ᤕᤷᤔᤡᤕᤠ 7 - LIFOTNTᤕᤷᤔᤡᤕᤠ᤺ᤸᤗᤧ ᤔᤠᤱᤜᤡᤶᤔᤥ ᤐᤠ᤺ᤳᤋᤢᤒᤠ ᤂᤠᤜᤢᤴ 1 ᤕᤜᤘᤣ ᤍᤠᤱᤒᤠᤗᤠᤶ ᤕᤷᤔᤡᤕᤠᤀᤥ ᤀᤰᤋᤱᤒᤠ ᤀᤡᤱᤄᤱ ᤁᤧᤖᤧ. 2 “ᤂᤧᤏᤧ᤹ ᤔᤠᤱᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤕᤧᤒᤧ᤹. ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤀᤡᤱᤓᤴ ᤆᤥᤃᤧ᤹. ᤕᤜᤘᤣ ᤍᤠᤱᤒᤠᤴ ᤛᤣᤛᤣ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤁᤴ ᤗᤠᤶᤎᤣ᤺ᤵᤐᤥᤗᤠᤶᤒᤠ ᤁᤧᤍᤠᤒᤠ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥ 3 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤁᤧᤔᤧᤳᤋᤡ. ᤂᤡᤏᤡ᤹ ᤀᤠᤒᤠᤅᤣ ᤜᤡᤱᤔᤴᤏᤥᤒᤠ ᤕᤧᤵᤗᤧᤰᤁᤡᤴ ᤏᤢ ᤕᤠ᤺ᤶᤒᤰᤁᤡᤴ ᤋᤥ᤺ᤴᤍᤥᤴ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤁᤴ ᤗᤠᤈᤣ᤹ᤀᤥ ᤕᤢᤱᤔᤠ ᤑᤠ᤺ᤰᤏᤡᤱ॥ 4 ‘ᤁᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤗᤥ. ᤁᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤗᤥ. ᤁᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤗᤥ. ᤀᤠᤏᤡᤃᤣ ᤋᤠᤵᤌᤣᤰ ᤕᤠᤶᤎᤣᤰ ᤘᤕᤡᤃᤧ᥄’ ᤁᤧᤗ᤹ᤒᤠ ᤀᤡᤱᤗᤧᤰ ᤐᤠ᤺ᤴᤏᤥ ᤏᤛᤠᤴ ᤔᤧᤈᤥᤃᤧᤶᤔᤡᤴᤏᤧ᤹॥ 5 “ᤂᤡᤏᤡ᤹ ᤜᤡᤱᤔᤴᤒᤠ ᤛᤢᤳᤏᤠ ᤏᤢ ᤕᤧᤵᤗᤧᤰᤁᤡᤴ ᤗᤧᤰᤂᤧᤶᤔᤧ᤹. ᤀᤠᤸᤗᤥ ᤁᤧᤈᤥᤃᤢᤶᤗ ᤁᤧᤘᤕᤡᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤏᤠ᤹ᤖᤧᤶᤔᤧ᤹॥ ᤘᤣ᤹ᤜᤠ᤹ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤕᤠ᤺ᤶᤒᤰ ᤆᤥᤃᤧᤶᤔᤧ᤹॥ 6 ᤗᤠᤶᤍᤡ᤺ᤵᤐᤠᤱ. ᤕᤧᤳᤇᤠᤒᤠ ᤕᤧᤳᤇᤠᤔᤠ ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ᤗᤠᤶ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤌᤰᤔᤠᤗᤠᤶ ᤔᤧᤈᤥᤃᤧᤶᤔᤡᤴᤏᤧ᤹॥ ᤁᤴ ᤗᤠᤈᤣ᤹ᤀᤥ ᤑᤥᤋᤩᤠ ᤔᤧ᤺ᤴᤏᤣᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤔᤧᤛᤧᤛᤧᤶᤔᤡᤴᤏᤧ᤹॥ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤛᤠᤶᤔᤠᤱᤜᤠ᤹ᤀᤥ ᤛᤧᤘᤠ ᤆᤥ᤺ᤰᤔᤠ ᤗᤧᤖᤧᤶᤔᤧ᤹. ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤔᤧᤰᤂᤡ ᤁᤧᤶᤛᤧᤖᤡᤖᤰ॥ 7 ᤂᤡᤏᤡ᤹ ᤛᤢᤳᤏᤠ᤺ᤴ ᤏᤢ ᤕᤧᤵᤗᤧᤰᤁᤡᤴ ᤁᤧᤍᤥ᤺ᤴᤍᤢᤶᤏᤧᤓᤃᤪ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤀᤠᤱᤃᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤐᤡᤖᤢᤱᤛᤡᤱᤒᤠ ᤁᤴ ᤗᤠᤈᤣ᤹ᤀᤥ ᤂᤡᤏᤡ᤹ ᤘᤠ᤹ᤔᤠ ᤐᤠᤱᤏᤡᤱ॥ 8 “ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤌᤣᤏᤠᤎᤣᤒᤠ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤀᤡᤱᤗᤧᤰ ᤐᤠ᤺ᤴᤏᤡᤴ ᤏᤠᤃᤧᤛᤠ᤹ᤖᤢᤶ॥ 9 ᤂᤡᤏᤡ᤹ ᤂᤢ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶ. ᤔᤏᤠ ᤁᤧᤛᤧᤖᤢᤶᤛᤡᤶ ᤜᤧᤰᤁᤩᤠᤱ ᤆᤠᤖᤠᤶᤔᤠ-ᤐᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶ. ᤔᤠᤱᤁᤧᤜᤧᤰᤁᤠᤛᤡᤀᤠᤱ ᤀᤡᤱᤗᤧᤰ ᤁᤧᤒᤠᤖᤡ. ᤒᤠᤗ ᤛᤠᤶᤔᤠᤱᤅᤥ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶ ᤜᤧᤰᤁᤩᤠᤱ ᤀᤠᤒᤠᤅᤣ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤛᤡᤶᤔᤡᤴᤒᤠ ᤛᤠᤶᤔᤠᤱᤜᤠ᤹ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤛᤡᤶ॥ 10 ᤁᤴ ᤀᤠᤱᤃᤠ᤹ ᤀᤠᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤛᤧ ᤔᤧᤈᤥᤃᤢᤒᤠ ᤔᤠᤱᤜᤡᤶᤔᤥ ᤁᤧᤍᤩᤧ᤹ᤀᤡ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤁᤧᤕᤧᤒᤡᤀᤠᤱ ᤁᤧᤒᤠ᤺ᤳᤋᤢᤶ. ‘ᤀᤠᤏᤡᤃᤣ ᤋᤠᤵᤌᤣᤰ ᤕᤠᤶᤎᤣᤰᤁᤥ ᤘᤕᤡᤃᤧ᥄’ 11 ᤌᤣ ᤂᤡᤏᤡ᤹ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤑᤠ᤺ᤴᤍᤠᤜᤠ᤹ᤖᤧ ᤂᤢᤴᤇᤡ᤹ ᤆᤡᤱᤛᤡᤱᤔᤠᤍᤧᤴ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅ ᤂᤡᤏᤡ᤹ ᤌᤣ ᤁᤧᤈᤥᤃᤢᤶᤗ ᤁᤧᤘᤕᤡ. ᤀᤠᤱᤃᤠ᤹ ᤂᤧᤴ ᤏᤡᤛᤢᤱ᤹. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱ᤹॥ 12 “ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤛᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤛᤣᤃᤢᤱᤒᤠᤍᤧᤴ ᤛᤡᤗᤥᤀᤥ ᤐᤣᤃᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤏᤡᤱᤘᤠ᤹ ᤂᤥᤛᤧᤶᤔᤧ᤹. ᤀᤠᤒᤠᤅᤣ ᤀᤠᤔᤏᤠ ᤀᤡᤛᤪᤠᤀᤡᤗᤖᤧ ᤁᤢᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤋᤧᤴᤏᤡᤴ ᤌᤣ ᤆᤥᤃᤢᤱ॥ 13 ᤂᤡᤏᤡ᤹ ᤁᤴ ᤁᤧᤖᤧᤰ ᤗᤠᤕᤥ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤀᤧᤳᤗᤧᤱ ᤔᤧᤳᤏᤡᤱ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴ॥ ᤀᤠᤱᤃᤠ᤹ ᤀᤢ᤺ᤳᤏᤡᤱᤅᤡᤸᤗᤧ ᤂᤡᤏᤡ᤹ ᤏᤢᤃᤵ ᤕᤠᤵᤔᤡ ᤁᤧᤶᤒᤡᤖᤡᤴ॥ 14 ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤛᤧ ᤔᤧᤈᤥᤃᤢᤒᤠ ᤁᤴ ᤀᤠᤜᤡᤶᤔᤥ ᤂᤡᤏᤡ᤹ ᤏᤡᤱᤘᤠ᤹ ᤁᤧᤕᤢᤰᤂᤢᤶ. ᤀᤠᤱᤃᤠ᤹ ᤛᤡᤗᤥᤀᤥ ᤆᤥᤃᤢᤱᤒᤠ ᤜᤧᤰᤁᤣ ᤁᤴ ᤋᤧᤴᤏᤥᤀᤠᤱ ᤆᤥᤃᤢᤱ॥ ᤀᤠᤱᤃᤠ᤹ ᤂᤡᤏᤡ᤹ ᤏᤢ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤁᤴ ᤋᤧᤴᤏᤡᤴ ᤛᤡᤗᤥ᤺ᤴ ᤁᤢᤀᤡᤛᤡᤰ ᤔᤧᤰᤂᤢᤱ᤹॥ 15 ᤂᤡᤏᤡ᤹ ᤁᤠ᤹ᤀᤡ ᤛᤥ᤹ᤎᤥ᤺ᤰᤜᤠ᤹. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤏᤠ᤺ᤳᤋᤢᤱᤛᤡᤱᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤠᤔᤡᤰᤛᤠᤀᤥᤗᤠᤶᤒᤠ ᤂᤡᤏᤡ᤹ ᤗᤠ᤺ᤰᤁᤠᤳ ᤏᤠ᤺ᤳᤏᤡᤱ ᤗ᤺ᤳᤏᤡᤱ᤹॥” ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤡᤱᤈᤠᤱ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ 16 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤕᤷᤔᤡᤕᤠᤀᤣ. ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤋᤢᤘᤠ ᤔᤧᤈᤥᤃᤧᤴᤏᤧ᤹॥ ᤁᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤖᤡᤱ ᤔᤧᤎᤰᤋᤧᤴᤏᤧ᤹. ᤀᤠᤱᤃᤠ᤹ ᤋᤢᤘᤠ ᤔᤧᤈᤥᤃᤠᤱᤅᤡᤴᤏᤧ᤹. ᤀᤠᤱᤃᤠ᤹ ᤐᤣᤗᤡ ᤔᤧᤓᤠᤰᤋᤠᤱᤅᤡᤴᤏᤧ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤒᤣᤗᤡᤴ ᤔᤧᤄᤧᤵᤛᤢᤱᤅᤡᤴ॥ 17 ᤂᤧᤱᤜᤠ᤹ᤖᤧ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤏᤢ ᤕᤖᤢᤛᤗᤧᤔᤒᤠ ᤔᤠᤖᤠᤶᤜᤠ᤹ᤀᤥ ᤌᤣᤎᤣ ᤔᤧᤈᤥᤃᤢᤖ ᤔᤧᤒᤳ ᤌᤣ ᤂᤧᤏᤧ᤹ ᤁᤧᤴᤏᤡᤛᤢᤶᤒᤡ᥅ 18 ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤔᤠ ᤔᤧᤵᤔᤏᤠᤔᤠ ᤛᤠᤶᤔᤠᤱᤅᤡᤴ ᤂᤖᤧ᤺ᤱ ᤗᤧ᤺ᤱᤔᤠ ᤐᤡᤔᤠᤖᤧ ᤗᤠᤃᤡ ᤁᤢᤛ᤻ᤛᤠᤜᤠ᤹ᤖᤧ ᤛᤡᤱ ᤔᤧᤛᤢᤵᤛᤢ. ᤐᤠᤜᤠ᤹ᤖᤧ ᤔᤡᤴ ᤔᤧᤜᤠ᤺ᤴᤍᤢ ᤜᤧᤰᤁᤩᤠᤱ ᤔᤠᤜᤠ᤹ᤖᤧ ᤑᤣ᤹ᤖᤢᤶᤔᤡᤴ ᤔᤧᤛ᤹ᤖᤢ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤑᤥᤱᤔᤠᤖᤧ ᤗᤠᤃᤡ ᤘᤣ᤹ ᤛᤠᤶᤔᤠᤱᤜᤠ᤹ᤀᤥ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ 19 ᤁᤖ ᤌᤣ ᤂᤧᤱᤜᤠ᤹ᤖᤧ ᤛᤧᤰᤂᤠᤀᤣ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥ᤺ᤰᤂᤢᤖ ᤔᤧᤒᤵᤐᤡ᥅ ᤔᤣ᤺ᤴ. ᤂᤧᤱᤜᤠ᤹ ᤀᤠᤒᤠᤅᤣ ᤔᤧᤄᤠ᤺ᤴᤇᤡᤱᤗ ᤔᤧᤘᤠ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤛᤡᤖᤡᤱᤔᤔᤥ ᤔᤧᤎᤠᤖ ᤔᤧᤒᤳ॥ 20 “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤡᤰᤁᤧᤴ ᤁᤴ ᤔᤠᤱᤜᤡᤶᤔᤥ ᤌᤠᤛᤢᤱ᤹. ᤔᤏᤠ. ᤌᤰᤛᤠ. ᤛᤡᤱᤒᤢᤱᤜᤠ᤹ ᤏᤢ ᤀᤡᤰᤋᤠᤵᤐᤥᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤶᤎᤠᤱ ᤌᤠᤛᤢᤱ᤹॥ ᤀᤠᤱᤃᤠ᤹ ᤀᤠᤛᤡᤰᤁᤧᤴ ᤁᤧᤍᤡ᤺ᤵᤐᤠ ᤔᤡ ᤜᤧᤰᤁᤣ ᤋᤡ᤺ᤳᤗ ᤘᤠ᤹. ᤂᤧᤴ ᤜᤠ᤺ᤳᤗᤧᤀᤠᤱ ᤘᤖᤱᤔᤠ ᤛᤧᤵᤔᤠ ᤔᤧᤛᤢᤰᤋᤢᤴ॥ 21 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤔᤢᤰᤛᤠᤶᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤱ. ‘ᤀᤠᤔᤏᤠᤛᤣ. ᤁᤢᤓᤠ ᤛᤡᤍᤢᤱᤈᤓᤠᤜᤠ᤹ ᤂᤡᤏᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤌᤩ᤺ᤱ ᤔᤡᤎᤡᤱᤔᤠ ᤋᤣᤔᤠ ᤐᤥᤱ᤹ ᤜᤧᤰᤁᤩᤠᤱ ᤘᤣ᤹ ᤛᤡᤍᤢᤱᤈᤓᤠᤜᤠ᤹ ᤁᤢᤓᤠ ᤂᤡᤏᤡ᤹ ᤆᤠᤔᤠ ᤁᤧᤛᤢᤰᤋᤢᤶ᤹॥ ᤐᤖᤢᤔᤠᤸᤗᤧ ᤂᤧᤴ ᤁᤧᤖᤧᤰ ᤂᤡᤏᤡ᤹ᤀᤣ ᤆᤧᤶᤍᤣᤛᤧᤶᤔᤧ᤹॥ 22 ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱᤛᤡᤱᤅᤠᤱ ᤑᤧᤳᤋᤢᤱᤛᤡᤱᤅᤡᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤀᤡᤃᤪ ᤘᤣ᤹ ᤛᤡᤍᤢᤱᤈᤓᤠᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤱᤜᤠ᤹ ᤌᤣᤀᤠᤱ ᤀᤡᤱᤈᤠᤱ ᤔᤧᤒᤡᤖᤢᤱᤛᤡᤱᤅᤡᤴ॥ 23 ᤁᤖ ᤀᤠᤱᤃᤠ᤹ ᤂᤡᤏᤡ᤹ ᤀᤰᤂᤣ ᤔᤧᤳᤏᤡᤱᤅᤠᤱ ᤘᤕᤠᤱ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤍᤧᤶᤔᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱ ᤁᤢᤀᤡᤛᤡᤰ ᤂᤡᤏᤡ᤹ ᤜᤡᤱᤔᤴ ᤁᤳᤋᤧᤶᤔᤧ᤹॥ ᤜᤧᤰᤁᤣᤏᤧᤓᤃᤪ ᤂᤡᤏᤡ᤹ ᤏᤢ᤹ᤔᤠᤍᤠᤔᤠ ᤐᤥᤱ᤹. ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤔᤏᤠ ᤁᤧᤒᤥ᤺ᤰᤂᤡ᤹॥ 24 ᤁᤖ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤶᤔᤠ ᤔᤧᤴᤍᤧᤴᤍᤧᤴ. ᤂᤧᤵᤔᤥ ᤌᤧᤔᤠᤀᤠᤱ ᤏᤡᤱᤘᤠ᤹ ᤔᤧᤶᤒᤡᤖᤢᤴ॥ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ ᤏᤢ ᤋᤠᤵᤑᤧ᤺ᤶᤒᤠ ᤛᤡᤰᤗᤢᤱᤔᤠᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤁᤢᤀᤡᤛᤡᤰ ᤕᤠ᤺ᤶᤒᤰ ᤔᤧᤈᤥᤃᤢᤖ ᤔᤧᤘᤕᤧ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤀᤠᤖᤛᤠᤱ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤒᤥ᤺ᤰᤂᤧᤖ ᤔᤧᤒᤣ॥ 25 ᤂᤡᤏᤡ᤹ ᤌᤠ᤺ᤰᤌᤧᤒᤠ ᤛᤢᤎᤧᤒᤠᤜᤠ᤹ ᤔᤡᤛᤪᤗᤠᤶ ᤔᤧᤗ᤺ᤴᤍᤧ ᤔᤧᤎᤠᤅᤧᤒᤠ ᤕᤧᤴᤏᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤀᤧᤳᤗᤧᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤠᤔᤏᤠᤜᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤅᤠᤱ ᤘᤠ᤹॥ 26 ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤠᤒᤠ᤺ᤴᤏᤡᤴ ᤂᤧᤶᤔᤠ ᤔᤧᤴᤍᤧᤴᤍᤧᤴ. ᤂᤧᤵᤔᤥ ᤏᤡᤱᤘᤠ᤹ᤀᤣ ᤔᤧᤶᤒᤡᤖᤢᤴ॥ ᤂᤧᤸᤗᤧ ᤁᤢᤗᤧᤰᤘᤠᤀᤥ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤏᤢ ᤁᤢ᤹ᤀᤡᤃᤧᤓᤧᤶᤒᤠ ᤁᤧᤒᤥ᤺ᤰᤂᤡ॥’ 27 “ᤂᤧᤸᤗᤧᤆᤥᤃᤢᤸᤗᤧ ᤕᤷᤔᤡᤕᤠᤀᤣ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤏᤧ᤹ ᤀᤠᤔᤏᤠᤜᤠ᤹ ᤁᤧᤔᤧᤳᤋᤢᤛᤡᤛᤠᤱ ᤁᤧᤒᤠ᤺ᤴᤏᤡᤴ ᤂᤧᤶᤔᤠ ᤂᤧᤱᤜᤠ᤹ ᤔᤧᤴᤍᤧᤴᤏᤧᤴ. ᤂᤧᤏᤧ᤹ ᤂᤧᤱᤜᤠ᤹ ᤁᤧᤀᤢ᤺ᤳᤋᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤏᤢᤃᤵᤐᤣ ᤁᤧᤔᤧᤶᤒᤡᤏᤧᤴ॥ 28 ᤂᤧᤏᤧ᤹ ᤁᤴ ᤛᤢᤘᤠᤱᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ‘ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ ᤀᤡᤃᤪ ᤂᤡᤏᤡ᤹ ᤁᤧᤍᤢᤔᤢᤶᤒᤠ ᤂᤢᤶᤍᤡᤱᤗᤠᤶ ᤁᤢᤓᤠ ᤏᤡᤛᤠᤶ ᤁᤧᤱᤄᤥᤛᤢᤶᤔᤡᤴ॥ ᤛᤧᤰᤂᤠ ᤐᤠ᤺ᤴᤏᤡᤱᤃ ᤔᤧᤃᤧ. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤒᤠ᤺ᤴᤎᤡᤰᤁᤠᤱ ᤔᤧᤴᤍᤠᤖᤢᤴ॥’” ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥ ᤐᤥ᤺ᤰᤂᤧᤒᤠ ᤗᤠᤕᤥ 29 “ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠᤛᤣ ᤀᤠᤸᤗ ᤀᤠᤒᤠᤅᤣ ᤌᤧᤃᤣ᤺ᤰᤀᤡ᤺ᤴ ᤂᤰᤋᤧᤶᤔᤧ᤹ᤀᤠᤱ ᤗᤠᤵᤑᤢᤛᤧᤶᤔᤧ᤹ᤀᤥ॥ ᤔᤧᤖᤡᤱ ᤌᤰᤋᤧᤶᤔᤧ᤹ᤖ ᤌᤣᤀᤠᤱ ᤁᤧᤜᤥᤵᤐᤠ ᤔᤢᤖᤧᤰ ᤂᤠᤖᤧᤰᤐᤠ ᤁᤥ᤺ᤰᤔᤠ ᤑᤠᤱᤈᤱ ᤛᤶᤔᤥ ᤜᤠᤒᤧᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤀᤠᤛᤡᤰ ᤐᤥᤃᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤗᤠᤵᤑᤢᤛᤢᤱᤛᤡᤱᤅᤠᤱ ᤘᤠ᤹ᤖᤥ॥ 30 “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤕᤜᤢᤍᤠᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤀᤠᤔᤡᤰᤛᤠᤀᤥ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤔᤧᤘᤠ᤹॥ ᤀᤠᤱᤃᤠ᤹ ᤆᤡ᤺ᤳᤋᤢᤱᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤂᤧᤱᤜᤠ᤹ᤖᤧ ᤀᤠᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤁᤧᤒᤥᤱᤒᤠ ᤀᤠᤜᤡᤶᤔᤥ ᤔᤧᤕᤢᤰᤂᤢᤛᤡᤀᤠᤱ ᤕᤢᤱ ᤜᤧᤰᤁᤩᤠᤱ ᤔᤠᤱᤜᤡᤶᤔᤡᤴ ᤀᤠᤛᤢᤳᤌᤥ ᤔᤧᤈᤥᤃᤢᤀᤠᤱ ᤏᤧ᤹᤺॥ 31 ᤂᤧᤱᤜᤠ᤹ᤖᤧ ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴᤏᤥ ᤀᤠᤒᤠᤅᤣ ᤛᤠᤀᤣᤜᤠ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤖᤧ ᤗᤠᤃᤡ ᤋᤥᤐᤣᤋ ᤔᤧᤵᤔᤏᤠᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤈᤥᤃᤢᤀᤠᤱ ᤏᤧ᤹᤺॥ ᤀᤠᤱᤃᤠ᤹ ᤂᤧᤴ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤱᤛᤡᤱᤒᤠ ᤔᤣ᤺ᤴ. ᤜᤧᤰᤋᤱᤒᤠ ᤐᤠ᤺ᤴᤃ ᤀᤠᤱᤃᤠ᤹ ᤀᤡ᤺ᤳᤋᤢᤱᤒᤠᤀᤠᤱ ᤜᤥ᤺ᤵᤋᤠᤱ॥ 32 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤏᤡᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤀᤰᤋᤱᤒᤠ ᤕᤧᤶ ᤋᤠᤖ ᤐᤳ. ᤜᤧᤰᤁᤩᤠᤱ ᤂᤧᤴ ᤋᤥᤐᤣᤋ ᤀᤡᤃᤪ ᤜᤡᤴᤏᤥᤔᤒᤠ ᤏᤧᤏᤧᤒᤠᤍᤧᤴ ᤔᤧᤶᤔᤧᤳᤋᤢᤴ ᤁᤖ ᤔᤏᤠᤛᤧᤵᤔᤠ ᤏᤧᤏᤧᤒᤠᤍᤧᤴ ᤑᤠ᤹ᤀᤠᤱ ᤁᤢᤔᤡᤱ ᤐᤥᤱ᤹॥ ᤂᤧᤵᤔᤥ ᤔᤏᤠᤜᤠ᤹ᤖᤧ ᤆᤣᤜᤠ᤹ ᤗᤢᤵᤔᤠᤍᤧᤴ ᤂᤥᤔᤧᤴᤍᤧᤳᤋᤣ ᤌᤠᤖᤡᤰ ᤆᤣᤜᤠ᤹ ᤔᤧᤗᤢᤵᤋᤢᤛᤡ᤹॥ 33 ᤐᤢᤛᤠᤜᤠ᤹ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤧᤴ ᤆᤣᤜᤠ᤹ ᤔᤧᤈᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤱᤔᤠ ᤁᤧᤛᤧᤵᤐᤠᤀᤠᤱ ᤁᤧᤏᤠ᤺ᤵᤐᤠ ᤁᤧᤍᤣᤒᤠ ᤜᤠ᤺ᤳᤋᤠᤱ ᤔᤧᤘᤠ᤹ᤏᤧᤴ॥ 34 ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤒᤠ ᤔᤠᤖᤠᤶᤜᤠ᤹ᤀᤥ ᤀᤠᤱᤃᤠ᤹ ᤕᤧᤕᤧᤗ᤹ᤔᤠ ᤏᤢ ᤛ᤺ᤵᤔᤠ ᤀᤡᤰᤗᤠᤴ ᤂᤧᤒᤩᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶᤒᤠ ᤛᤠᤓ᤺ᤱᤈᤠ᤺ᤸᤗᤧ ᤜᤕᤱ ᤁᤡᤸᤗᤡᤱᤅᤡᤴᤏᤠᤱ ᤔᤠᤒᤣ᤺ᤰᤗ ᤆᤥᤃᤢᤱ᤹ ᤌᤣᤀᤠᤱᤓᤧᤸᤗᤧ ᤗᤠᤈᤣᤴ ᤆᤡᤈᤡ ᤂᤰᤂᤰ ᤐᤥᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.