ᤕᤷᤔᤡᤕᤠ 48 - LIFOTNTᤔᤥᤀᤠᤒᤖᤧ ᤁᤢᤔᤧᤰᤔᤠ ᤀᤡᤱᤄᤱ 1 ᤔᤥᤀᤠᤒᤖᤧ ᤁᤢᤕᤠ᤺ᤶᤒᤣᤀᤥ ᤁᤴ ᤀᤡᤱᤄᤱᤅᤡᤴ ᤁᤧᤖᤧᤀᤠᤱ ᤘᤕᤧ॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤆᤡ᤺ᤳᤋᤧ ᤛᤩᤧ. ᤏᤣᤒᤥᤒᤠ ᤕᤧᤰᤕᤰᤁᤡᤸᤗᤧ ᤁᤧᤛᤠᤰᤐᤠ ᤋᤢᤰᤂᤣᤴ ᤜᤠᤱᤄᤢᤀᤠᤱ ᤏᤧᤖᤥ. ᤁᤴ ᤕᤧᤰᤕᤰᤁᤡᤴ ᤜᤠᤖᤠᤀᤣ ᤂᤠᤵᤐᤢᤌᤩ᤺ᤱ ᤐᤥᤱᤗᤥ᥄ ᤁᤡᤷᤕᤠᤋᤤᤔᤒᤠ ᤕᤧᤰᤕᤰᤁᤡᤴ ᤏ᤺ᤶᤏ᤺ᤶᤒᤠ ᤐᤥᤱᤅᤠᤱ ᤔᤏᤠᤜᤢᤰᤁᤥ ᤌᤠᤖᤥ. ᤜᤠᤱᤕᤰᤁᤡᤴ ᤏ᤺ᤶᤏ᤺ᤶᤒᤠ ᤐᤥᤱᤅᤠᤱ ᤗᤢ᤺ᤴᤗᤥ॥ 2 ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤥᤀᤠᤒᤖᤧ ᤁᤢᤕᤠ᤺ᤶᤒᤣᤀᤥ ᤕᤠᤶᤔᤥ ᤕᤶᤒᤠ ᤔᤧᤜᤧᤴᤇᤡᤱᤗ ᤔᤧᤶᤒᤠ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤧᤱᤔᤠᤖᤧ ᤗᤠᤃᤡ ᤜᤣᤛ᤻ᤒᤥᤏᤀᤥ ᤀᤰᤋᤱᤒᤠ ᤆᤧᤶᤓᤴ ᤐᤠᤴ ᤐᤥᤱᤗ ᤐᤳᤗᤥ॥ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤋᤩᤧᤶᤔᤧ᤹ᤀᤥ. ᤂᤧᤴ ᤛᤢᤘᤠᤱᤅᤡᤴ ᤀᤠᤏᤡ᤹ ᤔᤧᤰᤂᤢᤶᤗᤥ॥’ ᤔᤍᤔᤣᤏᤒᤠ ᤕᤧᤰᤕᤰᤁᤡᤴᤏᤠᤱ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤋᤠᤓᤣ᤺ᤸᤗᤧ ᤂᤧᤵᤔᤥ ᤁᤧᤍᤡᤶᤍᤡ ᤁᤧᤍᤠᤖᤡᤖᤥ॥ 3 ᤜᤥᤖᤥᤏᤤᤔᤒᤠ ᤔᤏᤠᤜᤠ᤹ ᤔᤧᤀ᤺ᤰ ᤔᤧᤓᤡ᤺ᤰᤗᤥ. ᤂᤧᤴ ᤕᤶᤒᤠ ᤔᤧᤰᤔᤠ ᤏᤢ ᤛᤡᤔᤠ ᤜᤠ᤺ᤵᤔᤠᤜᤠ᤹ ᤂᤧᤵᤛᤧᤶᤔᤧ᤹ᤀᤥ॥ 4 ᤔᤥᤀᤠᤒᤧᤴ ᤁᤧᤖᤧᤰ ᤔᤧᤃᤧᤀᤠᤱ ᤏᤧᤖᤥ. ᤂᤧᤵᤔᤥᤒᤠ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤔᤧᤜᤠ᤺ᤵᤗᤥ॥ 5 ᤂᤧᤵᤔᤥᤒᤠ ᤘᤧᤵᤔᤡᤒᤠᤜᤠ᤹ ᤀᤢ᤺ᤰᤁᤠᤱ ᤀᤢᤰ ᤔᤧᤜᤠ᤺ᤵᤗᤥ. ᤗᤢᤜᤡᤋᤒᤠ ᤌᤠᤶᤔᤠᤱᤒᤠᤴ ᤂᤧᤱᤜᤠ᤹ᤖᤧ ᤔᤧᤗᤡᤅᤢᤖᤥ॥ ᤁᤡᤔᤠ ᤕᤱᤔᤠᤖᤧ ᤂᤧᤱᤜᤠ᤹ ᤔᤧᤜᤠ᤺ᤵᤗᤥ. ᤜᤥᤖᤥᤏᤤᤔ ᤛᤶᤔᤠᤱᤒᤥ ᤕᤥ ᤔᤧᤎᤠᤖᤥ॥ 6 ᤂᤡᤏᤡ᤹ ᤜᤡᤱᤔᤠᤖᤧ ᤗᤠᤃᤡ ᤂᤧᤳᤋᤠᤛᤡᤶᤔᤧ᤹ᤀᤥ. ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤋᤧᤰᤛᤧᤰᤛᤧ᤺ᤰᤐᤠ ᤛᤡᤱᤒᤢᤱ ᤜᤧᤰᤋᤱᤒᤠ ᤐᤥ᤺ᤰᤂᤧᤶᤔᤧ᤹ᤀᤥ᥄ 7 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤀᤥ ᤜᤧᤰᤁᤩᤠᤱ ᤜᤢᤰᤘᤠ ᤏᤢ᤹ᤔᤥ ᤏᤡᤱᤘᤠ᤹ ᤁᤧᤕᤢᤰᤂᤢᤶᤗᤥ. ᤂᤡᤏᤡ᤹ ᤁᤧᤶᤍᤧᤶᤛᤡᤀᤠᤱ ᤁᤧᤶᤍᤣ᤹ᤖᤡᤖᤥ॥ ᤂᤡᤏᤡ᤹ ᤔᤠᤱ ᤁᤔᤥᤛᤧᤴ ᤁᤢᤕᤰᤕᤠᤒᤠ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤛᤥᤖᤡᤰ. ᤔᤠ᤺ᤱᤄᤠᤒᤠ ᤗᤠᤈᤣ᤹ᤀᤥ ᤔᤧᤀᤢ᤺ᤰᤂᤢ ᤔᤧᤎᤧᤔᤢ ᤔᤧᤍᤣ᤹ᤖᤢᤛᤡᤖᤥ॥ 8 ᤁᤧᤖᤧᤰ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤂᤧᤒᤩᤠᤱ ᤏᤧᤏᤧᤒᤠᤍᤧᤴᤜᤠ᤹ ᤀᤡᤃᤪ ᤋᤧᤶᤒᤣᤜᤠ᤹ᤀᤠᤱ ᤔᤧᤰᤗᤥ ᤀᤠᤳᤋᤡᤴᤜᤠ᤹ᤀᤠᤱ ᤂᤧᤳᤇᤡᤱᤔᤠ ᤔᤧᤴᤇᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 9 ᤔᤥᤀᤠᤒ ᤗᤠᤈᤣᤴ ᤕᤢᤶ ᤆᤢ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤧᤴ ᤔᤢᤖᤧᤰ ᤂᤠᤖᤧᤰ ᤐᤥᤱᤗᤖᤥ. ᤂᤧᤸᤗᤧ ᤁᤢᤕᤧᤰᤕᤰᤜᤠ᤹ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤂᤧᤱᤜᤠ᤹ᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤕᤢᤱᤏᤧᤴᤗᤥ॥ 10 “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤏᤠᤒᤠ ᤁᤧᤗᤧᤶᤒᤠᤜᤠ᤹ ᤔᤠᤱᤍᤣ ᤔᤧᤎᤠᤖᤖᤥ. ᤔᤠᤰᤂᤡ᤹ ᤔᤧᤴᤇᤧᤔᤏᤠᤒᤠ ᤋᤠᤓᤣ ᤁᤧᤈᤡᤱᤒᤠᤜᤠ᤹ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤖᤖᤥ᥄ 11 “ᤔᤥᤀᤠᤒᤧᤴ ᤁᤧᤖᤧᤰᤏᤢ᤺ᤸᤗᤧ ᤋᤃᤡᤒᤠ ᤁᤢᤛᤠᤵᤔᤢ᤺ᤴᤎᤢᤶᤔᤥ ᤂᤧᤴ ᤛᤏᤠᤖᤢᤱᤅᤥ ᤆᤡᤈᤡ ᤕᤧᤶᤕᤧᤶ ᤘᤠ᤹ᤖᤥ. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤘᤣ᤹ ᤗᤠᤈᤣ᤹ ᤔᤧᤴᤍᤣ᤹ᤀᤣ ᤘᤠ᤹ᤖᤥ॥ ᤔᤧᤸᤗᤡᤱᤅᤣ ᤕᤢᤱᤔᤏᤠᤒᤠ ᤛᤣᤈ᤺ᤱᤘᤠ ᤜᤧᤰᤁᤣ ᤗ᤹ᤖᤥ॥ ᤂᤵᤐᤩᤠᤀᤥᤏᤢ ᤘᤣ᤹ ᤂᤵᤐᤩᤠᤀᤥ ᤔᤧᤸᤗᤡᤱᤅᤣ ᤕᤢᤱᤗᤥ ᤂᤧᤴ ᤀᤠᤸᤗ ᤁᤢᤈᤠᤃᤧᤏᤢ᤹ᤒᤠ ᤏᤢ ᤁᤢᤏᤠᤶᤃᤧᤏᤢ᤹ᤒᤠ ᤆᤥᤰᤗᤥ॥” 12 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤖ ᤕᤧᤶᤔᤡᤴ ᤜᤠᤖᤠᤀᤣ ᤋᤠᤖ ᤐᤳᤗᤥ ᤀᤠᤱᤃᤠ᤹ ᤔᤏᤠᤜᤠ᤹ ᤐᤠᤱᤄᤢᤱᤛᤡᤱᤗᤥ ᤂᤧᤱᤜᤠ᤹ᤖᤧ ᤂᤧᤴ ᤁᤢ᤺ᤴᤍᤠᤀᤥᤗᤠᤶ ᤔᤧᤗᤡᤱᤄᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠ᤺ᤰᤁᤠᤳ ᤔᤧᤜᤢᤰᤂᤢᤖᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤢ᤺ᤴᤍᤠ᤺ᤴ ᤔᤧᤕ᤺ᤵᤛᤢ ᤔᤧᤍᤣᤛᤢᤖᤥ॥ 13 ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤒᤣᤌᤣᤗᤀᤥ ᤂᤢᤴᤇᤡ᤹ ᤛᤠᤶᤔᤩᤠᤱ ᤐᤡᤳᤛᤠᤳᤋᤡᤴᤏᤢ ᤔᤧᤏᤢ᤺ᤴᤍᤧᤖᤥ. ᤂᤧᤴ ᤜᤧᤰᤁᤣ ᤔᤥᤀᤠᤒᤧᤴ ᤏᤡᤴᤎᤠᤛᤣ᤺ᤰᤀᤥ ᤁᤢᤏᤠᤘᤠᤀᤡᤳᤗᤠ ᤁᤔᤥᤛᤧᤴᤏᤢ ᤛᤡᤖᤡᤱᤔᤔᤥ ᤌᤠᤖᤥ॥ 14 “ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤕᤶᤒᤠ ᤁᤧᤜᤧᤴᤏᤠᤛᤡᤖᤥ. ‘ᤀᤠᤏᤡᤃᤧᤃ ᤌᤱ ᤁᤧᤏᤠ᤺ᤶᤒᤠᤛᤡᤃᤧᤖᤥ. ᤌᤱᤅᤥ ᤁᤧᤀᤠ᤺ᤵᤐᤠ ᤔᤏᤠᤍᤡᤃᤧᤖᤥ॥’ 15 ᤁᤖ ᤀᤠᤸᤗ ᤔᤥᤀᤠᤒᤧᤴ ᤏᤢ ᤁᤢᤕᤧᤰᤕᤰᤜᤠ᤹ ᤔᤧᤔᤧᤰᤂᤢᤖᤥ॥ ᤂᤧᤸᤗᤧ ᤛᤠ᤹ᤖᤡᤰ ᤀᤡᤱᤄᤢᤛᤡᤒᤠ ᤌᤠᤱᤒᤧᤴ ᤁᤢᤔᤏᤠᤜᤠ᤹ ᤔᤧᤛᤧᤖᤢᤛᤡᤖᤥ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤜᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥ 16 “ᤔᤥᤀᤠᤒᤖᤧ ᤁᤢᤔᤧᤰᤔᤧᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤂᤠᤵᤐᤢᤌᤩ᤺ᤱ ᤁᤢᤔᤧᤰᤔᤠ ᤛᤡᤔᤧᤴ ᤋᤠᤖ ᤐᤳᤗᤥ॥ 17 ᤔᤥᤀᤠᤒᤖᤧ ᤁᤢᤄᤡᤖᤡ ᤁᤧᤕᤢᤱᤒᤠᤛᤣ. ᤂᤢᤏᤧ᤹ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤁᤧᤄᤧᤶᤒᤠ ᤁᤧᤏᤡᤒᤠᤛᤣ. ᤂᤧᤸᤗᤧ ᤁᤢᤗᤠᤃᤡ ᤜᤠᤒᤠᤶᤔᤧ᤹ ᤑᤡ᤺ᤰᤋᤧᤶᤔᤧ᤹ᤀᤥ᥄ ‘ᤂᤧᤸᤗᤧ ᤁᤧᤔᤢᤰᤐᤠ ᤁᤢᤕᤢᤰᤁᤡᤴ ᤔᤕᤧᤖᤥ. ᤁᤢᤜᤠᤱᤘᤠ ᤁᤢᤔᤠᤱᤘᤠ ᤏᤢ ᤁᤢᤔᤢᤰᤛᤠᤶᤔᤡᤴ ᤀᤠᤸᤗ ᤜᤥᤵᤗᤥ᥄’ 18 “ᤂᤡᤏᤡ᤹ ᤍᤡᤒᤥᤏᤒᤠ ᤔᤏᤠᤛᤣ. ᤂᤡᤏᤡ᤹ ᤔᤡᤔᤡᤍᤡᤱᤅᤥᤏᤢ ᤕᤥ ᤌᤠᤛᤡᤱ ᤕᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤠᤶᤓᤢᤳᤇᤪᤢᤶᤒᤥ ᤕᤢᤅᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴᤜᤠ᤹ᤖᤧ ᤔᤥᤀᤠᤒᤧᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ᤹. ᤂᤧᤱᤜᤠ᤹ᤖᤧᤀᤣ ᤍᤡᤒᤥᤏᤧᤴᤏᤠᤱ ᤑᤢᤳᤗᤢᤶ ᤌᤩ᤺ᤱ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤆᤱᤜᤡᤶᤜᤠ᤹ ᤔᤧᤗᤢ᤺ᤴᤍᤢ ᤔᤧᤍᤣᤛᤢᤖᤥ॥ 19 ᤀᤖᤥᤀᤣᤖᤒᤠ ᤔᤏᤠᤛᤣ. ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤕᤧᤒᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤡᤏᤡ᤹ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤔᤥᤀᤠᤒᤗᤠᤶ ᤁᤧᤄᤧᤳᤇᤡᤱᤒᤠᤜᤠ᤹ ᤁᤶᤓᤗ᤹ᤖᤡᤰ ᤑᤧ᤺ᤰᤋᤧᤶᤛᤡᤔᤧ᤹ᤀᤥ. ‘ᤂᤧᤵᤔᤥ ᤜᤧᤴ ᤐᤥ᤺ᤰᤛᤧᤀᤠᤱ ᤏᤧᤃᤜᤦ᥅’ 20 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤁᤧᤶᤔᤧᤳᤋᤡᤖᤥ. ‘ᤔᤥᤀᤠᤒᤧᤴ ᤌᤩ᤺ᤱ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤜᤠᤒᤧᤶᤔᤧ᤹ᤀᤠᤱ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ᥄ ᤀᤷᤏᤥᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤀᤰᤂᤣ ᤐᤠ᤺ᤳᤋᤧᤶᤔᤧ᤹ᤀᤥ. ᤔᤥᤀᤠᤒᤧᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ᥄’ 21 ᤜᤥᤗᤥᤏ. ᤕᤜᤛᤠᤜ ᤏᤢ ᤔᤣᤐᤠᤋᤀᤥ ᤋᤧᤸᤗᤰᤁᤥᤒᤠ ᤐᤠᤱᤈᤢᤶᤜᤠ᤹ᤀᤥ ᤂᤠᤛᤧᤴᤏᤡᤴ ᤋᤩᤧᤀᤠᤱ ᤘᤠ᤹ᤖᤥ. 22 ᤍᤡᤒᤥᤏ. ᤏᤣᤒᤥ ᤏᤢ ᤒᤣᤌ-ᤍᤡᤒ᤻ᤗᤋᤤᤔᤀᤥ. 23 ᤁᤡᤷᤕᤠ-ᤋᤤᤔ. ᤒᤣᤌ-ᤃᤔᤢᤕᤗ ᤏᤢ ᤒᤣᤌ-ᤔᤥᤏᤀᤥ. 24 ᤁᤡᤷᤕᤥᤋ ᤏᤢ ᤒᤥᤈᤪᤠᤀᤥ. ᤔᤠ᤺ᤱᤄᤠ ᤏᤢ ᤏᤡ᤺ᤳᤋᤠᤱᤒᤠ ᤔᤥᤀᤠᤒᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤂᤠᤛᤧᤴᤏᤡᤴ ᤌᤩᤧᤀᤠᤱ ᤘᤠ᤹ᤖᤥ॥ 25 “ᤔᤥᤀᤠᤒᤖᤧ ᤁᤢᤔᤢᤰᤛᤠᤶᤔᤡᤴ ᤏᤢᤒᤧᤖᤥ ᤂᤧᤸᤗᤧ ᤁᤢᤜᤢᤰᤁᤡᤴ ᤀᤧᤃᤧᤀᤠᤱ ᤘᤠ᤹ᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 26 “ᤂᤧᤴ ᤜᤥ᤹ᤍᤥᤴ ᤜᤥ᤹ᤍᤥᤴ ᤗ᤹ᤖᤖᤥ ᤜᤧᤰᤁᤩᤠᤱ ᤌᤡ᤺ᤸᤗᤧ ᤁᤧᤔᤒᤠ ᤜᤧᤰᤁᤣ ᤆᤥ᤺ᤴᤗᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤸᤗᤧ ᤐᤡᤑᤩᤢᤱ ᤆᤥᤃᤢᤀᤠᤱ ᤘᤠ᤹ᤖᤥ॥ ᤔᤥᤀᤠᤒᤧᤴ ᤀᤠᤒᤠᤅᤣ ᤁᤢᤒᤧ᤹ᤔᤠ᤺ᤳᤋᤥ ᤜᤥ᤺ᤳᤇᤡᤱᤗᤥ ᤂᤧᤱᤃ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤣ᤺ᤵᤔᤠ ᤆᤠᤜᤠᤰ ᤐᤥᤱᤗᤥ॥ 27 ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤌᤣ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤁᤧᤴᤈᤥᤃᤢᤛᤡᤴᤒᤡ᥅ ᤂᤧᤏᤧ᤹ ᤂᤧᤱᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤒᤠ ᤁᤢᤛᤡᤱ ᤂᤧᤱᤜᤠ᤹ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤧᤍᤧᤶᤛᤢᤛᤡᤒᤡ᥅” 28 “ᤂᤡᤏᤡ᤹ ᤔᤥᤀᤠᤒᤒᤠ ᤔᤏᤠᤛᤣ. ᤂᤡᤏᤡ᤹ ᤕᤧᤰᤕᤰᤜᤠ᤹ᤀᤥᤗᤠᤶ ᤂᤧᤳᤋᤠᤛᤡᤶᤔᤧ᤹ᤀᤥ ᤗᤢᤱ ᤗᤢᤱᤑᤢᤰᤁᤥᤜᤠ᤹ᤀᤥ ᤂᤡᤏᤡ᤹ ᤕᤢᤅᤧᤶᤔᤧ᤹ᤀᤥ᥄ ᤕᤠᤰᤐᤣ᤹ᤑᤡ᤺ᤵᤔᤥ ᤜᤠᤵ ᤁᤧᤈᤥ᤺ᤰᤐᤠ ᤐᤢᤳᤋᤢ᤺ᤰᤁᤣᤴ ᤁᤢᤛᤡᤱ ᤂᤡᤏᤡ᤹ ᤕᤠᤶᤏᤠᤖᤠ ᤌᤣ᤺ᤰᤌᤣ᤺ᤰ ᤆᤡᤱᤅᤠᤛᤡᤶᤔᤧ᤹ᤀᤥ॥ 29 ᤔᤥᤀᤠᤒᤖᤧ ᤁᤢᤀᤠᤱᤍᤡᤱᤅᤡᤴ ᤁᤧᤖᤧᤰ ᤂᤧᤵᤛᤢᤶᤒᤧᤀᤠᤱ ᤘᤠ᤹ᤖᤥ᥄ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠ᤹ᤖᤡᤰ ᤕᤶᤒᤠ ᤗᤧᤱᤛᤡᤱᤗᤥ॥ ᤁᤢᤜᤧᤴᤇᤡᤱᤔᤠ ᤏᤡᤱᤘᤠᤴ ᤏᤢ ᤕᤶᤒᤠ ᤁᤢᤗᤧᤱᤛᤡᤱᤔᤠᤴ ᤀᤧ᤺ᤳᤗᤧ᤹ ᤀᤧ᤺ᤳᤗᤧ᤹ ᤁᤢᤗ᤹ᤔᤠᤴ ᤀᤠᤏᤡᤃᤣ ᤏᤡᤛᤢᤶᤒᤧᤖᤥ॥” 30 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤸᤗᤧ ᤁᤢᤛᤠᤰᤛᤠᤰ ᤗ᤹ᤔᤧᤴ ᤀᤠᤱᤃᤠ᤹ ᤏᤡᤛᤢᤱᤗᤥ. ᤁᤖ ᤂᤧᤸᤗᤧ ᤁᤢᤜᤧᤴᤇᤡᤱᤔᤠᤱᤃ ᤂᤢᤏᤧ᤹ ᤆᤥᤃᤢᤒᤠ ᤌᤣᤏᤠᤎᤣᤒᤠ ᤁᤢᤕᤠ᤺ᤶᤒᤰᤜᤠ᤹ ᤜᤧᤰᤋᤱᤒᤠ ᤆᤥᤰᤗᤥ॥ 31 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤔᤥᤀᤠᤒᤖᤧ ᤁᤢᤗᤠᤃᤡ ᤔᤧᤖᤡᤱ ᤌᤰᤁᤠᤖᤥ ᤀᤥᤘᤠ. ᤔᤥᤀᤠᤒᤖᤧ ᤁᤢᤗᤠᤃᤡ ᤜᤠ᤺ᤵᤐᤠᤖᤥ॥ ᤁᤡᤖ-ᤜᤖᤣᤛᤣᤋᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤠᤱᤃᤠ᤹ ᤀᤠᤕᤥᤶ ᤐᤢ᤹ᤖᤧᤀᤠᤱ ᤘᤠ᤹ᤖᤥ॥ 32 “ᤛᤡᤒ᤻ᤔᤠᤒᤠ ᤔᤏᤠᤛᤣ. ᤆᤧᤰᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤈᤥᤃᤡᤖᤥ. ᤕᤠᤈᤣᤖᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤜᤠᤒᤠᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤜᤠ᤺ᤵᤐᤠᤖᤥ॥ ᤂᤡᤏᤡ᤹ ᤆᤧᤸᤗᤧᤰᤛᤣᤸᤗᤧ ᤁᤢᤍᤠᤵᤐᤠᤜᤠ᤹ ᤌᤡᤰᤗᤧᤱ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱ ᤌᤠᤖᤡᤰ ᤔᤠ᤺ᤱᤄᤠ ᤁᤧᤖᤧᤖᤥ. ᤁᤖ ᤁᤧᤔᤧᤱᤒᤠᤜᤠ᤹ᤖᤧ ᤂᤡᤏᤡ᤹ ᤔᤢᤖᤧᤰ ᤂᤠᤖᤧᤰ ᤁᤧᤶᤈᤥᤃᤡᤖᤥ᥄ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤆᤧᤸᤗᤧᤰᤛᤣ᤹ᤜᤠ᤹ ᤏᤢ ᤜᤠᤱᤘᤠᤔᤥ ᤁᤧᤎᤥ᤺ᤰᤐᤠ ᤛᤡᤱᤛᤣ᤹ᤜᤠ᤹ ᤔᤧᤍᤢᤒᤢᤀᤠᤱ ᤏᤧᤖᤥ॥ 33 ᤔᤥᤀᤠᤒᤒᤠ ᤆᤠᤃᤧᤏᤢ᤹ᤒᤠᤍᤧᤴᤜᤠ᤹ᤗᤠᤶ ᤛ᤺ᤵᤔᤠ ᤏᤢ ᤕᤧᤕᤧ ᤗ᤹ᤔᤧᤴ ᤔᤕᤧᤖᤥ॥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤜᤠ᤹ᤗᤠᤶ ᤁᤢᤘᤠ ᤔᤧᤗ᤺ᤴᤏᤧᤴᤗᤥ॥ ᤜᤠ᤺ᤳᤗᤧᤀᤠᤱ ᤂᤧᤴ ᤀ᤺ᤰᤗ ᤛ᤺ᤳᤗ ᤔᤧᤗᤠ᤺ᤰᤋᤢᤴᤗᤥ ᤀᤥᤘᤠ. ᤂᤧᤵᤔᤥ ᤁᤧᤀ᤺ᤰᤐᤠ ᤀᤡᤰᤗᤠ ᤘᤠ᤹ᤖᤥ. ᤁᤖ ᤛ᤺ᤵᤔᤠ ᤀᤡᤰᤗᤠᤃ ᤔᤣ᤺ᤴᤗᤥ॥ 34 “ᤂᤧᤴᤏᤢ᤺ᤸᤗᤧᤃ. ᤂᤧᤱᤜᤠ᤹ ᤔᤧᤃᤡ ᤔᤧᤕᤱᤒᤠ ᤜᤠ᤺ᤵᤔᤧᤴ ᤜᤣᤛ᤻ᤒᤥᤏᤗᤠᤶ ᤀᤣᤗᤠᤗ ᤏᤢ ᤀᤜᤠᤈ ᤌᤠᤖᤡᤰ. ᤛᤥᤀᤖᤗᤠᤶ ᤁᤧᤖᤧᤰ ᤜᤣᤖᤥᤏᤤᤔ ᤜᤧᤰᤁᤩᤠᤱ ᤀᤣᤃ᤻ᤗᤋ-ᤛᤗᤡᤛᤡᤕᤠ ᤌᤠᤖᤡᤰᤁᤣ ᤏᤢᤖᤡᤰᤁᤠᤱ ᤂᤧᤶᤍᤧᤳ॥ ᤀᤠᤸᤗᤥ ᤏᤡᤔᤪᤡᤔᤒᤠ ᤆᤫᤠ᤺ᤳᤜᤠ᤹ᤀᤠᤱ ᤆᤒᤧᤀᤠᤱ ᤏᤧᤖᤥ॥” 35 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤔᤥᤀᤠᤒᤧᤴ ᤂᤠᤵᤐᤢᤌᤩ᤺ᤱ ᤐᤥᤱᤗ ᤆᤥᤃᤢᤱ᤹. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤛᤠᤶᤔᤠᤱ ᤕᤢᤰᤏᤠᤍᤧᤴᤜᤠ᤹ᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤔᤠᤱᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢ᤹॥ 36 ᤔᤥᤀᤠᤒᤖᤧ ᤁᤢᤗᤠᤃᤡ ᤏᤢ ᤁᤡᤖ-ᤜᤖᤣᤛᤣᤋᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤧᤴ ᤔᤢᤑᤪᤠᤔᤠ ᤜᤧᤰᤁᤣ ᤔᤧᤖᤡᤱ ᤌᤰ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤃᤧᤀᤠᤱ ᤘᤠ᤹॥ 37 ᤔᤏᤠᤜᤠ᤹ ᤔᤧᤖᤡᤱ ᤔᤧᤎᤰᤁᤠᤱ ᤂᤢᤴᤇᤡ᤹ ᤌᤧᤃᤣᤰᤐᤠᤜᤠ᤹ ᤏᤢ ᤔᤢᤎᤥ᤹ᤜᤠ᤹ ᤔᤧᤏ᤺ᤰᤂᤢᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤴ ᤔᤧᤈᤧᤖᤢ ᤜᤧᤰᤁᤩᤠᤱ ᤛᤃᤡᤋᤣᤳ ᤋᤔᤏᤠᤒᤠ ᤆᤠᤱᤜᤠ᤹ ᤔᤧᤈᤠᤰᤂᤢᤀᤠᤱ ᤔᤧᤘᤠ᤹॥ 38 ᤔᤥᤀᤠᤒᤒᤠ ᤁᤧᤖᤧᤰ ᤜᤡᤶᤜᤠ᤹ᤀᤥ ᤏᤢ ᤁᤧᤖᤧᤰ ᤗᤠᤶᤜᤠ᤹ᤀᤥᤀᤠᤱ ᤜᤠ᤺ᤶᤗᤠᤰᤘᤠ ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤥᤀᤠᤒᤧᤴ ᤆᤠᤜᤠ ᤔᤧᤴᤈᤥ᤺ᤰᤔᤏᤠᤒᤠ ᤑᤢᤈᤡᤰ ᤁᤢᤀᤡᤛᤡᤰ ᤑᤕ᤹ ᤕ᤺ᤵᤛᤢᤱᤅᤠᤱ ᤏᤧᤖᤥ॥ 39 ᤀᤠᤰᤂᤣᤗ᤹ᤖᤡᤰ ᤁᤴ ᤁᤢᤶᤈᤡᤰᤔᤠ ᤐᤥ᤺ᤰᤂᤧ᥄ ᤔᤧᤖᤡᤱᤅᤡᤴ ᤂᤧᤵᤛᤧᤶᤔᤧ᤹᥄ ᤔᤥᤀᤠᤒᤧᤴ ᤛᤡᤖᤡᤱᤔᤔᤥ ᤌᤩᤧᤒᤠᤴ ᤀᤥᤔᤧᤳᤋᤧᤶᤔᤧ᤹᥄ ᤁᤢᤒᤣᤛᤠᤱᤒᤠ ᤁᤧᤖᤧᤰᤗᤧ ᤗᤠᤃᤡ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤁᤢᤒᤡ ᤏᤢ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥” 40 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤥᤔᤧᤳᤋᤧ᤹᥄ ᤔᤢᤕᤠᤴ ᤁᤢᤀᤡᤛᤡᤰ ᤁᤢᤏᤡᤱᤔᤡ᤺ᤸᤗᤧ ᤑᤳᤋᤢᤖᤥ. ᤔᤥᤀᤠᤒᤖᤧ ᤁᤢᤛᤶᤎᤠᤱ ᤁᤢᤗᤠᤵᤐᤡᤴ ᤜᤵᤑᤧ ᤑᤧᤛᤢᤖᤥ॥ 41 ᤁᤸᤗᤧ ᤁᤢᤕᤧᤰᤕᤰᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤜᤠᤱᤕᤰᤜᤠ᤹ ᤏᤡᤱᤔᤡ ᤜᤢᤰᤁᤥ ᤌᤠᤖᤥ॥ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ᤀᤠᤱ ᤛᤠᤶᤔᤡᤰᤗᤧ ᤗᤧᤖᤢᤛᤡᤖᤥ॥ 42 ᤔᤥᤀᤠᤒᤧᤴ ᤕᤠᤶᤔᤥ ᤛᤢᤘᤠᤱ ᤔᤧᤒᤥᤱᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤜᤘᤣ ᤍᤠᤱᤒᤠᤴᤏᤢ ᤀᤠᤱᤍᤡᤱ ᤗ᤹ᤖᤧᤖᤥ॥ 43 “ᤔᤥᤀᤠᤒᤣ. ᤁᤡᤔᤠ ᤕᤱᤔᤠ ᤏᤢ ᤀᤡᤍᤠ᤺ᤰᤜᤠ᤹ ᤜᤧᤰᤁᤩᤠᤱ ᤆᤧᤴᤜᤠ᤹ ᤂᤧᤏᤧ᤹ ᤁᤧᤗᤰᤁᤥ ᤌᤠᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 44 “ᤁᤡᤔᤠ ᤕᤱᤔᤠᤀᤥ ᤀᤠᤳᤋᤡᤴᤜᤠ᤹ ᤔᤧᤄᤧᤳᤇᤡᤱ᤹ ᤂᤧᤱᤜᤠ᤹ ᤆᤧᤴᤏᤥ ᤔᤧᤎᤠᤖᤥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤆᤧᤴᤏᤥᤗᤠᤶ ᤔᤧᤓᤡ᤺ᤴᤇᤡᤱ᤹ ᤂᤧᤱᤜᤠ᤹ ᤀᤡᤛᤪᤢᤵᤐᤠ ᤀᤡᤈᤥᤀᤥ ᤔᤧᤎᤠᤖᤥ॥ ᤂᤡᤏᤡ᤹ ᤐᤣ᤺ᤰᤔᤠ ᤁᤧᤱᤄᤥᤛᤡᤴᤒᤠᤴ ᤀᤠᤱᤃᤠ᤹ ᤀᤥᤔᤧᤳᤋᤢᤱᤗᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤂᤠᤛᤧᤴ ᤆᤥ᤺ᤰᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 45 “ᤔᤏᤠᤜᤠ᤹ ᤜᤣᤛ᤻ᤒᤥᤏ ᤌᤠᤖᤡᤰᤁᤣ ᤔᤧᤄᤧᤳᤇᤡᤱᤗᤥ ᤁᤖ ᤋᤃᤡ ᤐᤣ᤺ᤰᤔᤠ ᤔᤧᤴᤇᤢᤰᤏᤧᤸᤗᤥ॥ ᤌᤣᤀᤠᤱᤓᤧᤸᤗᤧ ᤛᤡᤜᤥᤏ ᤜᤠᤱᤅᤡᤸᤗᤧ ᤀᤢ᤺ᤴᤇᤥ᤺ᤴᤒᤠ ᤁᤢᤜᤡᤶ ᤜᤣᤛ᤻ᤒᤠᤏᤗᤠᤶ ᤐᤡᤑᤩᤢᤱᤒᤠ ᤔᤏᤠᤜᤠ᤹ ᤏᤢ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤡᤎᤢᤱ ᤔᤡᤖᤠ᤺ᤰ ᤐᤥ᤺ᤰᤗᤥ॥ 46 “ᤆᤡ᤺ᤳᤋᤧᤛᤩᤧᤖᤥ. ᤔᤥᤀᤠᤒᤣ. ᤂᤧᤱᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤔᤧᤜᤠ᤺ᤵᤗᤥ᥄ ᤁᤔᤥᤛ ᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤧᤔᤧᤃᤧᤀᤠᤱ ᤘᤠ᤹ᤖᤥ᥄ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹ ᤔᤠ᤺ᤱᤄᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤠ᤹ᤖᤥ॥ 47 ᤁᤖ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤀᤠᤱᤃᤠ᤹ ᤔᤥᤀᤠᤒᤖᤧ ᤁᤢᤏᤢ᤹ᤔᤠ ᤁᤢᤍᤠᤔᤠᤜᤠ᤹ ᤕᤠᤶᤔᤥ ᤏᤢ᤺ᤰᤋᤢᤱ ᤐᤡᤖᤢᤱᤗᤥ॥ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄” ᤔᤥᤀᤠᤒᤖᤧ ᤁᤢᤕᤠ᤺ᤶᤒᤣᤀᤥ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤏᤢᤵᤔᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤜᤠᤒᤠ ᤁᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.