ᤕᤷᤔᤡᤕᤠ 41 - LIFOTNT

ᤃᤍᤗᤩᤠᤜᤴ ᤔᤧᤛᤧᤖᤢ

¹ ᤁᤖ ᤏᤡᤛᤡᤃᤣᤰᤐᤠ ᤗᤠᤀᤥ ᤀᤣᤗᤡᤛᤠᤔᤠᤖᤧ ᤁᤢᤶᤔᤧᤴᤇᤠ᤹. ᤏᤋᤏᤩᤠᤜ᤺ᤸᤗᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤧᤴ. ᤂᤧᤴ ᤜᤠᤱᤛᤕᤱᤒᤠ ᤔᤏᤠ ᤏᤢ ᤜᤠᤱᤅᤡᤸᤗᤧ ᤋᤢᤶ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤗᤳᤇᤠ ᤘᤕᤧ. ᤂᤧᤸᤗᤧ ᤌᤡᤒᤥᤱ ᤔᤏᤠᤜᤠ᤹ ᤕᤠᤱᤛᤡᤱᤅᤠᤱ ᤃᤍᤗᤩᤠᤜ᤺ᤸᤗᤧ ᤁᤢᤍᤧᤶᤛᤧ ᤔᤡᤛ᤻ᤐᤠ ᤐᤣ॥ ᤂᤧᤱᤜᤠ᤹ ᤛᤥᤖᤡᤰ ᤆᤠᤈᤠᤏᤢ ᤔᤧᤕᤢᤅᤧᤸᤗᤧ

² ᤀᤡᤛ᤻ᤔᤠᤀᤣᤗᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤍᤠᤒᤠ ᤌᤡᤒᤥᤱ ᤔᤏᤠᤜᤠ᤹ᤖᤧ ᤌᤡᤰᤗᤧᤱᤗᤧ ᤋᤠᤓᤣᤴ ᤋᤖᤵ ᤔᤧᤓᤡ᤺ᤰᤂᤢᤀᤠᤱ ᤐᤡᤳᤆᤠᤰ ᤔᤧᤒᤡᤴᤍᤧ ᤜᤧᤰᤁᤩᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤜᤠᤱᤕᤢᤰᤐᤠ ᤆᤥᤃᤢᤒᤠ ᤃᤍᤗᤩᤠᤜᤴ ᤂᤧᤱᤜᤠ᤹ᤖᤧ ᤔᤧᤛᤧᤖᤢ॥

³ ᤀᤡᤛ᤻ᤔᤠᤀᤣᤗᤖᤧ ᤃᤍᤗᤩᤠᤜ᤺ᤴᤏᤢ ᤔᤡᤛ᤻ᤐᤠᤀᤥ ᤁᤧᤘᤠ᤹ᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤀᤠᤱ ᤛᤧᤖᤢᤛᤡ॥

⁴ ᤁᤢᤍᤠ᤺ᤴᤍᤡᤰᤔᤠ. ᤃᤍᤗᤩᤠᤜᤴ ᤔᤧᤛᤧᤖᤢᤒᤠ ᤐᤠ᤺ᤴᤏᤡᤴ ᤁᤢᤓᤠᤖᤧ ᤏᤡᤱᤘᤠ᤹ ᤂᤥᤔᤠᤏᤢ᤺ᤸᤗᤧ ᤋᤃᤡᤀᤣ.

⁵ ᤛᤁᤣᤔ. ᤛᤡᤗᤥ ᤏᤢ ᤛᤠᤔᤖᤡᤕᤠᤗᤠᤶᤒᤠ ᤕᤧᤵᤐᤥᤱ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤧᤎᤠᤅᤧᤖ ᤔᤧᤒᤳᤇᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤎᤥ᤹ᤜᤠ᤹ ᤔᤧᤏ᤺ᤰᤂᤢᤀᤠᤱ ᤐᤳᤇᤧ. ᤁᤧᤍᤧ᤺ᤱᤒᤠ ᤆᤠᤱ ᤔᤧᤈᤠᤰᤂᤢᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤰᤁᤥ ᤛᤠ᤹ᤖᤡᤰ ᤁᤠ᤺ᤴᤍᤧᤀᤠᤱ ᤐᤳᤇᤧ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤛᤢᤰᤐᤠᤜᤠ᤹ ᤔᤧᤍᤠᤖᤢᤀᤠᤱ ᤘᤕᤧ॥

⁶ ᤏᤋᤏᤩᤠᤜ᤺ᤸᤗᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤧᤴ ᤜᤠᤒᤧᤖ ᤔᤡᤛ᤻ᤐᤠᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤐᤣ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤁᤧᤖᤧᤀᤠᤱ ᤂᤧᤸᤗᤧ ᤔᤧᤳᤋᤢᤛᤡ. “ᤑᤧᤖᤧᤶᤔᤧ᤹ᤀᤠᤱ ᤃᤍᤗᤩᤠᤜᤴ ᤋᤢᤔᤧᤶᤔᤧ᤹᥄”

⁷ ᤁᤖ ᤂᤧᤱᤜᤠ᤹ ᤕᤧᤰᤕᤰᤁᤥ ᤔᤧᤗᤠᤛᤧᤏᤢᤔᤧ᤺ᤴᤏᤣ ᤀᤡᤛ᤻ᤔᤠᤀᤣᤗᤧᤴ ᤏᤢ ᤁᤢᤔᤏᤠᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤔᤧᤛᤧᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤆᤫᤠ᤺ᤳ ᤔᤧᤴᤕᤠᤰᤔᤏᤠᤒᤠ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤘᤠᤒᤠᤰᤁᤥ ᤗᤠᤵᤔᤧᤓᤢᤛᤢ ᤔᤧᤕᤠᤰᤋᤢᤛᤡ॥

⁸ ᤁᤖ ᤂᤧᤱᤜᤠ᤹ᤀᤥᤒᤠ ᤌᤡᤒᤥᤱ ᤔᤏᤠᤜᤠ᤹ᤖᤧ ᤀᤡᤛ᤻ᤔᤠᤀᤣᤗᤧᤴ ᤔᤧᤔᤧᤳᤋᤢ. “ᤀᤠᤏᤡᤃᤣ ᤕᤠᤵᤔᤡ ᤔᤧᤛᤧᤖᤧᤴᤏᤧ᤹᥄ ᤀᤠᤏᤡᤃᤣ ᤔᤠᤛᤡ. ᤜ᤺ᤰᤛᤡ. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤏᤢ ᤛᤰᤘᤠᤄᤢ ᤀᤡᤰᤋᤠᤵᤐᤥ ᤆᤡᤰᤂᤢᤶᤒᤧᤀᤠᤱ ᤘᤠ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤗᤧᤖᤢᤍᤣᤛᤢᤛᤡ ᤜᤧᤰᤁᤩᤠᤱ ᤘᤣ᤹ᤜᤠ᤹ᤏᤢ ᤂᤧᤱᤜᤠ᤹ ᤔᤧᤛᤧᤖᤢᤛᤡᤴ॥

⁹ ᤀᤡᤛ᤻ᤔᤠᤀᤣᤗᤖᤧ ᤛᤧᤖᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤃᤍᤗᤩᤠᤜᤖᤧ ᤁᤢᤎᤰᤁᤧᤴᤏᤢ ᤛᤥᤖᤡᤰ ᤆᤫᤠ᤺ᤳ ᤔᤧᤴᤕᤠᤰᤔᤏᤠᤒᤠ ᤆᤫᤠ᤺ᤳ ᤕᤠᤱᤄᤥ᤺ᤵᤔᤠ ᤘᤠᤒᤠᤰᤁᤥ ᤗᤠᤵᤑᤢᤛᤢ ᤕᤠᤰᤋᤢᤛᤡᤀᤠᤱ ᤔᤧᤕᤠᤃᤧ॥ ᤀᤠᤛᤠ ᤜᤠᤱᤅᤡᤸᤗᤧ ᤔᤡᤛ᤻ᤐᤠᤴ ᤜᤠᤱᤕᤰ ᤆᤥᤃᤢᤸᤗᤧ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠᤏᤗᤠᤶ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤂᤧᤴ ᤆᤫᤠ᤺ᤳ ᤔᤧᤴᤕᤠᤰᤔᤏᤠᤒᤠ ᤘᤠᤒᤠᤰᤁᤡᤴ ᤋᤔᤠ ᤐᤠᤱᤄᤢᤛᤡᤀᤠᤱ ᤏᤧᤛ᤻ᤛᤧ॥ ᤏᤋᤏᤩᤠᤜᤖᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤖᤧ ᤂᤧᤴ ᤆᤫᤠ᤺ᤳ ᤔᤧᤴᤕᤠᤰᤔᤏᤠᤒᤠ ᤘᤠᤒᤠᤰᤁᤡᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤎᤰᤜᤠ᤹ᤖᤧ ᤌᤡᤶᤛᤢ॥

¹⁰ ᤂᤧᤒᤩᤠᤱ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤃᤍᤗᤩᤠᤜᤴ ᤁᤶᤒᤪᤠᤱ ᤔᤧᤵᤔᤠ ᤐᤠᤱᤄᤢᤒᤠ ᤔᤡᤛ᤻ᤐᤠᤀᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹. ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ ᤀᤡᤛ᤻ᤔᤠᤀᤣᤗᤖᤧ ᤋᤧᤶᤛᤢ ᤋᤣ᤹ᤖᤢᤛᤡ॥ ᤀᤶᤔᤥᤏ ᤗᤠᤈᤣ᤹ ᤗᤧᤵᤔᤠᤱ ᤂᤢᤏᤧ᤹ ᤂᤧᤱᤜᤠ᤹ ᤏᤢ᤺ᤰᤔᤠ ᤋᤣ᤹ᤔᤠ ᤜᤣ᤺ᤰᤋᤢᤛᤡ॥

¹¹ ᤁᤖ ᤁᤠᤖᤣᤜᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤏᤢ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤌᤰᤛᤢᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤡᤛ᤻ᤔᤠᤀᤣᤗᤖᤧ ᤆᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤔᤧᤄᤧᤵᤛᤢᤀᤠᤱ.

¹² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤔᤏᤠᤜᤠ᤹ ᤔᤧᤍᤣ᤹ᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤠᤶᤄᤰᤔᤠᤖᤧ ᤗᤠᤃᤡ ᤔᤧᤎᤣ᤺ᤰᤋᤢ॥ ᤃᤡᤒᤥᤏᤒᤠ ᤕᤶᤒᤠ ᤘᤖᤰᤁᤡᤸᤗᤧ ᤁᤢᤒᤣᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢ॥

¹³ ᤀᤠᤸᤗ ᤀᤡᤛ᤻ᤔᤠᤀᤡᤗᤖᤧ ᤋᤧᤶᤛᤢ ᤋᤣ᤹ᤖᤢᤛᤡᤒᤠ ᤔᤏᤠᤜᤠ᤹ᤖᤧ ᤕᤥᤜᤠᤏᤠᤏᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤘᤣ᤹ ᤗᤠᤶᤗᤥᤒᤠ ᤌᤰᤛᤢᤒᤠᤜᤠ᤹ ᤔᤧᤏᤡᤛᤢᤛᤡᤀᤠᤱ ᤂᤧᤱᤜᤠ᤹ ᤔᤧᤛ᤺ᤳᤋᤧᤖ ᤔᤧᤀ᤺ᤰᤋᤧ॥

¹⁴ ᤜᤧᤰᤁᤩᤠᤱ ᤀᤡᤛ᤻ᤔᤠᤀᤣᤗᤖᤧ ᤔᤡᤛ᤻ᤐᤠᤗᤠᤶ ᤋᤧᤶᤛᤢ ᤋᤣ᤹ᤖᤢᤛᤡᤒᤠᤜᤠ᤹ ᤁᤧᤖᤧᤰ ᤔᤧᤄᤧᤳᤇᤡᤱ ᤂᤧᤒᤩᤠᤱ ᤕᤥᤜᤠᤏᤠᤏᤧᤴ ᤑᤠ᤹ᤔᤠ ᤔᤧᤜᤣ᤺ᤰᤋᤢ॥

¹⁵ ᤜᤠᤒᤠ ᤂᤧᤴ ᤕᤧᤶᤔᤥ. ᤀᤡᤛ᤻ᤔᤠᤀᤣᤗᤧᤴ ᤏᤢ ᤕᤧᤳᤇᤡ ᤁᤢᤔᤏᤠᤜᤠ᤹ ᤕᤥᤜᤠᤏᤠᤏᤧᤸᤗᤧ ᤁᤢᤜᤢᤰᤁᤥᤗᤠᤶᤒᤠ ᤔᤧᤓᤡ᤺ᤴᤇᤡᤱᤅᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤄᤧᤳᤇᤡᤱ ᤔᤧᤒᤣ॥

¹⁶ ᤂᤧᤒᤩᤠᤱ ᤃᤍᤗᤩᤠᤜᤴ ᤔᤧᤛᤧᤖᤢᤀᤠᤱ ᤀᤣᤃᤠᤱ ᤔᤡᤛ᤻ᤐᤠᤗᤠᤶ ᤀᤡᤛ᤻ᤔᤠᤀᤣᤗᤖᤧ ᤋᤧᤶᤛᤢ ᤋᤣ᤹ᤖᤢᤛᤡᤒᤠ ᤌᤰᤛᤢᤒᤠᤜᤠ᤹. ᤔᤧᤴᤇᤢᤔᤠᤜᤠ᤹. ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤏᤢ ᤂᤠᤛᤧᤴᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤁᤠᤖᤣᤜᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏᤧᤴ ᤏᤢ ᤘᤣ᤹ ᤗᤠᤶᤗᤥᤒᤠ ᤌᤰᤛᤢᤒᤠᤜᤠ᤹ᤖᤧ ᤃᤡᤒᤥᤏᤀᤥ ᤔᤧᤛᤧ᤺ᤵᤋᤢᤛᤡᤒᤠ ᤁᤧᤖᤧᤰ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤒᤣ॥

¹⁷ ᤂᤧᤱᤜᤠ᤹ ᤒᤣᤒᤡᤗᤥᤏᤗᤠᤶ ᤂᤧᤳᤇᤡᤱᤔᤠᤖᤧ ᤗᤠᤃᤡ ᤔᤡᤛᤪ ᤗᤠᤈᤣ᤹ ᤐᤣ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤒᤣᤌᤗᤧᤜᤧᤔᤀᤥᤒᤠ ᤃᤣᤖᤢᤌ-ᤁᤡᤶᤜᤠᤔᤀᤥ ᤕᤠᤱᤔᤧᤎᤥ᤺ᤰᤋᤧ॥

¹⁸ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤜᤠᤱᤕᤢᤰᤐᤠ ᤆᤥᤃᤢᤒᤠ ᤃᤍᤗᤩᤠᤜᤴ ᤀᤡᤛ᤻ᤔᤠᤀᤣᤗᤖᤧ ᤛᤧᤖᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤒᤣᤒᤡᤗᤥᤏᤡᤜᤠ᤹ᤖᤧ ᤔᤧᤄᤧᤵᤛᤢᤸᤗᤧ ᤂᤧᤱᤜᤠ᤹ᤖᤧ ᤌᤧᤔᤠ ᤔᤧᤈᤥᤃᤢ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤃᤡᤛᤧᤀᤠᤱ ᤔᤧᤘᤕᤧᤖᤥ॥