ᤕᤷᤔᤡᤕᤠ 44 - LIFOTNTᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤜᤠ᤹ᤖᤧ ᤗᤠᤃᤡ ᤂᤠᤛᤧᤴ 1 ᤔᤡᤛᤪ ᤗᤠᤈᤣ᤹ ᤌᤥᤜᤠᤱ ᤗᤧᤵᤔᤠᤱᤒᤠ ᤕᤧᤰᤕᤰ ᤔᤡᤃ᤻ᤍᤥᤗ. ᤋᤜᤐᤏᤣᤛ ᤏᤢ ᤔᤣᤶᤑᤡᤛᤒᤠ ᤕᤧᤰᤕᤰᤜᤠ᤹ᤀᤥ ᤜᤧᤰᤁᤩᤠᤱ ᤗᤠᤱᤃᤧᤳ ᤐᤡᤛᤠᤱ ᤁᤧᤕᤢᤱᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤷᤔᤡᤕᤠᤀᤥ ᤁᤧᤖᤧᤒᤠ ᤀᤡᤱᤄᤱᤅᤡᤴ ᤜᤠᤒᤠ ᤁᤴᤗᤥ— 2 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤕᤖᤢᤛᤗᤧᤔ ᤏᤢ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤀᤠᤱᤃᤠ᤹ ᤋᤠᤖᤢᤱᤒᤠ ᤔᤧᤰᤔᤠᤛᤡᤔᤧᤴ ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤡᤰᤁᤡᤸᤗᤧ ᤁᤧᤏᤡᤛᤢ॥ ᤀᤠᤸᤗᤥ ᤂᤧᤴ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤏᤢ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 3 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥ᤺ᤰᤂᤢ॥ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤛᤡᤴᤒᤠ ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤀᤠᤱ ᤀᤠᤓᤧᤸᤗᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤛᤡᤴᤒᤠ ᤘᤣ᤹ ᤔᤠᤱ ᤛᤠᤶᤔᤠᤱᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤛᤧᤘᤠ ᤔᤧᤔᤧᤳᤋᤢᤛᤡ॥ 4 “ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤕᤧᤳᤗᤧᤱ ᤕᤧᤳᤗᤧᤱ ᤂᤢᤴᤇᤡ᤹ ᤗᤠᤃᤡ ᤀᤰᤂᤣ ᤔᤧᤳᤋᤢᤱᤛᤡᤱᤅᤠᤱ ᤐᤠᤱᤄᤢᤱᤛᤡᤱ. ‘ᤀᤠᤱᤃᤠ᤹ ᤆᤠ᤹ᤖᤡᤰ ᤆᤡ᤺ᤳᤋᤢᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤈᤥᤃᤧᤶᤔᤡᤴᤏᤧ᤹॥’ 5 ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤀᤠᤒᤠ᤺ᤴᤏᤡᤴ ᤔᤧᤱᤄᤧᤵᤛᤢᤴ. ᤀᤡᤃᤪ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤥᤗᤠᤶ ᤔᤧᤴᤏᤢ᤺ᤰᤂᤧᤴ॥ ᤂᤧᤱᤜᤠ᤹ᤖᤧ ᤁᤴ ᤔᤠᤱ ᤛᤠᤶᤔᤠᤱᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤛᤢᤰᤐᤠ ᤔᤧᤜᤠ᤺ᤴᤍᤢ॥ 6 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤕᤠ᤺ᤰᤗᤧ᤹ᤔᤠᤴ ᤔᤡ ᤜᤧᤰᤁᤣ ᤔᤡᤎᤢᤱ ᤔᤡᤖᤠ᤺ᤰ ᤐᤥᤃᤧ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤏᤢ ᤕᤖᤢᤛᤗᤧᤔᤒᤠ ᤗᤠᤶᤜᤠ᤹ᤀᤥ ᤌᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤀᤡᤴ ᤌᤠᤖᤡᤰᤛᤠᤱ ᤆᤡᤈᤡ ᤂᤰᤂᤰ ᤔᤢᤖᤧᤰ ᤂᤠᤖᤧᤰ ᤏᤧᤖᤥ॥ 7 “ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤔᤧᤳᤋᤡ᤹—ᤂᤡᤏᤡ᤹ ᤀᤠᤵᤑᤣᤰ ᤌᤣᤀᤠᤱ ᤁᤧᤔᤧᤱᤅᤠᤛᤡᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤕᤧᤶᤒᤡᤳᤇᤠᤜᤠ᤹. ᤔᤧᤴᤇᤢᤔᤠᤜᤠ᤹. ᤀᤡᤃᤪ ᤕᤜᤢᤍᤠᤗᤠᤶ ᤁᤧᤕᤢᤒᤠ ᤜᤡᤴᤈᤠ᤹ᤒᤡᤳᤇᤠ᤹. ᤁᤡᤃᤪ ᤂᤡᤏᤡ᤹ ᤗᤠᤵᤑᤡ᤺ᤵᤔᤠᤜᤠ᤹ᤀᤥᤒᤠ ᤀᤅᤧ᤺ᤰᤘᤠᤜᤠ᤹ ᤀᤠᤳᤋᤡᤴᤜᤠ᤹ᤀᤠᤱ ᤁᤧᤴᤜᤡᤅᤡᤴ᤹॥ 8 ᤁᤴ ᤔᤡᤛᤪ ᤗᤠᤈᤣ᤹ᤀᤥ ᤂᤡᤏᤡ᤹ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤛᤡᤶᤒᤠ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤛᤢᤰᤐᤠ ᤁᤧᤜᤠ᤺ᤴᤍᤢᤶᤔᤠᤱ ᤌᤣᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢᤶᤒᤠᤒᤣ᥅ ᤂᤡᤏᤡ᤹ ᤀᤠᤒᤠᤅᤣᤖᤰ ᤁᤧᤔᤧᤱᤅᤠᤛᤡ᤹ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤛᤠᤰᤔᤢᤖᤠ ᤔᤠᤱᤍᤣ ᤏᤢ ᤁᤡᤏᤠ᤺ᤴᤍᤡ ᤆᤠᤜᤠᤰ ᤁᤧᤈᤥ᤺ᤰᤁᤠᤛᤡ᤹॥ 9 ᤌᤣ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹. ᤕᤜᤢᤍᤠᤒᤠ ᤜᤠᤱᤜᤠ᤹ ᤏᤢ ᤜᤠᤱᤔᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤣ᤺ᤳᤜᤠ᤹ᤖᤧ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤈᤥᤃᤢᤶᤒᤠ ᤗᤠᤕᤥᤜᤠ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅ 10 ᤀᤠᤸᤗᤥ ᤁᤴ ᤕᤧᤶᤔᤥᤀᤠᤱ ᤏ᤺ᤶᤏ᤺ᤶ ᤔᤧᤸᤗ᤹ᤀᤣ ᤁᤧᤘᤕᤡ᤹ ᤀᤡᤃᤪ ᤔᤡᤱᤛᤥ ᤀᤡᤱᤎᤠᤱ ᤀᤥᤛᤣ᤺ᤴᤎᤠᤱ ᤔᤧᤴᤈᤥ᤺ᤰᤁᤣ ᤁᤧᤘᤕᤡ᤹॥ ᤀᤠᤱᤃᤠ᤹ ᤂᤡᤏᤡ᤹ ᤋᤃᤡ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤐᤠᤴ ᤏᤢ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤶᤒᤡᤀᤣ ᤘᤠ᤹॥ 11 “ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤂᤡᤏᤡ᤹ ᤁᤧᤖᤧᤰ ᤔᤧᤱᤔᤠᤏᤡᤱ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹॥ 12 ᤔᤡᤛᤪᤀᤥ ᤐᤣ᤺ᤰᤔᤠᤀᤠᤱ ᤕᤢᤱᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤁᤧᤈᤥ᤺ᤰᤐᤠ ᤂᤧᤴ ᤕᤜᤢᤍᤠᤀᤥ ᤐᤰᤔᤧᤎᤩᤧ ᤔᤧᤕᤠ᤺ᤰᤋᤧᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤋᤣ᤹ᤖᤢᤱᤛᤡᤱᤅᤠᤱ ᤕᤢᤔᤪᤧᤰ ᤔᤧᤰᤂᤢᤱᤛᤡᤱ᤹॥ ᤁᤴ ᤔᤡᤛᤪ ᤗᤠᤈᤣ᤹ᤀᤥ ᤁᤧᤎᤠᤒᤠᤜᤠ᤹ ᤁᤧᤖᤧᤰ ᤛᤠᤰᤘᤠᤴ ᤏᤢ ᤌᤱᤅᤥ ᤔᤧᤛᤡᤖᤥ॥ ᤂᤧᤱᤜᤠ᤹ ᤆᤢᤰᤐᤠᤀᤠᤱᤎᤥ ᤕᤶᤒᤠ ᤌᤠᤖᤡᤰᤐᤠ ᤁᤧᤖᤧᤰ ᤔᤧᤛᤡᤖᤥ॥ ᤂᤧᤱᤜᤠ᤹ ᤀᤠᤵᤋᤡᤰᤛᤠᤒᤠ. ᤁᤡᤵᤔᤠᤃᤧᤄᤢᤒᤠ. ᤔᤠᤱᤍᤣ ᤛᤠᤱᤃᤪᤠ ᤏᤢ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡᤒᤠ ᤔᤧᤒᤥᤱ᤹॥ 13 ᤀᤠᤱᤃᤠ᤹ ᤂᤧᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤋᤧᤴᤎᤱ. ᤛᤠᤰᤘᤠᤴ ᤏᤢ ᤋᤢᤰᤔᤠ ᤗᤠ᤺ᤰᤔᤠ ᤔᤡᤱᤍᤣᤸᤗᤧ ᤂᤢᤶᤍᤡᤱ ᤐᤡᤖᤢᤱᤅᤠᤱ ᤘᤕᤠᤱᤒᤠ ᤜᤧᤰᤁᤣᤀᤣ ᤔᤡᤛᤪ ᤗᤠᤈᤣ᤹ᤀᤥ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ 14 ᤁᤢᤓᤠ ᤕᤧᤶ ᤀᤣᤃᤠᤱ ᤕᤜᤢᤍᤠᤀᤥ ᤏᤢ᤺ᤱᤔᤠ ᤌᤠᤱᤔᤠ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ ᤂᤧᤴ ᤐᤰᤔᤧᤎᤩᤧ ᤔᤧᤕᤠ᤺ᤰᤋᤧᤒᤠ ᤔᤡᤛᤪ ᤗᤠᤈᤣ᤹ᤀᤥ ᤁᤧᤄᤧᤳᤇᤡᤱᤒᤠ ᤁᤧᤒᤣ᤺ᤰᤐᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤜᤡᤱᤏᤧᤴ॥ ᤂᤧᤴ ᤐᤰᤔᤧᤎᤩᤧ ᤔᤧᤕᤠ᤺ᤰᤋᤧᤒᤠᤜᤠ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤏᤢ᤺ᤱᤔᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤛᤠᤱ ᤜᤧᤰᤁᤣ ᤁᤧᤀᤡ᤺ᤵᤐᤠᤃ ᤛᤠ᤹ᤖᤡᤰ ᤛᤢ᤺ᤸᤗᤡᤰᤗᤰ ᤔᤧᤏᤢ᤺ᤱ ᤔᤧᤎᤠᤱ᤹॥” 15 ᤂᤧᤒᤩᤠᤱ ᤂᤧᤴ ᤕᤖᤡᤰ ᤛᤱᤈᤢᤶᤓᤥᤜᤠ᤹ᤀᤥ ᤁᤧᤈᤢᤶᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤖᤧ ᤛᤠᤶᤔᤠᤱᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤒᤠ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤈᤢᤶᤔᤥ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤔᤡᤛᤪ ᤗᤠᤈᤣ᤹ ᤏᤢ ᤗᤠᤱᤃᤧᤳ ᤐᤡᤛᤠᤱᤒᤠ ᤔᤡᤛᤪ ᤗᤠᤈᤣ᤹ ᤁᤧᤘᤠ᤹ᤒᤠ ᤕᤖᤡᤰ ᤀᤡᤛᤪᤠᤀᤡᤗᤡ ᤔᤏᤠᤛᤢᤶᤜᤠ᤹ ᤔᤧᤍᤩᤧᤀᤠᤱ ᤕᤷᤔᤡᤕᤠᤴ ᤔᤧᤔᤧᤳᤋᤢ. 16 “ᤕᤜᤘᤣ ᤍᤠᤱᤒᤠᤗᤠᤶ ᤁᤧᤒᤠ᤺ᤳᤋᤢᤒᤠ ᤁᤧᤀᤡᤱᤄᤱᤜᤠ᤹ ᤀᤠᤏᤡᤃᤣ ᤔᤧᤄᤧᤵᤛᤢᤶᤒᤧᤴ᤹᥄ 17 ᤀᤠᤏᤡᤃᤣ ᤆᤥ᤺ᤰᤔᤠ ᤛᤡᤖᤠ᤹ ᤁᤧᤎᤠᤱᤒᤠ ᤆᤩᤠᤛᤠᤱ ᤆᤥᤃᤢᤶᤒᤧ᤹॥ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤐᤠᤎᤧᤒᤠ. ᤜᤠᤱᤜᤠ᤹ ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤗᤠᤶᤗᤠᤶᤔᤥ ᤀᤠᤓᤧᤸᤗᤧᤛᤠᤱ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤘᤕᤧ. ᤂᤧᤴ ᤁᤢᤀᤡᤛᤡᤰ ᤀᤠᤏᤡᤃᤣ ᤛᤡᤖᤠ᤹ᤌᤠᤱᤎᤠᤱ ᤛᤠᤱᤃᤪᤠᤶᤐᤣᤍᤠᤱᤔᤠ ᤜᤠᤱᤔᤠᤀᤥ ᤛᤢᤰᤐᤠ ᤜᤠ᤺ᤴᤍᤢᤶᤒᤧ ᤜᤧᤰᤁᤩᤠᤱ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤜᤢᤰᤂᤢᤶᤒᤧ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤀᤠᤏᤡᤃᤣ ᤘᤧᤳᤋᤧᤛᤖᤧ ᤁᤢᤈᤠ ᤁᤳᤋᤢᤶᤒᤧ. ᤀᤠᤏᤡᤃᤣ ᤏᤢ᤹ᤔᤠ ᤋᤠᤔᤠ ᤐᤥ᤺ᤰᤂᤧᤀᤠᤱ ᤘᤕᤧ ᤜᤧᤰᤁᤩᤠᤱ ᤀᤠᤏᤡᤃᤣ ᤕᤧᤳᤋᤢᤰᤂᤣ ᤋᤢᤔᤢᤶᤒᤧᤒᤠ ᤜᤥ᤺ᤵᤋᤧ॥ 18 ᤁᤖ ᤛᤠᤱᤃᤪᤠᤶᤐᤣᤍᤠᤱᤔᤠ ᤜᤠᤱᤔᤠᤀᤥ ᤀᤠᤏᤡᤃᤣ ᤛᤢᤰᤐᤠ ᤜᤠ᤺ᤶᤔᤠ. ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤢ ᤛᤧᤘᤠ ᤔᤧᤵᤔᤠ ᤗᤧᤖᤢᤶᤒᤧᤀᤠᤱᤎᤥ ᤀᤠᤏᤡᤃᤣ ᤕᤶᤒᤠ ᤋᤢᤰᤂᤣᤗᤠᤰᤂᤣᤀᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ ᤂᤧᤒᤩᤠᤱ ᤋᤧᤴᤎᤱ ᤏᤢ ᤛᤠᤰᤘᤠ᤺ᤴᤗᤠᤶ ᤛᤩᤧ᤹ᤀᤡᤃᤧᤖ ᤘᤕᤡᤃᤧ॥” 19 ᤀᤠᤸᤗᤛᤠᤱ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤕᤥ᤹ᤖᤢᤖ ᤔᤧᤒᤠ᤺ᤳᤋᤢ᤹. “ᤀᤠᤏᤡᤃᤣ ᤕᤧᤶᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤏᤢ ᤔᤧᤶᤓᤠ᤹ᤀᤣ ᤛᤠᤱᤃᤪᤠᤶᤐᤣᤍᤠᤱᤔᤠ ᤜᤠᤱᤔᤠᤀᤥ ᤀᤠᤏᤡᤃᤣ ᤛᤢᤰᤐᤠ ᤜᤠ᤺ᤴᤍᤢᤶᤒᤧ ᤜᤧᤰᤁᤩᤠᤱ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤜᤢᤰᤂᤢᤶᤒᤧ. ᤂᤧᤒᤩᤠᤱ ᤂᤢᤏᤧ᤹ ᤁᤢᤀᤡᤳᤋᤥ ᤔᤠᤱᤛᤥ᤺ᤰ ᤆᤥᤃᤢᤶᤒᤧ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤀᤡ᤺ᤳᤋᤢᤒᤡ᥅ ᤛᤧᤰᤂᤠ᤺ᤸᤗᤧ ᤔᤣ᤺ᤴ᥄” 20 ᤂᤧᤒᤩᤠᤱ ᤕᤧᤶᤒᤡᤳᤇᤠ᤹ᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹ ᤁᤧᤖᤧᤰᤗᤧ ᤔᤧᤔᤧᤳᤋᤢᤒᤠ ᤁᤢᤀᤡᤛᤡᤰ ᤕᤷᤔᤡᤕᤠ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤔᤧᤳᤋᤢᤛᤡ. 21 “ᤂᤡᤏᤡ᤹. ᤂᤡᤏᤡ᤹ ᤌᤠ᤺ᤰᤜᤠ᤹ᤖᤧ. ᤂᤡᤏᤡ᤹ ᤜᤠᤱᤜᤠ᤹ ᤏᤢ ᤂᤡᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤏᤢ ᤕᤖᤢᤛᤗᤧᤔᤒᤠ ᤗᤠᤶᤗᤠᤶᤔᤥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤠᤘᤠᤀᤡᤳᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤒᤠᤴ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤘᤠ᤹ ᤔᤧᤄᤥᤛᤢᤴ ᤗ᤹ᤖᤡᤰ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤡ᥅ 22 ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤏᤠᤛᤡ ᤔᤧᤎ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤡᤏᤡ᤹ ᤗᤠᤈᤣᤴ ᤀᤠᤸᤗᤥ ᤔᤠᤱᤍᤣ ᤛᤠᤱᤃᤪᤠ ᤔᤧᤔᤧᤳᤋᤢᤒᤠ. ᤔᤏᤠ ᤔᤧᤴᤕᤢᤱᤔᤏᤠᤒᤠ ᤆᤡᤈᤡ ᤂᤰᤂᤰ ᤔᤢᤖᤧᤰ ᤂᤠᤖᤧᤰᤐᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤗᤠᤕᤥ ᤁᤧᤈᤥᤃᤢᤶᤒᤠ ᤏᤢ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤛᤢᤰᤐᤠ ᤁᤧᤜᤠ᤺ᤴᤍᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤁᤧᤖᤧᤰ ᤁᤡᤵᤔᤠ ᤁᤧᤄᤢᤒᤠ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤒᤠᤖᤥ॥ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠᤱᤜᤠ᤹. ᤁᤢᤎᤡᤶᤜᤠ᤹ ᤏᤢ ᤁᤢᤓᤠᤱᤜᤠ᤹ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤁᤧᤘᤕᤡ᤹॥” 24 ᤂᤧᤒᤩᤠᤱ ᤕᤷᤔᤡᤕᤠ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤏᤢ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤳᤋᤢᤛᤡ. “ᤔᤡᤛᤪ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤂᤡᤏᤡ᤹ ᤕᤜᤢᤍᤠᤒᤠ ᤕᤰᤕᤢᤱᤒᤠ ᤁᤧᤖᤧᤰᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥” 25 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. “ᤂᤡᤏᤡ᤹ ᤏᤢ ᤂᤡᤏᤡ᤹ ᤔᤣ᤺ᤳᤜᤠ᤹ᤖᤧ ᤁᤧᤒᤠ᤺ᤳᤋᤢᤶᤔᤠᤱ ᤘᤠ᤹. ‘ᤛᤠᤱᤃᤪᤠᤶᤐᤣᤍᤠᤱᤔᤠ ᤜᤠᤱᤔᤠᤀᤥ ᤛᤢᤰᤐᤠ ᤜᤠ᤺ᤶᤔᤠ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤜᤢᤱᤔᤠ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤔᤠᤱᤜᤢᤵᤐᤡᤴ ᤆᤥᤃᤢᤶᤒᤧ.’ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤴ ᤂᤡᤏᤡ᤹ ᤕᤠ᤺ᤶᤒᤰᤗᤠᤶ ᤀᤥᤛᤣ᤺ᤴᤎᤠᤱ ᤁᤧᤈᤥᤃᤢᤶ॥ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤂᤧᤴ ᤜᤠᤱᤔᤠᤀᤥ ᤁᤧᤈᤥᤃᤢᤶᤒᤠ ᤔᤠᤱᤜᤢᤵᤜᤠ᤹ ᤏᤢ ᤔᤠᤱᤜᤧᤰᤜᤠ᤹ ᤋᤃᤡ ᤆᤥᤃᤧᤶ ᤋᤣ᤹ᤖᤧᤶᤔᤧ᤹᥄ 26 “ᤁᤖ ᤀᤠᤸᤗᤥ ᤔᤡᤛᤪ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤕᤜᤢᤍᤡᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤂᤡᤏᤡ᤹ ᤁᤧᤖᤧᤰᤗᤧ ᤂᤧᤵᤛᤧᤶᤔᤧ᤹—ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤐᤕᤶ ᤕᤶᤒᤠ ᤀᤠᤔᤡᤱᤅᤥ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤠ᤹. ᤀᤠᤸᤗᤀᤠᤱᤎᤥ ᤔᤡᤛᤪ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤠᤳᤋᤡᤴ ᤕᤜᤢᤍᤡᤜᤠ᤹ᤖᤧᤀᤠᤱ ᤀᤠᤱᤃᤠ᤹ ᤀᤠᤔᤡᤱ ᤔᤧᤸᤗᤥ᤺ᤰᤂᤢᤴ᤹॥ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤁᤧᤶᤒᤠ᤺ᤳᤋᤢᤶᤔᤡᤴ᤹ ᤀᤡᤃᤪ ᤁᤴ ᤔᤠᤱᤜᤧᤰᤁᤡᤴ ᤀᤥᤃᤵ ᤁᤧᤴᤈᤥᤃᤢᤶᤔᤡᤴ. “ᤜᤡᤱᤔᤴᤍᤠᤱᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤂᤡ ᤕᤢᤰᤂᤢᤱ᤹॥” 27 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤥ ᤏᤢ᤹ᤔᤠ ᤋᤠᤔᤠ ᤔᤣ᤺ᤴ ᤁᤖ ᤔᤧᤰᤔᤠᤛᤡᤔᤧᤴ ᤋᤠ᤺ᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤀᤍᤰᤋᤰ ᤀᤥᤔᤧᤳᤏᤡᤱ᤹॥ ᤂᤡᤏᤡ᤹ ᤕᤜᤢᤍᤠᤗᤠᤶ ᤁᤧᤕᤢᤒᤠᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤜᤍ᤹ ᤔᤧᤴᤇᤡᤀᤣ ᤌᤠᤖᤡᤰ ᤌᤱᤅᤥ ᤏᤢ ᤛᤠᤰᤘᤠ᤺ᤴᤏᤥ ᤋᤢᤰᤂᤣ ᤁᤧᤈᤩᤧ᤹ᤀᤡ॥ 28 ᤆᤒᤧ᤺ᤳᤇᤡᤰᤗᤰ ᤛᤡᤔᤧᤴᤗᤠᤶᤒᤠ ᤁᤧᤍᤠᤅᤡᤀᤠᤱ ᤔᤡᤛᤪ ᤗᤠᤈᤣ᤹ᤗᤠᤶ ᤕᤜᤢᤍᤠᤀᤥ ᤁᤧᤏᤢ᤺ᤰᤂᤡ᤹॥ ᤂᤧᤒᤩᤠᤱ ᤂᤧᤴ ᤁᤧᤖᤧᤰ ᤔᤡᤛᤪ ᤗᤠᤈᤣ᤹ ᤁᤧᤕᤢᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤧᤴ ᤛᤧᤰᤂᤠᤒᤡ ᤀᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤧᤴ ᤛᤧᤰᤂᤠᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ᤹॥’ 29 “ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ‘ᤂᤡᤏᤡ᤹ ᤕᤱᤔᤠ ᤛᤧᤳᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ᤀᤥ ᤁᤧᤳ ᤜᤧᤰᤁᤩᤠᤱ ᤁ᤹ᤕᤥ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤆᤥᤃᤢᤱᤅᤠᤱ ᤀᤥᤛᤣ᤺ᤴᤎᤠᤰᤏᤡᤱ᤹॥’ 30 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤥ ᤜᤡᤛᤢᤱᤒᤠ ᤁᤢᤀᤡᤛᤡᤰ ᤔᤡᤛᤪᤒᤠ ᤑᤠᤖᤥ ᤜᤥᤐᤪᤠ᤺ᤴᤏᤠᤱ ᤂᤢᤏᤧ᤹ ᤛᤧᤵᤔᤠ ᤁᤧᤃᤥ᤺ᤵᤐᤠ ᤁᤢᤏᤡᤱᤔᤡᤜᤠ᤹ᤖᤧᤀᤣ ᤂᤢᤴᤇᤡ᤹ ᤜᤢᤰᤁᤥ ᤜᤡᤛᤢᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.