ᤕᤷᤔᤡᤕᤠ 9 - LIFOTNT

¹ ᤀᤣ. ᤀᤠᤎ᤻ᤃᤣᤰᤁᤡᤴ ᤆᤫᤠ᤺ᤳᤋᤡᤸᤗᤧ ᤘᤒᤠᤰ ᤐᤥ᤺ᤰᤂᤧᤒᤠ ᤜᤧᤰᤁᤣ᤺ᤸᤗᤧᤃ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤰᤜᤠ᤹ ᤔᤡᤰᤘᤠ᤺ᤸᤗᤧ ᤘᤠᤎᤠ᤺ᤶ ᤐᤥ᤺ᤰᤂᤧᤒᤠ ᤁᤢᤛᤡᤱᤅᤡᤸᤗᤧᤃ ᤀᤠᤱᤃᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤔᤧᤛᤧᤖᤢᤛᤡᤒᤠ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤜᤠᤒᤠᤱᤒᤠᤖᤥ॥

² ᤀᤣ. ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤗᤳᤇᤠ ᤀᤠᤜᤡᤶ ᤏᤧᤛ᤻ᤛᤧᤒᤠ ᤜᤧᤰᤁᤣ᤺ᤸᤗᤧᤃ ᤀᤠᤱᤃᤠ᤹ ᤂᤧᤵᤔᤥ ᤐᤣᤃᤠᤱᤅᤠᤱ ᤀᤠᤔᤏᤠᤜᤠ᤹ᤗᤠᤶᤒᤠ ᤔᤠ᤺ᤱᤄᤠᤀᤣ ᤘᤕᤠᤱᤒᤠᤖᤥ॥ ᤌᤣᤀᤠᤱᤓᤧᤸᤗᤧ ᤁᤴᤜᤠ᤹ᤃ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤖᤥ ᤂᤧᤒᤩᤠᤱ ᤀᤡᤱᤗᤧᤰ ᤁᤧᤈᤥ᤺ᤰᤐᤠ ᤔᤏᤠᤛᤢᤶ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥

³ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤋᤥᤱ ᤁᤧᤀᤠᤵᤐᤠ ᤔᤏᤠᤜᤠ᤹ᤖᤧ ᤋᤥ᤺ᤱᤅᤡᤴ ᤗᤡᤀᤥ ᤔᤧᤓᤳᤇᤢᤖᤥ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤀᤡᤱᤗᤧᤰ ᤐᤠ᤺ᤵᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤗᤧᤛ᤻ᤛᤥ᤺ᤵᤐᤠᤴ ᤔᤧᤗᤠ᤺ᤰᤂᤢᤖᤥ॥ ᤛᤧᤰᤂᤠᤒᤠ ᤐᤠ᤺ᤴᤏᤡᤸᤗᤧ ᤔᤣ᤺ᤴ ᤁᤖ ᤁᤢᤈᤠ᤺ᤳᤌᤡ ᤁᤧᤒᤣ᤺ᤰᤐᤠᤜᤠ᤹ ᤜᤠᤱ ᤔᤧᤈᤥᤰᤗᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤋᤠᤵᤑᤧ᤺ᤶᤒᤠ ᤔᤧᤈᤥᤃᤢᤖ ᤔᤧᤘᤠ᤹ᤖᤥ॥ ᤀᤠᤱᤃᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤐᤠ᤺ᤵᤔᤠ ᤂᤧᤱᤜᤠ᤹ ᤔᤧᤴᤍᤧᤴᤏᤧᤴᤗᤥ॥

⁴ ᤁᤧᤖᤧᤰ ᤀᤠᤒᤠᤅᤣ ᤂᤢᤴᤇᤡ᤹ ᤆᤢᤶᤜᤠ᤹ᤗᤠᤶᤒᤠ ᤛᤡᤱᤛᤡᤱ ᤔᤧᤗ᤹ᤖᤖᤥ ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤏᤠᤔᤧᤛᤠ᤹ᤖᤢᤴᤇᤡᤴᤗᤖᤥ॥ ᤌᤣᤀᤠᤱᤓᤧᤸᤗᤧ ᤑᤢ᤹ᤏᤢᤛᤠ᤹ᤜᤠ᤹ ᤕᤠᤁᤢᤒᤧᤴ ᤜᤧᤰᤁᤣ ᤀᤡᤱᤗᤧᤰ ᤔᤧᤈᤥᤰᤗᤥ ᤂᤧᤒᤩᤠᤱ ᤁᤧᤖᤧᤰᤗᤧ ᤀᤠᤒᤠᤅᤣ ᤋᤣ᤺ᤱᤈᤢᤶᤜᤠ᤹ ᤆᤠ᤺ᤳᤌᤡ ᤔᤧᤍᤣᤛᤢ ᤔᤧᤒᤡᤖᤢᤛᤡᤖᤥ॥

⁵ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤆᤢᤶᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤖᤥ. ᤀᤠᤳᤋᤡᤴᤏᤠᤱ ᤛᤧᤰᤂᤠ ᤔᤧᤶᤒᤠ᤺ᤳᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤛ᤻ᤛᤥ᤺ᤵᤐᤠᤴ ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤜᤢ᤹ᤖᤢᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤗᤠᤕᤥ ᤆᤥ᤺ᤰᤔᤠᤖᤧ ᤔᤧᤏᤠᤛᤧᤀᤠᤱ ᤔᤧᤘᤠ᤹ᤖᤥ॥

⁶ ᤂᤧᤱᤜᤠ᤹ᤖᤧ ᤁᤢᤈᤰᤗᤧ ᤁᤢᤈᤰ ᤔᤏᤠ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖᤥ. ᤗᤳᤇᤠ ᤀᤡᤱᤗᤧᤰ ᤛᤶᤎᤠᤱ ᤘᤣ᤹ ᤀᤡᤱᤗᤧᤰᤁᤡᤴ ᤔᤧᤕᤥ᤹ᤖᤢᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤔᤧᤏᤠ᤹ᤀᤠ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥

⁷ ᤂᤧᤸᤗᤧᤆᤥᤃᤢᤸᤗᤧ ᤛᤠᤶᤔᤩᤠᤱ ᤕᤢᤵᤐᤠ ᤛᤠᤱᤔᤏᤠᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤠᤱᤛᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠᤶᤔᤩᤠᤱ ᤕᤢᤵᤐᤠ ᤛᤠᤱᤔᤏᤠᤒᤠ ᤜᤧᤰᤁᤣ ᤛᤠ᤹ᤖᤢᤱᤛᤡᤱᤗᤥ॥ ᤀᤠᤔᤏᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤘᤣ᤹ ᤌᤣ ᤆᤥᤃᤢᤱᤒᤠᤒᤣ᥅

⁸ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤛ᤻ᤛᤥ᤺ᤵᤐᤠᤴ ᤜᤠᤛᤶᤛᤶᤒᤠ ᤋᤥᤱ ᤜᤧᤰᤁᤣ ᤗ᤹ᤖᤥ. ᤂᤧᤱᤜᤠ᤹ ᤀᤠᤓᤧᤸᤗᤧᤛᤠᤱ ᤀᤡᤱᤗᤧᤰ ᤔᤧᤒᤠ᤺ᤳᤗᤥ॥ ᤔᤢᤖᤠ᤺ᤸᤗᤧᤃ ᤀᤠᤒᤠᤅᤣ ᤐᤠᤱᤓᤣ᤹ᤛᤠᤒᤠᤜᤠ᤹ᤏᤢ ᤁᤧᤖᤧᤰ ᤁᤢᤈᤠ ᤁᤧᤏᤢ᤹ᤒᤠ ᤐᤠᤴ ᤔᤧᤒᤠ᤺ᤳᤗᤥ ᤁᤖ ᤏᤡᤱᤘᤠ᤺ᤸᤗᤧᤃ ᤀᤡᤈᤥ ᤔᤧᤃᤧᤛᤢᤖᤥ॥

⁹ ᤌᤣ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤸᤗᤧ ᤗᤠᤃᤡ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤒᤡᤀᤠᤛᤡᤱᤅᤡᤴᤒᤡ᥅ ᤌᤣ ᤀᤰᤋᤱᤒᤠ ᤛᤢᤘᤠᤱᤅᤥ ᤀᤠᤱᤃᤠ᤹ ᤌᤧᤳᤗᤱ ᤔᤧᤜᤢᤱᤅᤠᤴᤒᤡ᥅ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤀᤠᤖᤥ॥”

¹⁰ ᤁᤥ᤺ᤰᤔᤠ ᤌᤧᤃᤢᤜᤠ᤹ᤖᤧ ᤗᤠᤃᤡ ᤔᤧᤖᤡᤱ ᤌᤰᤁᤠᤖᤥ ᤜᤧᤰᤁᤩᤠᤱ ᤐᤡᤳ ᤆᤠᤖᤠᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤜᤠ᤺ᤵᤐᤠᤖᤥ ᤌᤣᤀᤠᤱᤓᤧᤸᤗᤧ ᤂᤧᤴ ᤜᤣᤖᤧ ᤆᤒᤧᤀᤠᤱ ᤏᤧᤖᤥ ᤂᤧᤒᤩᤠᤱ ᤜᤠ᤺ᤳᤋᤠᤱ ᤂᤧᤴ ᤋᤧᤴᤏᤥᤗᤠᤶᤒᤠ ᤔᤧᤒᤥᤱᤏᤧᤴᤏᤠᤱ ᤔᤧᤒᤣ᤺ᤰᤏᤧᤴᤗᤥ॥ ᤂᤧᤵᤔᤥ ᤐᤡᤳ ᤔᤧᤔᤠ᤺ᤱᤒᤠ ᤀᤡᤰᤗᤠᤀᤠᤱ ᤂᤧᤶᤔᤧᤍᤧᤳᤏᤧᤸᤗᤥ. ᤌᤰᤛᤠ ᤐᤢᤛᤠᤜᤠ᤹ᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤁᤡᤎᤡ᤺ᤵᤐᤠᤜᤠ᤹ ᤘᤠ᤹ᤔᤠᤖᤧ ᤗᤠᤃᤡ ᤗᤢᤱᤜᤠ᤹ ᤗᤢᤵᤛᤢᤱᤗᤥ. ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤗᤢ᤺ᤴᤍᤢᤱᤅᤠᤱ ᤔᤏᤠ ᤔᤣ᤺ᤴᤏᤣᤒᤠ ᤆᤥᤃᤢᤱᤗᤥ. ᤂᤧᤒᤩᤠᤱ ᤂᤧᤵᤔᤥ ᤀᤠᤳᤋᤡᤴᤏᤠᤱ ᤔᤧᤘᤠ᤹ᤏᤧᤴᤗᤥ॥”

¹² ᤁᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤐᤠ ᤆᤠ᤺ᤵᤐᤠ ᤛᤡᤰᤁᤢᤶᤛᤠᤒᤠ ᤔᤏᤠ ᤜᤠᤳ ᤘᤠ᤹ᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤳ ᤜᤢ᤹ᤖᤢᤀᤠᤱ ᤘᤠ᤹ᤀᤠᤱ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤆᤥ᤺ᤰᤔᤠ ᤏᤢ ᤘᤣ᤹ᤜᤠ᤹ ᤜᤢ᤹ᤔᤠ ᤛᤢᤰᤋᤢᤛᤡᤒᤣ᥅ ᤌᤣᤀᤠᤱ ᤁᤴ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤀᤠᤳᤋᤡᤴᤏᤠᤱ ᤗᤠᤶᤍᤡᤰ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤔᤢᤖᤧ᤺ᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤜᤧᤰᤋᤱᤒᤠ ᤐᤥ᤺ᤰᤂᤧᤒᤠᤒᤣ᥅

¹³ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤐᤡᤖᤢᤱᤛᤡᤱᤒᤠ ᤏᤡᤛᤠᤶᤔᤡᤴ ᤔᤧᤗᤧᤖᤢ ᤜᤧᤰᤁᤩᤠᤱ ᤀᤠᤀᤡᤱᤈᤠᤱᤅᤡᤴ ᤔᤧᤓᤣ᤺ᤴᤍᤢᤀᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤔᤧᤴᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤰᤂᤣ ᤐᤥ᤺ᤰᤂᤧ॥

¹⁴ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤂᤧᤱᤜᤠ᤹ ᤜᤠᤍᤡᤱ ᤁᤧᤎᤰᤐᤠ ᤔᤧᤒᤥ᤺ᤰᤂᤧ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤁᤢᤀᤡᤛᤡᤰ ᤒᤠᤗ ᤛᤠᤶᤔᤠᤱᤅᤡᤴ ᤔᤧᤍᤡᤶᤍᤢᤀᤠᤱ ᤔᤧᤘᤠ᤹॥

¹⁵ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹. ᤂᤧᤴ ᤂᤧᤵᤛᤧᤶᤔᤧ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤆᤠᤔᤠᤖᤧ ᤗᤠᤃᤡ ᤛᤠᤰᤂᤡ᤺ᤰ ᤁᤧᤄᤡ᤺ᤰᤐᤠ ᤁᤢᤈᤠ ᤏᤢ ᤌᤢᤱᤔᤠᤖᤧᤗᤠᤃᤡ ᤏᤡᤱ ᤁᤧᤕᤠᤰᤐᤠ ᤆᤫᤠ᤺ᤳ ᤐᤡᤖᤢᤱᤛᤡᤱ᤹॥

¹⁶ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤛᤡᤶᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤂᤧᤱᤜᤠ᤹ ᤑᤢᤳᤗᤢᤶ ᤛᤧᤛᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤢᤔᤪᤧᤰ ᤔᤧᤶᤔᤧᤰᤁᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤏᤡᤱᤔᤡᤜᤠ᤹ ᤐᤠᤱᤄᤢᤱᤛᤡᤱᤗᤥ॥”

ᤁᤢᤓᤠ᤹ᤖᤧ ᤗᤠᤃᤡ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ᤖᤧ ᤐᤣᤗᤡ ᤔᤧᤓᤠᤰᤋᤢ

¹⁷ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤌᤧᤔᤠ ᤐᤥᤱᤗ ᤐᤳ. ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤔᤧᤖᤡᤱ ᤛᤠᤶᤗᤥ ᤛᤠᤶᤃᤧᤔᤧᤵᤔᤠ ᤔᤧᤴᤇᤢᤔᤠᤜᤠ᤹ ᤔᤧᤖᤡᤱ ᤌᤰᤛᤧ ᤀᤢ᤺ᤳᤋᤧᤶᤛᤡᤶᤔᤧ᤹ᤀᤥ॥”

¹⁸ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤸᤗ ᤜᤠᤖᤠ ᤆᤥᤃᤧᤶᤔᤧ᤹ᤀᤥ. ᤀᤠᤏᤡᤃᤣ ᤔᤡᤰᤁᤥᤗᤠᤶ ᤔᤡᤰᤘᤠ ᤔᤧᤴᤎᤠᤀᤣ ᤌᤠᤖᤡᤰ ᤜᤠ᤺ᤵᤔᤠᤖᤧ ᤔᤡᤰᤜᤠ᤹ ᤔᤧᤴᤜᤶᤔᤣ ᤌᤠᤖᤡᤰ ᤀᤠᤏᤡᤃᤣ ᤗᤠᤃᤡ ᤔᤧᤖᤡᤱ ᤛᤠᤶᤗᤥᤎᤡᤰ ᤛᤠᤶᤔᤧᤳᤇᤧ ᤂᤧᤱᤜᤠ᤹ ᤀᤢ᤺ᤳᤋᤧᤶᤛᤡᤶᤔᤧ᤹ᤀᤥ॥”

¹⁹ ᤛᤡᤕᤥ᤺ᤴᤏᤥ ᤁᤧᤕᤢᤱᤒᤠᤜᤠ᤹ ᤔᤧᤜᤠ᤺ᤵᤐᤠ ᤀᤡᤰᤗᤠᤴ ᤂᤧᤶᤍᤧᤳᤗ ᤐᤳᤗᤥ. “ᤀᤠᤸᤗᤃ ᤀᤠᤏᤡ᤹ ᤂᤠᤵᤐᤢᤌᤩ᤺ᤱ ᤀᤠᤒᤥ᤺ᤰᤂᤧᤖᤥ᥄ ᤀᤠᤏᤡ᤹ ᤛᤧᤰᤂᤠᤀᤣ ᤆᤠ᤺ᤳᤌᤡ ᤀᤡᤱᤎᤠᤱ ᤐᤣᤖᤥ᥄ ᤀᤠᤏᤡ᤹ ᤀᤠᤒᤠᤅᤣ ᤗᤠᤈᤣᤴ ᤗᤧᤵᤔᤠᤀᤣ ᤐᤥᤱᤗᤥ. ᤀᤠᤏᤡ᤹ ᤜᤡᤶᤜᤠ᤹ ᤗᤢ᤺ᤴᤍᤧ ᤌᤢᤒᤧᤀᤠᤱ ᤏᤧᤖᤥ॥”

²⁰ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤗᤥ. “ᤔᤧᤴᤇᤢᤔᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤛᤡᤱᤛᤡᤱᤅᤠᤱ ᤂᤧᤵᤛᤧᤶᤔᤧ᤹ᤀᤥ॥ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤔᤧᤖᤡᤱ ᤌᤰᤔᤠ ᤜᤢ᤹ᤖᤧᤶᤛᤡᤶᤔᤧ᤹ᤀᤥ ᤂᤧᤶᤒᤩᤠᤱ ᤂᤧᤏᤧ᤹ ᤁᤧᤴᤍᤣ᤺ᤱ ᤁᤧᤴᤈᤢᤶᤜᤠ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠᤀᤥ ᤛᤠᤶᤗᤥᤔᤠ ᤜᤢ᤹ᤖᤧᤶᤛᤡᤶᤔᤧ᤹ᤀᤥ॥

²¹ ᤗᤠᤶᤗᤠᤶᤔᤥ ᤛᤠᤜᤠ᤹ ᤛᤧᤖᤢᤛᤡᤖ. ᤐᤠᤱᤈᤢᤶᤔᤥᤒᤠ ᤗᤠᤶᤍᤥᤜᤠ᤹ᤀᤥ ᤌᤠᤱᤒᤧᤴᤜᤠ᤹ ᤛᤥ᤺ᤴᤍᤢᤛᤡᤖ ᤀᤠᤏᤡᤃᤣ ᤐᤣᤎᤠ᤺ᤵᤗᤠᤶᤒᤠ ᤛᤡᤔᤧᤴ ᤜᤡᤶᤔᤥ ᤗᤠᤛᤧᤖᤥ. ᤀᤠᤏᤡ᤹ ᤕᤰᤜᤠ᤹ᤀᤥᤀᤠᤱ ᤗᤠᤛᤧᤖᤥ॥”

²² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤐᤠ᤺ᤵᤔᤠ ᤐᤠᤱᤅᤠᤖᤥ. “ᤀᤡᤰᤋᤠᤵᤐᤥ ᤐᤡ᤹ᤜᤡ ᤗᤢᤶᤔᤏᤠᤒᤠ ᤜᤧᤰᤁᤣ. ᤐᤥᤃᤢᤃᤧᤴ ᤁᤢᤈᤠᤴ ᤛᤢᤶᤔᤠᤀᤠᤱ ᤀᤡᤰᤋᤠᤵᤐᤥ ᤗᤧᤵᤔᤏᤠ ᤌᤠᤔᤏᤠᤒᤠ ᤜᤧᤰᤁᤣ. ᤂᤧᤴ ᤐᤥᤃᤢᤃᤧᤴ ᤁᤢᤈᤠᤴ ᤀᤠᤳᤋᤡᤸᤗᤧᤀᤠᤱ ᤕᤠᤶᤔᤥ ᤔᤧᤛᤢᤵᤛᤢᤶᤒᤠ ᤜᤧᤰᤁᤣ ᤔᤏᤠ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤗᤢᤶᤛᤡᤱᤅᤠᤱ ᤁᤧᤖᤧᤰ ᤐᤡᤛᤠᤱ ᤛᤧᤖᤧᤀᤠᤱ ᤏᤧᤖᤥ॥”

²³ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤆᤠ᤺ᤵᤐᤠ ᤔᤏᤠᤜᤠ᤹ ᤀᤠᤒᤠᤅᤣ ᤛᤡᤰᤁᤢᤶᤏᤡᤱᤘᤠ᤹ᤀᤥ ᤀᤠᤱᤍᤡᤱ ᤔᤧᤸᤗ᤹ᤏᤧᤴᤗᤖᤥ. ᤁᤧᤎᤢᤶᤒᤠ ᤔᤏᤠᤴ ᤁᤧᤎᤢᤶᤒᤠ ᤆᤥ᤺ᤰᤁᤠ ᤑᤠ᤹ᤀᤠᤱ ᤕᤶᤒᤠ ᤔᤧᤜᤧᤴᤇᤡᤱᤅᤡᤴᤗᤖᤥ. ᤕᤠᤱᤛᤠᤁᤢᤴᤎᤣᤛᤠᤒᤠᤴ ᤀᤠᤒᤠᤅᤣ ᤁᤢᤕᤠᤱᤛᤠᤁᤢᤴᤎᤣᤀᤥ ᤀᤠᤱᤍᤡᤱ ᤔᤧᤗ᤹ᤏᤧᤴᤗᤖᤥ॥

²⁴ ᤁᤖ ᤀᤠᤱᤍᤡᤱ ᤁᤧᤗ᤹ᤒᤧᤸᤗᤧ ᤀᤰᤂᤣ ᤆᤥᤃᤢᤖᤖᤥ. ‘ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ. ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤗᤥ᤺ᤶᤒᤠ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠᤶᤕᤥᤒᤠ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤂᤧᤸᤗᤧ ᤁᤢᤛᤡᤱ ᤏᤡ᤺ᤳᤋᤠᤖᤖᤥ॥’ ᤜᤠᤒᤠ ᤁᤴ ᤐᤠ᤺ᤴᤜᤠ᤹ᤀᤥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤠᤖᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤀᤠᤖᤥ॥”

²⁵ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧ᤹. ᤂᤧᤴ ᤕᤧᤶᤔᤡᤴ ᤋᤠᤖ ᤐᤳ. ᤜᤧᤰᤁᤣ᤺ᤸᤗᤧ ᤏᤠᤛᤡᤃᤧᤴ ᤌᤰᤗᤠᤀᤥᤖᤰ ᤜᤷᤍᤥ ᤁᤧᤜᤧᤰᤐᤠ ᤁᤖ ᤁᤴ ᤔᤡᤰᤛᤣ᤺ᤴ ᤁᤧᤒᤡᤒᤠ ᤔᤠᤱᤜᤢᤵᤐᤡᤴ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤒᤠ.

²⁶ ᤔᤡᤛᤪ ᤗᤠᤈᤣ᤹. ᤕᤜᤢᤍᤠ. ᤀᤧᤍᤥᤔ. ᤀᤶᤔᤥᤏ. ᤔᤥᤀᤠᤒᤡᤜᤠ᤹ ᤜᤧᤰᤁᤩᤠᤱ ᤏᤧᤛᤡ᤺ᤶᤒᤥᤒᤠ ᤌᤧᤃᤣ᤺ᤰᤀᤡ ᤋᤠᤱᤒ᤻ ᤋᤠᤱᤒᤠ ᤁᤧᤄᤰᤐᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤍᤧᤴᤏᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤁᤴ ᤛᤢᤘᤠᤱᤜᤠ᤹ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧᤴᤏᤠᤱ ᤛᤡᤰᤗᤢᤱᤔᤥ ᤜᤷᤍᤥ ᤜᤧᤰᤔᤠ ᤕᤠ᤺ᤶᤒᤰ ᤔᤧᤶᤒᤥᤱᤅᤣ ᤘᤠ᤹ᤖᤥ॥”