ᤕᤷᤔᤡᤕᤠ 6 - LIFOTNT

ᤏᤡᤱᤔᤡᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤡᤴ ᤔᤧᤃᤒᤢ

¹ “ᤒᤣᤏᤩᤠᤔᤡᤏ ᤔᤏᤠᤛᤣ. ᤋᤠᤱᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤂᤧᤳᤇᤡᤅᤠᤶᤔᤧ᤹ᤀᤥ ᤕᤖᤢᤛᤗᤧ᤺ᤶᤗᤠᤶᤒᤠ ᤂᤡᤏᤡ᤹ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤳᤋᤠᤛᤡᤶᤔᤧ᤹ᤀᤥ᥄ ᤋᤁᤥᤀᤥ ᤔᤧᤸᤗᤢᤰ ᤛᤠᤍᤠᤱᤅᤡᤴ ᤔᤢ᤺ᤳᤋᤧᤶᤔᤧ᤹ᤀᤥ᥄ ᤜᤧᤰᤁᤩᤠᤱ ᤒᤣᤌ-ᤜᤰᤁᤣᤖᤣᤶᤔᤥ ᤔᤡᤴ ᤜᤠ᤺ᤴᤍᤧᤶᤔᤧ᤹ᤀᤥ ᤂᤧᤒᤩᤠᤱ ᤔᤡ᤺ᤰᤂᤢᤗᤠᤶ ᤔᤡᤰᤛᤣᤴ ᤐᤡᤔᤠ ᤋᤱᤃᤠᤶ ᤆᤥᤃᤧᤶᤔᤧ᤹ᤀᤥ᥄ ᤔᤧᤰᤔᤠᤛᤡᤔᤠᤴ ᤂᤠ ᤋᤠᤖ ᤐᤳᤗᤥ. ᤌᤠᤱᤃᤧᤳ ᤐᤡᤛᤠᤱᤗᤠᤶ ᤂᤠᤵᤐᤢᤌᤩ᤺ᤱ ᤀᤠᤈᤥ᤺ᤰᤆᤥ᤺ᤰᤐᤠᤴ ᤕᤢᤖ ᤐᤳᤗᤥ॥”

² ᤏᤢᤔᤠᤛᤢᤰᤔᤠ ᤕᤖᤢᤛᤗᤧ᤺ᤶᤔᤡᤴ ᤛᤡᤶᤛᤡᤶᤔᤠ ᤆᤥᤰᤗᤥ. ᤁᤖ ᤀᤠᤱᤃᤠ᤹ ᤂᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ॥

³ ᤔᤧᤸᤗᤢᤰᤁᤶᤒᤠᤜᤠ᤹ ᤏᤢ ᤂᤢᤴᤇᤡ᤹ ᤕᤖᤡᤰ ᤔᤧᤸᤗᤢᤰᤜᤠ᤹ᤖᤧ ᤌᤧᤃᤢᤴ ᤛᤡᤍᤧᤵ ᤔᤧᤍᤧᤵᤋᤢᤒᤠ ᤜᤧᤰᤁᤣ ᤌᤰᤔᤥᤒᤠᤜᤠ᤹ ᤏᤢ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ᤖᤧ ᤕᤧᤰᤕᤰ ᤁᤒᤪᤡᤱ ᤋᤢᤖᤠᤜᤡᤶ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤔᤧᤱᤔᤠᤛᤡ ᤋᤧᤴᤜᤠ᤹ ᤔᤧᤛᤣᤃᤢᤖᤥ॥

⁴ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤕᤖᤢᤛᤗᤧ᤺ᤶᤔᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤁᤧᤖᤧᤰ ᤕᤠᤖᤡᤵ ᤆᤥᤃᤧᤶᤔᤧ᤹᥄ ᤀᤠᤏᤡᤃᤣ ᤂᤧᤴ ᤗᤧᤴᤍᤡᤰᤛᤠ ᤆᤡᤓᤳ ᤑᤳᤋᤢᤶᤒᤧᤖᤥ॥ ᤁᤖ ᤆᤡ᤺ᤳᤋᤧᤛᤩᤧᤖᤥ᥄ ᤏᤠᤶᤎᤩᤧ ᤆᤢᤖᤧ॥ ᤏᤠᤶ ᤗᤠ᤺ᤵᤔᤠ ᤀᤡ᤺ᤳᤋᤧᤀᤠᤱ ᤘᤠ᤹ᤖᤥ॥

⁵ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤜᤠᤖᤠ ᤛᤧᤴᤍᤡᤰᤛᤠ ᤂᤧᤴ ᤑᤳᤋᤢᤶᤒᤧᤖᤥ॥ ᤕᤧᤰᤕᤰᤁᤥᤒᤠ ᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤶᤒᤧᤖᤥ॥”

⁶ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤌᤰᤔᤥᤒᤠᤜᤠ᤹ ᤔᤧᤳᤋᤢᤛᤡᤖᤥ. “ᤕᤖᤢᤛᤗᤧ᤺ᤶᤔᤡᤴ ᤗᤢ᤺ᤶᤔᤠᤖᤧ ᤗᤠᤃᤡ ᤛᤡᤱᤜᤠ᤹ ᤋᤠᤅᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤗᤢᤵᤛᤧᤶ ᤏᤧᤛᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤁᤴ ᤕᤧᤰᤕᤰᤁᤡᤴ ᤂᤢᤶᤍᤡᤱ ᤐᤡᤖᤢᤱᤅᤠᤱᤗᤰ ᤗᤧᤖᤢᤱᤗᤥ ᤌᤣᤀᤠᤱᤓᤧᤸᤗᤧ ᤁᤵᤔᤥ ᤔᤏᤠ ᤋᤢᤰᤂᤣ ᤆᤠ᤺ᤵᤔᤠ ᤏᤡᤱᤄᤧᤶᤔᤡᤴ ᤘᤠ᤹ᤖᤥ॥

⁷ ᤘᤠᤃᤧᤱᤅᤥᤗᤠᤶᤒᤠ ᤛᤣᤛᤣᤒᤠ ᤆᤫᤠ᤺ᤳᤋᤡᤴ ᤀᤠᤶᤓᤠ ᤗ᤺ᤴᤏᤠᤱ ᤐᤳᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤕᤖᤢᤛᤗᤧ᤺ᤶᤔᤡᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤗ᤺ᤳᤋᤢᤀᤠᤱ ᤐᤳᤗᤥ॥ ᤂᤧᤵᤔᤥ ᤜᤕᤱ ᤋᤧᤴᤎᤱᤜᤠ᤹ ᤏᤢ ᤔᤧᤰᤔᤠᤛᤡᤔᤠ ᤐᤥᤱᤒᤠ ᤂᤧᤶᤍᤧᤳᤗᤥ. ᤀᤠᤱᤃᤠ᤹ ᤂᤧᤵᤔᤥ ᤋᤢᤰᤔᤠ ᤛᤠᤰᤔᤠ ᤏᤢ ᤕᤠᤱᤄᤣᤰ ᤀᤡᤛᤣ᤺ᤱᤗᤰ ᤏᤡᤛᤢᤱᤗᤥ॥

⁸ ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤛᤣ. ᤁᤴ ᤕᤧᤳᤋᤢᤰᤂᤣᤜᤠ᤹ ᤂᤡᤏᤡ᤹ ᤗᤠᤃᤡ ᤛᤠᤶᤍᤡᤱ ᤐᤥᤱᤗᤖᤥ॥ ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤏᤠ᤹ᤏᤡᤱᤗᤥ. ᤂᤡᤏᤡ᤹ ᤗᤠᤈᤣᤴ ᤆᤡᤈᤡ ᤂᤰᤂᤰ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤂᤧᤴ ᤔᤢᤖᤧᤰ ᤂᤠᤖᤧᤰ ᤐᤥᤱᤗᤥ॥”

ᤀᤡᤛᤪᤠᤀᤡᤗᤖᤧ ᤐᤡᤑᤩᤢᤱ ᤆᤥᤃᤢ

⁹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤁᤧᤖᤧᤰ ᤛᤡᤱᤛᤣ᤹ᤜᤠ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤗᤠᤶᤒᤠ ᤗᤳᤌᤡᤰᤁᤠᤱ ᤔᤧᤸᤗᤧᤳᤋᤣ ᤋᤢᤵᤔᤠ ᤐᤥᤱᤗᤥ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤛᤪᤠᤀᤡᤗᤒᤠ ᤁᤧᤜᤡᤱᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤔᤧᤔᤧᤰᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤕᤧᤶ ᤘᤠ᤹ᤖᤀᤣ ᤂᤧᤏᤧ᤹ ᤁᤧᤍᤢᤔᤢᤛᤡᤒᤠᤜᤠ᤹ ᤂᤰᤐᤧᤳ ᤛᤠᤶᤍᤡᤱ ᤐᤡᤖᤧᤛᤧ᤹ᤀᤥ॥”

¹⁰ ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤜᤠ᤺ᤳᤗᤧ ᤂᤧᤵᤛᤢᤒᤣ᥅ ᤀᤠᤳᤋᤡᤴᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤛᤠᤶᤍᤡᤱ ᤐᤡᤖᤢᤱᤛᤡᤱᤒᤠᤒᤣ᥅ ᤂᤧᤱᤜᤠ᤹ ᤜᤠᤍᤡᤱ ᤁᤧᤎᤰᤐᤠ ᤔᤧᤒᤥᤱᤗᤥ ᤂᤧᤒᤩᤠᤱ ᤀᤠᤒᤠᤅᤣ ᤂᤢᤏᤡ᤹ ᤏᤧᤰᤂᤥ᤹ᤀᤡᤴ ᤔᤧᤜᤢ᤹ᤖᤢᤀᤠᤱ ᤔᤧᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤀᤡᤱᤄᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤧᤄᤒᤠ ᤐᤠᤴ ᤐᤥᤱᤗᤥ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤋᤠᤔᤠ ᤐᤠᤴ ᤌᤣᤀᤠᤱ ᤔᤧᤱᤄᤥᤛᤢᤴᤗᤥ॥

¹¹ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤛᤠᤰᤁᤧᤴᤏᤡᤸᤗᤧ ᤀᤠᤱᤃᤠ᤹ ᤔᤡ ᤜᤧᤰᤁᤣ ᤌᤢᤰᤁᤠᤖᤥ. ᤀᤠᤸᤗ ᤀᤠᤱᤃᤠ᤹ ᤂᤧᤴ ᤌᤶᤔᤠᤀᤠᤱ ᤁᤵᤔᤠ ᤔᤧᤛᤢᤰᤁᤠᤴᤗᤥ॥” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤂᤧᤴ ᤀᤠᤛᤡᤰ ᤐᤥ᤺ᤰᤔᤠᤴ ᤗᤠᤶᤔᤥ ᤁᤧᤘᤠ᤹ᤒᤠ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤜᤧᤰᤁᤩᤠᤱ ᤌᤠᤱᤒᤧᤴᤜᤠ᤹ ᤔᤧᤈᤢᤶᤒᤠᤍᤧᤴᤏᤥ ᤌᤠᤛᤧ᤹ᤀᤥ॥ ᤕᤧᤶᤒᤠ ᤏᤢ ᤔᤣ᤺ᤳᤜᤠ᤹ ᤁᤧᤖᤧᤰ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ. ᤁᤢᤎᤧᤃᤣᤰ ᤁᤧᤓᤢᤵᤐᤠ ᤁᤠᤵᤐᤥᤒᤠᤀᤠᤱ ᤔᤧᤸᤗᤧᤖᤢᤴᤇᤡᤴᤗᤥ॥

¹² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤎᤠ᤺ᤱᤜᤠ᤹ ᤘᤣ᤹ᤜᤠ᤹ᤖᤧ ᤔᤧᤍᤣ᤹ᤖᤢᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤡᤰᤋᤠᤵᤜᤠ᤹ ᤏᤢ ᤔᤣ᤺ᤳᤜᤠ᤹ᤀᤠᤱ ᤘᤣ᤹ᤜᤠ᤹ᤖᤧ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡᤖᤥ॥ ᤀᤠᤱᤃᤠ᤹ ᤔᤢᤰᤛᤠᤶᤛᤠᤒᤠ ᤀᤠᤜᤢᤰᤁᤡᤴ ᤛᤴᤇᤢᤱᤗᤥ ᤜᤧᤰᤁᤣ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤀᤥ ᤁᤧᤳᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤗᤥ॥

¹³ ᤌᤣᤀᤠᤱᤓᤧᤸᤗᤧ ᤆᤢᤰᤐᤠ ᤕᤶᤒᤠ ᤔᤏᤠ ᤁᤧᤖᤧᤰᤗᤧ ᤀᤡᤱᤗᤧᤰᤗᤠᤶ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤋᤶᤛᤡᤱ ᤔᤧᤈᤥᤃᤢᤖᤥ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤀᤠᤱᤎᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤖᤧᤰᤗᤧ ᤔᤏᤠᤜᤠ᤹ ᤔᤧᤄᤢᤶᤛᤢᤛᤡᤖᤥ॥

¹⁴ ᤂᤧᤱᤜᤠ᤹ᤖᤧ ᤁᤧᤃᤠ᤺ᤶᤒᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤠᤰᤗᤰ ᤁᤧᤃᤠ᤺ᤶᤒᤠ ᤜᤧᤰᤁᤣ ᤛᤡᤍᤠ᤹ ᤔᤧᤔᤧᤳᤋᤢᤛᤡᤖᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤛᤏᤠᤖᤢᤱ. ᤛᤏᤠᤖᤢᤱ. ᤁᤧᤖᤧᤰ ᤏᤢᤒᤠ ᤘᤠ᤹ᤖᤥ.’ ᤁᤖ ᤛᤧᤰᤂᤠ᤺ᤸᤗᤧᤃ ᤛᤏᤠᤖᤢᤱ ᤛᤢᤰᤂᤣᤘᤠ ᤀᤠᤳᤋᤠᤴᤏᤠᤱ ᤜᤥᤵᤗᤥ॥

¹⁵ ᤁᤴ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤒᤠᤀᤥ ᤂᤢᤴᤇᤡ᤹ ᤏᤢ᤺ᤶᤔᤠ ᤁᤧᤒᤥᤱᤒᤠ ᤔᤣ᤺ᤶᤒᤡ᥅ ᤁᤖ ᤂᤧᤱᤜᤠ᤹ᤃ ᤔᤡᤛᤠᤰᤁᤠᤱ ᤏᤢ᤺ᤶᤔᤠᤀᤣ ᤔᤧᤴᤏᤢ᤺ᤴᤍᤧᤴᤗᤥ॥ ᤏᤢ᤺ᤶᤔᤠ ᤐᤠ᤺ᤴᤏᤡᤴ ᤌᤧᤔᤠᤒᤣ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤸᤗᤧᤛᤢᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤘᤣ᤹ ᤁᤧᤔᤧᤰᤐᤠᤜᤠ᤹ᤏᤢᤀᤣ ᤂᤧᤱᤜᤠ᤹ᤀᤠᤱ ᤔᤧᤔᤧᤰᤗᤥ॥ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤒᤠ ᤕᤧᤶᤔᤥ ᤂᤧᤱᤜᤠ᤹ ᤔᤧᤔᤧᤰᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”

ᤀᤡᤛᤪᤠᤀᤡᤗᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤡᤴ ᤔᤧᤏᤠ᤺ᤳᤋᤢᤴ

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤗᤡᤛᤡ ᤗᤠᤶ ᤁᤧᤍᤢᤶᤒᤠ ᤗᤠᤶᤍᤥᤀᤥ ᤕᤧᤒᤧᤶᤔᤧ᤹ᤀᤠᤱ ᤀᤥᤔᤕᤧᤶᤔᤧ᤹ᤀᤥ॥ ᤋᤃᤡᤒᤠ ᤗᤠᤶᤜᤠ᤹ ᤏᤢ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤗᤠᤶᤔᤡᤴ ᤁᤥ᤺ᤳᤋᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤴ ᤗᤠᤶᤔᤥ ᤗᤠᤱᤄᤣᤃᤧᤶᤔᤧ᤹ᤀᤥ ᤂᤧᤶᤒᤩᤠᤱ ᤂᤡᤏᤡ᤹ ᤜᤡᤱᤔᤴᤏᤡᤴ ᤕᤠᤶᤏᤠ᤺ᤶ ᤐᤥᤱᤗᤥ॥” ᤁᤖ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤜᤠ᤹. ᤀᤠᤏᤡᤃᤣ ᤜᤧᤰᤁᤣ ᤔᤧᤈᤥᤃᤢᤶᤒᤧᤴᤗᤥ॥”

¹⁷ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤗᤠᤶᤃᤧᤃᤥᤒᤠᤜᤠ᤹ ᤛᤣ᤺ᤰᤕᤢᤰ ᤆᤥᤃᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤕᤧᤖᤥ. “ᤁᤡᤵᤔᤠ ᤁᤧᤄᤢᤒᤠ ᤛᤠᤶᤍᤡᤱᤗᤧ ᤗᤠᤃᤡ ᤔᤧᤸᤗᤢᤰ ᤛᤠᤍᤠᤱ ᤗᤠᤀᤡᤰᤐᤠᤴ ᤂᤧᤵᤛᤧᤶᤔᤧ᤹ᤀᤥ” ᤁᤖ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ. “ᤂᤧᤴᤏᤠᤱ ᤀᤠᤏᤡᤃᤣ ᤔᤧᤄᤧᤵᤛᤢᤶᤒᤧᤴᤗᤥ॥”

¹⁸ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤛᤡᤖᤥ. “ᤕᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤒᤠ ᤔᤏᤠᤛᤣ. ᤂᤧᤵᤛᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤌᤣ ᤔᤧᤒᤥᤱ. ᤂᤧᤴ ᤏᤡᤱᤘᤠ᤹ ᤂᤥᤛᤧᤶᤔᤧ᤹ᤀᤥ॥

¹⁹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤣ. ᤂᤧᤵᤛᤧ᤹ᤀᤥ᥄ ᤁᤴᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤗᤧᤰᤘᤠ ᤁᤴ ᤛᤢᤘᤠᤱᤜᤠ᤹ᤀᤥ ᤔᤧᤰᤔᤧᤴ ᤋᤠᤖᤢᤱᤗᤥ ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤔᤧᤏᤠ᤹ᤖᤢᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤂᤧᤶᤔᤠ ᤔᤧᤴᤍᤧᤴᤏᤣ ᤔᤧᤘᤠ᤹ᤖᤥ॥

²⁰ ᤛᤣᤒᤠ ᤗᤠᤈᤣ᤹ᤗᤠᤶ ᤏᤢ ᤔᤠ᤺ᤱᤄᤠ ᤗᤠᤈᤣ᤹ᤗᤠᤶ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤜᤧᤰᤁᤩᤠᤱ ᤔᤠᤖᤢᤰᤜᤠ᤹ ᤌᤣ᤺ᤸᤗᤧ ᤗᤠᤃᤡ ᤀᤠᤱᤃᤠ᤹ᤀᤥ ᤔᤧᤍᤠᤖᤢᤒᤠᤀᤡᤖᤥ᥅ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤔᤧᤍᤠ᤺ᤰᤁᤠᤴᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧᤀᤠᤱ ᤀᤠᤏᤡᤱᤘᤠ᤹ ᤔᤧᤍᤠᤏᤧᤸᤗᤥ॥

²¹ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤔᤧᤍᤥ᤺ᤰᤗ ᤕᤠ᤺ᤴᤍᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤧᤷᤈᤢ ᤛᤥ᤺ᤴᤍᤢᤱᤛᤡᤱᤗᤥ॥ ᤁᤢᤶᤒᤠ ᤁᤢᤛ᤻ᤛᤠ. ᤁᤠ᤹ᤀᤡ ᤛᤥ᤹ᤎᤥᤰ. ᤐᤠᤱᤓᤣ᤹ᤛᤠᤒᤠᤜᤠ᤹ ᤁᤧᤖᤧᤰ ᤔᤧᤛᤡᤖᤥ॥”

ᤌᤥ ᤐᤡᤛᤠᤱᤗᤠᤶᤒᤠ ᤜᤕᤱᤋᤧᤴᤎᤱ

²² ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤌᤥ ᤐᤡᤛᤠᤱᤒᤠ ᤗᤠᤈᤣ᤹ᤗᤠᤶᤒᤠ ᤌᤰᤛᤢᤒᤠᤜᤠ᤹ ᤔᤧᤕᤢᤖ ᤔᤧᤒᤳᤗᤥ. ᤂᤧᤴ ᤔᤠ᤺ᤱᤄᤠ ᤗᤠᤈᤣ᤹ᤒᤠ ᤔᤢᤰᤛᤠᤶᤒᤠ ᤛᤢᤘᤠᤱᤜᤠ᤹ ᤔᤧᤜᤢᤛᤢᤛᤡᤖ ᤔᤧᤕᤠᤰᤗᤥ ᤂᤧᤒᤩᤠᤱ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥᤱᤗ ᤔᤧᤒᤳᤗᤥ॥

²³ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤗᤠ᤺ᤰ ᤏᤢ ᤗᤡᤴ ᤜᤢᤰᤁᤥ ᤔᤧᤃᤳᤋᤢᤖᤥ ᤂᤧᤱᤜᤠ᤹ ᤁᤢ᤹ᤀᤡᤃᤧᤓᤧᤶᤒᤠ ᤏᤢ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠᤒᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧᤃ ᤀᤴᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤔᤧᤍᤠᤖᤥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤒᤢᤰᤁᤡᤴ ᤘᤖ᤺ᤱᤅᤡᤴ ᤛ᤺ᤰᤐᤠ ᤜᤧᤰᤁᤣ ᤗ᤹ᤖᤥ॥ ᤏᤢᤔᤠᤛᤢᤰᤔᤠ ᤕᤖᤢᤛᤗᤧ᤺ᤶᤔᤡᤴᤏᤢ ᤌᤰᤛᤧ ᤂᤧᤱᤜᤠ᤹ ᤔᤧᤍᤠᤖ ᤔᤧᤒᤳᤗᤥ॥”

²⁴ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤁᤴ ᤐᤠ᤺ᤴᤏᤡᤸᤗᤧ ᤀᤡᤱᤄᤱᤅᤡᤴ ᤂᤧᤵᤛᤢᤶᤒᤧᤖᤥ ᤜᤧᤰᤁᤩᤠᤱ ᤀᤠᤏᤡᤃᤣ ᤛᤠᤘᤣ᤺ᤳ ᤕᤅᤧᤀᤠᤱ ᤗᤠᤱᤜᤢᤰᤗᤧ ᤔᤧᤍᤰᤋᤡᤃᤧᤴᤗᤥ॥ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤀᤠᤏᤡᤃᤣ ᤗ᤹ᤖᤡᤃᤧᤖᤥ ᤂᤧᤶᤒᤩᤠᤱ ᤕᤧᤳᤋᤢᤰᤂᤣᤀᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧᤖᤥ॥

²⁵ ᤀᤡᤰᤋᤠᤵ ᤗᤧᤵᤔᤠᤱ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤗᤠᤶᤔᤥᤀᤠᤱ ᤗᤠᤱᤔᤧᤄᤣᤃᤧᤶᤔᤡᤴᤏᤧ᤹ᤀᤥ॥ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤑᤧᤈᤠ ᤑᤧᤕᤢᤶ ᤔᤧᤃᤳᤋᤢᤖᤥ. ᤁᤧᤖᤧᤰ ᤐᤡᤛᤠᤱ ᤁᤡᤔᤠ ᤕᤱᤔᤠ ᤘᤠ᤹ᤖᤥ॥”

²⁶ ᤀᤠᤔᤏᤠᤛᤣ. ᤛᤃᤡᤋᤣᤳ ᤆᤠᤰᤂᤠᤶᤔᤧ᤹ᤀᤠᤱ ᤂᤠᤵᤐᤢᤀᤥ ᤛ᤹ᤀᤠᤛᤡᤶᤔᤧ᤹ᤀᤥ॥ ᤗᤳᤌᤡᤰᤐᤠ ᤛᤠ᤺ᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤁᤧᤎᤰᤐᤠ ᤜᤧᤰᤁᤣ ᤛᤠ᤹ᤖᤡᤰ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤔᤧᤱᤔᤧᤱᤒᤧᤸᤗᤧ ᤜᤰᤆᤄᤳ ᤂᤠ ᤁᤧᤓᤳᤗᤥ॥

²⁷ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤕᤷᤔᤡᤕᤠᤀᤣ. ᤛᤠᤶᤔᤩᤠᤱ ᤕᤢᤵᤐᤠ ᤛᤠ᤹ᤔᤏᤠᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤠ᤹ᤖᤧᤛᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤰᤋᤱᤒᤠ ᤔᤧᤈᤥᤰ. ᤂᤧᤏᤧ᤹ ᤏᤡᤱᤘᤠ᤹ ᤂᤥᤛᤧ᤹ᤀᤥ॥

²⁸ ᤂᤧᤱᤜᤠ᤹ ᤜᤠᤍᤡᤱ ᤁᤧᤎᤰᤐᤠ ᤏᤢ ᤐᤡᤑᤩᤢᤱᤒᤠ ᤔᤏᤠᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤠᤛᤠ ᤏᤢ ᤑᤧᤴᤈᤣ᤹ ᤜᤧᤰᤁᤣ ᤁᤧᤛᤠ᤺ᤰᤐᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ ᤂᤰᤐᤧᤳ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ ᤂᤧᤶᤒᤩᤠᤱ ᤘᤣ᤹ᤜᤠ᤹ ᤆᤧ᤹ᤕᤠ ᤀᤡᤱᤍᤥ ᤔᤧᤔᤧᤳᤋᤢᤛᤡᤖᤥ॥

²⁹ ᤑᤧᤴᤎᤰᤋᤧᤴᤏᤡᤴ ᤛᤠ᤹ᤖᤡᤰ ᤔᤡ᤺ᤸᤗᤧ ᤔᤰᤋᤢᤖᤥ ᤁᤖ ᤕᤢᤵᤐᤠᤜᤡ᤺ᤴ ᤔᤧᤕᤥ᤺ᤴᤏᤧᤴᤗᤥ॥ ᤀᤠᤔᤏᤠᤜᤠ᤹ ᤛᤠᤱᤔᤠᤛᤡ ᤕᤠ᤺ᤶᤒᤰᤁᤡᤴ ᤜᤏᤧᤖᤰ ᤐᤥᤱᤗ ᤘᤠ᤹ᤖᤥ ᤌᤣᤀᤠᤱᤓᤧᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤱᤄᤧᤳᤋᤢᤴ ᤔᤧᤴᤍᤣᤛᤢᤛᤡᤴᤗᤥ॥

³⁰ ᤂᤧᤱᤜᤠ᤹ ᤋᤠᤵᤑᤧ᤺ᤶᤒᤠ ᤕᤢᤵᤐᤠ ᤔᤧᤔᤧᤳᤋᤢᤛᤡᤖᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤏᤠ᤹ᤖᤢᤱᤛᤡᤱᤅᤠᤱ ᤘᤠ᤹ᤖᤥ॥”