ᤕᤷᤔᤡᤕᤠ 42 - LIFOTNT

ᤕᤷᤔᤡᤕᤠᤴ ᤐᤣᤗᤡ ᤔᤧᤓᤠᤰᤋᤢ

¹ ᤂᤧᤒᤩᤠᤱ ᤁᤧᤖᤧᤰ ᤗᤠᤶᤗᤥᤒᤠ ᤌᤰᤛᤢᤒᤠᤜᤠ᤹. ᤁᤠᤖᤣᤜᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤏᤢ ᤜᤥᤛᤕᤠᤜᤖᤧ ᤁᤢᤛ᤻ᤛᤠ ᤕᤣᤈᤏᤩᤠᤜ. ᤜᤧᤰᤁᤩᤠᤱ ᤆᤢᤰᤐᤠᤀᤠᤱᤎᤥ ᤕᤶᤒᤠ ᤌᤠᤖᤡᤰᤐᤠ ᤁᤧᤖᤧᤰ ᤔᤏᤠᤜᤠ᤹

² ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤀᤥ ᤔᤧᤍᤩᤧ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤗᤠᤃᤡ ᤐᤣᤗᤡ ᤑᤠᤰᤋᤧ ᤀᤠᤒᤡᤖᤧ᤹ᤀᤥ॥ ᤂᤧᤏᤧ᤹ ᤁᤧᤏᤡᤛᤢᤖ ᤁᤧᤘᤠ᤹. ᤋᤃᤡ ᤀᤠᤏᤡᤃᤣ ᤕᤖᤡᤰ ᤘᤕᤡᤃᤧᤒᤠᤴ ᤀᤥᤔᤧᤵᤔᤠᤸᤗᤧ ᤀᤠᤸᤗᤥ ᤛᤠ᤹ᤖᤡᤰ ᤛᤢ᤺ᤸᤗᤡᤰᤗᤰ ᤏᤖᤡᤃᤧᤀᤠᤱ ᤘᤕᤡᤃᤧ॥

³ ᤀᤠᤏᤡᤃᤣ ᤀᤠᤳᤋᤡ ᤐᤣ᤺ᤰᤔᤠ ᤐᤥᤱ᤹ ᤜᤧᤰᤁᤩᤠᤱ ᤌᤣ ᤆᤥ᤺ᤰᤔᤠ ᤐᤥᤱ᤹. ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤀᤠᤏᤡᤃᤣ ᤀᤥᤛᤣ᤺ᤴᤎᤠᤰᤋᤡᤃᤧᤖ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤀᤠᤈᤥᤃᤧ ᤀᤠᤒᤡᤖᤧ᤹॥”

⁴ ᤕᤷᤔᤡᤕᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤥᤱ᤹. ᤀᤠᤱᤃᤠ᤹ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤱ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ᤹॥ ᤀᤠᤱᤃᤠ᤹ ᤌᤧᤔᤠ ᤐᤠ᤺ᤴᤏᤡᤴᤏᤠᤱ ᤂᤡᤏᤡ᤹ᤗᤠᤶᤒᤠ ᤔᤧᤈᤡᤱᤅᤠᤴ॥”

⁵ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤕᤷᤔᤡᤕᤠᤴ ᤔᤧᤔᤧᤳᤋᤢ. “ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤡᤃᤧᤒᤠ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤆᤥ᤺ᤰᤔᤠ ᤔᤧᤍᤧᤴᤍᤡᤃᤧᤴᤏᤧᤓᤃᤪ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤛᤧᤰᤂᤠ ᤏᤢ ᤏᤛᤠ᤺ᤴᤛᤠᤒᤠ ᤛᤠᤂᤡ ᤐᤥᤱᤗ॥

⁶ ᤀᤠᤏᤡᤃᤣ ᤛᤡᤖᤠ᤹ ᤌᤠᤱᤛᤠᤱ ᤀᤡᤃᤪ ᤛᤡᤖᤠ᤹ ᤔᤧᤎᤠᤱᤏᤧᤴᤇᤠᤱ. ᤀᤠᤏᤡᤃᤣ ᤐᤣᤗᤡ ᤑᤠᤰᤋᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤠᤱᤅᤠᤛᤡᤃᤧᤒᤠ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤱᤈᤠ᤺ᤱᤅᤡᤴ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧᤏᤧᤓᤃᤪ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤗᤠᤃᤡ ᤏᤢᤒᤠ ᤐᤥᤱ᤹॥”

⁷ ᤌᤡᤒᤥᤱ ᤕᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤷᤔᤡᤕᤠᤀᤥ ᤁᤧᤖᤧ.

⁸ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤠᤖᤣᤜ᤺ᤸᤗᤧ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤗᤠᤶᤗᤥᤒᤠ ᤌᤰᤛᤢᤒᤠᤜᤠ᤹ ᤂᤧᤒᤩᤠᤱ ᤆᤢᤰᤐᤠ ᤕᤶᤒᤠᤗᤠᤶ ᤁᤧᤖᤧᤰ ᤔᤏᤠᤜᤠ᤹ ᤀᤢ᤺ᤳᤋᤢᤛᤡ॥

⁹ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣᤗᤡ ᤋᤥ᤺ᤴᤍᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤒᤠᤱᤄᤡ. ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹—

¹⁰ ‘ᤂᤡᤏᤡ᤹ ᤜᤠᤒᤠ ᤁᤴ ᤗᤠᤈᤣ᤹ᤀᤥ ᤕᤢᤅᤧᤶᤔᤧ᤹॥ ᤂᤡᤏᤡ᤹ ᤁᤧᤕᤢᤅᤡᤏᤧᤓᤃᤪ. ᤀᤠᤱᤃᤠ᤹ ᤂᤡᤏᤡ᤹ ᤌᤥ ᤆᤥ᤺ᤰᤏᤡᤱ ᤁᤖ ᤔᤧᤕᤴᤏᤡᤱᤅᤡᤴ ᤔᤧᤍᤣᤏᤡᤱᤅᤡᤴ᤹. ᤀᤠᤱᤃᤠ᤹ ᤂᤡᤏᤡ᤹ ᤗᤣ᤺ᤳᤏᤡᤱ᤹ ᤁᤖ ᤜᤠ᤹ᤕᤠᤰ ᤔᤧᤀᤠ᤺ᤱᤏᤡᤱᤅᤡᤴ᤹॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤶᤎᤠᤱ ᤀᤠᤱᤃᤠ᤹ ᤋᤠᤖᤢᤱᤒᤠ ᤔᤧᤰᤔᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹॥’”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤒᤣᤒᤡᤗᤥᤏᤒᤠ ᤜᤠᤱᤅᤡᤴᤏᤢ ᤀᤠᤸᤗᤀᤠᤱᤎᤥ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤀᤠᤱ ᤂᤡᤏᤡ᤹ ᤛᤧ᤺ᤵᤏᤡᤱ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤢᤰᤛᤠᤶᤗᤠᤶ ᤂᤡᤏᤡ᤹ ᤋᤠᤱᤛᤧ᤺ᤵᤏᤡᤱ᤹॥

¹² ᤀᤠᤱᤃᤠ᤹ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤏᤡᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤏᤢ᤹ᤒᤠ ᤐᤥᤱᤗ ᤆᤥᤃᤢᤱ᤹.” ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤴ ᤗᤠᤈᤣ᤹ᤀᤥ ᤂᤢᤏᤧ᤹ ᤕᤢᤱᤔᤠ ᤁᤧᤓᤠ᤺ᤰᤋᤡ᤹॥

¹³ “ᤁᤖ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤴᤍᤧᤴᤍᤡᤴ. ᤜᤧᤰᤁᤩᤠᤱ ‘ᤀᤠᤏᤡᤃᤣ ᤁ᤹ᤕᤥ ᤔᤧᤕᤢᤅᤡᤃᤧᤴ.

¹⁴ ᤐᤖᤢᤔᤠᤸᤗᤧ ᤔᤡᤛᤪ ᤗᤠᤈᤣ᤹ ᤀᤠᤏᤡᤃᤣ ᤐᤣᤃᤡᤃᤧᤀᤠᤱ ᤕᤢᤅᤡᤃᤧᤖᤥ. ᤂᤧᤵᤔᤥ ᤌᤱ. ᤌᤱ ᤐᤥᤱᤔᤠ ᤀᤡᤰᤗᤠ ᤏᤢ ᤛᤡᤰᤗᤠ᤺ᤰᤔᤠᤗᤠᤶ ᤗᤠ᤺ᤳᤗᤠ᤺ᤳ ᤐᤥ᤺ᤰᤂᤡᤃᤧ.’ ᤁᤧᤗ᤹ᤖᤡᤏᤧᤓᤃᤪ.

¹⁵ ᤂᤧᤒᤩᤠᤱᤃ ᤕᤜᤢᤍᤠᤀᤥ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤔᤡᤛᤪ ᤗᤠᤈᤣ᤹ᤀᤥ ᤐᤣ᤺ᤰᤔᤠᤀᤠᤱ ᤂᤧᤵᤔᤥ ᤕᤢᤱᤔᤠ ᤂᤡᤏᤡ᤹ ᤏᤡᤱᤘᤠ᤹ ᤏᤡ᤺ᤴᤎᤥ ᤁᤧᤈᤥᤃᤢᤶᤔᤠᤱ ᤘᤠ᤹ᤏᤧᤓᤃᤪ.

¹⁶ ᤂᤡᤏᤡ᤹ ᤛᤠ᤹ᤖᤡᤰ ᤁᤧᤃᤡᤖᤢᤶᤒᤠ ᤌᤱ ᤏᤢ ᤛᤠᤰᤗᤠᤶᤒᤠ ᤗᤠ᤺ᤳᤗᤠᤳ ᤐᤥᤱᤔᤠ ᤁᤧᤴᤇᤢᤰᤋᤡᤴ᤹. ᤂᤧᤒᤩᤠᤱ ᤂᤡᤏᤡ᤹ ᤂᤧᤵᤔᤥᤀᤣ ᤁᤧᤛᤩᤧ᤹ᤀᤡ॥

¹⁷ ᤔᤡᤛᤪ ᤗᤠᤈᤣ᤹ᤀᤥᤀᤣ ᤐᤣ᤺ᤰᤔᤠᤀᤠᤱ ᤕᤢᤱᤔᤠ ᤜᤠᤍᤡᤱ ᤁᤧᤎᤰᤐᤠ ᤂᤡᤏᤡ᤹ ᤁᤧᤖᤧᤰ ᤜᤧᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤜᤠᤱᤄᤡᤖ ᤘᤠ᤹॥ ᤀᤥ᤺ᤰ. ᤌᤱ. ᤛᤠᤰᤘᤠᤴ ᤏᤢ ᤋᤢᤰᤔᤠ ᤗᤠ᤺ᤰᤔᤠᤗᤠᤶ ᤂᤡᤏᤡ᤹ ᤁᤧᤛᤩᤧᤀᤡ᤹॥ ᤀᤠᤱᤃᤠ᤹ ᤂᤧᤵᤔᤥ ᤋᤠᤖᤢᤱᤒᤠ ᤔᤧᤰᤔᤠ ᤛᤡᤔᤠᤗᤠᤶ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤀᤠᤱ ᤁᤧᤴᤍᤠᤅᤡᤴ᤹॥’”

¹⁸ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤧᤴ ᤏᤢ ᤛᤠ᤹ᤖᤡᤰ ᤀᤠᤕᤠ᤺ᤰᤗᤧ᤹ᤔᤠᤴ ᤕᤖᤢᤛᤗᤧ᤺ᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤩᤧᤀᤠᤱ ᤘᤕᤧ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤔᤡᤛᤪ ᤗᤠᤈᤣ᤹ᤀᤥ ᤁᤧᤗᤠᤛᤡᤸᤗᤧ ᤂᤧᤴ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤧᤴ ᤏᤢ ᤀᤠᤕᤠ᤺ᤰᤗᤧ᤹ᤔᤠᤴ ᤂᤡᤏᤡ᤹ ᤛᤶᤎᤠᤱ ᤌᤠᤖᤥ॥ ᤔᤧᤰᤔᤠᤛᤡᤔᤠ. ᤁᤡᤵᤔᤠᤃᤧᤄᤢᤒᤠ. ᤔᤠᤱᤍᤣ ᤛᤠᤱᤃᤪᤠ ᤏᤢ ᤆᤧᤰᤕᤠ ᤀᤡᤱᤍᤥ ᤐᤠ᤺ᤴᤏᤡᤸᤗᤧ ᤀᤠᤵᤋᤡᤰ ᤆᤠᤜᤠᤰ ᤁᤧᤒᤥ᤺ᤰᤂᤡ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣᤴ ᤂᤡᤏᤡ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤁᤧᤴᤏᤡᤛᤢᤶᤔᤡᤴ᤹॥’

¹⁹ “ᤕᤜᤢᤍᤠᤀᤥ ᤐᤰᤁᤧᤎᤠᤒᤠ ᤁᤧᤕᤠ᤺ᤰᤐᤠᤛᤣ. ᤂᤧᤵᤛᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤀᤰᤂᤣ ᤁᤧᤔᤧᤳᤋᤡᤀᤠᤱ ᤘᤠ᤹. ‘ᤔᤡᤛᤪ ᤗᤠᤈᤣ᤹ ᤔᤧᤒᤣᤃᤧᤶᤔᤡᤴᤏᤧ᤹᥄’ ᤀᤠᤱᤃᤠ᤹ ᤀᤠᤀᤡᤴ ᤂᤡᤏᤡ᤹ ᤛᤠᤶᤍᤡᤱ ᤐᤡᤏᤡᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹॥

²⁰ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤠᤵᤔᤡ ᤁᤧᤒᤠᤱᤄᤡᤸᤗᤧ ᤂᤡᤏᤡ᤹ ᤏᤛᤠ᤺ᤴᤛᤠᤒᤠ ᤁᤢᤍᤥ᤺ᤵᤔᤠ ᤁᤧᤶᤒᤥ᤺ᤰᤂᤡᤴ॥ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ. ‘ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤧᤔᤠ ᤐᤠ᤺ᤳᤋᤢ᤹ ᤀᤠᤔᤧᤳᤋᤧᤒᤠ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤴ ᤆᤥᤃᤢᤶᤒᤧᤖᤥ᥄’

²¹ ᤜᤧᤰᤁᤩᤠᤱ ᤀᤠᤀᤡᤴ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤖᤰ ᤔᤧᤳᤏᤡᤱᤅᤠᤱ ᤘᤠ᤹. ᤁᤖ ᤂᤡᤏᤡ᤹ ᤀᤢᤴᤇᤥᤴ ᤁᤧᤴᤀᤡ᤺ᤳᤋᤢᤶ ᤁᤧᤴᤏᤠ᤺ᤳᤋᤢᤶᤔᤡᤴᤏᤠᤱ ᤁᤧᤘᤕᤡᤒᤠᤏᤢ᤺ᤸᤗᤧ ᤏᤢᤖᤡᤰ ᤀᤠᤸᤗᤥ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴ᤹॥

²² ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤐᤣ᤺ᤰᤔᤠᤖᤧ ᤗᤠᤃᤡ ᤜᤠᤍᤡᤱ ᤁᤧᤎᤰᤋᤡᤒᤠ ᤔᤡᤛᤪ ᤗᤠᤈᤣ᤹ᤀᤥ ᤌᤱ. ᤛᤠᤰᤘᤠᤴ ᤏᤢ ᤔᤡᤱᤍᤣᤸᤗᤧ ᤜᤍ᤹ ᤁᤧᤛᤩᤧ᤹ᤀᤡᤒᤣ ᤐᤠ᤺ᤴᤏᤥ ᤏᤡᤱᤘᤠ᤹ ᤏᤡ᤺ᤴᤎᤥ ᤐᤥ᤺ᤰᤂᤧᤶᤔᤧ᤹ᤀᤥ॥”