ᤕᤥᤏᤠ 4 - LIFOTNT

ᤕᤥᤏᤠ᤺ᤸᤗᤧ ᤁᤢᤛᤠᤰᤁᤧᤴ

¹ ᤁᤖ ᤁᤴ ᤐᤠ᤺ᤴᤏᤡᤴ ᤕᤥᤏᤠᤖᤧ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤔᤧᤎᤠᤅᤧᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤖᤧ॥

² ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤕᤜᤘᤣ ᤍᤠᤱᤒᤠᤀᤣ. ᤌᤣ ᤀᤠᤛᤣ᤺ᤴᤇᤠ ᤀᤠᤱᤃᤠ᤹ ᤜᤡᤶᤔᤥᤏᤢ ᤗ᤺ᤶᤔᤠ ᤋᤃᤡᤀᤣ ᤂᤧᤏᤧ᤹ ᤀᤰᤂᤣᤀᤣ ᤁᤧᤈᤥᤃᤢ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤶᤒᤠ᤺ᤵᤐᤠᤴᤒᤡ᥅ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤋᤷᤛᤡᤛ ᤗᤧᤵᤔᤠᤱ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤀᤠᤛᤢᤰᤛᤢᤰ ᤏᤡᤱᤘᤠ᤹ ᤆᤥᤃᤢᤱ॥ ᤂᤧᤏᤧ᤹ ᤔᤡ᤺ᤶᤈᤡᤍᤠᤱᤒᤠ. ᤗᤢᤱᤃᤢᤶᤛᤠᤒᤠ. ᤛᤍᤠᤍᤡᤱ ᤏᤠᤛᤡ ᤁᤧᤎ᤺ᤵᤐᤠ. ᤛᤍᤠᤍᤡᤱ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤂᤧᤏᤧ᤹ ᤀᤠᤒᤠᤅᤣ ᤁᤧᤏᤡᤱᤘᤠᤴ ᤁᤧᤏᤢ᤺ᤰᤋᤢ᤹ ᤂᤧᤒᤩᤠᤱ ᤂᤢᤶᤍᤡᤱ ᤁᤧᤶᤒᤡᤖᤢᤛᤡᤴ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱ॥

³ ᤕᤜᤘᤣ ᤍᤠᤱᤒᤠᤀᤣ. ᤀᤠᤸᤗ ᤀᤠᤕᤠᤶᤛᤠᤶᤔᤡᤴ ᤋᤣ᤹ᤖᤧ᤹॥ ᤀᤠᤸᤗ ᤀᤠᤱᤃᤠ᤹ ᤜᤡᤱᤔᤠᤏᤢ᤺ᤸᤗᤧ ᤛᤡᤔᤠᤀᤣ ᤏᤢᤒᤠ ᤐᤥᤱᤗᤥ॥”

⁴ ᤕᤜᤘᤣ ᤍᤠᤱᤒᤧᤸᤗᤧ ᤏᤢᤃᤵ ᤐᤡᤖᤢ. “ᤂᤧᤏᤧ᤹ ᤕᤠ᤺ᤰᤗᤧ᤹ᤔᤠ ᤕᤢᤰ ᤁᤧᤃᤳᤋᤢᤒᤡ᥅”

⁵ ᤂᤧᤒᤩᤠᤱ ᤕᤥᤏᤠᤴ ᤕᤧᤰᤕᤰᤁᤡᤸᤗᤧ ᤏᤠᤶᤃᤧᤳ ᤗᤧᤵᤔᤠᤱ ᤗ᤺ᤴᤍᤧᤒᤣᤀᤠᤱ ᤌᤡᤰᤋᤧᤴᤏᤥ ᤕᤢᤱᤛᤡᤱ॥ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤃᤡ ᤗᤳᤇᤠ ᤋᤠᤖᤠᤶᤎᤡᤰ ᤋᤠ᤹ᤖᤢᤀᤠᤱ ᤂᤧᤴ ᤏᤠᤶᤈᤡ᤺ᤰᤂᤥ᤹ᤀᤥ ᤕᤢᤱᤛᤡᤱ॥ ᤜᤧᤰᤁᤩᤠᤱ ᤏᤡᤏᤒᤣ ᤕᤧᤰᤕᤰᤁᤡᤴ ᤜᤧᤴ ᤐᤥᤱᤅᤡ ᤑᤠ᤹ᤀᤠᤱ ᤂᤧᤴ ᤀᤥᤔᤧᤵᤔᤠᤖᤧ ᤗᤠᤃᤡ ᤜᤠᤱᤄᤢᤖ ᤕᤢᤅᤧ॥

⁶ ᤜᤧᤰᤁᤣ᤺ᤸᤗᤧ ᤕᤥᤏᤠ᤺ᤸᤗᤧ ᤏᤠᤶᤈᤡᤂᤥ᤹ ᤂᤥᤛᤢᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤑᤢᤱᤘᤧᤳᤋᤡᤸᤗᤧ ᤁᤢᤒᤢᤱᤎᤡᤰ ᤗᤡᤅᤧᤖ ᤕᤠ᤺ᤴᤍᤢ॥ ᤂᤧᤴ ᤑᤢᤱᤘᤧᤳᤋᤡᤸᤗᤧ ᤁᤢᤒᤢᤱᤅᤡᤴ ᤏᤡᤛᤢᤀᤠᤱ ᤕᤥᤏᤠᤴ ᤛᤠ᤹ᤖᤡᤰ ᤛ᤺ᤳᤋᤧ॥

⁷ ᤁᤖ ᤁᤢᤏᤠᤶᤍᤠ᤺ᤵᤔᤠ ᤂᤠᤀᤥ᤺ᤵᤔᤠ ᤀᤡ᤺ᤳᤋᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤑᤢᤱᤘᤧᤳᤋᤡᤸᤗᤧ ᤁᤢᤒᤢᤱᤅᤡᤴ ᤂᤰᤋᤢᤖ ᤑᤠ᤹ᤀᤠᤱ ᤗᤳᤇᤠ ᤂᤠ᤹ᤘᤍᤡ᤺ᤰᤐᤠ ᤌᤡᤰ ᤐᤠᤱᤄᤢ॥ ᤂᤧᤒᤩᤠᤱ ᤂᤧᤸᤗᤧ ᤂᤧᤴ ᤂᤰᤋᤢ ᤜᤧᤰᤁᤩᤠᤱ ᤂᤧᤴ ᤑᤢᤱᤘᤧᤳᤋᤡᤸᤗᤧ ᤁᤢᤒᤢᤱᤅᤡᤴ ᤀᤡᤖᤧᤔᤧᤀᤠᤱ ᤛᤩᤧ॥

⁸ ᤏᤠᤶ ᤁᤧᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤶᤃᤧᤳ ᤐᤡᤛᤠᤱᤗᤠᤶᤒᤠ ᤁᤧᤃᤥᤒᤠ ᤛᤢᤖᤡ᤺ᤳᤔᤠᤴ ᤜᤢᤛᤢ ᤜᤧᤰᤁᤩᤠᤱ ᤛᤠ᤹ᤖᤡᤰ ᤀᤠᤀᤥ᤹ᤀᤥ᤹ᤒᤠ ᤏᤠᤶᤛᤧ᤺ᤰᤔᤠᤴ ᤕᤥᤏᤠᤖᤧ ᤁᤢᤎᤧᤃᤣ᤺ᤰᤁᤥ ᤆᤢᤰᤋᤧ॥ ᤜᤠᤱᤘᤠᤔᤠᤸᤗᤧ ᤂᤢᤏᤧ᤹ ᤁᤢᤎᤏᤠ ᤗᤧᤰᤂᤧ॥ ᤂᤢᤏᤧ᤹ ᤛᤡᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤗᤠᤃᤡᤃ ᤜᤡᤱᤔᤠᤏᤢ᤺ᤸᤗᤧ ᤛᤡᤔᤠᤀᤣ ᤏᤢᤒᤠ ᤐᤥᤱᤗᤥ॥”

⁹ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤥᤏᤠᤴ ᤔᤧᤳᤋᤢ. “ᤂᤧᤴ ᤑᤢᤱᤘᤧᤳᤋᤡᤸᤗᤧ ᤁᤢᤒᤢᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤕᤠ᤺ᤰᤗᤧ᤹ᤔᤠ ᤌᤧᤔᤠ ᤕᤢᤰ ᤁᤧᤃᤳᤋᤢ᥅” ᤕᤥᤏᤠ᤺ᤸᤗᤧ ᤕᤠᤶᤔᤥ ᤏᤢᤃᤵ ᤐᤡᤖᤢᤀᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤛᤡᤛᤡ ᤌᤠᤖᤡᤰ ᤀᤠᤕᤠ᤺ᤰᤗᤧ᤹ᤔᤠ ᤕᤢᤰ ᤁᤳᤋᤢᤱ᤹॥”

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤕᤥᤏᤠᤴ ᤔᤧᤳᤋᤢ. “ᤂᤧᤴ ᤑᤢᤱᤘᤧᤳᤋᤡᤸᤗᤧ ᤁᤢᤒᤢᤱᤅᤡᤴ ᤌᤡᤰᤛᤧᤴᤗᤧᤛᤠ ᤗᤡᤅᤧ ᤜᤧᤰᤁᤩᤠᤱ ᤘᤣ᤹ᤛᤔᤠ ᤛᤧᤴᤍᤡᤰ ᤛᤩᤧ॥ ᤂᤧᤸᤗᤧ ᤗᤠᤃᤡ ᤂᤧᤏᤧ᤹ ᤌᤣᤀᤠᤱ ᤁᤧᤴᤈᤥᤃᤢᤴ. ᤂᤧᤴ ᤂᤧᤏᤧ᤹ ᤁᤧᤗᤣ᤺ᤳᤋᤢᤒᤠᤀᤠᤱ ᤔᤣ᤺ᤴ ᤗᤡᤱᤔᤠ ᤁᤧᤒᤠᤱᤄᤢᤒᤠᤀᤠᤱ ᤔᤣ᤺ᤴ ᤜᤧᤰᤁᤣᤛᤠᤱ ᤂᤧᤸᤗᤧ ᤗᤠᤃᤡ ᤁᤧᤗᤢᤱᤔᤠ᤹ ᤋᤢᤰᤁᤡᤸᤗᤧ

¹¹ ᤂᤧᤵᤔᤥ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤛᤧᤶᤔᤠ ᤔᤧᤴᤇᤢᤰᤔᤏᤠᤒᤠ ᥇.᥈᥆.᥆᥆᥆ ᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤔᤧᤘᤠ᤹ ᤂᤧᤒᤩᤠᤱ ᤜᤠᤒᤠ ᤂᤧᤔᤩᤠᤰᤁᤣ ᤌᤰᤛᤠᤜᤠ᤹ᤀᤠᤱ ᤔᤧᤘᤠ᤹॥ ᤌᤣ ᤂᤧᤴ ᤛᤠ᤹ᤖᤡᤰ ᤕᤶᤒᤠ ᤏᤡᤏᤒᤣ ᤕᤧᤰᤕᤰᤁᤡᤴ ᤗᤢᤱᤔᤠ᤹ ᤔᤧᤍᤢᤰᤋᤢᤱᤅᤡᤴᤒᤠᤒᤡ᥅”