ᤕᤷᤔᤡᤕᤠ 46 - LIFOTNTᤁᤷᤁᤔᤡᤛᤀᤥ ᤔᤡᤛᤪᤡᤜᤠ᤹ ᤜᤠᤖᤡᤔᤧᤍᤩᤧ 1 ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤠᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤀᤥ ᤁᤴ ᤁᤢᤀᤡᤱᤄᤱᤜᤠ᤹ ᤁᤧᤖᤧ॥ 2 ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤷᤁᤔᤡᤛᤒᤠ ᤋᤧᤴᤎᤱᤅᤥ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤡᤛᤪᤒᤠ ᤜᤠᤱ ᤑᤠᤖᤥ ᤏᤣᤁᤥᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤏᤠ᤺ᤴᤍᤢᤛᤡᤒᤠ ᤛᤢᤕᤧᤶᤔᤥ ᤕᤜᤢᤍᤠᤒᤠ ᤜᤠᤱ ᤕᤥᤛᤡᤕᤠ᤺ᤸᤗᤧ ᤁᤢᤛ᤻ᤛᤠ ᤕᤜᤥᤕᤠᤁᤡᤔᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤁᤴ ᤀᤡᤱᤄᤱᤅᤡᤴ ᤔᤡᤛᤪ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤖᤧᤀᤠᤱ ᤘᤕᤧᤖᤥ॥ 3 “ᤂᤧᤏᤡ᤹ ᤛᤡᤍᤡ ᤔᤠᤍᤡ ᤂᤥᤜᤠ᤹ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤥ. ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤋᤃᤡ ᤐᤥᤖᤧᤶᤔᤧ᤹ᤀᤥ᥄ 4 ᤀᤴᤜᤠ᤹ᤀᤥ ᤁᤖᤣᤗᤡᤜᤠ᤹ ᤀᤡᤛᤡᤰᤂᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤀᤴᤜᤠ᤹ ᤕᤢᤰᤋᤧᤶᤛᤡᤶᤔᤧ᤹ᤀᤥ᥄ ᤂᤡᤏᤡ᤹ ᤕᤧᤵᤔᤠᤍᤧᤴᤏᤥ ᤕᤧᤒᤧᤶᤔᤧ᤹ᤀᤥ ᤌᤧᤃᤣ᤺ᤰᤁᤥ ᤂᤢ᤺ᤱᤔᤠᤜᤠ᤹ ᤂᤢ᤺ᤰᤂᤧᤶᤔᤧ᤹ᤀᤥ᥄ ᤂᤡᤏᤡ᤹ ᤗᤠ᤺ᤰᤜᤠ᤹ ᤕᤧᤖᤠᤵᤋᤧᤶᤔᤧ᤹ᤀᤥ᥄ ᤜᤧᤰᤁᤩᤠᤱ ᤂᤡᤏᤡ᤹ ᤑᤧᤈᤠᤓᤧᤕᤢᤶᤜᤠ᤹ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤥ॥ 5 ᤁᤖ ᤀᤠᤱᤃᤠ᤹ ᤌᤧᤔᤠ᤺ᤴ ᤏᤡᤛᤢᤱᤒᤣ᥅ ᤔᤡᤛᤪᤒᤠ ᤌᤰᤛᤢᤒᤠᤜᤠ᤹ ᤁᤡᤔᤧᤸᤗᤧ ᤔᤧᤄᤧᤳᤇᤡᤱᤗᤥ॥ ᤂᤧᤸᤗᤧ ᤔᤧᤱᤃᤡᤔᤏᤠᤒᤠ ᤁᤧᤎᤰᤐᤠ ᤁᤢᤔᤏᤠᤜᤠ᤹ ᤀᤣᤃᤠᤱ ᤛᤢᤵᤗᤧᤰᤌᤡᤰᤁᤠᤱ ᤀᤥᤔᤧᤶᤔᤢᤀᤣ ᤔᤧᤄᤧᤳᤇᤡᤱᤗᤥ॥ ᤂᤧᤱᤜᤠ᤹ ᤁᤧᤖᤧᤰ ᤐᤡᤛᤠᤱᤗᤠᤶ ᤐᤃᤡ ᤔᤧᤃᤡ ᤔᤧᤛᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤖᤥ॥ 6 “ᤜᤠᤖᤠ ᤁᤧᤗᤥ᤺ᤰᤐᤠᤜᤠ᤹ ᤂᤧᤳᤇᤡᤱᤔᤠ ᤔᤧᤴᤇᤢᤰᤏᤧᤴᤗᤥ. ᤛᤠ᤹ᤖᤡᤰ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ ᤂᤧᤳᤇᤡᤱᤔᤠ ᤔᤧᤴᤇᤢᤰᤏᤧᤴᤗᤥ. ᤌᤥ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤂᤧᤱᤜᤠ᤹ ᤔᤧᤍᤥ᤺ᤰᤁᤠᤱ ᤗᤧᤖᤧᤶᤓᤧᤏᤠ ᤔᤧᤈᤥᤴᤗᤥ॥ 7 “ᤏᤡᤗ ᤘᤜ᤺ᤱᤅᤡᤴ ᤁᤢᤀᤡᤛᤡᤰ ᤁᤧᤃᤢᤱᤒᤠᤀᤠᤱ ᤁᤧᤒᤥᤒᤠ ᤁᤧᤎᤠᤱᤒᤠ ᤘᤜ᤺ᤱᤜᤠ᤹ᤀᤥᤒᤠ ᤆᤫᤠ᤺ᤳᤋᤡᤴ ᤁᤧᤜᤢ᤺ᤰᤐᤠ ᤁᤧᤎᤠᤱᤒᤠ ᤜᤧᤰᤋᤱᤒᤠᤴ ᤁᤴ ᤜᤠ᤺ᤵᤐᤣ᥅ 8 ᤁᤱᤃ ᤔᤡᤛᤪ ᤗᤠᤈᤣ᤹ᤒᤠ ᤌᤰᤛᤢᤒᤠᤖᤥ ᤁᤧᤖᤧᤰ ᤗᤠᤈᤣᤴ ᤛᤎᤧᤰ ᤁᤧᤎᤡᤶᤒᤠ ᤕᤧᤰᤕᤰᤜᤠ᤹ ᤏᤢ ᤂᤧᤵᤔᤥᤒᤠ ᤔᤏᤠᤜᤠ᤹ ᤁᤧᤔᤧᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤍᤧᤵᤐᤠ ᤘᤍᤵᤔᤠ ᤜᤧᤰᤁᤣ ᤗ᤹ᤖᤥ॥ 9 ᤀᤴᤗᤠᤎᤠ ᤏᤢ ᤀᤴᤇᤣ. ᤗᤥ᤺ᤰᤋᤧᤶᤔᤧ᤹ᤀᤥ. ᤔᤡᤛᤪᤒᤠ ᤔᤢᤰᤛᤠᤶᤒᤠ ᤌᤰᤛᤢᤒᤠᤜᤠ᤹ ᤑᤳᤋᤠᤶᤛᤡᤶᤔᤧ᤹ᤀᤥ᥄ ᤋᤥᤱ ᤏᤢ ᤂᤥ ᤕᤠᤱᤔᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤁᤢᤛ. ᤗᤡᤒᤡᤕᤠ ᤏᤢ ᤗᤢᤍᤒᤠ ᤌᤰᤛᤢᤒᤠ ᤆᤢᤶᤍᤣᤱᤛᤣ ᤋᤩᤧᤶᤔᤧ᤹ᤀᤥ᥄ 10 ᤌᤣᤀᤠᤱᤓᤧᤸᤗᤧ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤗᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤔᤡᤜᤠ᤹ᤖᤧ ᤗᤠᤃᤡ ᤁᤢᤗᤧᤰᤘᤠ ᤏᤢ᤺ᤰᤔᤠ ᤕᤧᤴᤗᤥ॥ ᤋᤠᤓᤣ᤺ᤸᤗᤧ ᤁᤢᤛᤡᤰ ᤔᤧᤴᤈᤡᤶᤔᤣ ᤌᤠᤖᤡᤰ ᤀᤥᤘᤠ. ᤔᤠᤰᤂᤡᤸᤗᤧ ᤔᤧᤶᤔᤀᤣ ᤌᤠᤖᤡᤰ. ᤋᤠᤓᤣ᤺ᤸᤗᤧ ᤂᤸᤗᤧ᤺ᤱ ᤗᤧ᤺ᤰᤂᤢᤛᤡᤖᤥ᥄ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤌᤠᤱᤃᤧᤳ ᤐᤡᤛᤠᤱᤒᤠ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤀᤡᤴ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤕᤠᤖᤡᤵ ᤆᤥᤃᤢᤖ ᤕᤠᤰᤗᤥ॥ 11 “ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤔᤡᤛᤪ ᤗᤠᤈᤣ᤹ᤀᤣ. ᤃᤡᤗᤠᤍᤀᤥ ᤌᤥ ᤛᤡᤍᤠ᤹ ᤕᤢ᤺ᤳᤇᤧ ᤐᤣᤃᤧ᤹ᤀᤥ. ᤁᤖ ᤂᤧᤏᤧ᤹ ᤕᤖᤡᤰ ᤛᤡᤍᤠ᤹ᤐᤠᤱᤍᤠ᤹ ᤁᤧᤔᤧᤳᤇᤡᤱᤛᤠᤱ ᤂᤧᤸᤗᤧ ᤂᤧᤏᤧ᤹ ᤁᤧᤴᤘᤣ᤺ᤳᤏᤧᤴᤗᤥ॥ 12 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤏᤧ᤹ ᤁᤧᤏᤠᤎᤠᤔᤠᤴ ᤔᤧᤄᤧᤵᤛᤢᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤁᤧᤕᤱᤔᤠ ᤁᤧᤵᤔᤠ ᤜᤠ᤺ᤵᤔᤠ ᤑᤡ᤺ᤰᤔᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤡᤶᤛᤢᤖᤥ॥ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤁᤧᤎᤰᤛᤢᤒᤠᤜᤠ᤹ ᤌᤡᤰᤏᤢ ᤌᤡᤰ ᤔᤧᤗᤥ᤺ᤰᤗᤥ ᤂᤧᤶᤒᤩᤠᤱ ᤂᤧᤱᤜᤠ᤹ ᤛᤥᤛᤥᤖᤡᤰ ᤔᤧᤈᤥᤴᤗᤥ॥” 13 ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤔᤡᤛᤪ ᤗᤠᤈᤣᤴ ᤑᤵᤔᤠᤖᤧ ᤗᤠᤃᤡ ᤏᤡᤱᤛᤣᤰ ᤆᤥᤃᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤴᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤥᤀᤥ ᤁᤴ ᤀᤡᤱᤄᤱᤅᤡᤴ ᤁᤧᤖᤧᤖᤥ॥ 14 “ᤔᤡᤛᤪ ᤗᤠᤈᤣ᤹ᤀᤥ ᤂᤧᤏᤧ᤹ ᤀ᤺ᤰᤋᤧ᤹ᤀᤥ᥄ ᤔᤡᤃ᤻ᤍᤥᤗ. ᤔᤣᤶᤑᤡᤛ ᤏᤢ ᤋᤜᤐᤴᤜᤣᤛ ᤕᤧᤰᤕᤰᤜᤠ᤹ᤀᤥ ᤂᤧᤏᤧ᤹ ᤀᤰᤂᤣ ᤔᤧᤳᤋᤧᤛᤧ᤹ᤀᤥ᥄ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤧᤶᤔᤠᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤠᤓᤣ᤺ᤸᤗᤧ ᤂᤡᤷᤗᤡ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤗᤧ᤺ᤰᤂᤢᤛᤡᤖᤥ॥ 15 ᤂᤡᤏᤡ᤹ ᤌᤰᤛᤢᤒᤠᤜᤠ᤹ ᤌᤣᤀᤠᤱ ᤔᤧᤈᤥ᤺ᤴᤍᤧᤒᤣ᥅ ᤂᤧᤱᤜᤠ᤹ ᤋᤰᤐᤧᤳ ᤕᤧᤵᤔᤠ ᤔᤧᤴᤇᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤜᤡᤵᤋᤢᤱ ᤛᤥ᤺ᤴᤍᤢᤱᤛᤡᤱᤗᤥ॥ 16 ᤂᤧᤱᤜᤠ᤹ ᤔᤧᤍᤥ᤺ᤰᤁᤠᤱ ᤁᤢᤛᤧᤳ ᤁᤢᤛᤧᤳ ᤔᤧᤈᤥᤴᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱᤗᤥ. ‘ᤋᤩᤧᤶᤔᤧ᤹. ᤀᤠᤏᤡ᤹ ᤛᤠᤀᤠᤘᤠ᤺ᤴᤇᤡᤱᤒᤠ ᤗᤠᤈᤣ᤹ᤀᤥ ᤀᤠᤏᤡ᤹ ᤔᤏᤠᤜᤠ᤹ᤀᤥ ᤏᤢ᤺ᤰᤂᤡ ᤐᤣᤃᤡᤖᤥ॥ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣᤗᤠᤶ ᤀᤠᤏᤡ᤹ ᤂᤧᤳᤋᤠᤛᤡᤖᤥ᥄’ 17 ᤂᤧᤵᤔᤥ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. ‘ᤔᤡᤛᤪᤒᤠ ᤑᤠᤖᤥ ᤜᤠᤱᤅᤡᤱᤃ ᤁᤢᤶᤒᤪᤠ ᤁᤧᤀᤡ᤺ᤵᤐᤠᤖᤥ ᤂᤧᤸᤗᤧ ᤁᤢᤛᤢᤕᤧᤶᤔᤡᤴ ᤔᤧᤄᤥᤛᤢᤴᤗᤥ॥’” 18 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤔᤡᤱ ᤁᤧᤘᤠ᤺ᤵᤐᤠ ᤜᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤜᤧᤰᤁᤣ ᤁᤥ᤺ᤰᤔᤠᤜᤠ᤹ᤀᤥ ᤋᤒᤥᤖ ᤜᤧᤰᤋᤱᤒᤠ ᤌᤡᤰ ᤕᤢᤖᤥ. ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤁᤷᤔᤣᤗ ᤌᤧᤃᤢᤴ ᤜᤧᤰᤁᤣ ᤋᤠᤖᤥ᥄ 19 ᤂᤡᤏᤡ᤹ ᤔᤡᤛᤪᤒᤠ ᤕᤰᤕᤢᤱᤒᤠᤖᤣ. ᤂᤡᤏᤡ᤹ ᤛᤢᤰᤘᤠᤜᤠ᤹ ᤁᤰᤆᤥᤃᤧᤶᤔᤧ᤹ᤀᤥ᥄ ᤋᤧᤶᤔᤠ ᤋᤣ᤹ᤔᤠ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤗᤳᤇᤠ ᤔᤏᤠᤀᤠᤱ ᤔᤧᤴᤕᤢᤱᤅᤣ. ᤔᤣᤶᤑᤡᤛᤒᤠ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥ 20 ᤔᤡᤛᤪ᤺ᤴ ᤘᤖᤧᤱᤗᤧᤱᤔᤠ ᤏᤢᤔᤠ ᤐᤡᤵᤔᤠ ᤜᤧᤰᤁᤣ ᤗ᤹ᤖᤥ. ᤁᤖ ᤌᤠᤱᤃᤧᤳᤗᤠᤶ ᤂᤡ᤺ᤴᤍᤫᤠᤎᤡᤰ ᤕᤢᤖ ᤐᤳᤗᤥ॥ 21 ᤔᤡᤛᤪ ᤗᤠᤈᤣ᤺ᤸᤗᤧ ᤏᤠᤶᤕᤠᤰ ᤐᤡᤖᤢᤛᤡᤒᤠ ᤁᤢᤎᤰᤛᤢᤒᤠᤜᤠ᤹ ᤆᤠᤵᤔᤧ᤹ ᤁᤧᤔᤧ᤹ᤒᤠ ᤐᤡᤳᤛᤠᤳᤜᤠ᤹ ᤜᤧᤰᤁᤣ ᤔᤧᤗ᤹ᤖᤥ॥ ᤂᤧᤱᤜᤠ᤹ᤀᤠᤱ ᤜᤡᤸᤗᤡᤰ ᤔᤧᤏᤢ᤺ᤱᤅᤠᤱ ᤔᤧᤗᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤔᤡᤛᤪ ᤗᤠᤈᤣ᤺ᤸᤗᤧ ᤗᤠᤃᤡ ᤐᤕᤶ ᤕᤶᤒᤠ ᤔᤧᤰᤔᤠᤛᤡᤔᤠ ᤕᤧᤴᤗᤥ. ᤛᤠ᤹ᤖᤡᤰ ᤕᤶᤒᤠ ᤂᤢᤶᤍᤡᤱᤗᤧ ᤕᤧᤶᤗᤥ॥ 22 ᤀᤛᤣ᤺ᤰᤁᤡᤴ ᤛ᤺ᤴᤇᤡᤱ ᤐᤣ᤺ᤰᤐᤠ ᤁᤢᤀᤡᤛᤡᤰ ᤔᤡᤛᤪᤡᤜᤠ᤹ ᤛᤫᤠ᤺ᤳᤋᤠᤱ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥ ᤋ᤺ᤴᤍᤡ᤹ ᤁᤧᤍᤣ᤹ᤒᤠᤀᤠᤱ ᤛᤡᤱᤒᤢᤱ ᤁᤧᤀᤠ᤺ᤵᤐᤠᤜᤠ᤹ ᤜᤧᤰᤁᤣ ᤗᤠᤈᤣ᤹ ᤁᤧᤏᤠᤵᤐᤠ ᤌᤰᤛᤢᤒᤠᤜᤠ᤹ ᤔᤧᤗᤠᤳ ᤔᤧᤍᤠᤖᤥ॥” 23 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤛᤡᤱᤜᤠ᤹ ᤗᤧ᤺ᤱᤔᤏᤠᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤔᤧᤗᤧ᤺ᤰᤂᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤏᤡ᤺ᤱᤄᤢᤰᤘᤠᤏᤢ᤺ᤸᤗᤧ ᤕᤖᤡᤰ ᤔᤧᤘᤠ᤹ᤖᤥ॥ 24 ᤔᤡᤛᤪ ᤗᤠᤈᤣᤴ ᤏ᤺ᤶᤏ᤺ᤶᤒᤠ ᤐᤥᤱᤗᤥ. ᤌᤥ ᤏᤢ ᤁᤧᤕᤢᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤖᤥ॥” 25 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤌᤣᤒᤣᤛᤒᤠ ᤀᤠᤔᤥᤏ ᤛᤠᤶᤔᤠᤱᤅᤡᤴ. ᤑᤠᤖᤥᤴ. ᤔᤡᤛᤪ᤺ᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤠᤶᤔᤠᤱᤜᤠ᤹ ᤏᤢ ᤁᤢᤜᤠᤱᤜᤠ᤹. ᤜᤧᤰᤁᤩᤠᤱ ᤑᤠᤖᤥᤴ ᤏᤠᤃᤧᤛᤠ᤹ᤒᤠᤜᤠ᤹ᤀᤠᤱ ᤁᤧᤖᤧᤰ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ 26 ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤛᤧᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ. ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤜᤢᤰᤛᤢᤵᤋᤢᤱᤛᤡᤱ᤹॥ ᤁᤖ ᤂᤧᤴ ᤀᤣᤃᤠᤱ ᤁᤢᤗᤧᤰᤘᤠ ᤌᤱ ᤐᤥᤱᤅᤡᤸᤗᤧ ᤌᤱᤗᤠᤶ ᤗᤠᤈᤣᤴ ᤕᤠᤶᤔᤥ ᤏᤢ᤺ᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” 27 “ᤁᤖ ᤀᤠᤛᤧᤘᤠᤖᤥᤒᤠ. ᤕᤠᤁᤢᤒᤣ. ᤔᤧᤃᤡᤛᤧᤴᤏᤧ᤹ᤀᤥ. ᤀᤡᤛᤪᤠᤀᤡᤗᤀᤣ. ᤏᤡᤱᤛᤠᤱᤅᤥ ᤔᤧᤎᤩᤧᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤀᤠᤱᤃᤠ᤹ ᤕᤠᤶᤔᤥ ᤜᤡᤶᤔᤥ ᤋᤠ᤺ᤳᤏᤧᤖᤥ. ᤜᤧᤰᤁᤩᤠᤱ ᤁᤧᤛ᤻ᤛᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤕᤠᤶᤔᤥ ᤔᤧᤏᤢ᤺ᤱᤗᤥ॥ ᤀᤡᤛᤪᤠᤀᤡᤗᤧᤴ ᤛᤏᤠᤖᤢᤱ ᤏᤢ ᤏᤢ᤹ᤔᤠ ᤋᤠᤔᤠᤀᤥ ᤏᤢ᤺ᤱᤗᤥ. ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤳᤋᤡᤸᤗᤧᤀᤠᤱ ᤕᤱᤔᤠ ᤔᤧᤛᤧᤖᤢᤛᤡᤴᤗᤥ॥” 28 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤛᤧᤘᤠᤖᤥᤒᤠ ᤕᤠᤁᤢᤒᤣ. ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤗ᤺ᤳᤏᤧᤍᤣᤏᤧᤀᤠᤱ ᤁᤧᤘᤠ᤹ᤒᤠ ᤛᤢᤘᤠᤱᤜᤠ᤹ ᤀᤠᤱᤃᤠ᤹ ᤑᤢᤳᤗᤢᤶ ᤌᤩ᤺ᤱ ᤋᤣᤛᤢᤱᤛᤡᤱᤗᤥ. ᤁᤖ ᤂᤧᤏᤧ᤹ᤃ ᤑᤢᤳᤗᤢᤶ ᤌᤩ᤺ᤱ ᤔᤧᤍᤣᤏᤧᤴᤗᤥ॥ ᤀᤠᤱᤃᤠ᤹ ᤂᤧᤏᤧ᤹ ᤜᤧᤴᤌᤡᤶ ᤕᤠᤰᤏᤧᤖᤥ. ᤁᤖ ᤁᤧᤗᤠ᤹ᤒᤠ ᤜᤧᤴᤌᤡᤶ ᤕᤠᤰᤏᤧᤖᤥ. ᤂᤧᤏᤧ᤹ ᤂᤢᤶᤍᤡᤱ ᤔᤧᤶᤒᤡᤀᤣ ᤔᤧᤗᤧᤳᤏᤧᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.