ᤕᤷᤔᤡᤕᤠ 8 - LIFOTNT

¹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤴ ᤕᤧᤶᤔᤥ ᤕᤜᤢᤍᤠᤒᤠ ᤜᤠᤱᤜᤠ᤹ ᤏᤢ ᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤳᤜᤠ᤹ ᤂᤧᤒᤩᤠᤱ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤏᤡᤱᤔᤡᤜᤠ᤹ᤖᤧ ᤀᤡᤐᤢᤱᤗᤠᤶᤒᤠ ᤔᤧᤗ᤺ᤳᤋᤢ᤹॥

² ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤃᤧᤎᤠᤱᤒᤠ ᤜᤧᤰᤁᤩᤠᤱ ᤔᤠᤱᤛᤧᤘᤠ ᤔᤧᤔᤧᤳᤋᤢᤛᤡᤒᤠ ᤏᤠᤶ. ᤗᤠᤒᤠ ᤏᤢ ᤂᤣ᤺ᤶᤛᤡᤰᤐᤠᤜᤠ᤹ ᤋᤃᤡ ᤂᤧᤴ ᤕᤧᤵᤐᤠᤜᤠ᤹ ᤂᤠᤶᤒᤠᤱᤅᤥ ᤔᤧᤛᤧᤛᤢ ᤔᤧᤏᤧᤛ᤻ᤛᤢ᤹॥ ᤛᤢᤶᤔᤠᤀᤠᤱ ᤗᤢᤵᤔᤠᤖᤧ ᤁᤢᤗᤧᤰᤘᤠ ᤂᤧᤴ ᤕᤧᤵᤐᤠᤜᤠ᤹ ᤂᤠᤶᤒᤠᤱᤅᤥ ᤆᤡᤎᤢᤰ ᤜᤧᤰᤁᤣ ᤁᤡᤀᤠᤱ ᤏᤧᤖᤥ॥

³ ᤂᤧᤶᤒᤩᤠᤱ ᤁᤴ ᤁᤢ᤹ᤀᤡᤃᤧᤓᤧᤶᤒᤠ ᤌᤠ᤺ᤰᤜᤠ᤹ ᤀᤠᤱᤃᤠ᤹ ᤏᤠ᤺ᤳᤋᤢᤱᤍᤣᤛᤢᤱᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤜᤳᤇᤧ ᤁᤧᤛᤧᤒᤠᤀᤠᤱ ᤁᤢᤕᤢᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤖᤧᤃ. ᤜᤡᤱᤔᤠᤏᤢ᤺ᤸᤗᤧ ᤛᤡᤔᤠᤀᤣ ᤂᤢᤴᤇᤡ᤹ ᤛᤡᤖᤠ᤹ᤌᤠᤱ॥ ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

ᤗᤠᤕᤥ ᤏᤢ ᤂᤢᤶᤍᤡᤱ

⁴ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤧᤏᤧ᤹ ᤀᤰᤂᤣ ᤔᤧᤳᤋᤧᤛᤧ᤹ᤀᤥ. ᤁᤢᤓᤠ ᤔᤏᤠᤜᤠ᤹ ᤔᤧᤈᤥ᤺ᤴ. ᤜᤧᤰᤁᤣ᤺ᤸᤗᤧ ᤌᤣ ᤂᤧᤱᤜᤠ᤹ ᤔᤢᤳᤌᤪᤡᤰ ᤔᤧᤶᤒᤥ᤺ᤰᤏᤧᤶᤒᤡ᥅ ᤁᤢᤓᤠ ᤗᤠᤶᤔᤧᤒᤥ᤺ᤳᤏᤧᤓᤃᤪ ᤌᤣ ᤂᤧᤱᤜᤠ᤹ ᤕᤠᤶᤔᤥ ᤔᤧᤴᤏᤢ᤺ᤱᤏᤧᤴ ᤔᤧᤴᤍᤠᤏᤧᤶᤒᤡ᥅

⁵ ᤁᤖ. ᤁᤴ ᤔᤏᤠᤜᤠ᤹. ᤌᤣᤀᤠᤱ ᤀᤠᤱᤃᤠ᤹ᤗᤠᤶᤒᤠ ᤔᤧᤀᤡ᤺ᤶᤛᤡᤱ ᤔᤧᤒᤣᤀᤠᤱ ᤔᤧᤘᤠ᤹ᤒᤠᤒᤣ᥅ ᤜᤧᤰᤁᤩᤠᤱ ᤌᤣᤀᤠᤱ ᤀᤠᤱᤃᤠ᤹ᤀᤥ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢ᤺ᤴᤏᤧᤴ ᤔᤧᤴᤍᤠᤏᤧᤶᤒᤠᤒᤣ᥅ ᤂᤢᤴᤇᤡ᤹ ᤀᤠᤒᤠᤅᤣ ᤀᤡᤱᤗᤧᤰ ᤐᤠ᤺ᤴᤏᤥ ᤔᤧᤄᤡᤶᤛᤡᤱᤅᤠᤱ ᤔᤧᤒᤳᤗᤥ ᤜᤧᤰᤁᤩᤠᤱ ᤏᤢ᤺ᤱᤔᤠᤍᤠᤔᤠ ᤔᤧᤴᤍᤧᤴᤏᤧᤸᤗᤥ॥

⁶ ᤀᤠᤱᤃᤠ᤹ ᤀᤠᤏᤧᤰᤂᤥᤴ ᤜᤱ ᤔᤧᤳᤋᤢᤱᤅᤠᤱ ᤐᤠᤴ ᤂᤧᤵᤛᤢᤱᤗᤥ. ᤂᤧᤱᤜᤠ᤹ᤃ ᤛᤧᤰᤂᤠ ᤐᤠᤴ ᤔᤧᤶᤒᤠ᤺ᤵᤏᤧᤴᤗᤥ॥ ᤁᤴᤜᤠ᤹ ᤗᤳᤇᤠᤀᤠᤱ ᤀᤠᤒᤠᤅᤣ ᤋᤠᤵᤑᤧ᤺ᤶᤒᤠ ᤗᤠᤕᤥ ᤆᤥ᤺ᤰᤔᤠᤗᤠᤶ ᤔᤧᤜᤡᤴᤍᤧᤒᤠ ᤜᤥᤵᤗᤥ. ᤂᤧᤱᤜᤠ᤹ᤀᤥ ᤗᤳᤇᤠ ᤌᤡᤰᤗᤧᤀᤠᤱ ‘ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤆᤥᤃᤢᤱ’ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤒᤠ ᤜᤥᤵᤗᤥ॥ ᤀᤴᤏᤡᤴ ᤌᤱᤅᤥ ᤋᤃᤡ ᤗᤥ᤺ᤰᤁᤠᤱ ᤐᤣ᤺ᤰᤗᤥ ᤂᤧᤴ ᤜᤧᤰᤁᤣ ᤁᤴᤜᤠ᤹ ᤁᤧᤖᤧᤰ ᤀᤠᤒᤠᤅᤣ ᤗᤠᤶᤔᤥ ᤔᤧᤎᤠᤛᤡᤱ ᤔᤧᤒᤣᤒᤠᤴ ᤔᤧᤒᤣᤒᤠᤀᤣ ᤔᤧᤒᤥ᤺ᤰᤂᤧᤖᤥ॥

⁷ ᤗᤡᤗᤡᤘᤠ᤺ᤸᤗᤧᤀᤠᤱ ᤜᤡᤶᤔᤥ ᤏᤢ᤺ᤱᤔᤠᤍᤠᤔᤠ ᤕᤧᤶ ᤏᤡᤛᤢᤖᤥ॥ ᤛᤠᤵᤐᤧᤳᤋᤪᤢ᤺ᤰᤔᤠ ᤏᤢ ᤛᤡᤈᤥᤘᤠ ᤐᤢᤜᤠ᤹ᤖᤧ ᤂᤧᤒᤩᤠᤱ ᤁᤠᤖᤠ᤺ᤱᤘᤠᤜᤠ᤹ᤖᤧᤀᤠᤱ ᤐ᤺ᤶᤔᤠ ᤐᤣ᤺ᤰᤔᤠ ᤕᤧᤶ ᤐᤥᤱᤒᤠ ᤏᤡᤱᤘᤠ᤹ ᤔᤧᤄᤥᤛᤢᤖᤥ ᤁᤖ ᤀᤠᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤎᤡᤶᤜᤠ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

⁸ “ᤀᤠᤔᤏᤠᤛᤣ. ᤂᤡᤏᤡ᤹ ᤀᤠᤓᤣᤗ᤹ᤖᤡᤰ ᤀᤰᤂᤣ ᤐᤠ᤺ᤵᤔᤠ ᤁᤧᤛᤢᤰᤋᤢᤶᤒᤠᤒᤣ᥅ ‘ᤀᤠᤏᤡᤃᤧᤃ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤛᤠᤒᤠ ᤆᤥᤃᤡᤃᤧᤖᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤁᤳᤋᤢᤶᤒᤧᤖᤥ॥’ ᤛᤧᤰᤂᤠᤒᤠ ᤐᤠ᤺ᤱᤃ ᤂᤡᤏᤡ᤹ ᤀᤥᤔᤧᤳᤋᤧᤶᤔᤧ᤹ᤀᤥ. ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤛᤠᤶᤕᤥᤀᤡᤱᤈᤠᤱᤅᤡᤴ ᤋᤠᤱᤃᤪᤠᤰᤆᤡ ᤘᤁᤪᤠᤳᤆᤡ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥

⁹ ᤂᤧᤏᤧ᤹ ᤛᤡᤰᤁᤢᤶᤛᤠᤒᤠ ᤁᤧᤔᤏᤠᤜᤠ᤹ ᤛᤡᤖᤡᤱᤔᤔᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ ᤜᤠ᤺ᤒ᤻ ᤔᤧᤗᤧᤰᤋᤧᤀᤠᤱ ᤀᤡᤈᤥᤀᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤏᤠ᤹ᤖᤢᤀᤠᤱ ᤔᤧᤘᤠ᤹ᤖᤥ. ᤀᤠᤸᤗ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤢᤶᤏᤡᤱᤘᤠᤴ ᤀᤠᤰᤋᤱᤒᤠ ᤘᤠ᤹ᤀᤡᤖᤥ᥅

¹⁰ “ᤂᤧᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤘᤣ᤹ ᤔᤏᤠᤜᤠ᤹ ᤜᤢᤰᤛᤢᤵᤋᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹ ᤕᤠᤵᤔᤡᤜᤠ᤹ ᤐᤡᤖᤢᤱᤛᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤆᤢᤰᤐᤠ ᤕᤶᤒᤠ ᤔᤏᤠ ᤁᤧᤖᤧᤰᤗᤧ ᤀᤡᤱᤗᤧᤰᤗᤠᤶ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤋᤶᤛᤡᤱ ᤔᤧᤈᤥᤃᤢᤖᤥ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤀᤠᤱᤎᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤖᤧᤰᤗᤧ ᤔᤏᤠᤜᤠ᤹ ᤔᤧᤄᤢᤶᤛᤢᤛᤡᤖᤥ॥

¹¹ ᤂᤧᤱᤜᤠ᤹ᤖᤧ ᤁᤧᤃᤠ᤺ᤶᤒᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤠᤰᤗᤰ ᤁᤧᤃᤠ᤺ᤶᤒᤠ ᤜᤧᤰᤁᤣ ᤛᤡᤍᤠ᤹ ᤔᤧᤔᤧᤳᤋᤢᤛᤡᤖᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤛᤏᤠᤖᤢᤱ. ᤛᤏᤠᤖᤢᤱ. ᤁᤧᤖᤧᤰ ᤏᤢᤒᤠ ᤘᤠ᤹ᤖᤥ.’ ᤁᤖ ᤛᤧᤰᤂᤠ᤺ᤸᤗᤧᤃ ᤛᤏᤠᤖᤢᤱ ᤛᤢᤰᤂᤣᤘᤠ ᤀᤠᤳᤋᤠᤴᤏᤠᤱ ᤜᤥᤵᤗᤥ॥

¹² ᤁᤴ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤒᤠᤀᤥ ᤂᤢᤴᤇᤡ᤹ ᤏᤢ᤺ᤶᤔᤠ ᤁᤧᤒᤥᤱᤒᤠ ᤔᤣ᤺ᤶᤒᤡ᥅ ᤁᤖ ᤂᤧᤱᤜᤠ᤹ᤃ ᤔᤡᤛᤠᤰᤁᤠᤱ ᤏᤢ᤺ᤶᤔᤠᤀᤣ ᤔᤧᤴᤏᤢ᤺ᤴᤍᤧᤴᤗᤥ॥ ᤏᤢ᤺ᤶᤔᤠ ᤐᤠ᤺ᤴᤏᤡᤴ ᤌᤧᤔᤠᤒᤣ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤸᤗᤧᤛᤢᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤘᤣ᤹ ᤁᤧᤔᤧᤰᤐᤠᤜᤠ᤹ᤏᤢᤀᤣ ᤂᤧᤱᤜᤠ᤹ᤀᤠᤱ ᤔᤧᤔᤧᤰᤗᤥ॥ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤒᤠ ᤕᤧᤶᤔᤥ ᤂᤧᤱᤜᤠ᤹ ᤔᤧᤔᤧᤰᤗᤥ॥

¹³ ᤀᤠᤱᤃᤠ᤹ ᤂᤢᤴᤇᤡ᤹ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤋᤣ᤹ᤖᤢᤱ ᤐᤡᤖᤢᤱᤛᤡᤱᤗᤥ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤥ ᤆᤧᤸᤗᤧᤰᤛᤣ᤹ ᤔᤧᤒᤳᤏᤧᤴᤗᤥ. ᤜᤧᤰᤁᤩᤠᤱ ᤐ᤺ᤳᤇᤣ᤹ᤒᤢᤱᤅᤥᤀᤠᤱ ᤁᤢᤈᤠ᤹ ᤔᤧᤎᤥ᤺ᤰᤏᤧᤸᤗᤥ॥ ᤂᤧᤸᤗᤧ ᤁᤢᤓᤧᤰᤘᤠᤜᤠ᤹ᤀᤠᤱ ᤀᤡᤖᤧᤶᤒᤣ᤺ᤰᤗᤥ॥ ᤂᤧᤸᤗᤧ ᤂᤧᤱᤜᤠ᤹ ᤌᤣᤎᤣ ᤐᤡᤖᤢᤱᤛᤡᤱᤅᤠᤱ ᤘᤕᤠᤱ ᤂᤧᤴ ᤁᤧᤖᤧᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶᤒᤠ ᤏᤠᤵᤋᤢᤱᤛᤡᤱᤗᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

¹⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤀᤠᤏᤡ᤹ ᤌᤣᤀᤠᤱ ᤛᤫᤠ᤺ᤳ ᤀᤠᤕᤢᤱ ᤀᤠᤈᤠᤒᤠᤒᤣ᥅ ᤗᤢ ᤑᤧᤖᤧᤶᤔᤧ᤹ᤀᤥ. ᤀᤠᤏᤡ᤹ ᤗᤥ᤺ᤰᤋᤡᤖ ᤋᤠᤱᤛᤧ᤺ᤵᤛᤡᤱᤔᤠᤍᤧᤴ ᤁᤧᤏᤧᤒᤠ ᤕᤧᤰᤕᤰ ᤗᤧᤵᤔᤠᤱ ᤐᤣᤃᤡᤖᤥ ᤜᤧᤰᤁᤩᤠᤱ ᤀᤠᤏᤡ᤹ ᤂᤧᤵᤔᤥᤀᤣ ᤜᤍ᤹ ᤛᤩᤧ᤹ᤀᤡᤖᤥ॥ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤔᤧᤱᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤔᤔᤒᤠ ᤏᤡᤱᤅᤡᤴ ᤌᤢᤱᤔᤠ ᤀᤠᤒᤡᤖᤧᤀᤠᤱ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤀᤠᤈᤥᤃᤢᤶᤔᤠᤱ ᤘᤠ᤹ᤖᤥ॥

¹⁵ ᤀᤠᤏᤡᤃᤧᤃ ᤛᤏᤠᤖᤢᤱ ᤐᤥᤱ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ ᤁᤖ ᤜᤧᤰᤋᤱᤒᤠ ᤌᤧᤔᤠᤀᤠᤱ ᤔᤧᤒᤥ᤺ᤰᤂᤧᤴᤗᤥ. ᤘᤣ᤺ᤵᤔᤠ ᤕᤧᤶ ᤜᤠᤱᤄᤢᤶᤒᤧᤀᤠᤱ ᤘᤕᤡᤃᤧᤖᤥ ᤁᤖ ᤜᤰᤆᤄᤳ ᤁᤡᤔᤠ ᤏᤢ ᤁᤡᤵᤔᤠᤃᤧᤄᤢᤒᤠ ᤕᤧᤶ ᤋᤩᤧᤖᤥ॥

¹⁶ ᤀᤠᤏᤡᤃᤣ ᤏᤡᤱᤔᤡᤜᤠ᤹ ᤍᤠᤏᤒᤠ ᤕᤧᤰᤕᤰᤁᤥ ᤔᤧᤃᤧᤖᤧ ᤔᤧᤍᤩᤧᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ ᤜᤧ᤺ᤰᤜᤧ᤺ᤰ ᤔᤧᤗ᤹ᤖᤧᤒᤠ ᤀᤠᤏᤡᤃᤣ ᤂᤧᤵᤛᤢᤶᤒᤧᤖᤥ॥ ᤂᤧᤴ ᤀᤴᤜᤠ᤹ ᤀᤡᤜᤧᤜᤧ ᤔᤧᤗ᤹ᤀᤡᤸᤗᤧ ᤁᤠᤰ ᤗᤠᤈᤣᤴ ᤗᤥ᤺ᤰᤂᤢᤖᤥ॥ ᤂᤧᤱᤜᤠ᤹ ᤀᤠᤏᤡᤃᤣ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹. ᤀᤠᤏᤡᤃᤣ ᤕᤧᤰᤕᤰ ᤏᤢ ᤂᤧᤵᤔᤥᤒᤠ ᤁᤧᤖᤧᤰ ᤕᤰᤕᤢᤱᤒᤠᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤂᤧᤱᤜᤠ᤹ ᤁᤵᤔᤥ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥”

¹⁷ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧᤶᤔᤧ᤹ᤀᤥ᥄ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤀᤛᤣ᤺ᤰᤜᤠ᤹ ᤐᤠᤱᤄᤢᤱ ᤋᤠᤛᤢᤱᤛᤡᤱᤗᤥ. ᤁᤧᤀᤠ᤺ᤵᤐᤠ ᤁᤢᤏᤡᤱ ᤁᤧᤕᤠᤰᤐᤠ ᤀᤛᤣ᤺ᤰᤜᤠ᤹. ᤔᤢ᤺ᤵᤔᤏᤠᤒᤠ ᤔᤢᤴᤎᤢᤰᤁᤡᤸᤗᤧ ᤔᤧᤕᤠᤱᤄᤢᤴᤛᤡᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤀᤃᤡᤖᤥ॥”

¹⁸ ᤀᤠᤱᤃᤠ᤹ ᤀᤠᤔᤧᤖᤡᤱ ᤌᤰᤔᤧᤴ ᤔᤧᤶᤒᤣ᤺ᤰᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤀᤠᤛᤡᤰᤗᤢᤱᤔᤧᤴ ᤛᤠ᤹ᤖᤡᤰ ᤛᤩᤠᤱᤐᤧᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

¹⁹ ᤂᤧᤵᤛᤧᤶᤔᤧ᤹. ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤁᤧᤖᤧᤰ ᤗᤠᤈᤣ᤹ᤀᤥ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤔᤧᤈᤥᤃᤢᤖᤥ “ᤌᤣ ᤕᤜᤘᤣ ᤍᤠᤱᤒᤠᤴ ᤀᤠᤸᤗ ᤛᤡᤕᤥ᤺ᤴᤏᤥ ᤜᤥ᤺ᤵᤐᤡ᥅ ᤌᤣ ᤂᤧᤵᤔᤥᤒᤠ ᤜᤠᤱᤅᤡᤴ ᤀᤠᤸᤗ ᤜᤥ᤺ᤵᤐᤠᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤏᤢᤃᤵ ᤐᤡᤖᤢᤛᤡᤖᤥ. “ᤌᤣᤀᤠᤱ ᤏᤠᤘᤠᤀᤡᤳᤗᤠᤜᤠ᤹ ᤂᤧᤱᤜᤠ᤹ᤖᤧ ᤔᤠᤱᤔᤧᤄᤕᤢᤛᤡᤒᤠᤒᤣ᥅ ᤂᤧᤒᤩᤠᤱ ᤌᤣᤀᤠᤱ ᤜᤏᤧᤒᤠ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤛᤠᤶᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤠᤒᤣ᥅ ᤂᤧᤱᤜᤠ᤹ᤖᤧ ᤜᤧᤰᤁᤣ ᤔᤧᤈᤥᤃᤢᤀᤠᤱ ᤌᤣᤀᤠᤱ ᤀᤠᤛᤡᤰ ᤔᤧᤓᤥ᤺ᤰᤂᤢᤒᤠᤒᤣ᥅”

²⁰ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤆᤠᤛᤢᤶᤔᤠ ᤕᤧᤶᤔᤡᤴᤏᤠᤱ ᤗᤧᤰᤋᤧᤒᤣᤖᤥ ᤜᤠᤱᤘᤠᤔᤠ ᤕᤧᤶᤔᤡᤴ ᤗᤧᤰᤋᤧᤒᤣᤖᤥ. ᤁᤖ ᤀᤠᤏᤡ᤹ ᤛᤧᤴᤗᤵ ᤔᤧᤱᤄᤥᤀᤣ ᤀᤠᤘᤠ᤹ᤖᤥ॥”

²¹ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤴ ᤕᤧᤳᤋᤢᤰᤂᤣ᤺ᤸᤗᤧ ᤋᤧᤳᤋᤢᤀᤠᤱ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤀᤠᤔᤏᤠᤜᤠ᤹ ᤌᤧᤕᤢ᤺ᤳ ᤌᤧᤕᤢ᤺ᤳ ᤔᤧᤕᤢ᤺ᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤒᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤔᤧᤖᤡᤱ ᤌᤰᤁᤠᤖᤥ॥ ᤀᤠᤱᤃᤠ᤹ᤃ ᤆᤠ᤹ᤖᤡᤰ ᤁᤡᤔᤠ ᤕᤱᤔᤠᤀᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥

²² ᤃᤡᤗᤠᤍᤀᤥ ᤜᤧᤴᤏᤠᤱ ᤛᤡᤍᤠ᤹ᤐᤠᤱᤍᤠ᤹ ᤜᤥ᤺ᤵᤐᤡ᥅ ᤌᤣ ᤂᤧᤵᤔᤥ ᤜᤠ᤺ᤳᤋᤠᤱ ᤛᤡᤍᤠ᤹ᤛᤠᤶᤒᤠ ᤜᤥ᤺ᤵᤐᤡ᥅ ᤌᤣᤀᤠᤱ ᤁᤧᤃᤠ᤺ᤶᤒᤠ ᤀᤠᤔᤏᤠᤜᤠ᤹ ᤔᤧᤴᤘᤣ᤺ᤳᤋᤣ ᤔᤧᤘᤠ᤹ᤒᤠᤒᤣ᥅