᤖᤡᤰ. ᤋᤥ᤺ᤶᤔᤏᤠᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤏᤢ ᤐᤱᤔᤏᤠᤒᤠ ᤁᤢᤛᤱᤒᤵᤔᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤔᤧᤍᤠᤖᤢᤖ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤂᤥᤔᤠ ᤕᤢᤰ ᤐᤥᤱ᤹॥” 16 ᤀᤠᤸᤗ ᤔᤥᤛᤠ᤺ᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤁᤢᤶᤒᤠᤒᤠ ᤔᤧ᤺ᤴᤍᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠᤴ ᤛᤣ᤺ᤴᤍᤥᤛᤢᤸᤗᤧ ᤂᤧᤱᤃ ᤔᤡᤔᤧᤎᤡᤰᤂᤢ ᤔᤧᤛᤢᤖᤢᤒᤠ ᤋᤢᤔᤢ. ᤂᤢᤏᤧ᤹ ᤜᤠᤖᤢᤏᤧᤸᤗᤧ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤁᤢᤛ᤻ᤛᤠ ᤀᤣᤗᤠᤈᤠᤖ ᤜᤧᤰᤁᤩᤠᤱ ᤀᤡᤋᤠᤔᤠᤖᤧᤴᤏᤢ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤔᤧᤳᤋᤢᤛᤡ. 17 “ᤂᤧᤴᤇᤡ᤹ ᤌᤣᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤛᤣᤛᤣᤍᤧᤴᤏᤥ ᤁᤧᤴᤈᤩᤧᤛᤢᤴ᥅ ᤌᤣᤀᤠᤱᤓᤧᤸᤗᤧ ᤂᤧᤱᤃ ᤆᤠ᤹ᤖᤡᤰ ᤛᤣᤛᤣᤒᤠ ᤐᤠᤴ ᤆᤥᤰ॥ ᤛᤱᤈᤢᤶᤓᤥᤜᤠ᤹ᤖᤧ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤏᤠ᤺ᤰᤔᤠᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤋᤡᤰᤁᤡᤴ ᤂᤧᤵᤔᤠ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤂᤧᤴᤇᤡ᤹ ᤐᤡᤏᤧᤛᤡᤱᤅᤠᤱ ᤁᤧᤘᤕᤧᤛᤡ॥ 18 ᤂᤧᤸᤗᤧ ᤁᤢᤔᤠᤰᤂᤡᤴ ᤛᤣᤛᤣᤍᤧᤴᤏᤥ ᤁᤧᤴᤍᤠᤖᤧᤇᤢᤴᤒᤠᤸᤗᤧ ᤆᤥᤃᤢᤸᤗᤧ ᤂᤧᤴᤇᤡ᤹ ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤔᤢᤖᤠ ᤔᤧᤳᤏᤧᤇᤡᤱᤒᤠ ᤁᤢᤀᤡᤛᤡᤰ ᤂᤧᤴ ᤁᤢᤶᤒᤠᤒᤠ ᤔᤧ᤺ᤴᤍᤠ ᤛᤠᤴ ᤛᤣᤛᤣᤍᤧᤴᤏᤥ ᤆᤠᤔᤠ ᤁᤧᤒᤥᤱᤒᤠ ᤘᤕᤧ॥” 19 ᤂᤧᤒᤩᤠᤱ ᤜᤠᤖᤢᤏᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤀᤠᤀᤡᤴᤇᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤥᤴᤍᤢᤀᤠᤱ ᤘᤠ᤹. ᤜᤧᤰᤁᤣᤛᤠᤱ ᤀᤠᤱᤃᤠ᤹ᤀᤥ ᤀᤰᤋᤱᤒᤠ ᤐᤠᤴ ᤐᤥ᤺ᤰᤂᤧᤍᤩᤧᤀᤠᤱ ᤘᤠ᤹॥ ᤀᤠᤱᤃᤠ᤹ ᤀᤠᤀᤡᤴ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤴ ᤆᤠᤱᤒᤠ ᤜᤧᤰᤁᤣ᤺ᤸᤗᤧ ᤌᤣ ᤂᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤏᤢᤒᤠ ᤐᤥ᤺ᤰᤂᤧᤒᤠᤒᤡ᥅” 20 ᤀᤠᤸᤗ ᤔᤥᤛᤠ᤺ᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.