ᤕᤷᤔᤡᤕᤠ 43 - LIFOTNT

ᤕᤷᤔᤡᤕᤠᤴ ᤔᤡᤛᤪ ᤔᤧᤍᤣ᤹ᤖᤢ

¹ ᤀᤠᤸᤗ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤷᤔᤡᤕᤠᤴ ᤔᤧᤳᤋᤢᤒᤠ ᤁᤴ ᤀᤡᤱᤄᤱᤅᤡᤴ ᤔᤏᤠᤜᤠ᤹ ᤔᤧᤵᤔᤠ ᤛᤢᤖᤢᤛᤡ.

² ᤂᤧᤒᤩᤠᤱ ᤜᤥᤛᤕᤠᤜᤖᤧ ᤁᤢᤛ᤻ᤛᤠ ᤀᤈᤷᤕᤠᤜᤴ ᤏᤢ ᤁᤠᤖᤣᤜᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤜᤧᤰᤁᤩᤠᤱ ᤘᤣ᤹ ᤁᤧᤖᤧᤰ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧ ᤕᤷᤔᤡᤕᤠᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤡᤱᤗᤧᤰ ᤐᤠᤴ ᤁᤧᤒᤠ᤺ᤳᤋᤢᤖ ᤁᤧᤒᤳ᥄ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤛᤪ ᤗᤠᤈᤣ᤹ᤀᤥ ᤀᤠᤏᤡᤃᤣ ᤐᤣ᤺ᤰᤔᤠ ᤔᤧᤓᤠ᤺ᤰᤋᤡᤃᤧᤴᤒᤠ ᤜᤥᤵ᥄

³ ᤁᤖ ᤏᤣᤖᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤖᤢᤰᤁᤧᤸᤗᤧ ᤂᤧᤏᤧ᤹ ᤁᤴ ᤐᤠ᤺ᤵᤔᤠ ᤁᤧᤒᤠᤱᤄᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤏᤡᤃᤣ ᤁᤵᤔᤥᤀᤣ ᤕᤢᤅᤡᤃᤧᤀᤠᤱ ᤒᤣᤒᤡᤗᤥᤏᤒᤠᤜᤠ᤹ᤖᤧ ᤔᤧᤛᤩᤧᤖᤡᤃᤧᤖ ᤀᤡᤃᤪ ᤒᤣᤒᤡᤗᤥᤏᤀᤥ ᤀᤠᤶᤍᤧᤶ ᤀᤠᤶᤍᤣ᤹ᤖ ᤁᤧᤗ᤹ᤒᤠ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤢ᤹॥”

⁴ ᤁᤸᤗᤧᤆᤥᤃᤢᤸᤗᤧ ᤕᤥᤜᤠᤏᤠᤏᤧᤴ ᤏᤢ ᤘᤣ᤹ ᤗᤠᤶᤗᤥᤒᤠ ᤌᤰᤛᤢᤒᤠᤜᤠ᤹ᤖᤧ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤢᤍᤠ ᤗᤠᤈᤣ᤹ᤀᤥ ᤕᤢᤅᤧᤶᤔᤧ᤹ ᤁᤧᤗ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴ॥

⁵ ᤔᤧᤗᤧᤖᤢ ᤔᤧᤎᤒᤠ ᤏᤡ᤺ᤳᤋᤠᤱᤒᤠ ᤗᤠᤈᤣ᤹ᤜᤠ᤹ᤗᤠᤶ ᤁᤧᤄᤧᤳᤇᤡᤱᤒᤠᤀᤠᤱ ᤁᤧᤏᤢ᤺ᤱᤒᤠ ᤁᤧᤍᤠᤒᤠ ᤁᤧᤖᤧᤰ ᤕᤜᤢᤍᤠᤒᤠ ᤔᤏᤠᤜᤠ᤹ ᤕᤥᤜᤠᤏᤠᤏᤧᤴ ᤏᤢ ᤘᤣ᤹ ᤗᤠᤶᤗᤥᤒᤠᤜᤠ᤹ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤒᤣ॥

⁶ ᤂᤧᤴ ᤔᤏᤠ ᤛᤢᤶᤜᤠ᤹ᤀᤥ ᤜᤠᤱ ᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤛᤠᤐᤠᤏᤖᤧ ᤁᤢᤶᤔᤧᤴᤇᤠ᤹. ᤀᤜᤡᤁᤠᤔᤖᤧ ᤁᤢᤛ᤻ᤛᤠ ᤃᤍᤗᤩᤠᤜᤀᤥ ᤗᤧᤖᤢᤎᤛᤡᤒᤠ ᤕᤧᤶᤒᤡᤳᤇᤠᤜᤠ᤹. ᤔᤧᤴᤇᤢᤔᤠᤜᤠ᤹ ᤜᤧᤰᤁᤩᤠᤱ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤏᤢ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤔᤧᤘᤕᤧ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤴ ᤏᤢ ᤏᤣᤖᤡᤕᤠᤜᤖᤧ ᤁᤢᤛ᤻ᤛᤠ ᤒᤠᤖᤢᤰᤁᤧᤴᤏᤠᤱ ᤘᤕᤧᤳᤇᤡ॥

⁷ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ ᤔᤧᤒᤣ. ᤋᤜᤐᤏᤣᤛ ᤕᤧᤰᤕᤰ ᤌᤠᤖᤡᤰᤁᤣ ᤔᤧᤃᤧᤖᤧ॥

⁸ ᤂᤧᤒᤩᤠᤱ ᤋᤜᤐᤏᤣᤛ ᤕᤧᤰᤕᤰᤁᤥ ᤕᤜᤘᤣ ᤍᤠᤱᤒᤧᤸᤗᤧ ᤘᤣ᤹ ᤁᤢᤀᤡᤱᤄᤱᤎᤡᤰ ᤕᤷᤔᤡᤕᤠᤀᤥ ᤁᤧᤖᤧ॥ ᤂᤢᤏᤧ᤹ ᤐᤠ᤺ᤳᤋᤢ.

⁹ “ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤀᤥᤔᤧᤔᤧᤳᤋᤢᤀᤠᤱ ᤔᤧᤒᤳᤋᤡᤸᤗᤧ. ᤁᤢᤓᤠ ᤕᤶᤒᤕᤶᤒᤠ ᤗᤢᤱᤜᤠ᤹ ᤕᤠᤱᤛᤡᤱᤅᤧ᤹ ᤜᤧᤰᤁᤩᤠᤱ ᤁᤴ ᤋᤜᤐᤴᤜᤣᤛᤀᤥ ᤁᤧᤕᤢᤱᤒᤠ ᤜᤠᤱᤜᤡᤶᤔᤥ ᤗᤠ᤺ᤵᤔᤠ ᤗᤠᤶᤔᤥ ᤗᤢᤱ ᤔᤧᤓᤧᤛᤢᤀᤠᤱ ᤁᤧᤏᤧᤒᤠᤍᤧᤴᤏᤥ ᤂᤧᤴ ᤗᤢᤱᤜᤠ᤹ ᤗᤢᤵᤋᤧ᤹॥

¹⁰ ᤂᤧᤒᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤁᤴ ᤔᤡᤛᤪ ᤗᤠᤈᤣ᤹ᤀᤥ ᤛᤧᤰᤂᤠᤀᤣ ᤋᤠᤖᤢᤱ᤹॥ ᤀᤠᤱᤃᤠ᤹ ᤆᤡᤰᤂᤢᤱᤅᤠᤱ ᤁᤧᤏᤧᤒᤠ ᤁᤴ ᤗᤢᤱᤜᤠ᤹ ᤛᤶᤎᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤴ ᤕᤢᤰᤂᤢᤱ᤹॥ ᤂᤢᤏᤧ᤹ ᤂᤧᤸᤗᤧ ᤁᤢᤛᤶᤎᤠᤱ ᤁᤢᤜᤠᤱ ᤏᤠᤶᤎᤣ᤺ᤰᤔᤠᤴ ᤂᤡᤱᤄᤢ᤹॥

¹¹ ᤜᤧᤰᤁᤩᤠᤱ ᤂᤢᤏᤧ᤹ ᤑᤧᤴᤏᤠᤱ ᤔᤡᤛᤪ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤆᤥᤃᤢ᤹॥ ᤔᤡᤱᤍᤣ᤹ᤗᤠᤶ ᤀᤠᤳᤋᤡᤴ ᤛᤡᤔᤠ ᤁᤧᤒᤥᤱᤒᤠ ᤘᤠ᤹. ᤂᤧᤴ ᤔᤡᤱᤍᤣᤸᤗᤧ ᤛᤡ᤹᤺. ᤀᤠᤳᤋᤡᤴ ᤋᤧᤶᤔᤠ ᤋᤣ᤹ᤔᤠ ᤁᤧᤒᤥᤱᤒᤠ ᤘᤠ᤹. ᤂᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢ. ᤜᤧᤰᤁᤩᤠᤱ ᤌᤱᤅᤥ ᤀᤠᤳᤋᤡᤴ ᤛᤡᤔᤠ ᤁᤧᤒᤥᤱᤒᤠ ᤘᤠ᤹. ᤂᤧᤴ ᤌᤱᤅᤥ ᤛᤡ᤹᤺॥

¹² ᤂᤧᤸᤗᤧ ᤔᤡᤛᤪᤒᤠ ᤔᤠᤱᤛᤠᤶᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤜᤡᤶᤜᤠ᤹ᤀᤥ ᤑᤢᤳᤗᤢᤶ ᤔᤡ ᤕᤠᤰᤋᤢ ᤐᤡᤖᤢᤛᤡ. ᤂᤢᤏᤧ᤹ ᤔᤠᤱᤜᤡᤶᤜᤠ᤹ ᤔᤡᤎᤡᤰᤂᤢᤍᤣᤛᤢ᤹ ᤂᤧᤒᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤆᤡᤃᤰᤘᤠ ᤔᤧᤏᤠᤵᤋᤢᤛᤡᤒᤠ ᤜᤧᤰᤁᤣ ᤋᤣ᤹ᤖᤢᤛᤡᤀᤠᤱ ᤐᤣᤰ॥ ᤔᤧᤸᤗᤢᤰ ᤁᤶᤒᤠᤸᤗᤧ ᤁᤢᤈᤠᤱᤅᤥ ᤛᤡᤵᤋᤰᤐᤠᤜᤠ᤹ ᤘᤖᤧᤱᤗᤧᤱ ᤛᤣᤃᤢᤛᤡᤒᤠ ᤜᤧᤰᤁᤣ ᤂᤢᤏᤧ᤹ ᤔᤡᤛᤪ ᤗᤠᤈᤣᤴ ᤘᤖᤧᤱᤗᤧᤱ ᤆᤥᤃᤢ᤹॥ ᤜᤧᤰᤁᤩᤠᤱ ᤂᤧᤴ ᤗᤳᤇᤠᤀᤠᤱ ᤔᤧᤱᤃᤠ᤺ᤴᤏᤣ ᤏᤢ᤺ᤱ ᤐᤣ᤺ᤰᤗᤥ॥

¹³ ᤂᤢᤏᤧ᤹ ᤔᤡᤛᤪᤒᤠ ᤏᤠᤶ ᤔᤠᤱᤜᤡᤶᤔᤥ ᤁᤧᤕᤧᤵᤐᤠ ᤛᤣᤛᤣ ᤛᤡᤳᤗᤠᤱᤜᤠ᤹ ᤕ᤺ᤵᤛᤢ᤹. ᤜᤧᤰᤁᤩᤠᤱ ᤔᤡᤛᤪᤒᤠ ᤔᤠᤱᤛᤠᤶᤔᤠᤱᤜᤠ᤹ ᤔᤧᤕᤢᤱᤒᤠ ᤔᤠᤱᤜᤡᤶᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥’”