ᤕᤷᤔᤡᤕᤠ 47 - LIFOTNT

ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱ

¹ ᤔᤡᤛᤪᤒᤠ ᤌᤰᤛᤢᤒᤠᤜᤠ᤹ᤖᤧ ᤃᤠᤈᤠᤴ ᤜᤢᤰᤁᤠᤵ ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡ ᤃᤠᤈᤠᤒᤠ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤔᤧᤳᤋᤢᤒᤠ ᤀᤡᤱᤄᤱᤅᤡᤴ ᤀᤠᤶᤓᤠ ᤁᤴᤗᤥ॥

² ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤗᤠᤈᤣᤴ ᤆᤫᤠ᤺ᤳᤋᤡᤸᤗᤧ ᤛᤎᤧᤰ ᤋᤡᤶᤔᤠᤖᤧ ᤗᤠᤃᤡ ᤌᤠᤱᤃᤧᤳ ᤗᤠᤶᤒᤠᤏᤢ ᤆᤫᤠ᤺ᤳᤋᤡᤴ ᤁᤢᤱ ᤕᤢᤖ ᤐᤳᤗᤥ॥ ᤂᤧᤸᤗᤧ ᤗᤠᤈᤣᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹. ᤕᤧᤰᤕᤰᤜᤠ᤹ ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤧᤰᤂᤢᤛᤡᤖᤥ॥ ᤔᤏᤠᤜᤠ᤹ ᤔᤧᤃᤡ ᤔᤧᤕᤱᤅᤠᤱ ᤔᤧᤓᤡ᤺ᤰᤗᤥ. ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤖᤡᤱ ᤔᤧᤎᤰᤗᤥ॥

³ ᤂᤧᤵᤛᤧ᤹. ᤀᤴᤗᤠᤱᤒᤢᤰᤜᤠ᤹ ᤌᤢᤖᤢᤵ ᤌᤢᤖᤢᤵ ᤗ᤹ᤖᤥ. ᤜᤧᤰᤁᤩᤠᤱ ᤀᤴᤗᤠᤎᤠᤜᤠ᤹ ᤁᤢᤍᤢᤱᤍᤢᤱ ᤔᤧᤗᤥ᤺ᤰᤁᤡᤸᤗᤧ ᤁᤠᤵᤗᤥ᤺ᤰᤜᤠ᤹ ᤂᤴᤍᤪᤱ ᤂᤴᤍᤪᤱ ᤗᤠᤀᤡᤰᤗᤥ॥ ᤁᤡᤔᤠᤖᤧ ᤛᤠᤶᤔᤡᤰ ᤁᤧᤔᤠᤒᤠ ᤐᤠᤜᤠ᤹ ᤁᤧᤏᤠᤱᤒᤠ ᤜᤧᤰᤁᤣ ᤔᤧᤗᤥ᤺ᤰᤗᤥ. ᤕᤠᤱᤛᤠ᤹ᤖᤢᤛᤡᤒᤠ ᤛᤠᤜᤠ᤹ ᤀᤣᤃᤠᤱ ᤛᤢᤵᤗᤧᤰᤁᤠᤱ ᤀᤥᤔᤧᤶᤔᤧᤳᤋᤢᤛᤡᤴᤗᤥ॥

⁴ “ᤋᤢᤖᤥᤛ ᤏᤢ ᤛᤡᤍᤥᤏ ᤗᤠᤶᤒᤠᤒᤠ ᤌᤰᤛᤢᤒᤠ ᤆᤢᤶᤍᤧᤱᤜᤠ᤹ᤏᤢ ᤛᤥᤛᤥᤖᤡᤰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ॥ ᤀᤥᤘᤠ. ᤕᤜᤘᤣ ᤍᤠᤱᤒᤧᤸᤗᤧ ᤐᤗᤡᤛ᤻ᤋᤡᤜᤠ᤹. ᤁᤪᤣᤋ ᤘᤠᤃᤵᤂᤣ᤺ᤱᤗᤠᤶ ᤁᤧᤍᤠᤒᤠᤀᤠᤱ ᤁᤧᤕᤢᤱᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤔᤧᤱᤔᤠ ᤀᤡ᤺ᤳᤋᤢᤛᤡᤀᤠᤱ ᤘᤠ᤹ᤖᤥ॥

⁵ ᤃᤠᤈᤠᤒᤠ ᤔᤏᤠᤜᤠ᤹ ᤏ᤺ᤶᤏ᤺ᤶᤒᤠ ᤔᤧᤈᤥᤃᤢᤛᤡᤖᤥ. ᤀᤛ᤻ᤁᤗᤥᤏᤧᤴ ᤆᤡᤈᤡ ᤕᤧᤶᤕᤧᤶ ᤐᤥᤱᤗᤥ॥ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣᤰᤐᤠᤴ ᤗᤡᤃᤥ᤹ ᤔᤧᤏ᤺ᤰᤂᤢᤖᤥ. ᤂᤠᤶᤍᤥ᤺ᤰᤗᤢᤶ ᤘᤖ᤺ᤱᤅᤡᤸᤗᤧ ᤁᤢᤕᤠᤗᤠᤶ ᤁᤧᤍᤠᤱᤒᤠᤜᤠ᤹. ᤀᤠᤵᤑᤠᤸᤗᤧ ᤌᤠᤖᤡᤰ ᤁᤧᤜᤠᤒᤡᤀᤠᤱ ᤔᤧᤖᤡᤱ ᤁᤧᤎᤰᤋᤡᤒᤣ᥅

⁶ “ᤂᤡᤏᤡ᤹ ᤁᤧᤒᤠ᤺ᤳᤋᤢᤶ᤹. ‘ᤀᤠᤸᤗ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤠᤓᤣᤀᤣ. ᤂᤧᤏᤧ᤹ ᤀᤠᤵᤑᤠᤸᤗᤧ ᤕᤠᤶᤔᤥ ᤁᤧᤏᤠ᤺ᤶᤛᤡᤱᤒᤣ᥅ ᤂᤧᤏᤧ᤹ ᤀᤠᤒᤠᤅᤣ ᤁᤧᤛᤢ᤺ᤵᤐᤥ ᤏᤢ᤺ᤰᤂᤧ ᤐᤣᤃᤧ᤹ᤀᤥ ᤏᤠ᤺ᤶᤛᤡᤱᤅᤧ᤹ ᤜᤧᤰᤁᤩᤠᤱ ᤛᤫᤠ᤺ᤳ ᤕᤠᤃᤧ᤹ᤀᤥ॥’

⁷ “ᤁᤖ ᤂᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤠ᤺ᤶᤛᤡᤱᤔᤠ ᤛᤢᤰᤋᤢᤒᤣ᥅ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤕᤠ᤺ᤶᤒᤰ ᤐᤡᤖᤢᤱᤅᤠᤱ ᤘᤠ᤹ᤖᤥ. ᤀᤛ᤻ᤁᤗᤥᤏᤧᤴ ᤛ᤹ᤔᤠ ᤏᤢ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤂᤧᤴ ᤀᤡᤱᤈᤠᤱ ᤐᤡᤖᤢᤱᤅᤠᤱ ᤘᤠ᤹ᤖᤥ॥”