ᤕᤷᤔᤡᤕᤠ 5 - LIFOTNTᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤕᤖᤢᤛᤗᤧ᤺ᤶᤒᤠ ᤔᤠᤖᤠᤶᤔᤠᤜᤠ᤹ᤀᤥ ᤌᤥ ᤏᤢ ᤕᤥ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱ ᤀᤥᤔᤕᤧ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥ ᤁᤥ᤺ᤳᤋᤧ᤹ᤖ ᤗᤠᤶᤍᤥᤜᤠ᤹ᤀᤥ ᤀᤥᤔᤕᤧ᤹ᤀᤥ. ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤛᤧᤰᤂᤠᤴ ᤁᤧᤜᤱᤒᤠ ᤗᤳᤇᤠ ᤁᤥ᤺ᤳᤋᤧ᤹ᤀᤥ ᤜᤧᤰᤋᤱᤒᤠ ᤔᤏᤠᤎᤡᤰ ᤂᤧᤏᤧ᤹ ᤁᤧᤄᤥᤛᤢᤏᤧᤓᤃᤪ ᤀᤠᤱᤃᤠ᤹ ᤂᤧᤴ ᤕᤧᤰᤕᤰᤁᤡᤴ ᤗᤧᤵᤔᤡ ᤐᤡᤖᤢᤱᤗᤥ॥ 2 ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ ‘ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ’ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤡᤱᤗᤧᤰᤐᤠ ᤔᤠᤱᤜᤧᤰ ᤔᤧᤈᤥᤃᤢᤖᤥ॥” 3 ᤕᤜᤘᤣ ᤍᤠᤱᤒᤠᤀᤣ ᤂᤧᤏᤧ᤹ ᤛᤧᤰᤂᤠᤴ ᤁᤧᤃᤥ᤺ᤳᤋᤢᤖᤥ॥ ᤂᤧᤏᤧ᤹ ᤂᤧᤱᤜᤠ᤹ ᤁᤧᤜᤡᤵᤋᤢᤛᤡᤖᤥ. ᤁᤖ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤀᤣ ᤔᤧᤶᤒᤡᤖᤢᤴᤗᤥ ᤂᤧᤏᤧ᤹ ᤐᤧᤍ᤺ᤰ ᤌᤠᤶ ᤁᤧᤔᤧᤳᤋᤢᤛᤡ ᤁᤖ ᤂᤧᤱᤜᤠ᤹ ᤜᤢ᤹ᤛᤡᤱᤔᤠ ᤔᤧᤴᤍᤧᤴᤍᤧᤴᤗᤥ॥ ᤂᤧᤱᤜᤠ᤹ ᤜᤠᤍᤡᤱ ᤁᤧᤎᤰᤐᤠ ᤔᤧᤒᤥ᤺ᤰᤂᤧᤖᤥ ᤜᤧᤰᤁᤩᤠᤱ ᤀᤠᤒᤠᤅᤣ ᤗᤠᤕᤥᤜᤠ᤹ᤗᤠᤶ ᤔᤧᤴᤏᤢ᤺ᤰᤂᤧᤴᤗᤥ॥ 4 ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ. “ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤏᤢ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤔᤧᤈᤥ᤺ᤰᤗᤧᤳᤇ ᤂᤧᤱᤜᤠ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤧᤔᤠ ᤐᤠ᤺ᤴᤜᤠ᤹ ᤂᤥᤔᤠ ᤏᤡᤱᤘᤠ᤹ ᤁᤧᤈᤥᤃᤢᤖᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤌᤣ ᤔᤧᤈᤥᤃᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢ ᤑᤠ᤹ᤀᤠᤱ ᤂᤢᤴᤇᤡ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ 5 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤗᤠᤶᤗᤥᤒᤠᤜᤠ᤹ᤖᤥ ᤐᤣ᤺ᤰᤁᤠᤀᤠᤱ ᤂᤧᤱᤜᤠ᤹ᤏᤢ ᤋᤠ᤹ᤈᤧᤱᤅᤠᤖᤥ॥ ᤛᤧᤰᤂᤠᤛᤠᤱ ᤂᤧᤱᤜᤠ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤖᤥ ᤂᤧᤴ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤘᤠ᤹ ᤁᤧᤈᤥᤃᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥” ᤁᤖ ᤁᤧᤖᤧᤰᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤕᤢᤰᤁᤡᤴ ᤋᤧᤴᤍᤡᤱ ᤆᤥ᤺ᤰᤔᤠ ᤔᤧᤴᤍᤧᤴᤍᤧᤴᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤏᤠ᤹ᤖᤢᤖᤥ॥ 6 ᤂᤧᤸᤗᤧᤆᤥᤃᤢᤸᤗᤧ ᤋᤠᤶᤓᤢᤱᤅᤥᤒᤠ ᤂᤡᤖᤡᤱᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤛᤧᤖᤢᤛᤡᤖᤥ. ᤔᤢᤖᤧᤰ ᤂᤠᤖᤧᤰᤐᤥᤒᤠ ᤐᤖᤠᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤎᤧ᤺ᤰᤂᤢ ᤔᤧᤛᤧᤖᤢᤛᤡᤖᤥ ᤜᤧᤰᤁᤩᤠᤱ ᤌᤧᤖᤡᤱᤒᤠᤜᤠ᤹ ᤂᤢᤴᤇᤡ᤹ ᤕᤧᤰᤕᤰ ᤜᤧᤱᤃᤠᤳᤋᤡ ᤋᤠᤰᤔᤧᤃᤴᤗᤥ॥ ᤁᤢᤓᤠ ᤗᤠ᤺ᤰᤁᤠᤳ ᤔᤧᤒᤣ᤺ᤰᤏᤧᤓᤃᤪ ᤂᤧᤱᤜᤠ᤹ ᤁᤢᤈᤪᤡᤱ ᤁᤢᤈᤪᤡᤱ ᤔᤧᤒᤥᤱᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡ᤺ᤳᤔᤧᤴᤍᤧᤳᤋᤣ ᤕᤖᤡᤰ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤧᤳᤗᤧᤱ ᤁᤧᤶᤏᤠ᤹ᤖᤧᤀᤠᤱ ᤘᤠ᤹ᤖᤥ॥ 7 ᤕᤜᤘᤣ ᤍᤠᤱᤒᤠᤴ ᤐᤠ᤺ᤴᤛᤣ᤺ᤴᤍᤥᤖᤥ. “ᤌᤣᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤗᤧᤵᤔᤡ ᤐᤡᤏᤡᤱᤒᤠᤒᤣ᥅ ᤂᤡᤏᤡ᤹ ᤛᤠᤜᤠ᤹ᤖᤧ ᤀᤠᤱᤃᤠ᤹ ᤗᤠᤵᤔᤧᤓᤢᤛᤠᤱᤅᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤱᤗᤧᤰᤐᤠ ᤔᤠᤱᤜᤠ᤹ᤀᤥ ᤔᤠᤱᤔᤧᤜᤧᤰᤛᤡᤱᤅᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ ᤔᤧᤱᤄᤠᤀᤣ ᤌᤠᤖᤡᤰ ᤆᤠ᤺ᤳᤋᤢᤱᤛᤡᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤧᤶᤒᤠ ᤜᤱᤈᤣᤏᤠ ᤁᤧᤳᤏᤡᤔᤠᤴᤏᤢ ᤕᤖᤡᤰ ᤕᤧᤶ ᤔᤧᤍᤣᤛᤢᤖᤥ॥ 8 ᤂᤧᤱᤜᤠ᤹ ᤛᤠ᤹ᤖᤡᤰ ᤆᤠᤗᤢᤵᤔᤏᤠᤒᤠ ᤏᤢ ᤗᤠᤶᤛᤡᤱᤔᤠᤸᤗᤧ ᤁᤢᤔᤡ᤺ᤵᤔᤠᤸᤗᤧ ᤋᤖᤢᤛᤡᤒᤠ ᤀᤴᤜᤠ᤹ ᤜᤧᤰᤁᤣ ᤔᤧᤗ᤹ᤖᤥ. ᤁᤧᤖᤧᤰ ᤀᤠᤒᤠᤅᤣ ᤂᤢᤴᤇᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤏᤢ ᤀᤡᤶᤔᤠ ᤛᤡᤖᤠ᤹ᤌᤠᤅᤧᤀᤠᤱ ᤘᤠ᤹ᤖᤥ. 9 ᤌᤣ ᤀᤰᤋᤱᤒᤠ ᤗᤠᤕᤥᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤒᤡᤖᤢᤱᤛᤡᤱᤅᤡᤴᤒᤡ᥅ ᤜᤧᤰᤁᤩᤠᤱ ᤌᤣ ᤀᤠᤱᤃᤠ᤹ ᤁᤴ ᤛᤢᤘᤠᤱᤜᤠ᤹ ᤛᤶᤎᤠᤱ ᤁᤢᤗᤧᤰᤘᤠ ᤔᤧᤜᤢᤱᤅᤠᤴᤒᤡ᥅ 10 ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤔᤧᤱᤛᤧ ᤀᤠᤱᤃᤠ᤹ ᤏᤡᤱᤔᤡᤜᤠ᤹ ᤐᤠᤱᤄᤢᤱᤛᤡᤱᤗᤥ ᤁᤖ ᤂᤰᤐᤧᤰᤁ ᤔᤧᤱᤔᤠ ᤔᤧᤒᤠᤱᤅᤠᤛᤡᤱᤅᤡᤴᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤆᤧᤸᤗᤧᤰᤛᤣ᤹ ᤐᤥᤖᤠ᤺ᤰᤜᤠ᤹ ᤗᤡᤄᤧ᤹ ᤗᤡᤄᤧ᤹ ᤗᤧᤴᤍᤧᤶᤔᤧ᤹ ᤔᤧᤳᤋᤢᤱᤛᤡᤱᤗᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠ ᤔᤣ᤺ᤴᤇᤡᤖᤥ॥ 11 ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤁᤧᤖᤧᤰ ᤐᤖᤡᤰᤗᤧ ᤀᤡᤱᤗᤧᤰᤁᤥ ᤔᤧᤎᤠᤛᤠᤱᤅᤠᤱ ᤔᤧᤘᤠ᤹ᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤏᤠ᤹ᤖᤢ 12 ᤕᤜᤘᤣ ᤍᤠᤱᤒᤠᤴ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢᤀᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤂᤢᤏᤧ᤹ ᤛᤧᤰᤂᤠ᤺ᤸᤗᤧ ᤌᤣᤀᤠᤱ ᤔᤧᤈᤥᤃᤢᤴᤗᤥ॥ ᤀᤠᤏᤡᤃᤧᤀᤥ ᤋᤢᤰᤂᤣ ᤗᤠᤰᤂᤣ ᤔᤧᤍᤠᤏᤧᤴᤗᤥ ᤀᤠᤓᤧᤸᤗᤧᤀᤠᤱ ᤌᤱ ᤀᤡᤃᤪ ᤛᤠᤰ ᤔᤧᤍᤠᤏᤧᤴᤗᤥ॥ 13 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤴᤘᤠ᤹ᤔᤏᤠᤒᤠ ᤐᤠᤴ ᤔᤧᤒᤠ᤺ᤳᤋᤢᤖᤥ ᤂᤧᤱᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤜᤥᤵᤗᤥ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤢᤴᤇᤡ᤹ ᤛᤶᤎᤠᤱᤅᤣ ᤆᤢᤰᤗᤖᤥ॥” 14 ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱᤗᤥ— “ᤕᤷᤔᤡᤕᤠᤀᤣ. ᤁᤴ ᤔᤏᤠᤜᤠ᤹ᤖᤧ ᤀᤰᤋᤱᤒᤠ ᤐᤠᤴ ᤁᤧᤶᤔᤧᤳᤋᤧᤖᤥ ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤧᤶᤒᤪᤠᤀᤥ ᤀᤠᤱᤃᤠ᤹ ᤀᤠᤒᤠ᤺ᤴᤜᤠ᤹ ᤔᤡ ᤜᤧᤰᤋᤱᤒᤠ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤁᤴ ᤔᤏᤠᤜᤠ᤹ᤃ ᤛᤡᤱ ᤁᤢᤀᤡᤛᤡᤰ ᤆᤥᤃᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤴ ᤔᤡ᤺ᤸᤗᤧ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡᤖᤥ॥ 15 ᤀᤡᤛᤪᤠᤀᤡᤗᤒᤠ ᤔᤧᤴᤇᤠᤶ ᤕᤠᤵᤔᤡᤛᤣ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤠ᤺ᤱᤄᤠᤗᤠᤶᤒᤠ ᤗᤳᤇᤠ ᤛᤢᤘᤠᤱᤎᤡᤰ ᤂᤡᤏᤡ᤹ᤏᤢ ᤌᤰᤛᤧ ᤑᤧᤳᤋᤢᤱᤗ ᤐᤳᤋᤠᤖᤥ॥ ᤂᤧᤱᤃ ᤗᤳᤇᤠ ᤁᤧᤎᤢᤶᤒᤠ ᤀᤢᤴᤇᤣ᤺ᤴᤒᤠ ᤛᤢᤘᤠᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤍᤠᤱᤅᤡᤴ ᤁᤧᤸᤗᤧᤛᤢᤶᤔᤡᤴᤗᤥ ᤂᤧᤱᤜᤠ᤹ ᤔᤧᤒᤠ᤺ᤵᤐᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤸᤗᤥ॥ 16 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤥᤱ ᤁᤧᤀᤠᤵᤐᤠ ᤌᤰᤛᤢᤒᤠᤜᤠ᤹ᤃ ᤔᤢᤰᤁᤧᤃᤢᤒᤠ ᤌᤱᤃᤧᤈᤥ᤺ᤰᤐᤠ ᤔᤧᤈᤥᤰᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤢᤱᤔᤠ᤹ ᤔᤧᤴᤍᤢᤰᤁᤣ ᤔᤧᤛᤧᤖᤢᤛᤡᤖᤥ॥ 17 ᤂᤧᤱᤜᤠ᤹ᤖᤧ ᤂᤡᤏᤡ᤹ ᤐᤥᤃᤢᤃᤧᤴ ᤁᤢᤈᤠ ᤏᤢ ᤆᤠᤔᤠ ᤁᤢᤈᤠᤜᤠ᤹ ᤔᤧᤈᤔᤧᤍᤣᤛᤢᤖᤥ ᤂᤡᤏᤡ᤹ ᤔᤧᤴᤇᤢᤔᤠ ᤕᤧᤶᤒᤡᤳᤇᤠᤛᤠᤜᤠ᤹ ᤔᤧᤈ ᤔᤧᤍᤣᤛᤢᤛᤡᤖᤥ॥ ᤂᤡᤏᤡ᤹ ᤔᤧᤸᤗᤢᤰ ᤔᤧ᤺ᤴᤍᤠ ᤏᤢ ᤐᤡᤳᤌᤰᤛᤠᤜᤠ᤹ ᤔᤧᤈ ᤔᤧᤍᤣᤛᤢᤛᤡᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤆᤧᤸᤗᤧᤰᤛᤣ᤹ᤀᤡᤴ ᤏᤢ ᤐ᤺ᤳᤇᤣ᤹ᤒᤢᤱᤔᤠᤜᤠ᤹ ᤔᤧᤈᤔᤧᤍᤣᤛᤢᤖᤥ॥ ᤀᤠᤎᤣ᤺ᤰᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠ ᤗᤢᤱᤎᤠᤰᤁᤡᤸᤗᤧ ᤔᤧᤓᤠᤅᤢᤒᤠ ᤕᤧᤰᤕᤰᤜᤠ᤹ ᤔᤧᤗᤢ᤺ᤴᤍᤢᤖᤥ॥” 18 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤜᤧᤰᤁᤣᤛᤠᤱ ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤰᤐᤧᤳ ᤔᤧᤔᤧᤱᤅᤠᤛᤡᤱᤅᤡᤴ॥ 19 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤣᤀᤠᤱ ᤀᤠᤏᤡᤃᤧᤏᤢ ᤀᤰᤋᤱᤒᤠ ᤆᤥᤃᤢ ᤑᤠ᤹ᤀᤠᤱ ᤂᤧᤏᤧ᤹ ᤛᤣ᤺ᤴᤁᤧᤶᤗᤠᤵ. ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤕᤜᤘᤣ ᤍᤠᤱᤒᤠᤴ ᤁᤧᤏᤠ᤹ᤖᤢᤶᤔᤠᤱ ᤀᤠᤒᤠᤅᤣ ᤗᤠᤈᤣ᤹ᤀᤥ ᤘᤣ᤹ ᤛᤠᤶᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤘᤣ᤹ ᤗᤠᤈᤣ᤹ᤒᤠ ᤕᤠᤵᤔᤡᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤗᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤛᤠᤶᤍᤡᤱ ᤐᤡᤖᤢᤛᤡ 20 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹ᤀᤥ. ᤕᤜᤢᤍᤠᤒᤠ ᤔᤏᤠᤜᤠ᤹ ᤁᤴ ᤐᤠ᤺ᤴᤏᤡᤴ ᤂᤧᤶᤔᤠ ᤐᤠᤱᤄᤧᤛᤧ᤹ᤀᤥ— 21 ᤀᤍᤱ ᤏᤢ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤏᤠᤛᤣ. ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤧᤏᤡ᤹ ᤔᤡᤰᤁ ᤐᤳ ᤁᤖ ᤏᤡᤔᤠ ᤔᤧᤴᤇᤢᤰᤋᤢᤴᤗᤥ. ᤏᤧᤓᤠᤰᤁ ᤐᤳ ᤁᤖ ᤂᤧᤶᤔᤠ ᤁᤧᤴᤇᤢᤰᤋᤢᤶᤔᤡᤴᤗᤥ॥ 22 ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ. ᤂᤡᤏᤡ᤹ ᤀᤠᤱᤃᤠ᤹ᤏᤢ ᤁᤡᤔᤠ ᤔᤧᤒᤥᤱᤏᤧᤴᤒᤡ᥅ ᤀᤠᤱᤃᤠ᤹ ᤀᤠᤍᤃᤡ ᤌᤣᤀᤠᤱ ᤌᤧᤃᤰᤁᤰᤏᤠ ᤁᤧᤴᤕᤰᤂᤡᤴᤒᤣ᥅ ᤀᤠᤱᤃᤠ᤹ ᤘᤖ᤺ᤱᤅᤡᤸᤗᤧ ᤗᤠᤃᤡ ᤕᤧ᤺ᤱᤄᤠ᤺ᤴ ᤀᤡ᤺ᤴᤍᤥ ᤏᤧᤛ᤻ᤛᤢᤱ ᤐᤡᤖᤢᤱᤅᤠᤱ ᤏᤧᤖᤥ॥ ᤂᤧᤴ ᤘᤖ᤺ᤱᤅᤡᤸᤗᤧ ᤁᤠ᤺ᤰᤔᤠ ᤔᤧᤴᤇᤢᤰᤔᤏᤠ ᤗᤳᤇᤠ ᤋᤎᤵ ᤔᤧᤸᤗ᤹ᤔᤏᤠᤒᤠ ᤁᤢᤎᤣ᤺ᤰᤔᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤘᤖ᤺ᤱᤅᤥᤒᤠ ᤘᤠᤓᤧᤸᤗᤧᤱᤜᤠ᤹ ᤐᤥ᤺ᤰᤐᤡᤗᤠᤖᤥ ᤁᤖ ᤂᤧᤴ ᤀᤡ᤺ᤴᤍᤥᤴ ᤁᤠ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤴ ᤘᤠᤓᤧᤸᤗᤧᤱᤜᤠ᤹ ᤕᤶᤒᤠ ᤛ᤺ᤰᤐᤡᤗᤠᤖᤥ ᤁᤖ ᤂᤧᤴ ᤜᤔᤠᤀᤠᤱ ᤁᤠ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ 23 ᤁᤖ ᤂᤡᤏᤡ᤹ᤃ ᤛᤠ᤹ᤖᤡᤰ ᤜᤠᤍᤡᤱ ᤁᤧᤎᤰᤐᤠ ᤏᤢ ᤐᤡᤵᤑᤩᤢᤱᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤖᤥ॥ ᤂᤧᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤏᤠ᤹ᤖᤡᤖᤥ ᤂᤧᤒᤩᤠᤱ ᤘᤣ᤹ ᤗᤠᤶ ᤗᤧᤵᤔᤠᤱ ᤁᤧᤒᤣᤃᤡᤀᤠᤱ ᤁᤧᤘᤕᤡᤖᤥ॥ 24 ᤀᤠᤱᤃᤠ᤹ ᤂᤡᤏᤡ᤹ ᤋᤱᤘᤠ᤺ᤶᤔᤥᤒᤠ ᤘᤜᤡᤳ ᤌᤠᤛᤢᤱ ᤐᤡᤏᤡᤱᤗᤥ ᤜᤧᤰᤁᤩᤠᤱ ᤑᤢᤱᤘᤠ᤺ᤶᤔᤥᤒᤠ ᤘᤜᤡᤳ ᤐᤠᤱᤄᤢᤱ ᤕᤢᤛᤢᤱᤗᤥ ᤜᤧᤰᤁᤩᤠᤱ ᤋᤱᤒᤣ ᤌᤰᤔᤠ ᤐᤥᤃᤢᤃᤧᤴ ᤁᤢᤈᤠ ᤛᤢᤶᤔᤠ ᤕᤧᤶ ᤋᤠᤖᤢᤱᤗᤥ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤶᤔᤡᤴᤗᤥ॥ 25 ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤁᤴ ᤏᤢᤒᤠ ᤐᤠ᤺ᤴᤜᤠ᤹ ᤔᤧᤍᤠᤏᤧᤴᤗᤥ॥ ᤂᤡᤏᤡ᤹ ᤗᤠᤕᤥᤸᤗᤧ ᤁᤴ ᤏᤢᤒᤠ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤁᤧᤈᤥᤃᤡᤖᤥ॥ 26 “ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤔᤧᤘᤠ᤹ᤖᤥ. ᤂᤧᤴ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧᤃ ᤐᤢ ᤀᤡᤃᤧᤕᤢᤰᤐᤠ ᤜᤧᤰᤁᤣ ᤔᤏᤠᤜᤠ᤹ ᤔᤧᤛᤢᤃᤢᤛᤡᤖ ᤔᤧᤕᤢᤱᤗᤥ ᤁᤖ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤋᤧᤶᤔᤠᤛᤡᤖᤧ ᤗᤠᤃᤡ ᤆᤧᤴᤜᤠ᤹ ᤔᤧᤍᤠ᤺ᤰᤋᤢᤀᤠᤱ ᤏᤧᤖᤥ॥ 27 ᤛᤠᤘᤠᤃᤧᤶᤒᤠᤸᤗᤧ ᤐᤢᤜᤠ᤹ ᤆ᤺ᤱᤃᤪᤱᤅᤥ ᤌᤠᤛᤢᤛᤡᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤂᤢ᤺ᤵᤔᤏᤠᤒᤠ ᤆᤡᤃᤰᤘᤠᤜᤠ᤹ᤖᤧ ᤂᤢᤏᤡ᤹ ᤜᤡᤶᤜᤠ᤹ ᤔᤧᤎᤡᤶᤛᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤖᤛᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤜᤧᤰᤁᤩᤠᤱ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 28 ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤧᤈᤀᤠᤱ ᤔᤧ᤹ᤖᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤁᤢᤏᤢᤵᤔᤠ ᤜᤥᤵᤗᤥ॥ ᤂᤧᤱᤜᤠ᤹ᤖᤧ ᤕᤧᤳᤇᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰᤁᤡᤴ ᤔᤧᤏᤠᤵᤋᤢᤛᤡᤖᤥ. ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤴᤗᤥ᤺ᤴᤍᤢᤴ ᤔᤧᤶᤒᤡᤖᤢᤛᤡᤴᤗᤥ॥ 29 ᤌᤣ ᤀᤰᤋᤱᤒᤠ ᤗᤠᤕᤥᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤒᤡᤖᤢᤱᤛᤡᤱᤅᤡᤴᤒᤡ᥅ ᤜᤧᤰᤁᤩᤠᤱ ᤌᤣ ᤀᤠᤱᤃᤠ᤹ ᤁᤴ ᤛᤢᤘᤠᤱᤜᤠ᤹ᤀᤥ ᤁᤢᤗᤧᤰᤘᤠ ᤔᤧᤜᤢᤱᤅᤠᤴᤒᤡ᥅ 30 ᤁᤴ ᤗᤠᤈᤣ᤹ᤀᤥ ᤁᤡᤵᤔᤠᤃᤧᤄᤢᤒᤠ ᤐᤥ᤺ᤰᤂᤧᤖᤥ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 31 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖᤥ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤕᤢᤰ ᤔᤧᤈᤥᤃᤢᤖ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧᤃ ᤜᤧᤰᤋᤱᤒᤠᤀᤣ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤗᤥ॥ ᤁᤖ ᤀᤠᤔᤏᤠᤛᤣ ᤁᤢᤏᤢᤵᤔᤥᤃ ᤂᤡᤏᤡ᤹ ᤌᤣ ᤁᤧᤈᤥᤃᤢᤶᤔᤡᤖᤥ᥅” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.